မတ် ၇ ရက်က ပြည်သူ့လွှတ်တော် အစည်းအဝေးအပြီး၌ အစည်းအဝေးခန်းမ အပြင်ဘက်တွင် ကိုယ်စားလှယ်များအား တွေ့ရစဉ် 

အမျိုးသားလွှတ်တော်က ပေးပို့လာသော ငြိမ်းစုစီဥပဒေကို ပြင်ဆင်သည့် ဥပဒေကြမ်းအား ပြည်သူ့လွှတ်တော် ဥပဒေကြမ်း ကော်မတီဝင် အများစုက သဘောတူကြောင်း ဥပဒေကြမ်းကော်မတီ ပြည်သူ့လွှတ်တော်သို့ အစီရင်ခံစာ တင်သွင်းခဲ့သည်။

ကန့်ကွက်ဆန္ဒပြမှုများ ပြုလုပ်ခဲ့သော်လည်း အမျိုးသား လွှတ်တော်တွင် ပြင်ဆင်ချက်များဖြင့် အတည်ပြုခဲ့သည့် ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စုဝေးခြင်းဆိုင်ရာ ဥပဒေကို ပြင်ဆင်သည့် ဥပဒေကြမ်းအား နေပြည်တော်၌ မတ် ၉ ရက်က ပြုလုပ်သည့် ဒုတိယအကြိမ် ပြည်သူ့လွှတ်တော် သတ္တမပုံမှန် အစည်းအဝေး ၂၆ ရက်မြောက်နေ့တွင် ပြည်သူ့လွှတ်တော် ဥပဒေကြမ်း ကော်မတီဥက္ကဋ္ဌက အစီရင်ခံစာ တင်သွင်းခဲ့ခြင်းဖြစ်သည်။

ပြည်သူ့လွှတ်တော် ဥပဒေကြမ်းကော်မတီသည် မတ် ၈ ရက်တွင် ပြည်သူ့လွှတ်တော် နိုင်ငံသားများ၏ မူလအခွင့်အရေးဆိုင်ရာ ကော်မတီ၊ ပြည်သူ့လွှတ်တော် ပြည်သူ့ရေးရာ စီမံခန့်ခွဲမှု ကော်မတီ၊ ပြည်ထဲရေး ဝန်ကြီးဌာန၊ ပြည်ထောင်စုရှေ့နေချုပ်ရုံး၊ ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေး ကော်မရှင်တို့မှ တာဝန်ရှိသူများနှင့် ညှိနှိုင်းအစည်းအဝေး ပြုလုပ်ခဲ့ပြီး ၂၀၁၃ ခုနှစ် ပြည်သူ့လွှတ်တော်ဆိုင်ရာ နည်းဥပဒေ ၅၉ အရ အခြေခံရမည့်မူ ၁၂ ချက်နှင့်အညီ စိစစ်လေ့လာခဲ့ကြောင်း၊ ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ ဥပဒေကို ပြင်ဆင်သည့် ဥပဒေကြမ်းရှိ အသစ်ဖြည့်စွက်ချက် ပုဒ်မ ၁၈ နှင့် စပ်လျဉ်း၍ အလေးအနက် စိစစ်ဆောင်ရွက်သင့်ကြောင်း တပ်မတော်သား ပြည်သူ့လွှတ်တော် ကိုယ်စားလှယ် ဗိုလ်မှူးချုပ်မောင်မောင်က တင်ပြခဲ့ကြောင်းနှင့် ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စုဝေးခြင်းဆိုင်ရာ ဥပဒေကို ပြင်ဆင်သည့် ဥပဒေကြမ်းကို ပြည်သူ့လွှတ်တော် ဥပဒေကြမ်းကော်မတီဝင် အများစုက သဘောတူညီကြသဖြင့် လွှတ်တော်က အတည်ပြုပေးနိုင်ရန် ပြည်သူ့လွှတ်တော် ဥပဒေကြမ်း ကော်မတီဥက္ကဋ္ဌ၊ ရှမ်းပြည်နယ်မြောက်ပိုင်း၊ နောင်ချိုမြို့နယ် မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးထွန်းထွန်းဟိန်က အစီရင်ခံစာ တင်သွင်းရာတွင် ပြောကြားသည်။

