ဓာတ်ပုံ - တပ်မတော်ကာကွယ်ရေးဦးစီးချုပ်ရုံး

ပြည်ထောင်စုသမ္မတ မြန်မာနိုင်ငံနှင့် ရုရှားဖက်ဒရေးရှင်းနိုင်ငံ တပ်မတော်နှစ်ရပ်အကြား စစ်ဘက်နည်းပညာ ပူးပေါင်းဆောင်ရွက်ရေး သဘောတူစာချုပ်အား ဇန်နဝါရီ ၂၀ ရက်တွင် လက်မှတ် ရေးထိုးခဲ့ကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ရုရှားဖက်ဒရေးရှင်းနိုင်ငံ၊ ကာကွယ်ရေးဝန်ကြီး Army General Sergey K.SHOIGU ကို ဇန်နဝါရီ ၂၀ ရက် နေ့လယ်ပိုင်းတွင် နေပြည်တော်ရှိ ဇေယျာသီရိဗိမာန်ရှေ့၌ ဂုဏ်ပြုတပ်ဖွဲ့ဖြင့် ကြိုဆိုခဲ့ကြောင်း သိရသည်။

ထို့နောက် ရုရှား-မြန်မာ နှစ်နိုင်ငံအကျိုးတူ ဆွေးနွေးပွဲပြုလုပ်ခဲ့ရာ တပ်မတော်ကာကွယ်ရေးဦးစီးချုပ်က မြန်မာနိုင်ငံနှင့် ရုရှား နိုင်ငံနှစ်နိုင်ငံသည် မိတ်ဆွေနိုင်ငံများဖြစ်ပြီး မိမိတို့နိုင်ငံ လွတ်လပ်ရေးရရှိချိန်မှစ၍ နှစ် နိုင်ငံခေါင်းဆောင်များ ဆက်ဆံရေး ကောင်းမွန်ခဲ့ကြောင်း၊ အလှမ်းကွာဝေးသော်လည်း ထူးခြားသည့် ဆက်ဆံရေးများ ရှိကြောင်း၊ နှစ်နိုင်ငံဆက်ဆံရေး ပိုမိုတိုးမြှင့်ဆောင်ရွက်ရန် လိုအပ်ပါကြောင်း၊ ထိုသို့ဆောင်ရွက်ခြင်းဖြင့် နှစ်နိုင်ငံ ပူးပေါင်းဆောင်ရွက်မှု နယ်ပယ်များစွာ ကျယ်ပြန့်လာမည် ဖြစ်ကြောင်း၊ ရုရှားနိုင်ငံအနေဖြင့် မြန်မာနိုင်ငံ၏ ပြုပြင်ပြောင်းလဲမှုများတွင် နိုင်ငံတကာမျက်နှာစာ၌ မြန်မာနိုင်ငံဘက်မှ ရပ်တည် ဆောင်ရွက်ပေးခဲ့မှုများအတွက် ကျေးဇူးတင်ရှိပါကြောင်း၊ ARSA အစွန်းရောက် ဘင်္ဂါလီ အကြမ်းဖက်သမားများသည် မြန်မာနိုင်ငံ၏ တရားဥပဒေစိုးမိုးရေး လုပ်ငန်းစဉ်များ ထိခိုက်စေရန် ဦးတည်ဆောင်ရွက်လျက် ရှိသည်ကို တွေ့ရှိရကြောင်း၊ အကြမ်းဖက်သမားများသည် နိုင်ငံတကာတွင် ဆိုရှယ်မီဒီယာများအား အသုံးပြု၍ ၎င်းတို့ ကျူးလွန်ခဲ့သည့် အကြမ်းဖက်မှုများအား မှေးမှိန်ပျောက်ကွယ်စေရန်အတွက် ဝါဒဖြန့်မှုများ ဆောင်ရွက်၍ မိမိတို့ လုံခြုံရေးတပ်ဖွဲ့ဝင်များက ဘင်္ဂါလီများကိုသာ နှိပ်စက်သည့်ပုံစံဖြင့် ဆောင်ရွက်လျက်ရှိပြီး အချို့နိုင်ငံတကာ အသိုင်းအဝိုင်းများက မြန်မာနိုင်ငံအပေါ် စွပ်စွဲပြီး ပိတ်ဆို့ကန့်သတ်မှုများ ဆောင်ရွက်လာကြောင်း ပြောကြားခဲ့သည်။

