ဒိုင်ယာလော့ ယဉ်ကျေးမှု အသက်ဝင်လာပြီလား

သူနာပြုဂုဏ်ပြုသီချင်း (ကရုဏာအလင်း) သီဆို၍ ဗီနိုင်းများ ကိုင်ဆောင်ကာ လမ်းလျှောက်လာသော ရန်ကုန်သူနာပြုတက္ကသိုလ်မှ ကျောင်းသား၊ ကျောင်းသူများအား မတ် ၁၅ ရက်က တွေ့ရစဉ်

မြန်မာနိုင်ငံမှာ ၁၉၆၂ ခုနစ် ဦးနေ၀င်း အာဏာသိမ်းချိန်ကစလို့ အုပ်ချုပ်သူလူတန်းစားနဲ့ အုပ်ချုပ်ခံ လူတန်းစားကြားမှာ ပျောက်နေတဲ့ ယဉ်ကျေးမှုတစ်ခု ရှိခဲ့ပါတယ်။ အဲဒီလို အုပ်ချုပ်သူ(အစိုးရ)နဲ့ အုပ်ချုပ်ခံ (ပြည်သူ) ကြားမှာ အဓိကပျောက်ဆုံးခဲ့တဲ့ ယဉ်ကျေးမှုကို လက်ရှိအစိုးရသစ် လက်ထက်မှာ ပြီးခဲ့တဲ့မတ် ၁၇ ရက်က ပြန်လည်တွေ့ခဲ့ရပါတယ်။

အုပ်ချုပ်သူ (အစိုးရ) နဲ့ အုပ်ချုပ်ခံ (ပြည်သူ) ကြားမှာ နှစ်ပေါင်း ၅၅ နှစ်ကြာမှ ပြန်လည်တွေ့ရှိခဲ့ရတဲ့ ပျောက်ဆုံးနေတဲ့အရာဆိုတာ ဒိုင်ယာလော့ယဉ်ကျေးမှုပဲ ဖြစ်ပါတယ်။ ပြီးခဲ့တဲ့ မတ် ၁၅ ရက်က သူနာပြုရပ်ဝန်း ဖိနှိပ်မှုရပ်ဆိုပြီး သူနာပြုတက္ကသိုလ် ကျောင်းသားများသမဂ္ဂကနေ ဆန္ဒပြမှု ပြုလုပ်ခဲ့ပါတယ်။

သူနာပြုတက္ကသိုလ် ကျောင်းသားကျောင်းသူတွေ အနေနဲ့ “ပြည်သူ့ဆေးရုံများတွင် လိုင်စင်မဲ့သူနာပြုများမှ ကျန်းမာရေးစောင့်ရှောက်မှု ပေးနေသည်ကို သင်သိပါသလား” “မြန်မာနိုင်ငံရဲ့ ကျန်းမာရေး စောင့်ရှောက်မှုဟာ မလုံခြုံတော့ပါဘူး” စတဲ့စာတန်းတွေကို ကိုင်ဆောင်ကာ သူနာပြုသီချင်းကိုသီဆိုပြီး သူနာပြု တက္ကသိုလ်ကနေ ဆူးလေအထိ စီတန်းလမ်းလျှောက် ဆန္ဒပြခဲ့ကြတာပါ။

“အဓိက ခံစားချက်က လိုင်စင်လက်ဝယ် ကိုင်ထားချင်တယ်။ လိုင်စင်မရှိဘူးဆိုရင် လမ်းမှာလူနာတစ်ခုခုဖြစ်ရင် ကူညီခွင့်မရှိဘူး” လို့ရန်ကုန်သူနာပြုတက္ကသိုလ် ကျောင်းသားများသမဂ္ဂမှ ဥက္ကဋ္ဌကိုမင်းကျော်လင်းက ဆိုပါတယ်။

သူနာပြုတက္ကသိုလ် ကျောင်းသားများသမဂ္ဂကနေ ဦးဆောင်ပြီး ကျောင်းသားကျောင်းသူ အယောက် ၅၀၀ ကျော်လောက်က ဆန္ဒထုတ်ဖော်ခဲ့ကြတာ ဖြစ်ပါတယ်။ ဒီလိုဆန္ဒထုတ်ဖော်ရာမှာ တောင်းဆိုချက် အချက်သုံးချက်ကို တောင်းဆိုခဲ့ကြပါတယ်။  

အဓိက တောင်းဆိုခဲ့ကြတဲ့ အချက်သုံးချက်ကတော့ သူနာပြုနှင့် သားဖွားသင်တန်းကျောင်းတွေက သက်ဆိုင်ရာဒီဂရီ၊ ဒီပလိုမာလက်မှတ် ရရှိသူတွေကို နိုင်ငံ့ဝန်ထမ်းဆောင်ရာမှာ အမြဲတမ်းလိုင်စင် ချက်ချင်းထုတ်ပေးဖို့၊ ကျန်းမာရေးဝန်ကြီး ဌာနရဲ့ထုတ်ပြန်မှုကို ရုပ်သိမ်းပေးဖို့နဲ့ မြန်မာနိုင်ငံ သူနာပြုနှင့် သားဖွားကောင်စီ ဥပဒေအခန်း (၂)၊ ၄။ (စ) မှာပါဝင်တဲ့ သူနာပြုသားဖွားလုပ်ငန်းတွေ ဆောင်ရွက်တဲ့အခါမှာ အကာအကွယ်ပေးဖို့ စတဲ့အချက်တွေပဲ ဖြစ်ပါတယ်။

ဘာကြောင့် ဆန္ဒပြကြသလဲ

သူနာပြုတက္ကသိုလ် ကျောင်းသားကျောင်းသူတွေ ဘာကြောင့်ဆန္ဒပြကြသလဲဆိုတာကို အဖြေရှာကြည့်တဲ့အခါမှာတော့ ကျန်းမာရေးနှင့် အားကစားဝန်ကြီးဌာနရဲ့ ကုသရေးဦးစီးဌာနကနေ ဖေဖော်ဝါရီ ၁ ရက်က ထုတ်ပြန်ခဲ့တဲ့ ကြေညာချက်ကြောင့်ပဲ ဖြစ်ပါတယ်။

ဒီကြေညာချက်ထဲမှာပါတဲ့ အကြောင်းအရာကတော့ “ပုဂ္ဂလိကဆေးရုံများတွင် သူနာပြုနှင့်သားဖွား တက္ကသိုလ်သင်တန်းကျောင်းများမှ စာချုပ်ဖောက်ဖျက်သော သူနာပြုနှင့် သားဖွားများခန့်ထားခြင်း မပြုရန်ကိစ္စ” ပဲဖြစ်ပါတယ်။

