၂၀၁၈ ခုနှစ် ဧပြီမှ မေ ၁၀ ရက်အထိ ပြည်သူများက တိုင်ကြားသည့် တိုင်ကြားစာ ၉၀၀ ကျော်တွင် မြေယာသိမ်းဆည်းမှု၊ တရားရေးနှင့် သက်ဆိုင်သည့် တိုင်ကြားစာအများဆုံး ရောက်ရှိကြောင်း အမျိုးသားလွှတ်တော် ပြည်သူတို့၏ တိုင်ကြားစာဆိုင်ရာ ကော်မတီဥက္ကဋ္ဌ ဦးဆန်းမြင့်က The Daily Eleven သတင်းစာသို့ မေ ၁၀ ရက်က ပြောကြားသည်။
“လွှတ်တော်ရပ်နားထားတဲ့ ဧပြီကနေ ယနေ့အထိ တိုင်ကြားစာစောင်ရေ ၉၀၀ ကျော်လောက် ရောက်လာတယ်။ အဲဒီအထဲမှာ မြေယာသိမ်းဆည်းမှုနဲ့ပတ်သက်တာက အများဆုံးတိုင်ကြားထားတာကို တွေ့ရတယ်။ ဒုတိယအများဆုံးကတော့ တရားရေးနဲ့ပတ်သက်တဲ့ တိုင်ကြားစာတွေပဲ။ တချို့တိုင်ကြားစာတွေ ကျတော့လည်း လုပ်ထုံးလုပ်နည်းတွေနဲ့ မညီတဲ့အတွက် ဆောင်ရွက်ရန်မလိုဘူးဆိုပြီး သတ်မှတ်လိုက်ရတဲ့ တိုင်စာတွေလည်းရှိတယ်” ဟု ဦးဆန်းမြင့်က ပြောကြားသည်။
အမျိုးသားလွှတ်တော် အစည်းအဝေးများ ရပ်နားထားသည့် ဧပြီမှ မေ ပထမပတ်အတွင်း ကော်မတီသို့ရောက်ရှိလာသည့် တိုင်ကြားစာ ၉၀၀ ကျော်တွင် မြေယာနှင့်ပတ်သက်သည့် တိုင်ကြားစာစောင်ရေ ၄၀၀ ခန့်ရှိကြောင်း၊ တရားရေးနှင့်ပတ်သက်သည့် တိုင်ကြားစာစောင်ရေမှာ ၃၀၀ ဝန်းကျင်ခန့်ရှိကြောင်း၊ ကျန်သည့် တိုင်ကြားစာများသည် အထွေထွေ တိုင်ကြားစာများဖြစ်ကြောင်း၊ အချို့တိုင်ကြားစာများသည် လုပ်ထုံးလုပ်နည်းများနှင့် မညီသည့်အတွက် ဆောင်ရွက်ရန်မလိုဟု သတ်မှတ်ရသည့်အထဲတွင် ပါဝင်သွားသည့် တိုင်ကြားစာများရှိကြောင်း ကော်မတီဥက္ကဋ္ဌ ဦးဆန်းမြင့်က ပြောကြားသည်။
အမျိုးသားလွှတ်တော် ပြည်သူတို့၏တိုင်ကြားစာဆိုင်ရာ ကော်မတီဥက္ကဋ္ဌ ဦးဆန်းမြင့်က “ပြီးခဲ့တဲ့ သတ္တမပုံမှန်အစည်းအဝေးအထိက တိုင်ကြားစာပေါင်း ၆၀၀၀ ကျော်လောက် ရောက်တယ်။ သတ္တမပုံမှန်အစည်းအဝေး ရပ်နားစဉ်ကာလတွင် မပြီးပြတ်သေးတဲ့ တိုင်ကြားစာတွေကို စိစစ်နေပါတယ်။ လွှတ်တော်ရပ်နားထားတဲ့ ကာလမှာ တိုင်ကြားစာပေါင်း ၉၀၀ ကျော်လောက် ထပ်မံရောက်ရှိလာတယ်။ မပြီးပြတ်သေးတဲ့ တိုင်ကြားစာပေါင်း ၂၀၀၀ လောက် ကျန်သေးတယ်။ အဋ္ဌမပုံမှန်အစည်းအဝေးမစခင်မှာ တိုင်ကြားစာတွေနဲ့ပတ်သက်ပြီး ဆောင်ရွက်နေပါတယ်။ မပြီးသေးတဲ့ တိုင်ကြားစာတွေထဲမှာ အများဆုံးကတော့ မြေယာနဲ့ပတ်သက်တဲ့ အမှုတွေပဲ။ ဒုတိယအများဆုံးကတော့ တရားရုံးတွေနဲ့ ပတ်သက်ပြီးတော့ မကျေနပ်ချက်တွေအပေါ်မှာ တိုင်ကြားလာတာတွေရှိတယ်။ ကျန်တာကတော့ အထွေထွေတိုင်ကြားစာတွေပါ။ အထွေထွေတိုင်ကြားစာထဲမှာတော့ ဝန်ကြီးဌာနတွေနဲ့ ပတ်သက်တာတွေ တိုင်ကြားတာတွေရှိတယ်။ ကော်မတီအနေနဲ့ကတော့ မြေသိမ်းယာသိမ်းတဲ့ ကိစ္စတွေနဲ့ပတ်သက်တာတွေကို ဗဟိုမြေစစ်ကို လွှဲသင့်တာတွေ လွှဲတယ်။ တချို့တိုင်ကြားစာတွေကိုတော့ သက်ဆိုင်ရာတိုင်းဒေသကြီးနဲ့ ပြည်နယ်တွေကိုလွှဲတယ်။ သိမ်းဆည်းမြေတွေနဲ့ ပတ်သက်ပြီးတော့ ကွင်းဆင်းစစ်ဆေးဖို့ လွှတ်တော်ဥက္ကဋ္ဌကြီးထံကို တင်ပြရပါတယ်” ဟုပြောကြားသည်။
ဆက်လက်၍ “တရားရုံးကိစ္စတွေကတော့ စစ်ဆေးကြားနာဆဲ ကိစ္စတွေဖြစ်တဲ့အတွက် ဥပဒေပြုရေးမဏ္ဍိုင်အနေနဲ့က တရားစီရင်ရေးမဏ္ဍိုင်ကို စောင့်ကြည့်ရုံ၊ ထိန်းကျောင်းရုံပဲရတာကို။ တိုက်ရိုက်ဝင်စွက်ဖက်လို့ မရဘူး။ မရပေမယ့်လည်း တိမ်းစောင်းနေမှု တော်တော်များများကို တွေ့ရတယ်။ ပြည်ထောင်စု တရားလွှတ်တော်ချုပ်ကို ကြီးကြပ်ပေးဖို့ဆိုပြီး လွှဲပြောင်းပေးတဲ့ တိုင်ကြားစာတွေရှိတယ်။ တရားစီရင်မှုတွေမှာ တိမ်းစောင်းမှုတွေ ရှိနေတယ်ဆိုတာတွေကိုပေါ့” ဟု ဦးဆန်းမြင့်က ပြောကြားသည်။
