ကမ္ဘာ့ဘဏ်မှ သဘာဝဘေးနှင့် ပြန်လည်ထူထောင်ရေးဆိုင်ရာ ချေးငွေဒေါ်လာသန်း ၂၀၀ ချေးယူခွင့်ပြုရန် ဆောက်လုပ်ရေး ၀န်ကြီးဌာန အပါအ၀င် ၀န်ကြီးဌာနသုံးခု လွှတ်တော်သို့တင်ပြ

မေ ၁၃ ရက်က ပြုလုပ်သော ပြည်ထောင်စုလွှတ်တော် အစည်းအဝေးသို့ တက်ရောက်လာသူများ
ကမ္ဘာ့ဘဏ်ထံမှ သဘာဝဘေးနှင့် ပြန်လည်ထူထောင်ရေးဆိုင်ရာ ချေးငွေ အမေရိကန်ဒေါ်လာ သန်း ၂၀၀ ချေးယူခွင့်ပြုရန် စီမံကိန်းနှင့် ဘဏ္ဍာရေး ၀န်ကြီးဌာန၊ ဆောက်လုပ်ရေး ၀န်ကြီးဌာနနှင့် စိုက်ပျိုးရေး၊ မွေးမြူ ရေးနှင့် ဆည်မြောင်း ၀န်ကြီးဌာနတို့က နေပြည်တော်တွင် မေ ၁၃ ရက်က ပြုလုပ်သည့် ပြည်ထောင်စုလွှတ်တော် အစည်းအဝေး၌ တင်ပြခဲ့သည်။
 
အဆိုပါ ချေးငွေ အမေရိကန်ဒေါ်လာ သန်း ၂၀၀ နှင့်ပတ်သက်၍ ဆောက်လုပ်ရေး ၀န်ကြီးဌာနက သဘာဝဘေးဒဏ် ခံနိုင်ရည်ရှိသည့် လမ်းများအဖြစ် ဆောင်ရွက်ရန်အတွက် အမေရိကန်ဒေါ်လာ ၁၀၅ သန်း၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနက ကျေးလက်ဒေသလမ်းများ ဆောင်ရွက်ရန်အတွက် အမေရိကန်ဒေါ်လာ သန်း ၇၀၊ စီမံကိန်းနှင့် ဘဏ္ဍာရေး ၀န်ကြီးဌာနက အရေးပေါ် တုံ့ပြန်မှု ချေးငွေအဖြစ် လျာထားဆောင်ရွက်ရန်အတွက် အမေရိကန်ဒေါ်လာ ၁၅သန်းနှင့် project management လုပ်ငန်းများ ဆောင်ရွက်ရန်အတွက် အမေရိကန်ဒေါ်လာ ၁၀သန်း ချေးယူသုံးစွဲမည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာနမှ ပြည်ထောင်စုဝန်ကြီး ဦးကျော်ဝင်းက လွှတ်တော်သို့ ရှင်းလင်းတင်ပြသည်။
 
“ကမ္ဘာ့ဘဏ်ထံမှ ချေးငွေအမေရိကန် ဒေါ်လာသန်း၂၀၀ ရယူမည့် သဘောတူညီချက်မှာ ဆိုင်းငံ့ကာလ ခြောက်နှစ်၊ ပြန်ဆပ်ကာလ ၃၂ နှစ်အဖြစ်၊ စုစုပေါင်း သက်တမ်း ၃၈ နှစ်ဖြစ်ပြီး အတိုးမဲ့ချေးငွေ ဖြစ်ပါတယ်။ ၀န်ဆောင်ခ တစ်နှစ်လျှင် ၀ ဒသမ ၇၅ ရာခိုင်နှုန်းဖြစ်ပြီး ကတိခံကြေးအား လက်ရှိကာလတွင် သုညရာခိုင်နှုန်း သတ်မှတ်ထားသော်လည်းပဲ ကမ္ဘာ့ဘဏ် IDA ဘုတ်အဖွဲ့ ဆုံးဖြတ်ချက်အရ ပေးရန်ရှိလာပါက ၀ ဒသမ ၅ ရာခိုင်နှုန်းထက် မပိုသောနှုန်းကို သတ်မှတ်ထားနိုင်မည် ဖြစ်ပါတယ်။ ၀န်ဆောင်ခအား ချေးငွေထုတ်ယူသည့် အချိန်မှစ၍ လည်းကောင်း၊ အရင်းငွေအား ဆိုင်းငံ့ကာလ ကုန်ဆုံးပြီးချိန်မှ လည်းကောင်း တစ်နှစ်လျှင်နှစ်ကြိမ် ပေးဆပ်ရမှာ ဖြစ်ပါတယ်” ဟု ဦးကျော်ဝင်းက ပြောကြားသည်။
 
