Miss Supranational Myanmar ဆုရှင် အလှမယ်ရွှေမှူးဟန်နှင့် တွေ့ဆုံခြင်း

ကမ္ဘာ့ထိပ်တန်း အလှမယ်ပြိုင်ပွဲများတွင် မြန်မာကိုယ်စားပြုယှဉ်ပြိုင်ရန် အလှမယ်များ ရွေးချယ်သည့် Miss Golden Land Myanmar အလှမယ်ပြိုင်ပွဲအား ကျင်းပပြီးစီးခဲ့ပြီဖြစ်သည်။ အလှမယ်ခြောက်ဦးအား ရွေးချယ်ခဲ့သည့်အနက် အမြင့်ဆုံးဆုတစ်ခုဟု ဆိုနိုင်သည့် Miss Supranational Myanmar အလှမယ်ဆုကို ကချင်တိုင်းရင်းသူ ရွှေမှူးဟန်က ဆွတ်ခူးရရှိခဲ့ပါသည်။ အလှမယ် ခင်ဝင့်ဝါ၊ ဟန်သီ၊ L ဘောက်နူးနှင့် ဆွေဇင်ထက်တို့ သွားရောက်ယှဉ်ပြိုင်ခဲ့ကြရာတွင် ရလဒ်ကောင်းများ ထွက်ပေါ်လာအောင် ယှဉ်ပြိုင်နိုင်ခဲ့သည့် Miss Supranational ပြိုင်ပွဲအတွက် ယခုနှစ်ကိုယ်စားပြုအလှမယ်ဖြစ်လာသည့် ရွှေမှူးဟန်အနေဖြင့် ပြင်ဆင်မှုများ စတင်ပြုလုပ်နေပြီဖြစ်သည်။ နိုဝင်ဘာလအတွင်း သွားရောက် ယှဉ်ပြိုင်ရမည်ဖြစ်ကာ ဒီဇင်ဘာ ၁ ရက်တွင် နောက်ဆုံးအဆင့် ပြိုင်ပွဲပြုလုပ်မည့် Miss Supranational ပြိုင်ပွဲအတွက် ပြင်ဆင်သွားရန် ကြိုးပမ်းနေမှုများ၊ ပြိုင်ပွဲအတွက် စိတ်လှုပ်ရှားရင်ခုန်မှုများ၊ မြန်မာကိုယ်စားပြုအလှမယ်တစ်ယောက်အဖြစ် ရှေ့ဆက် လုပ်ဆောင်သွားလိုသည်များအား မေးမြန်းဖြစ်ခဲ့ပါသည်။

‘မြန်မာလူမျိုးတွေရဲ့ ယဉ်ကျေးသိမ်မွေ့မှု၊ ဖော်ရွေပျူငှာမှု၊ စေတနာထက်သန်မှု၊ ကူညီရိုင်းပင်းတတ်မှု ဆိုတာတွေကိုလည်း နိုင်ငံတကာကသိအောင် တင်ဆက်သွားချင်ပါတယ်’

■ မေး – Miss Golden Land Myanmar အလှမယ်ပြိုင်ပွဲမှာ မပြိုင်ခင် ပြိုင်ပွဲအတွေ့အကြုံလေး ရှိခဲ့ဖူးလား အရင်ပြောပြပါဦး။

ဖြေ – အရှေ့မှာ ပြိုင်ပွဲအတွေ့အကြုံအနေနဲ့ Miss Universe Myanmar မိတ္ထီလာမြို့ကိုယ်စားပြုအနေနဲ့ ပါဝင်ယှဉ်ပြိုင်ခဲ့ဖူးပါတယ်။ ပြိုင်ပွဲမှာ အကောင်းဆုံးကြိုးစား ယှဉ်ပြိုင်ခဲ့ပေမယ့် နိုင်ငံကိုယ်စားပြုအလှမယ် ဖြစ်ခွင့်မရခဲ့တာကြောင့် ထပ်မံကြိုးစားယှဉ်ပြိုင်ဖို့ စီစဉ်ခဲ့တာပါ။ Miss Golden Land Myanmar ပြိုင်ပွဲမှာလည်း ညီမ အနေနဲ့ ကိုယ်စွမ်းဥာဏ်စွမ်းရှိသမျှ အကောင်းဆုံး ကြိုးစားယှဉ်ပြိုင်ခဲ့ပါတယ်။

■ မေး – ပြိုင်ပွဲမှာ ဆုကြေညာတဲ့အခါ အမြင့်ဆုံးဆုတစ်ခုလို့ ပြောလို့ရမယ့် Miss Supranational Myanmar ဆုအတွက် ကြေညာခံရတော့ ဘယ်လိုခံစားရလဲ။

ဖြေ – ညီမရဲ့အိပ်မက်က နိုင်ငံကိုယ်စားပြု အလှမယ်တစ်ယောက် ဖြစ်ချင်တာပါ။ ဒါပေမဲ့ Miss Golden Land Myanmar ပြိုင်ပွဲမှာ မြင့်မားတဲ့ဆုတစ်ခုဖြစ်တဲ့အပြင် အရှေ့က ပြိုင်ပွဲဝင် စီနီယာတွေအားလုံးကလည်း ရလဒ်ကောင်းတွေ ရယူနိုင်ခဲ့တဲ့ Miss Supranational Myanmar ဆုကို ရမယ်လို့တော့ အများကြီး မျှော်လင့်မထားရဲပါဘူး။ တကယ်တမ်း ဆုကြေညာတဲ့အခါ အရမ်းလည်းဝမ်းသာ ကြည်နူးခဲ့ရပါတယ်။ ပြိုင်ပွဲတောက်လျှောက်မှာ ညီမအနေနဲ့ ကံ ဥာဏ် ၀ီရိယအားလုံး အသုံးပြုပြီး ကြိုးစားခဲ့တဲ့ရလဒ်လို့လည်း ယုံကြည်ပါတယ်။

■ မေး – Miss Supranational ပြိုင်ပွဲကို မြန်မာကိုယ်စားပြုသွားပြီး ယှဉ်ပြိုင်ခဲ့ကြတဲ့အခါ ရလဒ်ကောင်းတွေ ထွက်ပေါ်ခဲ့တဲ့အတွက် ပိုပြီးတာဝန်ကြီးတယ်လို့ ပြောလို့ရလား။

ဖြေ – အဲဒီလို ပြောလို့ရပါတယ်။ ညီမအနေနဲ့တော့ မြန်မာကိုယ်စားပြုအနေနဲ့သွားပြီး ယှဉ်ပြိုင်တဲ့အခါ မြန်မာမိန်းကလေးတစ်ယောက်ရဲ့ လှပသိမ်မွေ့မှု၊ ယဉ်ကျေးပျူငှာမှု၊ သွက်လက်ထက်မြက်မှုတွေ အားလုံးကို ကမ္ဘာ့နိုင်ငံအသီးသီးက အလှမယ်တွေကြားမှာ ပေါ်လွင်အောင် တင်ပြသွားချင်ပါတယ်။ အဲဒီအတွက်လည်း အခုချိန်ကစပြီး လေ့ကျင့်ပြင်ဆင်နေပါပြီ။ ပြိုင်ပွဲက အချိန်နည်းနည်းကပ်နေတော့ လောလောဆယ်မှာ ပြိုင်ပွဲအတွက်ကိုပဲ အပြည့်အ၀ အာရုံစိုက်ပြီး ကြိုးစားသွားပါမယ်။

■ မေး – Miss Golden Land Myanmar ပြိုင်ပွဲ စခန်းသွင်းကာလမှာရော ဘယ်လိုအတွေ့အကြုံကောင်းတွေ ရခဲ့လဲ။

ဖြေ – အတွေ့အကြုံ အများကြီးရပါတယ်။ ညီမတို့ ပြိုင်ပွဲဝင်တွေအားလုံး လေ့လာတာတွေ အများကြီးလုပ်ရတယ်။ ပြီးတော့ ပရဟိတ လှုပ်ရှားမှုတွေလည်း လုပ်ရတယ်။ ပြိုင်ပွဲအတွက် လေ့ကျင့်ပြင်ဆင်တာတွေလည်း လုပ်ခဲ့ရတယ်။ ပြိုင်ပွဲဝင်တွေအားလုံး အတူတူ နေခဲ့တဲ့အချိန်မှာ ညီအစ်မအရင်းတွေလို ရင်းနှီးချစ်ခင်စိတ်တွေ ဖြစ်ခဲ့ပါတယ်။ တစ်ယောက်ကိုတစ်ယောက် ကူညီရိုင်းပင်းခဲ့ကြတဲ့ အတွေ့အကြုံတွေက တန်ဖိုးဖြတ်လို့မရပါဘူး။ နိုင်ငံကိုယ်စားပြုသွားရောက် ယှဉ်ပြိုင်တဲ့အခါလည်း အဲဒီလို အတွေ့အကြုံကောင်းတွေ ရရှိမယ်လို့ ယုံကြည်ပါတယ်။

