MICA နှင့် ပတ်သက်၍ ကွင်းဆင်းရန် ကျန်ရှိနေသည့် နေရာများသို့ မကြာမီပြန်စမည့် ဒုတိယအကြိမ် အမျိုးသားလွှတ်တော် သတ္တမပုံမှန်အစည်းအဝေး ကာလအတွင်း သွားရောက် စိစစ်မည်ဖြစ်ပြီး အပြီးသတ် အစီရင်ခံစာအား ပုံမှန်အစည်းအဝေး မပြီးမီ တင်နိုင်ရန်ကြိုးစားမည်ဟု အမျိုးသားလွှတ်တော် အစိုးရ၏ အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီဥက္ကဋ္ဌ ဦးသိမ်းဆွေက ပြောကြားသည်။
MICA (Myanmar International Cooperation Agency) ဖျက်သိမ်းရေးနှင့် စာရင်းရှင်းလင်းရေးကို သက်ဆိုင်ရာဌာန အနေဖြင့် အတိအကျ လိုက်နာရန်နှင့် လိုအပ်သလို အရေးယူဆောင်ရွက်ရန် လွှတ်တော် ကိုယ်စားလှယ်အချို့က တိုက်တွန်းထားပြီး ရန်ကုန်နှင့် ဧရာဝတီသို့ ကွင်းဆင်းလေ့လာ စိစစ်ခဲ့သည့် အမျိုးသားလွှတ်တော်အစိုးရ၏ အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီ၏ ကြားဖြတ်အစီရင်ခံစာကို အမျိုးသားလွှတ်တော်က ဆဋ္ဌမပုံမ ှန် အစည်းအဝေးကာလအတွင်းက အတည်ပြုခဲ့သည်။
“ဒီလွှတ်တော်စပြီး ၂၂ ရက်ကျရင် မိုက်ကာနဲ့ ပတ်သက်ပြီး ကျန်တာတွေ တချို့ကို ကျွန်တော်တို့ လိုက်စိစစ်မယ်။ ဒါပေမဲ့ အခုလောလောဆယ်မှာတော့ မိုက်ကာထက် ပိုပြီးတော့ စိတ်ဝင်စားစရာ ကောင်းတာတော့ ကျွန်တော်တို့ မိုးထိမိုးမိ။ အဲဒါနဲ့ ပတ်သက်ပြီးတော့ အမျိုးသားလွှတ်တော် ကိုယ်စားလှယ် ဦးစောမိုးမြင့်တင်ထားတဲ့ မေးခွန်းအပေါ်မှာ ကျွန်တော်တို့ စိစစ်ရမှာရှိတယ်။ အဲဒါကတော့ တော်တော်များများ လေ့လာတွေ့ရှိချက်တွေ၊ သက်ဆိုင်ရာဝန်ကြီးဌာန ပုဂ္ဂိုလ်တွေနဲ့ တွေ့တဲ့အခါမှာ ကြည့်တာတော့ တော်တော်များများ အံ့ချော်နေတာတွေ တွေ့ရတယ်။ ကုမ္ပဏီတွေ အနေနဲ့ပေါ့နော်။ ဆိုတော့ နိုင်ငံတော်အတွက်တော့ တော်တော်များများကို ပြန်ပြီးတော့ သုံးသပ်ရမယ်။ တိုင်းပြည်အကျိုးရှိအောင် သုံးသပ်ရမယ့် အနေအထားရှိတယ်။ အံချော်နေတယ် ဆိုတာ ပြောရမယ်ဆိုရင် တိုင်းပြည်အတွက် ရသင့်ရထိုက်တဲ့ အခွန်အခတွေ၊ နစ်နာဆုံးရှုံးမှုတွေ ရှိနေတယ်။ တွေ့ရှိချက်တွေကတော့ ကျွန်တော်တို့ ကော်မတီကနေ တင်တဲ့အခါမှာ အသေးစိတ်ပြောနိုင်မှာ ဖြစ်ပါတယ်။ လာမယ့် လွှတ်တော်မှာ တင်နိုင်အောင် ကျွန်တော်တို့ တင်နိုင်အောင် ကြိုးစားနေပါတယ်”ဟု ဦးသိမ်းဆွေက ဆိုသည်။
ထို့ပြင် အမျိုးသားလွှတ်တော် အစိုးရ၏ အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီဥက္ကဋ္ဌ ဦးသိမ်းဆွေက “မိုက်ကာ ကတော့ ပထမ ကြားဖြတ်အစီရင်ခံစာ တင်ပြီးပါပြီ။ အပြီးသတ်တော့ မလုပ်သေးဘူး။ စောင့်ကြည့်နေတယ်။ မိုက်ကာနဲ့ ပတ်သက်တဲ့ လုပ်ရမယ့် ဝန်ကြီးဌာနကလည်း ကိုင်တွယ်ဆောင်ရွက်နေတာတော့ ကြားတယ်။ မိုက်ကာနဲ့ ပတ်သက်ပြီး ကျွန်တော်တို့ အကြံပြုထားတဲ့ အချက်တွေရှိတယ်။ နောက် ဝန်ကြီးဌာနအနေနဲ့ ကိုင်တွယ်နေတာတွေ ရှိတယ်။ အဲဒါတွေကိုတော့ ဆောင်ရွက်နေပါတယ်။ ကျွန်တော်တို့ ကွင်းဆင်းဖို့အတွက်တော့ ရှိပါတယ်။ အခု လွှတ်တော်ပြန်စတာနဲ့ ကျန်နေတဲ့နေရာတွေ ရောက်အောင်သွားမှာပါ။ မေးခွန်းနဲ့အတူ ခုနက မိုးထိမိုးမိ ရွှေတွင်း လုပ်ကွက်တွေပေါ့နော်။ အဲဒီနေရာတွေ သွားရောက်စိစစ်မယ်။ ပြီးသွားရင် မိုက်ကာ ကျန်နေတဲ့ နေရာတွေ သွားရောက်စိစစ်မယ်။ အဲဒါတွေ ပြီးရင်တော့ ကော်မတီရဲ့ အစီရင်ခံစာ ထွက်လာမှာပါ။ အဲဒီကျရင်တော့ အသေးစိတ်ပြောနိုင်မှာပါ။ အပြီးသတ်အစီရင်ခံစာကို သတ္တမအကြိမ် လွှတ်တော်အစည်းအဝေး မပြီးခင် တင်နိုင်အောင် ကြိုးစားမှာပါ”ဟု ဆက်လက်ပြောကြားသည်။
ကော်မတီ၏ အစီရင်ခံစာတွင် MICA စတင်ဖွဲ့စည်းရာတွင် ပါဝင်ကြသူများသည် ဌာနမှ ပုဂ္ဂိုလ်အများစု ပါဝင်ခဲ့ကြပြီး MICA ဖျက်သိမ်းရာတွင်လည်း ဌာနမှ ထိုပုဂ္ဂိုလ်များကပင် ပါဝင်နေကြသဖြင့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ပြည်ထောင်စုဝန်ကြီးရုံး၏ အမိန့်ကြော်ငြာစာအမှတ် ၁၈/၂၀၁၇ ဖြင့် ဖွဲ့စည်းခဲ့သည့် စာရင်းရှင်းလင်း ဖျက်သိမ်းရေးကြီးကြပ်မှုကော်မတီကို ပြန်လည်သုံးသပ် ဖွဲ့စည်းသင့်ကြောင်း၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန လက်အောက်ရှိ မွေးမြူရေးနှင့်ကုသရေးဦးစီးဌာန၊ ငါးလုပ်ငန်းဦးစီးဌာနပိုင်များရှိ ခြံ၊ စက်ရုံ၊ လုပ်ငန်း၊ စခန်းများ ၁၉ ခု အကျိုးတူ ပူးပေါင်း ဆောင်ရွက်ငှားရမ်းခြင်းအတွက် ၂၀၁၆ ခုနှစ်၊ ဧပြီ ၁ ရက်မှ ၂၀၁၇ ခုနှစ် မေ ၃၁ ရက်အထိ ပြင်ပစာရင်းစစ်အဖွဲ့၏ အစီရင်ခံစာအရ စုစုပေါင်း ၅၀၃ ဒသမ ၄၁ သန်း နိုင်ငံတော်မှ ငှားရမ်းခ ရရှိသော်လည်း တည်ဆဲဥပဒေများနှင့်အညီ ပြဋ္ဌာန်းထားသည့် ဝင်ငွေခွန်၊ ကုန်သွယ်လုပ်ငန်းခွန်၊ အမြတ်ခွန် စသည့် အခွန်အခများအား နိုင်ငံတော်သို့ စနစ်တကျ ပေးသွင်းထားခြင်း မရှိသည်ကို စိစစ်တွေ့ရှိရသဖြင့် အခွန်အခများကို လုပ်ငန်းလုပ်ကိုင်သူ ဆောင်ရွက်သူများမှ ဥပဒေနှင့်အညီ စနစ်တကျပေးသွင်းနိုင်ရေးအတွက် တာဝန်ရှိသူ အဆင့်ဆင့်မှ ကြီးကြပ်ကွပ်ကဲ ဆောင်ရွက်သင့်ကြောင်းနှင့် MICA ၏ မူလ ရည်ရွက်ချက်သည် မြန်မာနိုင်ငံ၏ သားငါးကဏ္ဍ တိုးတက်ရန်နှင့် စားနပ်ရိက္ခာဖူလုံရန် စသည့် ရည်ရွယ်ချက်ကောင်းများဖြင့် ဖွဲ့စည်းခဲ့သော်လည်း အမှန်မြေပြင်တွင် ဆောင်ရွက်နေသော လုပ်ငန်းများသည် မူလရည်ရွယ်ချက်များနှင့် ကွဲလွဲနေပါသဖြင့် ပြန်လည်သုံးသပ် ဆောင်ရွက်သင့်ပါကြောင်း စသည့် အ ကြံပြုချက်များ ပါဝင်သည့် အကြံပြုချက် အချက် ၃၀ ပါရှိသည်။
ဒုတိယအကြိမ် ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော် သတ္တမပုံမှန်အစည်းအဝေးများ ဇန်နဝါရီ ၁၅ ရက်တွင် စတင်မည် ဖြစ်သည်။
