စေတုတ္တရာမြို့နယ် ပွင့်တောက်ကျေးရွာ ရွာဦးကျောင်းတွင် Eleven Media Group မှ တတိယအကြိမ် ကထိန်သင်္ကန်းကပ်အလှူတော်ပွဲကျင်းပ

စေတုတ္တရာမြို့နယ် ပွင့်တောက်ကျေးရွာ ရွာဦးကျောင်းတွင် Eleven Media Group မှ တတိယအကြိမ် ကထိန်သင်္ကန်းကပ်အလှူပွဲ ကျင်းပနေစဉ်

မကွေးတိုင်းဒေသကြီး စေတုတ္တရာမြို့ နယ်ပွင့်တောက်ကျေးရွာ ရွာဦးကျောင်းတွင် အောက်တိုဘာ၂၂ ရက်က Eleven Media Group မှ တတိယအကြိမ် ကထိန်သင်္ကန်းကပ် အလှူတော်ပွဲကျင်းပခဲ့ကြောင်း သိရသည်။

ပွင့်တောက်ကျေးရွာသည် ၂၀၁၅ ခုနှစ် ဇူလိုင်လကုန်ပိုင်းက မုန်းချောင်းရေကြီးရေလျှံမှုကြောင့် ရွာဦးစေတီ၊ ရွာဦးကျောင်း၊ စာသင်ကျောင်းများ အပါအ၀င် ရွာလုံးကျွတ်ရွှံ့နုန်း နှင့် သဲများပို့ခဲ့ပြီး မူလကျေးရွာ၏ အနောက်တောင်ဘက်ရှိ ကုန်းမြင့်ပေါ်သို့ ရွာလုံးကျွတ် ပြောင်းရွှေ့ခဲ့ရကြောင်း သိရသည်။

အိမ်ခြေ ၁၄၀ ကျော်ရှိသည့် ထိုကျေးရွာအတွက် ရွာလုံးကျွတ်ပျက်စီးပြီးစက Eleven Media Group နှင့် စေတနာရှင်အလှူရှင်များ ရေဘေးလှူဒါန်းမှု အစီအစဉ်က ဆန်အိတ် ၅၀၀ ကျော်နှင့် အခြားလူသုံးကုန်ပစ္စည်းများ လှူဒါန်းပေးခဲ့ကြောင်း သိရသည်။

ထို့ပြင် သဘာဝဘေးအန္တရာယ်များ ထပ်မံကြုံတွေ့လာလျှင် ဆရာတော်သံဃာတော်များ အပါအ၀င် ကျေးရွာနေ ပြည်သူများ အန္တ ရာယ်ကင်းစွာ စုဝေးနေထိုင်နိုင်ရန် Eleven Media Group နှင့် စေတနာရှင် အလှူရှင်များ ရေဘေးလှူဒါန်းမှု အစီအဉ်က ကျပ်သိန်း ၁၀၀၀ တန် ဘုန်းတော်ကြီးကျောင်းတစ်ကျောင်း ထပ်မံတည်ဆောက်လှူဒါန်းခဲ့ကြောင်း၊ ထို့ပြင် ယင်းဘုန်းတော်ကြီးကျောင်းအတွက် ဘုရားဆင်းတုတော် အကြီးတစ်ဆူကို Eleven Media Group ၏ C.E.O ဒေါက်တာသန်းထွဋ် အောင်မိသားစုမှ လှူဒါန်းခဲ့ပြီး နှစ်ကျိပ်ရှစ်ဆူ ဘုရားဆင်းတုတော်ငယ်များကို Eleven Media Group ၀န်ထမ်းများက လှူဒါန်းခဲ့ကြောင်း ထိုကျောင်းတွင် နှစ်စဉ် ကထိန်သင်္ကန်းကပ် အလှူတော် ကျင်းပလေ့ရှိခဲ့ပြီး ယခု ၂၀၁၇ ခုနှစ်တွင် တတိယအကြိမ် ကထိန်သင်္ကန်းကပ် အလှူတော်ကို ကျင်းပခြင်းဖြစ်သည်။

“Eleven Media မိသားစုကနေပြီးမှ ဘုန်းဘုန်းတို့ ရွာလုံးကျွတ် ပျက်စီးခဲ့ရချိန်ကစပြီး လှူဒါန်းမှုတွေ အများကြီးပေးခဲ့ပြီး ကျပ် သိန်း ၁၀၀၀ တန် ကျောင်းကြီးကို တည်ဆောက် လှူဒါန်းခဲ့တယ်။ အဲဒီကျောင်းကြီးမှာ ဘုန်းဘုန်းတို့ အပါအ၀င် ကျေးရွာသူကျေးရွာသား တွေလည်း နေ့စဉ် မှီခိုနေကြရတော့ အဲဒီလိုလှူဒါန်းမှုတွေကြောင့် အလှူရှင်တွေမှာ ကုသိုလ်တွေ နေ့စဉ်ရနေမှာပါ။ ဒီကျောင်းမှာ နှစ်စဉ်လည်း ကထိန်အလှူလာကျင်းပပြီး အခုနှစ်မှာ လည်းသုံးကြိမ်မြောက်အထိ လှူဒါန်းခဲ့တော့ ဒီကုသိုလ်တွေကိုလည်း နေ့စဉ်နေ့စဉ် ထပ်မံခံစားကြရပြီး အလှူရှင်အားလုံးစိတ်၏ ချမ်းသာခြင်း၊ ကိုယ်၏ကျန်းမာခြင်းတို့နဲ့ ပြည့်စုံနိုင်ကြပါစေလို့ ဆုတောင်းပါတယ်” ဟု ပွင့် တောက်ကျေးရွာ ရွာဦးကျောင်းဆရာတော် ဦးဝိသုဒ္ဓက မိန့်ကြားသည်။

အဆိုပါအလှူပွဲသို့ ပွင့်တောက်ကျေးရွာ နှင့် အနီးတစ်ဝိုက်ရှိ မကြီး၊ ဘူး၊ ဘိုကုန်း၊ ချီ၊ ချီချောင်း၊ ထက်လယ်ကျေးရွာများမှ သံဃာတော် ၁၁ ပါးကို လှူဖွယ်ဝတ္ထုများ လှူဒါန်းခဲ့ပြီး ယင်းကျေးရွာနေ ပြည်သူများလည်း ကထိန်အလှူတော်သို့ လာရောက်ခဲ့ကြကြောင်း သိရသည်။

ပန်းဦးလွှတ်အရေး ဘယ်လိုဖြေရှင်းကြမလဲ

လူမှုကွန်ရက်တွင် ပျံ့နှံ့နေသော ခွန်တန် (ခ) ဇာတ်လိုက်ဆိုသူ၏ ဓာတ်ပုံများ

အောက်တိုဘာလလယ်ပိုင်းတွင် မွန်ပြည်နယ် သထုံမြို့နယ်မြောက်ပိုင်း ဇရစ်ချောင် ကျေးရွာအုပ်စုရှိ အလံတစ်ရာ နယ်မြေတွင် လူအများ စိတ်ဝင်စားသည့် သတင်းတစ်ပုဒ် ထွက်ပေါ်ခဲ့သည်။ အဆိုပါသတင်းမှာ အလံတစ်ရာ ဆရာတော်ကြီး ၀င်စားသူဟု ဆိုသူက အသက်မပြည့်သေးသည့် မိန်းကလေးငယ်များကို ပေါင်းသင်း နေထိုင်သည်ဆိုသည့် သတင်းဖြစ်သည်။

အလံတစ်ရာ ဆရာတော်ကြီး ၀င်စားသူဟု ဒေသခံ ပအိုဝ်းတိုင်းရင်းသားများကို လိမ်လည်ထားသူမှာ အသက် ၂၅ နှစ်ရှိ ခွန်တန် (ခ) ဇာတ်လိုက် ဆိုသူဖြစ်ပြီး ကျူးလွန်ခံရသည့် အမျိုးသမီးငယ်များမှာ ရှစ်ဦးအထက်ရှိကြောင်း အဆိုပါဖြစ်စဉ်အား စုံစမ်းဖော်ထုတ်ခဲ့သူ တစ်ဦးက ပြောကြားသည်။

ခွန်တန် (ခ) ဇာတ်လိုက်ဆိုတာ ဘယ်သူလဲ

ခွန်တန် (ခ) ဇာတ်လိုက်ဆိုသူမှာ အသက် ၂၅ နှစ်အရွယ်ရှိသူဖြစ်ပြီး ငယ်ရွယ်စဉ်က ကိုရင်ဝတ်ခဲ့သူ တစ်ဦးဖြစ်ပြီး အသက် ၂၀ ကျော်အရွယ်တွင် လူထွက်ခဲ့သူ ဖြစ်သည်။

