ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန ညွှန်ကြားရေးမှူးချုပ် ဒေါက်တာကိုကိုနိုင်နှင့် ဆက်သွယ်မေးမြန်းခြင်း

ဇွန်လဆန်းပိုင်းအတွင်း မိုးသည်းထန်စွာ ရွာသွန်းခြင်းများကြောင့် မြန်မာနိုင်ငံအနှံ့ ရေကြီးရေလျှံမှုများ၊ မြေပြိုမှုများ ဖြစ်ပွားခဲ့သည်။ လက်ရှိအချိန်တွင် အချို့ဒေသများတွင် ရေပြန်ကျသွားသော်လည်း ဒေသအချို့တွင် ရေကြီးမှုများ ဆက်လက်ဖြစ်ပေါ်နေခြင်းကြောင့် လူနေအိမ်ပြောင်းရွှေ့ရခြင်း၊ မြစ်ကမ်းပါးပြိုကျခြင်းများ ဖြစ်ပေါ်နေဆဲဖြစ်သည်။ ယင်းအခြေအနေများအပေါ် အရေးပေါ် ထောက်ပံ့ရေး လုပ်ငန်းများ လုပ်ဆောင်ရန်အတွက် အဓိကတာဝန်ရှိသည့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနသို့ ဆက်သွယ်မေးမြန်းခဲ့သည်။ ဇွန် ၁၇ ရက်တွင်မူ မွန်ပြည်နယ်ဘက်တွင် ရေကြီးမှုများ ဖြစ်ပေါ်နေခြင်းကို ကူညီထောက်ပံ့မှုများပြုလုပ်ရန် ပြည်ထောင်စုဝန်ကြီး ဒေါက်တာဝင်းမြတ်အေး သွားရောက်လျက်ရှိရာ ယင်းခရီးစဉ်တွင် လိုက်ပါသွားသည့် ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာန ညွှန်ကြားရေးမှူးချုပ်အား ဖုန်းဖြင့် ဆက်သွယ်မေးမြန်းထားသည်များကို ပြန်လည်ဖော်ပြအပ်ပါသည်။

“ဒီတစ်ခေါက်မှာ ရေကသိပ်မကြာဘူး။ ဘာလို့လဲဆိုတော့ မြစ်ရေတွေက ရေနည်းနေသေးတယ်။ စိုးရိမ်ရေမှတ်တွေဘာတွေ မရှိသေးဘူး …”

■ မေး – လက်ရှိ ရေကြီးရေလျှံမှုဖြစ်နေတဲ့ ဒေသတွေထဲမှာ ဘယ်ဒေသမှာ အများဆုံး ဖြစ်ပေါ်နေတာပါပဲ။

ဖြေ – ကျွန်တော်တို့ ဒီရက်ပိုင်းမှာ မကွေးဘက်မှာရယ်၊ ရခိုင်ဘက်မှာရယ်၊ အဲဒီဘက်က ရေပြန်ကျသွားတယ်။ ဒီနေ့တော့ ညကမှ ဖြစ်တာ။ မွန်ပြည်နယ်ဘက်၊ သံဖြူဇရပ်ဘက်လို့တော့ ကြားတယ်။ အခု ကျွန်တော်တို့ အဲဒီကို သွားနေပြီ။ အိမ်ခြေ ၂,၀၀၀ လောက် ရွှေ့ရတယ်လို့ပြောတယ်။ ပြီးခဲ့တဲ့ရက်မှာ ဖြစ်ခဲ့တဲ့ဟာတွေမှာလည်း ကယ်ဆယ်ရေးအနေနဲ့ တောက်လျှောက်သွားတယ်။ ထောက်ပံ့တယ်။ မင်းဘူး၊ ဆိပ်ဖြူ၊ ငဖဲ၊ စကု စသဖြင့် ပေါ့။ အဲဒီဘက်တွေမှာ အဖြစ်များတော့ အဲဒီဘက်တွေကိုသွားတယ်။ ရခိုင် မင်းပြားဘက်ကတော့ နည်းနည်းလေးများတဲ့နေရာတွေပေါ့။ တခြားဟာတွေမှာလည်းရှိတယ်။ ဒီတစ်ခေါက်မှာ ရေက သိပ်မကြာဘူး။ ဘာလို့လဲဆိုတော့ မြစ်ရေတွေက ရေနည်းနေသေးတယ်။ စိုးရိမ်ရေမှတ်တွေဘာတွေ မရှိသေးဘူး။ မော်လမြိုင်မှာလည်း နည်းနည်းတော့ ပြန်ကျနေပြီ။

■ မေး – သဘာဝဘေးဖြစ်ပေါ်လာရင် ထောက်ပံ့ရေးလုပ်ငန်းစဉ်တွေအတွက် ဘတ်ဂျက်ချမှတ်သုံးစွဲတယ်လို့ သိရပါတယ်။ ဒီကြားကာလ ခြောက်လဘတ်ဂျက်မှာ သဘာဝဘေးထောက်ပံ့ရေး လုပ်ငန်းတွေအပေါ် ဘယ်လောက်သုံးစွဲသွားဖို့ လျာထားထားပါသလဲ။

ဖြေ – လက်ရှိဖြစ်ပေါ်နေတဲ့ သဘာဝဘေးတွေကြောင့် ထိခိုက်ပျက်စီးမှုတွေကို ထောက်ပံ့နေတာနဲ့ ပတ်သက်ပြီး စာရင်းတော့ မချုပ်ရသေးဘူး။ လူသေရင် သုံးသိန်းပေါ့နော်။ ဆေးရုံတက်ရင် ငါးသောင်း၊ ဆန်အိတ်က ခုနစ်ရက်စာ တောက်လျှောက်ပေးနေတယ်။ ကယ်ဆယ်ရေးပစ္စည်းပေးတယ်။ ဒါက သူ့မြို့နယ်တွေ မှာပေးနေကြတာ။ ချက်ချင်း အဲဒါကို ပေါင်းဖို့ဆိုတာ ခက်တယ်။

■ မေး – သဘာဝဘေးတစ်ခု ကြုံလာရင်း အရေးပေါ် ဘယ်လိုလုပ်မယ်ဆိုတာ ပြင်ဆင်ထားတယ်ဆိုတာလည်း ပြောပြပေးပါ။

ဖြေ – ဒါတွေက ပြင်ဆင်ထားလို့လည်း အခုလုပ်နိုင်တာပေါ့။ ကြိုတင်သတိပေးစနစ် လုပ်တယ်။ အရေးပေါ် ထောက်ပံ့ရေးအတွက် အဆင့်မြှင့်တင်ထားတယ်။ ဒါမျိုးတွေက ကြိုတင်ပြင်ဆင်ရေးပေါ့။ နောက်တစ်ခုကတော့ သဘာဝဘေးဒဏ် ကြံ့ကြံ့ခံနိုင်သော လူ့အသိုင်းအ၀ိုင်း ဖြစ်စေရန် အဲဒါလည်း လုပ်ရမှာပေါ့။ ဒါက ရေဘေး၊ လေဘေး၊ မုန်တိုင်းဘေး၊ မြေငလျင်ဘေး၊ အကုန်လုံးဘေး။ ဒါမျိုးက General မှာ သဘာဝဘေးနဲ့ပတ်သက်ပြီးတော့ လုပ်ကြရတယ်။ သဘာဝဘေးမှာ ဘာရှိလဲဆိုတော့ ကြိုတင်ပြင်ဆင်ရေး၊ ကြိုတင် ကာကွယ်ခြင်း၊ အရေးပေါ်တုံ့ပြန်ခြင်း၊ နောက်တစ်ခုက သဘာဝဘေးဒဏ် ကြံ့ကြံ့ခံနိုင်အောင်ပေါ့။ ကနဦးသတင်းတွေရအောင် လုပ်ပေးရတာတွေ ရှိတယ်။