■ မေး – ပြိုင်ပွဲက အချိန်နည်းနည်း ကပ်နေတယ်ဆိုတော့ ဘယ်တော့လောက်သွားပြိုင်ရမလဲ။ အဲဒီအတွက် အဓိက ဘယ်လိုအရာတွေ ပြင်ဆင်သွားမလဲ။

ဖြေ – ပြိုင်ပွဲက ဒီဇင်ဘာလောက်မှာ ပြိုင်ရမယ်လို့ ပြောပါတယ်။ အဓိကတော့ ဗီဇာအရင်ဆုံး ကြိုးစားနေတယ်။ ဒီကြားထဲမှာလည်း အလှမယ်တစ်ယောက်အတွက် လိုအပ်ချက်ဖြစ်တဲ့ Body Beauty Brain အတွက် ပြင်ဆင်သွားမှာပါ။ အထွေထွေ ဗဟုသုတအတွက်လည်း ပြင်ဆင်နေပါတယ်။ ညီမဘက်က လိုအပ်တာတွေအားလုံးကို အတတ်နိုင်ဆုံး ပြင်ဆင်သွားပါမယ်။

■ မေး – Talent အတွက်ရော ဘာတွေအဓိကထား ပြင်ဆင်သွားမလဲ။

ဖြေ – Talent ပိုင်းအတွက်ကတော့ ညီမအနေနဲ့ စန္ဒရားတီးတတ်ပါတယ်။ ဒါပေမဲ့ သီချင်းအဆိုပိုင်းကိုလည်း ထပ်မံလေ့ကျင့်ပြင်ဆင်ဖို့ ရည်မှန်းထားတယ်။ Talent ပိုင်း အနေနဲ့ ဂီတတင်ဆက်မှုကို ပြုလုပ်သွားဖို့ ရည်မှန်းထားပါတယ်။

■ မေး – Miss Supranational ပြိုင်ပွဲမှာ မြန်မာကိုယ်စားပြု ယှဉ်ပြိုင်ခွင့်ရတဲ့အခါ မြန်မာနိုင်ငံရဲ့ ဘယ်လိုအကြောင်းအရာမျိုးတွေကို ကမ္ဘာ့နိုင်ငံအသီးသီးက သိရှိသွားအောင် ပြောပြသွားချင်လဲ။

ဖြေ – မြန်မာနိုင်ငံကို လှပတဲ့နေရာဒေသတွေ ပိုင်ဆိုင်ထားတဲ့နိုင်ငံတစ်ခုအဖြစ် နိုင်ငံတကာကသိရှိပြီး လာရောက် လည်ပတ်ကြတာတွေ ရှိပါတယ်။ ဒါပေမဲ့ ဒီလိုလှပတဲ့နေရာ ဒေသအသီးသီးက ဘယ်လောက်ထိ တန်ဖိုးရှိသလဲ၊ ဘယ်လိုတန်ဖိုးထား ထိန်းသိမ်းသင့်သလဲ ဆိုတာတွေကို ကမ္ဘာ့နိုင်ငံတွေကပါသိအောင် ပြောပြချင်ပါတယ်။ ပြီးတော့ မြန်မာလူမျိုးတွေရဲ့ ယဉ်ကျေးသိမ်မွေ့မှု၊ ဖော်ရွေပျူငှာမှု၊ စေတနာထက်သန်မှု၊ ကူညီရိုင်းပင်းတတ်မှု ဆိုတာတွေကိုလည်း နိုင်ငံတကာကသိအောင် တင်ဆက်သွားချင်ပါတယ်။

■ မေး – Organization တွေနဲ့ အလှမယ်တွေကြားမှာ တစ်ခါတလေ အဆင်မပြေမှုတွေလည်း ရှိတတ်တော့ ဘယ်လိုနားလည်မှုမျိုးနဲ့ လက်တွဲသွားမလဲ။

ဖြေ – ညီမတို့ကို Organization က ယုံကြည်မှု အပြည့်အ၀ရှိလို့သာ အခုလို အလှမယ်တစ်ယောက်အနေနဲ့ ရွေးချယ်စေလွှတ်ဖို့ စီစဉ်တာပါ။ Organization ကထားတဲ့ ယုံကြည်မှုအတိုင်းပဲ ညီမဘက်ကလည်း အပြည့်အ၀ ကြိုးစားသွားပါမယ်။ ရှေ့မှာလည်း အပြန်အလှန် လက်တွဲကြိုးစားခဲ့သလို နိုင်ငံကိုယ်စားပြု အလှမယ်တစ်ယောက် အနေနဲ့ အကောင်းဆုံး ယှဉ်ပြိုင်နိုင်ဖို့ဆိုတာ Organization ရဲ့ ပံ့ပိုးပေးမှုတွေ လိုအပ်သလို ညီမရဲ့ကြိုးစားအားထုတ်မှုလည်း မဖြစ်မနေ လိုအပ်ပါတယ်။ ဒါကြောင့် နားလည်မှုပြည့်ဝစွာနဲ့ လက်တွဲ ယှဉ်ပြိုင်သွားပါမယ်။

■ မေး – ပရဟိတအလုပ်တွေရော ဆက်လုပ်ဖြစ်သွားမလား။

ဖြေ – ညီမ အလှမယ်တစ်ယောက် မလုပ်ခင်ကတည်းက သူငယ်ချင်းတွေနဲ့အတူ တတ်နိုင်သလောက် ပရဟိတအလုပ်တွေ လုပ်ဖြစ်ပါတယ်။ ရှေ့ဆက်ပြီးလည်း ဆက်လုပ်ဖြစ်သွားမှာပါ။

■ မေး – ကချင်တိုင်းရင်းသူတစ်ယောက် အနေနဲ့ အခုလို ရွေးချယ်ခံရတဲ့အတွက် ကချင်တိုင်းရင်းသားတွေအတွက် ဘာတွေလုပ်ဖြစ်သွားဖို့ရှိဦးမလဲ။

ဖြေ – ရှိပါတယ်။ ကချင်ဒေသကို ကိုယ်စားပြုယှဉ်ပြိုင်ခဲ့ပြီး အခုလိုဆုရတဲ့အတွက် ကချင်တိုင်းရင်းသားတွေကလည်း ကျေနပ်ဂုဏ်ယူမယ်လို့ ယုံကြည်ပါတယ်။

■ မေး – ပရိသတ်တွေကို ပြောချင်တဲ့စကားလက်ဆောင်ရှိရင် ပြောပေးပါဦး။

ဖြေ – ညီမကို ပြိုင်ပွဲတစ်လျှောက်လုံး အားပေးခဲ့ကြတဲ့ ပရိသတ်အားလုံးကိုလည်း ကျေးဇူးအများကြီးတင်ပါတယ်။ မြန်မာကိုယ်စားပြုပြိုင်တဲ့အခါမှာလည်း အားပေးကြပါဦးလို့ ပြောချင်ပါတယ်ရှင်။

လူမှုဝန်ထမ်းဦးစီးဌာန ဒုတိယညွှန်ကြားရေးမှူးချုပ် ဦးမျိုးဆက်အောင်နှင့် တွေ့ဆုံမေးမြန်းခြင်း

တောင်းရမ်းစေခိုင်းခံနေရသူတွေနဲ့ ပတ်သက်လို့ပြီးခဲ့တဲ့ အောက်တိုဘာ ၁၂ ရက်က ရန်ကုန်တိုင်းဒေသကြီး လွှတ်တော်မှာ လွှတ်တော်ကိုယ်စားလှယ်တစ်ဦးက မေးခွန်းမေးမြန်းခဲ့ပါတယ်။ ဒီမေးခွန်းကို ရန်ကုန်မြို့တော်ဝန် ဦးမောင်မောင်စိုးက ပြန်လည်ဖြေကြားရာမှာ ၂၀၁၇ ဇန်န၀ါရီ ၁ ရက်ကနေ စက်တင်ဘာ ၅ ရက်အထိ ထိန်းသိမ်းထားသူ ၉၆၄ ဦး ရှိတယ်လို့ ပါရှိပါတယ်။ ဒီလို တောင်းရမ်းစားသောက်သူတွေနဲ့ လမ်းပျော်ကလေး ပပျောက်ရေးစီမံချက်ကို ၁၉၉၅ ခုနစ်လောက်က စတင်ဆောင်ရွက်ခဲ့ပေမယ့် လက်ရှိအချိန်အထိ ပပျောက်သွားခြင်းမရှိတာကို တွေ့ရှိနေရပါတယ်။ ဒီကိစ္စနဲ့ ပတ်သက်လို့ လူမှုဝန်ထမ်းဦးစီးဌာနမှ ဒုတိယညွှန်ကြားရေးမှူးချုပ် ဦးမျိုးဆက်အောင်နဲ့ တွေ့ဆုံမေးမြန်းခဲ့သမျှထဲက တချို့ကို ကောက်နုတ်ဖော်ပြလိုက်ရပါတယ်။