ဒီကိစ္စနဲ့ပတ်သက်လို့ ပုဂ္ဂလိကဆေးရုံတွေ အနေနဲ့ ကျန်းမာရေးနှင့် အားကစားဝန်ကြီးဌာနရှိ သူနာပြုတက္ကသိုလ်တွေ၊ သူနာပြုနှင့် သားဖွား သင်တန်းကျောင်းတွေကနေ ကျောင်းဆင်းသူနာပြု သားဖွားတွေကို ခန့်အပ်ရာမှာ စာချုပ်ပါ သတ်မှတ်ချက်တွေအရ နိုင်ငံ့ဝန်ထမ်းအဖြစ် အနည်းဆုံးသုံးနှစ် တာဝန်ထမ်းဆောင်ပြီးခြင်း၊ သက်ဆိုင်ရာဌာနရဲ့ တရားဝင်နုတ်ထွက်ခွင့် ရရှိပြီးဖြစ်ခြင်း၊ သူနာပြုနှင့် သားဖွားလိုင်စင် သက်တမ်းရှိသူဖြစ်ခြင်း အစရှိတဲ့အချက်တွေနဲ့ ပြည့်စုံသူတွေကိုသာ အမြဲတမ်းဝန်ထမ်းအဖြစ် ခန့်အပ်တာဝန် ထမ်းဆောင်စေဖို့နဲ့ စာချုပ်ဖောက်ဖျက်ထားသူ (ဒါမှမဟုတ်) သူနာပြုနှင့် သားဖွားလိုင်စင် မရှိသူတွေကို ခန့်အပ်တာဝန် ထမ်းဆောင်ခြင်းမပြုစေဖို့ ပုဂ္ဂလိက ကျန်းမာရေးလုပ်ငန်းဆိုင်ရာ ကြီးကြပ်ရေးကော်မတီ အဆင့်ဆင့်ထံ ထပ်မံညွှန်ကြားပြီး အခါအားလျော်စွာ ကွင်းဆင်းစစ်ဆေး ကြီးကြပ်ထားဖို့ အကြောင်းကြားအပ်ပါတယ်ဆိုပြီး ဖော်ပြပါရှိပါတယ်။

သူနာပြု ကျောင်းသူကျောင်းသားတွေ အနေနဲ့ သူနာပြုတက္ကသိုလ် သင်တန်းတက်ရောက်ပြီးပါက နိုင်ငံ့ဝန်ထမ်းအဖြစ် သုံးနှစ်ကြာ မပျက်မကွက် တာဝန်ထမ်းဖို့ ကတိခံဝန်စာချုပ်မှာ လက်မှတ်ရေးထိုးထားရပြီး ပျက်ကွက်ခဲ့ပါက လျော်ကြေးငွေ ကျပ်လေးသိန်းပေးလျော်ဖို့ စာချုပ်ချုပ်ဆိုထားပါတယ်။

ဒါပေမဲ့ ကုသရေးဦးစီးဌာနက ဖေဖော်ဝါရီ ၁ ရက်က ထုတ်ပြန်ခဲ့တဲ့ ကြေညာချက်ကြောင့် ပုဂ္ဂလိကဆေးရုံတွေမှာ အချိန်ပိုင်း ၀င်ရောက်လုပ်ကိုင်နေတဲ့ သူနာပြုတွေအတွက် ဥပဒေအကြောင်းအရ အန္တရာယ်ရှိလာပါတယ်။ ဘာကြောင့်လဲဆိုတော့  ၂၀၁၅ ခုနစ် မေ ၁၉ ရက်က ပြည်ထောင်စုလွှတ်တော်မှာ ပြဋ္ဌာန်းခဲ့တဲ့ မြန်မာနိုင်ငံ သူနာပြုနှင့်သားဖွားကောင်စီ ဥပဒေအခန်း (၁၃) တားမြစ်ချက်များ ပုဒ်မ ၃၆ မှာ “မည်သူမျှ ဤဥပဒေအရ ထုတ်ပေးထားသော လိုင်စင် သို့မဟုတ် ကန့်သတ်လိုင်စင်မရှိဘဲ သူနာပြုလုပ်ငန်း၊ သားဖွားလုပ်ငန်း သို့မဟုတ် သူနာပြုသားဖွားလုပ်ငန်းကို လုပ်ကိုင်ခြင်းမပြုရ” ဆိုပြီးပြဋ္ဌာန်းထားပါတယ်။

ဒီလိုပြဋ္ဌာန်းထားတာကို ဖောက်ဖျက်ကျူးလွန်ပါက ပုဒ်မ ၄၀ (က)အရ ကျူးလွန်သူကို တစ်နှစ်ထက်မပိုတဲ့ ထောင်ဒဏ်နဲ့ ဒဏ်ငွေအဖြစ် ကျပ်တစ်သိန်းကနေ ကျပ် ၁၀ သိန်းအထိ ပြစ်ဒဏ်ချမှတ်နိုင်ပါတယ်။

“အရင်ကဆို လိုင်စင်ထုတ်ပေးပါတယ်။ ကျောင်းပြီးပြီးချင်း၊ ဘွဲ့ရပြီးရင် လိုင်စင်ထုတ်ပေးပါတယ်။ အချိန်ကာလ သတ်မှတ်ပြီးတော့။ ကျွန်တော်တို့ အခုလိုင်စင်မှာ ဖေဖော်ဝါရီ ၁ ရက်ထုတ်ပြန်ချက်မှာဆိုရင် နိုင်ငံ့တာဝန် သုံးနှစ်ထမ်းဆောင်ပြီးမှ လိုင်စင်ထုတ်ပေးမှာ ဖြစ်တယ်။ အဲဒါကြောင့် လိုင်စင်ကိစ္စ ဖြစ်လာတာပါ။ ကျွန်တော်တို့မှာလက်ထဲမှာ လိုင်စင်မရှိဘူးဆိုရင် ကျွန်တော်တို့ ကျောင်းသားတစ်ယောက်အနေနဲ့ ကျွန်တော်တို့မှာ သီအိုရီရော၊ လက်တွေ့ရော ဆင်းခဲ့ရတယ်။ လေးနှစ် ကျွန်တော်တို့ အလုပ်ဝင်ရင် လိုင်စင်ကိုင်ထားချင်တယ်။ သုံးနှစ် တာဝန်ထမ်းဆောင်ပြီးမှ လိုင်စင်ပေးမယ်ဆိုတဲ့ သဘောရှိပါတယ်” လို့ ရန်ကုန်သူနာပြုတက္ကသိုလ် ကျောင်းသားများသမဂ္ဂမှ ဥက္ကဋ္ဌ ကိုမင်းကျော်လင်းက ဆိုပါတယ်။

