ပြည်ထောင်စုငြိမ်းချမ်းရေး ညီလာခံ၌ ဆွေးနွေးသော အချက်များတွင် ပြည်တွင်းငြိမ်းချမ်းရေးကို အာမခံချက် ပေးနိုင်သော အချက်အလက်များ အလုံအလောက် မရှိသေးကြောင်း UPDJC ဒုတိယဥက္ကဋ္ဌပြောကြား

ပြည်ထောင်စုငြိမ်းချမ်းရေး ညီလာခံ၌ ဆွေးနွေးသော အချက်များတွင် ပြည်တွင်းငြိမ်းချမ်းရေးကို အာမခံချက် ပေးနိုင်သော အချက်အလက်များ အလုံအလောက် မရှိသေးကြောင်း UPDJC ဒုတိယဥက္ကဋ္ဌပြောကြား
Published 16 July 2018

ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) ၏ ၁၇ ကြိမ်မြောက် အစည်းအဝေးကို နေပြည်တော်တွင် ဇူလိုင် ၁၅ ရက် မွန်းလွဲပိုင်းက ကျင်းပစဉ်

ပြည်ထောင်စုငြိမ်းချမ်းရေး ညီလာခံ - ၂၁ ရာစုပင်လုံ တတိယအစည်းအဝေး၌  ဆွေးနွေးသော အချက်များတွင်  ပြည်တွင်းငြိမ်းချမ်းရေးကို အာမခံချက်ပေးနိုင်သော အချက်အလက်များ အလုံအလောက် မရှိသေးကြောင်း ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) ဒုတိယဥက္ကဋ္ဌ ဒေါက်တာဆလိုင်းလျန်မှုန်းက ဇူလိုင် ၁၅ ရက်တွင်  ပြောကြားသည်။

၁၇ ကြိမ်မြောက် UPDJC မပြုလုပ်မီ  ၂၁ ရာစုပင်လုံ တတိယ အစည်းအဝေး အခြေအနေနှင့် ပတ်သက်၍ မီဒီယာများ၏ မေးမြန်းမှုအပေါ် ဒေါက်တာဆလိုင်းလျန်မှုန်းဆာခေါင်းက ထိုသို့ပြန်လည် ဖြေကြားသည်။

ဇူလိုင် ၁၁ ရက်မှ စတင်ပြုလုပ်နေသည့်  ၂၁ ရာစုပင်လုံ တတိယအစည်းအဝေးတွင် နိုင်ငံရေး၊ စီးပွားရေး၊ လူမှုရေးနှင့် မြေယာနှင့် သဘာဝပတ်ဝန်းကျင် ကဏ္ဍတို့မှ အချက် ၁၄ ချက်ကို ဆွေးနွေးလျက်ရှိသည့် ညီလာခံ နောက်ဆုံးနေ့တွင် ပြည်ထောင်စု သဘောတူစာချုပ် အစိတ်အပိုင်း (၂) အဖြစ် ချုပ်ဆိုမည်ဖြစ်သည်။

“ဒီ ၁၄ ချက်ကို ကြည့်မယ်ဆိုရင် NCA စာချုပ်မှာ ပါတဲ့အတိုင်း ဒီမိုကရေစီနဲ့ ဖက်ဒရယ်စနစ်ကို အခြေခံသော ပြည်ထောင်စုကြီး တည်ဆောက်ရမယ်လို့ ကျွန်တော်တို့က သဘောတူထားတယ်။ ဒီ ၁၄ ချက်ကိုပဲ အခြေခံပြီးတော့ လုပ်မယ်ဆိုရင် ဒီမိုကရေစီနဲ့ ဖက်ဒရယ်စနစ်ကို အခြေခံသော ပြည်ထောင်စု တည်ဆောက်ရေးအတွက် အားရကျေနပ်ဖွယ် မကောင်းသေးဘူးဆိုတာ ကျွန်တော် ရိုးသားစွာပဲ ဝန်ခံလိုက်တယ်။ ဒုတိယအနေနဲ့ ဒီညီလာခံတွေ ကျင်းပပြီးတော့ ငြိမ်းချမ်းရေး ဆွေးနွေးပွဲကို ကျွန်တော်တို့ လုပ်နေတာဟာ နှစ် ၇၀ ကြာပြီဖြစ်တဲ့ ပြည်တွင်းစစ်ကို ချုပ်ငြိမ်းစေဖို့ ဖြစ်ပါတယ်။ အခုရလာတဲ့ အချက်အလက်တွေက ပြည်တွင်းငြိမ်းချမ်းရေးကို အာမခံချက်ပေးနိုင်တဲ့ အချက်အလက်တွေ အလုံအလောက် မရှိသေးဘူးဆိုတာ ကျွန်တော် ဝန်ခံချင်ပါတယ်” ဟု ဒေါက်တာဆလိုင်းလျန်မှုန်းဆာခေါင်းက ပြောကြားသည်။

