၈၈ မျိုးဆက် ကျောင်းသားခေါင်းဆောင်များ အပါအ၀င် နိုင်ငံရေးနယ်ပယ် အသီးသီးမှ ပုဂ္ဂိုလ်များ ပါဝင်ထူထောင်မည့် နိုင်ငံရေးပါတီဖြစ်မြောက်ရေး ကော်မတီ ဖွဲ့စည်းခြင်း အခမ်းအနား ရန်ကုန်မြို့၌ ကျင်းပ

၈၈ မျိုးဆက် ကျောင်းသားခေါင်းဆောင်များ ပါဝင်ထူထောင်မည့် နိုင်ငံရေးပါတီ ဖြစ်မြောက်ရေး ကော်မတီ ဖွဲ့စည်းခြင်း အခမ်းအနားကို ရန်ကုန်မြို့ သင်္ဃန်းကျွန်းမြို့နယ်ရှိ ဓမ္မပီယကျောင်းတိုက်တွင် ဇူလိုင် ၁၅ ရက်က စတင်ပြုလုပ်လျက် ရှိသည်။

ရန်ကုန်မြို့ UMFCCI ၌ ၂၀၁၇ ခုနှစ် မေ ၃၀ ရက်မှ ၃၁ ရက်အထိ နှစ်ရက်ကြာ ပြုလုပ်ခဲ့သော နိုင်ငံရေးပါတီတစ်ရပ် ပေါ်ထွန်းရေး တွေ့ဆုံဆွေးနွေးပွဲ နောက်ဆက်တွဲအဖြစ် ပါတီဖြစ်မြောက်ရေးကော်မတီ ဖွဲ့စည်းရန် ဆောင်ရွက်ခြင်းဖြစ်ကြောင်း ၈၈ မျိုးဆက် ကျောင်းသားခေါင်းဆောင်တစ်ဦးဖြစ်သူ ဦးရဲနိုင်အောင်က ပြောကြားသည်။

“UMFCCI နောက်ပိုင်းမှာ ဘယ်လို ရှေ့ဆက်ဆောင်ရွက်ကြမလဲဆိုတဲ့ လုပ်ငန်းစဉ်တွေကို ဆွေးနွေးတိုင်ပင် ညှိနှိုင်းခဲ့ပါတယ်။ ဒီတိုင်ပင်ဆွေးနွေးညှိနှိုင်းမှုတွေအရ ကျွန်တော်တို့က ပါတီတစ်ရပ် ဖြစ်မြောက်ရေးအတွက် ရှေ့ဆက်ဆောင်ရွက်မယ့် ခြေလှမ်းတွေမှာ ဦးဆောင်အဖွဲ့ဆိုတာကို ဖွဲ့စည်းဖို့အတွက်ကို ယေဘုယျမူအနေနဲ့ ချထားပါတယ်။ ကော်မတီလေးရပ် ဖွဲ့စည်းဖို့လည်း ချထားပါတယ်” ဟု ဦးရဲနိုင်အောင်က ပြောကြားသည်။

နိုင်ငံရေးပါတီတစ်ရပ် ဖွဲ့စည်းပါက နီးစပ်ရာ အမာခံ စုစည်းကာ သွားရောက်မှတ်ပုံတင်ကြောင်း၊ ထို့နောက် ပါတီမှတ်ပုံတင်ကျမှသာ လူများစုသည့် သမားရိုးကျ လုပ်ရိုးလုပ်စဉ် ဖြစ်ကြောင်း၊ သို့သော် ယခုပါတီသစ်အတွက် စုဆောင်းသည့်အခါ တတ်နိုင်သမျှ အပေါ်မှ ညွှန်ကြားပြီး ဖွဲ့စည်းသည့်ပုံစံ မဟုတ်ဘဲ အောက်ခြေမှ အကြိမ်ကြိမ်ဆွေးနွေးညှိနှိုင်းကာ ဖွဲ့စည်းသည့် ပုံစံအား စတင်ကြိုးပမ်းနေခြင်းဖြစ်ကြောင်း ၈၈ မျိုးဆက် ကျောင်းသားခေါင်းဆောင် တစ်ဦးဖြစ်သူ ဦးကိုကိုကြီးက ပြောကြားသည်။