ဒါကြောင့် ဒီညွှန်ကြားချက်အပေါ် သူနာပြုတက္ကသိုလ် ကျောင်းသားများသမဂ္ဂကနေ အပြင်းအထန် ကန့်ကွက်ရှုတ်ချခဲ့ပြီး ဖေဖော်ဝါရီ ၂၇ ရက်က သတင်းစာရှင်းလင်းပွဲတစ်ရပ် ပြုလုပ်ခဲ့ပါတယ်။ သတင်းစာရှင်းလင်းပွဲ ပြီးဆုံးချိန်မှာတော့  သူနာပြုတက္ကသိုလ် ကျောင်းသားများသမဂ္ဂကနေ သဘောထား ကြေညာချက်တစ်စောင်ကို ထုတ်ပြန်ခဲ့ပါတယ်။

၂၀၁၅ ခုနစ် မေ ၁၉ ရက်က ပြည်ထောင်စုလွှတ်တော်မှာ ပြဋ္ဌာန်းခဲ့တဲ့ မြန်မာနိုင်ငံ သူနာပြုနှင့်သားဖွားကောင်စီ ဥပဒေအခန်း (၆) မှတ်ပုံတင်ခြင်းနဲ့ အခန်း (၇) လိုင်စင်နှင့် ကန့်သတ်လိုင်စင်ဆိုင်ရာ ဥပဒေတွေအရ ပြည်သူ့ဆေးရုံတွေမှာ သုံးနှစ်တာဝန် ထမ်းဆောင်ပြီးမှသာ လိုင်စင်ထုတ်ပေးခြင်းဟာ ဒီဥပဒေပါ အကြောင်းအရာတွေကို ဖောက်ဖျက်ကျူးလွန်ရာ ရောက်နေတယ်ဆိုတဲ့ အချက်အပါအ၀င် အချက်ခုနစ်ချက်ကို ထုတ်ပြန်ခဲ့ပါတယ်။

ဒီလိုသတင်းစာရှင်းလင်းပွဲ ပြုလုပ်ပြီးချိန်ကစပြီး ငါးရက်ကြာတဲ့အချိန်ထိ ကျန်းမာရေးနှင့် အားကစားဝန်ကြီးဌာနဘက်ကနေ တစ်စုံတစ်ရာ ပြန်လည်တုံ့ပြန်မှုမရှိတာကြောင့် သူနာပြုတက္ကသိုလ် ကျောင်းသားများသမဂ္ဂကနေ ဆန္ဒပြတောင်းဆိုခဲ့ကြတာ ဖြစ်ပါတယ်။

လက်ရှိအချိန်မှာ ကျောင်းဆင်းပြီး အစိုးရ၀န်ထမ်း သူနာပြုလုပ်ကိုင်ပါက လစာ ၁၆၀၀၀၀ လောက်သာရရှိပြီး ပုဂ္ဂလိကဆေးရုံတွေမှာ သွားရောက်လုပ်ကိုင်ပါက တစ်လကို လစာငါးသိန်းလောက်ရရှိတယ်လို့ သူနာပြုအသိုင်းအ၀ိုင်းက ဆိုပါတယ်။ 

ဝန်ကြီးဌာန သတင်းစာရှင်းလင်းပွဲ

သူနာပြုတက္ကသိုလ် ကျောင်းသားကျောင်းသူတွေ လမ်းပေါ်ထွက် ဆန္ဒဖော်ထုတ်မှုနဲ့ ပတ်သက်လို့ ကျန်းမာရေးနှင့် အားကစားဝန်ကြီးဌာနမှ တာဝန်ရှိသူတွေအနေနဲ့ မတ် ၁၆ ရက်က နေပြည်တော်ရှိ ကျန်းမာရေးနှင့် အားကစားဝန်ကြီးဌာနမှာ  သတင်းစာရှင်းလင်းပွဲ ပြုလုပ်ခဲ့ပါတယ်။

သူနာပြုတက္ကသိုလ်၊ သင်တန်းကျောင်းတွေကနေ စာချုပ်ဖောက်ဖျက်တဲ့ သူနာပြုတွေနဲ့ သားဖွားတွေကို ပုဂ္ဂလိကဆေးရုံတွေမှာ ခန့်ထားခြင်းမပြုဖို့၊ ကျန်းမာရေးနှင့် အားကစားဝန်ကြီးဌာနက စာထုတ်ပြန်ခဲ့တဲ့အပေါ် ရန်ကုန်သူနာပြုတက္ကသိုလ် ကျောင်းသားကျောင်းသူတွေက မတ် ၁၅ ရက်က ဆန္ဒထုတ်ဖော်ခဲ့ပြီး နောက်တစ်ရက်မှာ ၀န်ကြီးဌာနဘက်ကနေ သတင်းစာရှင်းလင်းပွဲ ပြုလုပ်ခဲ့တာ ဖြစ်ပါတယ်။

“ပြေလည်အောင်လုပ်မယ်လို့ ပြောထားတာပဲ။ ပြေလည်အောင်ကိုညှိမှာ။ သူတို့ကျေကျေနပ်နပ် ဖြစ်တဲ့အထိ ဆရာတို့အနေနဲ့ စဉ်းစားထားတယ်။ တစ်ခုတော့ရှိတယ်။ ၀န်ထမ်းတွေ ဖြစ်တယ်ဆိုရင် ၀န်ထမ်းစည်းမျဉ်းတွေရှိတယ်။ ကျောင်းသားကျောင်းသူတွေမှာလည်း ကျောင်းသားကျောင်းသူ စည်းမျဉ်းတွေရှိတယ်။ တချို့ဟာတွေက ကျော်လို့မရဘူး။ ကျော်လို့မရတော့ သူတို့ရဲ့အတိုင်းအတာကို ကြည့်ရမယ်” လို့ကျန်းမာရေးနှင့် အားကစားဝန်ကြီးဌာန ကုသရေးဦးစီးဌာနမှ ညွှန်ကြားရေးမှူးချုပ် ပါမောက္ခ ဒေါက်တာမြင့်ဟန်က ဆိုပါတယ်။