သဘာဝဘေးဒဏ် ခံနိုင်ရည်ရှိသည့် လမ်းများအဖြစ် ဆောင်ရွက်ရန်အတွက် ကမ္ဘာ့ဘဏ်ထံမှ အမေရိကန်ဒေါ်လာ ၁၀၅ သန်းချေးယူရန် တင်ပြခြင်းနှင့် ပတ်သက်၍ ဆောက်လုပ်ရေး ၀န်ကြီးဌာနမှ ပြည်ထောင်စုဝန်ကြီး ဦးဝင်းခိုင်က မြန်မာနိုင်ငံအတွင်း ၂၀၁၅ ခုနှစ်၊ ဇူလိုင်လ နောက်ဆုံးပတ်တွင် ကိုမန်မုန်တိုင်း တိုက်ခတ်မှုကြောင့် ထူးကဲစွာ မိုးရွာသွန်းမှုများ ဖြစ်ပေါ်ခဲ့ပြီး ကချင်ပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်း ဒေသကြီး၊ ရခိုင်ပြည်နယ်၊ ရှမ်းပြည်နယ် (မြောက်ပိုင်း)နှင့် ဧရာဝတီတိုင်းဒေသကြီး စသည့်တိုင်းဒေသကြီးနှင့် ပြည်နယ်အများအပြားတွင် ရေကြီးနစ်မြုပ်ခြင်း၊ လမ်း၊ တံတားများ ပြိုကျပျက်စီးခဲ့ခြင်းတို့ ဖြစ်ပေါ်ခဲ့ပြီး အဆိုပါ ပျက်စီးခဲ့မှုများအား ကမ္ဘာ့ဘဏ်၏ Emergency Recovery Credit ချေးငွေဖြင့် ပြန်လည်ပြင်ဆင်သွားမည့် အခြေအနေကို လွှတ်တော်၌ ရှင်းလင်းပြောကြားသည်။
 
ဆောက်လုပ်ရေး ၀န်ကြီးဌာန အနေဖြင့် ချင်းပြည်နယ်ရှိ ကလေး-ဖလမ်း-ဟားခါးလမ်းနှင့် ဟားခါး-ဂန့်ကောလမ်း၊ ရခိုင်ပြည်နယ်နှင့် ဧရာဝတီတိုင်း ဒေသကြီးတို့ကို ဆက်စပ်ထားသည့် ငါးသိုင်းချောင်း-ဂွလမ်း၊ သံတွဲ-ဂွလမ်း ဖြစ်ပေါ်လာနိုင်သော အရေးပေါ် ကိစ္စများအတွက် လျာထားခြင်း၊ အသေးစိတ် ပုံထုတ်ခြင်းနှင့် ကြီးကြပ်မှုအတွက် လျာထားခြင်း၊ အဖွဲ့အစည်းများနှင့် အထောက်အကူပြု လုပ်ငန်းများအတွက် အသုံးပြုမည့် စရိတ်တို့အား ကမ္ဘာ့ဘဏ်ချေးငွေ အမေရိကန်ဒေါ်လာ ၁၀၅ သန်းဖြင့် အကောင်အထည်ဖော် ဆောင်ရွက်သွားမည်ဖြစ်ကြောင်း ပြည်ထောင်စုဝန်ကြီး ဦးဝင်းခိုင်က ရှင်းလင်း ပြောကြားသည်။
 
ထို့အတူ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ပြည်ထောင်စုဝန်ကြီး ဒေါက်တာအောင်သူက “၂၀၁၅ ခုနှစ်အတွင်းမှာ ဖြစ်ပွားခဲ့တဲ့ ရေကြီး၊ ရေလျှံမှု၊ မြေပြိုမှုများကြောင့် ပြည်နယ်နှင့် တိုင်းဒေသကြီး ၁၃ ခုမှာ ကျေးလက်လမ်း၊ တံတားများ ပျက်စီးခဲ့ရပြီး စစ်ကိုင်းတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ ရန်ကုန်တိုင်းဒေသကြီးနဲ့ ဧရာဝတီတိုင်း ဒေသကြီးတို့မှာ ကျေးလက်လမ်း၊ တံတား 
ပျက်စီးမှုများစွာ ဖြစ်ပေါ်ခဲ့ပါတယ်” ဟု လွှတ်တော်၌ ရှင်းလင်းပြောကြားသည်။
 
