ပြည်ပချေးငွေယူပြီး ဆောင်ရွက်သည့် စီမံကိန်းများတွင် အကြောင်းအမျိုးမျိုးကြောင့် မျှော်မှန်းသည့်အတိုင်း အောင်မြင်မှု မရှိခြင်း၊ အားနည်းမှု ရှိနေခြင်းများကို တွေ့ရှိရကြောင်း စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက ပြည်ထောင်စု လွှတ်တော်၌ ပြောကြားသည်။
ဇန်နဝါရီ ၃၁ ရက် ပြည်ထောင်စုလွှတ်တော် အစည်းအဝေးတွင် ၂၀၁၆-၂၀၁၇ ဘဏ္ဍာနှစ် အစိုးရ၏ ကြွေးမြီဆိုင်ရာ နှစ်ပတ်လည် အစီရင်ခံစာ အပါအဝင် လွှတ်တော် ကိုယ်စားလှယ်များ၏ ဆွေးနွေးချက်များအား ရှင်းလင်းစဉ် ပြောကြားခဲ့ခြင်းဖြစ်သည်။
ဒုတိယဝန်ကြီးဦးမောင်မောင်ဝင်းက “ပြည်ပချေးငွေရယူပြီး အကောင်အထည်ဖော် ဆောင်ရွက်တဲ့စီမံကိန်းတွေမှာ အကြောင်း ကြောင်းကြောင့် မျှော်မှန်းတဲ့အတိုင်း အောင် မြင်မှုမရှိခြင်း၊ အားနည်းမှုရှိခြင်းတို့ကို တွေ့ မြင်ကြရပါတယ်။ ဒါကြောင့် ယင်းအားနည်း ချက်၊ လိုအပ်ချက်တွေကို သင်ခန်းစာယူပြီး သေချာစွာစိစစ်သုံးသပ် ဆောင်ရွက်လျက်ရှိပါ တယ်။ ပြည်ပချေးငွေရယူရာမှာ ဦးစွာ သက် ဆိုင်ရာဝန်ကြီးဌာနက မိမိဝန်ကြီးဌာန၏ မူဝါဒ၊ ရည်မှန်းချက်တွေနဲ့ကိုက်ညီမှု ရှိမရှိ စိစစ်သုံးသပ်ရမှာဖြစ်ပါတယ်”ဟု ပြည် ထောင်စုလွှတ်တော်တွင် ပြောကြားသည်။
ထို့ပြင် ဝန်ကြီးဌာန၏ အဆိုပြုချက်ကို ဖွံ့ဖြိုးမှုအကူအညီများ ညှိနှိုင်းရေးအဖွဲ့မှ ထပ်မံစိစစ်ခြင်း၊ အခြားသောအဖွဲ့အစည်းများနှင့် ဆက်စပ်ဝန်ကြီးဌာနများ၏ အကြံဉာဏ်များ ရယူခြင်းဖြင့် ချေးငွေရယူသင့်မသင့် စိစစ် ကြောင်း၊ ယခုချမှတ်ထားပြီးဖြစ်သည့် မြန်မာ နိုင်ငံ၏ ဖွံ့ဖြိုးမှုအကူအညီဆိုင်ရာမူဝါဒနှင့်လည်း စိစစ်ရမည်ဖြစ်ကြောင်း၊ ထိရောက် သော ချေးငွေဖြစ်စေရေးနှင့် နိုင်ငံနှင့်ပြည်သူ အတွက် အကျိုးဖြစ်ထွန်းသည့် စီမံကိန်းလုပ် ငန်းများဖြစ်ရေးအတွက် စီမံကိန်းများကို စနစ်တကျစိစစ်နိုင်ရန် စီမံကိန်းစိစစ်ရေးနှင့် တိုးတက်မှုအစီရင်ခံရေးဦးစီးဌာနကို တာဝန် ပေးဆောင်ရွက်လျက်ရှိကြောင်း ဒုတိယဝန် ကြီးက ပြောကြားသည်။