■ မေး – ကနဦးသတင်းတွေရအောင် ၀န်ကြီးဌာနအနေနဲ့ လုပ်ဆောင်နေတဲ့ အခြေအနေကိုလည်း ပြောပြပေးပါ။

ဖြေ – အဓိကက မိုးဇလနဲ့ပေါ့။ ဒီကာလမှာဆိုရင် မိုးလေ၀သအခြေအနေတွေ နားထောင်တယ်။ မြစ်ရေတွေကို ကြည့်တယ်။ ဆည်တွေရဲ့ ရေအမှတ်တွေကို ကြည့်တယ်။ စိုးရိမ်စရာရှိတယ်ဆိုရင် သတင်းထုတ်ပြန်တယ်။ ဒီရက်ပိုင်းမှာလည်း တစ်နေ့ကဆို ကရင်၊ တနင်္သာရီမှာ နေရာကွက်၍ မိုးကြီးမယ်ဆိုတာ ဒါမျိုးတွေပေါ့။ မိုးကြီးလို့လည်း ဖြစ်တာပေါ့။ ဒါကြောင့်လည်း ကျွန်တော်တို့ ချက်ချင်းသွားနိုင်တယ်။ ကျွန်တော်တို့ မသွားနိုင်လည်း ပြည်နယ်မှာရှိတဲ့သူတွေက လုပ်နိုင်တယ်။ အရေးပေါ်ဖြစ်လာရင် အပေါ်ကနေ ချက်ချင်းထောက်ပံ့နိုင်အောင်လည်း လုပ်နေပါတယ်။ ပညာပေးလုပ်ငန်းတွေလည်း လုပ်နေတယ်။ အသိပညာပေးလုပ်ငန်းက ပထမဦးဆုံး ကျွန်တော်တို့ဆီမှာ ပန်းဖလက်တွေ ရှိတာပေါ့။ ဘေးဒဏ်အမျိုးမျိုးအတွက် ငလျင်တို့ မုန်တိုင်းတို့ပေါ့။ အဲဒါမျိုးတွေအတွက် ဘယ်လိုလုပ်မလဲ။ ရေဘေး၊ မုန်တိုင်းစသဖြင့် ဒါမျိုးပန်းဖလက်တွေရှိတယ်။ မြို့နယ်သဘာဝဘေး စီမံခန့်ခွဲမှုကော်မတီတို့ ပြည်နယ်နဲ့ တိုင်းမှာရှိတဲ့ကော်မတီတို့ကလည်း မြို့နယ်တွေကို သွားပြီးတော့ သဘာဝဘေးပညာပေးတွေနဲ့ ပတ်သက်ပြီး အသိပညာတွေ ဖြန့်ဝေတယ်။ ပြီးခဲ့တဲ့နွေရာသီ ကျောင်းပိတ်ရက်ကဆိုရင် ပညာရေးနဲ့ပေါင်းပြီးတော့မှ ဆရာမတွေကို မြေငလျင်ဘေးနဲ့ပတ်သက်ပြီး အသိပညာပေး လုပ်ငန်းတွေ ဆက်တိုက်လုပ်တယ်။ ဒါတွေက ကြားအချိန်မှာ လုပ်နေတယ်။ ကြိုသိတဲ့ကိစ္စတွေအတွက် Early Warning လုပ်တယ်။ မိုးလေ၀သ သတင်းတွေလုပ်တယ်။ Alert ဖြစ်စေတာပေါ့။ အဆင်သင့်ဖြစ်စေဖို့အတွက် ဒါတွေ ဆောင်ရွက်နေပါတယ်။

■ မေး – အရေးပေါ် သဘာဝဘေးကြုံလာရင် ဆရာတို့အနေနဲ့ ပြည်သူလူထုကို မက်ဆေ့ပေးချင်တဲ့စကားလေးရှိရင် ပြောပြပေးပါ။

ဖြေ – ကျွန်တော်တို့နဲ့ ပူးပေါင်းပါဝင်ကြပါလို့ ပြောချင်ပါတယ်။ ကျွန်တော်တို့ဆီမှာလည်း Hot Line ဖုန်း အမြဲတမ်းပြောနေကြပါ။ ၀၆၇၃၄၀၄၆၆၆ နဲ့ ၀၆၇၃၄၀၄၇၇၇ ကို ဆက်သွယ်ပြီး မိုးလေ၀သသတင်းတွေ မေးနိုင်တယ်။ အကူအညီ တောင်းနိုင်တယ်။

သရုပ်ဆောင် ရွှေမှုန်ရတီနှင့် တွေ့ဆုံခြင်း

ငယ်ရွယ်သည့် ဆယ်ကျော်သက် အနုပညာရှင်တစ်ဦးအဖြစ် အနုပညာလောကအတွင်း ရောက်ရှိလာခဲ့ပြီး အနုပညာပျိုးခင်း၏ စင်တင်မင်းသမီးတစ်ဦးအဖြစ် ပရိသတ်အားပေးချစ်ခင်မှု အခိုင်အမာရရှိထားသူ၊ လှုပ်ရှားမှုတိုင်း၊ ပြောစကားတိုင်းအား ပရိသတ်စိတ်ဝင်စားစေသူတစ်ဦးမှာ သရုပ်ဆောင်ရွှေမှုန်ရတီပင် ဖြစ်သည်။ ငယ်ရွယ်လှပသည့် သရုပ်ဆောင်တစ်ဦးဖြစ်သည့်အပြင် အမူအရာပီပြင်သူတစ်ဦးအဖြစ်လည်း ပရိသတ်များလက်ခံထားသူ ဖြစ်သည်။ လတ်တလောတွင် ‘ဧည့်သည်’ ဟု အမည်ပေးထားသည့် ဇာတ်ကား၌ ဂျစ်ကန်ကန်မိန်းကလေးအဖြစ် ပါဝင်မည်ဖြစ်သည့်အပြင် ကိုယ်ပိုင်ထုတ်လုပ်ရေးအနေဖြင့်လည်း ဇာတ်ကားများ ရိုက်ကူးရန်ပြင်ဆင်လျက်ရှိသည်။ ပရိသတ်စိတ်ဝင်စားလျက်ရှိသော အချစ်ရေးတွင်လည်း Single ဖြစ်သွားပြီဟု ကြေညာထားသည့်အပြင် အချစ်ရေးတွင် အတ္တများလျှော့ချနိုင်ရန် ပြင်ဆင်သွားမည်ဟု ဖြေကြားခဲ့သည့် သရုပ်ဆောင်ရွှေမှုန်ရတီနှင့် တွေ့ဆုံမေးမြန်း ဖြစ်ခဲ့ပါသည်။

