ရွေးကောက်ပွဲအနိုင်မရ နိုင်ငံရေးပါတီများ၏ သဘောထားများကို စုစည်း၍ ၂၁ ရာစု ပင်လုံညီလာခံ တက်ရောက်ခွင့်ရှိသည့် ပါတီများက ကိုယ်စားတင်ပြသွားရန်ရှိကြောင်း UPDJC ၏ နိုင်ငံရေးပါတီအစုအဖွဲ့ အဖွဲ့ဝင်ပြောကြား

အစိုးရအစုအဖွဲ့၊ တိုင်းရင်းသား လက်နက်ကိုင်များအစုအဖွဲ့၊ နိုင်ငံရေးပါတီများ အစုအဖွဲ့တို့ပါဝင်သည့် UPDJC အစည်းအဝေး ဖေဖော်ဝါရီ ၆ ရက်က ပြုလုပ်နေသည်ကို တွေ့ရစဉ်

ရွေးကောက်ပွဲအနိုင်မရ နိုင်ငံရေးပါတီများ၏ သဘောထားများကို စုစည်း၍ ၂၁ ရာစု ပင်လုံညီလာခံ တက်ရောက်ခွင့်ရှိသည့် ပါတီများက ကိုယ်စား တင်ပြသွားရန်ရှိကြောင်း ပြည်ထောင်စု ငြိမ်းချမ်းရေး ဆွေးနွေးမှုပူးတွဲကော်မတီ (UPDJC) ၏ နိုင်ငံရေးပါတီအစုအဖွဲ့ အဖွဲ့ဝင် ကချင်ပြည်နယ် ဒီမိုကရေစီပါတီ (KSDP) ဥက္ကဋ္ဌဒေါက်တာ မနာမ်တူးဂျာက ပြောကြားသည်။

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) ၏ နိုင်ငံရေးဆွေးနွေးမှုဆိုင်ရာ မူဘောင်အရ ပြည်ထောင်စု ငြိမ်းချမ်းရေးညီလာခံတွင် တရားဝင် နိုင်ငံရေးပါတီများမှ ကိုယ်စားလှယ် ၁၅၀ ပါဝင်ခွင့်ရှိကြောင်း သတ်မှတ်ထားသည်။

ပြီးခဲ့သည့် အစိုးရလက်ထက် ၂၀၁၆ ခုနှစ် ဇန်န၀ါရီတွင် ပြုလုပ်ခဲ့သည့် ပြည်ထောင်စု ငြိမ်းချမ်းရေးညီလာခံတွင် တရားဝင်နိုင်ငံရေးပါတီများမှ ရွေးကောက်ပွဲအနိုင်ရသည် ဖြစ်စေ၊ အနိုင်မရသည်ဖြစ်စေ တက်ရောက်ခွင့်ရှိခဲ့ကြောင်း၊ သို့သော်လက်ရှိအစိုးရ လက်ထက် ၂၀၁၆ ခုနှစ် စက်တင်ဘာအတွင်းက ကျင်းပပြီးစီးခဲ့သည့် ပြည်ထောင်စု ငြိမ်းချမ်းရေး ညီလာခံ-၂၁ ရာစုပင်လုံ ပထမအစည်းအဝေးတွင် တရားဝင်နိုင်ငံရေးပါတီများထဲမှ ရွေးကောက်ပွဲ အနိုင်ရ နိုင်ငံရေးပါတီများ၏ ကိုယ်စားလှယ်များသာ တက်ရောက် ဆွေးနွေးခွင့်ရှိခဲ့ကြောင်း သိရသည်။