ထို့ပြင် လွှတ်တော်ကိုယ်စားလှယ် ဒေါ် ခင်စန်းလှိုင်၏ ဆွေးနွေးချက်ဖြစ်သည့် ချေး ငွေဖြင့်ဆောင်ရွက်သည့် စီမံကိန်းများသည် ပြည်သူလူထုအတွက် အမှန်တကယ် အကျိုး ကျေးဇူးဖြစ်ထွန်းစေသည့် စီမံကိန်းဖြစ်မှသာ ကြွေးတင်ရကျိုးနပ်မည်ဆိုသည်မှာ အလွန် မှန်ကန်သည့်အချက်ဖြစ်ကြောင်း၊ နိုင်ငံတော်က တာဝန်ယူ၍ ပေးဆပ်ရမည့် ချေးငွေများ ဖြင့် စီမံကိန်းများ အကောင်အထည်ဖော် ဆောင်ရွက်သည့် သက်ဆိုင်ရာဝန်ကြီးဌာန များအနေဖြင့် စီမံကိန်းရည်မှန်းချက်များ သတ်မှတ်ချိန်အတွင်း ပြည့်မီစေရေးနှင့် လေလွင့်ဆုံးရံှုံးမှုမရှိစေရေးတို့ကို အလေးထား ဆောင်ရွက်သင့်ကြောင်း၊ ဆောင်ရွက်မှုအခြေ အနေများကိုလည်း ပွင့်လင်းမြင်သာမှုရှိရှိဖြင့် အများပြည်သူသိရှိစေရေး ပြည်ထောင်စု လွှတ်တော်မှတစ်ဆင့် တိုးတက်မှုအစီရင်ခံမှု များကိုဆောင်ရွက်သင့်ကြောင်း၊ စီမံကိန်းနှင့် ဘဏ္ဍာရေးဝန်ကြီးဌာနအနေဖြင့်လည်း ချေး ငွေသုံးစွဲမှုနှင့် လုပ်ငန်းတိုးတက်မှုများကို စောင့်ကြည့်သုံးသပ်သွားမည်ဖြစ်ကြောင်း ဒုတိယဝန်ကြီးက ပြောကြားသည်။
၂၀၁၆ ခုနှစ်တွင် ပြည်သူ့ကြွေးမြီ စီမံခန့် ခွဲမှုဥပဒေကိုပြဋ္ဌာန်းနိုင်ခဲ့ပြီးနောက် အစိုးရ/ဌာန/အဖွဲ့အစည်းများအနေဖြင့် ယခင်ကကဲ့ သို့ တိုက်ရိုက်ငွေချေးယူခြင်း၊ စာချုပ်လက် မှတ်ရေးထိုးခြင်းများ ဆောင်ရွက်၍မရတော့ဘဲ စီမံကိန်းနှင့် ဘဏ္ဍာရေးဝန်ကြီးဌာနမှသာ ပြည်ထောင်စုလွှတ်တော်၏ အတည်ပြုချက်ဖြင့် နိုင်ငံတော်ကိုယ်စား တာဝန်ယူကာ ငွေချေးယူခြင်း၊ စာချုပ်လက်မှတ်ရေးထိုးခြင်းများကို ဆောင်ရွက်လျက်ရှိကြောင်း၊ အစိုးရ မဟုတ်သော အဖွဲ့အစည်းများသို့ အာမခံချက် ထုတ်ပေးခြင်းမရှိကြောင်း ဒုတိယဝန်ကြီး ဦးမောင်မောင်ဝင်းက ပြောကြားသည်။