NCA စာချုပ်အရ ရေးဆွဲထားသည့် နိုင်ငံရေးဆွေးနွေးမှုဆိုင်ရာ မူဘောင်အရ ပြည်ထောင်စုငြိမ်းချမ်းရေး ညီလာခံ-၂၁ ရာစုပင်လုံ အစည်းအဝေးများကို တစ်နှစ်လျှင် နှစ်ကြိမ် ကျင်းပရမည် ဖြစ်သော်လည်း ၂၀၁၇ ခုနှစ်အတွက် တစ်ကြိမ်သာ ကျင်းပခဲ့သည့်အတွက် ယခုအချိန်မှ ပြန်လည်ကျင်းပရခြင်းဖြစ်သည်။

“ဒီညီလာခံမှာ ကျွန်တော်တို့အားလုံး အလုံအလောက် မရသော်လည်းပဲ ကျွန်တော်တို့ အဖွင့်ပွဲမှာ နိုင်ငံတော်ရဲ့ အတိုင်ပင်ခံပုဂ္ဂိုလ် ကလည်းပဲ ၂၀၁၉ မတိုင်ခင်မှာ ညီလာခံသုံးခါ ကျင်းပမယ်လို့ ပြောတယ်။ တပ်ချုပ်ကြီးက လည်း ၂၀၂၀ မှာ ဒီငြိမ်းချမ်းရေး ဖြစ်စဉ်ကို အပြီးအစီး ဆောင်ရွက်နိုင်အောင် ကြိုးစားမယ်လို့ ပြောတဲ့အတွက်  ဒီကာလအတွင်းမှာ ကျွန်တော်တို့ လိုချင်တာရအောင် လုပ်နိုင်မယ်လို့ ကျွန်တော် မျှော်လင့်ပါတယ်” ဟု ဒေါက်တာဆလိုင်းလျန်မှုန်းဆာခေါင်းက ပြောကြားသည်။

တိုင်းရင်းသား လက်နက်ကိုင် အဖွဲ့အစည်းများက ဒီမိုကရေစီနှင့် ဖက်ဒရယ်စနစ်ကို အခြေခံသော ပြည်ထောင်စု တည်ဆောက်ရေးအတွက် အခြေခံရမည့်မူများနှင့် အဓိက အရေးကြီးသည့်မူများကို အစိုးရနှင့် တပ်မတော်သို့ တင်ပြပြီးဖြစ်ကြောင်း ဒေါက်တာဆလိုင်းလျန်မှုန်းဆာခေါင်းက ဆိုသည်။

ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ (UPDJC ) ၏ ၁၇ ကြိမ်မြောက် အစည်းအဝေးကို နေပြည်တော်တွင် ဇူလိုင် ၁၅ ရက် မွန်းလွဲပိုင်းက ကျင်းပစဉ်