“လှိုင်သာယာဘက်မှာ မော်တာစက်ငါးလုံး၊ အပ်ချုပ်စက် ၁၀ လုံး ထောင်ထားပေးပြီးတော့ သင်ချင်တဲ့သူလာသင်၊ Street Children အမေ၊ အဖေတွေ လာသင်ပြီးရင် ငွေထောက်ပံ့ပေးမယ်ဆိုပြီး ပြောထားပေမယ့် အခုထိကို မပေါ်လာကြသေးဘူး”

မေး ။ ဆရာတို့ဌာနအနေနဲ့ လမ်းပေါ်က မိဘရှိတဲ့ ကလေးနဲ့မိဘမဲ့ ကလေးတွေကို ဘယ်လိုမျိုးခွဲခြားပြီး စောင့်ရှောက်မှုပေးတယ်ဆိုတာကို သိချင်ပါတယ်။

 

ဖြေ ။ လမ်းပေါ်က ကလေးတွေမှာ တချို့က မိဘရှိတယ်။ မိဘက ပြန်လာခေါ်တဲ့အခါ အထောက်အထားပြည့်စုံရင် ပြန်ပေးလိုက်တယ်။ မိဘမရှိတဲ့ ကလေးဆိုရင် မိဘမဲ့အဖြစ်နဲ့ ကျွန်တော်တို့ဌာနက စောင့်ရှောက်တယ်။  မိဘမဲ့ကျောင်းက သပ်သပ်ရှိတယ်။ ကလေးပြုစုရေး ဌာနကတော့ ၁၀ နှစ်အထိ လက်ခံတယ်။ ၁၀ နှစ်အထက်နဲ့ ၁၈ နှစ် ကြားမှာ မိန်းကလေးနဲ့ ယောက်ျားလေး သပ်သပ်စီခွဲထားတယ်။ အမှုမရှိတဲ့ ကလေးဆိုရင် သူနေချင်တဲ့ကျောင်းမှာ နေလို့ရအောင် လုပ်ပေးတယ်။ တချို့ ကလေးတွေကျတော့ ကျောင်းမှာမနေချင်ဘူး။ သူ့မိဘ ဆွေမျိုးတွေဆီ ပြန်မယ်ဆိုတဲ့အခါကျတော့ ပြန့်ပို့ပေးတယ်။ အဲဒီလို ပြန်လွှတ်တဲ့အခါမှာ လိုက်စစ်ဆေးတဲ့ သူတစ်ယောက်ကို ကျွန်တော်တို့က လွှတ်လိုက်တယ်။ မိဘတကယ်ရှိသလား။ ဆွေမျိုးတွေက ညာပြောနေသလား။ ဒါမှမဟုတ် ခိုင်းစားဖို့လား။ ဒီလို သေချာမေးမြန်းစုံစမ်းပြီး သေချာမှ ထည့်ပေးလိုက်တယ်။ မိဘတွေအနေနဲ့ ပြန်လာခေါ်တဲ့အခါမှာ ကလေးရဲ့ မိဘမှန်ကန်ကြောင်း ရပ်ကွက်ထောက်ခံစာပါရမယ်။ သန်းခေါင်စာရင်းပါမယ် မှတ်ပုံတင်ပါရမယ်။ အဲဒီလို အထောက်အထားတွေကို ပြနိုင်မှ ကလေးမိဘ အစစ်အမှန်ဆို ပြန်ပေးလိုက်တယ်။

■မေး ။ ၁၉၉၅ ခုနှစ်ကတည်းက တောင်းရမ်းစားသောက်သူတွေနဲ့ လမ်းပျော်ကလေး ပပျောက်ရေး စီမံချက်ချပြီး ဖမ်းဆီးထိန်းသိမ်းမှုတွေ ပြုလုပ်နေပေမယ့်လည်း ဒီနေ့အချိန်အထိ ပျောက်ကွယ်သွားခြင်း မရှိတဲ့အပေါ်မှာ ဆရာ့အနေနဲ့ ဘာများပြောချင်ပါသလဲ။

■ဖြေ ။ တချို့ ကလေးတွေက အလွယ်သိပ်လိုက်တာ။ လမ်းပေါ်မှာနေပြီး ဖုန်းခိုးလိုက်ရင် တစ်သောင်းရမယ်။ မုန့်တွေ လျှောက်စားမယ်။ အဲဒါကို သူတို့က ပျော်နေတာတွေ ရှိတယ်။ ကိုယ့်ရှေ့ရေးကို မတွေးဘူးပေါ့နော်။ သူတို့ ဘ၀ရှေ့ရေးကကြာရင် သူတောင်းစားဖြစ်မယ်။ ကြာရင် လူဆိုးလူမိုက်ဖြစ်လာမယ်ဆိုပြီး ကျွန်တော်တို့က အမျိုးမျိုး နားချပေမယ့် တချို့ကလေးက မရဘူး။ အဲဒါ သူ့တို့ရဲ့ လူနေမှုအ ကျင့်စရိုက်နဲ့ သူတို့ရဲ့ မိဘတွေအပေါ်မှာ မူတည်တယ်။ တချို့ မိဘတွေက ပြန်ခေါ်သွားပြီးတော့ ကျောင်းလည်း မထားဘဲနဲ့ ပြန်တောင်းစားခိုင်းတာတွေ ရှိတယ်။ အဓိက အကြောင်းရင်းကတော့ ဆင်းရဲမွဲတေမှုပဲ။ နိုင်ငံတော်ကတော့ အကုန်လုံးကို ထိန်းသိမ်းစောင့်ရှောက်နိုင်တာ မရှိဘူး။ တချို့မိဘတွေက သားသမီးတွေကို တောင်းရမ်းခိုင်းပြီး ဝေစုခွဲယူတာတွေလည်း ရှိတယ်။ ဒါတွေက မိဘအရင်းတွေနော်။ ကျွန်တော်တို့နဲ့ တွေ့ရင်တော့ ကျွန်မတို့ မတောင်းစားခိုင်းတော့ပါဘူးဆိုပြီး ပြောပေမယ့် ကျွန်တော်တို့ ပြန်စုံစမ်းကြည့်တဲ့အခါမှာ ကလေးက ဒီအလုပ်ကို လုပ်နေတာတွေ တွေ့ရတယ်။ ဒီလိုသူတို့ရဲ့ အကျင့်စရိုက်တွေကို မဖျောက်လို့ရှိရင် ကျွန်တော်တို့က ဘာမှ လုပ်ပေးလို့ မရဘူး။ သူတို့ မိဘတွေအပေါ်မှာ မူတည်သလို ဘယ်လောက်ပဲ သွန်သင်ဆုံးမပြော ဆိုနေပေမယ့် သူတို့အပေါ်မှာပဲ မူတည်တယ်။ တချို့ဆို မနေဘူး။ ဒီအဆောင်မှာ မနေဘူး။ ကျွန်တော်တို့ ပြန်မယ်။ ဘာဖြစ်ဖြစ် ပြန်မယ်ဆိုပြီး နောက်တော့ ဖုန်းပြန်ခိုးတဲ့ ဘ၀ကို ရောက်သွားရော။ ကိုယ်ကျင့်တရားကို ကောင်းအောင် ပြုပြင်ပေးတာတွေတော့ ရှိတာပေါ့။ ကလေး ၁၀၀ မှာ လေး၊ ငါး၊ ခြောက်ယောက်ပဲ လမ်းကြောင်းတည့်တည့်ကို ရောက်သွားတယ်။ ဘာကြောင့်လဲဆိုတော့ သူတို့ အကျင့်စရိုက်ကို ပြောင်းပေးပြုပြင်ပေးပေမယ့် သူတို့မိဘတွေ ကိုယ်တိုင်က အဲဒီစိတ် ဓာတ်မရှိဘူး။ အဲဒီလို မိဘတွေကို အသိပညာပေး ခေါ်ပြောပေမယ့် ရလားဆိုတော့ မရဘူး။ ခွေးမြီး ကောက်ခြေထောက်စွပ်ပဲ။ ကျွန်တော်တို့ဆီမှာ INGO  ရှစ်ဖွဲ့ရှိတယ်။ အဲဒီအဖွဲ့တွေနဲ့ ကျွန်တော်တို့ ပူးပေါင်းပြီး လုပ်တာပဲ။ အဲဒီလို လုပ်တဲ့အခါမှာ ဘာဖြစ်လာလဲဆိုတော့ ကျွန်တော်တို့နိုင်ငံမှာ ကလေးတွေရဲ့ စိတ်ဓာတ်ကို ဆင်းရဲလို့ဆိုတဲ့ အကြောင်းတစ်ခုနဲ့ မဟုတ်ဘဲ တချို့ယောက်ျားတွေက မိန်းမတွေ ထပ်ယူ၊ တစ်ချို့ မိန်းမတွေက ယောက်ျားတွေ ထပ်ယူပြီး ကလေးတွေရဲ့ ဘ၀ကို မပြုစုဘဲနဲ့ လုပ်နေတဲ့အတွက် ကလေးတွေ ဘ၀ပျက်စီးသွားတာတွေ အများကြီးရှိတယ်။ ကျွန်တော်တို့ကျောင်းမှာ ထားတယ်ဆိုတာကမတူဘူး။ တကယ်တမ်းကျ လုံခြုံတယ်။ သူ့ဘ၀တိုး တက်ဖို့က မိဘမေတ္တာက ပိုအရေးကြီးတယ်။ သူက မိဘမေတ္တာကို မရတဲ့အခါမှာ ကျောင်းမှာ မထားချင်ပေမယ့်လည်း သင်တန်းကျောင်းကို ပို့ရတာရှိတယ်။

