ပြည်သူ့လွှတ်တော်ဘဏ်များနှင့် ငွေကြေးဆိုင်ရာ ဖွံ့ဖြိုးတိုးတက်ရေးကော်မတီ လွှတ်တော်သို့ နှစ်ပတ်လည်အစီရင်ခံစာ တင်သွင်း

ပြည်သူ့လွှတ်တော်ဘဏ်များနှင့် ငွေကြေးဆိုင်ရာ ဖွံ့ဖြိုးတိုးတက်ရေးကော်မတီက လွှတ်တော်သို့ နှစ်ပတ်လည်အစီရင်ခံစာကို နေပြည်တော်တွင် ဇွန် ၁၉ ရက်က ကျင်းပသည့် ပြည်သူ့လွှတ်တော် အစည်းအဝေး၌ ၎င်းကော်မတီ အတွင်းရေးမှူး၊ ဆိပ်ကြီးခနောင်တို မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးတင်ထွန်းနိုင်က တင်သွင်းခဲ့သည်။

ကော်မတီသက်တမ်း တစ်နှစ်တာကာလအတွင်း ကော်မတီအစည်းအဝေး (၁၅) ကြိမ်၊ ဘတ်ဂျက်စိစစ်ရေး ပူးပေါင်းအစည်းအဝေးသုံးကြိမ်၊ သက်ဆိုင်ရာဝန်ကြီးဌာနများနှင့် အစည်းအဝေးသုံးကြိမ် ကျင်းပဆောင်ရွက်နိုင်ခဲ့ကြောင်း၊ ပြည်တွင်းပြည်ပ အဖွဲ့အစည်းများ တွေ့ဆုံမှုအနေဖြင့် ကျွမ်းကျင်ပညာရှင်များ လက်ခံတွေ့ဆုံမှုသုံးကြိမ်၊ ၀န်ကြီးဌာန အဖွဲ့အစည်းဝင်များနှင့် တွေ့ဆုံမှုသုံးကြိမ်၊ ပြည်ပနိုင်ငံတကာ အဖွဲ့အစည်းများနှင့် တွေ့ဆုံမှု (၁၁) ကြိမ်ရှိကြောင်း ဦးတင်ထွန်းနိုင်ကဆိုသည်။

“ကော်မတီအနေနဲ့ ကျေးလက်နေပြည်သူအများစုနဲ့ တောင်သူလယ်သမားများအတွက် အင်မတန်အရေးပါတဲ့ မြန်မာ့စိုက်ပျိုးရေးနဲ့ ကျေးလက်ဖွံ့ဖြိုးရေးဘဏ်ဥပဒေ၊ န၀တဥပဒေအမှတ် ၃/၁၉၉၇ အား ခေတ်နဲ့လျော်ညီသော ဥပဒေဖြစ်စေရန် ပညာရှင်များကိုဖိတ်ခေါ်၍ အထူးဦးစားပေး လေ့လာဆန်းစစ်မှုများ ဆောင်ရွက်ခဲ့ပါတယ်။ သို့သော် ၎င်းဥပဒေနဲ့ စည်းနှောင်ပြဋ္ဌာန်းထားသော မြန်မာ့လယ်ယာ ဖွံ့ဖြိုးရေးဘဏ်အား ဖွဲ့စည်းပုံအပါအ၀င် ဘဏ်လုပ်ငန်းမူဝါဒ အခြေခံမှစ၍ ပြုပြင်ပြောင်းလဲရန် ပြည်ထောင်စုအစိုးရအဖွဲ့မှ ဆုံးဖြတ်ခဲ့ပြီး စီမံကိန်းနှင့်ဘဏ္ဍာရေး ၀န်ကြီးဌာနမှ လိုအပ်တဲ့ပြုပြင်ပြောင်းလဲမှုများ စတင်ဆောင်ရွက်နေပြီဖြစ်တဲ့အတွက် တည်ဆဲဥပဒေအား ပြင်ဆင်ပြဋ္ဌာန်းရန် လေ့လာစိစစ်နေမှုများအား ဆိုင်းငံ့ထားရှိခဲ့ရပါတယ်” ဟု ပြည်သူ့လွှတ်တော်ကိုယ်စားလှယ် ဦးတင်ထွန်းနိုင်က ကော်မတီနှစ်ပတ်လည် အစီရင်ခံစာ တင်သွင်းရာတွင် ထည့်သွင်းပြောကြားသည်။

ပြည်သူ့လွှတ်တော်ဘဏ်များနှင့် ငွေကြေးဆိုင်ရာ ဖွံ့ဖြိုးတိုးတက်ရေးကော်မတီ၏ နှစ်ပတ်လည်အစီရင်ခံစာနှင့် ပတ်သက်၍ ဆွေးနွေးလိုသည့် လွှတ်တော်ကိုယ်စားလှယ်များအနေဖြင့် အမည်စာရင်း တင်သွင်းနိုင်ကြောင်း လွှတ်တော်ဒုတိယဥက္ကဋ္ဌက ကြေညာသည်။
 

Writer: 
ငြိမ်းဇော်လင်း၊ မျိုးမင်းထက်