သိမ်းဆည်းခံ လယ်ယာမြေများနှင့် ပတ်သက်၍ တိုင်ကြားမှုများရှိနေပြီး အကြံပြုချက်များဖြင့် လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေး ဗဟိုကော်မတီသို့ တိုက်ရိုက်ပေးပို့လျက်ရှိကြောင်း လွှတ်တော် တောင်သူလယ်သမားနှင့် အလုပ်သမားရေးရာ ကော်မတီဥက္ကဋ္ဌ ပြောကြား

သိမ်းဆည်းခံ လယ်ယာမြေများနှင့် ပတ်သက်၍ တိုင်ကြားမှုများရှိနေပြီး အကြံပြုချက်များဖြင့် လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေး ဗဟိုကော်မတီသို့ တိုက်ရိုက်ပေးပို့လျက်ရှိကြောင်း လွှတ်တော် တောင်သူလယ်သမားနှင့် အလုပ်သမားရေးရာ ကော်မတီဥက္ကဋ္ဌ ပြောကြား
Published 27 September 2017

သိမ်းဆည်းခံလယ်ယာမြေများနှင့် ပတ်သက်၍ တိုင်ကြားမှုများ ရှိနေသေးပြီး အကြံပြုချက်များဖြင့် ဒုတိယသမ္မတ ဦးဟင်နရီဗန်ထီးယူ ဦးဆောင်သည့် လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေး ဗဟိုကော်မတီသို့ တိုက်ရိုက်ပေးပို့လျက်ရှိကြောင်း ပြည်သူ့လွှတ်တော် တောင်သူလယ်သမားနှင့် အလုပ်သမားရေးရာ ကော်မတီဥက္ကဋ္ဌ ဦးကျော်မြင့်က ပြောကြားသည်။

“တိုင်စာတွေနဲ့ ပတ်သက်လို့ ကျွန်တော်တို့ကော်မတီက ရောက်လာတဲ့တိုင်စာတွေကို သူ့တိုင်းအလိုက်တိုင်းအလိုက် ကိုယ်စားလှယ်တွေက ကျွန်တော်တို့မူအတိုင်း စိစစ်ပြီးတော့ တိုင်ကြားစာပါအရဆိုပြီး ကျွန်တော်တို့ ဒုသမ္မတ ဦးဟင်နရီဗန်ထီးယူဆီကို တိုက်ရိုက်ပို့ပါတယ်။ လက်ရှိမှာတော့ အမှုပေါင်း ၇၀၀၀ ကျော်ကိုစိစစ်ပြီး ပေးပို့ထားပြီးပါပြီ။ မစိစစ်ရသေးတဲ့ အမှုတွေလည်း ရှိသေးတယ်။ အမှုတွေကတော့ တောက်လျှောက်လာနေတာ။ ဘာဖြစ်လို့လဲဆိုတော့ အောက်ခြေတွေမှာ မကျေမလည်ဖြစ်တဲ့ဟာတွေကို အပေါ်ကို တိုင်ကြတာပေါ့” ဟု တောင်သူလယ်သမားနှင့် အလုပ်သမားရေးရာ ကော်မတီဥက္ကဋ္ဌ ဦးကျော်မြင့်က ပြောကြားသည်။

ထို့ပြင် တိုင်ကြားစာများနှင့် ပတ်သက်၍ သက်ဆိုင်ရာမြို့နယ်ရှိ လွှတ်တော်ကိုယ်စားလှယ်များနှင့် တွေ့ဆုံဆွေးနွေးကာ ၎င်း၏မှတ်ချက်နှင့် တိုင်ကြားစာပါ အချက်အလက်များအပေါ် စိစစ်ကာ မည်သို့ဆက်လက် ဆောင်ရွက်သင့်သည်ကို မှတ်ချက်ပြု၍ လယ်ယာမြေနှင့်အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေးဗဟိုကော်မတီသို့ တိုက်ရိုက်ပေးပို့ခြင်းဖြစ်ကာ အစိုးရမှလုပ်ဆောင်ချက်များ မှားယွင်းမှုနည်းပါးရန် ပူးပေါင်းဆောင်ရွက်ခြင်းဖြစ်ကြောင်း ကော်မတီ ဥက္ကဋ္ဌက ပြောကြားသည်။

သိမ်းဆည်းခံ လယ်ယာမြေနှင့် အခြားမြေများနှင့် ပတ်သက်၍ စီမံကိန်းလုပ်ဆောင်မှုမရှိသေးသည့် သိမ်းဆည်းထားသော မြေနေရာများအား မူလပိုင်ရှင်များထံ ပြန်လည်ပေးအပ်ရန် အစီအစဉ်ရှိမရှိကို ပြည်သူ့လွှတ်တော်ဥက္ကဋ္ဌ ဦးဝင်းမြင့်ကိုယ်တိုင် မေးခွန်းထုတ်မေးမြန်းခဲ့ပြီး လွှတ်တော်ကိုယ်စားလှယ်များ အနေဖြင့်လည်း လယ်ယာမြေများ သိမ်းဆည်းခံရခြင်းမှ ပြန်လည်စိစစ်ရေး ဗဟိုကော်မတီတွင် မပါဝင်ပါက ပါဝင်နိုင်ရန် ဆောင်ရွက်ရန်နှင့် မူလပိုင်ရှင်များထံ ပြန်လည်ပေးအပ်နိုင်ရန်အတွက် ဥပဒေနှင့်အညီ မှန်မှန်ကန်ကန်၊ တရားမျှတဖြစ်စေရန် အဂတိ၊ ဘက်မလိုက်ဘဲ သက်ဆိုင်ရာ အာဏာပိုင်များနှင့် ပူးပေါင်းဆောင်ရွက်ကြရန် လိုအပ်ကြောင်း ဇွန် ၁၂ ရက်က ပြည်သူ့လွှတ်တော်၌ ပြောကြားထားသည်။

Most Recent