ဒါ့ပြင် သူနာပြုနှင့်သားဖွား ကိစ္စရပ်တွေအတွက် ဆက်သွယ်ဆောင်ရွက်ဖို့ ခုနစ်ဦးပါတဲ့အဖွဲ့ကို တာဝန်ပေးအပ်ထားတယ်လို့ ကျန်းမာရေးနှင့် အားကစားဝန်ကြီးဌာန တာဝန်ရှိသူက ပြောပါတယ်။

အဲဒီအဖွဲ့မှာ ဒုတိယညွှန်ကြားရေးမှူးချုပ် ဒေါက်တာဌေးအောင် ဦးဆောင်ပြီး ညွှန်ကြားရေးမှူး (သူနာပြု)၊ လက်ထောက်ညွှန်ကြားရေးမှူး (သူနာပြု)၊  မြန်မာနိုင်ငံ သူနာပြုနှင့် သားဖွားကောင်စီဥက္ကဋ္ဌ၊ မြန်မာနိုင်ငံ သူနာပြုနှင့် သားဖွားအသင်း ဥက္ကဋ္ဌတွေပါဝင်သလို သူနာပြုတက္ကသိုလ် ကျောင်းသားများသမဂ္ဂလိုမျိုး အဖွဲ့အစည်းတွေနဲ့ တွေ့ဆုံညှိနှိုင်းသွားမယ်လို့ သိရပါတယ်။

ဖေဖော်ဝါရီ ၁ ရက်က ထုတ်ပြန်ခဲ့တဲ့ ညွှန်ကြားချက်မှာ ကျောင်းကိုသုံးနှစ်ပြည့်မီအောင် မတက်ပါက လျော်ကြေးပေးဖို့၊ ကျောင်းပြီးချိန်မှာ အစိုးရလုပ်ငန်းခွင်အတွင်း လုပ်သက်သုံးနှစ်မပြည့်ဘဲ အလုပ်ထွက်ပါက လိုင်စင်မထုတ်ပေးဖို့နဲ့ လိုင်စင်မရှိတဲ့ သူနာပြုတွေကို ပုဂ္ဂလိကဆေးရုံတွေမှာ အလုပ်ခန့်ထားခြင်းမပြုဖို့ ကျန်းမာရေးနှင့် အားကစားဝန်ကြီးဌာနက စည်းကမ်းချက်အသစ် ထုတ်ပြန်ခဲ့တာပါ။

ဒီလိုညွှန်ကြားချက် ထုတ်ပြန်ရခြင်းက နိုင်ငံတော်မှာ သူနာပြု လိုအပ်ချက် မြင့်မားနေတဲ့အပြင် အစိုးရလုပ်ငန်းခွင်တွေမှာ သူနာပြုတွေ အလုပ်ထွက်နှုန်း များပြားလာမှုကြောင့် ဖြစ်တယ်လို့ ကျန်းမာရေးနှင့် အားကစားဝန်ကြီးဌာနမှ တာဝန်ရှိသူတွေက ဆိုပါတယ်။

“စာချုပ်မှာလည်း သုံးနှစ်ထိုးထားကြတယ်။ ၀င်ခွင့်မှာလည်း ကြေညာထားတယ်။ ရိုးသားစွာပဲ သုံးနှစ်လေးလုပ်ပေးပါလို့ ဆရာတို့က ၀န်ထမ်းရေးရာ လိုအပ်ချက်အရ တောင်းဆိုခြင်း ဖြစ်ပါတယ်” လို့ ပါမောက္ခ ဒေါက်တာမြင့်ဟန်က ရှင်းလင်းပြောကြားပါတယ်။

ကျန်းမာရေး ၀န်ကြီးဌာနအနေနဲ့ အရင်စနစ်တုန်းက အစိုးရဆေးရုံတွေမှာ သုံးနှစ်တာဝန် ထမ်းဆောင်လိုခြင်းမရှိပါက လျော်ကြေးငွေ ပေးဆောင်စေခဲ့ပေမယ့် လက်ရှိမှာတော့ ၀န်ထမ်းလိုအပ်ချက်အရ လျော်ကြေး လက်ခံနိုင်ခြင်းမရှိတော့ဘူးလို့ သိရပါတယ်။

“တစ်ချိန်တုန်းက လျော်ကြေးပေးရင်ရပေမယ့် အခုကတော့လျော်ကြေး တစ်ခုတည်းနဲ့ လက်မခံနိုင်တော့ဘူး။ ကျွန်တော်တို့လိုချင်တာ ဆားဗစ်လိုချင်တာပါ။ အဲဒီတော့ ပွင့်ပွင့်လင်းလင်းပြောရရင် နောင်ဆိုရင် လျော်ကြေးကို စဉ်းစားဖို့ လျော်ကြေးကို မသတ်မှတ်နဲ့တော့လို့ပါ ပြောချင်တယ်” လို့ ပါမောက္ခ ဒေါက်တာမြင့်ဟန်က  ပြောကြားပါတယ်။

