နိုင်ငံတော်အစိုးရသည် စီးပွားရေးလုပ်ငန်းများ ဆောင်ရွက်ခြင်းထက် စည်းမျဉ်းစည်းကမ်းများဖြင့် ထိန်းကျောင်းခြင်းကိုသာ ဆောင်ရွက်သင့်ပြီး နိုင်ငံပိုင်စီးပွားရေး လုပ်ငန်းအချို့ကို ပုဂ္ဂလိကကဏ္ဍသို့ လွှဲပြောင်းပေးသင့်ကြောင်း စီမံ/ဘဏ္ဍာဝန်ကြီး ပြောကြား

မြန်မာနိုင်ငံ ဖွံ့ဖြိုးတိုးတက်ရေးအတွက် အစိုးရသည် စီးပွားရေးလုပ်ငန်းများ ဆောင်ရွက်ခြင်းထက် စည်းမျဉ်းစည်းကမ်းများဖြင့် ထိန်းကျောင်းခြင်းကိုသာ ဆောင်ရွက်သင့်ပြီး နိုင်ငံပိုင်စီးပွားရေး လုပ်ငန်းအချို့ကို အမှန်တကယ် လုပ်ကိုင်နိုင်သည့် ပုဂ္ဂလိကကဏ္ဍသို့ လွှဲပြောင်းပေးသင့်ကြောင်း  စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက မတ် ၁၈ ရက်က ရန်ကုန်မြို့ရှိ Novotel Yangon Max Hotel တွင်ကျင်းပသည့် Meeting between Chairman of Myanmar Investment Commission and Foreing Business Communities အခမ်းအနား၌ဆိုသည်။

“နိုင်ငံတစ်နိုင်ငံ တိုးတက်အောင် လုပ်မယ်ဆိုရင် အစိုးရက စီးပွားရေးလုပ်စရာ အကြောင်းမရှိပါဘူး။ အစိုးရက နိုင်ငံတော် တိုးတက်ရေးအတွက် လိုအပ်တဲ့လုပ်ထုံးလုပ်နည်း စည်းမျဉ်းစည်းကမ်းတွေကို ပြဋ္ဌာန်းဖို့နဲ့ ပြဋ္ဌာန်းထားတဲ့ ဥပဒေတွေကို တရားဥပဒေနဲ့အညီ လိုအပ်သလို ပံ့ပိုးဆောင်ရွက်ပေးဖို့ပဲ။ ကျန်တာက နိုင်ငံဖွံ့ဖြိုး တိုးတက်ဖို့ဆိုရင် စီးပွားရေးမလုပ်တတ်တဲ့ အစိုးရအနေနဲ့ လုပ်စရာမလိုဘဲ စီးပွားရေးတကယ် လုပ်တတ်တဲ့ လုပ်ငန်းရှင်တွေလက်ထဲကို လွှဲအပ်ပေးဖို့၊ နိုင်ငံတစ်နိုင်ငံရဲ့ စီးပွားရေး ဖွံ့ဖြိုးတိုးတက်မှုဟာ ပြည့်ဝမ်းဗိုက်လို့ခေါ်တဲ့ စီးပွားရေးလုပ်ငန်းရှင်တွေ လက်ထဲမှာပဲရှိစေရမယ်။ မလိုလားအပ်ဘဲ နိုင်ငံပိုင်ဆိုင်တဲ့ စီးပွားရေးလုပ်ငန်းတွေ စက်မှုလုပ်ငန်းတွေ ကျွန်တော်တို့လက်ထဲမှာ ကိုင်ထားစရာမရှိဘူး။ ကျွန်တော်တို့ စီးပွားရေးယန္တရားတွေ နားမလည်ဘူး။ အုပ်ချုပ်မှုပဲ နားလည်တယ်။ ဒီလိုနားလည်တဲ့ ဥာဏ်လောက်နဲ့ ဒီလိုနားလည်တဲ့ အတွေးအခေါ်လောက်နဲ့ စီးပွားရေးလုပ်လို့ရှိရင် ကျွန်တော်တို့ ဆုံးရှုံးနေမှာပဲ။ မတိုးတက်နိုင်ဘူး” ဟု ပြည်ထောင်စုဝန်ကြီး ဦးကျော်ဝင်းက ပြောကြားသည်။ မြန်မာနိုင်ငံ၏ စီးပွားရေးတွင် မျှတစွာ ယှဉ်ပြိုင်မှုသည် စီးပွားရေးတိုးတက်မှုနှင့် စားသုံးသူများကို အကျိုးကျေးဇူး ဖြစ်ထွန်းစေကြောင်း သိရသည်။

မြန်မာနိုင်ငံသည် ဘတ်ဂျက်လိုငွေ၊ ကုန်သွယ်ရေးလိုငွေနှင့် ဆင်းရဲနွမ်းပါးမှုတို့ကို ရင်ဆိုင်နေရသဖြင့် အဆိုပါအခက်အခဲများကို ဖြေရှင်းနိုင်ရေးသည် နိုင်ငံတော်အစိုးရ၏ ဦးစားပေးလုပ်ငန်းများဖြစ်ကြောင်း၊ အခက်အခဲများကို အခွင့်အလမ်းများအဖြစ် ပြောင်းလဲရမည့်အချိန်ဖြစ်ကြောင်းနှင့် ယင်းအခွင့်အလမ်းများကို အကောင်အထည်ဖော်ရာတွင် နိုင်ငံခြား ရင်းနှီးမြှုပ်နှံသူများ အနေဖြင့် အဓိကအခန်းကဏ္ဍမှ ပါဝင်နိုင်ကြောင်း ပြည်ထောင်စုဝန်ကြီး ဦးကျော်ဝင်းက နိုင်ငံခြားစီးပွားရေး လုပ်ငန်းရှင်များနှင့် စီးပွားရေးအဖွဲ့အစည်းများတွင် တွေ့ဆုံရာတွင် ပြောကြားသည်။

အလားတူ မြန်မာနိုင်ငံ၏ ရင်းနှီးမြှုပ်နှံမှုဥပဒေနှင့် အသစ်ပြဋ္ဌာန်းမည့် စည်းမျဉ်းအသစ်သည် ပြည်တွင်းပြည်ပ စီးပွားရေးလုပ်ငန်းများကို တန်းတူအခွင့်အရေးများကို ဖန်တီးပေးမည်ဖြစ်ကြောင်းနှင့် နိုင်ငံတစ်ဝန်းလုံးရှိ ဒေသများအားလုံးသည် ဖွံ့ဖြိုးတိုးတက်ရန် အခွင့်အလမ်းများ တန်းတူရှိပြီး နိုင်ငံတော်၏ စီးပွားရေးတိုးတက်မှုအတွက် အရေးကြီးသဖြင့် ငြိမ်းချမ်းရေးရရှိရန် အရေးကြီးကြောင်း မြန်မာနိုင်ငံ ရင်းနှီးမြှုပ်နှံမှု ကော်မရှင်ဥက္ကဋ္ဌ ဦးကျော်ဝင်းက ပြောကြားသည်။         

Writer: 
နီလာ