ရှမ်းပါတီနှစ်ခု ပေါင်းစည်းရေး ကိစ္စနှင့်ပတ်သက်၍ မည်ကဲ့သို့ သဘောထားရှိကြောင်း ကျားခေါင်းပါတီထံ ကျားဖြူပါတီ စာဖြင့်မေးမြန်း

ရှမ်းပါတီနှစ်ခု ပေါင်းစည်းရေး ကိစ္စနှင့်ပတ်သက်၍ မည်ကဲ့သို့ သဘောထားရှိကြောင်း ကျားခေါင်းပါတီထံ ကျားဖြူပါတီ စာဖြင့်မေးမြန်း
Published 25 May 2018

ရှမ်းပါတီနှစ်ခု ပေါင်းစည်းရေးကိစ္စနှင့် ပတ်သက်၍ မည်ကဲ့သို့သဘောထားရှိကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီ (SNLD-ကျားခေါင်းပါတီ) ထံ ရှမ်းတိုင်းရင်းသားများ ဒီမိုကရက်တစ်ပါတီ (SNDP-ကျားဖြူပါတီ) က မေ ၂၃ ရက်တွင် စာပေးပို့မေးမြန်းထားကြောင်း သတင်းရရှိသည်။

SNLD ပါတီသို့ ပေးပို့သောစာတွင် ကျားဖြူပါတီ (SNDP) ၏ အနာဂတ်နိုင်ငံရေးမျှော်မှန်းချက်နှင့် ၎င်းတို့၏မူဝါဒများအား ရှမ်းပြည်ညီညွတ်ရေးကော်မတီ (CSSU) ၂၀၁၇-၂၀၁၈ အလှည့်ကျသဘာပတိသို့ တင်ပြထားပြီးဖြစ်ကြောင်း၊ CSSU သဘာပတိသို့ တင်ပြထားသည်မှာ SNDP ပါတီ၏ ၁၄ ကြိမ်မြောက် ဗဟိုအလုပ်အမှုဆောင်ကော်မတီ အစည်းအဝေးဆုံးဖြတ်ချက်အရ ရှမ်းတိုင်းရင်းသား ရဟန်းရှင်လူ၊ ပြည်သူများ၏ သဘောဆန္ဒများကို လေးစားသောအားဖြင့် SNDP နှင့် SNLD ပါတီနှစ်ခု ပေါင်းစည်းရေးကို ဆောင်ရွက်သွားရန် သဘောတူညီမှုရရှိခဲ့ကြောင်း၊ ပါတီနှစ်ခု ပူးပေါင်းရေးကိစ္စအား အခြေအနေအရပ်ရပ်ကြောင့်သော်လည်းကောင်း (သို့မဟုတ်) အကြောင်းအမျိုးမျိုးကြောင့်သော်လည်းကောင်း အကော်အထည်ဖော် ဆောင်ရွက်နိုင်ခြင်းမရှိသေးပါက လာမည့် ၂၀၂၀ အထွေထွေရွေးကောက်ပွဲတွင် ရှမ်းပါတီကြီးနှစ်ခုအနေဖြင့် မဲဆန္ဒနယ်မြေခွဲခြား၍ ရွေးကောက်ပွဲဝင်ကြရန် (သို့မဟုတ်) မြို့နယ်ခွဲခြား၍ ရွေးကောက်ပွဲဝင်ကြရန်နှင့် ပူးပေါင်းရေးအောင်မြင်ပါက ရှမ်းပါတီတစ်ခုတည်းအမည်ဖြင့် ရွေးကောက်ပွဲဝင်ကြရန်ဟူ၍ အဆိုပြုတင်ပြခဲ့ကြောင်း ဖော်ပြထားသည်။