“ဥပဒေတစ်ခုဟာ ပြဋ္ဌာန်းလိုက်တဲ့အခါမှာ ဘာလိုလဲဆိုရင် ဖွဲ့စည်းအုပ်ချုပ်ပုံ အခြေခံဥပဒေနဲ့ ညီညွှတ်ဖို့ လိုပါတယ်။ ဖွဲ့စည်းအုပ်ချုပ်ပုံ အခြေခံဥပဒေနဲ့ မညီညွှတ်ဘူးဆိုရင် အဲဒီဥပဒေက ပျက်သွားပါတယ်။ ဥပဒေကို ပြဋ္ဌာန်းလိုက်ရင် အပြစ်အနာကင်းတဲ့ ဥပဒေ ဖြစ်ဖို့ဆိုရင် အချိန်ယူရပါတယ်။ အပြစ်အနာတွေ့ရင် ဒါကိုလိုက်ပြီး ပြင်ရပါတယ်။ ဥပဒေ ဆိုတာကတော့ ပြင်ရတဲ့အမျိုးပါပဲ။ ခေတ်နဲ့ မလျော်ညီဘူးဆိုရင် ပြင်ရတာပဲ။ ချို့ယွင်းချက် ဟာကွက်တွေ့ရင် ပြင်ရပါတယ်။ ဒီမိုကရေစီ အနှစ်သာရကို ပြောင်းသွားအောင် ပြင်တာမဟုတ်ပါဘူး။ လွတ်လပ်စွာ ဖော်ထုတ်ခွင့်၊ လွတ်လပ်စွာ ဆန္ဒပြခွင့်၊ လွတ်လပ်စွာ ပြောဆိုခွင့် ဒါတွေကို  ပိတ်ပင်လိုက်တာ မဟုတ်ပါဘူး။ တစ်ခုကို လုပ်ဆောင်မယ် ပြောလိုက်ရင် ဘယ်လောက်ပဲ လွယ်ကူတဲ့ကိစ္စ ဖြစ်ပါစေ နှစ်ဖက်ဆိုတာ ဖြစ်သွားတာပဲ။ ဒါကို ပြင်လိုက်တာကို သဘောကျတဲ့သူ ရှိသလို သဘောမကျတဲ့ သူတွေလည်း ရှိတာပဲ။ အဲဒီအတွက် ဘာမှ မပြောလိုပါဘူး။ တစ်ခု ပြောလိုတာက ဥပဒေတစ်ခုကို ကောင်းသထက် ကောင်းအောင် လုပ်တာပါဆိုတာ ပြောချင်ပါတယ်” ဟု ဦးထွန်းထွန်းဟိန်က ပြောကြားသည်။

အဆိုပါ ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ ဥပဒေကို ပြင်ဆင်သည့် ဥပဒေကြမ်းကို အမျိုးသားလွှတ်တော်သို့ အမျိုးသားလွှတ်တော် ဥပဒေကြမ်းကော်မတီ အတွင်းရေးမှူး၊ ရန်ကုန်တိုင်းဒေသကြီး မဲဆန္ဒနယ် အမှတ် (၃) မှ အမျိုးသား လွှတ်တော်ကိုယ်စားလှယ် ဒေါက်တာမြတ်ဉာဏစိုးက ဖေဖော်ဝါရီ ၁၉ ရက်က တင်သွင်းခဲ့ခြင်းဖြစ်ပြီး မတ် ၇ ရက်တွင် ဆန္ဒမဲပေးခွင့်ရှိသူ စုစုပေါင်း ၁၉၄ ဦးရှိသည့်အနက် ထောက်ခံမဲ ၁၁၃ မဲ၊ ကန့်ကွက်မဲ ၇၈ မဲဖြင့် အတည်ပြုခဲ့ခြင်းဖြစ်သည်။

ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ ဥပဒေကို ပြင်ဆင်သည့် ဥပဒေကြမ်းအား အမျိုးသားလွှတ်တော် အနေဖြင့် အတည်မပြုသင့်ကြောင်းကို လွှတ်တော်ကိုယ်စားလှယ် ရခိုင်အမျိုးသား ပါတီဝင် ဦးခင်မောင်လတ်၊ ဦးကျော်ကျော်၊ NLD ပါတီဝင် ဒေါ်နော်လှလှစိုး၊ ဦးရဲထွဋ်၊ ဦးတင်အောင်ထွန်း၊ ဦးဌေးဦး၊ တစ်သီးပုဂ္ဂလ ကိုယ်စားလှယ် ဦးစိုးသိန်း၊ ပြည်ခိုင်ဖြိုးပါတီဝင် ဦးစိုင်းသန်းနိုင်နှင့် တပ်မတော်သား လွှတ်တော်ကိုယ်စားလှယ် နှစ်ဦးက ဆွေးနွေးခဲ့သည်ဟု သိရသည်။