 

■မေး ။ တချို့ မိဘရှိတဲ့ ကလေးတွေကို မိဘတွေက ဆရာ့တို့ဆီကနေ ပြန်ခေါ်သွားပြီး ပြန်တောင်းစား ခိုင်းနေတာတွေ ရှိတယ်လို့လည်း သိရပါတယ်။ ဒီအပေါ်မှာ ဆရာ့အနေနဲ့ ကလေးမိဘတွေကို ဘာများပြောချင်ပါသလဲ။

■ဖြေ ။ နာနတ်တောစခန်းမှာ မိဘတွေက ကလေးတွေကို ပြန်လာခေါ်တယ်။ လာခေါ်ရင် ကျွန်တော်တို့က မေးရတယ်။ ခင်ဗျားကလေးကို ပြန်ခေါ်ပြီးသွားရင် ပြန်မတောင်းစားခိုင်းနဲ့ ကလေးဘ၀အတွက် ဘာမှ မတိုးတက်ဘူး။ အဲဒီလိုပြောရင် ကျွန်တော်တို့ ရှေ့မှာတော့ မတောင်းစားခိုင်းတော့ပါဘူး ဆိုပေမယ့်လို့ ပြန်တောင်းစားခိုင်းတာပါပဲ။ ငွေရလိုမှုကို ဦးတည်တာပါပဲ။ အဲဒီလို ကျွန်တော်တို့က ဘယ်လောက်ပြောပြော ကျွန်တော်တို့ မျက်စိအောက်က ပျောက်သွားတာနဲ့ အရင်အတိုင်း ပြန်လုပ်ခိုင်းတာပဲ။ သူတို့ကို စက်ချုပ်သင်မလား။ လာခဲ့ကျွန်တော်တို့ သင်ပေးမယ်။ တတ်ပြီဆိုရင် စက်ခေါင်းတစ်လုံးပါ အလကားပေးလိုက်မယ်။ သင်တန်းလာတက်လို့တတ်ပြီဆို သူတို့နေတဲ့နေရာမှာ ကျွန်တော်တို့ကှု NGO တွေနဲ့ ပေါင်းပြီးဆိုင်တည်ပေးတာပေါ့။ ဒါပေမဲ့ သူတို့က တစ်လလောက် လုပ်ပြီးလို့ရှိရင် သွားကြည့်တဲ့အခါ မရှိတော့ဘူး။ အဲဒီတော့ စက်ရှိနေရင် သားသမီးတွေအတွက် ကောင်းအောင်လုပ်ကျွေးမယ်ဆိုတဲ့ စိတ်ဓာတ်နည်းသွားတယ်။ အခုဆိုရင် လှိုင်သာယာဘက်မှာ မော်တာစက်ငါးလုံး၊ အပ်ချုပ်စက် ၁၀ လုံး ထောင်ထားပေးပြီးတော့ သင်ချင်တဲ့သူလာသင်၊ Street Children အမေ၊ အဖေတွေ လာသင်ပြီးရင် ငွေထောက်ပံ့ ပေးမယ်ဆိုပြီး ပြောထားပေမယ့် အခုထိကို မပေါ်လာကြသေးဘူး။ အဓိကကတော့ ငွေကို အလွယ်လို ချင်ကြတာပေါ့။ နာနတ်တောကို သုံးလေးကြိမ် ပြန်ရောက်ဖူးတဲ့ ကလေးရှိတယ်။ သူတို့ကို မေးကြည့်တော့ ဖုန်းခိုးရတာ လွယ်တယ်တဲ့။ ပြန်ရောင်းရင် တစ်သောင်းရတော့ သူတို့အတွက် တစ်နေ့စရိတ်က အေးဆေးပေါ့။ အဲဒီလိုစိတ်ဓာတ်တွေ ပြင်အောင်လို့ ကျွန်တော်တို့က သူတို့ရှိတဲ့နေရာတွေ သွားပြီး စာသင်ပေးတာတွေ မုန့်ကျွေးတာတွေ လုပ်ပေမယ့် သူတို့ရဲ့ ပင်ကိုစိတ်က မပြောင်းဘူး။

 

■မေး ။ ကလေးသူငယ် ဥပဒေပုဒ်မ ၆၅ နဲ့ ၆၆ မှာ ကလေးသူငယ်တွေကို တောင်းရမ်းစားသောက်ဖို့ ခိုင်းစေရင် ထောင်ဒဏ်နှစ်နှစ်၊ ငွေဒဏ်ကျပ်တစ်သောင်းနဲ့ ဒဏ်နှစ်ရပ်လုံး ချမှတ်နိုင်တယ်လို့ ပြဋ္ဌာန်းထားတာရှိပါတယ်။ ဒါကြောင့် ကလေးသူငယ် တောင်းရမ်းခိုင်းနေတဲ့ သူတွေကို ဆရာတို့အနေနဲ့ အမှုဖွင့်တာတို့ အရေးယူဆောင်ရွက်ထားတာတို့များ ရှိသလား ဆိုတာကို သိချင်ပါတယ်။

■ဖြေ ။  ခိုင်မာအောင် အမှုတည်ဆောက်မယ်ဆိုလို့ရှိရင် ကလေးကလည်း ကျွန်တော့်ကို ခိုင်းစားနေပါတယ်လို့ ထွက်ဆိုပေးရင် အမှုက ခိုင်မာတာပေါ့။ အဲဒီလိုတွေ မပြောတဲ့အတွက်လည်း အမှုက မခိုင်မာဘူး။ သူ့အမေအဖေကို ထောင်ချလိုက်ပြီဆိုရင် ကလေးကို ဘယ်သူထိန်းမလဲ။ ပိုဆိုးသွားမှာလည်း ကျွန်တော်တို့က စိုးရိမ်တယ်။ ကလေးရဲ့ အကောင်းဆုံး အကျိုးစီးပွားကို ဆောင်ရွက်နိုင်တာ သူ့အဖေနဲ့ အမေပဲ။ တစ်ခါတလေကျရင် တအားစဉ်းစားရတယ်။ ကလေးရဲ့အဖေနဲ့ အမေကို ဖမ်းလိုက်လို့ရှိရင် ထောင်နှစ်နှစ်ကျသွားမယ်။ အဲဒီနှစ်နှစ် အတွင်းမှာ ကလေးကိုဘယ်လို လုပ်မလဲ။ အဖေနဲ့ အမေက ပြန်ထွက်လာလို့ ပြုပြင်ရင် ကောင်းတယ်။ မပြုပြင်ဘူးဆို အရင်အတိုင်းပဲ။ အဲဒီတော့ နည်းလမ်းက ရှာလေခက်လေ။ ဘယ်လို ဖြေရှင်းရမလဲဆိုပြီး အသိပညာပေးတာတွေ လုပ်တာပဲ။ ပြောတုန်းခဏပဲ။ နောက်တော့ ဘာမှမထူးဘူး။ ရန်ကုန်တိုင်းမှာ ကလေးငယ်တွေကို တောင်းရမ်းခိုင်းစေတာတွေနဲ့ ပတ်သက်လို့ ပြောဆိုဆုံးမတာတော့ ရှိတယ်။ အမှုဖွင့် အရေးယူတဲ့အထိတော့ မရှိသေးဘူး။

 

