ရွေးကောက်ပွဲလုပ်ငန်းစဉ်များနှင့် ပတ်သက်၍ တစ်နိုင်ငံလုံးရှိ ရွေးကောက်ပွဲကော်မရှင်အဖွဲ့များနှင့် ပြည်ထောင်စုရွေးကောက်ပွဲကော်မရှင် ဧပြီ ၉ ရက်တွင် တွေ့ဆုံမည်ဖြစ်ကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင် ဦးမြင့်နိုင်က The Daily Eleven သတင်းစာကို ပြောကြားသည်။
ရွေးကောက်ပွဲလုပ်ငန်းများနှင့် ပတ်သက်သည့်ကိစ္စရပ်များကို ဆွေးနွေးသွားမည်ဖြစ်ကြောင်း ဦးမြင့်နိုင်က ဆိုသည်။
“အခု ဧပြီ ၉ ရက် ၁၀ ရက်လည်း အစည်းအဝေးရှိပါတယ်။ မဟာဗျူဟာစီမံကိန်းနဲ့ ပတ်သက်ပြီးတော့လည်း ဆွေးနွေးဦးမှာပေါ့။ အဲဒီမှာလည်း အခုဟာက ကော်မရှင်အဖွဲ့ခွဲအသစ်တွေဆိုတဲ့ အခါကျတော့ ရွေးကောက်ပွဲဆိုင်ရာတွေ သိသင့်သိထိုက်တာတွေ ဆွေးနွေးမယ့်သဘောပါပဲ” ဟု ရွေးကောက်ပွဲကော်မရှင်အဖွဲ့ဝင် ဦးမြင့်နိုင်က ပြောကြားသည်။
ပြီးခဲ့သည့် ဖေဖော်ဝါရီ ၇ ရက်၌ ၂၀၁၈ ခုနှစ်အတွင်း ကျင်းပမည့် ကြားဖြတ်ရွေးကောက်ပွဲနှင့် ပတ်သက်၍ ပြည်ထောင်စုရွေးကောက်ပွဲကော်မရှင်နှင့် လစ်လပ်မဲဆန္ဒနယ်များမှ တိုင်းဒေသကြီး၊ ပြည်နယ်ရွေးကောက်ပွဲ ကော်မရှင်အဖွဲ့ခွဲဥက္ကဋ္ဌများ တွေ့ဆုံဆွေးနွေးခဲ့သည်။
ကြားဖြတ်ရွေးကောက်ပွဲ ကျင်းပရာတွင် ကုန်ကျမည့်စရိတ်များနှင့်ပတ်သက်၍ အကုန်အကျ နည်းနိုင်သမျှနည်းရန် စိစိစစ်စစ်တွက်ချက်၍ ချွေချွေတာတာ သုံးစွဲစေလိုကြောင်း၊ မဲစာရင်းကို မှန်ကန်ပြည့်စုံစေရန် ပြုစုဆောင်ရွက်ရန်လိုကြောင်း၊ မဲရုံများဆောက်လုပ်ရာတွင် မဲဆန္ဒရှင်များ အဆင်ပြေစွာမဲပေးနိုင်ရန်နှင့် အထူးသဖြင့် မသန်စွမ်းမဲဆန္ဒရှင်များရှိပါက ၎င်းမဲဆန္ဒရှင်များအဆင်ပြေစွာ မဲပေးနိုင်ရေး ဆောင်ရွက်ထားရှိရန်လိုကြောင်း ၂၀၁၈ ခုနှစ်အတွင်း ကျင်းပမည့် ကြားဖြတ်ရွေးကောက်ပွဲနှင့် ပတ်သက်သည့် အစည်းအဝေး၌ ပြည်ထောင်စုရွေးကောက်ပွဲ ကော်မရှင်ဥက္ကဋ္ဌ ဦးလှသိန်းက ပြောကြားထားသည်။
ထို့ပြင် မဲရုံလုပ်ငန်းသုံးပစ္စည်းများ အချိန်မီ သယ်ယူပို့ဆောင်ရေးအတွက်လည်း ကြိုတင်စီစဉ်ထားရှိရန် လိုအပ်ကြောင်း ကော်မရှင်ဥက္ကဋ္ဌ ဦးလှသိန်းက ပြောကြားထားသည်။
လက်ရှိတွင် လွှတ်တော်ကိုယ်စားလှယ် လစ်လပ်နေသည့် မဲဆန္ဒနယ်မှာ ၁၂ နေရာအထိရှိကြောင်း သတင်းရရှိသည်။
၂၀၁၈ ခုနှစ်အတွင်း ကြားဖြတ်ရွေးကောက်ပွဲတစ်ရပ် ကျင်းပမည်ဖြစ်ပြီး ရွေးကောက်ပွဲကျင်းပမည့်အချိန်ကို ကြိုတင်ကြေညာပေးမည်ဖြစ်ကြောင်း ကော်မရှင်အဖွဲ့ဝင် ဦးမြင့်နိုင်က ပြောကြားသည်။
