ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းအား ပါတီတွင်း သတိပေး ဆုံးမထားကြောင်း NLD ပါတီ ဗဟိုအလုပ်အမှုဆောင် အဖွဲ့ဝင် ဦးဉာဏ်ဝင်း ပြောကြား

ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းအား ပါတီတွင်း သတိပေး ဆုံးမထားကြောင်း အမျိုးသားဒီမိုကရေစီအဖွဲ့ချုပ် (NLD) ပါတီ ဗဟိုအလုပ်အမှုဆောင်အဖွဲ့ အတွင်းရေးမှူး အဖွဲ့ဝင် ဦးဉာဏ်ဝင်းက ဇူလိုင် ၁၅ ရက်တွင် ပြောကြားသည်။

ထိုသို့ ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းအား သတိပေး ဆုံးမရာတွင် ပါတီရုံးသို့ ခေါ်ယူ ပြောကြားခဲ့ခြင်းဖြစ်ပြီး ဇူလိုင် ၁၄ ရက် ရက်စွဲပါ ရုံးတွင်းအမိန့်စာလည်း ထုတ်ပြန်ခဲ့ကြောင်း သိရသည်။

အဆိုပါ ရုံးတွင်းအမိန့်စာတွင် ၂၀၁၇ ခုနှစ် ဇူလိုင် ၉ ရက်၌ ရန်ကုန်မြို့ ဆီဒိုးနားဟိုတယ် USAID နှင့် ပူးပေါင်းပြုလုပ်သည့် နိုင်ငံရေး အကျဉ်းသားများအတွက် အလုပ်အကိုင် ဖန်တီးပေးရေး အရပ်ဘက် အဖွဲ့အစည်းနှင့် မီဒီယာ စီမံကိန်း အလုပ်ရုံဆွေးနွေးပွဲတွင် ပြောကြားခဲ့သည့် ကိစ္စနှင့် ပတ်သက်၍ ဦးဖြိုးမင်းသိန်းအား သတိပေး ဆုံးမလိုက်သည်ဟု ဖော်ပြထားသည်။

ယင်းအမိန့်စာနှင့် ပတ်သက်၍ NLD ပါတီ ဗဟိုအလုပ်အမှုဆောင်အဖွဲ့ အတွင်းရေးမှူး အဖွဲ့ဝင် ဦးဉာဏ်ဝင်းအား ဆက်သွယ်မေးမြန်းခဲ့ရာ “ဟုတ်ပါတယ်။ ဟုတ်ကဲ့ပါ။ တခြား ဘာမှ မပြောပါဘူး။ ဒါက ပါတီအနေနဲ့ လုပ်တာပါ” ဟု အတည်ပြု ပြောကြားသည်။

ရန်ကုန်မြို့တွင် ဇူလိုင် ၉ ရက်က ပြုလုပ်သည့် နိုင်ငံရေးအကျဉ်းသားများအတွက် အလုပ်အကိုင် ဖန်တီးပေးရေး အရပ်ဘက် အဖွဲ့အစည်းနှင့် မီဒီယာစီမံကိန်း အလုပ်ရုံဆွေးနွေးပွဲတွင် ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းက “အခု ဒီမိုကရေစီ ရနေပြီလို့တော့ ထင်နေနိုင်ပါတယ်။ ဒီမိုကရေစီရဖို့ ကြိုးပမ်းနေရတဲ့ ကာလမှာပဲ ရှိပါသေးတယ်။ အရပ်သား အုပ်ချုပ်ရေး စနစ် တက်လာပေမယ့် အရပ်ဘက် စစ်ဘက် ဆက်ဆံရေးဆိုတာ ဒီမိုကရေစီခေတ်မှာ မရှိပါဘူး။ အရပ်သား အုပ်ချုပ်ရေး စနစ်ရဲ့ အောက်မှာပဲ စစ်ဘက်ဆိုတာ ရှိရမှာပဲ ဖြစ်ပါတယ်။ ဒါပေမဲ့ ကာကွယ်ရေးဦးစီးချုပ်ဆိုတာ ကျွန်တော်တို့ Protocol အရဆိုရင် ညွှန်ကြားရေးမှူးချုပ် Level ပဲ ဖြစ်ပါတယ်။ ဒါပေမဲ့ ကျွန်တော်တို့ Relation ဆက်ဆံနေရတဲ့ ဥစ္စာက နိုင်ငံ့အကြီးအကဲ Level တစ်ခုတည်းကို ထည့်ဆက်ဆံနေရတယ်။ ဒါ ဒီမိုကရေစီ မဟုတ်ပါဘူး” ဟု ပြောကြားသည်။

