ပြည်တွင်းပြည်ပ အန္တရာယ်များနှင့် စပ်လျဉ်းပြီးမဟာဗျူဟာရှုထောင့်မှ လေ့လာသုံးသပ်၍ နိုင်ငံတော်သမ္မတနှင့် ပြည်ထောင်စု အစိုးရအဖွဲ့ကို အကြံပြုနိုင်ရန် အမျိုးသားလုံခြုံ​ရေးဆိုင်​ရာအကြံ​ပေးပုဂ္ဂိုလ်​ ခန့်အပ်

ပြည်တွင်းပြည်ပ အန္တရာယ်များနှင့် စပ်လျဉ်း၍ မဟာဗျူဟာရှုထောင့်မှ လေ့လာသုံးသပ်၍ နိုင်ငံတော်သမ္မတနှင့် ပြည်ထောင်စုအစိုးရအဖွဲ့ကို အကြံပြုနိုင်ရန် အမျိုးသားလုံခြုံရေးဆိုင်​ရာ အကြံ​ပေးပုဂ္ဂိုလ်​ ခန့်အပ်ကြောင်း ဇန်န၀ါရီ ၁၀ ရက် ရက်စွဲဖြင့် နိုင်ငံတော်သမ္မတရုံးက အမိန့်အမှတ် (၁/၂၀၁၇) ထုတ်ပြန်သည်။

အဆိုပါ အမိန့်ထုတ်ပြန်ချက်တွင်  နိုင်ငံတော်သမ္မတနှင့် ပြည်ထောင်စုအစိုးရအဖွဲ့အား ပြည်တွင်းပြည်ပ အန္တရာယ်များနှင့် စပ်လျဉ်း၍ မဟာဗျူဟာရှုထောင့်မှ လေ့လာသုံးသပ် အကြံပြုနိုင်ရေးအတွက် ပြည်ထောင်စုအစိုးရအဖွဲ့၏ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်ရာထူးကို ပြည်ထောင်စုဝန်ကြီးအဆင့် သတ်မှတ်ပြီး ခန့်အပ် တာဝန်ပေးရန် ပြည်ထောင်စုအစိုးရအဖွဲ့ အစည်းအဝေး အမှတ်စဉ် (၁၈/၂၀၁၆) က သဘောတူဆုံးဖြတ်ခဲ့ကြောင်းနှင့် ယင်းသဘောတူ ဆုံးဖြတ်ချက်အရ ပြည်ထောင်စုအစိုးရအဖွဲ့၏ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်အဖြစ် ဦးသောင်းထွန်းကို ခန့်အပ် တာဝန်ပေးလိုက်ကြောင်း ဖော်ပြပါရှိသည်။

ပြည်ထောင်စုအစိုးရအဖွဲ့၏ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်၏ ခံစားခွင့်ဆိုင်ရာ ကိစ္စရပ်များကို ပြည်ထောင်စုအစိုးရအဖွဲ့ရုံးက ဆောင်ရွက်ပေးရမည်ဟုလည်း အမိန့်ထုတ်ပြန်ချက်တွင် ပါရှိသည်။

ထိုသို့ အမျိုးသားလုံခြုံရေးဆိုင်ရာအကြံပေးပုဂ္ဂိုလ်ရာထူး ခန့်အပ်မှုနှင့် ပတ်သက်၍  အမိန့်ထုတ်ပြန်ချက်တွင် ပါရှိသည့်အတိုင်း ပြည်ထောင်စုအစိုးရအဖွဲ့အား အကြံပေးရန်ဖြစ်ကြောင်းနှင့် ဦးသောင်းထွန်းအား ခန့်အပ်ခြင်းနှင့် စပ်လျဉ်း၍ တရားဝင်ပြောကြားခွင့် မရှိကြောင်း သမ္မတရုံးဝန်ကြီးဌာန ဒုတိယ ညွှန်ကြားရေးမှူးချုပ် ဦးဇော်ဌေးက ဆိုသည်။

ယခုကဲ့သို့ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်ရာထူး ခန့်အပ်ထားရှိခြင်းမှာ လုပ်ဆောင်သင့်သည့် ကိစ္စဖြစ်ပြီး လူပုဂ္ဂိုလ်တစ်ဦးချင်းထက် အကြံပေးအဖွဲ့ပုံစံ ထားရှိသင့်ကြောင်း တကောင်းနိုင်ငံရေးလေ့လာမှုအဖွဲ့ အမှုဆောင်ဒါရိုက်တာ ဦးရဲမျိုးဟိန်းက ပြောကြားသည်။

