ရွေးကောက်ပွဲဥပဒေသုံးရပ်ကို တစ်ခုတည်းအဖြစ် ပူးပေါင်းမည့် လွှတ်တော်ရွေးကောက်ပွဲ ဥပဒေသစ် ရေးဆွဲနေပြီး အတည်ပြုပြဋ္ဌာန်းနိုင်ရန် ယခုနှစ်ဒီဇင်ဘာတွင် လွှတ်တော်သို့တင်ပြမည်

ပြည်သူ့လွှတ်တော် ရွေးကောက်ပွဲဥပဒေ၊ အမျိုးသားလွှတ်တော် ရွေးကောက်ပွဲဥပဒေ၊ တိုင်းဒေသကြီးနှင့် ပြည်နယ်ရွေးကောက်ပွဲဥပဒေ စသည်ဖြင့် သီးခြားရေးဆွဲထားသော ရွေးကောက်ပွဲဥပဒေ သုံးရပ်ကို တစ်ခုတည်းအဖြစ် ပူးပေါင်းထားသည့် လွှတ်တော်ရွေးကောက်ပွဲဥပဒေသစ် ရေးဆွဲနေပြီး အတည်ပြု ပြဋ္ဌာန်းနိုင်ရေးအတွက် ယခုနှစ်ဒီဇင်ဘာတွင် လွှတ်တော်သို့ တင်ပြသွားမည်ဖြစ်ကြောင်း ပြည်ထောင်စု ရွေးကောက်ပွဲကော်မရှင်မှ သိရသည်။

“ပြီးခါနီးပါပြီ။ မူကြမ်းပြီးတဲ့အခါ နိုင်ငံရေးပါတီတွေ၊ CSO တွေနဲ့ တွေ့ဆုံဆွေးနွေး ညှိနှိုင်းပြီး အကြံပြုချက်တွေ ရယူဖို့ရှိပါသေးတယ်။ ပါဝင်ပတ်သက်တဲ့ အဖွဲ့တွေအားလုံး စုံသွားပြီ ဆိုရင်တော့  ဒီဥပဒေမူကြမ်းကို လွှတ်တော်ကို ဆက်လက် တင်ပြသွားမှာ ဖြစ်ပါ တယ်” ဟု  ပြည်ထောင်စု ရွေးကောက်ပွဲကော်မရှင် အဖွဲ့ဝင် ဦးတင်ထွန်းက ပြောကြားသည်။

“ဒီနှစ်ဒီဇင်ဘာမှာ လွှတ်တော်ကို တင်ပြဖို့ ရည်မှန်းထားပါတယ်” ဟု ၎င်းကဆက်လက် ပြောကြားသည်။

ယခင်က ရွေးကောက်ပွဲဥပဒေသုံးရပ် ရှိနေသည့်အတွက် ဖတ်ရှုနားလည်ရန် ခက်ခဲသည်ဟု လွှတ်တော်ကိုယ်စားလှယ်များ အပါအ၀င် လေ့လာသူများ၊ ပြည်တွင်းပြည်ပ အဖွဲ့အစည်းများက တင်ပြကြောင်း၊ ရွေးကောက်ပွဲ ကော်မရှင်က လေ့လာသုံးသပ်ရာတွင်လည်း ဥပဒေသုံးခုတွင် မဲဆန္ဒနယ် သတ်မှတ်သည့် နေရာမှလွဲ၍ ဥပဒေပုဒ်မ အများစုမှာ တူညီသည့်အတွက် လွယ်ကူစေရန် ရေးဆွဲဆောင်ရွက်ခြင်း ဖြစ်ကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင် ဦးမြင့်နိုင်က ပြောကြားသည်။

“ကျွန်တော်တို့ ကြည့်တဲ့အခါ လွှတ်တော်သုံးရပ်အတွက် ဥပဒေသုံးခု ပြဋ္ဌာန်းတယ်။ နည်းဥပဒေကလည်း သုံးခုပြဋ္ဌာန်းတယ်။ အဲဒီလိုပြဋ္ဌာန်းတဲ့အတွက် ဖတ်ရှုတဲ့အခါ နားလည်ဖို့ခက်ခဲတာ။ တစ်ခုတည်းသာ လုပ်လိုက်ရင် အလွယ်တကူ သိရှိသွားပြီလို့ ယူဆတယ်။ တကယ်လည်း တစ်ခုတည်း ပြင်ဆင်ထားတယ်။ ဖတ်ရတာ သိပ်လွယ်သွားတယ်” ဟု ရွေးကောက်ပွဲကော်မရှင် အဖွဲ့ဝင် ဦးမြင့်နိုင်က ပြောကြားသည်။

