မတ် ၆ ရက်ကပြုလုပ်သည့် ရန်ကုန်တိုင်းဒေသကြီး လွှတ်တော်အစည်းအဝေးကို တွေ့ရစဉ် (ဓာတ်ပုံ- ပြည့်ဖြိုးအောင်)
ရန်ကုန်တိုင်းဒေသကြီး အောင်ဆန်းအားကစားကွင်း ပတ်လည်ရှိ ဆိုင်ခန်းပေါင်း ၃၂၁ ခန်းမှ ဆိုင်ခန်းငှားရမ်းခ တစ်နှစ်လျှင် ငွေကျပ်သိန်း ၄၈၀ ကျော်သာရရှိကြောင်း ရန်ကုန်တိုင်းအစိုးရအဖွဲ့ လူမှုရေးဝန်ကြီး ဦးနိုင်ငံလင်းက မတ် ၆ ရက်တွင်ပြုလုပ်သည့် ဒုတိယအကြိမ် ရန်ကုန်တိုင်းဒေသကြီး လွှတ်တော်ဆဋ္ဌမပုံမှန်အစည်းအဝေး (ဒသမနေ့) တွင် ပြောကြားသည်။
မင်္ဂလာတောင်ညွှန့်မြို့နယ် မဲဆန္ဒနယ် အမှတ် (၁) လွှတ်တော်ကိုယ်စားလှယ် ဦးလှဌေး၏ “(၁) ရန်ကုန်တိုင်းဒေသကြီးအတွင်း အားကစားကဏ္ဍ တိုးတက်လာစေရန် စည်းမျဉ်းစည်းကမ်းများကို လိုက်နာဆောင်ရွက်မှု အားနည်းသော ဒေသဆိုင်ရာ အားကစားမှူးများအား ထိန်းချောင်းသွားရန် အစီအစဉ် ရှိ မရှိ၊ (၂) အစဉ်အလာကြီးမားခဲ့သော အောင်ဆန်းအားကစားကွင်းအား မည်ကဲ့သို့ ပြုပြင်ဆောင်ရွက်သွားမည်နှင့် ပြုပြင်ပြီးပါက ဘောလုံးအားကစားနှင့် ပြေးခုန်ပစ်အားကစားပြိုင်ပွဲများကို အဆင့်မြင့်တင်ကျင်းပပေးရန် အစီအစဉ် ရှိ မရှိ၊ (၃) ယခုလက်ရှိ အောင်ဆန်းအားကစားကွင်း ပတ်လည်ရှိ ဆိုင်ခန်းများအား မည်သည့်နှုန်းထားနှင့် မည်ကဲ့သို့ငှားရမ်းထားရှိပြီး မည်သည့်ဌာနက ရရှိကြောင်း” ကို သိရှိလိုကြောင်း လွှတ်တော်၌ မေးခွန်းမေးမြန်းခြင်းနှင့်ပတ်သက်၍ ဝန်ကြီးက ပြန်လည်ဖြေကြားရာတွင် ထည့်သွင်းပြောကြားခဲ့ခြင်းဖြစ်သည်။
“အောင်ဆန်းအားကစားကွင်း ပတ်လည်တွင် ဆိုင်ခန်းပေါင်း ၃၂၁ ခန်းရှိပါတယ်။ အဲဒီငှားရမ်းခငွေ တစ်နှစ်လျှင် စုစုပေါင်းကျပ် ၄၈၁၃၃၂၀၀ သိန်းရရှိပါတယ်။ ဒီငွေတွေကို နိုင်ငံတော်ကို ပေးသွင်းရတာဖြစ်ပါတယ်။ ငှားရမ်းခ တိုးမြှင့်ကောက်ခံပြီးတော့ နိုင်ငံတော်ငွေစာရင်း ပိုမိုရရှိဖို့အတွက်ဆိုရင်တော့ အောင်ဆန်းအားကစားကွင်း အဆင်မြင့်တင်ခြင်းစီမံချက်နဲ့အတူ ဆက်လက်ဆောင်ရွက်သွားမှာပါ” ဟု လူမှုရေးဝန်ကြီး ဦးနိုင်ငံလင်းက ပြောကြားသည်။
ထို့ပြင် ရန်ကုန်တိုင်းဒေသကြီးအတွင်း အားကစားကဏ္ဍ တိုးတက်စေရန်နှင့် စိတ်ဓာတ်မှန်ကန်မှုမရှိသော ဒေသဆိုင်ရာ အားကစားမှူးများကို ထိန်းသိမ်းသွားရန်အစီအစဉ်ရှိ မရှိနှင့် ပတ်သက်၍ ဖြေကြားရာတွင် ဒေသဆိုင်ရာ အားကစားမှူးများကို ထိန်းသိမ်းသွားရန် အစီအစဉ်ရှိကြောင်း၊ မှန်ကန်စွာ ကြီးကြပ်ကွပ်ကဲလျက်ရှိကြောင်း၊ လက်ရှိတွင် ဝန်ထမ်းစည်းမျဉ်းစည်းကမ်း၊ ပြိုင်ပွဲစည်းမျဉ်းစည်းကမ်း ချိုးဖောက်သူများကို အရေးယူဆောင်ရွက်ထားကြောင်း ဝန်ကြီးက ပြောကြားသည်။
အလားတူ အောင်ဆန်းအားကစားကွင်းအား မည်ကဲ့သို့ ပြုပြင်ဆောင်ရွက်သွားမည်နှင့် ပြုပြင်ပြီးပါက ဘောလုံးအားကစားနှင့် ပြေးခုန်ပစ်အားကစားပြိုင်ပွဲများကို အဆင့်မြင့်တင်ကျင်းပပေးရန် အစီအစဉ်ရှိ မရှိနှင့် ပတ်သက်၍ ဝန်ကြီးက ဖြေကြားရာတွင် အောင်ဆန်းအားကစားကွင်းအား ပြုပြင်ဆောင်ရွက်သွားရန် ပြည်ထောင်စုအစိုးရနှင့် ညှိနှိုင်းဆောင်ရွက်လျက်ရှိကြောင်း၊ ပြည်ထောင်စုအစိုးရအဖွဲ့၏ ၂၀၁၇ ခုနှစ် ဒီဇင်ဘာ ၂၂ ရက်စွဲပါ စာအမှတ် ၁၄/၂၇၂ ကွင်း FMM (၁၈)၊ အဖရ ၂၀၁၇ အရ အပ်နံှလွဲပြောင်းရေးကို လုပ်ထုံးလုပ်နည်းနှင့်အညီ ဆောင်ရွက်လျက်ရှိပြီး အဆင့်မြင့်တင်ခြင်းစီမံချက်ကို အား/ကာရုံးချုပ်သို့လည်း တင်ပြထားကာ ပြုပြင်ပြီးစီးပါက ဘောလုံးအားကစားနှင့် ပြေးခုန်ပစ်အားကစားများ အဆင့်မြှင့်တင် ဆောင်ရွက်သွားမည်ဖြစ်ကြောင်း ဝန်ကြီးက ပြောကြားသည်။