■မေး ။ ဒီလို ကလေးသူငယ်တွေကို တောင်းရမ်းခိုင်းစေတာတွေ ပပျောက်ဖို့ဆိုရင် အဓိက ထိထိရောက်ရောက် လုပ်ဆောင်ရမယ့် အချက်တွေက ဘာတွေဖြစ်မယ်လို့ ဆရာ့အနေနဲ့ ပြောချင်ပါသလဲ။

■ဖြေ ။ အတွေးအခေါ်တွေကို ပြောင်းလဲပစ်ရမယ်။ ကလေးတွေရဲ့ မိဘတွေကို အလုပ်အကိုင်ရှာဖွေ ပေးပြီးတော့ မိဘတွေရဲ့ အတွေးအခေါ်ကိုလည်း ပြောင်းလဲပစ်ရမယ်။ ပတ်ဝန်းကျင်ရဲ့ အတွေးအခေါ်ကိုလည်း ချိန်းရမယ်။ ညီအစ်ကို မောင်နှမတွေရဲ့ အတွေးအခေါ်တွေကိုလည်း ချိန်းရမယ်။ အတွေးအခေါ် ပြောင်းလဲပစ်ရမယ့်အပြင်ကို အမြဲတမ်း စစ်ဆေးတာတွေလည်း လုပ်ရမယ်။ ဒါပေမဲ့ ကျွန်တော်တို့မှာ အင်အားမရှိဘူး။

 

■မေး ။  ဒီလို တောင်းရမ်းနေတဲ့ လမ်းပျော် ကလေးတွေရဲ့ ဘ၀တွေကို ပပျောက်အောင် မလုပ်နိုင်ဘူးဆိုရင် နောင်ဖြစ်လာမယ့် ဆိုးကျိုးတွေက ဘာတွေဖြစ်လိမ့်မယ်လို့ ဆရာ့အနေနဲ့ ယူဆပါသလဲ။

■ဖြေ ။ အဲဒါကို ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းကလည်း ပြောဖူးတယ်။ တစ်ချိန်ကျရင် ဒီကလေးတွေကို ငယ်ငယ်ကတည်းက မပြုပြင်ဘူးဆိုရင် ကြီးလာတဲ့အခါမှာ သူတောင်းစား ဟုတ်ရင်ဟုတ်၊ ဒါမှမဟုတ် ခိုးဆိုးမိုက်ရိုင်းတဲ့ လူမိုက်တွေ ဖြစ်သွားနိုင်တယ်။ အဲဒီတော့ Street Children  စီမံကိန်းကို လုပ်မယ်ဆိုပြီးတော့ စီစဉ်ကြတယ်။ ဒါပေမဲ့ ကျွန်တော်တို့ အသေးစား သုတေသနလုပ်တဲ့အခါမှာ အတော်လုပ်ယူရတယ်။ တိုင်းတစ်တိုင်းလုံးအနေနဲ့တော့ မဖြစ်နိုင်သေးဘူး။ ၀န်ကြီးချုပ်ကလည်း ခဏဆိုင်းငံ့ပြီး ကြည့်နေတာ။ အသေးလေးကိုတောင် လုပ်လို့ မနိုင်ဘူး။ NGO တွေနဲ့ ပေါင်းပြီးတော့ ဒီကလေးတွေကို မှတ်တမ်းယူ၊ သုတေသနလုပ်ပြီး အမျိုးအစားတွေခွဲခြား အဲဒါတွေကို လုပ်ပြီးပြီ။ ဒါပေမဲ့ ငွေအင်အား၊ လူအင်အား၊ တတ်ကျွမ်းနားလည်တဲ့ ၀န်ထမ်းအင်အားရှိမှ အသေးလေးကနေ အကြီးကြီးကို ကူးနိုင်မှာ။ ဒါပေမဲ့ ကြိုးစားပြီးတော့ လုပ်ရမှာပဲ။

 

■မေး ။ ရန်ကုန်တိုင်းဒေသကြီးအတွင်းမှာ လမ်းပေါ်ကလေး စုစုပေါင်း ဘယ်လောက်ရှိပြီး ဘယ်မြို့နယ်တွေက အများဆုံးဖြစ်မလဲ ဆရာ။

■ဖြေ ။ ရန်ကုန်တိုင်းဒေသကြီးမှာ လမ်းပျော်ကလေး အရေအတွက်က အကြမ်းဖျင်း ၁၅၀၀ လောက်ရှိတယ်။ မြို့နယ် ၄၅ မြို့နယ်မှာ တခြားဒေသကနေ ပြောင်းလာတာတွေလည်း ရှိတယ်။ အဲဒီလူတွေပါ ရောထွေးနေတာ။ ရန်ကုန်တိုင်းကချည်းပဲ မဟုတ်ဘူး။ အဲဒီ ၄၅ မြို့ နယ်ထဲမှာ လမ်းပျော်ကလေး အများဆုံးရှိတဲ့နေရာတွေက လှိုင်သာယာ၊ ဒလ၊ ရွှေပြည်သာ အဲဒီ သုံးမြို့ နယ်မှာတော့ အများဆုံးပဲ။ လမ်းပျော်ကလေး အရေအတွက်မှာ ယောက်ျားလေးများတယ်။ ဒီစာရင်းက ကျွန်တော်တို့ သုတေသနလုပ်ပြီး ရတဲ့စာရင်းပါ။

 

■မေး  ။  အခုလို မေးမြန်းခဲ့တဲ့အပေါ်မှာ ဆရာ့အနေနဲ့ ဘာများဖြည့်စွက် ပြောချင်တာ ရှိပါသလဲ။

■ဖြေ ။ အကုန်လုံးပပျောက်ဖို့ဆိုတာ ကျွန်တော်တို့ လူမှုဝန်ထမ်းဦးစီးဌာနတစ်ခုတည်းက လုပ်လို့မရဘူး။ အကုန်ဝိုင်းလုပ်မှရမှာ။ အဲဒါကြောင့်မို့လို့ အကုန်လုံးက ကလေးတွေ ကောင်းစားဖို့အတွက် ၀ိုင်းလုပ်ပေးကြပါလို့ ပြောချင်ပါတယ်။

ဒါရိုက်တာ ညီညီထွန်းလွင်နှင့် တွေ့ဆုံခြင်း

ပရိသတ်ကြိုက်နှစ်သက်တဲ့ ဇာတ်ကားတွေကို ရိုက်ကူးဖန်တီးနိုင်ခဲ့တဲ့ ဒါရိုက်တာတွေထဲမှာ ဒါရိုက်တာညီညီထွန်းလွင်ကလည်း ထင်ရှားတဲ့သူတစ်ဦးပါ။ အနုပညာနယ်ပယ်မှာ နှစ်ကာလများစွာ အောင်မြင်မှု တွေနဲ့ရပ်တည်နိုင်ခဲ့တဲ့ ဒါရိုက်တာ ညီညီထွန်းလွင်က ခုနောက်ပိုင်းမှာတော့ အသက်အရွယ်အရ ဇာတ်ကားရိုက်ကူးမှုတွေကို လုံးဝနီးပါး လျော့ချခဲ့သူလည်း ဖြစ်ပါတယ်။ ဇာတ်ကားရိုက်ကူးမှုတွေ နားတော့မယ်လို့ ဆုံးဖြတ်ပြီးချိန်မှာတော့ သူဖန်တီးချင်တဲ့ ဇာတ်လမ်းတွေ၊ သူရိုက်ချင်တဲ့ဇာတ်လမ်းတွေ၊ သူ့ဘ၀အတွက် အမှတ်တရဖြစ်စေမယ့် ဇာတ်လမ်းတွေကို လွန်ခဲ့တဲ့ သုံးနှစ်ဝန်းကျင်ကစပြီး ရိုက်ကူးခဲ့သူပါ။ အဲဒီအချိန်တုန်းက ရိုက်ကူးခဲ့တဲ့ ရုပ်ရှင်ဇာတ်ကားတွေထဲမှာ တစ်ကားအပါအ၀င်ဖြစ်ခဲ့တဲ့ ‘အော်တိုဘုရင်’ ရုပ်ရှင်ဇာတ်ကားကို အောက်တိုဘာ ၂၀ ရက်ကစပြီး မြန်မာနိုင်ငံတစ်ဝန်းက ရုပ်ရှင်ရုံတွေမှာ ရုံတင်ပြသတော့မှာပါ။ လက်ရှိမှာ မြန်မာနိုင်ငံရုပ်ရှင်အစည်းအရုံးရဲ့ အဖွဲ့ဝင်တစ်ဦးအဖြစ် တာဝန်ထမ်းဆောင်နေသလို ဇာတ်ကား နမူနတင်ကတည်းက ပရိသတ်တွေရဲ့စိတ်ဝင်စားမှု အများကြီးရရှိခဲ့တဲ့ ‘အော်တိုဘုရင်’ ဇာတ်ကားနဲ့ပတ်သက်ပြီး ဖန်တီးသူဖြစ်တဲ့ ဒါရိုက်တာ ညီညီထွန်းလွင်နဲ့တွေ့ဆုံခိုက် မေးမြန်းဖြစ်ခဲ့တာတွေကို ဖော်ပြလိုက်ပါတယ် . . .