ဧည့်သည်တော်ဝန်ကြီးက ရခိုင်ဒေသအတွင်း ဖြစ်ပွားခဲ့သည့် အကြမ်းဖက် တိုက်ခိုက်မှုများသည် နိုင်ငံရေးနှင့် ပတ်သက်ဆက်နွယ်မှုများ ရှိသည်ဟု ယူဆပါကြောင်း၊ မြန်မာနိုင်ငံအစိုးရ၊ တပ်မတော်နှင့် နိုင်ငံသားများ အားလုံး နည်းလမ်းရှာဖွေ ဆောင်ရွက်ရမည်ဖြစ်ပြီး အခက်အခဲများ ရှိပါကြောင်း၊ ရခိုင်ပြည်နယ်အတွင်း ဖြစ်ပွားလျက်ရှိသည့် အခြေအနေမှန်များအား နိုင်ငံတကာမှ သိရှိအောင် မိမိတို့ နိုင်ငံမီဒီယာမှ ဆောင်ရွက်ပေးသွားမည် ဖြစ်ကြောင်း ပြောကြားသည်။

ယင်းနောက် တပ်မတော်ကာကွယ်ရေးဦးစီးချုပ်နှင့် ရုရှားဖက်ဒရေးရှင်းနိုင်ငံ ကာကွယ်ရေးဝန်ကြီးတို့သည် နှစ်နိုင်ငံ တပ်မတော်နှစ်ရပ်အကြား စစ်ဘက်နည်းပညာ ပူးပေါင်းဆောင်ရွက်မှုဆိုင်ရာ ကိစ္စရပ်များ၊ လေ့ကျင့်ရေးဆိုင်ရာ ပူးပေါင်းဆောင်ရွက်ရေး၊ တပ်မတော်(ရေ)နှစ်ရပ်အကြား စစ်သင်္ဘောများ အပြန်အလှန်လည်ပတ်ရေး၊ တပ်မတော် နှစ်ရပ်အကြား ချစ်ကြည်ရေးခရီးများ အပြန်အလှန် လည်ပတ်ရေးနှင့် တပ်မတော်နှစ်ရပ်အကြား ချစ်ကြည်ရင်းနှီးမှု တိုးမြှင့်ဆောင်ရွက်ရေးဆိုင်ရာ ကိစ္စရပ်များအား ရင်းနှီးပွင့်လင်းစွာ အမြင်ချင်းဖလှယ် ဆွေးနွေးကြသည်။

ဆက်လက်ပြီး ရုရှားဖက်ဒရေးရှင်းနိုင်ငံ နှင့် ပြည်ထောင်စုသမ္မတ မြန်မာနိုင်ငံတော်၊ မြန်မာ့တပ်မတော်တို့အကြား ပူးပေါင်းဆောင်ရွက်ရေး သဘောတူစာချုပ် လက်မှတ်ရေးထိုးခြင်း အခမ်းအနားအား ကျင်းပပြုလုပ်ရာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် တပ်မတော်အရာရှိကြီးများ၊ ရုရှားဖက်ဒရေးရှင်းနိုင်ငံ၊ ကာကွယ်ရေးဝန်ကြီး Army General Sergey K.SHOIGU နှင့် ရုရှားတပ်မတော်မှ အရာရှိကြီးများ တက်ရောက်ကြသည်။

ထို့နောက် ကာကွယ်ရေးဝန်ကြီးဌာန ဒုတိယဝန်ကြီး ဗိုလ်ချုပ်မြင့်နွယ်နှင့် ရုရှားဖက်ဒရေးရှင်းနိုင်ငံ ဒုတိယကာကွယ်ရေးဝန်ကြီး Lieutenant General Alexander V. FOMIN တို့က ပြည်ထောင်စုသမ္မတ မြန်မာနိုင်ငံတော် မြန်မာ့တပ်မတော်နှင့် ရုရှားဖက်ဒရေးရှင်းနိုင်ငံ တပ်မတော်တို့အကြား ပူးပေါင်းဆောင်ရွက်ရေးဆိုင်ရာ သဘောတူစာချုပ်အား လက်မှတ်ရေးထိုးခဲ့ကြပြီး အပြန်အလှန်လဲလှယ်ခဲ့ကြောင်း သိရသည်။