ယင်းကဲ့သို့ SNDP ပါတီမှ CSSU သဘာပတိထံတင်ပြချက်များသည် ရေတိုနိုင်ငံရေးအခွင့်အလမ်းအတွက် မျှော်မှန်းအဆိုပြုခြင်းမဟုတ်ဘဲ အနာဂတ်နိုင်ငံရေးကဏ္ဍတွင် ရှမ်းတိုင်းရင်းသားများ၏ စုစည်းခိုင်မာသောအင်အားဖြင့် အမျိုးသားနိုင်ငံရေး အကျိုးစီးပွားကို ဖော်ဆောင်နိုင်ရန် ဦးတည်ရည်မှန်း အဆိုပြုတင်ပြခြင်းဖြစ်သော်လည်း ယင်းတင်ပြချက်များကို CSSU ၏ (၂၀၁၇-၂၀၁၈) အလှည့်ကျသဘာပတိမှ သက်ဆိုင်ရာပါတီများအား အစည်းအဝေးခေါ်ယူ ဆွေးနွေးဆုံးဖြတ်ပေးထားခြင်း မရှိသေးကြောင်း၊ ထို့အတွက် SNLD အနေဖြင့် SNDP ၏ အပြုသဘောဆောင်သည့် အဆိုပြုချက်များအပေါ် မည်ကဲ့သို့ သဘောထားရှိကြောင်း တရားဝင်အကြောင်းပြန်ပေးရန် တင်ပြသည်ဟု SNLD ကို ပေးပို့သောစာတွင် ထည့်သွင်းဖော်ပြထားသည်။

SNDP ပါတီတွဲဖက်အတွင်းရေးမှူး (၁) ဦးစိုင်းအောင်မြင့်ခိုင်က “ကျွန်တော်တို့ ပြည်သူတွေနဲ့ ရဟန်းပြည်သူတွေရဲ့ တောင်းဆိုချက်အရ ရှမ်းပါတီနှစ်ပါတီ ပေါင်းစည်းဖို့ ဆန္ဒရှိကြတဲ့အတွက်ကြောင့် ကျွန်တော်တို့ ပါတီတွေအနေနဲ့ ပေါင်းလို့ရရင်လည်းပေါင်းမယ်။ ပေါင်းလို့မရရင်လည်း ဘယ်လိုရှေ့ဆက်ပြီးတော့ စခန်းသွားကြမလဲဆိုတာ ဆွေးနွေးရဦးမှာပါ။ ကျွန်တော်တို့ကတော့ ရဟန်းရှင်လူရဲ့ သဘောထားအတိုင်း ဆောင်ရွက်တာပါ” ဟုပြောကြားသည်။

SNDP ပါတီမှ ပေးပို့သောစာသည် ရှမ်းနှစ်ပါတီ ပေါင်းစည်းရေးအတွက် တိုက်ရိုက်ဦးတည် ပြောကြားခြင်းမဟုတ်သောကြောင့် အဆိုပါကိစ္စအပေါ် တစ်စုံတစ်ရာ တုံ့ပြန်သွားရန် အဆင်သင့်မဖြစ်သေးကြောင်း SNLD ပါတီ၏ တွဲဖက်အတွင်းရေးမှူး (၁) ဦးစိုင်းလိတ်က ပြောကြားသည်။