‘အချစ်ရေးဆိုတာက ညီမအတွက်ဘ၀တစ်ခု မဟုတ်တော့ အဲဒါထက် အရေးပါတာတွေ အရင်လုပ်နေတယ်။ နှလုံးသားနဲ့ခံစားချက်ကို ဘေးဖယ်ထားပြီး ဦးနှောက်နဲ့လုပ်သင့်တာတွေ လုပ်နေပါတယ်’

 

■ မေး – ‘ဧည့်သည်’ ဇာတ်ကားမှာ ရွှေမှုန်ပါဝင်ရမယ့် ဇာတ်ရုပ်ပိုင်းနဲ့ပတ်သက်လို့ ပြောပြပါဦး။

■ ဖြေ – ဒီဇာတ်ကားမှာတော့ ဦးညီ (ညွန့်မြန်မာညီညီအောင်) နဲ့ပေါ့။ ဦးညီနဲ့ကတော့ အမြဲဆုံနေကျပါ။ အဓိကက ကိုဖြိုး၊ ကိုရွှေထူး၊ မနေခြည်သုံးယောက်လုံးနဲ့ တွဲဖက်သရုပ်ဆောင်ရမယ်။ အတွေ့အကြုံ သစ်တွေလည်းရမယ်လို့ မျှော်လင့်တယ်။ ညီမတို့အဖွဲ့တွေအားလုံး အကောင်းဆုံးကြိုးစားသွားမယ်လို့ ပရိသတ်ကိုပြောချင်ပါတယ်။

■ မေး – ဒီဇာတ်ကားမှာပါဝင်ဖို့အတွက် အဓိက ဘာတွေပြင်ဆင်ထားလဲ။

■ ဖြေ – ညီမ အနုပညာကို စိတ်ဝင်တစားနဲ့ ကြိုးစားပြီးလုပ်တယ်။ သရုပ်ဆောင်သစ်တွေကိုလည်း အများကြီးကြိုဆိုပါတယ်။ ဒီဇာတ်ကားမှာဆို ကိုရွှေထူးတို့ မနေခြည်တို့နဲ့ တွဲဖက်သရုပ်ဆောင် ရမယ်ဆိုတဲ့အခါ သဲတို့တတ်သလောက် မှတ်သလောက်နဲ့ ဒီလိုပဲ အားလုံးဝိုင်းဝန်းကြိုးစားပြီး လုပ်ဆောင် သွားမယ်လို့ စိတ်ကူးထားပါတယ်။ မနေခြည်ကိုလည်း တတ်နိုင်သလောက် ကူညီပါမယ်လို့ ပြောပါတယ်။ ဦးညီအောင်လည်းရှိတော့ အားလုံးအတူတကွပူးပေါင်း လုပ်ဆောင်နိုင်မယ်လို့ ထင်ပါတယ်။

■ မေး – ဦးညီညီအောင်နဲ့တော့ ဇာတ်ကားတွေ အရိုက်များတယ်နော်။

■ ဖြေ – ဟုတ်တယ်။ သားအဖလို့တောင်ခေါ်ကြတာ။ သဲမင်းသမီးစဖြစ်တဲ့ လွန်ခဲ့တဲ့ငါးနှစ်လောက်ကတည်းက ကိုနေတိုးတို့နဲ့စရိုက်ကတည်းက ဦးညီနဲ့ ကရိုက်ဖြစ်တယ်။ ဦးညီတို့မိသားစုနဲ့က ကိုယ့်မိဘတွေလိုတောင် ဖြစ်နေပါပြီ။ ရိုက်ကွင်းပေါ်မှာဆိုလည်း ဦးညီညွှန်ကြားတဲ့အတိုင်းကို သေချာလိုက်နာတယ်။ ဦးညီတစ်ယောက်တည်းမှ မဟုတ်ပါဘူး။ ဒီလောကထဲ ၀င်လာကတည်းက တွဲဖက်ရိုက်ကူးခဲ့တဲ့ ဒါရိုက်တာအားလုံးကညီမရဲ့ သင်ဆရာမြင်ဆရာကြား ဆရာတွေချည်းပါပဲ။ အဲဒီလိုသင်ကြားပေးမှုအပေါ်မှာ ညီမကလည်း တရိုတသေလိုက်နာခဲ့လို့ ညီမအတွက်တန်ဖိုးတွေ အများကြီးရှိပါတယ်။ ညီမအတွက် တန်ဖိုးဖြတ်လို့မရတဲ့ ခြောက်နှစ်တာကာလကို ပိုင်ဆိုင်ခွင့်ရခဲ့ပါတယ်။

■ မေး – ၀တ်စားဆင်ယင်မှုအပိုင်းဆိုရင်ရော ဒီဇာတ်ကားမှာ ဘာတွေကွာခြားလဲ။

■ ဖြေ – နည်းနည်းတော့ဂေါ်ပါမယ်။ တစ်မျိုးလေးလုပ်ထားတယ်။ အခုလက်ရှိ ကောင်မလေးတွေဝတ်စားနေကြတဲ့ ဖက်ရှင်ပုံစံမျိုးပါ။ ကာရိုက်တာထဲတော့ ၀င်အောင်လုပ်ထားတယ်။

■ မေး – ပရိသတ်စိတ်ဝင်စားနေတဲ့ အချစ်ရေးနဲ့ပတ်သက်လို့လည်း ပြောပေးပါဦး။

■ ဖြေ – အခုတော့ Single ဖြစ်သွားပါပြီ။ နောက်ထပ် မစဉ်းစားသေးဘူးလားဆိုရင်တော့ လောလောဆယ်အလုပ်တွေ လုပ်လိုက်ပါဦးမယ်။ အချစ်ရေးဆိုတာက ညီမအတွက်ဘ၀တစ်ခုမဟုတ်တော့ အဲဒါထက်အရေးပါတာတွေ အရင်လုပ်နေတယ်။ နှလုံးသားနဲ့ခံစားချက်ကို ဘေးဖယ်ထားပြီး ဦးနှောက်နဲ့လုပ်သင့်တာတွေ လုပ်နေပါတယ်။

■ မေး – အချစ်နဲ့ပတ်သက်လို့ရော ဘယ်လိုခံယူထားလဲ။

■ ဖြေ – အချစ်က အေးချမ်းပါတယ်။ သံသယတွေကတော့ ပူလောင်တယ်လို့ ခံယူထားပါတယ်။ တတ်နိုင်သလောက် အတ္တလျှော့နိုင်အောင် ကြိုးစားရမယ်လို့ထင်တယ်။ ညီမလည်း ကြိုးစားနေတယ်။ Relationship တစ်ခုမှာကျတော့ ညီမက ရွှေမှုန်ရတီဆိုတာတွေ၊ မင်းသမီးဆိုတာတွေ မရှိဘူး။ တစ်ယောက်နဲ့တစ်ယောက် ချစ်တာပဲရှိတယ်။ အဲဒီနေရာမှာ အတ္တတွေကိုလျှော့နိုင်ဖို့ ကြိုးစားရမယ်။ ညီမက အသက်ငယ်တော့ စိတ်လည်းတိုတတ်တယ်။ ရှေ့လျှောက် ဘ၀မှာတော့ အကောင်းဆုံးဖြစ်အောင် နေထိုင်သွားမယ်လို့ ခံယူထားတယ်။