ထို့နောက် ရန်ကုန်တိုင်းဒေသကြီး ၀န်ကြီးချုပ်၏ ပြောကြားချက်နှင့် ပတ်သက်၍ တပ်မတော် သတင်းမှန်ပြန်ကြားရေးအဖွဲ့က ဇူလိုင် ၁၂ ရက်တွင် တပ်မတော်၏ သဘောထားထုတ်ပြန်ချက်ကို ထုတ်ပြန်ရာ၌ ဦးဖြိုးမင်းသိန်း အနေဖြင့် ၂၀၀၈ ခုနှစ်၊ ဖွဲ့စည်းပုံ အခြေခံဥပဒေပါ ပြဋ္ဌာန်းချက်များအတိုင်း ၀န်ကြီးချုပ်၏ တာဝန်နှင့် လုပ်ငန်းများကို ဆောင်ရွက်နေခြင်းသာဖြစ်ပြီး တပ်မတော် ကာကွယ်ရေးဦးစီးချုပ် အနေဖြင့်လည်း ၂၀၀၈ ခုနှစ် ဖွဲ့စည်းပုံ အခြေခံဥပဒေက အပ်နှင်းထားသော တာဝန်များနှင့်အညီ နိုင်ငံတော်ကာကွယ်ရေး တာဝန်များကို ထမ်းဆောင်လျက်ရှိကြောင်း ဖော်ပြထားသည်။

နိုင်ငံတော် အစိုးရ၏ တည်ငြိမ်အေးချမ်းရေးနှင့် တရားဥပဒေ စိုးမိုးရေး၊ တိုင်းရင်းသား စည်းလုံးညီညွတ်ရေးနှင့် ပြည်တွင်းငြိမ်းချမ်းရေး၊ လူမှုစီးပွား ဖွံ့ဖြိုးတိုးတက်ရေးတို့ကို ကဏ္ဍအလိုက် တိုင်းပြည်အကျိုး ရှေးရှုဆောင်ရွက်လျက်ရှိသော တပ်မတော်နှင့် တပ်မတော်ကာကွယ်ရေး ဦးစီးချုပ်အပေါ် ရန်ကုန်တိုင်းဒေသကြီး အစိုးရအဖွဲ့ ၀န်ကြီးချုပ် ဦးဖြိုးမင်းသိန်း အနေဖြင့် ယခုကဲ့သို့ လက်လွတ်စပယ်နှင့် ထိပ်တိုက်ရင်ဆိုင်မှု ပုံစံဖြင့် ပြောကြားချက်သည် နိုင်ငံတော်အစိုးရ၏ အမျိုးသားရင်ကြားစေ့ရေး ဦးတည်ချက်ကို ထိခိုက်စေသည့်အပြင် နိုင်ငံတော်အစိုးရနှင့် တပ်မတော်အကြား၊ တိုင်းရင်းသားပြည်သူလူထုနှင့် တပ်မတော်အကြား ဆက်ဆံရေး ပိုမိုကောင်းမွန်စေရန် စဉ်ဆက်မပြတ် တည်ဆောက်သွားရမည်ဖြစ်သော ရေရှည်ဆက်ဆံရေး လုပ်ငန်းစဉ်များ အတွက်လည်း အခက်အခဲ ဖြစ်လာစေနိုင်သူဖြစ်ကြောင်း သုံးသပ်ရပါသည်ဟု ထုတ်ပြန်ချက်တွင် ပါရှိသည်။

ထို့ကြောင့် တပ်မတော်အနေဖြင့် အပြုသဘောဖြင့် ရေရှည်ဆက်ဆံရန် မသင့်လျော်သောကြောင့် ရန်ကုန်တိုင်းဒေသကြီး အစိုးရအဖွဲ့ ၀န်ကြီးချုပ် ဦးဖြိုးမင်းသိန်းအား လိုအပ်သလို စိစစ် အရေးယူပေးနိုင်ရန် နိုင်ငံတော် အစိုးရထံ တင်ပြခဲ့ရခြင်း ဖြစ်သည်ဟု သဘောထား ထုတ်ပြန်ချက်တွင် ဖော်ပြထားသည်။

ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်း၏ ပြောကြားချက်သည် နိုင်ငံတော်အစိုးရ၏ ရပ်တည်ချက် သဘောထား မဟုတ်ကြောင်းနှင့် ရန်ကုန်တိုင်းဒေသကြီး ၀န်ကြီးချုပ် ဆောင်ရွက်ရမည့် အပိုင်းကို ညွှန်ကြားထားပြီးဖြစ်ကြောင်း နိုင်ငံတော်အတိုင်ပင်ခံရုံး ၀န်ကြီးဌာန ညွှန်ကြားရေးမှူးချုပ် ဦးဇော်ဌေးက ဇူလိုင် ၁၃ ရက်က ပြောကြားထားသည်။

Writer: 
ဝီရမိုးနေ