“ဒါကြောင့်မို့လို့ ကျွန်တော်တို့ အခုထက်ထိ ကျွန်တော်တို့ ပါတီမှတ်ပုံ မတင်သေးဘူး။ မတင်သေးတဲ့ အချိန်မှာကတည်းက နယ်အလိုက်၊ နယ်အလိုက် အစုအဖွဲ့တွေ၊ ရန်ကုန် ကျွန်တော်တို့ မျိုးဆက်အလိုက် အစုအဖွဲ့တွေ တတ်နိုင်သလောက် စုစည်းပြီးတော့ အကြိမ်ပေါင်းများစွာ ကျွန်တော်တို့ ဆွေးနွေးတိုင်ပင်ပြီးတော့ လုပ်ခဲ့ကြပါတယ်။ တချို့ရဲဘော်များကတော့ အခု မပါနိုင်သေးဘူး။ နောင်တစ်ချိန်မှာ ပါကောင်းပါလာနိုင်တယ်။ သူတို့အတွက်လည်း ကျွန်တော်တို့က အမြဲတမ်းကြိုဆိုပြီးတော့ တံခါးဖွင့်လှစ်ထားမှာ ဖြစ်ပါတယ်။ ဒါမှ ကျွန်တော်တို့ပါတီက တဖြည်းဖြည်းနဲ့ ကျယ်ပြန့်ရုံတင် မဟုတ်ဘဲနဲ့ ကျစ်လစ်တဲ့ပါတီတစ်ခုဖြစ်ဖို့ မျှော်လင့်ပါတယ်။ ဒါကြောင့် ကျွန်တော်တို့ ရဲဘော်တွေ အားလုံးဟာ အတွေ့အကြုံတွေ အများကြီး ကိုယ်စီကိုယ်စီ ရှိခဲ့ပြီးပါပြီ” ဟု ၎င်းက ပြောကြားသည်။

အဆိုပါ နိုင်ငံရေးပါတီ ဖြစ်မြောက်ရေး ကော်မတီတွင် ဦးဆောင်အဖွဲ့၊ စည်းရုံးရေး ကော်မတီ၊ သတင်းနှင့် ပြန်ကြားရေးကော်မတီ၊ သုတေသနနှင့် ဖွံ့ဖြိုးရေးကော်မတီ၊ ဘဏ္ဍာရေးကော်မတီတို့ ပါဝင်မည်ဖြစ်ကြောင်း သိရသည်။