■ မေး – ရွှေမှုန်ရဲ့ ကိုယ်ပိုင်ထုတ်လုပ်ရေးကနေ ရိုက်မယ့်ကားက ဘယ်တော့စရိုက်မလဲ။

■ ဖြေ – ဇွန် ၁၈ ရက်မှာအောင်ရဲလင်းနဲ့ စရိုက်ပါမယ်။ မင်းသမီးကတော့ မခိုင်လေး (ခိုင်သင်းကြည်)၊ သဲရယ်၊ မကြီးစိုး(စိုးမြတ်သူဇာ)၊ နောက်အငယ်မ (ငွေမှုန်ရတီ)နဲ့ တခြားသရုပ်ဆောင်များစွာ ပါပါမယ်။ ဒါရိုက်တာက ဦးမိုးဦး (ကျော်ဇောလင်း-အတွေးပုံရိပ်) ပါ။ ရယ်ရမယ့်ပျော်ရမယ့် ဇာတ်ကားပါ။

■ မေး – ပရိသတ်တွေက ရွှေမှုန်ဘာလုပ်လုပ် စိတ်ဝင်စားတယ်နော်။ အဲဒီအပေါ်ဘယ်လိုခံစားရလဲ။

■ ဖြေ – သူတို့ကချစ်လည်းချစ်တယ်။ စိတ်ဝင်စားတယ်။ ဘာပဲဖြစ်ဖြစ်သဲက မကွယ်မ၀ှက်ဘဲ စိတ်ထဲရှိတဲ့အတိုင်း ပြောတတ်လုပ်တတ်တဲ့သူဆိုတော့ သူတို့အတွက် အသစ်အဆန်းဖြစ်နေတယ်။ အင်တာဗျူးတွေမှာတော့ ဟန်ဆောင်ပြီး မလုပ်ချင်ဘူး။ ထောက်ပြပေးတဲ့ ပရိသတ်တွေလည်းရှိတယ်။ အဲဒီအတွက် ကျေးဇူးတင်ပါတယ်။ ဒါပေမဲ့အပြင်မှာ ညီမနေတတ်တဲ့ပုံစံကို ပရိသတ်တွေ ကိုသိစေချင်တယ်။ ဒါကြောင့် မီဒီယာတွေမှာမကွယ်မ၀ှက်ဘဲ ဒီအတိုင်းနေ ဖြစ်တာပါ။ အဲဒါက ပရိသတ်တွေကိုမလေးစားသလို၊ မီဒီယာတွေကို မလေးစားသလို အပြုအမူ၊ အပြောအဆိုတွေပါခဲ့မယ်ဆိုရင် တောင်းပန်ချင်ပါတယ်။ ပရိသတ်တွေလိုချင်တဲ့ မင်းသမီးတစ်ဦးပုံစံမျိုးဖြစ်အောင် ကြိုးစားသွားပါမယ်။

■ မေး – ပရိသတ်ကိုပြောချင်တဲ့ စကားလက်ဆောင်များ ရှိဦးမလား။

■ ဖြေ – သဲအခုအလုပ်တွေကို အာရုံစိုက်ပြီးလုပ်နေပါတယ်။ ဧည့်သည်ဇာတ်ကားမှာ အကောင်းဆုံးကြိုးစားမှာဖြစ်သလို သဲရဲ့ကိုယ်ပိုင်ထုတ်လုပ်ရေးနဲ့ ရိုက်မယ့်ဇာတ်ကားမှာလည်း အကောင်းဆုံးကြိုးစားသွားပါမယ်။ သဲကိုအားပေးကြပါဦးလို့ ပြောချင်ပါတယ်။

သရုပ်ဆောင် နေခြည်ဦးနှင့် တွေ့ဆုံခြင်း

Beauty Blogger တစ်ဦးအဖြစ် ပရိသတ်များ စတင်သတိထားမိစေခဲ့ပြီး ချစ်စဖွယ်ဟန်ပန်လေးများအား ပိုင်ဆိုင်ထားသူ နေခြည်ဦးမှာ ချစ်ခင်အားပေးသည့် ပရိသတ်များပြားလှသူတစ်ဦးဖြစ်သည်။ အောင်မြင်သည့် Beauty Blogger တစ်ဦးအဖြစ်မှသည် သရုပ်ဆောင်တစ်ဦးအဖြစ် ရုပ်ရှင်ဇာတ်ကားတစ်ကား ရိုက်ကူးပြီးဖြစ်ကာ ယခုအခါ “ဧည့်သည်” ဟု အမည်ပေးထားသည့် ဒုတိယမြောက်ဇာတ်ကားတွင် ပါဝင်သရုပ်ဆောင်ရန် စီစဉ်ထားပါသည်။ အချစ်ကြီးသည့် မိန်းကလေးတစ်ဦးပုံစံဖြင့် သရုပ်ဆောင်သွားမည့် နေခြည်ဦးက လတ်တလောတွင် ချမ်းမြေ့ပျော်ရွှင်ဖွယ် အချစ်ရေးကို ပိုင်ဆိုင်ထားသူလည်းဖြစ်သည်။ လှုပ်ရှားမှုတိုင်းအား ပရိသတ်စိတ်ဝင်စားစေသူ သရုပ်ဆောင် Beauty Blogger နေခြည်ဦးနှင့်တွေ့ဆုံ၍ ဒုတိယမြောက်ဇာတ်ကားအတွက် ပြင်ဆင်ထားမှုများ၊ စိတ်ချမ်းမြေ့ပျော်ရွှင်ရသည့် အချစ်ရေး၊ ပရိသတ်စိတ်ဝင်စားလျက်ရှိသည့် ရက်စွဲတစ်ခုအကြောင်းများကို မေးမြန်းဖြစ်ခဲ့ပါသည် …

‘ကိုယ့်စိတ်ထဲမှာ ခံစားမှုအတိုင်း သရုပ်ဆောင်ရမှာဆိုတော့ လွတ်လပ်တယ်။ အချစ်ကိုတန်ဖိုးထားတဲ့ မိန်းကလေးတစ်ယောက် ပုံစံရအောင်တော့ လုပ်ဖြစ်မှာပါ’

■ မေး – ဧည့်သည်ဆိုတဲ့ဇာတ်ကားမှာ ဘယ်လိုဇာတ်ရုပ်မျိုးနဲ့ ပါဝင်သရုပ်ဆောင်ဖြစ်မလဲဆိုတာလေး အရင်ပြောပြပေးပါလား။

ဖြေ – နေခြည်က ဒီဇာတ်ကားထဲမှာတော့ အရမ်းချစ်တတ်တဲ့ ကောင်မလေးတစ်ယောက်။ ဘ၀မှာအချစ်ကိုကိုးကွယ်တယ်။ အချစ်ကလွဲလို့ ဘာမှမသိဘူး။ ကိုယ်နိုင်ငံခြားထွက်သွားတဲ့အခါ ဘ၀မှာမျှော်လင့်မထားတာတွေ ဖြစ်လာတဲ့အတွက် မိန်းကလေးတစ်ယောက်ရဲ့ အချစ်က ဘယ်လိုဖြစ်လာမလဲပေါ့။ အဲဒါလေးကို ပြထားတဲ့ ဇာတ်ကားလေးပါ။