ငယ်ရွယ်စဉ်က အလံတစ်ရာဆရာတော်ကြီး ၀င်စားသူဟု နာမည်ကြီးခဲ့သူဖြစ်ပြီး အဆိုပါ ဆရာတော်ကြီး၏ ဒါယိကာ၊ ဒါယိကာမများကို မှတ်မိသူတစ်ဦးဖြစ်သည် ဟုဆိုကာ အလှူခံခဲ့သူ တစ်ဦးဖြစ်ကြောင်း အမည်မဖော်လိုသူ သထုံဒေသခံ တစ်ဦးက ဆိုသည်။

အသက်အရွယ် ကြီးမြင့်လာချိန်တွင် ဒေသခံ တိုင်းရင်းသားများက ကိုးကွယ်လာပြီး ခွန်တန်မှာ လက်နက် ကိုင်ဆောင်ထားကြောင်း ၎င်းကဆက်လက် ပြောကြားသည်။

“သူ့အဖွဲ့တင် မဟုတ်ဘူး။ သူကိုယ်တိုင် လက်နက်ကိုင်တယ်” ဟု အဆိုပါ အမည်မဖော်လိုသူ ဒေသခံက ပြောကြားသည်။

ထို့ပြင် တိုင်းရင်းသား ဒေသခံများ၏ ယုံကြည်မှုကို အခွင့်ကောင်းယူကာ လွန်ခဲ့သည့် ငါးနှစ်ခန့်ကတည်းက ဒေသခံ ပအိုဝ်းတိုင်းရင်းသားများ၏ မိန်းကလေးငယ်များကို သိဒ္ဓိတင်ပေးမည်ဟုဆိုပြီး အတူအိပ်စက်ခဲ့ကြောင်း၊  ဘာသာရေးအကြောင်းပြ လုပ်ဆောင်ခြင်းကြောင့် မိဘများမှာလည်း ပြောဆိုတားဆီးခြင်း မရှိကြောင်း သထုံမဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဒေါ်မာမာခိုင်က ပြောကြားသည်။

“သူက အလံတစ်ရာ ဆရာတော်ဘုရားကြီး ၀င်စားတယ်ဆိုပြီး ရောက်လာတယ်။ အဲဒီမှာလည်း သူက တချို့ကိစ္စတွေ ပြောနိုင်တာရှိတယ်။ ဒါပေမဲ့ ကျွန်မအမြင်ကတော့ ပအိုဝ်းတိုင်းရင်းသားတွေက ရိုးသားကြတယ်။ သူတို့ရင်ထဲမှာ အလံတစ်ရာ ဆရာတော်ဘုရားကြီးကို ကြည်ညိုတဲ့အစွဲဟာ တော်တော်ကြီးကို ရှိတယ်။ သူပြောသမျှကို အလံတစ်ရာ ဆရာတော်ဘုရားကြီး ပြောတယ်လို့ပဲ မှတ်ယူနေကြတယ်။ အဓိကဇာစ်မြစ်က အဲဒါပဲ။ တကယ်လို့သာ ဆရာတော်ဘုရားကြီး ၀င်စားတယ်ဆိုရင် ဆရာတော်ဘုရားကြီးဟာ သူတော်ကောင်း ဖြစ်တဲ့အတွက် ဒီလိုမျိုး ကာမေသုမိစ္ဆာစာရကံ ကျူးလွန်မှာ မဟုတ်ဘူး။ မသိတော့ဘူးပေါ့။ အမှားအမှန်ကို ခွဲခြားနိုင်ခြင်း မရှိတော့ဘူး ဖြစ်သွားတာ” ဟု ပြည်သူ့လွှတ်တော် ကိုယ်စားလှယ် ဒေါ်မာမာခိုင်က ပြောကြားသည်။

ထိုသို့အခြေအနေများကြောင့် မွန်ပြည်နယ်အစိုးရအဖွဲ့က နှစ်ကြိမ်တိုင် သတိပေးထားကြောင်း၊ ဘာသာရေး အကြောင်းပြပြီး ယခုလို ပန်းဦးလွှတ်ခြင်းကိစ္စများ ပေါ်ပေါက်လာသဖြင့် သတိပေးထားခြင်း ဖြစ်ကြောင်း လက်ရှိမွန်ပြည်နယ် ၀န်ကြီးချုပ် ဒေါက်တာအေးဇံက မီဒီယာများကို ပြောကြားထားသည်။

ထိုသို့ဖြစ်စဉ်များကို ဖော်ထုတ်သူများမှာ ခြိမ်းခြောက်ခံရသည့် ဖြစ်စဉ်များရှိနေပြီး ယင်းဖြစ်စဉ်များမှာ ၂၀၁၂ ခုနှစ်မှ စတင်ဖြစ်ပွားခဲ့ခြင်းဖြစ်ကြောင်း အဆိုပါဖြစ်စဉ်အား ဖော်ထုတ်ခဲ့သူ တစ်ဦးက ပြောကြားသည်။

“ဒီကိစ္စတွေက ၂၀၁၂ ခုနှစ်လောက်ကတည်းက ဖြစ်နေတာ။ အာဏာပိုင်တွေဘက်က အဲဒီကတည်းက ဖြစ်နေတာကို သေသေချာချာ အရေးယူပေးမယ်ဆိုရင် ဒီဖြစ်စဉ်က အခုလောက်အထိ ကြီးမလာဘူး” ဟု ၎င်းက ပြောကြားသည်။

ပန်းဦးလွှတ်ခြင်းဖြစ်စဉ်အား ဒေသခံ ပအိုဝ်းတိုင်းရင်းသားများတွင် အများဆုံး ကျူးလွန်ခံရခြင်းဖြစ်ပြီး သထုံမြို့နယ် ဇရစ်ချောင်ကျေးရွာ အုပ်စုတွင် ဖြစ်ပွားခဲ့ခြင်းဖြစ်ကာ အမျိုးသမီးငယ်များမှာ ရှစ်ဦးအထက်ရှိကြောင်း ဖြစ်စဉ်ကို ဖော်ထုတ်ခဲ့သူ တစ်ဦးက ပြောကြားသည်။

ခွန်တန်ကို ဘယ်လိုအရေးယူမလဲ

မွန်ပြည်နယ် သထုံမြို့နယ် ဇရစ်ချောင်ကျေးရွာအုပ်စုတွင် ဖြစ်ပွားခဲ့သည့် ယင်းအခြေအနေများကို ပြည်ထောင်စုအဆင့်မှ ပြည်နယ်အစိုးရနှင့် ပူးပေါင်းကာ ကိုင်တွယ်အရေးယူ ဆောင်ရွက်သွားရန်ရှိကြောင်း သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး သူရအောင်ကိုက အောက်တိုဘာ ၁၉ ရက်တွင် ပြည်သူ့လွှတ်တော်သို့ လာရောက်စဉ် မီဒီယာများအား ပြောကြားသည်။

ထိုသို့ပြောကြားခြင်းမှာ မီဒီယာများက မေးမြန်းသည့် အချိန်အထိ ယင်းဖြစ်စဉ်အား ပြည်ထောင်စုဝန်ကြီးက သိရှိခြင်းမရှိဘဲ အနားတွင်ရှိသည့် ပြည်သူ့လွှတ်တော် ကိုယ်စားလှယ် ဒေါ်မာမာခိုင်အား မေးမြန်းပြီးမှသာ ဖြေကြားနိုင်ခဲ့ခြင်းဖြစ်သည်။

အဆိုပါဖြစ်စဉ်နှင့် ပတ်သက်၍ ယခုအချိန်မှသာ သိရှိရခြင်းဖြစ်ပြီး တိုင်ကြားစာများလည်း ရောက်ရှိခြင်း မရှိသေးကြောင်း၊ သို့ရာတွင် မွန်ပြည်နယ်အစိုးရနှင့် ပူးပေါင်း၍ အရေးယူသွားမည်ဖြစ်ကြောင်း သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး သူရဦးအောင်ကိုက ပြောကြားသည်။

“ပြည်နယ်အစိုးရနဲ့ ပြည်ထောင်စုဝန်ကြီးဌာန ပူးပေါင်းပြီးတော့ ညှိနှိုင်းအကောင်အထည်ဖော် ဆောင်ရွက်သွားမှာ ဖြစ်ပါတယ်။ သေချာပေါက် အရေးယူဆောင်ရွက်မှာ ဖြစ်ပါတယ်” ဟု ၎င်းက ပြောကြားသည်။

