နိုင်ငံရေးဆွေးနွေးပွဲ အဆင့်ဆင့်၏ အခြေခံဖြစ်သည့် နိုင်ငံရေးဆွေးနွေးမှုဆိုင်ရာ မူဘောင်အား ထပ်မံပြုလုပ်မည့် ပြည်ထောင်စုငြိမ်းချမ်းရေး ညီလာခံ-၂၁ ရာစုပင်လုံ မတိုင်မီ ဆွေးနွေးရမည်ဟု UPDJC တာဝန်ရှိသူ ပြောကြား

၂၀၁၆ ခုနှစ် အောက်တိုဘာလအတွင်းက ရန်ကုန်မြို့ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် နိုင်ငံရေးဆွေးနွေးမှုဆိုင်ရာ မူဘောင်ပြန်လည် သုံးသပ်ခြင်းအစည်းအဝေး ပြုလုပ်စဉ် (ဓာတ်ပုံ-ဇာလီမြင့်ဦး)

နိုင်ငံရေးဆွေးနွေးပွဲ အဆင့်ဆင့်၏ အခြေခံဖြစ်သည့် နိုင်ငံရေးဆွေးနွေးမှုဆိုင်ရာ မူဘောင်အား ထပ်မံပြုလုပ်မည့် ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ မတိုင်မီ ဆွေးနွေးရမည်ဟု ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အတွင်းရေးမှူးအဖွဲ့ဝင် ဦးစိုင်းကျော်ညွန့်က ဇန် န၀ါရီ ၈ ရက်တွင် ပြောကြားသည်။

ယခင်အစိုးရ လက်ထက်က တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) အရ အစိုးရအစုအဖွဲ့၊ တိုင်းရင်းသား လက်နက်ကိုင်များအစုအဖွဲ့နှင့် နိုင်ငံရေးပါတီများ အစုအဖွဲ့တို့က ရေးဆွဲထားသည့် နိုင်ငံရေးဆွေးနွေးမှုဆိုင်ရာ မူဘောင်အား NCA ပါ နိုင်ငံရေးလမ်းပြမြေပုံအရပင် ပြန်လည်သုံးသပ်ခြင်း ပြင်ဆင်ရေးဆွဲခြင်းများကို မကြာခဏ ပြုလုပ်လျက်ရှိသည်။

ဦးစိုင်းကျော်ညွန့်က “လုပ်တာတော့ လုပ်ရမယ်။ လုပ်တဲ့အချိန်မှာ UNFC DPN ပေါ့လေ။ သူတို့ပါမှာလား မပါဘူးလား။ အဲဒါတွေကအစ အဲဒီအပေါ်မှာ အကုန်လုံး သွားမူတည်တာပေါ့။ မူအရဆိုရင်တော့ အစိုးရလည်း သူ့ရဲ့မူဝါဒဆိုပြီးတော့ NCA နှစ်ပတ်လည်မှာ ပြောထားတာ ရှိတယ်လေ။ မူဘောင်ကို ပြန်လည်သုံးသပ်မယ်။ ပြန်လည် ပြင်ဆင် ရေးသားမယ်ဆိုတာတွေ ပါတယ်။ နောက်ပြီးမှသာ ၂၁ ရာစု ပင်လုံလုပ်မယ်လို့ ပြောထားတယ်ဆိုတော့ သူက အတည်တော့ပြုရမယ်ဆိုတဲ့ သဘောတော့ ရှိတာပေါ့။ အဲဒီအစိုးရ မူဝါဒအတိုင်း ဆိုရင်တော့။ နောက်ပြီးတော့  တပ်မတော်ဘက်က တင်ပြချက်တွေက မူဘောင်အသစ်ကို အတည်မပြုနိုင်ဘူးဆိုရင် အဟောင်းက အတည်ဖြစ်တယ်ဆိုတဲ့ ပုံစံမျိုးလည်း ပြောကြတာလည်း ရှိတယ်။ အဲဒီတော့ ဒါကတော့ UPDJC မှာ ဆွေးနွေးရမှာပါ။

ဒါကြောင့်မို့ ပြည်ထောင်စုငြိမ်းချမ်းရေးညီလာခံကို လုပ်မယ်ဆိုရင် ဆွေးနွေးရမယ့်သဘော ရှိပါတယ်။ ဒီမူဘောင်ကိစ္စတွေက ဘယ်လိုလုပ်မယ်က အစပေါ့။ ဒါပေမဲ့ အခုပြင်ဆင်ပြီးသလောက်နဲ့ သွားမယ်ဆိုရင်လည်း အဲဒါကို အတည်ပြုဖို့ လိုသေးတယ်”ဟု  ဆိုသည်။