■ မေး – ဒီဇာတ်ကားက သုံးပွင့်ဆိုင် အချစ်ဇာတ်လမ်းဆိုတော့ တခြားဇာတ်ကားတွေနဲ့ ဘယ်လိုကွဲပြားတဲ့ပုံစံမျိုး မြင်တွေ့ရမလဲ။

ဖြေ – ဒီကားမှာ နေခြည်ပါဝင်ရမှာက အချစ်အတွက် အရူးအမူးပေါ့။ ကိုယ့်ချစ်သူပျော်မယ်ဆိုရင် ဘာပဲလုပ်ပေးရလုပ်ပေးရဆိုတဲ့ ပုံစံမျိုးပေါ့။ ကိုယ့်ချစ်သူနားမှာပဲ နေချင်တယ်။ အဲဒီလိုပုံစံမျိုး။ ရွှေထူးရဲ့ ကာရိုက်တာကျတော့ ချစ်သူက သူ့ဘေးနားမှာ တစ်ချိန်လုံး ရှိနေတာကို စိတ်ကျဉ်းကျပ်တဲ့ပုံစံမျိုး။ ရွှေမှုန်ကျတော့လည်း ကိုယ့်စိတ်ထဲမှာ ဘာလိုချင်တယ်ဆိုတာကို မသိဘူး။ အချစ်သစ်တစ်ခုတွေ့တဲ့အခါ ဖြစ်ပေါ်လာတဲ့ ခံစားချက်မျိုး။ နေခြည့်ကာရိုက်တာဆိုရင် အရင်က နေခြည်မှာဖြစ်ခဲ့တဲ့ relationship တွေထဲက အကြောင်းအရာမျိုးတွေ အများကြီးပါတယ်။ ဇာတ်ညွှန်း ကိုမိုးနီ ပြောလိုက်တဲ့စကားလုံးတွေ၊ ဇာတ်ညွှန်းကို ဖတ်လိုက်တဲ့အခါ နေခြည်မျက်ရည်ကျရတယ်။ ဒါကြောင့် အပြင်က လူငယ်တွေနဲ့လည်း ခံစားချက်ချင်း တိုက်ဆိုင်မယ်လို့ထင်တယ်။ လူငယ်တွေကြားက အခြေအနေ စိတ်ခံစားမှုတွေကို ဖော်ညွှန်းမယ်လို့ ထင်ပါတယ်။

■ မေး – လက်ရှိအချစ်ရေးမှာ စိတ်ချမ်းသာမှု အပြည့်အ၀ရတယ်လို့ ပရိသတ်တွေက ထင်ကြတယ်နော်။

ဖြေ – အခုကတော့ သူချစ်ကပိုများတော့ သူကကိုယ့်ကို စိတ်ပူပေးတယ်။ အနွံတာခံတယ်ဆိုတော့ စိတ်ချမ်းသာရတာပေါ့နော်။ ကိုယ့်အချစ်ရေးက အရမ်းပျော်နေလို့တောင် ဒီဇာတ်ကားရိုက်တဲ့အခါ စိတ်ညစ်ရတဲ့ခံစားမှုမျိုး ထည့်နိုင်ပါ့မလားလို့ တွေးမိတယ်။ အဲဒါကြောင့် သူ့ကိုလည်းပြောထားတယ်။ ဒီကားရိုက်နေတုန်း ခဏတော့ ရန်ဖြစ်ရအောင်လို့။ ခဏလောက် အဆက်အသွယ် ဖြတ်ထားပါလားလို့ စနေမိပါတယ်။

■ မေး – ပထမတစ်ကားရိုက်ပြီးပြီဆိုတော့ အခုဇာတ်ကားက ဘယ်လိုကွာခြားတဲ့ခံစားမှုတွေ၊ အတွေ့အကြုံတွေ ရမယ်လို့ထင်လဲ။

ဖြေ – ပထမကားတုန်းက pressure အရမ်းများတယ်။ ရိုက်နေတုန်းလည်း သုံးရက်လောက် ဖျားခဲ့တယ်။ ကိုယ်မဟုတ်တဲ့ လူတစ်ယောက် ပုံစံလုပ်ရတာ တကယ်မလွယ်ပါဘူး။ ကိုယ်လုပ်လိုက်လို့မှားမှာကို၊ ဒါရိုက်တာက စိတ်တိုင်းမကျမှာ အရမ်းစိုးရိမ်ခဲ့တယ်။ အခုကတော့ ကိုယ့်စိတ်ထဲမှာ ခံစားမှုအတိုင်း သရုပ်ဆောင်ရမှာဆိုတော့ လွတ်လပ်တယ်။ အချစ်ကိုတန်ဖိုးထားတဲ့ မိန်းကလေးတစ်ယောက် ပုံစံရအောင်တော့ လုပ်ဖြစ်မှာပါ။

■ မေး – နောက်ပိုင်းမှာရော အနုပညာနဲ့ ကိုယ်ပိုင်စီးပွားရေး ဘာကိုဦးစားပေးဖြစ်မလဲ။

ဖြေ – နေခြည် အရင်ကတည်းက စီးပွားရေးပဲလုပ်မယ်လို့ အမြဲစဉ်းစားခဲ့တယ်။ ကျောင်းပြီးလို့ပြန်လာတော့လည်း မိသားစုစီးပွားရေးမှာ ၀င်လုပ်ပေးတယ်။ မထင်မှတ်တဲ့အချိန်မှာ အနုပညာအလုပ်တွေ လုပ်ခွင့်ရတယ်။ နေခြည်ခံစားချက်က ကိုယ်ဝါသနာပါတဲ့ အလုပ်ကို လုပ်ခွင့်ရတဲ့အချိန်မှာ ပျော်ရွှင်တယ်။ ကုသိုလ်တွေ မေတ္တာတွေ အများကြီးရတယ်လို့လည်း ခံစားရတယ်။ entertainer တစ်ယောက် ဖြစ်ရတာကိုကြိုက်တယ်။ ကိုယ်လုပ်တဲ့အလုပ်က ပိုက်ဆံတွေ အများကြီး ရခြင်းမရခြင်းထက် passionate ဖြစ်နေဖို့ လိုအပ်တယ်။ ဒါကြောင့် ဒီအလုပ်ကို တန်ဖိုးထားပါတယ်။

■ မေး – ညီမလေးနဲ့ နှစ်ယောက်တွဲ ဗီဒီယိုလေးတင်ဖြစ်တာကို ပရိသတ်တွေကလည်း သဘောကျတယ်နော်။

