ဆက်သွယ်ရေးဥပဒေ ပုဒ်မ ၆၆ (ဃ) ကို ပြင်ဆင်သင့်ကြောင်းနှင့် နိုင်ငံတကာ အဖွဲ့အစည်းများကလည်း ဖျက်သိမ်းရန် ပြောဆိုအကြံပြုမှုများ ရှိကြောင်း လွှတ်တော် ပို့ဆောင်ရေး၊ ဆက်သွယ်ရေးနှင့် ဆောက်လုပ်ရေးဆိုင်ရာ ကော်မတီဥက္ကဋ္ဌ ပြောကြား

ဆက်သွယ်ရေး ဥပဒေပုဒ်မ ၆၆ (ဃ) ကို ပြင်ဆင်သင့်ကြောင်းနှင့် နိုင်ငံတကာ အဖွဲ့အစည်းများကလည်း ဖျက်သိမ်းရန် ပြောဆို အကြံပြုမှုများ ရှိကြောင်း ပြည်သူ့လွှတ်တော် ပို့ဆောင်ရေး၊ ဆက်သွယ်ရေးနှင့် ဆောက်လုပ်ရေးဆိုင်ရာ ကော်မတီဥက္ကဋ္ဌ၊ ဆိပ်ကမ်းမဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးတင်မောင်ဝင်းက The Daily Eleven သတင်းစာကို ပြောကြားသည်။

အဆိုပါ ပုဒ်မ ၆၆ (ဃ) နှင့်ပတ်သက်၍ ပြင်ဆင်မည်ဆိုပါက အားလုံးပါဝင်သည့် ကြားနာမှုများ ပြုလုပ်ပြီးမှသာ ပြင်ဆင်သင့်ကြောင်း ပြည်သူ့လွှတ်တော်ကိုယ်စားလှယ် ဦးတင်မောင်ဝင်းက ဆိုသည်။

“၆၆ (ဃ) က တကယ်တမ်းကျတော့ ဒါက ပို့ဆောင်ရေး၊ ဆက်သွယ်ရေးနဲ့ ဆောက်လုပ်ရေးရာ ကော်မတီနဲ့ ဆိုင်တာ။ ဆက်နွှယ်နေတာပေါ့။ ဆက်နွှယ်နေတော့ အဲဒါနဲ့ ပတ်သက်လို့ ကိုယ်တို့က ဒါဘယ်လိုဖြစ်မယ် ဆိုတာကို ပြင်သင့်လား၊ ဖျက်သင့်လား ဆိုတာကို နိုင်ငံတကာ လူ့အခွင့်အရေး အဖွဲ့တို့လည်း လာကြတော့ လာလို့ရှိရင် သူတို့နဲ့တွေ့တယ်။ သူတို့ကတော့ ဒါကို နိုင်ငံတကာမှာ မရှိတဲ့ အတွက် ဒါက မရှိသင့်ဘူးဆိုတဲ့အကြောင်းတွေ ပြောတာပေါ့နော်။ ဒါပေမဲ့ ကျွန်တော်တို့ဘက်ကျတော့ ဒီအတိုင်းလုပ်လို့ မရသေးဘူး။ ဒါတွေကို ကြားနာရမှာပေါ့။ ကြားနာတယ်ဆိုတာ ဆက်သွယ်ရေးဝန်ကြီးဌာနက ဘာပြောစရာ ရှိမလဲ။ ပြည်သူလူထုက ဘာပြောစရာ ရှိမလဲ။ အဲဒါတွေ အကုန်လုံး ခြုံငုံပြီးတော့ ပြင်သင့်လား တစ်ခုခုပေါ့” ဟု ကော်မတီဥက္ကဋ္ဌ ဦးတင်မောင်ဝင်းက ဆက်လက်ပြောကြားသည်။

လတ်တလောတွင် ပြည်သူ့လွှတ်တော် ဥက္ကဋ္ဌ အနေဖြင့် ဆက်သွယ်ရေးဥပဒေနှင့် ပတ်သက်၍ ပြည်သူ့လွှတ်တော် ပို့ဆောင်ရေး၊ ဆက်သွယ်ရေးနှင့် ဆောက်လုပ်ရေးဆိုင်ရာ ကော်မတီအား အကြံပြုတင်ပြရန် ညွှန်ကြားထားခြင်းမျိုး မရှိသေးကြောင်း ဦးတင်မောင်ဝင်းက ပြောကြားသည်။