ဦးစိုင်းလိတ်က “ကျွန်တော်တို့ဆီပို့ထားတဲ့စာကို ဖတ်ကြည့်တော့ ကျွန်တော်တို့ဆီကို တိုက်ရိုက်ပေးပို့တယ်ဆိုတာထက် CSSU ဥက္ကဋ္ဌ ဒါမှမဟုတ် သဘာပတိပေါ့။ အဲဒီသဘာပတိကြီးဆီကို ရေးပြီးတော့မှ သဘာပတိက အကြောင်းမပြန်တဲ့ကိစ္စကို ကျွန်တော်တို့ဆီကို လှမ်းတိုင်တဲ့ပုံစံမျိုးဖြစ်နေပါတယ်။ ကျွန်တော်တို့ပါတီကို တိုက်ရိုက်ဒီလိုမျိုးပေါင်းဖို့ပြုဖို့ ပြောတာမဟုတ်တဲ့အတွက်ကြောင့် ကျွန်တော်တို့ဘက်က တစ်စုံတစ်ရာ ပြန်ပြီးတော့ တုံ့ပြန်ဖို့ကတော့ အဆင့်သင့်မဖြစ်သေးပါဘူး။ ကျွန်တော်တို့ဆီကို တိုက်ရိုက်ပေးပို့တာဆိုရင်တော့ တစ်မျိုးပေါ့။ စာအသွားအလာအရ ဒီအပေါ်မှာ စဉ်းစားရကျပ်နေပါတယ်။ အရင်ကတည်းက ပြောတာကလည်း ကျွန်တော်တို့ဆီကို တိုက်ရိုက်ပြောတာ တစ်ခုမှမရှိဘူး။ အွန်လိုင်းပေါ်တင်လိုက်နဲ့ ပြောတာပဲရှိတယ်။ ကျွန်တော်တို့ဆီကို တိုက်ရိုက်ညှိနှိုင်းတာမျိုးလည်း မရှိသေးပါဘူး။ ပေါင်းစည်းရေးနဲ့ ပတ်သက်လို့ကတော့ ကျွန်တော်တို့က လူထုရဲ့ဆန္ဒကို အဓိကထားပါတယ်။ တစ်ချိန်တည်းမှာပဲ ဒီမိုကရေစီအခွင့်အရေးတွေကို အလေးအနက်ထားပါတယ်။ ဒီမိုကရေစီ စံချိန်စံညွှန်းနဲ့ကိုက်ညီတဲ့ ပူးပေါင်းဆောင်ရွက်မှု လုပ်ငန်းမျိုးကိုတော့ အားလုံးကြိုဆိုပါတယ်။ ဒါပေမဲ့ သံဃာထုရဲ့တောင်းဆိုမှု၊ လူထုရဲ့တောင်းဆိုမှုဆိုတဲ့အပေါ်မှာ ဘယ်အရပ်၊ ဘယ်ဒေသက သံဃာတော်တွေက တောင်းဆိုတာလဲဆိုတာတော့ အများကြီးသုတေသနလုပ်ဖို့ လိုအပ်ပါသေးတယ်” ဟုပြောကြားသည်။

SNLD ပါတီသည် ၁၉၈၈ တွင် စတင်တည်ထောင်ခဲ့သည့်ပါတီဖြစ်ပြီး ၂၀၁၀ ရွေးကောက်ပွဲကာလက ပါတီခေါင်းဆောင်အချို့ ဖမ်းဆီးထိန်းသိမ်းခံထားရသောကြောင့် ပါတီအား ပြန်လည်မှတ်ပုံတင်ခြင်းမရှိဘဲ ရွေးကောက်ပွဲအား ဝင်ရောက်ယှဉ်ပြိုင်ခြင်းမရှိခဲ့သော်လည်း SNDP ပါတီသည် ၂၀၁၀ ရွေးကောက်ပွဲတွင် ပေါ်ပေါက်လာပြီးနောက် ၂၀၁၀ ရွေးကောက်ပွဲတွင် ရှမ်းပြည်နယ်ရှိ မဲဆန္ဒနယ်နေရာအများအပြားတွင် အနိုင်ရရှိခဲ့သည်။ ထို့နောက် SNLD ပါတီသည် ၂၀၁၂ ခုနှစ်တွင်ပြန်လည်၍ ပါတီမှတ်ပုံတင်ခဲ့ပြီး SNDP ပါတီမှ လွှတ်တော်ကိုယ်စားလှယ်အချို့နှင့် ပါတီဝင်အချို့သည် SNLD သို့ပါတီ ပြောင်းဝင်မှုများရှိခဲ့ကာ ၂၀၁၅ အထွေထွေရွေးကောက်ပွဲတွင် SNLD ပါတီသည် လွှတ်တော်ကိုယ်စားလှယ်နေရာ ၄၀ အနိုင်ရရှိခဲ့ပြီး SNDP ပါတီသည် လွှတ်တော်ကိုယ်စားလှယ်နေရာ တစ်နေရာသာ ရရှိထားသည်။