ဖြေ – ပီတိအရမ်းဖြစ်ရသလို အမှတ်တရလည်း ဖြစ်ရပါတယ်။ ညီမလေးက နေခြည်ထက်ပိုပြီး အနုပညာပိုး ပိုများတယ်။ အဆိုတော်လည်း ဖြစ်ချင်သလို သရုပ်ဆောင်လည်း ဖြစ်ချင်တယ်။ သိုင်းတို့မြန်မာအကတို့ဆိုလည်း တတ်တယ်။ နေခြည်တို့က ပညာအရည်အချင်းကို ထိခိုက်မှာစိုးလို့ ပညာရေးကို ဦးစားပေးခိုင်းတာပေါ့နော်။ အခုလိုရိုက်ဖြစ်တာကတော့ ညီမတစ်ယောက်အနေနဲ့ အစ်မဆီက ဘယ်လိုအချက်လေးတွေ လိုချင်လဲဆိုတာ သိချင်တယ်။ တစ်ယောက်နဲ့တစ်ယောက်က နီးကပ်နေပေမယ့် relation က မနီးဘူး။ ညီမလေးတွေ မောင်လေးတွေမှာ အဲဒီလို ပြောစရာစကားတွေ ရှိမှာပဲလေ။ အဲဒါကြောင့် ဒီဗီဒီယိုဖိုလ်လေးတင် ဖြစ်တဲ့အခါ ပရိသတ်တွေက နေခြည်တို့ ညီအစ်မနှစ်ယောက်လုံးကို ချစ်ပေးကြတဲ့အတွက် ကျေးဇူးအများကြီးတင်ပါတယ်။ တခြားသောညီအစ်မတွေ၊ မောင်နှမတွေမှာလည်း ဒီလိုအငယ်ရဲ့ ရင်ထဲကခံစားမှုလေးတွေ သိအောင်လုပ်ဖို့ လိုအပ်မယ်လို့ ထင်ပါတယ်။

■ မေး – မင်္ဂလာပွဲလုပ်မယ့်ရက်လို့ နေခြည်တို့တင်ထားတဲ့ နေ့စွဲလေးတစ်ခုကိုကြည့်ပြီး ပရိသတ်တွေက ပျော်နေကြပြီ။ အဲဒါလေးနဲ့ ပတ်သက်လို့ပြောပါဦး။

ဖြေ – အချစ်ရေးက ပျော်ရွှင်ပါတယ်။ ဒါပေမဲ့ မနက်ဖြန်မှာ ဘာဖြစ်မယ်ဆိုတာ ကြိုမသိရတဲ့အတွက် နေခြည်တင်လိုက်တာက ၂၀.၂.၂၀၂၀ ပေါင်းခြင်းက ရှစ်ပေါ့။ အဲဒီလိုထူးခြားတဲ့ရက်လေးမှာ အမှတ်တရ တစ်ခုခုတော့လုပ်မယ်။ သီးခြား စီစဉ်ထားတာမျိုးတော့ မရှိသေးပါဘူး။ ဖြစ်နေတဲ့ အချိန်လေးမှာ ပျော်တယ်။ ကျေနပ်တယ်။ အဲဒီလိုလေးပဲ စိတ်ထဲမှာထားပါတယ်။

The Voice Myanmar ၏ Winner ဆုရှင် ငွေစိုးနှင့် တွေ့ဆုံခြင်း

မြန်မာနိုင်ငံတွင် ပထမဆုံးအကြိမ်ကျင်းပသည့် The Voice Myanmar သီချင်းဆိုပြိုင်ပွဲတွင် Winner ဆုရှင်မှာ ပေါ်ထွက်လာခဲ့ပြီ ဖြစ်သည်။ Coach လင်းလင်း၏အဖွဲ့မှ ပြိုင်ပွဲဝင် ကိုငွေစိုးဖြစ်ပြီး ပြိုင်ပွဲတစ်လျှောက်လုံးတွင် တေးသီချင်းများအားလုံးကို ခံစားမှုအပြည့်ဖြင့် ပုံဖော်သီဆိုနိုင်သူလည်း ဖြစ်သည်။ နောက်ဆုံးအဆင့်ပြိုင်ပွဲတွင် တေးသံရှင်ထူးအိမ်သင်၏ ထင်ရှားသည့် ‘ရာဇ၀င်များရဲ့သတို့သမီး’ သီချင်းဖြင့် ယှဉ်ပြိုင်ခဲ့ရာ ပရိသတ်များ၏အားပေးမှုကို အပြည့်အ၀ရယူနိုင်ခဲ့သည့် Winner ဆုရှင် ကိုငွေစိုးနှင့် တွေ့ဆုံကာ ပြိုင်ပွဲအတွေ့အကြုံနှင့် သိလိုသည်များကို မေးမြန်းဖြစ်ခဲ့သည်။

‘တစ်နိုင်ငံလုံးက ကျွန်တော့်အတွက် Voting တွေပေးလို့ ဒီဆုကိုရတဲ့အတွက် ကျေးဇူးအများကြီးတင်ပါတယ်’

■မေး – The Voice Myanmar ပြိုင်ပွဲဝင်ဖို့ ဘယ်လိုဆုံးဖြတ်ဖြစ်ခဲ့တာလဲဆိုတာလေး အရင်ပြောပြပါလား။

■ ဖြေ – ဂီတကိုတော့ ကျွန်တော်ငယ်ငယ်ကတည်းက ၀ါသနာပါတာပါ။ The Voice Myanmar ပြိုင်ပွဲတွေကိုလည်း အရင်ကတည်းက ကြည့်ခဲ့ဖူးပါတယ်။ ကျွန်တော် အရမ်းသဘောကျတယ်ပေါ့နော်။ အခုမြန်မာနိုင်ငံကို The Voice ရောက်လာတဲ့အခါ အသက်ကန့်သတ်ချက်လည်းမရှိတော့ ၀င်ပြိုင်မယ်ဆိုပြီး ဆုံးဖြတ်ဖြစ်သွားတာပါ။

■ မေး – ပြိုင်ပွဲမ၀င်ခင်မှာရော ဘယ်လိုတွေပြင်ဆင်ဖြစ်ခဲ့လဲ။

■ ဖြေ – အဓိကတော့ သီချင်းတွေကိုပြင်ဆင် ဖြစ်ခဲ့ပါတယ်။ ကျွန်တော်အကောင်းဆုံး ဆိုနိုင်မယ့်သီချင်းတွေကိုတော့ ရွေးချယ်ပြင်ဆင်ခဲ့တယ်။ Stress တွေများ လာရင်ပဲဖြစ်ဖြစ်၊ ကျန်းမာရေးမကောင်းရင်ပဲဖြစ်ဖြစ် ဆိုနိုင်မယ့်သီချင်းမျိုးတွေလည်း ပြင်ဆင်ခဲ့ပါတယ်။ နောက်ပိုင်းမှာတော့ ကိုလင်းလင်းနဲ့တိုင်ပင်ပြီး သီချင်းပိုင်းဆိုင်ရာတွေ သေချာပြင်ဆင်ဖြစ်ပါတယ်။

■ မေး -Coach တွေထဲက ကိုလင်းလင်းနဲ့ လက်တွဲခွင့်ရခဲ့တဲ့အပေါ် ခံစားမှုကိုလည်း သိချင်ပါတယ်။

■ ဖြေ- အစကတည်းကလည်း ကျွန်တော့်မှာသာ ရွေးချယ်ခွင့်ရှိခဲ့မယ်ဆိုရင် ကိုလင်းလင်းနဲ့ပဲ လက်တွဲချင်ခဲ့ပါတယ်။ ဒါပေမဲ့ Blind Auditionမှာ ကိုလင်းလင်းတစ်ယောက်တည်းကပဲ လှည့်ကြည့်တာဆိုတော့ ကျွန်တော့်ခံစားမှုနဲ့တစ်ထပ်တည်း ကျသွားတာပေါ့။ အဲဒီအတွက်လည်း ပျော်ပါတယ်။