ဒီဖြစ်စဉ်နဲ့ ပတ်သက်လို့ ခုတင် ၅၀၀ ဆံ့ကလေးဆေးရုံ (မန္တလေး) မှသူနာပြု မမေသူနှင်းက “ပထမဦးဆုံး သတင်းစာရှင်းလင်းပွဲလုပ်တာ ကျွန်မတို့ ကျောင်းသားတွေဘက်က တောင်းဆိုတာရှိတဲ့အတွက် သတင်းစာရှင်းလင်းပွဲ လုပ်လာတယ်လို့ မြင်ပါတယ်။ သူတို့ သတင်းစာရှင်းလင်းပွဲလုပ်တာ အရမ်းနောက်ကျပါတယ်။ ကလေးတွေက လမ်းပေါ်ရောက်ခဲ့ပြီးပါပြီ။ ဒါဟာဖြစ်သင့်လား မဖြစ်သင့်လား အားလုံးစဉ်းစားတတ်ပါတယ်။ ဒီသတင်းစာရှင်းလင်းပွဲ လုပ်ပြီဆိုတော့ ကျွန်တော်တို့ မျှော်လင့်ချက်လေးနဲ့ နေပြည်တော်ကလူတွေ အကုန်လာတယ်။ ကျွန်တော်ကိုယ်တိုင် မန္တလေးက ဆင်းလာတယ်။ သတင်းစာရှင်းလင်းပွဲနဲ့ ပတ်သက်ပြီး သူတို့ရဲ့ရည်ရွယ်ချက်က လိုင်စင်နဲ့ပတ်သက်တဲ့ ရှင်းလင်းချက်တွေ လုပ်သွားပါတယ်။ အစိုးရအလုပ်ဝင်ခြင်း မ၀င်ခြင်းတွေ ပြောပြချက်တွေကို သူတို့ဘက်က ရှေ့ဆက်လျှောက်မယ့် လမ်းအချက်အလက်တွေကို ရှင်းသွားပါတယ်။ ကျွန်တော်တို့ ကျောင်းသားဘက်က ပြန်လည်မေးမြန်းချက်တွေ ရှိပါတယ်။ အဲဒီအချိန်မှာ သူတို့က ဖြေဆိုခြင်းမရှိပါဘူး။ အကုန်လုံး အနှစ်ချုပ်လိုက်တဲ့အချိန်မှာ သူတို့ရုံးပိုင်းဆိုင်ရာ အချင်းချင်း ချိတ်ဆက်လုပ်ရမယ့် ကိစ္စတွေရှိတယ်။ အဖွဲ့ဖွဲ့ထားတာတွေရှိတယ်။ ဒါပေမဲ့လည်း အဖြေကိုတိတိကျကျ မပေးနိုင်ပါဘူးဆိုတာနဲ့ပဲ အဆုံးသတ်သွားပါတယ်။ သူတို့ဘက်က သေချာပေါက်ကတော့ ကျောင်းသားတွေ ဒီထက်ရှေ့ဆက်လာလို့ရှိရင် ဆေးကုသရေးအပိုင်းက ဆရာမတွေလည်း ငြိမ်မနေတော့ပါဘူး။ သေချာတာကတော့ အကုန်ခြုံပြောရင်တော့ ဆေးကုသပေးနေတဲ့ စက်ယန္တရားတစ်ခုမှာ အနှောင့်အယှက် တော်တော်ကြီးကြီးမားမား ဖြစ်သွားနိုင်တယ်ဆိုတာ ပြောချင်ပါတယ်။ ကျွန်မတို့ဘက်က လိုချင်တဲ့အဖြေတစ်ခု၊ ပွင့်လင်းမြင်သာတဲ့ အဖြေတစ်ခု ထွက်မလာမချင်း တစ်ခုခုကို လုပ်ဆောင်သွားပါမယ်။ တစ်နိုင်ငံလုံး အတိုင်းအတာနဲ့ ဖြစ်နိုင်ပါတယ်။ အားလုံးကိုယ်စား ပြောပါတယ်။ ကျွန်မတို့ အကုန်လုံး စဉ်းစားပါမယ်။ အားလုံး နှိုင်းဆချင့်ချိန်ပြီးမှ လုပ်ပါမယ်” လို့သတင်းစာရှင်းလင်းပွဲအပြီးမှာ မီဒီယာတွေကို ပြောကြားပါတယ်။

မြန်မာနိုင်ငံမှာ ဆေးရုံပေါင်း ၁၁၂၃ ရုံရှိပြီးတော့ အဲဒီဆေးရုံတွေမှာ ခွင့်ပြုသူနာပြုအင်အား ၃၇၀၀၀ ကျော်ရှိရမှာဖြစ်ပေမယ့် လက်ရှိခန့်အပ်ထားမှုကတော့ ၂၀၀၀၀ ကျော်သာရှိပါတယ်။ နိုင်ငံတော်အနေနဲ့ သူနာပြုဦးရေ တစ်နှစ်ကို နှစ်ထောင်လောက်သာ မွေးထုတ်ပေးနိုင်ခဲ့တယ်လို့ သိရပါတယ်။

လက်ရှိမြန်မာနိုင်ငံရဲ့ ဆေးရုံပေါင်း ၁၁၂၃ ရုံမှာ သူနာပြု ၁၅၁၁၈ ယောက်လစ်လပ်နေပြီး သူနာပြု သင်တန်းဆင်း ၂၅ ရာခိုင်နှုန်းဟာ ပြည်သူ့ဆေးရုံတွေမှာ အလုပ်မ၀င်ကြဘူးလို့ သိရပါတယ်။

“ဘယ်အရင်းအမြစ်တွေက နည်းနေလဲဆိုရင် သူနာပြုလို့ပြောရမယ်။ ဘယ်လိုနည်းနေလဲဆိုတော့ ခွင့်ပြုတာက ၃၇၇၀၄၊ တကယ်တမ်း ခန့်ထားတဲ့နေရာမှာ ၂၀၆၈၃ ဦးပဲခန့်ထားနိုင်ပါတယ်။ ရာခိုင်နှုန်းနဲ့ တွက်ကြည့်ရင် ၅၄ ဒသမ ၈၅ ရာခိုင်နှုန်းပဲ ရှိပါတယ်။ အဲဒီတော့လွယ်လွယ်နဲ့ ကောက်ချက်ချကြည့်ရင် ကျွန်တော်တို့ ခန့်ထားနိုင်တဲ့ အင်အားရဲ့ ရာခိုင်နှုန်း ၅၀ သောသူနာပြုတွေနဲ့ တိုင်းပြည်မှာရှိတဲ့ ဆေးရုံတွေက လည်ပတ်နေတယ်ဆိုတာ အလေးအနက်ထားပြီး တင်ပြလိုပါတယ်။ ဆေးရုံပေါင်း ၁၁၂၃ ရုံမှာ လစ်လပ်တာက ၁၅၁၁၈ ယောက်။ ရာခိုင်နှုန်းအားဖြင့် ၄၃ ရာခိုင်နှုန်း လစ်လပ်နေတယ်” လို့ဒေါက်တာမြင့်ဟန်က ပြောပါတယ်။

မြန်မာနိုင်ငံရှိ သူနာပြုတက္ကသိုလ်နှစ်ခုနဲ့ သူနာပြုနှင့်သားဖွား သင်တန်းကျောင်းပေါင်း ၅၀ ကနေ သူနာပြုတွေ မွေးထုတ်ပေးနေပြီး လက်ရှိအချိန်မှာ သင်တန်းသားပေါင်း ၉၉၀၀ ကျော်တက်ရောက်နေကြောင်းလည်း သိရပါတယ်။

တွေ့ဆုံညှိနှိုင်းမှု ရလဒ်

သူနာပြု ကျောင်းသူကျောင်းသားတွေ ဆန္ဒပြတောင်းဆိုထားတဲ့ အချက်တွေနဲ့ပတ်သက်လို့ မတ် ၁၇ ရက်က ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေး၊ ညှိနှိုင်းရေးအဖွဲ့နဲ့ သူနာပြုတက္ကသိုလ် ကျောင်းသားများသမဂ္ဂတို့ သုံးပွင့်ဆိုင် ဆွေးနွေးခဲ့ကြပါတယ်။