ပြည်ပချေးငွေရယူရာတွင် နိုင်ငံတော်၏မူဝါဒများ၊ အမျိုးသားစီမံကိန်းများ၊ ဦးစားပေး လုပ်ငန်းအစီအစဉ်များနှင့် လိုအပ်ချက်များ ကို အခြေခံစဉ်းစားရသည့်အပြင် သက်ဆိုင်ရာ ချေးငွေပေးအပ်မည့် ပြည်ပနိုင်ငံ/အဖွဲ့အစည်းများမှ ကူညီပံ့ပိုးပေးလိုသည့် နယ် ပယ်၊ ကူညီလိုသည့်ပမာဏ စသည်တို့နှင့် လည်း ပေါင်းစပ်ညှိနှိုင်း ဆောင်ရွက်ရခြင်းဖြစ် ကြောင်း ဒုတိယဝန်ကြီးက ပြောကြားသည်။
၂၀၁၇ ခုနှစ် စက်တင်ဘာ ၃၀ ရက်အထိ ဌာန၊ အဖွဲ့အစည်းအလိုက် ပေးရန်ရှိသည့် ပြည်ပကြွေးမြီအခြေအနေမှာ စုစုပေါင်း အမေရိကန်ဒေါ်လာ ၉,၅၇၁,၇၁၃,၄၀၄ ဒသမ ၂၈ ဖြစ်သည်။
၂၀၁၁-၂၀၁၂ ဘဏ္ဍာနှစ်မှ ၂၀၁၇-၂၀၁၈ ဘဏ္ဍာနှစ်အထိ နှစ်အလိုက် နိုင်ငံ တော်၏ ပြည်တွင်းပြည်ပကြွေးမြီအခြေအနေ မှာ သမ္မတဦးသိန်းစိန်လက်ထက်ဖြစ်သည့် ၂၀၁၁-၂၀၁၂ ခုနှစ်တွင် ပြည်တွင်းကြွေးမြီ ကျပ် ၉၉၃၈ ဘီလျံ၊ ပြည်ပကြွေးမြီ ကျပ် ၆၃၃၅ ဘီလျံ၊ ၂၀၁၂-၂၀၁၃ ခုနှစ်တွင် ပြည်တွင်း ကြွေးမြီ ကျပ် ၁၀၈၂၄ ဘီလျံ၊ ပြည်ပကြွေးမြီ ကျပ် ၇၃၀၁ ဘီလျံ၊ ၂၀၁၃-၂၀၁၄ ခုနှစ်တွင် ပြည်တွင်းကြွေးမြီ ကျပ် ၁၂၀၁၄ ဘီလျံ၊ ပြည်ပ ကြွေးမြီ ကျပ် ၉၅၆၁ ဘီလျံ၊ ၂၀၁၄-၂၀၁၅ ခုနှစ်တွင် ပြည်တွင်းကြွေးမြီ ကျပ် ၁၂၄၈၇ ဘီလျံ၊ ပြည်ပကြွေးမြီ ကျပ် ၉၅၄၅ ဘီလျံ၊ ၂၀၁၅-၂၀၁၆ ခုနှစ်တွင် ပြည်တွင်းကြွေးမြီ ကျပ် ၁၅၇၂၄ ဘီလျံ၊ ပြည်ပကြွေးမြီ ကျပ် ၁၂၂၄၆ ဘီလျံဖြစ်ကြောင်း သိရသည်။
အမျိုးသားဒီမိုကရေစီအဖွဲ့ချုပ်ဦးဆောင် သည့် အစိုးရသစ်လက်ထက်ဖြစ်သည့် ၂၀၁၆- ၂၀၁၇ ခုနှစ်တွင် ပြည်တွင်းကြွေးမြီ ကျပ် ၁၈၀၂၀ ဘီလျံ၊ ပြည်ပကြွေးမြီ ကျပ် ၁၀၈၄၁ ဘီလျံ၊ ၂၀၁၇-၂၀၁၈ ခုနှစ် စက်တင်ဘာ ၃၀ ရက်အထိ ပြည်တွင်းကြွေးမြီ ကျပ် ၁၉၃၆၀ ဘီလျံ၊ ပြည်ပကြွေးမြီ ကျပ် ၁၃၁၁၃ ဘီလျံဖြစ် ကြောင်း သိရသည်။ စိုးမင်းထိုက်၊ စည်သူ