■ မေး – ကိုလင်းလင်းရဲ့ သင်ကြားမှုတွေ၊ ခွန်အားပေးမှုတွေက ကိုငွေစိုးအတွက် ဘယ်လိုအတွေ့ အကြုံကောင်းတွေ ရစေခဲ့လဲ။

■ ဖြေ – သီချင်းဆိုတာနဲ့ပတ်သက်တာတွေမကဘဲ တခြားအပိုင်းတွေမှာလည်း စိတ်ဓာတ်ခွန်အားတွေ အများကြီးဖြစ်စေပါတယ်။ ကျွန်တော့်အတွေးအမြင် ခံယူမှုပိုင်းတွေမှာလည်း ကိုလင်းလင်းဆီက အများကြီး စိတ်ဓာတ်ခွန်အားဖြစ်စရာတွေ ရပါတယ်။ Music နဲ့ပတ်သက်လို့ကတော့ ကိုလင်းလင်းက ပညာရည်ပြည့်ဝပြီးသား၊ ၀မ်းစာပြည့်ဝပြီးသားသူဖြစ်တဲ့အတွက် အများကြီးလေ့လာသင်ယူခွင့်ရခဲ့ပါတယ်။

■ မေး – သီချင်းတိုင်းကို ခံစားမှုအပြည့်အ၀နဲ့ ဆိုတတ်တာလည်း တွေ့ရတယ်။ အဲဒီအပေါ် ဘယ်လိုပြင်ဆင်လဲ။

■ ဖြေ – ပြင်ဆင်တယ်ဆိုတာထက် စင်ပေါ်ရောက်လို့ သီချင်းဆိုပြီဆိုတာနဲ့ကို အဲဒီသီချင်းအပေါ်ကို ခံစားမှုအပြည့်အ၀ထည့်ပြီး ဆိုဖြစ်သွားတာပါ။ ကျွန်တော့်စိတ်ထဲမှာ ခံစားမှုအပြည့်နဲ့ကို ဖြစ်သွားတာ။ သီးခြားပြင်ဆင်တာမျိုးတော့ မရှိပါဘူး။

■ မေး – ပြိုင်ပွဲတောက်လျှောက် ဆိုခဲ့တဲ့သီချင်းတွေထဲမှာ ဘယ်သီချင်းတွေကို အားအရဆုံးလို့ပြောလို့ရလဲ။

■ ဖြေ – သီချင်းတွေအားလုံးကိုတော့ အပြည့်အ၀အားထုတ်ခဲ့ပါတယ်။ အဲဒီထဲမှာမှ အမေ့ရုပ်ရည်ရယ်၊ ဖိုင်နယ်မှာပြိုင်ခဲ့တဲ့ သီချင်းရယ်ကိုအားအရဆုံးပါပဲ။ အမှတ်တရလည်း ဖြစ်ပါတယ်။

■ မေး – ကိုငွေစိုးအသံက ကိုဘိုဘိုနဲ့တူတယ်လို့ ပြောကြတဲ့အပေါ် ဘယ်လိုခံစားရလဲ။

■ ဖြေ – ကျွန်တော်က ငယ်ငယ်ကတည်းက ကိုဘိုဘိုသီချင်းတွေကို အရမ်းကြိုက်ခဲ့သလို သူ့သီချင်းတွေနဲ့ ကြီးပြင်းခဲ့တာပေါ့။ သူ့သီချင်းနဲ့ယှဉ်ပြိုင်ရတဲ့အခါ သူ့ကိုကြိုက်ခဲ့တဲ့အစွဲနဲ့ အသံက ဆင်သွားတာပေါ့နော်။ ကျွန်တော့်ကို ကိုဘိုဘိုအသံနဲ့ ဆင်တယ်လို့ပြောကြတဲ့အတွက် ကျွန်တော်ကျေနပ်ပါတယ်။ ကိုဘိုဘိုသီချင်းမဟုတ်တဲ့ တခြားသီချင်းတွေမှာတော့ ကျွန်တော့်ကိုယ်ပိုင်ဟန်အတိုင်းပဲ ဆိုခဲ့တာပါ။ အဲဒါကို ပရိသတ်တွေလည်း ကျေနပ်မယ်လို့ထင်ပါတယ်။

■ မေး – ပရိသတ်အားလုံးကပေးတဲ့ Voting နဲ့ Winner ဆုရခဲ့တဲ့ခံစားချက်ကိုလည်း ပြောပြပါဦး။

■ ဖြေ – တစ်နိုင်ငံလုံးက ကျွန်တော့်အတွက် Voting တွေပေးလို့ဒီဆုကိုရတဲ့အတွက် ကျေးဇူးလည်းအများကြီး တင်ပါတယ်။ အရမ်းလည်း ၀မ်းသာရပါတယ်။

■ မေး – Coach ကိုလင်းလင်းကပေးတဲ့ မှတ်ချက်မှာ အရိုးသားဆုံးစိတ်နဲ့ အနုပညာကို ဖန်တီးသူလို့ပါတယ်ပေါ့နော်။ အဲဒီအပေါ် ကိုငွေစိုးရဲ့ခံစားချက်ကို သိချင်ပါတယ်။

■ ဖြေ – ဒီလိုကြားခွင့်ရတာ တော်တော်ကြီးကို ကျေနပ်ပီတိဖြစ်ရပါတယ်။ ကိုလင်းလင်းကိုလည်း ကျေးဇူးအများကြီးတင်ရပါတယ်။ ဒီဆုကိုရခဲ့တာက ကိုလင်းလင်းရဲ့ လမ်းညွှန်ပေးမှုတွေလည်း အများကြီးပါပါတယ်။

■ မေး -Universal Studio နဲ့လက်တွဲပြီး သီချင်းဖန်တီးခွင့်ရမယ်ဆိုတော့ ဘယ်လိုတွေပြင်ဆင်သွားမလဲ။

■ ဖြေ -The Voice နဲ့ တိုင်ပင်ပြီးတော့ပဲ Team Work နဲ့လုပ်ရမှာပါ။ တစ်ယောက်တည်း ဆုံးဖြတ်ချက်နဲ့ လုပ်လို့မရဘူး။ ကိုလင်းလင်းနဲ့ တိုင်ပင်ပြီးတော့လည်း လုပ်သွားမှာပါ။

■ မေး -သီချင်းအသစ်တွေရော ဖန်တီးသွားဖို့ ရှိမလား။

■ ဖြေ – ပရိသတ်အားပေးမှုများလာတဲ့အတွက် တာဝန်တော့ပိုကြီးလာပါတယ်။ သီချင်းအသစ်တွေကတော့ ဒီကြားထဲမှာနိုင်သလောက် လုပ်သွားမှာပါ။

■ မေး – ရှိုးပွဲတွေ ဘာတွေဆိုမယ်ဆိုရင်ရော The Voice နဲ့ ညှိနှိုင်းရမှာတွေရှိလား။

■ ဖြေ – အဲဒါကတော့ The Voice နဲ့ညှိနှိုင်းပြီးမှပဲ ဆိုဖြစ်မှာပါ။

■ မေး – မန္တလေးက ပရိသတ်တွေက အရမ်းအားပေးခဲ့ကြတော့ သူတို့အတွက်ပြောချင်တာများ ရှိမလား။