“ကျွန်တော်တို့နိုင်ငံမျိုးကတော့ဗျာ ပြည်တွင်း၊ ပြည်ပ လုံခြုံရေးအခြေအနေက အရမ်းရှုပ်ထွေးပြီးတော့ လက်ရှိအခြေအနေမှာလည်း အရပ်သား အစိုးရသစ်အနေနဲ့ လုံခြုံရေးပိုင်းဆိုင်ရာ ကိစ္စတွေမှာ အများကြီး အကြံပေးတာတွေ၊ အများကြီး အကြံဉာဏ်တွေ၊ နည်းပညာဆိုင်ရာ အထောက်အပံ့တွေ အများကြီးလိုအပ်တယ်လို့ မြင်ပါတယ်။ ဒီလိုမျိုး အရပ်သားအစိုးရအနေနဲ့ သူ့ရဲ့ပြည်တွင်း ပြည်ပ လုံခြုံရေးအခြေအနေနဲ့ ပတ်သက်ပြီးတော့ ခုလို အကြံပေးခန့်တာတော့ ကျွန်တော်တို့အနေနဲ့ လုပ်သင့်တဲ့ကိစ္စလို့ မြင်ပါတယ်။ ဒါက ကျွန်တော်တို့ အရင်ကတည်းက ပြောနေတာ အမျိုးသားလုံခြုံရေးအကြံပေး ထားသင့်တယ်ပေါ့။ အဲဒီအပြင် ကျွန်တော်တို့ အကြံပေးတစ်ဦးတည်းထက်စာရင် အကြံပေးအဖွဲ့ ထားသင့်တယ်လို့ မြင်ပါတယ်ခင်ဗျ။ ဘာဖြစ်လို့လဲဆိုတော့ လုံခြုံရေးဆိုတာ ကျွန်တော်တို့ နိုင်ငံမှာ အများကြီးရှုပ်ထွေးပြီးတော့ တခြား တခြားသော လုံခြုံရေးဆိုင်ရာပြဿနာတွေကလည်း အများကြီး ရှိတဲ့အခါကျတော့ အမျိုးသားလုံခြုံရေး အကြံပေးအဖွဲ့လို အဖွဲ့မျိုးပါ ဖွဲ့သင့်တယ်လို့ မြင်ပါတယ်”ဟု ဦးရဲမျိုးဟိန်းက ပြောကြားသည်။

ဆက်လက်၍ ဦးရဲမျိုးဟိန်းက “ကာလုံ (အမျိုးသားကာကွယ်ရေးနှင့် လုံခြုံရေးကောင်စီ) ရဲ့ အခြေအနေကတော့ နိုင်ငံတော်ကာကွယ်ရေးနဲ့ လုံခြုံရေးအတွက်ကို ဒါတွေ့ဆုံဆွေးနွေးပြီးတော့ လုပ်မယ်လို့ ပြောထားတယ်။ ဒါပေမဲ့ ကာလုံရဲ့ အနေအထားကျတော့ အရပ်သားအစိုးရကို လုံခြုံရေးဆိုင်ရာကိစ္စတွေ ကူညီတာမျိုးထက်စာရင် သူက သီးသန့်အဖွဲ့အစည်းတစ်ရပ်လို ဖြစ်နေတယ်။ နိုင်ငံဦးသျှောင်အဖွဲ့အစည်းလို ဖြစ်နေတဲ့အခါကျတော့လေ။ တကယ့် တကယ် နိစ္စဓူဝလုံခြုံရေး ဆိုင်ရာ ကိစ္စမျိုးတွေမှာတော့ အရပ်သားအစိုးရအနေနဲ့ ဖြေရှင်းကိုင်တွယ်ဖို့ကကျတော့ သူ့မှာ ဒီထက်ပိုပြီးတော့ ကျွမ်းကျင်မှုတွေ အ ကြံဉာဏ်တွေ အများကြီးလိုအပ်တယ်လို့ မြင်တယ်။ ဒါကြောင့်မို့လို့ ဒီရာထူးကို အရပ်သားအစိုးရ ခန့်သင့်တယ်လို့ မြင်ပါတယ်”ဟု ဦးရဲမျိုးဟိန်းက ပြောကြားသည်။

ပအိုဝ်းလက်နက်ကိုင်အဖွဲ့ (PNLO) ဥက္ကဋ္ဌ ခွန်မြင့်ထွန်းက “ကျွန်တော့်အမြင်မှာက လုံခြုံရေးရဲ့ အဓိပ္ပာယ်ပေါ့လေ။ လုံခြုံရေးဆိုတာကတော့ ကျွန်တော်တို့ စစ်ဘက်ဆိုင်ရာ လုံခြုံရေးအပြင် လုံခြုံရေးဆိုတဲ့ စကားလုံးရဲ့ အောက်မှာ ကာကွယ်ရေးကိစ္စတွေ ပါတယ်။ ပြီးရင် တစ်မျိုးသားလုံးဆိုင်ရာဆိုရင် အစားအသောက်လုံခြုံရေးတို့၊ နောက်တစ်ခါ မြေယာလုံခြုံရေးတို့၊ ဒါက ကျယ်ပြန့်တဲ့ကိစ္စ ဖြစ်တဲ့အတွက် ကျွန်တော်တို့ လုံခြုံရေးကဏ္ဍတစ်ခုလုံးက ကျွန်တော်တို့တိုင်းပြည်က လုံခြုံမှုက ဒီအစားအသောက်လုံခြုံမှုတို့၊ မြေယာလုံခြုံမှု ကိစ္စရပ်တွေကအစ လုံခြုံရေးကိစ္စရပ်တွေနဲ့ အများကြီးရင်ဆိုင်နေရတယ်။ ကျွန်တော်တို့ကတော့ ဒီလိုအကြံပေးပုဂ္ဂိုလ်တာဝန် ပေးတာမျိုးကတော့ ပြောစရာမရှိဘူး”ဟု ပြောကြားသည်။

အမျိုးသားလုံခြုံရေးဆိုင်ရာ အကြံပေးပုဂ္ဂိုလ်အဖြစ် ခန့်အပ်ခံရသော ဦးသောင်းထွန်းသည် ၀ါရင့်သံတမန်အငြိမ်းစား တစ်ဦးဖြစ်ကြောင်း စုံစမ်းသိရသည်။

Writer: 
ကျော်ဇင်ဝင်း