“ပုဒ်မလည်း ထူးမသွားဘူး။ အခန်းကလည်း ထူးမသွားဘူး။ အခန်းကလည်း တစ်ခန်းပဲပိုတယ်။ အဲဒါကလည်း  ရည်ရွယ်ချက် ထည့်လိုက်တဲ့သဘော။ ဥပဒေသုံးခုက ပေါင်းသွားတာ အင်မတန်ကောင်းတဲ့ သဘောပေါ့။ သေသေချာချာ သုံးခုကို တစ်ခုပေါင်းတယ်။ အရင်တုန်းက ရွေးကောက်ပွဲ အတွေ့အကြုံတွေက လိုအပ်တဲ့ ပြဋ္ဌာန်းချက်ကလေးတွေလည်း အသစ်ထည့်ထားတယ်။ CSO တွေ လေ့လာခွင့်ရမယ့် ကိစ္စတွေ၊ နောက်ပြီးတော့ ရွေးကောက်ပွဲ အငြင်းပွားမှုတွေ၊ ညှိနှိုင်းရေး ကော်မတီတွေဖွဲ့ပြီး လုပ်တာတွေ။ ဒါတွေကိုလည်း ဥပဒေသစ်မှာ ထည့်လိုက်တော့ ပိုပြီးတော့ ခိုင်ခိုင်မာမာ ဖြစ်သွားမယ်။ ထူးထူးခြားခြားကြီး ပြောင်းလဲသွားတာမျိုး မရှိဘူး” ဟု ဦးမြင့်နိုင်က ဆက်လက်ပြောကြားသည်။

ရွေးကောက်ပွဲဥပဒေ သုံးရပ်မှ လွှတ်တော်ရွေးကောက်ပွဲဥပဒေ တစ်ခုတည်းအ ဖြစ် သတ်မှတ်ပြဋ္ဌာန်းမည် ဖြစ်သကဲ့သို့ ရွေးကောက်ပွဲ နည်းဥပဒေမှာလည်း တစ်ခုတည်းသာ သတ်မှတ်မည်ဖြစ်ကြောင်း၊ နည်းဥပဒေ ရေးဆွဲမှုနှင့် ပတ်သက်၍လည်း တစ်ပြိုင်တည်း အကောင်အထည်ဖော် ဆောင်ရွက်နေကြောင်း၊ နည်းဥပဒေ ရေးဆွဲရာတွင် လွှတ်တော်ကိုယ်စားလှယ်များအတွက် ရွေးကောက်ပွဲ အသုံးစရိတ် တူညီစွာ ရရှိနေမှုကို စဉ်းစားသုံးသပ် သွားမည်ဖြစ်ကြောင်း သိရသည်။

“တိုင်းဒေသကြီး ပြည်နယ်လွှတ်တော် ကိုယ်စားလှယ်ကျတော့ နှစ်နေရာဆိုတော့ မြို့နယ်တစ်ဝက်ကိုပဲ သူက အသုံးစရိတ်ရတယ်။ ပြည်သူ့လွှတ်တော် ကိုယ်စားလှယ်က တစ်မြို့နယ်လုံးအတွက် အကုန်ရတယ်။ အမျိုးသားလွှတ်တော် ကိုယ်စားလှယ်ကျတော့ တချို့ဆို နှစ်မြို့နယ်၊ သုံးမြို့နယ် အဲဒီလိုသုံးရတယ်။ သို့သော်လည်း သိန်းတစ်ရာစီ အညီအမျှဆိုတော့ အဲဒီမှာလည်း အခက်အခဲ နည်းနည်းရှိတယ်။ နည်းဥပဒေကျရင်တော့ ဒါလည်း ပြန်စဉ်းစားဖို့ရှိနေတယ်။ အသုံးစရိတ်က တစ်ပြေးညီပေးထားတော့ တကယ်ကွင်းဆင်းတဲ့အခါ အမျိုးသားလွှတ်တော်က နှစ်မြို့နယ်၊ သုံးမြို့နယ်၊ လေးမြို့နယ် ပေါင်းတော့  သူ့ကျနည်းသွားတာပေါ့။ တချို့မြို့နယ်ကျ လူဦးရေ သောင်းဂဏန်းပဲရှိတယ်။ လူဦးရေ သိန်းဂဏန်းရှိတဲ့ မြို့နယ်တွေရဲ့ အသုံးစရိတ် ဒါလေးတွေကို သင့်တင့်အောင် စဉ်းစားထားပါတယ်” ဟု ပြည်ထောင်စု ရွေးကောက်ပွဲ ကော်မရှင်အဖွဲ့ဝင် ဦးမြင့်နိုင်က ပြောကြားသည်။

အဆိုပါဥပဒေသစ် ရေးဆွဲနိုင်ရန်အတွက် နိုင်ငံရေးပါတီများ၊ လေ့လာသူများ အပါအ၀င် သက်ဆိုင်ရာ အဖွဲ့အစည်းများနှင့် တိုင်းဒေသကြီးနှင့် ပြည်နယ်အဆင့် ဆွေးနွေးပွဲ ၁၄ ကြိမ်၊ ပြည်ထောင်စုအဆင့် ဆွေးနွေးပွဲ သုံးကြိမ်ပြုလုပ်ခဲ့ကြောင်း၊ မူကြမ်းအချောသပ် ရေးဆွဲပြီးစီးပါက လွှတ်တော်သို့ မတင်သွင်းမီ နိုင်ငံရေးပါတီများ၊ လေ့လာသူများ အပါအ၀င် ဥပဒေနှင့် ဆက်စပ်သည့် အဖွဲ့အစည်းများနှင့် တွေ့ဆုံကာ အကြံပြုချက်များ ရယူဆောင်ရွက်မည် ဖြစ်ကြောင်း ပြည်ထောင်စု ရွေးကောက်ပွဲကော်မရှင် အတွင်းရေးမှူး ဦးတင်ထွန်းက ပြောကြားသည်။