“ဘာဖြစ်လို့ မျှော်လင့်သလဲဆိုတော့ ကျွန်တော်တို့ တိုင်းရင်းသား လက်နက်ကိုင် တော်လှန်ရေး အဖွဲ့အစည်း ကနေပြီးတော့ ဒီမိုကရေစီနဲ့ ဖက်ဒရယ်စနစ်ကို အခြေခံသော ပြည်ထောင်စု တည်ဆောက်ရေးအတွက် အခြေခံရမယ့် မူအများစုကို သော်လည်းကောင်း၊ အဓိကအရေးကြီးတဲ့မူ အားလုံးကို အဲဒီလိုပြောလို့ရတယ်။ ကျွန်တော်တို့ တင်ပြပြီးပြီ။ ပြီးတော့ နှစ် ၇၀ ကြာပြီဖြစ်တဲ့ ပြည်တွင်းငြိမ်းချမ်းရေး၊ ပြည်တွင်းစစ် ချုပ်ငြိမ်းရေးအတွက် လိုအပ်တဲ့ အခြေခံမူအားလုံးကို ကျွန်တော်တို့ တင်ပြပြီးပြီ။ ကျွန်တော်တို့နှစ်ပေါင်း ၇၀ ကြာမြင့်ပြီဖြစ်တဲ့ ပြည်တွင်းစစ်ကာလမှာ ကျွန်တော်တို့ တောင်းဆိုတဲ့ တောင်းဆိုချက်က ဒီမိုကရေစီရေး၊ အမျိုးသား တန်းတူရေးနဲ့ ကိုယ်ပိုင်ပြဋ္ဌာန်းခွင့် အခွင့်အရေးများ အပြည့်အ၀ အာမခံချက်ရှိသော ပြည်ထောင်စု တည်ဆောက်ရေး ဖြစ်ပါတယ်” ဟု ဒေါက်တာဆလိုင်းလျန်မှုန်းဆာခေါင်းက ပြောကြားသည်။

မိမိတို့တောင်းဆိုသည့် အချက်များမှာလည်း NCA စာချုပ်တွင် ပါရှိပြီးဖြစ်ကြောင်း ဒေါက်တာဆလိုင်းလျန်မှုန်းဆာခေါင်းက ဆိုသည်။

“အဲဒါကို NCA မှာလည်း ပါပြီးသားဖြစ်တယ်။ ဆိုတော့ ဒါတွေကို ကျွန်တော်တို့အားလုံးကနေ ကြိုးစားပမ်းစားနဲ့ ဆောင်ရွက်ပေးမယ်ဆိုရင် အမှန်စင်စစ်က တစ်ပွဲနဲ့တောင် ပြီးနိုင်တဲ့ကိစ္စ ဖြစ်ပါတယ်။ ကျွန်တော်တို့ အားလုံး တင်ပြပြီးပြီ။ အဲဒီတင်ပြချက်ပေါ်မှာ အစိုးရနဲ့ တပ်မတော်ကနေ  ပူးပေါင်းပြီးတော့ ကျွန်တော်တို့ ထုတ်ပြန်ချက်အပေါ်မှာ ကဲဒါလေးတော့ ရနိုင်တယ်။ ဒါလေးတော့ မရနိုင်သေးဘူး။ နောက်ဆွေးနွေးမယ်ဆိုတဲ့ ပုံစံမျိုးနဲ့ အပြုသဘောဆောင်ပြီးတော့ ကျွန်တော်တို့ ဆွေးနွေးနိုင်မယ်ဆိုရင် အင်မတန်မှ ကောင်းပါတယ်” ဟု ဒေါက်တာဆလိုင်းလျန်မှုန်းဆာခေါင်းက ရှင်းပြသည်။

နှစ်ပေါင်း ၇၀ အတွင်း ယခုကျင်းပနေသည့် နိုင်ငံရေးဆွေးနွေးပွဲလို မရှိဖူးခဲ့ကြောင်း၊ ညီလာခံတွင် ဆွေးနွေးသည့် အချက်များကို အားရစရာ မရှိသော်လည်း ညီလာခံသည် ငြိမ်းချမ်းရေးဖြစ်စဉ် ရှေ့ဆက်နိုင်ရန် အတွက်နှင့် ငြိမ်းချမ်းရေးဖြစ်စဉ်ကို ထိန်းသိမ်းပေးမည့် ညီလာခံဖြစ်သည့်အတွက် အကျိုးရှိကြောင်း ဒေါက်တာဆလိုင်းလျန်မှုန်းဆာခေါင်းက ရှင်းပြသည်။

 

Most Read

Most Recent