ကမ္ဘာ့ဘဏ်မှ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန အနေဖြင့် အမေရိကန်ဒေါ်လာ သန်း ၇၀ ချေးယူမည်ဖြစ်ပြီး ယင်းချေးငွေဖြင့် သဘာဝဘေးဒဏ်သင့် ဒေသများ၌ ကျေးလက်လမ်း၊ တံတားများ ပြင်ဆင်မွမ်းမံခြင်းနှင့် အဆင့်မြှင့်တင်ခြင်း လုပ်ငန်းများကို ဆောင်ရွက်ရန်၊ လမ်းပန်းဆက်သွယ်မှု လွယ်ကူချောမွေ့စေခြင်းဖြင့် ဘေးဒဏ်သင့် ဒေသများတွင် အသက်မွေးဝမ်းကျောင်း ပြန်လည်ထူထောင်ခြင်း လုပ်ငန်းများ အထောက်အကူပြုစေရန်နှင့် သဘာဝဘေးဒဏ် (သို့မဟုတ်) အရေးပေါ် အခြေအနေ ထပ်မံကျရောက်ပါက လျင်မြန်စွာ တုံ့ပြန်ဖြေရှင်း ဆောင်ရွက်မည်ဖြစ်ကြောင်း ဒေါက်တာအောင်သူက ရှင်းလင်းပြောကြားသည်။
 
သဘာဝဘေးဒဏ် ဆိုးရွားစွာ ခံစားခဲ့ရသည့် စစ်ကိုင်းတိုင်းဒေသကြီး၊ ပဲခူးတိုင်း ဒေသကြီး၊ မကွေးတိုင်းဒေသကြီး၊ ရန်ကုန်တိုင်း ဒေသကြီးနှင့် ဧရာဝတီတိုင်း ဒေသကြီးတို့၌ ကျေးလက်လမ်း (၁၈၀) မိုင်၊ စုစုပေါင်းအရှည် ၄၄၆၉ ပေရှိ တံတား ၅၅ စင်းတို့အား ပြန်လည်မွမ်းမံခြင်း၊ ကွန်ကရစ်လမ်းနှင့် ကွန်ကရစ် တံတားများအဖြစ် အဆင့်မြှင့်တင်ခြင်း လုပ်ငန်းများကို ဆောင်ရွက်ရန် လျာထားကြောင်း ဒေါက်တာအောင်သူက ဆက်လက် ပြောကြားသည်။
 
ထို့အတူ စီမံကိန်းနှင့် ဘဏ္ဍာရေး ၀န်ကြီးဌာနမှ သုံးစွဲမည့် ချေးငွေ အမေရိကန်ဒေါ်လာ ၁၅ သန်းသည် အရေးပေါ်တုံ့ပြန်မှု ချေးငွေအတွက် ဘဏ္ဍာငွေ ထပ်မံလိုအပ်ပါက ဖြည့်ဆည်းနိုင်ရန် ရည်ရွယ်၍ အရန်အဖြစ် ခွဲဝေလျာထားခြင်းဖြစ်ကြောင်း၊ ယင်းချေးငွေ အမေရိကန်ဒေါ်လာ ၁၅ သန်းဖြင့် သဘာဝဘေးဒဏ်ကြောင့် နောက်ဆက်တွဲ ဖြစ်ပေါ်လာသော လိုအပ်ချက်များဖြစ်သည့် လယ်ယာစိုက်ပျိုးရေးကဏ္ဍ၊ သားငါးကဏ္ဍတို့တွင် ပြန်လည်ထူထောင်ရေး လုပ်ငန်းများအား လျင်မြန်စွာ ပံ့ပိုးပေးနိုင်ရန်နှင့် အကယ်၍ စီမံကိန်း အကောင်အထည်ဖော်နေစဉ် ကာလအတွင်း သဘာဝဘေးအန္တရာယ် ကျရောက်ခဲ့ပါက အရေးပေါ် ပြန်လည်ထူထောင်ရေး ကိစ္စများ ဆောင်ရွက်နိုင်ရန်ဖြစ်ကြောင်း အဆိုပါ ၀န်ကြီးဌာနမှ ဦးကျော်ဝင်းက ရှင်းလင်းပြောကြားသည်။
 
ကမ္ဘာ့ဘဏ်မှ အမေရိကန်ဒေါ်လာ သန်း ၂၀၀ ချေးငွေနှင့် ပတ်သက်၍ ဆွေးနွေးလိုသည့် လွှတ်တော်ကိုယ်စားလှယ်များ အနေဖြင့် အမည်စာရင်း တင်သွင်းနိုင်ကြောင်း ပြည်ထောင်စုလွှတ်တော် နာယက မန်းဝင်းခိုင်သန်းက ကြေညာထားသည်။   
Writer: 
ကျော်ဇင်ဝင်း၊ မျိုးမင်းထက်