 

■ မေး- အော်တိုဘုရင် ရုပ်ရှင်ဇာတ်ကားကို ရိုက်ကူးဖြစ်ခဲ့တဲ့အကြောင်းလေးကို အရင်သိပါရစေ။

ဖြေ – ဦးညီအနေနဲ့ ဇာတ်ကားရိုက်ကူးမှုတွေ အနုပညာအလုပ်တွေကနေ နားတော့မယ်လို့ ဆုံးဖြတ်တဲ့အချိန်မှာ အပျင်းပြေ အပျော်ကြည့်အနေနဲ့ မဟုတ်ဘဲ အမှတ်တရဖြစ်စရာ ဇာတ်လမ်းလေးတွေ ရိုက်မယ် စဉ်းစားမိတယ်။ ဒီအော်တိုဘုရင်ကလည်း အဲဒီလို စိတ်ကူးနဲ့ရိုက်တယ်။ ဇာတ်သမားပြန်ရင် မှတ်သမားစရာ ကျန်ရမယ်ဆိုတာမျိုး၊ ခေတ်နဲ့စနစ်ကို သရော်ပြီးတော့ ပုံဖော် ရိုက်ကူးထားတယ်။ ရုပ်ရှင်တစ်ကားကို အပျော်ကြည့် အပျင်းပြေတစ်ခုနဲ့တင် ပြီးမသွားဘဲ ပရိသတ်ကို တစ်ခုခုပေးနိုင်တဲ့ ဇာတ်ကားမျိုးဖြစ်ချင်တယ်။ ဒီ ဇာတ်ကားဆိုမှာဆိုရင်လည်း နိုင်ငံရေးနဲ့ပတ်သက်တဲ့ အကြောင်းအရာတွေ ကိုသရော်ပြီး ရိုက်ကူးထားတယ်။  နိုင်ငံရေးနဲ့ပတ်သက်ပြီး ပိုပြီးစိတ်ဝင်စားစေချင်တာရယ် စကားလုံးတွေကတစ်ဆင့် နိုင်ငံရေးအကြောင်းအရာတွေကို သရော်ထားတယ်။

■ မေး – နိုင်ငံရေးနဲ့ပတ်သက်တဲ့ အကြောင်းအရာတွေကို သရော်ရိုက်ကူးဖို့အတွက် ဒီဇာတ်လမ်းကိုရွေးချယ်ဖြစ်ခဲ့တာလား ကိုယ်ရိုက်ချင်တဲ့ အကြောင်းအရာတွေကိုတည်ပြီးတော့မှ ဒီဇာတ်လမ်းကို ရွေးခဲ့တာမျိုးလား။

ဖြေ – ဇာတ်လမ်းကိုပဲ အရင်ရွေးတာပါ။ ပြီးတော့ နဂါးနိုင်မင်း ပေါက်ကျိုင်းဆိုတာက သူ့ဇာတ်လမ်းနဲ့ သူရှိပြီးသားလေ။ ဒါကိုပဲ ဦးညီတို့က ကိုယ်လိုချင်တဲ့ အပိုင်းလေးတွေကို ချဲ့ယူတာမျိုးပါပဲ။ ကိုယ်ပြောချင်တဲ့ နိုင်ငံရေးသရော် ဇာတ်ကွက်တွေကို ဇာတ်လမ်းထဲကိုဝင်အောင်ထည့်ပြီး ရိုက်ကူးခဲ့တာပါ။

■ မေး – ‘အော်တိုဘုရင်’ ရုပ်ရှင်ရိုက်ကူးဖို့အတွက် ပြင်ဆင်ခဲ့ရတာတွေရှိရင်လည်း သိချင်ပါတယ်။

ဖြေ – ဒီဇာတ်ကားမရိုက်ခင်မှာ ဂျာနယ်တွေ၊ သတင်းစာတွေ၊ ဆောင်းပါးတွေ၊ ကာတွန်းတွေဖတ်ပြီး ခေတ်နဲ့စနစ်ကို ထင်ဟပ်နိုင်မယ့် အကြောင်းအရာတွေ သရော်ဟာသအနေနဲ့ လုပ်နိုင်မယ့်အချက်အလက်တွေကို ရှာဖွေစုဆောင်းရတယ်။ အဲဒီလိုရှာဖွေထားတာကို ဒီဇာတ်လမ်းမှာ ဖြည့်စွက်လိုက်တာမျိုးပါပဲ။ အဲဒီလို ဖြည့်စွက်တင်ပြလို့ရမယ့် ဇာတ်လမ်းမျိုးဖြစ်လို့လဲ ပေါက်ကျိုင်းဇာတ်ကို ရွေးချယ်ဖြစ်ခဲ့တာ။

■ မေး – ဟိုးအရင်တုန်းကလည်း ဒီလို ပေါက်ကျိုင်းဇာတ်မျိုးကို ရိုက်ခဲ့ဖူးတယ်ဆိုတော့ အဲဒီဇာတ်ကားနဲ့ အော်တိုဘုရင် ဇာတ်ကား ဘာတွေကွာခြားသွားမလဲ။

ဖြေ – ဟိုးအရင် ဗီဒီယိုခေတ်တုန်းက မော့စ်နဲ့ ခေတ်သစ်ပေါက်ကျိုင်းဆိုပြီး ရိုက်ကူးခဲ့တယ်။ အဲဒီဇာတ်ကားက ခွေငှားဆိုင်တွေ အတော်များများမှာ ဈေးကြီးတင်ပြီး ခိုးဝှက် ငှားကြည့်ရတဲ့ ဇာတ်ကားဖြစ်ခဲ့သလို ဦးညီ ကိုယ်တိုင်လည်း စစ်ဆေးမေးမြန်းတာတွေ ခံခဲ့ရတယ်။ အဲဒီတုန်းကလည်း ခေတ်နဲ့စနစ်ကို သရော်နိုင်မယ့်အကြောင်းအရာလေးတွေထည့်ပြီး ရိုက်ခဲ့တာပါပဲ။ အော်တို ဘုရင်ဇာတ်ကားမှာတော့ အရင်ကထက်ပိုပြီး လွတ်လွတ်လပ်လပ် တင်ပြနိုင်တဲ့ အနေအထားမျိုးဖြစ်လာသလို ဒီဘက်ခေတ်ရဲ့ အနေအထားတွေ အခြေအနေတွေကိုလည်း ထင်ဟပ်နိုင်အောင် ကြိုးစားထားတယ်။

■ မေး – အရင်ကထက်ပိုပြီး လွတ်လွတ်လပ်လပ် ဖန်တီးလာနိုင်တဲ့ ဒီအော်တိုဘုရင် ဇာတ်ကားအတွက် ဆင်ဆာ အခက်အခဲတွေလည်း ရှိခဲ့တယ်ဆိုတော့ ဆင်ဆာမှာ ကြုံရတဲ့အခက်အခဲတွေကိုလည်း ပြောပြပေးပါဦး။

ဖြေ – အော်တိုဘုရင် ဇာတ်ကားမှာလည်း ဆင်ဆာက ဖြတ်ခိုင်းတာတွေများခဲ့တယ်။ ကိုယ့်ဘက်ကလည်း ဖြတ်နိုင်တာလေးတွေ ဖြတ်ပေးပြီး တချို့ဇာတ်ဝင်ခန်းတွေကတော့ ဇာတ်လမ်းကို ထိခိုက်ပျက်ဆီးစေနိုင်တာမျိုးတွေ ကြုံနိုင်တဲ့အတွက် ပြန်ပြီးစောဒကတက်တဲ့နည်းနဲ့  ပြန်ညှိနှိုင်းပြီး ဆွေးနွေးရတာလေးတွေ ရှိပါတယ်။ ဒီဇာတ်ကားက တစ်ကားလုံးနီးပါးက အန်နီးမေးရှင်းတွေပါတဲ့အခါ ဆင်ဆာဖြတ်ခံရရင် အဲဒီ ကွန်ပျူတာ အထူးပြုလုပ်ချက်တွေပါ အကုန်ပြန်လုပ်ရတာမျိုးတွေ ကျတော့လည်း အဆင်မပြေဖြစ်တာတွေ ရှိတယ်။ ပထမပိုင်းတုန်းကတော့ ဆင်ဆာဖြတ်ခံရတဲ့အပိုင်းက တော်တော်များများရှိခဲ့တယ်။ ဇာတ်ဝင်ခန်းတစ်ခန်းလုံးကို ဖြတ်ပေးရ တာမျိုးတွေလည်းရှိတယ်။ ဒါပေမဲ့ ကိုယ့်ဘက်ကစောဒက ပြန်တက်ပြီး ညှိရတာတွေရှိတယ်။ အတော်များများကတော့ ပြန်ပြီးအဆင်ပြေခဲ့ပါတယ်။

