လစာတိုးမြှင့်ရေးသည် ဝန်ထမ်းများ မျှော်လင့်သလို ချက်ချင်းမဖြစ်နိုင်သေးဘဲ နိုင်ငံတော်အစိုးရအနေဖြင့် အခြားနည်းလမ်းများဖြင့် ပံ့ပိုးပေးသွားမည်ဖြစ်ကြောင်း နိုင်ငံတော်၏အတိုင်ပင်ခံပုဂ္ဂိုလ် ပြောကြား

လစာတိုးမြှင့်ရေးသည် ဝန်ထမ်းများ မျှော်လင့်သလို ချက်ချင်းမဖြစ်နိုင်သေးဘဲ နိုင်ငံတော်အစိုးရအနေဖြင့် အခြားနည်းလမ်းများဖြင့် ပံ့ပိုးပေးသွားမည်ဖြစ်ကြောင်း နိုင်ငံတော်၏အတိုင်ပင်ခံပုဂ္ဂိုလ် ပြောကြား
Published 28 July 2017

လစာတိုးမြှင့်ရေးသည် ဝန်ထမ်းများ မျှော်လင့်သလို ချက်ချင်းမဖြစ်နိုင်သေးပေမဲ့ နိုင်ငံတော်အစိုးရအနေဖြင့် ပြည်သူ့ဝန်ထမ်းများကို အခြားနည်းလမ်းများနှင့် ပံ့ပိုးပေးသွားမည်ဖြစ်ပါကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။

ဇူလိုင် ၁၀ ရက်က နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းစင်တာ-၂ (MICC-2) တွင်ကျင်းပသည့် မြန်မာနိုင်ငံ၊ နိုင်ငံ့ဝန်ထမ်း ပြုပြင်ပြောင်းလဲမှုဆိုင်ရာ မဟာဗျူဟာစီမံချက်အား ထုတ်ပြန်ကြေညာသည့် အခမ်းအနားနှင့် ဖွံ့ဖြိုးဆဲနိုင်ငံများမှ နိုင်ငံ့ဝန်ထမ်းများ၏ ယုံကြည်ချက်၊ ခံယူချက်နှင့် စိတ်ဓာတ်မြင့်မား တက်ကြွလာစေရေးအတွက် ကမ္ဘာ့နိုင်ငံများမှ သတ်မှတ်ကျင့်သုံးသည့် နည်းလမ်းများကို လေ့လာဆွေးနွေးခြင်းနှင့် ပြည်သူ့ဝန်ထမ်းများအား လုပ်ငန်းခွင်တွင် စိတ်အားထက်သန်တက်ကြွစွာဖြင့် ဝန်ဆောင်မှုပေးနိုင်ရေး လှုံ့ဆော်မြှင့်တင်ပေးခြင်း အသိပညာမျှဝေမှုဖိုရမ်တွင် နိုင်ငံတော်၏ အတိုင်ပင်ခံပုဂ္ဂိုလ်က အဖွင့်မိန့်ခွန်းပြောကြားရာတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

“ကျွန်မတို့အစိုးရအဖွဲ့အနေနဲ့လည်း ကျွန်မတို့ရဲ့ဝန်ထမ်းတွေကို ဂရုတစိုက်စောင့်ရှောက်ပေးရမယ့် တာဝန်တွေရှိတယ်ဆိုတာကို သိရှိနားလည်ထားပါတယ်။ ကျွန်မတို့ဝန်ထမ်းတွေ သင့်လျော်မျှတတဲ့ လုပ်ခလစာရရှိရေး၊ ကောင်းမွန်တဲ့ အထွေထွေခံစားခွင့်တွေ ရရှိခံစားနိုင်ရေးအတွက် အစွမ်းကုန်ကြိုးစား ဆောင်ရွက်ပေးသွားမှာဖြစ်ပါတယ်” ဟု ဒေါ်အောင်ဆန်းစုကြည်က ပြောကြားသည်။

ပြည်သူ့ဝန်ထမ်းအများစု၏ လုပ်ခလစာနှုန်းထားသည် အခြားနယ်ပယ်များမှ ဝန်ထမ်းများနှင့် နှိုင်းယှဉ်ပါက နိမ့်ကျနေသေးသည်ကို သိရှိကြောင်း၊ လစာတိုးမြှင့်ရေးသည် ဝန်ထမ်းများမျှော်လင့်သလို ချက်ချင်းမဖြစ်နိုင်သေးပေမဲ့ နိုင်ငံတော်အစိုးရအနေဖြင့် ပြည်သူ့ဝန်ထမ်းများအား အခြားနည်းလမ်းများနှင့် ပံ့ပိုးပေးသွားမည်ဖြစ်ပါကြောင်း နိုင်ငံတော်၏ အတိုင်ပင်ခံပုဂ္ဂိုလ်က ဆက်လက်ပြောကြားသည်။

“ဒီကိစ္စနဲ့ပတ်သက်ပြီး ပွင့်ပွင့်လင်းလင်းပဲ ပြောလိုပါတယ်။ ဒီပြဿနာကို ချက်ချင်းဖြေရှင်းပေးနိုင်မယ့်နည်း မရှိသေးပါဘူး။ လုပ်ခလစာ တိုးမြှင့်ပေးတဲ့အခါမှာ လေးလေးနက်နက် စဉ်းစားသုံးသပ်ပြီး ရေရှည်တည်တံ့အောင် ဖြည်းဖြည်းချင်း တိုးမြှင့်ပေးရမှာဖြစ်တဲ့အပြင် နိုင်ငံတော်ရဲ့ ရသုံးမှန်းခြေငွေစာရင်း အခြေအနေနဲ့အညီလည်း ဆောင်ရွက်ရပါတယ်” ဟု ဒေါ်အောင်ဆန်းစုကြည်က ပြောကြားသည်။

နိုင်ငံ့ဝန်ထမ်းများအတွက် ပိုမိုကောင်းမွန်သည့် အလုပ်ခွင်ဖန်တီးခြင်းနှင့် မိသားစုဝင်များအတွက် နေထိုင်မှုအခြေအနေများ ပိုမိုကောင်းမွန်လာစေရန် ဖြစ်မြောက်ရန်အတွက် ကြိုးပမ်းဆောင်ရွက်သွားမည်ဖြစ်ကြောင်း ၎င်းကဆိုသည်။

လက်ရှိတွင် စတင်လုပ်ဆောင်နေသည့် လုပ်ရပ်တစ်ခုအဖြစ် အဆင့်မြင့်ဝန်ထမ်းအိမ်ရာများ ဆောက်လုပ်နေပြီး အငြိမ်းစားပြည်သူ့ဝန်ထမ်းများ နိုင်ငံအပေါ်သစ္စာရှိစွာ နှစ်ရှည်လများ တာဝန်ထမ်းဆောင်အပြီးတွင် လုံလုံခြုံခြုံ၊ သိက္ခာရှိစွာ နေထိုင်သွားနိုင်ရန်အတွက် အိမ်ရာများဆောက်လုပ်ပေးသွားမည်ဖြစ်ကြောင်း နိုင်ငံတော်၏အတိုင်ပင်ခံပုဂ္ဂိုလ်က ပြောကြားသည်။

Writer:
နေရိုင်း၊ ဇေယျာထွန်း

Most Read

Most Recent