ရန်ကုန်မြို့က ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီးနေအိမ်မှာ နှစ်နာရီကြာ ဆွေးနွေးခဲ့ပြီးနောက် တောင်းဆိုချက်တွေ ရရှိခဲ့တယ်လို့ သူနာပြုသမဂ္ဂအဖွဲ့ဝင် မကေခိုင်ထွန်းက ဆိုပါတယ်။

“ကျွန်မတို့ အဆင်ပြေပြေပဲ ညှိနှိုင်းပြီးသွားပါပြီ။ အသေးစိတ်ကတော့ နောက်မှထုတ်ပြန်ပေးပါမယ်။ အခုလောလောဆယ်ကတော့ ကျွန်မတို့ကို ကောင်းမွန်စွာ တွေ့ဆုံဆွေးနွေးပြီးတဲ့အခါကျတော့ ကျေနပ်တဲ့ အဖြေလည်းရပါတယ်။ ကျွန်မတို့ တောင်းဆိုတဲ့အချက်တွေလည်း ရပါတယ်။ လူကြီးတွေ အကုန်စုံရာနဲ့လည်း တွေ့ဆုံဆွေးနွေးခွင့်ရတဲ့ အခါကျတော့ အဆင်ပြေသွားပါပြီ” လို့ မကေခိုင်ထွန်းက ဆွေးနွေးပွဲအပြီးမှာ ပြောပါတယ်။

ဒီဆွေးနွေးမှုနဲ့ ပတ်သက်လို့ အပြုသဘောဆောင်တဲ့ ဆွေးနွေးပွဲဖြစ်တယ်လို့ ညှိနှိုင်းရေးအဖွဲ့မှ ဒုတိယညွှန်ကြားရေးမှူးချုပ် ဒေါက်တာဌေးအောင်က မှတ်ချက်ပြုပါတယ်။

ဒီလိုသုံးပွင့်ဆိုင် ဆွေးနွေးပြီးတဲ့ နောက်မှာတော့ ကျန်းမာရေးနှင့် အားကစားဝန်ကြီးဌာနမှ သူနာပြုသားဖွား ကိစ္စရပ်တွေအတွက် ဆက်သွယ်ဆောင်ရွက်ပေးဖို့ တာဝန်ပေးအပ်ထားတဲ့အဖွဲ့ကနေ အချက်ရှစ်ချက်ပါတဲ့ သတင်းထုတ်ပြန် ကြေညာချက်တစ်စောင်ကို ထုတ်ပြန်ခဲ့ပါတယ်။

ဒီကြေညာချက်ထဲမှာ သူနာပြုတက္ကသိုလ် ကျောင်းသူကျောင်းသားတွေ တောင်းဆိုထားတဲ့ လိုင်စင်လက်ဝယ် ကိုင်ဆောင်နိုင်ရေးအတွက် မြန်မာနိုင်ငံသူနာပြုနှင့် သားဖွားကောင်စီအနေနဲ့ နိုင်ငံ့တာဝန် ထမ်းဆောင်သူတွေကို လက်ဝယ်ကိုင်ဆောင်ခွင့်ပြုမှာဖြစ်ကြောင်း၊ သူနာပြုတက္ကသိုလ် ၀င်ရောက်တုန်းက စာချုပ်ချုပ်ဆိုခဲ့တဲ့ ကတိအတိုင်း နိုင်ငံ့တာဝန်ကို မပျက်မကွက်ထမ်းဆောင်ဖို့ ညှိနှိုင်းသဘောတူခဲ့ကြောင်း၊ သူနာပြု၊ သားဖွားတွေအနေနဲ့ မြန်မာနိုင်ငံ သူနာပြုနှင့် သားဖွားကောင်စီဥပဒေနဲ့ ချမှတ်ထားတဲ့ ကျင့်ဝတ်၊ စည်းမျဉ်း၊ စည်းကမ်းတွေကို လိုက်နာရမှာဖြစ်ကြောင်း၊ နောက်နောင် အလားတူအရေးကိစ္စရပ်တွေ ပေါ်ပေါက်လာပါက ဌာနအတွင်း မိသားစုသဖွယ် ညှိနှိုင်းဆွေးနွေး ဆောင်ရွက်သွားမှာဖြစ်ကြောင်း စတဲ့အချက်တွေ ပါဝင်ခဲ့ပါတယ်။

ဒိုင်ယာလော့ယဉ်ကျေးမှု အသက်ဝင်လာပြီလား

ကျန်းမာရေးနှင့် အားကစားဝန်ကြီးဌာနရဲ့ သူနာပြုတက္ကသိုလ် ကျောင်းသားကျောင်းသူတွေ တောင်းဆိုဆန္ဒထုတ်ဖော်မှုနဲ့ ပတ်သက်လို့ ကိုင်တွယ်ဖြေရှင်းပုံကို နိုင်ငံရေးအသိုင်းအ၀ိုင်း အံ့သြချီးကျူးမှုတွေ ရှိနေပါတယ်။ မြန်မာနိုင်ငံမှာ ၁၉၆၂ ခုနစ် ဦးနေ၀င်း အာဏာသိမ်းပြီးနောက်ပိုင်း မမြင်တွေ့ရတော့တဲ့ ဒိုင်ယာလော့ ယဉ်ကျေးမှုတစ်ရပ်ကို ကျန်းမာရေးနှင့် အားကစားဝန်ကြီးဌာနကနေ အမြန်ဆုံးအကောင်အထည် ဖော်လိုက်တဲ့အပေါ်မှာ နိုင်ငံရေးအသိုင်းအ၀ိုင်းက ကြိုဆိုခဲ့ကြတာပါ။