“စည်းရုံးရေးကော်မတီနဲ့ ပတ်သက်လို့ကတော့ ကျွန်တော်တို့က နှစ်ပိုင်းခွဲထားပါတယ်။ တစ်ပိုင်းကတော့ ကျွန်တော်တို့ ဒီဗဟိုမှာပေါ့။ ဗဟိုမှာ တာဝန်ယူပြီးတော့ စည်းရုံးရေးလုပ်ငန်းတွေကို ဆောင်ရွက်မယ့် ဗဟိုစည်းရုံးရေးကော်မတီ ကျွန်တော်တို့ ဖွဲ့စည်းပါမယ်။ ဒီမှာတော့ ဘယ်သူမဆို ဒီအစည်းအဝေးကို တက်ရောက်လာတည်းက မိမိကိုယ်တိုင် အဆိုပြုမှုကို အခြေခံပြီးတော့ ဗဟိုစည်းရုံးရေး ကော်မတီကို ကျွန်တော်တို့ ဖွဲ့စည်းသွားမှာ ဖြစ်ပါတယ်။ နောက်တစ်ချက်ကတော့ နယ်က ကျွန်တော်တို့ ရဲဘော်ရဲဘက်တွေနဲ့ ဘယ်လိုချိတ်ဆက်ဆောင်ရွက်မယ်ဆိုတဲ့ အပိုင်းကို ပြောချင်ပါတယ်။ အဲဒီတော့ နယ်တွေမှာ ကျွန်တော်တို့ အနေအထားအရ နယ်က ပုဂ္ဂိုလ်အားလုံးလည်း ဆောင်ရွက်နိုင်စွမ်းရှိတယ် ဆိုရင်တော့ ဗဟိုစည်းရုံးရေး ကော်မတီမှာ ပါဝင်ဆောင်ရွက်ဖို့အတွက် ကမ်းလှမ်းထားပါတယ်။ လမ်းဖွင့်ထားပါတယ်။ သို့သော်ငြားလည်း အကြောင်းအမျိုးမျိုးကြောင့် ကိုယ့်သက်ဆိုင်ရာ နယ်မြေရဲ့ စည်းရုံးရေးကိုပဲ တာဝန်ယူ ဆောင်ရွက်ရမယ့် အနေအထားမျိုးလည်း ရှိနေပါတယ်။ နယ်က ရဲဘော်တွေနဲ့ ပတ်သက်လို့ရှိရင် ဒါ ကျွန်တော်တို့က ဘယ်လိုချိတ်ဆက် ဆောင်ရွက်မယ် ဆိုတာကို နောက်ပိုင်းလည်း အသေးစိတ် ဆွေးနွေးသွားမှာပါ။ ယေဘူယျ ကျွန်တော်တို့ ဆွေးနွေးညှိနှိုင်းထားတဲ့ သဘောကတော့ နယ်မြေတွေမှာ သက်ဆိုင်ရာ ဇုံအလိုက် စည်းရုံးရေး ကော်မတီတွေကို ကျွန်တော်တို့ ဖွဲ့စည်းပါမယ်။ ဒါကတော့ သက်ဆိုင်ရာ ဇုန်မှာရှိတဲ့ ကိုယ့်ရဲဘော်ရဲဘက်တွေက ဦးဆောင်ပြီးတော့ ဖွဲ့စည်းရမှာပါ။ ဒီလို ဦးဆောင်ဖွဲ့စည်းတာကို ကျွန်တော်တို့ ဗဟိုစည်းရုံးရေး ကော်မတီ၊ ဦးဆောင်ကော်မတီတို့နဲ့ ညှိနှိုင်းပြီးတော့ နယ်မြေရဲ့ ဇုန်ရဲ့ လိုအပ်ချက်နဲ့ ကိုက်ညီအောင်လို့ ကျွန်တော်တို့ အသေးစိတ် ညှိနှိုင်းဆောင်ရွက်သွားပါမယ်။ နောက်တစ်ချက်က အရေးကြီးတဲ့ အချက်ကတော့ ဘာကိုပြောချင်လဲဆိုတော့ စည်းရုံးရေးနဲ့ ပတ်သက်တဲ့ အခါမှာ ကျွန်တော်တို့က နယ်က ရဲဘော်တွေ သဘောထား၊ သူတို့ရဲ့ အကြံဉာဏ်တွေကို အလေးအနက်ထားတယ်ဆိုတာကို ပြဖို့တစ်ကြောင်း၊ နောက် လုပ်ငန်းလိုအပ်ချက်အရကော တစ်ကြောင်းကြောင့် ဇုန်တွေမှာ တာဝန်ယူမယ့် နယ်က ရဲဘော်တွေကို ကျွန်တော်တို့ ဗဟိုအဆင့် တာဝန်ပေးဖို့ အတွက်ကို နည်းလမ်းလေး ရှာကြံထားပါတယ်” ဟု ဦးရဲနိုင်က ဆိုသည်။

နိုင်ငံရေးပါတီဖြစ်မြောက်ရေး ကော်မတီ ဖွဲ့စည်းခြင်း အခမ်းအနားကို ဇူလိုင် ၁၆ ရက်အထိ ကျင်းပမည်ဖြစ်ပြီး အခမ်းအနား ပထမနေ့တွင် ပါတီဖြစ်မြောက်ရေး ကော်မတီ၏ မူဝါဒများ ရှင်းလင်းခြင်းနှင့် တက်ရောက်လာသူများက ပြန်လည်ဆွေးနွေးခြင်း၊ ဖြစ်မြောက်ရေးကော်မတီ အသီးသီး တာဝန်ယူမည့် သူများ၏ ရေးသွင်းရန် ကိုယ်ရေးအချက်အလက် ဖောင်ဝေငှခြင်း၊ ဖြစ်မြောက်ရေးကော်မတီ ဗဟိုနှင့် နယ်ရုံးများ ချိတ်ဆက်ဆောင်ရွက်ရမည့် လုပ်ငန်းစဉ်များအား ဆွေးနွေးမှု ပြုလုပ်ခဲ့ကြောင်း သိရသည်။