အလံတစ်ရာ ဆရာတော်ဘုရားကြီးအား ပအိုဝ်းတိုင်းရင်းသားများက ဘုရားတစ်ဆူကဲ့သို့ပင် ယုံကြည် ကိုးကွယ်ခဲ့ကြပြီး မိမိနှင့်လည်း ၁၉၈၉ ခုနှစ် ၁၉၉၀ ပြည့်နှစ်ဝန်းကျင်က ဆရာတော်နှင့်အတူ သာသနာ ပြုခဲ့ဖူးကြောင်း၊ ဆရာတော်ဘုရားကြီး ပျံလွန်တော်မူပြီးနောက် သထုံမြို့နယ် အလံတစ်ရာဒေသတွင် အလံတစ်ရာဆရာတော် ၀င်စားသည် ဟုဆိုသည့် ကိုရင်တစ်ပါး ရောက်လာခဲ့သည်ဟု သတင်းကြားရကြောင်း၊ အဆိုပါကိုရင်သည် ဆရာတော် သီတင်းသုံးခဲ့သည့် နေရာ၊ အသုံးအဆောင် ပစ္စည်းများမှအစ အကုန်လုံး အမှန်အတိုင်း ပြန်လည်ပြောပြနိုင်သည်ဟု ဆိုသည့်အတွက်ကြောင့် ရွာသူရွာသား အများစုသည် ဆရာတော် ၀င်စားသည်ဟု အကြွင်းမဲ့ ယုံကြည်ကြကြောင်း သူရဦးအောင်ကိုက ဆိုခဲ့ပြီး ယခုကဲ့သို့ ကျူးလွန်မှုများမှာ ဘာသာရေး ယုံကြည်မှုအပေါ် အမြတ်ထုတ်ပြီး လူမှုရေးချိုးဖောက်မှုတစ်ခု ဖြစ်ကြောင်း ပြည်ထောင်စုဝန်ကြီးက သုံးသပ်ပြောကြားသည်။

“အဲဒီယုံကြည်မှု၊ ရိုးသားမှုကို လူမှုရေးအရ ချိုးဖောက်အမြတ်ထုတ်တာ ဖြစ်တယ်လို့ ဒါခန့်မှန်းလို့ ရပါတယ်။ သုံးသပ်လို့ရပါတယ်။ ဒါကို အမြန်ဆုံး အမှုဖွင့်ဆောင်ရွက်သွားမှာ ဖြစ်ကြောင်း ပြောကြားလိုပါတယ်” သူရဦးအောင်ကိုက ပြောကြားသည်။

မွန်ပြည်နယ်ဝန်ကြီးချုပ် ဒေါက်တာအေးဇံကလည်း ခွန်တန်အား ဖမ်းဆီးနိုင်ရန် ဆောင်ရွက်လျက်ရှိပြီး သတင်းပေါက်ကြားမှုကြောင့် လက်ရှိတွင် ရှမ်းပြည်နယ်သို့ ထွက်ပြေးတိမ်းရှောင်သွားကြောင်း၊ ရှမ်းပြည်နယ် အစိုးရနှင့် ပူးပေါင်း၍ ဖမ်းဆီးသွားမည်ဖြစ်ကြောင်း ဧရာဝတီသတင်းဌာနသို့ ပြောကြားသည်။

သို့သော်ခွန်တန်မှာ သြဂုတ်လကတည်းက ထွက်ပြေးခဲ့ခြင်းဖြစ်ပြီး အစိုးရ၏ ကိုင်တွယ်မှုမှာ အားနည်းကြောင်း အဆိုပါဖြစ်စဉ်အား စုံစမ်းဖော်ထုတ်ခဲ့သူ တစ်ဦးက ဝေဖန်ပြောကြားသည်။

“သူထွက်ပြေးသွားတာက ရှစ်လပိုင်းကတည်းက ထွက်ပြေးသွားတာ။ ပြောချင်တာကတော့ သာသနာ့နယ်မြေလို့ ကြွေးကြော်ထား တဲ့ အလံတစ်ရာဒေသကို သန့်ရှင်းစင်ကြယ်အောင် လုပ်ဆောင်ပေးစေ လိုပါတယ်” ဟု အဆိုပါ စုံစမ်းဖော်ထုတ်သူက ဆိုသည်။

ထိုသို့ ရှမ်းပြည်နယ် အစိုးရအဖွဲ့နှင့် ပူးပေါင်းဆောင်ရွက်ပြီး ဖော်ထုတ်ဖမ်းဆီးမည်ဟု မွန်ပြည်နယ် ၀န်ကြီးချုပ် ဒေါက်တာအေးဇံက ပြောကြားခြင်းနှင့် ပတ်သက်၍ ရှမ်းပြည်နယ် အစိုးရအဖွဲ့၏ အတွင်းရေးမှူး ဦးစိုးစိုးဇော်အား အောက်တိုဘာ ၂၂ ရက် နံနက်က ဖုန်းဖြင့်ဆက်သွယ် မေးမြန်းရာ ယင်းကိစ္စအား နယ်လုံဝန်ကြီးမှသာ သိနိုင်မည်ဖြစ်ကြောင်း၊ မိမိအနေဖြင့် သိရှိခြင်း မရှိသေးကြောင်း ပြန်လည်ဖြေကြားသည်။

ထိုသို့ဖြစ်စဉ်များကို ဖော်ထုတ်ခဲ့သည့် ပြည်နယ်လွှတ်တော် ကိုယ်စားလှယ် ဒေါ်ခိုင်ခိုင်လဲ့နှင့် ပအိုဝ်းတိုင်းရင်းသားရေးရာဝန်ကြီး ဒေါ်စံဝင့်ခိုင်တို့မှာ ခြိမ်းခြောက်ခံရသည့် ဖြစ်စဉ်များရှိကြောင်း သိရသည်။

“၀န်ကြီးနဲ့ကျွန်မ လုပ်ရတာ အခက်အခဲပေါင်းများစွာ ရင်ဆိုင်ရပါတယ်။ အခုချိန်အထိ ၀န်ကြီးကို တစ်ချိန်လုံး သတ်မယ်လို့ ခြိမ်းခြောက်တဲ့ Message တွေလာပါတယ်။ ကျွန်မဆီကိုလည်း Message ပေါင်းများစွာ ပို့ပါတယ်။ တစ်ချိန်လုံး သတ်မယ်ဆိုပြီး ခြိမ်းခြောက်ပါတယ်။ အဲဒီဖြစ်စဉ် ကျွန်မတို့နှစ်ယောက် အခုလက်ရှိ ကြုံနေရတာပါ” ဟု အောက်တိုဘာ ၁၇ ရက်က မော်လမြိုင်မြို့ ငွေမိုးဟိုတယ်တွင် ပြုလုပ်သော ကျား/မရေးရာ အခြေပြု အကြမ်းဖက်မှု သတင်းအချက်အလက်ဆိုင်ရာ ပူးပေါင်းညှိနှိုင်းမှု အစည်းအဝေးတွင် ဒေါ်ခိုင်ခိုင်လဲ့က ပြောကြားသည်။

ယင်းဖြစ်စဉ်တွင် အသက်အရွယ် ငယ်ရွယ်သူများ ပါဝင်ခြင်းကြောင့် ကလေးသူငယ် မုဒိမ်းမှုဖြင့် အရေးယူ ဆောင်ရွက်နိုင်ပြီး ဘာသာသာသနာ အကြောင်းပြ လုပ်ဆောင်ခြင်းကြောင့် သာသနာကို ညစ်နွမ်းစေသဖြင့် အရေးယူ ဆောင်ရွက်ရမည်ဖြစ်ကြောင်း လူ့အခွင့်အရေး လှုပ်ရှားသူ Equility Myanmar မှ ဦးအောင်မျိုးမင်းက ပြောကြားသည်။

“အခု ကျွန်တော်တို့ ပြောနေကြတဲ့ အသက်ငယ်တဲ့သူတွေကို ကျူးလွန်တဲ့ သက်ငယ်မုဒိမ်းပေါ့။ ဒီအောက်မှာ အများကြီး အကျုံးဝင်တယ်။ နောက်တစ်ခုက ဘာသာ၊ သာသနာကို အကြောင်းပြတဲ့ အတွက်ကြောင့် ဘာသာ၊ သာသနာကို ညစ်နွမ်းစေမှုနဲ့ ထပ်အရေးယူရမယ်” ဟု ဦးအောင်မျိုးမင်းက ပြောကြားသည်။