ဒေါက်တာ မနာမ်တူးဂျာက “ငြိမ်းချမ်းရေးညီလာခံမှာပါတီ ၉၀ ကျော်ရဲ့သဘောထား ပါဝင်မှုရှိနိုင်မရှိနိုင်ကတော့ လက်ရှိအစိုးရရဲ့ မူအပေါ်မှာ မူတည်သွားပါတယ်။ အရင်သမ္မတ ဦးသိန်းစိန် လက်ထက်တုန်းကတော့ ၉၂ ပါတီစလုံး ညီလာခံတက်ခွင့်ရှိတယ်။ ဒီတစ်ခေါက်ကတော့ မဲနိုင်တဲ့ပါတီပဲ ညီလာခံတက်ခွင့်ရှိတာကိုး။ လက်ရှိတော့ အဲဒီအတိုင်းပဲ ဆက်သွားနေတယ်။ မဲမနိုင်တဲ့ ပါတီတွေနဲ့ ပတ်သက်လို့ ကျွန်တော်တို့ တင်ပြတာတွေရှိတယ်။ ဆွေးနွေးပွဲတိုင်း ကျွန်တော်တို့ ပြောဖြစ်တယ်။ အာဏာပိုင်ဘက်ကတော့ သူတို့ချမှတ်ထားတဲ့ မူအတိုင်းပဲ မဲနိုင်တဲ့ပါတီတွေပဲ ညီလာခံတက်ဖို့ ဆက်ပြောနေတာပေါ့။ လက်ရှိတော့ မဲမနိုင်တဲ့ပါတီတွေက ညီလာခံတက်ဖို့ မရှိဘူးဆိုတော့ ကျွန်တော်တို့က တက်ခွင့်ရှိတဲ့ ပါတီတွေကပဲ ပင်လုံကို အဆင်ပြေသလို သူတို့ရဲ့သဘောထားတွေ ယူဆောင်သွားမယ်။ ပါတီတွေ တွေ့ဆုံစုစည်းညှိနှိုင်းမှုက ရလဒ်တွေကို UPDJC (ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ) ကိုပြန်ပြီးတင်ပြမယ်။ အဲဒီကနေ စုစည်းပြီးတော့ ညီလာခံကို တင်ပြသွားမယ်။ ဆွေးနွေးထားတဲ့ ဆွေးနွေးပွဲတိုင်းရဲ့ ရလဒ်တွေက အကျိုးရှိတယ်။ ဒီအတွက် နိုင်ငံရေးပါတီတွေ အားလုံးပါဝင်နိုင်တဲ့ ဆွေးနွေးမှုတွေကို ကျွန်တော်တို့ အလျဉ်းသင့်သလို လုပ်ဆောင်သွားဖို့ ရှိပါတယ်” ဟုပြောကြားသည်။

UPDJC ၏နိုင်ငံရေးပါတီများ အစုအဖွဲ့သည် ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) မှဖွဲ့စည်းထားသည့် နိုင်ငံရေး၊ လူမှုရေး၊ စီးပွားရေး၊ မြေယာနှင့် သဘာဝသယံဇာတ ကဏ္ဍအလိုက် လုပ်ငန်းကော်မတီများမှ စုစည်းမည့် အမျိုးသားအဆင့် နိုင်ငံရေးဆွေးနွေးပွဲ ရလဒ်များနှင့် ပတ်သက်၍ ဖေဖော်ဝါရီ ၈ ရက်မှ ၁၀ ရက်အထိလည်းကောင်း၊ ပြည်ထောင်စု အဆင့်တွင်သာ ဆွေးနွေးရန် သတ်မှတ်ထားသည့် လုံခြုံရေးကဏ္ဍနှင့် ပတ်သက်၍ ဖေဖော်ဝါရီ ၂၇ ရက်မှ ၂၈ ရက်အထိ လည်းကောင်း ရန်ကုန်မြို့တွင် တွေ့ဆုံညှိနှိုင်းမှုရှိခဲ့သည်။

“ပါတီတွေက ငြိမ်းချမ်းရေး လုပ်ငန်းစဉ်နဲ့ ပတ်သက်လို့ အဆက်မပြတ် လုပ်ဆောင်တာတွေရှိတယ်။ ရန်ကုန်မှာ တွေ့ဆုံပြီးနောက်ပိုင်း ကိုယ့်ဒေသကိုယ်ပြန်ပြီးတော့ ငြိမ်းချမ်းရေး လုပ်ငန်းစဉ်ဆိုင်ရာ ပြောကြတာတွေရှိတယ်။ ကျွန်တော်တို့ဆိုလည်း ဒီမှာပြန်စုကြတာတွေရှိတယ်။ ရန်ကုန်မှာ တွေ့ဆုံပြီးနောက်ပိုင်းမှာ အစိုးရ၊ တပ်မတော်၊ လွှတ်တော်၊ တိုင်းရင်းသား လက်နက်ကိုင် ခေါင်းဆောင်တွေနဲ့ ပါတီကပုဂ္ဂိုလ်တွေပါဝင်တဲ့ လုပ်ငန်းကော်မတီတွေ တွေ့ဆုံကြတယ်။ အဲဒီတွေ့ဆုံပွဲမှာ ရန်ကုန်မှာ ၂၂ ပါတီတွေ့တဲ့အထဲက ဆွေးနွေးသဘောတူတဲ့ အချက်အလက်တွေကိုလည်း ဒီဆွေးနွေးပွဲမှာ ပြန်ပြီးကျွန်တော်တို့ တင်ပြထားတာရှိတယ်” ဟုဒေါက်တာ မနာမ်တူးဂျာက ပြောကြားသည်။ ထို့ပြင် ငြိမ်းချမ်းရေး လုပ်ငန်းစဉ်နှင့် ဖြစ်စဉ်များအား ပြည်သူလူထုထံ သိရှိစေရန် တရားဝင်နိုင်ငံရေးပါတီ (၉၂) ပါတီပူးပေါင်း၍ နေရာဒေသအနှံ့ လှည့်လည်ဟောပြောရန် စီစဉ်ထားကြောင်း နိုင်ငံရေးပါတီများ၏ ခေါင်းဆောင်များထံမှ သိရသည်။    

Writer: 
ဇာလီမြင့်ဦး၊ ၀ီရမိုးနေ