ထို့ပြင် ကော်မတီဥက္ကဋ္ဌ ဦးတင်မောင်ဝင်းက ဆက်သွယ်ရေးဥပဒေပုဒ်မ ၆၆ (ဃ)နှင့် ပတ်သက်၍ “ဖျက်သိမ်းတာတော့ မဟုတ်ဘူး။ ပြင်တော့ ပြင်ဆင်သင့်တာပေါ့။ ပြင်ဆင်သင့်တာတော့ အာမခံပေးရမယ်လို့ ထည့်ရေးရမလားပေါ့။ အဲဒါလည်း Lawyer တွေ မေးကြည့်တော့ ဒါထည့်ရေးစရာ မလိုဘူးတဲ့။ ဒါ တရားသူကြီးက အာမခံပေးလို့ရရင် သူ့ဘာသာပေးဆိုတော့။ ဒါပေမဲ့ တရားသူကြီးတွေက ဆွဲလိုက်ပြီဆိုတာနဲ့ အာမခံ မပေးကြတာ များတယ်။ ဒါလည်း ဘာကြောင့်လဲမသိဘူး။ အဲဒီတော့ ပြင်တော့ပြင်ရမယ်။ ပြင်သင့်တယ်။ ပို့ဆောင်ဆက်သွယ်ရေးဥက္ကဋ္ဌ တစ်ယောက်အနေနဲ့ ၆၆ (ဃ) သည် နိုင်ငံတကာ စံချိန်စံညွှန်းတွေနဲ့ ညှိနှိုင်းပြီးတော့ ပြင်ဆင်ရန် သင့်ပါတယ်” ဟု ပြောကြားသည်။

နိုင်ငံတကာ အဖွဲ့အစည်းအချို့နှင့် တွေ့ဆုံဆွေးနွေးရာတွင်လည်း ပုဒ်မ ၆၆ (ဃ) ကို ဖျက်သိမ်းသင့်ကြောင်း၊ ဆွေးနွေးပြောဆိုမှုများ ရှိကြောင်း ပြည်သူ့လွှတ်တော် ပို့ဆောင်ရေး၊ ဆက်သွယ်ရေးနှင့် ဆောက်လုပ်ရေးဆိုင်ရာ ကော်မတီဥက္ကဋ္ဌ ဦးတင်မောင်ဝင်းက ဆက်လက်ပြောကြားသည်။

နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) ၏ ၂၀၁၇ မတ်လအတွက် နိုင်ငံရေးအကျဉ်းသားပြ လစဉ် အစီရင်ခံစာနှင့် နိုင်ငံရေး အကျဉ်းသားစာရင်း ထုတ်ပြန်ချက်တွင် မြန်မာနိုင်ငံတွင်း၌ နိုင်ငံရေးလှုပ်ရှားမှုများကြောင့် ဖမ်းဆီးထိန်းသိမ်းခံထားရသူ ၂၉၉ ဦးရှိကြောင်းနှင့် နိုင်ငံရေး အကျဉ်းသားများအဖြစ် စုစုပေါင်း ၉၃ ဦး အကျဉ်းကျခံနေရပြီး တက်ကြွလှုပ်ရှားသူ ၈၅ ဦးသည် အကျဉ်းထောင်တွင်းမှနေ၍ တရားရင်ဆိုင်နေရကာ ၁၂၁ ဦးသည် အကျဉ်းထောင်ပြင်ပမှနေ၍ တရားရင်ဆိုင်နေရကြောင်း ဧပြီ ၁၁ ရက်က ထုတ်ပြန်ထားသည်။

ထို့ပြင် AAPP ၏ အစီရင်ခံစာတွင် မတ်လအတွင်း ဆက်သွယ်ရေးဥပဒေပုဒ်မ ၆၆ (ဃ) ဖြင့် လေးဦး၊ ပုဒ်မ ၅၀၀ ဖြင့် တစ်ဦးနှင့် လက်ပံတောင်း သတ္တုတူးဖော်ရေး ဆန္ဒပြခြင်းနှင့် ပတ်သက်၍ ၅၀ တရားစွဲဆိုခံခဲ့ရကြောင်း ဖော်ပြထားပြီး နိုင်ငံသားများကို လွတ်လပ်စွာ ထုတ်ဖော်ပြောဆိုခွင့်မှ ရပ်တန့်သွားစေရန် ဆက်သွယ်ရေးဥပဒေ၊ အီလက်ထရွန်နစ် အက်ဥပဒေတို့အား ဆက်လက်အသုံးပြုလျက် ရှိသည်ဟုလည်း ထည့်သွင်းဖော်ပြထားသည်။

Writer: 
မျိုးမင်းထက်