လက်ရှိတွင် ကျူးလွန်ခံရသည့် ကလေးငယ်များ၏ အုပ်ထိန်းသူများကိုယ်တိုင် ကြောက်ရွံ့မှုများ ရှိနေသဖြင့် ၎င်းတို့အား အားပေးထောက်ခံမှု၊ ၀န်းရံမှုများ ပြုလုပ်ကာ အမှုဖွင့်အရေးယူနိုင်ရန် ဆောင်ရွက်နေကြောင်း အဆိုပါ ဖြစ်စဉ်အား ဖော်ထုတ်ခဲ့သူ တစ်ဦးက ပြောကြားသည်။

“မိဘတွေကိုယ်တိုင်က အကြောက်လွန်တာတွေ ရှိနေတယ်။ သူတို့ကို လူရှေ့သူရှေ့မှာ ထုတ်ဖော် ပြောကြားနိုင်အောင် မနည်းဆွဲထုတ်နေရတယ်။ အားပေးမှု၊ ၀န်းရံမှုတွေ လုပ်နေရတာပေါ့” ဟု ၎င်းက ပြောကြားသည်။

လူ့အခွင့်အရေးရှုထောင့်က ဘယ်လိုမြင်လဲ

မွန်ပြည်နယ်ဖြစ်စဉ်မှာ ရိုးရာဓလေ့ ထုံးတမ်းအစဉ်အလာများအရ ယုံကြည်မှုနှင့် သက်ဆိုင်ခြင်း ဖြစ်သော်လည်း နိုင်ငံတကာ လူ့အခွင့်အရေးအရ လူတစ်ဦး၊ လူတစ်စု၏ ဂုဏ်သိက္ခာကို ထိခိုက်နစ်နာစေသည့် ကျင့်စဉ်တစ်ခု ဖြစ်ပါက တားဆီးပိုင်ခွင့်ရှိကြောင်း ဦးအောင်မျိုးမင်းက ပြောကြားသည်။

“လူတစ်ဦး၊ လူတစ်စုကို ထိခိုက်နစ်နာ စေတယ်ဆိုရင် တားဆီးရမယ်၊ ထိန်းသိမ်းရမယ် ဆိုတာကို အဓိပ္ပာယ် ဖွင့်ဆိုထားတယ်။ ခုနက လိုကိစ္စဆိုရင် ဘာသာရေး ကျင့်စဉ်တစ်ခုလို ဖြစ်တယ်။ ဒါပေမဲ့ အမျိုးသမီးငယ်တွေ၊ ဒါမှမဟုတ်ရင် လူတွေရဲ့ အသက်အိုးအိမ် စည်းစိမ်တွေကို ထိခိုက်မယ်ဆိုရင် တားဆီးသင့်ရင် တားဆီးရမှာပဲ” ဟု ဦးအောင်မျိုးမင်းက ဆိုသည်။

အိန္ဒိယနိုင်ငံတွင် အသက်ငယ်စဉ်တွင် လက်ထပ်ပေးသည့် အစဉ်အလာတစ်ခု ရှိခဲ့ကြောင်း၊ ဘာသာရေးကျင့်စဉ် တစ်ခုအဖြစ် ဆောင်ရွက်ခဲ့ခြင်း ဖြစ်သော်လည်း လက်ရှိတွင် ဥပဒေများထုတ်ပြန်ကာ တားဆီးလျက်ရှိကြောင်း၊ လက်ရှိမွန်ပြည်နယ်တွင် ဖြစ်ပွားခဲ့သည့် ဖြစ်စဉ်မှာ လူ့အခွင့်အရေး ရှုထောင့်အရ ကြည့်ရှုမည် ဆိုပါက လက်ခံနိုင်ဖွယ်မရှိကြောင်း ဦးအောင်မျိုးမင်းက ပြောကြားသည်။

“အရင်က လင်ယောက်ျား သေပြီဆိုရင် မိန်းမက မီးပုံထဲ ခုန်ချခဲ့ရတာတွေရှိတယ်။ ဘာသာရေး အယူကြောင့်လို့ပဲဆိုဆို အခုဆို ဥပဒေတွေနဲ့ တားဆီးနေပြီ။ အခု မွန်ပြည်နယ်ကိစ္စဆိုရင် လက်ခံနိုင်ဖွယ်ရာ မရှိဘူး။ ဖြစ်စဉ်ထဲမှာ ကျူးလွန်ခံရတဲ့သူတွေက ကလေးငယ်တွေများတယ်။ သူတို့ကို ကာကွယ်ပေးရမယ့်အစား သူတို့က ကျူးလွန်ခံတယ်ဆိုတော့ ဆိုဖွယ်ရာ မရှိတော့ဘူး” ဟု ၎င်းက ဆိုသည်။

ယင်းကဲ့သို့ ကလေးငယ်များ ကျူးလွန်ခံရသည့် ဖြစ်စဉ်များမှာ ကျေးလက်ဒေသများတွင် အများစု ဖြစ်ပွားလျက်ရှိပြီး တစ်ခုခုဖြစ်ပြီ ဆိုပါက နတ်၊ စုန်း စသည်တို့ကို အယုံလွယ်ကြောင်း၊ ထိုမှတစ်ဆင့် အကြောက်လွန်၍ ယုံကြည်မှု လွန်ကဲခဲ့ခြင်းဖြစ်ကြောင်း၊ ဆင်ခြင်တုံတရားဖြင့်သာ ထိန်းသိမ်းနိုင်မည် ဖြစ်ကြောင်း ၎င်းက သုံးသပ်ပြောကြားသည်။

“လူတွေက ဆန္ဒကို သိက္ခာနဲ့ ထိန်းရမယ်။ အခုလိုခေတ်ကြီးထဲမှာ ဘယ်ဟာတွေကတော့ မှန်ကန်တယ်။ ဘယ်ဟာတွေကတော့ မဖြစ်သင့်တဲ့ဟာတွေဆိုတာ မှန်ကန်သော နည်းလမ်းနဲ့ သွန်သင်ဆုံးမမှု လိုအပ်တယ်။ ဒါမျိုးတွေဖြစ်လာရင် တိကျမှန်ကန်သော တရားဥပဒေအတိုင်း မျက်နှာမလိုက်ဘဲ အရေးယူ ဆောင်ရွက်မှုတွေ အများကြီး လိုအပ်ပါတယ်” ဟု ဦးအောင်မျိုးမင်းက ပြောကြားသည်။

လက်ရှိဖြစ်စဉ်များမှာ နှစ်ကာလကြာမြင့်စွာ ဖြစ်ပွားခဲ့ခြင်းကြောင့် မည်မျှအထိ နစ်နာဆုံးရှုံးမှုများ ရှိနေသည်ကို မည်သူမျှ အတိအကျ မသိနိုင်ကြောင်း၊ အစိုးရအနေဖြင့် တိကျမှန်ကန်စွာ လုပ်ဆောင်ပေးရန် တိုက်တွန်းလိုကြောင်း ဦးအောင်မျိုးမင်းက ဆိုသည်။

“ဘယ်သူတွေ ဘယ်လောက်နစ်နာခဲ့လဲ ဆိုတာက ဘယ်သူမှ အတိအကျ မသိနိုင်ဘူး။ ဒါဖြစ်နေတာက သတင်းတွေအရဆို ကြာနေပြီလေ။ အစိုးရအနေနဲ့ တရားဥပဒေအထက်မှာ ဘယ်သူမှမရှိဘူး ဆိုတာကို ဒီလိုဖြစ်စဉ်မှာ ပြသနိုင်ရမယ်။ ဘယ်လိုပုံစံတွေပဲ ရှိနေပါစေ ဘယ်လိုနောက်ခံတွေပဲ ရှိနေပါစေ။ နစ်နာမှုတွေကို အမြန်ဆုံး ဖော်ထုတ်ပေးရမယ်” ဟု ၎င်းကဆက်လက် ပြောကြားသည်။

သမိုင်းပညာရှင် အချို့၏ ရေးသားချက်များအရ ပုဂံခေတ်တွင် အရည်းကြီးများက မိန်းကလေးငယ်များအား ပန်းဦးလွှတ်သည်ဆိုသည့် ဖြစ်စဉ်များရှိခဲ့ပြီး လက်ရှိ နည်းပညာ ခေတ်တွင်လည်း အလားတူဖြစ်စဉ်မှာ မွန်ပြည်နယ်၌ ပေါ်ပေါက်လာခဲ့ခြင်းဖြစ်သည်။ ထို့အတူ လူ့အခွင့်အရေးနှင့် ပတ်သက်၍ ပညာပေးလှုပ်ရှားမှုများ မြန်မာနိုင်ငံတွင် အရှိန်အဟုန်ဖြင့် လုပ်ဆောင်နေချိန်တွင် လူ့အခွင့်အရေး ဆိုးဆိုးရွားရွား ချိုးဖောက်ခံရမှု များလည်း ထွက်ပေါ်လာခဲ့ခြင်းဖြစ်သည်။ အဆိုပါ ဖြစ်စဉ်များမှာ လူ့အခွင့်အရေး ကာကွယ်စောင့်ရှောက်မည် ဟူသော ကြွေးကြော်မှုဖြင့် အနိုင်ရရှိခဲ့သည့် လက်ရှိအစိုးရအတွက် စိန်ခေါ်မှုတစ်ရပ်ပင်ဖြစ်သည်။ သို့သော် ခွန်တန် (ခ) ဇာတ်လိုက်ဆိုသူမှာ လွတ်မြောက်နေဆဲပင်…။