■ မေး – ဒီဇာတ်ကား ရိုက်ကူးတုန်းက ကြုံရတဲ့အခက်အခဲတွေ အမှတ်တရတွေကိုလည်း ပြောပြပေးပါဦး။

ဖြေ – ပေါက်ကျိုင်းက ပါးစပ်ရာဇ၀င်တစ်ခုဖြစ်တဲ့အတွက်  ဒီ ဇာတ်မှာ ကျွန်တော်တို့က ဟာသအနေနဲ့ရော သရော်ပြီး ရိုက်ကူးမယ့် အကြောင်းအရာတွေအတွက်ပါ လွတ်လွတ်လပ်လပ် ဖန်တီးရိုက်ကူးခွင့်ရှိတဲ့ အပေါ်မှာ ဟာသအမြင်ဖြစ်အောင် နဂါးက လက်ပတ် နာရီပတ်တာမျိုး၊ အ၀တ်အစားဒီဇိုင်းကို အဆင်ပြေအောင်ပြင်ဆင်နိုင်တာမျိုးတွေရော စကားပြောမှာလည်း ခေတ်စကားတွေနဲ့ ထည့်ပြောတာတွေ လုပ်ထားတယ်။ နောက်ပြီး နဂါး ခေါင်းကိုဖြတ်ပြီး ယူသွားတဲ့ အခန်းဆိုရင်လည်း ဘုရားပွဲဈေးက နဂါးခေါင်းကိုထည့်သုံးပြီး စကားပြောနဲ့တင် ဟာသလုပ်ထားလိုက်တယ်။ ဒါကြောင့် ဒီဇာတ်ကားက ပရိသတ်တွေအတွက် အမြင်တစ်ခုတော့ ဆန်းနေမှာပါ။

■ မေး – ဒီဇာတ်ကားကို လာကြည့်မယ့် ပရိသတ်တွေကို ပြောချင်တဲ့စကားရှိရင်။

ဖြေ – ဒီဇာတ်ကားက ရိုက်ရိုးရိုက်စဉ် ပြရိုးပြစဉ်ထဲမှာ မပါတဲ့အတွက် ပရိသတ်တွေ ကြိုက်မှကြိုက်ပါ့မလားလို့ စိတ်ပူမိတာရှိတယ်။ ဒီ ဇာတ်ကားလေးကြည့်ရင် ပရိသတ်တွေရင်ထဲမှာ အမှတ်တရ အဖြစ်တွေ စကားလုံးလေးတွေပေါ်မှာ မှတ်သားမိတာ၊ ခံစားမှု ရသတွေတော့ ပေးစွမ်းနိုင်မှာပါ။

သစ်မင်းပရဟိတဆေးကုသရေးအဖွဲ့မှ ဒေါက်တာအောင်သူရနှင့် တွေ့ဆုံခြင်း

‘တချို့ရွာတွေမှာဆိုရင် ဆရာဝန်တွေကို မမြင်ဖူးတဲ့ ရွာတွေတောင် တွေ့ရတယ်’

မြန်မာနိုင်ငံအနှံ့ လှည့်ပတ်ကာ ဆေးကုပေးနေသည့် ရန်ကုန်အခြေစိုက် ပရဟိတအဖွဲ့တစ်ဖွဲ့ဖြစ်သော သစ်မင်းပရဟိတဆေးကုသရေးအဖွဲ့သည် ရခိုင်ပြည်နယ် ဘူးသီးတောင်မြို့သို့ ရောက်ရှိနေပြီး တစ်လကျော်ကြာ ဆေးကုပေးလျက်ရှိသည်။ ကျေးရွာများသို့လည်း ကွင်းဆင်းကာ ဒေသခံလူနာများအား ဆေးကုသပေးလျက်ရှိသည်။ အဆိုပါ ပရဟိတအဖွဲ့မှ ဒေါက်တာအောင်သူရနှင့်တွေ့ဆုံပြီး ဆေးကုသမှုပေးနေသည့် အခြေအနေများ၊ ကြုံတွေ့ရသည့် အခက်အခဲများနှင့် ဒေသခံများ၏ ကျန်းမာရေးအသိပညာ အခြေအနေများစသည်ဖြင့် မေးမြန်းဖြစ်ခဲ့သည်များကို ဖော်ပြအပ်ပါသည်။

■ မေး – ဆရာတို့ရဲ့ အဖွဲ့နာမည်နဲ့ ဘယ်လောက်ကြာပြီလဲဆိုတာ သိပါရစေ။

ဖြေ – သစ်မင်းပရဟိတ ဆေးကုသရေးအဖွဲ့၊ ရန်ကုန်ဖြစ်ပါတယ်။ ဒီကိုရောက်တာတစ်လကျော်ပြီ။ ဒီမှာဖြစ်ပြီးပြီးချင်းဆိုပါတော့။ ဒါပေမဲ့ သစ်မင်းအဖွဲ့မှာ ကျွန်တော်ဝင်ပြီးဆေးကုသပေးတာက သိပ်မကြာသေးဘူး။

■ မေး – အခုလို ဆေးကုသပေးဖို့ ရခိုင်ပြည်နယ်ကို ရောက်လာရတဲ့ အကြောင်းရင်းလေး သိပါရစေ။

ဖြေ – အဓိက,ကတော့ စိတ်ဓာတ်ပေါ့။ စေတနာနဲ့ လာရောက်ကုသပေးတာ ဖြစ်ပါတယ်။ ကျွန်တော်တို့အဖွဲ့အနေနဲ့ကလည်း ဒီလိုပဲ မြန်မာနိုင်ငံအနှံ့မှာ လိုအပ်တဲ့နေရာတွေကိုလိုက်ပြီး အခမဲ့ဆေးကုသပေးနေတာ ဖြစ်ပါတယ်။ စစ်ပွဲတွေဖြစ်တဲ့နေရာတွေ၊ ရေးဘေးဒုက္ခရောက်တဲ့ နေရာတွေကိုလည်းသွားပြီး ကုသပေးလေ့ ရှိပါတယ်။ ပညာရေးပိုင်းမှာလည်း ကူညီဆောင်ရွက်ပေးတာ ရှိပါတယ်။

■ မေး – ဘူးသီးတောင်မှာ ဆေးလာကုတဲ့အခါ ဒေသဆိုင်ရာ အာဏာပိုင်တွေနဲ့ ဒေသခံတွေက ကူညီပံ့ပိုးမှုတွေ ရှိပါသလား။

ဖြေ – ဒေသခံလူမှုအဖွဲ့အစည်းတွေကတော့ ကူညီပေးတာ ရှိပါတယ်။ လွှတ်တော်ကိုယ်စားလှယ်အဖွဲ့တွေက ကူညီပေးကြပါတယ်။ သူတို့က အစစအရာရာ ကူညီပေးကြတယ်။ တခြားသူတွေတော့ ကူညီပေးတာမရှိပါဘူး။

■ မေး – ကျေးရွာတွေကိုလည်း ကွင်းဆင်းပြီးဆေးကုသပေးတယ်။ ကယ်ဆယ်ရေးစခန်းတွေမှာလည်း ဆေးကုသပေးတယ်ဆိုတော့ အဓိကကြုံတွေ့ရတဲ့ အခက်အခဲက ဘာတွေရှိပါသလဲ။

ဖြေ – အဓိက,ကတော့ ဘာသာစကားပေါ့။ ဘာသာစကား အခက်အခဲရှိတယ်။ ကျေးရွာတွေကို ဆင်းတဲ့အချိန်မှာ သူတို့ပြောတာတွေ ကျွန်တော်က နားမလည်တော့ ဘာသာပြန်ပေးတဲ့လူတစ်ဦး ထားပေးရတယ်။ နောက်ပြီး လမ်းပန်းဆက်သွယ်ရေး မကောင်းတဲ့အတွက် သွားလာရေးခက်ခဲတယ်။ အဲဒါတွေပါပဲ။ ဒီအခက်အခဲတွေကို လူတိုင်းကြုံရမယ် ထင်ပါတယ်။ ကျန်တဲ့ကြီးမားတဲ့ အခက်အခဲတော့ မရှိပါဘူး။