“ဒိုင်ယာလော့ ယဉ်ကျေးမှုပေါ့။ တကယ်တော့ ဒီမိုကရေစီဆိုတာ ဒိုင်ယာလော့ ယဉ်ကျေးမှုပဲ။ နှစ်ဦးနှစ်ဖက် ညှိနှိုင်းဆွေးနွေးရမယ်။ တစ်ယောက်နဲ့တစ်ယောက် အမြင်မတူတာတွေကို ညှိနှိုင်းနိုင်ရမယ်။ အဲဒီယဉ်ကျေးမှုတစ်ရပ်ကို ဒီဖြစ်ရပ်မှာ သက်သေပြခဲ့ပါတယ်။ အထူးသဖြင့် ၀န်ကြီးဌာနဘက်က ကိုယ့်အပေါ်မှာ ဆန္ဒပြတဲ့ကိစ္စတွေကို မတူကွဲပြားလို့ဆိုပြီး ဖိနှိပ်တာမျိုး မဟုတ်ဘဲနဲ့ လိုလိုလားလားနဲ့ သေသေချာချာ နားထောင်ပြီးတော့ လက်ခံဖြေရှင်းပေးတဲ့ အလေ့အထလေးကို အန်တီက သဘောကျတယ်။ ဒါကြောင့်မို့လို့ အခြားသော ၀န်ကြီးဌာနတွေအနေနဲ့လည်း ပြည်သူလူထုရဲ့အသံကို သေသေချာချာ ဂရုတစိုက်နားထောင်ပြီးတော့ ဖြေရှင်းပေးမယ်ဆိုရင် အန်တီတို့နိုင်ငံမှာ ဒီမိုကရေစီ ယဉ်ကျေးမှု ထွန်းကားလာပါမယ်” လို့ ဒေါက်တာညိုညိုသင်းက ဆိုပါတယ်။

ဒီဖြစ်စဉ်ဟာ လက်ရှိပြည်သူတွေ ရွေးချယ်တင်မြှောက်ထားတဲ့ NLD အစိုးရသစ်လက်ထက်မှာ ပထမဆုံးအကြိမ် မြင်တွေ့ရတဲ့ ဒိုင်ယာလော့ ယဉ်ကျေးမှုလည်း ဖြစ်ပါတယ်။ အရင်အစိုးရအဆက်ဆက် အုပ်ချုပ်ခဲ့တုန်းကတော့ လမ်းပေါ်တက် ဆန္ဒထုတ်ဖော်တာနဲ့ ပါဝင်သူတွေကို တရားစွဲဆိုထောင်ချပြီး ဖိနှိပ်မှုတွေ ပြုလုပ်ခဲ့ပါတယ်။

အနီးစပ်ဆုံးပြောရရင် အရင်သမ္မတဟောင်း ဦးသိန်းစိန်အစိုးရ လက်ထက်မှာ အမျိုးသားပညာရေး ပြင်ဆင်ဖို့ ဆန္ဒပြတောင်းဆိုတဲ့ ကျောင်းသားတွေကို ဖမ်းဆီးပြီး တရားစွဲဆိုမှုတွေ ပြုလုပ်ခဲ့ပါတယ်။

၂၀၀၈ ဖွဲ့စည်းပုံအခြေခံဥပဒေ အခန်း(၈) နိုင်ငံသား၊ နိုင်ငံသားများ၏ မူလအခွင့်အရေးနှင့် တာဝန်များ ပုဒ်မ ၃၅၄ (က)မှာ “နိုင်ငံသားတိုင်းသည် မိမိ၏ယုံကြည်ချက်၊ ထင်မြင်ယူဆချက်များကို လွတ်လပ်စွာ ထုတ်ဖော်ပြောဆိုခွင့်၊ ရေးသားဖြန့်ဝေခွင့်” ရှိတယ်လို့ ပြဋ္ဌာန်းထားပြီး ပုဒ်မ ၃၅၄ (ခ) မှာတော့ “နိုင်ငံသားတိုင်းသည် လက်နက်မပါဘဲ ငြိမ်းချမ်းစွာစုဝေးခွင့်၊ စီတန်းလှည့်လည်ခွင့်” ရှိတယ်လို့ ပြဋ္ဌာန်းထားပါတယ်။

ဒါဟာ မြန်မာနိုင်ငံသား အားလုံးအတွက် နိုင်ငံရဲ့ အမြင့်ဆုံးဥပဒေက ပေးထားတဲ့ အခွင့်အရေးဖြစ်ပေမယ့် သမ္မတဟောင်း ဦးသိန်းစိန်အစိုးရ လက်ထက်မှာ ဆန္ဒထုတ်ဖော်ကြတဲ့ အလုပ်သမား၊ လယ်သမား၊ ကျောင်းသားတွေကို ဖမ်းဆီးတရားစွဲဆိုမှုတွေ ပြုလုပ်ခဲ့ပါတယ်။

ဒါကြောင့်လည်း လက်ရှိအစိုးရသစ် လက်ထက်မှာ ဒီလိုဒိုင်ယာလော့ ယဉ်ကျေးမှု စတင်လာတဲ့အပေါ်မှာ နိုင်ငံရေးအသိုင်းအ၀ိုင်းက အသိအမှတ်ပြုကြတာ ဖြစ်ပါတယ်။ 

“ရန်ကုန်သူနာပြုတက္ကသိုလ် ကျောင်းသားသမဂ္ဂက ဦးဆောင်ပြီးတော့လုပ်တဲ့ ဆန္ဒထုတ်ဖော်ပွဲနဲ့ ပတ်သက်ပြီးတော့ အစိုးရအဖွဲ့ရဲ့ ကျန်းမာရေးနဲ့ အားကစားဝန်ကြီးဌာနက ကိုင်တွယ်ဖြေရှင်းပုံကိုကြည့်ရင် တိုးတက်တဲ့ခြေလှမ်းလို့လည်း ပြောလို့ရသလို နောက်တစ်ခုက ဒီမိုကရေစီပိုကျတဲ့ အများဆန္ဒကို အလေးထားတဲ့ ခြေလှမ်းတစ်ခုလို့ ပြောလို့ရတယ်။ အရင်အစိုးရခေတ်အဆက်ဆက်မှာ ဆန္ဒထုတ်ဖော်တာနဲ့ ပတ်သက်ပြီးတော့ ဒါဟာအစိုးရကို ဆန့်ကျင်တာပဲ။ အစိုးရကို အပုပ်ချတာပဲဆိုတဲ့ အစိုးရကို အဆိုးမြင်တာပဲဆိုတဲ့ အမြင်မျိုးတွေမထားဘဲနဲ့ ဒီဆန္ဒထုတ်ဖော်တဲ့ သူတွေအနေနဲ့ တွေ့ဆုံဆွေးနွေးပြီးတော့ သဘောတူညီချက်တစ်ခုရအောင် လုပ်နိုင်ခဲ့တာဟာ အစိုးရသစ်ရဲ့ သိသာမြင်သာတဲ့ မှတ်ကျောက်တစ်ခုလို့လည်း ပြောလို့ရတယ်။ တိုးတက်မှုတစ်ခုလို့လည်း ပြောလို့ရတယ်” လို့ ဒေါက်တာရန်မျိုးသိမ်းက မှတ်ချက်ပြုပါတယ်။