 

ဆက်တိုက်မြင့်တက်လာတဲ့ ပြည်တွင်းဆန်ဈေး

ပခုက္ကူဆိပ်ကမ်းသို့ ဆန်သင်္ဘောဝင်ရောက်စဉ် သယ်ဆောင်နေကြသူများကို တွေ့ရစဉ် (ဓာတ်ပုံ-သက်ထိန်ဝင်း)

၂၀၁၇-၂၀၁၈ ဘဏ္ဍာနှစ်အတွင်း ပြည်ပသို့ မြန်မာ့ဆန်တင်ပို့မှု အလားအလာ ကောင်းနေပြီး ယခုနှစ်တွင် ဆန်တန်ချိန် နှစ်သန်းခန့် တင်ပို့နိုင်မည်ဟု ခန့်မှန်းထားပါသည်။ ပြည်ပဈေးကွက်ကို အဓိကတင်ပို့နေတာက ၂၅ မှတ် ဆန်အမျိုးအစားဖြစ်ပြီး ဆန် ချောအများစုကို ပြည်တွင်း၌သာ စားသုံးကြသည်။ လတ်တလောတွင် ပြည်တွင်းဆန်ချော ဈေးနှုန်းများ ပျမ်းမျှအားဖြင့် ကျပ် ၅၀၀၀ ၀န်းကျင်အထိ မြင့်တက်လာသည်။

ယခုနှစ်အတွင်း ပြည်ပသို့ဆန်တင်ပို့မှု အားကောင်းလာပြီး ပြည်တွင်းဈေးကွက်အတွင်းရှိ ပြည်ပပို့ ဆန်ကြမ်းဈေးနှုန်းများလည်း မြင့်တက်လျက်ရှိသည်။ ၂၀၁၇ ခုနှစ် နှစ်လယ်ပိုင်းတွင် ဧည့်မထဆန် (၂၅ ရာခိုင်နှုန်း) တစ်အိတ်လျှင် ကျပ် ၁၈၀၀၀ ၀န်းကျင်ရှိနေရာမှ ၂၀၁၇ ခုနှစ် စက်တင်ဘာ ၃၀ ရက်တွင် ကျပ် ၂၂၀၀၀ ၀န်းကျင်အထိ ရှိလာပြီး ငါးလခန့်အတွင်း ကျပ် ၄၀၀၀ ခန့်မြင့်တက်ခဲ့သည်။

ပြည်တွင်း ဆန်လက်ကျန်နည်းလာချိန်တွင် ဆန်သိုလှောင်ထားသူများမှ ငွေတိုးနှင့် အမြတ်အစွန်းတွက်ချက်ကာ ဈေးတင် ရောင်းချနေသဖြင့် ပြည်တွင်းစားသုံးနေသည့် ဆန်ဈေးမြင့်တက်လျက်ရှိကြောင်း ဆန်ကုန်သည်များထံမှ သိရသည်။

“အဓိက,က ဒီအချိန်မှ ဒီလိုပဲဈေးတိုးရောင်းနေကြပေါ့နော်။ ဆန်အသစ်ပေါ်ခါနီးမှာ ဆန်အဟောင်းလက်ကျန်ဆန်က တော်တော်များများက ကုန်သွားပြီ။ တစ်နှစ်လုံး စားဖို့သိမ်းထားခဲ့သမျှ နောက်ဆုံး ဆန်အသစ် ပေါ်ခါနီးတဲ့အခါ စက်ပိုင်တွေအားလုံးက လက်ကျန်တွေ နည်းသွားပြီလေ။ လက်ကျန်နည်းသွားတော့ ကျန်တဲ့သူက သိမ်းထားတဲ့ အချိန်ကာလ ငွေတိုးနဲ့အမြတ်အစွန်းတွက်ပြီးတော့ တိုးရောင်းတာပေါ့။ စားသုံးတဲ့သူက ဒီအဟောင်းပဲ စားလို့ရတယ်။ အသစ်ကို မစားနိုင်ကြသေးဘူး”ဟု ဘုရင့်နောင် ဆန်စပါးကုန်စည်ဒိုင်အတွင်းရေးမှူး ဦးသန်းဦးက ပြောကြားသည်။

ဘုရင့်နောင် ဆန်စပါးကုန်စည်ဒိုင်၊ အတွင်းရေးမှူး ဦးသန်းဦးက “ဈေးက ပြည်တွင်း စားသုံးဆန်က ပေါ်ဆန်းမွှေးရော ဇီရာရော ဈေးတက်တယ်။ ၂၅ မှတ်ဆန် export ဆန်ကတော့ ဈေးကျတယ်။ အခု ၂၅ မှတ်ဆန်က အမြင့်ဆုံး ၁၀၈ ပေါင် တစ်အိတ်ကို ကျပ် ၂၂၀၀၀ ဈေးဖြစ်သွားတယ်။ လက်ရှိပေါက်ဈေးက ၂၀၅၀၀ ကနေ ၂၁၀၀၀ ဖြစ်သွားတာ။ ဆန်ချောက ပြီးခဲ့တဲ့လက ကျပ် ၅၀၀၀၀ လောက်ကနေ အခု ကျပ် ၅၅၀၀၀ လောက် ဖြစ်သွားပြီ။ ရွှေဘိုပေါ်ဆန်းမွှေးပေါ့နော်၊ ဇီ ရာရှယ်ကတော့ ၂၇၀၀၀ လောက်ကနေ ၃၀၀၀၀ ဖြစ်သွားတာ” ဟု ပြောကြားသည်။

ပြီးခဲ့သည့် ရက် ၂၀ ခန့်က အထူးသဖြင့် ဆန်ကြမ်းဖြစ်သည့် မြောင်းမြဇီရာရှယ် တစ်အိတ်လျှင် ကျပ် ၂၂၅၀၀၊ ၂၃၀၀၀ ခန့်ရှိခဲ့ရာမှ ကျပ်၂၄၀၀၀ ဈေးရှိလာကာ ဈေးတန်းနေကြောင်း၊ ယခုရက်ပိုင်းတွင် ကျပ်၂၅၀၀၀ ခန့် အထိ ပြန်တက်လာကြောင်း သိရသည်။

ဆန်ချောဈေးအနေဖြင့် ပေါ်ကျွဲရှယ်၊ ပေါ်ဆန်းမွှေး(ရှယ်)၊ ပေါ်ဆန်းလတ် စသည်တို့မှာ ယခင် ၂၇၅၀၀၊ ၂၈၀၀၀ ကျပ်မှ လက်ရှိတွင် ကျပ် ၃၃၀၀၀ အထိဈေးရှိလာကာ တစ်အိတ်လျှင် ပျမ်းမျှအားဖြင့် ကျပ် ၅၀၀၀ ၀န်းကျင်ခန့် ဈေးတက်လာကြောင်း ဆန်ကုန်သည်များထံမှ သိရသည်။

ရွှေဘိုပေါ်ဆန်းတစ်အိတ်လျှင် ယခင်ရက်ပိုင်းက ၄၇၅၀၀၊ ၄၈၅၀၀ ကျပ်ဝန်းကျင်မှ ယခုရက်ပိုင်းအတွင်း ကျပ် ၅၁၀၀၀၊ ၅၁၅၀၀ ခန့်အထိ ဈေးတက်လာကြောင်း၊ မြောင်းမြပေါ်ဆန်းတစ်အိတ်လျှင် ယခင်က ကျပ် ၃၉၅၀၀ ၀န်းကျင်မှ ယခုရက်ပိုင်းအတွင်း ကျပ် ၄၃၀၀၀၊ ၄၄၀၀၀ အထိ ဈေးမြင့်လာကြောင်း ရန်ကုန်မြို့ရှိ ဆန်ကုန်သည်တစ်ဦးက ပြောကြားသည်။