ထိုသို့ပြုလုပ်ရာတွင်လည်း UPDJC အဖွဲ့ဝင် အစုအဖွဲ့သုံးခုအပြင် NCA လက်မှတ်မရေးထိုးရသေးသည့် တိုင်းရင်းသား လက်နက်ကိုင်အဖွဲ့အစည်းများအား အသိပေးခြင်း ဖိတ်ကြားခြင်းနှင့် အဆိုပါနိုင်ငံရေး ဆွေးနွေးမှုဆိုင်ရာ မူဘောင်ပြန်လည်သုံးသပ်ခြင်း အစည်းအဝေးသို့ တက်ရောက်ဆွေးနွေးစေခြင်းများ ပြုလုပ်ခဲ့ဖူးသည်။

NCA  ပြင်ပရှိ တိုင်းရင်းသား လက်နက်ကိုင်အဖွဲ့များ၏ သဘောထား ပါဝင်မှုမရှိဘဲ နိုင်ငံရေးဆွေးနွေးမှုဆိုင်ရာ မူဘောင်ကို ထပ်မံ အတည်ပြုမည်ဆိုပါက ထိုသို့ အတည်ပြု ခြင်းအား ပြန်လည်ပြင်ဆင်ရမည် ဖြစ်ကြောင်း ဦးစိုင်းကျော်ညွန့်က သုံးသပ်ထားသည်။

ဆက်လက်၍ ၎င်းက “ကျွန်တော်တို့ ဝေးဝေးလံလံ သွားစဉ်းစားနေတာလေ။ UNFC အနေနဲ့ DPN ဖွဲ့စည်းပြီးတော့ ဒီမှာ လာဆွေးနွေးနေတယ်။ အဲဒီအပေါ်မှာလည်း ဘယ်လောက်အထိ သဘောတူနိုင်တယ်။ဘယ်ဟာကတော့ လုံးလုံး သဘောမတူနိုင်ဘူးဆိုတာ။ ဆွေးနွေးမှုဆိုတာက ရာခိုင်နှုန်း ၁၀၀ ဆိုတာက လွယ်တာကတော့ မလွယ်ဘူးပေါ့။ အဲဒီတော့ အဲဒီအထဲမှာ ရာခိုင်နှုန်း ဘယ်လောက်ရရင်ရော ဟိုဘက်တွေက UNFC က သဘောတူနိုင်မယ်ဆိုတာ ဒါကတော့ စေ့စပ်ညှိနှိုင်းကြည့်မှ ရမယ်။ သွားပြီး စေ့စပ်ညှိနှိုင်းမယ့်သူကလည်း ကိုယ်စားပြုမှုအပြည့်နဲ့ ဆွေးနွေးနိုင်မယ်ဆိုရင်တော့ ဒါက ပြေလည်မယ်လို့ မြင်တာပဲ။ ကျွန်တော်တို့ နားလည်သလောက်ကလည်း UNFC ကလည်း ဒီလမ်းကြောင်းကပဲ သွားမယ်ဆိုတဲ့သဘောလည်း ကျွန်တော်တို့ ကြားပြီးသားလေ။ ဒီ  NCA ကနေ လမ်းကြောင်းအသစ် အဲဒီလိုမျိုးပုံစံကလည်း သိပ်မမြင်သေးဘူး။ ကျွန်တော့်အနေနဲ့ တော့ စေ့စပ်ညှိနှိုင်းလို့ ရနိုင်မယ်လို့ မြင်တယ်” ဟု ဆိုသည်။

အစိုးရ၏ ငြိမ်းချမ်းရေးကော်မရှင်နှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်မရေးထိုးရသေးသည့် တိုင်းရင်းသား လက်နက်ကိုင်အဖွဲ့များ ပါဝင်သည့် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) ၏ နိုင်ငံရေးဆိုင်ရာ ညှိနှိုင်းဆွေးနွေးရေး ကိုယ်စားလှယ်အဖွဲ့ (DPN) တို့သည် အလွတ်သဘောဖြစ်စေ၊ တရားဝင်ဖြစ်စေ မကြာခဏ တွေ့ဆုံညှိနှိုင်းမှုများ ပြုလုပ်လျက် ရှိသည်။အစိုးရအနေဖြင့် ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ ဒုတိယအစည်းအဝေးအား ဖေဖော်ဝါရီတွင် ကျင်းပရန် စီစဉ်ထားပြီး ညီလာခံမတိုင်မီ အမျိုးသားအဆင့် နိုင်ငံရေးဆွေးနွေးပွဲများကို ပြုလုပ်၍ သဘောထားများ စုစည်းနိုင်ရန် ဆောင်ရွက်နေသည်။ အဆိုပါ ညီလာခံမတိုင်မီ ပြည်ထောင်စု ငြိမ်းချမ်းရေးဆွေးနွေးမှုပူးတွဲကော်မတီ (UPDJC) အစည်းအဝေးအား ခေါ်ယူရန်နှင့်  နိုင်ငံရေးဆွေးနွေးမှုဆိုင်ရာ မူဘောင်ပြန်လည် သုံးသပ်ခြင်းကို လုပ်ဆောင်ရန် လိုအပ်နေကြောင်း UPDJC တာဝန်ရှိသူများက ဆိုသည်။