ထို့ပြင် ဥပဒေကြမ်းအား အမျိုးသားလွှတ်တော်တွင် တစ်ပိုဒ်ချင်းစီအလိုက် မဲခွဲအတည်ပြုခဲ့ပြီး ဥပဒေကြမ်း တစ်ခုလုံးအား အတည်ပြုပေးရန် ဥပဒေကြမ်းကော်မတီ အတွင်းရေးမှူးက အဆိုတင်သွင်းချိန်တွင် တပ်မတော်သား ကိုယ်စားလှယ်က ထပ်မံကန့်ကွက်ခဲ့ပြီး ယင်းသို့ ကန့်ကွက်ရခြင်းသည် အမျိုးသားလွှတ်တော် ဥပဒေအရ တစ်ရက်တည်းတွင် ဆွေးနွေးဆုံးဖြတ်ခဲ့သည့်အတွက် ကန့်ကွက်ရခြင်းဖြစ်ကြောင်း၊ အမျိုးသား လွှတ်တော်ဥက္ကဋ္ဌကလည်း အငြင်းပွားဖွယ်ရာ ကိစ္စများ ဖြစ်ပေါ်ပါက လွှတ်တော်၏ သဘောတူညီချက်ဖြင့် ဆက်လက်ဆောင်ရွက် နိုင်သည့်အတွက် လွှတ်တော်အဆုံးအဖြတ် ရယူကာ ဥပဒေကြမ်းအား အတည်ပြုခဲ့ခြင်း ဖြစ်သည်။

အမျိုးသား လွှတ်တော်အနေဖြင့် အတည်မပြုသင့်ကြောင်း ဆွေးနွေးမှုများရှိခဲ့သည့် ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ ဥပဒေကို ပြင်ဆင်သည့် ဥပဒေကြမ်းကို အရပ်ဘက်အဖွဲ့ အစည်း ၁၈၈ ဖွဲ့နှင့် တစ်သီးပုဂ္ဂလ ၁၇ ဦးတို့က သဘောထား ထုတ်ပြန်ချက်များ ပူးပေါင်းထုတ်ပြန်ပြီး ပယ်ဖျက်ပေးရန် တောင်းဆိုခဲ့ကြသည့်အပြင် မတ် ၅ ရက်က အင်အား ၅၀၀ ခန့်ဖြင့် ပယ်ဖျက်ပေးရန် ရန်ကုန်မြို့တွင် ဆန္ဒဖော်ထုတ် တောင်းဆိုခဲ့ကြသည်။

ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ မူလဥပဒေ၏ ပုဒ်မ ၄ (ဃ) တွင် ပြဋ္ဌာန်းထားသည့်  ငြိမ်းချမ်းစွာ စုဝေးခြင်း သို့မဟုတ် ငြိမ်းချမ်းစွာ စီတန်းလှည့်လည်ခြင်း ပြုလုပ်မည့် အစီအစဉ်နှင့် ခန့်မှန်းလူဦးရေအား ငြိမ်းချမ်းစွာ စုဝေးခြင်း သို့မဟုတ် ငြိမ်းချမ်းစွာ စီတန်းလှည့်လည်ခြင်း ပြုလုပ်မည့် အစီအစဉ်၊ ခန့်မှန်းလူဦးရေ၊ ခန့်မှန်းကုန်ကျစရိတ်နှင့် ကုန်ကျခံမည့်ပုဂ္ဂိုလ် သို့မဟုတ် အဖွဲ့အစည်း ရှိပါက ယင်းတို့၏ အမည်နှင့် ဆက်သွယ်ရမည့်လိပ်စာ အပြည့်အစုံအဖြစ် အမျိုးသားလွှတ်တော်က ပြောင်းလဲအတည်ပြုထားပြီး အဆိုပါ ပုဒ်မ ၄ (ဃ) အား ပယ်ဖျက်ရန် တပ်မတော်သား လွှတ်တော်ကိုယ်စားလှယ် ဗိုလ်မှူးအောင်ကိုမင်းက ဆွေးနွေးခဲ့ကြောင်း သိရသည်။