“ဆန်ဈေးကတော့ ဒီလထဲမှာ နှစ်ခါလောက်တောင် တက်သွားတယ်။ အရင်ဈေးနဲ့ဆိုရင် ဈေးအနည်းဆုံးကျပ် ၅၀၀၀ လောက် ဈေးတက်သွားတာ။ ဒါကျွန်တော်တို့ ဆိုင်ကြီးမို့လို့ ဒီဈေးနဲ့ရတာ။ ဆိုင်ငယ်တွေဆိုရင် ရွှေဘိုတစ်ပြည်ကို ၂၆၀၀၊ ၂၇၀၀ ၀န်းကျင် လောက်ရောင်းမှာ ဒါမှလည်း တွက်ခြေကိုက်မှာလေ။ ဒီလတွေကတော့ ဆန်ဈေးတက်တဲ့ လတွေပါပဲ။ ဒါပေမဲ့ ဒီနှစ်က အရင်နှစ်တွေကထက် အများကြီးပိုတက်သွားတယ်။ ဒီကြားထဲ ဆန်ဈေးတက်နေတဲ့ လလည်း ဖြစ်တယ်။ ပွဲစားတွေကလည်း ဈေးကစား၊ လှောင်လက်တွေကလည်း ဈေးကောင်းရမှ ရောင်းတော့ ကျွန်တော်တို့လို ဆန်ဆိုင်အသေးလေးနဲ့ စားသုံးသူတွေအတွက် တွက်ခြေ မကိုက်ဘူးပေါ့။ ကျွန်တော်တို့လည်း ဆန်တစ်အိတ်ကို အမြတ် ၂၀၀၀ လောက်ပဲတင် စားတာပါ။ မူရင်းဈေးကိုက ဈေးကြီးနေတော့ ဘာမှ မတတ်နိုင်ဘူးပေါ့လေ။ အခုလို ဆန်ဈေးတွေ တက်တာ ကျွန်တော်တို့လည်း အဆင် သိပ်မပြေဘူးဗျာ”ဟု ဧရာဆန်လက် လီ၊ လက်ကားအရောင်းဆိုင်မှ ဦးစောအောင်က ပြောကြားသည်။

ထို့ပြင် သင်္ဃန်းကျွန်းမြို့နယ်အတွင်း နေထိုင်သူ ဒေါ်စိုးစိုးအောင်ကလည်း “မိုးတွေကြီးလို့ ဆန်ဈေးတွေတက်မယ်၊ ဆန်တွေ ဈေးတက်မယ်လို့တော့ သတင်းတွေ၊ အသံတွေတော့ ကြားပါတယ်။ အဲဒီလောက်ကြီး ဈေးတက်မယ်လို့မထင်ထားတော့ အပို လည်းမ၀ယ်လိုက်မိဘူး။ အခုဈေးက အရင်ကိုယ်စားနေကျ ၄၀၀၀၀ ကျော်တန်ဆန်က ၅၀၀၀၀ နီးပါးလောက်ဖြစ်သွားတော့ လန့်တောင်လန့်သွားတယ်။ ဒီအတိုင်းဆိုရင်တော့ မလွယ်ပါဘူး။ ဆန်လည်းဈေးတက်၊ သားငါးလည်းဈေးတက်နဲ့ ထမင်းအစား ဆန်ပြုတ်ပြောင်းစားရတော့မယ့်အဖြစ် ရောက်နေပြီး။ အိမ်အသုံးစရိတ်တွေက မြင့်ပြီးတော့ ကိုယ်ရှာတဲ့ငွေက တက်တိုးလာ တယ်လို့ မရှိဘူး။ ၀င်ငွေနဲ့ထွက်ငွေနဲ့ မမျှတတော့ဘူး။ ကုန်ဈေးနှုန်းတွေ ဒီလိုသာ ဈေးတက်နေမယ်ဆိုရင်တော့ သာမန်လူတန်းစားတွေအတွက်က ဘယ်လောက်ပဲအလုပ်လုပ် ငွေရှာရှာ ဘယ်တော့မှ သူဌေးဖြစ်လာမှာ မဟုတ်ဘူး”ဟု ပြောကြားသည်။

နိုင်ငံခြားဝင်ငွေ ပိုမိုရရှိရေးအတွက် ယခုနှစ်အတွင်း ပြည်ပသို့ ဆန်တန်ချိန်နှစ်သန်း တင်ပို့ရန် ရည်မှန်းထားသော်လည်း ပြည်တွင်းဆန်ဈေးနှုန်း တည်ငြိမ်ရေးကို ထည့်သွင်းစဉ်းစား လုပ်ဆောင်ရမည်ဖြစ်ကြောင်း စီးပွားရေးနှင့်ကူးသန်းရောင်းဝယ် ရေးဝန်ကြီးဌာနမှ ဒုတိယ၀န်ကြီး ဦးအောင်ထူးက ပြောကြားသည်။
စီးပွားရေးနှင့်ကူးသန်းရောင်းဝယ်ရေး ၀န်ကြီးဌာနအနေဖြင့် ဆန်စပါးရောင်းဝယ်ရေး လုပ်ငန်းများကို စနစ်တကျရောင်းဝယ် ဖောက်ကားလာစေရန် မူဝါဒများချမှတ်၍ ထိန်းကျောင်းသွားမည်ဖြစ်သည်။

မြန်မာနိုင်ငံမှဆန်ကို ပြည်ပတင်ပို့မှု မြင့်တက်နေသည်ဆိုသော်လည်း အိမ်နီးချင်း ထိုင်းနိုင်ငံသည် ဆန်တန်ချိန် ၁၀ သန်း ကျော်တင်ပို့နိုင်သဖြင့် မြန်မာနိုင်ငံ၏ တင်ပို့နိုင်စွမ်းရည်နှင့် အလားအလာအပေါ် ရေရှည်ဖွံ့ဖြိုးတိုးတက်မှု ရှိရေးအတွက် အရည်အသွေးနှင့် အရေအတွက်ဈေးကွက်များကို ဆန်စပါးအမျိုးအစားအလိုက် ထုတ်လုပ် တင်ပို့နိုင်ရေး ဆောင်ရွက်သွားမည်ဖြစ်ကြောင်း စီးပွားရေးနှင့်ကူးသန်းရောင်းဝယ်ရေး ၀န်ကြီးဌာနမှ ပြည်ထောင်စုဝန်ကြီး ဒေါက်တာသန်းမြင့်က ပြောကြားသည်။

အဆိုပါတင်ပို့မှုဈေးကွက်အလိုက် ဆန်စပါး အမျိုးအစားခွဲကာ ဇုန်အလိုက် ရွေးချယ် စိုက်ပျိုး ထုတ်လုပ်တင်ပို့နိုင်ရေးအတွက် စနစ်တကျ ဆောင်ရွက်သွားရန်လိုကြောင်း၊ အဓိက စားသောက်ကုန်ဖြစ်သော ဆန်သည် Strategic Goods ဖြစ်သည့်အတွက် အခြား ကုန်စည်များနှင့်မတူဘဲ ဆန်စပါးကို G to G ရောင်းဝယ်မှုများဖြင့် ဆောင်ရွက်လျက်ရှိသည်။
ပြည်ပသို့ဆန်တင်ပို့မှုတွင် အောက်တိုဘာ ၁ ရက်မှ ၇ ရက်အထိ ကာလအတွင်း ဒေါ်လာ ၉ ဒသမ ၇၆၃ သန်းတန်ဖိုးရှိ ဆန်ဖြူနှင့် ပေါင်းဆန် ၃၁၇၉၂ တန်တင်ပို့ခဲ့ကြောင်း၊ ယင်းတို့အနက် တရုတ်နိုင်ငံသို့ ငစိန်ဆန်တန် ၁၀၀၊ သီရိလင်္ကာနိုင်ငံသို့ ဧည့်မထဆန် ၁၀၇၅ တန်နှင့် ငစိန်ဆန်တန် ၂၅၀၊ ရုရှားနိုင်ငံသို့ ပေါင်းဆန်တန် ၆၅၀၊ ဘင်္ဂလားဒေ့ရ်ှနိုင်ငံသို့ ပေါင်းဆန်တန်ချိန် ၂၅၀၊ ဧည့်ထမဆန် တန် ၅၁၅၀ နှင့် ဇီရာ ဆန် ၄၂၅ တန်၊ ဗီယက်နမ်နိုင်ငံသို့ ဧည့်မထ ဆန် ၁၂၅ တန်၊ အာဖဂန်နစ္စတန်နိုင်ငံသို့ ဧည့်မထဆန် တန် ၁၀၀၀၊ မက်ဒါဂါစကား နိုင်ငံသို့ ဧည့်မထဆန်၁၀၇၂ တန်၊ အိုင်ဗရီကို့စ်နိုင်ငံသို့ ဧည့်မထဆန်တန် ၂၀၀၀၀၊ အီးယူနိုင်ငံများသို့ ပေါင်းဆန် ၆၉၅ တန်နှင့် ဧည့်မထဆန်တန်ချိန် ၁၀၀၀ တင်ပို့ခဲ့ပြီး ယခင်သီတင်းပတ်က ပင်လယ်ရေကြောင်းမှ ၃၅၆၂၇ တန်တင်ပို့ခဲ့သဖြင့် ယခုသီတင်းပတ်မှာ ယခင်ကထက် တန်ချိန် ၃၈၃၅ တန်လျော့နည်းခဲ့ကြောင်း စီးပွားရေးနှင့်ကူးသန်းရောင်းဝယ်ရေး ၀န်ကြီးဌာနမှ သိရသည်။