■ မေး – ဆရာတို့အနေနဲ့ လူနာဘယ်လောက်ကို ဆေးကုသပေးနိုင်ခဲ့ပါလဲ။

ဖြေ – ကျွန်တော်ကတော့ နောက်တစ်ဖြတ်မှရောက်တာ။ ပထမအဖြတ်မှာ ဒေါက်တာ သန့်မင်းနဲ့ ဒေါက်တာသစ်လွင်တို့ လာသွားတယ်။ သူတို့ကလည်း ဆေးကုသပေးခဲ့တယ်။ သူတို့ ဘယ်နှယောက် ကုသပေးခဲ့လဲဆိုတာတော့ အသေးစိတ်မသိဘူး။ ကျွန်တော့်အနေနဲ့ ကုပေးတာရော အရင်ဆရာဝန်နှစ်ယောက် ကုပေးတာရောဆိုရင်တော့ လူနာနှစ်ထောင်ကျော်လောက်တော့ ရှိမယ်လို့ ခန့်မှန်းမိပါတယ်။

■ မေး – အဲဒီဒေသမှာ အဖြစ်များတဲ့ရောဂါက ဘာရောဂါဖြစ်တယ်လို့ တွေ့ရှိရပါသလဲ။ ဘာကြောင့်ဖြစ်တယ်လို့ တွေ့ရှိရပါသလဲ။

ဖြေ – အများဆုံးကတော့ အစာအိမ်နဲ့ အူလမ်းကြောင်းမှာဖြစ်တဲ့ ရောဂါကများတာ တွေ့ရပါတယ်။ ဘာဖြစ်လို့လဲဆိုတော့ သူတို့ရဲ့နေထိုင်မှု၊ အစားအသောက်တွေကြောင့်လည်း ဖြစ်မယ်ထင်တယ်။ အပူအစပ်တွေကို စားတဲ့အတွက် အဲဒီလို ဖြစ်တာလို့ထင်တယ်။ သက်ကြီးပိုင်းမှာကျတော့ သွေးတိုးတွေဖြစ်တာများတယ်။ နှလုံးရောဂါလည်း အနည်းငယ် တွေ့ရတယ်။

■ မေး – ကျေးလက်ဒေသခံတွေရဲ့ ကျန်းမာရေး စောင့်ရှောက်မှုအသိပညာ၊ တစ်ကိုယ်ရေသန့်ရှင်းမှု အသိပညာတွေ ဘယ်လောက်ရှိတယ်လို့ တွေ့ရပါသလဲ။

ဖြေ – ကျန်းမာရေး အသိပညာပိုင်းမှာတော့ အရမ်းအားနည်းတယ်။ သူတို့မသိကြဘူးပေါ့နော်။ အိမ်သာတက်တာကအစ သန့်ရှင်းအောင် ဘယ်လိုနေထိုင်ရမလဲဆိုတဲ့ အသိပညာ အားနည်းပါတယ်။ ဒါကြောင့် ကျန်းမာရေးပညာပေးလုပ်ငန်းတွေ တိုးမြှင့်လုပ်ဆောင်ပေးဖို့ လိုအပ်တယ်။ အဲဒီမှာကူးစက်ရောဂါနဲ့ မကူးစက်တဲ့ ရောဂါအကြောင်းတွေကို ရှင်းလင်းပြောကြားပေးဖို့ လိုတယ်။ ပြောရရင်တော့ အများကြီးပေါ့။ အခြေခံကအစ သင်ပြပေးဖို့လိုတယ်။ ဘာကြောင့်လဲဆိုတော့ သိထားတဲ့အချက်တွေက အတော်နည်းတယ်။

■ မေး – ဆရာတို့အဖွဲ့ရောက်သွားတော့ ပြည်သူတွေ ဘယ်လိုသဘောထားရှိတာ တွေ့ရပါလဲ။

ဖြေ – ၀မ်းသာအားရကြိုဆိုကြတာကို ခံရပါတယ်။ သူတို့ကလည်း အားကိုးတကြီးရှိလှတယ်။ ပျော်ကြတယ်။ အဲဒီပျော်ရွှင်မှုတွေကိုမြင်ရတော့ ကျွန်တော်တို့ပိုပြီးဝမ်းသာမိတယ်။ သူတို့လည်း အားရှိကြတယ်ပေါ့။ ဘာဖြစ်လို့လဲဆိုတော့ တချို့ရွာတွေမှာဆိုရင် ဆရာဝန်တွေကို မမြင်ဖူးတဲ့ရွာတွေတောင် တွေ့ရတယ်။ တစ်နေကုန် ထိုင်စောင့်နေကြသူတွေရှိသလို နှစ်ရက်လောက်ကြိုပြီး စောင့်နေကြသူတွေကိုလည်း တွေ့ရတယ်။ ကျွန်တော်တို့ ကုသပေးရကျိုးနပ်တာပေါ့။ ဆရာဝန်နဲ့ပြဖို့ မြို့ပေါ်ကိုတက်ပြီး ကုသမှုခံယူဖို့ဆိုတာကလည်း သူတို့အတွက် ၀န်ထုပ်ဝန်ပိုးလို ဖြစ်နေတယ်။ အဓိကတော့ ငွေကြေးချို့တဲ့သူတွေလည်းရှိနေတော့ ဆေးကုသမှု ခံယူဖို့ ခက်တာပေါ့။ အဲဒီမှာတချို့လူနာတွေကို ဆေးကုသမှုခံယူဖို့ ဆေးရုံကိုတင်ပို့ပေးရတာလည်း ရှိတယ်။ လိုအပ်တဲ့ ကုန်ကျစရိတ်ကို အလှူရှင်တွေက ကျခံပေးကြတာလည်း ရှိခဲ့တယ်။ ပြည်သူ့အိုးဝေဖောင်ဒေးရှင်းတို့၊ ဧရာဝတီဖောင်ဒေရှင်းတို့၊ စစ်တွေက ရခိုင်လူငယ်အဖွဲ့အစည်းတို့က ကူညီပေးကြတယ်။

■ မေး – ရခိုင်ပြည်နယ်အတွင်းမှာ အခုလိုမျိုးထွက်ပြေး တိမ်းရှောင်နေရတဲ့ တိုင်းရင်းသားတွေနဲ့ တွေ့ထိဆေးကုသပေးတဲ့အချိန်မှာ သူတို့ရဲ့စိတ်သဘောထားကို ဘယ်လိုတွေ့ရပါလဲ။

ဖြေ – သူတို့ရင်ထဲမှာရှိနေတာက ကြောက်စိတ်ဗျ။ သူတို့အနေနဲ့ ကြောက်စိတ်တွေဖြစ်သွားတယ်။ နောက်လည်း ဒါမျိုးဖြစ်မလား၊ ဒါမျိုးအကြမ်းဖက်တိုက်ခိုက်ခံရမှုတွေ ဖြစ်မလားဆိုတဲ့ ကြောက်စိတ်က ရှိနေသေးတယ်။ အခုဆို ပြန်တော့ပြန်သွားကြသူတွေ ရှိပေမယ့် တကယ်တော့မပြန်ရဲဘူး။ ကျွဲနွားတွေ၊ အိမ်တွေ၊ ပစ္စည်းတွေကျန်ခဲ့လို့သာ ပြန်ရတာဖြစ်တယ်လို့မြင်တယ်။ မပြန်ရဲလို့မပြန်ကြတဲ့ လူတွေလည်းရှိနေသေးတယ်။ အဓိက,ကတော့ သူတို့ကိုယ်သူတို့ လုံခြုံမှုရှိတယ်လို့ မခံစားရဘူး။

■ မေး – အခုလို ဆေးကုသပေးနေတဲ့အချိန်မျိုးမှာ ဖြစ်ပေါ်ခဲ့တဲ့ ဆရာရဲ့ခံစားချက်တွေကို ပြောပြပေးပါလား။

ဖြေ – ဆရာဝန်တစ်ယောက်ရဲ့ ခံစားချက်ဆိုရင်တော့ ဖြစ်နိုင်ရင်ဒီဒေသမှာ ခုတင် ၅၀၀ ဆံ့ဆေးရုံကြီးတွေ ဆောက်ပေးချင်တယ်။ ဖြစ်စေချင်တဲ့ဆန္ဒပေါ့။ ဒါပေမဲ့ ကျန်းမာရေး စောင့်ရှောက်မှုအပိုင်းမှာ အတော်လေး အားနည်းသေးတာကို တွေ့ရတဲ့အတွက် စိတ်ထဲတစ်မျိုးကြီး ခံစားရတယ်။ ပြည်သူတွေအတွက် ကျန်းမာရေးနဲ့ပတ်သက်ရင် အားမရဘူးဖြစ်ခဲ့ရတယ်။ ဒါကြောင့် ကျန်းမာရေးစောင့်ရှောက်မှုအပိုင်းကို ဒီထက်ပိုပြီး လုပ်ပေးစေချင်တယ်လို့ အားလုံးကို အသိပေးချင်ပါတယ်။