ဒါပေမဲ့ အစိုးရ၀န်ကြီးဌာနတွေ အနေနဲ့ နောက်ထပ်သတိထားရမယ့် အရာကတော့ တောင်းဆိုသူတွေ လမ်းပေါ်မထွက်ခင် ပြဿနာတစ်ခုကို အမြန်ဆုံးဖြေရှင်းပေးဖို့ပဲ ဖြစ်ပါတယ်။ သူနာပြုတက္ကသိုလ် ကျောင်းသားကျောင်းသူတွေ ဆန္ဒထုတ်ဖော်မှုဖြစ်စဉ်ကို ကြည့်မယ်ဆိုရင် အရင်ဆုံးလမ်းပေါ်တက် ဆန္ဒပြခဲ့တာ မဟုတ်ပါဘူး။ သူတို့လိုအပ်ချက်တွေကို အရင်ဆုံး သတင်းစာရှင်းလင်းပွဲလုပ်ပြီး အစိုးရကို တောင်းဆိုမှုတွေ လုပ်ခဲ့ပါတယ်။ ဒီလိုတောင်းဆိုမှုတွေ ပြုလုပ်ခဲ့ပေမယ့် အစိုးရ၀န်ကြီးဌာနဘက်က တစ်စုံတစ်ရာ တုံ့ပြန်မှုမရှိတာကြောင့် သူနာပြုတက္ကသိုလ် ကျောင်းသားကျောင်းသူတွေ အနေနဲ့ လမ်းပေါ်တက်ပြီး ဆန္ဒထုတ်ဖော်ခဲ့ကြတာ ဖြစ်ပါတယ်။

ဒီကိစ္စအပေါ်မှာ သက်ဆိုင်ရာဝန်ကြီးဌာနတွေ အနေနဲ့ အရေးတကြီးကိစ္စတွေကို ချက်ချင်းတုံ့ပြန်နိုင်အောင် ယန္တရားတစ်ရပ်ကို ကြိုတင်ဖွဲ့စည်းထားသင့်တယ်လို့ ဒေါက်တာညိုညိုသင်းက အကြံပြုပါတယ်။

“သက်ဆိုင်ရာဝန်ကြီးဌာနတွေ အနေနဲ့ကလည်း သတိထားဖို့လိုပါတယ်။ အရေးတကြီးကိစ္စတွေဆိုရင် ချက်ချင်းတုံ့ပြန်နိုင်အောင် ကြိုးစားသင့်တယ်။ အမှိုက်ကစ ပြာသာဒ်မီးလောင်မှုတွေ မဖြစ်ရအောင် အရေးပေါ်ကိစ္စတွေမှာ ဖြေရှင်းဖို့အတွက် ၀န်ကြီးဌာနတိုင်းမှာ ယန္တရားတစ်ရပ်ကို ကြိုတင်ပြီး ဖွဲ့စည်းထားသင့်တယ်” လို့ ဒေါက်တာ ညိုညိုသင်းက ဆိုပါတယ်။

ဘာပဲဖြစ်ဖြစ် ဒီမိုကရေစီရဲ့ အနှစ်သာရတစ်ခုဖြစ်တဲ့ ဒိုင်ယာလော့ ယဉ်ကျေးမှုတစ်ရပ်ကိုတော့ အစိုးရသစ်သက်တမ်း တစ်နှစ်ပြည့်ခါနီးအချိန်မှာ တွေ့မြင်ခဲ့ရပြီဖြစ်ပါတယ်။ ကျန်းမာရေးနှင့် အားကစားဝန်ကြီးဌာနကနေ တွေ့ဆုံညှိနှိုင်း ဆွေးနွေးမှုတွေကို စတင်ပြုလုပ်ခဲ့ပြီဆိုပေမယ့် အခြားသောဝန်ကြီးဌာနတွေ အနေနဲ့ကလည်း ဒီယဉ်ကျေးမှုကို အကောင်အထည်ဖော်ဖို့ လိုနေပါတယ်။

ဘာကြောင့်လဲဆိုတော့ နိုင်ငံအတွင်းမှာ ကျောင်းသားတွေသာမက အလုပ်သမား၊ လယ်သမား၊ အခြားသော လူတန်းစားအသီးသီးမှာလည်း လိုအပ်ချက်တွေ များပြားနေတဲ့အတွက် တွေ့ဆုံညှိနှိုင်းအဖြေရှာမှသာ ကောင်းမွန်တဲ့ရလာဒ်တွေရရှိပြီး ပြည်သူတွေရဲ့ ယုံကြည်ကိုးစားမှုကိုလည်း ရရှိလာမှာဖြစ်ပါတယ်။

ဒါ့ပြင် တွေ့ဆုံညှိနှိုင်းမှု ပြီးတဲ့နောက်ပိုင်းမှာလည်း တွေ့ဆုံစဉ်က ပေးထားတဲ့ ကတိက၀တ်တွေကို တိတိကျကျ ဖော်ဆောင်ပေးဖို့ လိုပါလိမ့်မယ်။ ဒီလိုမှမဟုတ်ဘဲ ပြဿနာတစ်ရပ်ဖြစ်လာတိုင်း ဖိအားတွေ လျှော့ချဖို့အတွက် ရေတိုနည်းနဲ့ ဖြေရှင်းခဲ့မယ်ဆိုရင်တော့ အလုပ်သမားပဲဖြစ်ဖြစ်၊ လယ်သမားပဲဖြစ်ဖြစ်၊ ကျောင်းသားပဲဖြစ်ဖြစ် နောက်တစ်ကြိမ် လမ်းပေါ်တက်လာပါလိမ့်မယ်။

ဒီကိစ္စနဲ့ပတ်သက်လို့ ဒေါက်တာရန်မျိုးသိမ်းက “အရေးကြီးတာက ဒီသဘောတူညီချက်ကို ဆက်ပြီးတော့ တစ်သဝေမသိမ်း ဖော်ဆောင်ဖို့လိုအပ်တယ်။ အဲဒီသဘောတူညီချက်ကို လက်တစ်လုံးခြားလုပ်ပြီးတော့ ဖော်ဆောင်တာမျိုး မဟုတ်ဘဲနဲ့ တိတိကျကျ တစ်သဝေမသိမ်း လုပ်ဆောင်ဖို့လိုတယ်” လို့ဆိုပါတယ်။

Writer: 
ဆန်းမိုးထွန်း