မြန်မာ-တရုတ်နယ်စပ်ရှိ ကုန်သွယ်ရေးစခန်းများနှင့် မြန်မာ-ဘင်္ဂလားဒေ့ရှ် နယ်စပ်ရှိ စစ်တွေကုန်သွယ်ရေးစခန်းမှ စက်တင်ဘာ ၁၆ ရက်မှ ၂၂ ရက်အထိ ကာလအတွင်း ဒေါ်လာ ၇ ဒသမ ၃၅၄ သန်းတန်ဖိုးရှိ ငစိန်ဆန်၊ ဧည့်မထဆန်နှင့် ကောက်ညှင်း ဆန် ၂၁၁၈၉ တန်ကျော် တင်ပို့ခဲ့ကြောင်း၊ ယခုတစ်ပတ်တွင် မြန်မာ-တရုတ်နယ်စပ်ရှိ မူဆယ် (၁၀၅) မိုင် ကုန်သွယ်ရေးဇုန်မှ ငစိန်ဆန်တန်ချိန် ၇၀၊ ဧည့်မထဆန် ၁၈၈၅၃ တန်ကျော်နှင့် ကောက်ညှင်းဆန် ၅၉ တန်၊ ချင်းရွှေဟော်ကုန်သွယ်ရေးစခန်းမှ ငစိန် ဆန် ၁၆၉ တန်၊ လွယ်ဂျယ်ကုန်သွယ်ရေးစခန်းမှ ဧည့်မထဆန် ၁၈၈၃ တန်ကျော် တင်ပို့ခဲ့ပြီး မြန်မာ-ဘင်္ဂလားဒေ့ရ်ှနယ်စပ်ရှိ စစ်တွေ ကုန်သွယ်ရေးစခန်းမှ ဧည့်မထဆန် ၁၅၅ တန်တင်ပို့ခဲ့ကြောင်း၊ ယခင်တစ်ပတ်က ၂၃၈၄၅ တန်ကျော် တင်ပို့ခဲ့သည့်အတွက် ယခင်တစ်ပတ်နှင့် နှိုင်းယှဉ်ပါက ယခု တစ်ပတ်မှာ၂၆၅၆ တန်တင်ပို့မှု လျော့ကျခဲ့ကြောင်း သိရသည်။

ယခုနှစ်အတွင်း ပြည်ပသို့ ဆန်တင်ပို့ရန်အတွက် ဈေးကွက်သစ်များရရှိလာခြင်း နှင့်အတူ တင်ပို့မှုလည်း တိုးတက်လာခဲ့သည်။ သို့သော် Export ဆန်ဈေးကွက်တွင်လည်း လှုပ်ခတ်မှုများစွာဖြစ်ပေါ်ခဲ့သည်။

ဆန်လုပ်ငန်းရှင်များက ပြည်ပသို့ ဆန်တန်ချိန် တစ်သိန်းခွဲခန့် ကြိုတင်ရောင်းချထားပြီဖြစ်သည့်အတွက် မကြာမီပေါ်လာတော့မည့် မိုးစပါးအသစ်မှ မဖြစ်မနေတင်ပို့ ပေးရမည်ဖြစ်ရာ ယင်းပမာဏကို ပြည့်မီအောင် တင်ပို့ပေးနိုင်ရန်အတွက် အခက်အ ခဲဖြစ်နေကြောင်း အောက်တိုဘာ ၁၄ ရက်က ရန်ကုန်မြို့ရှိ ဘုရင့်နောင် ဆန်စပါးကုန်စည်ဒိုင်တွင် ကျင်းပခဲ့သည့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယ၀န်ကြီးနှင့် ဆန်စပါးလုပ်ငန်းရှင်များ တွေ့ဆုံ ဆွေးနွေးပွဲမှ သိရသည်။
“လက်ရှိ တင်ပို့ဖို့ရှိတဲ့ပမာဏက သူတို့ ပြောသွားတာကတော့ ဆန်အိတ်ပေါင်း သိန်း ၃၀ လို့ပြောတယ်။ တစ်နေ့ကို ၂၅၀၀၀ ၀င်တဲ့အားနဲ့ဆို ရက်ပေါင်းတစ်ရာဝင်မှ ပြည့်ပမယ်လို့ ဆိုပါတယ်။ အိတ်သိန်း ၃၀ လောက်ရှိတဲ့ ပမာဏကို ရောင်းထားပြီးသား ဖြစ်တယ်။ ဒီဆန်သစ်ရာသီမှာ တင်ပေးရမယ်ပေါ့နော် ဒီတင်ပေးရမယ့် ရောင်းထားတဲ့ Volume အရမ်းကြီးနေတယ်။ သင်္ဘောတွေက နောက်ဆုတ်လို့ မရတော့တဲ့အနေအထား မဖြစ်မနေ တင်ပေးရမယ့်အနေအထားပေါ့။ လက်ရှိ မြန်မာဆိပ်ကမ်းမှာ ဆန်တင်ဖို့ စောင့်နေတဲ့ သင်္ဘောကိုက ခြောက်စင်းလောက်ရှိတယ်”ဟု ဘုရင့်နောင်ဆန် စပါး ကုန်စည်ဒိုင်၊ အတွင်းရေးမှူး ဦးသန်းဦးက အဆိုပါဆွေးနွေးပွဲအပြီး မီဒီယာများနှင့် တွေ့ဆုံရာတွင် ပြောကြားသည်။

ပြည်ပသို့ ဆန်တင်ပို့နေသည့် လုပ်ငန်းရှင်များအနေဖြင့် ယခုအောက်တိုဘာနှင့် နိုဝင်ဘာလများတွင် စတင်ပေါ်လာမည့် စပါးအသစ်ကို မျှော်ကိုးကာ ကြိုတင်ရောင်းချထားခြင်းဖြစ်သည်။ ယခုနှစ်တွင် ရာသီဥတု မကောင်းသည့်အတွက် စပါး ထွက်ရှိသည့်အချိန်နောက်ဆုတ်သွားခြင်းကြောင့် ဈေးကွက်အတွင်းသို့ အချိန်မီ ၀င်ရောက်လာခြင်း မရှိသေးသည့်အပြင် ပြည်တွင်းလက်ကျန်ဆန်များမှာလည်း ဈေးနှုန်းမြင့်တက်မှုများ ဖြစ်ပေါ်ခဲ့သည့်အတွက် ယခုကဲ့သို့ အခက်အခဲများ ဖြစ်ပေါ်နေခြင်းဖြစ်သည်။

“ပုံမှန်က ဒီမုန်တိုင်းသာ မ၀င်ခဲ့ဘူးဆိုရင် ကုန်စည်ဒိုင်ကို ဆန်အိတ်က ၅၀၀၀၀ နဲ့ တစ်သိန်းလောက်ဝင်တယ်။ မြန်မာတစ်နိုင်ငံလုံး အရှေ့အနောက် ပဲခူးတိုင်း ဧရာဝတီတိုင်း ပေါ်ပြီဟေ့ဆို ဆန်ကအများကြီး ထိန်းလို့ကို မနိုင်အောင်လာတယ်။ လက်ရှိရာသီက မုန်တိုင်းကြောင့် နောက်ဆုတ်သွားတယ်။ စပါးအသစ်ကို မလုပ်နိုင်ကြဘူး။ ဆန်ဝင်တဲ့ အားက အရမ်းနည်းနေပြီးတော့ သင်္ဘောတင်ရမယ့်သူကလည်း ဒီဝင်လာတဲ့၂၅၀၀၀ ၃၀၀၀၀ ကို လုဝယ်နေတဲ့အခါကျတော့ သူပေးပါ ငါ့ပေးပါဖြစ်နေတော့ ဆန်ဈေးက တက်သွားတယ်။ အခုရောင်းထားတဲ့ပမာဏက ဆန်ထွက်လာမယ့်ရာသီမှာ နောက်ထက် ရောင်းစရာမလိုဘဲနဲ့ တင်ပေးရင်တောင် အများကြီးတင်ပေးရမှာ နောက်ထက် သင်္ဘောကလည်း အဆင်သင့် ကပ် ထားတဲ့ပေါ်မှာလဲ စရိတ်တွေက အများကြီး တက်နေတယ်။ အဲဒီရောင်းထားတဲ့ သင်္ဘောကို တင်ပေးရမယ့် တာဝန်ရှိတဲ့ ကုမ္ပဏီအနေနဲ့က အရမ်းကိုအရှုံးနဲ့ ရင်ဆိုင်နေရတယ်။ နာမည်တော့ ထုတ်ဖော်မပြောသွားဘူး။ ဒီလိုဖြစ်တဲ့အတွက် နာမည်ပျက်မယ်ပေါ့နော်။နောက်မြန်မာနိုင်ငံမှာဝယ်ရင် သင်္ဘောတင်တဲ့ အခက်အခဲတွေ အရည်သွေးမပြည့်မီတဲ့ အခက်အခဲတွေ ဆန်ကိုတင်မပေးနိုင်တဲ့ အခက်အခဲတွေ ဒါကကမ္ဘာကို ပြန့်သွားနိုင်တယ်”ဟု မြန်မာနိုင်ငံ ဆန်ကုန်သည်များအသင်း အတွင်းရေးမှူး ဦးသန်းဦးက ဆိုသည်။

မြန်မာနိုင်ငံအနေဖြင့် ပြည်သို့ နယ်စပ် ကုန်သွယ်ရေးစခန်းများနှင့် ပင်လယ်ရေကြောင်းနှစ်ခုလုံးမှတစ်ဆင့် ဆန်တင်ပို့နေ ခြင်းဖြစ်ပြီး ပင်လယ်ရေကြောင်းကနေ ၂၅ မတ် ဆန်အမျိုးအစားကို အဓိက တင်ပို့နေခြင်းဖြစ်ကြောင်း သိရပါသည်။ ပင်လယ်ရေ ကြောင်းက အဓိကတင်ပို့နေသည့် ၂၅ မတ် ဆန်ဈေးနှုန်းက တစ်အိတ်ကို ၂၀၀၀၀ ကျပ်ရှိခဲ့ရာ ယခုတစ်ပတ်မှာ အတွင်း ၂၁၀၀၀ ကျပ်အထိ ဈေးနှုန်းမြင့်တက်ခဲ့ကြောင်း မြန်မာနိုင်ငံ ဆန်စပါးကုန်သည်များအသင်းမှ သိရသည်။

ကရင်ပြည်နယ် မဲသဝေါဒေသ၌ တစ်ကျော့ပြန်ဖြစ်ပွားသည့် တိုက်ပွဲများတွင် နှစ်ဖက်အကျအဆုံးများရှိလာပြီး ဒေသခံများ နေရပ်ပြန်ရန်မျှော်လင့်ချက် မှေးမှိန်လာ

ကရင်ပြည်နယ် ဖာပွန်ခရိုင် လှိုင်းဘွဲ့မြို့နယ် မြိုင်ကြီးငူ-မဲသဝေါလမ်း ကျုံထော်ရေတံခွန်အထက်ဘက်၌ တပ်မတော်၊BGF တပ်ဖွဲ့နှင့် DKBA (ခွဲထွက်) အဖွဲ့တို့  တစ်ကျော့ပြန် ဖြစ်ပွားလာသည့် ထိတွေ့ပစ်ခတ်မှုနှင့် မိုင်းထောင်ဖောက်ခွဲမှုများကြောင့် နှစ်ဘက်အထိ အခိုက်အကျအဆုံးရှိလာကြောင်း ကရင်ပြည်နယ် နယ်ခြားစောင့်တပ်ဖွဲ့မှ သိရသည်။

“ဒီရက်ပိုင်း လွန်ခဲ့တဲ့ လေး၊ ငါးရက်က စပြီး ထိတွေ့ပစ်ခတ်မှုတွေ မကြာခဏဖြစ်နေတယ်။ ဒဏ်ရာရသူ၊ မိုင်းထိသူတွေလည်း ရှိနေတယ်။ တိုက်ပွဲကြီးကြီး မားမားဖြစ်တာတော့ မရှိဘူး။ ချောင်းပစ်တာ၊ မိုင်းဆွဲတာတွေ ဆက်တိုက်လုပ်လာတယ်” ဟု နယ်ခြားစောင့်တပ်၊ တပ်နယ် (၃)မှ ဗိုလ်မှူးနိုင်မောင်ဇော်က ပြောကြားသည်။

အောက်တိုဘာ ၁၇ ရက် နံနက် ၃ နာရီ ခန့်က မိုင်းနင်းမိသော နယ်ခြားစောင့် တပ်ဖွဲ့ဝင်တစ်ဦး ကျဆုံးခဲ့ပြီး ဒဏ်ရာရသူအချို့ရှိခဲ့ ကြောင်း ၎င်းက ပြောကြားသည်။

လှိုင်းဘွဲ့မြို့နယ် မဲသဝေါဒေသတွင် ယခင်နှစ် စက်တင်ဘာလက တပ်မတော်၊ BGF တို့ ပူးပေါင်းအဖွဲ့နှင့် DKBA (ခွဲထွက်) အဖွဲ့တို့ ကိုးရက်ကြာ တိုက်ပွဲဖြစ်ပွားခဲ့ခြင်းကြောင့် ဒေသခံ ၅၀၀၀ ကျော် အိုးပစ်အိမ်ပစ် ထွက်ပြေးခဲ့ရပြီး ယခုတစ်ဖန် ထိတွေ့မှုများ ထပ်မံဖြစ်ပွားလာခြင်းကြောင့် မဲသဝေါကားလမ်းလည်း ပိတ်ထားရသည်ဟု သိရသည်။

“မဲသဝေါ သွားလမ်းရော၊ ရေတံခွန်ကို သွားရောက်လည်ပတ်မှုကိုပါ ပိတ်ထားရပါတယ်။ အောက်တိုဘာ ၁၆ ရက်လောက်ကတည်းက မိုင်းထောင်တာ၊ ခြုံခိုတိုက်တာတွေ လုပ်လာတယ်။ ရင်ဆိုင်တိုက်ပွဲရယ်လို့တော့ မဖြစ်ပါဘူး။ အဓိကတော့ ကိုယ်တို့လမ်းကင်းတွေပေါ့။ လမ်းကင်းယူထားတဲ့အဖွဲ့တွေကို သူတို့ မိုင်းလာဆွဲ တာတွေ၊ ချောင်းပစ်တာတွေ အဲဒီလိုမျိုးတွေဖြစ်တယ်။ ဒဏ်ရာရမှတွေက သူ့ဘက် ကိုယ့်ဘက်ရှိတယ်။ တပ်ကလည်းရှိတယ်။ စိုးရိမ်စရာ အနေအထားမျိုးတော့ မရှိပါဘူး” ဟု ကရင်ပြည်နယ် နယ်ခြားစောင့်တပ် တပ်နယ် (၃) မှ ဗိုလ်မှူးနိုင်မောင်ဇော်က ပြောကြားသည်။

ပြီးခဲ့သော စက်တင်ဘာနောက်ဆုံး ပတ်ကလည်း  BGF တပ်ဖွဲ ၀င်များတပ်စခန်းချရာသို့ အလစ်အငိုက်ဝင်ရောက် တိုက်ခိုက်ခဲ့ခြင်းကြောင့်  နယ်ခြားစောင့် တပ်ဖွဲ့ဝင်လေးဦး ကျဆုံးပြီး သုံးဦးဒဏ်ရာရရှိခဲ့ကြောင်း သိရသည်။

မြိုင်ကြီးငူ- မဲသဝေါသွား ကားလမ်းနှင့် မဲသဝေါဒေသတွင် ကျုံထော်ရေတံခွန် အထက်ဘက်၌ တစ်ကျော့ပြန် ဖြစ်ပွားလာသည့် ထိတွေ့ပစ်ခတ်မှုများကြောင့် ကျုံထော်ရေတံခွန်သို့ ခရီးသွားများသွားရောက် လည်ပတ်ခွင့်ကို ယာယီပိတ်ထားရကာ မြိုင်ကြီးငူစစ်ဘေးရှောင်စခန်း၌ ခိုလှုံနေရသည့်  ဒေသခံ ၅၀၀၀ ကျော်တို့မှာလည်း နေရပ်သို့ ပြန်ရန်မျှော်လင့်ချက် မှေးမှိန်နေဆဲဖြစ်ကြောင်း သိရသည်။