■ ဖြေ – မန္တလေးတစ်မြို့လုံးက ကျွန်တော်တို့ မြို့သူမြို့သားအားလုံးကို ကျွန်တော့်ကိုအားပေးခဲ့ကြတဲ့အတွက် ကျေးဇူးအများကြီးတင်ပါတယ်။ ဆက်ပြီးလည်း ကြိုးစားသွားမှာပါ။

■ မေး – ၀ါသနာပါရာ ဂီတခရီးလမ်းမှာ လျှောက်လှမ်းခွင့်ရပြီဆိုတော့ ရှေ့ဆက်သွားဖို့ ဘယ်လိုရည်မှန်းထားလဲ။

■ ဖြေ – ဒီဂီတလမ်းမှာ အခုမှပထမဆုံး ခြေလှမ်းစခွင့်ရတာပါ။ အဲဒီအတွက် ကျွန်တော်ရည်မှန်းထားတဲ့ ပန်းတိုင်ရောက်တဲ့အထိ ကြိုးစားသွားပါမယ်။

■ မေး – The Voice ပြိုင်ပွဲနဲ့ပတ်သက်လို့ ပြောချင်တဲ့ သုံးသပ်ချက်တစ်ခုခုများ ရှိမလား။

■ ဖြေ -The Voice ပြိုင်ပွဲက အရမ်းလည်း ကောင်းပါတယ်။ လွတ်လပ်မှုလည်းရှိတယ်။ Worldwide လည်းဖြစ်တော့ ပိုပြီးကောင်းပါတယ်။ နောက်နှစ်တွေမှာ ထပ်လုပ်တဲ့အခါပါဝင် ယှဉ်ပြိုင်ကြမယ့် ကျွန်တော့်ညီအစ်ကို မောင်နှမတွေကိုပြောချင်တာက သီချင်းတွေဆိုပြီးယှဉ်ပြိုင်တဲ့အခါ ပရိသတ်တွေရင်ထဲအထိရောက်အောင် ခံစားပြီးဆိုပါလို့ပဲ ပြောချင်ပါတယ်။

■ မေး – လတ်တလော အနုပညာလှုပ်ရှားမှုဆိုရင်ရော ဘာတွေရှိမလဲ။

■ ဖြေ – လောလောဆယ် The Voice က ဘာတွေစီစဉ်ထားလဲ မသိသေးဘူး။ သူတို့အစီအစဉ်ရှိတာတွေ ပါဝင်ပေးဖြစ်မယ်။ အင်တာဗျူးတွေ ဖြေဖြစ်တယ်။ အဲဒီလောက်ပါပဲ။ သီချင်းတွေကတော့ နိုင်သလောက် ဖြည်းဖြည်းချင်း လုပ်သွားဖို့ ရည်မှန်းထားပါတယ်။

ဖြိုးငွေစိုးနှင့် တွေ့ဆုံခြင်း

 

သရုပ်ဆောင်တစ်ဦးအနေနဲ့ အနုပညာနယ်ပယ်ထဲမှာ ဖြည်းဖြည်းမှန်မှန် ခြေလှမ်းတွေနဲ့ လျှောက်လှမ်းခဲ့သူ အနုပညာရှင်တစ်ဦးကတော့ ဖြိုးငွေစိုးပါ။ သူပိုင်နိုင်ရာ ဇာတ်ရုပ်ကိုသာ အကောင်းဆုံးကြိုးစားခဲ့သူ ဖြစ်တာနဲ့အညီ သူ့ရဲ့အနုပညာအပေါ် ပရိသတ်တွေရဲ့အားပေးမှုကို အမြဲရရှိခဲ့သူတစ်ဦးပါ။ မေ ၂၅ ရက်မှာတော့ သူပါဝင်သရုပ်ဆောင်ထားတဲ့ ‘မေတ္တာထားတာ အဟုတ်ကိုပဲ’ ဇာတ်ကားမှာ အဟုတ်ဆိုတဲ့ ဇာတ်ကောင်စရိုက်နဲ့တွေ့မြင်ရမယ့် ဖြိုးငွေစိုးနဲ့ တွေ့ဆုံခိုက် လတ်တလော အနုပညာလှုပ်ရှားမှုတွေ၊ သူလျှောက်လှမ်းခဲ့တဲ့ အနုပညာမှတ်တိုင်တွေအပြင် ‘မေတ္တာထားတာအဟုတ်ကိုပဲ’ ဇာတ်ကားကြီးနဲ့ ပတ်သက်တဲ့အကြောင်းအရာတွေကို တွေ့ဆုံမေးမြန်းဖြစ်ခဲ့ပါတယ် …

■ မေး – လတ်တလော လုပ်ဖြစ်နေတဲ့ အနုပညာလှုပ်ရှားမှုတွေကို အရင်သိချင်ပါတယ်။
ဖြေ – ဇာတ်လမ်းတွဲလေးတစ်ခု ရိုက်ဖို့အတွက် ကျွန်တော်တို့တွေ ပြင်ဆင်နေတာတွေရှိတယ်။ နောက်ပြီးတော့ ဇွန် ၁ ရက်မှာ ရုပ်ရှင်ကားကြီးတစ်ကား ရိုက်ကူးဖို့လည်း ရှိပါတယ်။ ကျွန်တော်တို့ စိတ်တူကိုယ်တူ သူငယ်ချင်းတွေစုပြီး ဇာတ်ညွှန်း၊ ဒါရိုက်တာမင်းသားစသည်ဖြင့် အုပ်စုလေးဖွဲ့ပြီး အနုပညာဖန်တီးမှုတွေ လုပ်ဖြစ်နေပါတယ်။ အဲဒီအနုပညာလှုပ်ရှားမှုတွေကိုလည်း ပရိသတ်တွေ မကြာခင် သိမြင်ရတော့မှာပါ။

■ မေး – မကြာခင် ရုံတင်ပြသတော့မယ့် ‘မေတ္တာထားတာ အဟုတ်ကိုပဲ’ ရုပ်ရှင်ဇာတ်ကားမှာ ဘယ်လိုဇာတ်ကောင်စရိုက်မျိုးနဲ့ ပါဝင်ထားလဲ သိပါရစေ။
ဖြေ – ‘မေတ္တာထားတာအဟုတ်ကိုပဲ’ ဇာတ်ကားမှာ ကျွန်တော်က အဟုတ်ဆိုတဲ့ဇာတ်ကောင်အနေနဲ့ ပါဝင်သရုပ်ဆောင်ထားပါတယ်။ အဲဒီဇာတ်လမ်းမှာ ကျွန်တော်က လက်ရှိအသက်အရွယ်ထက်ကြီးတဲ့ အသက်အရွယ်မျိုးနဲ့ ပါဝင်သရုပ်ဆောင်ရပါတယ်။ ၀င့်ယမုံလှိုင်ရဲ့ ဦးလေးဖြစ်လောက်မယ့် အရွယ်မျိုးပေါ့။ ဆံပင်အဖြူတွေနဲ့။ ကျွန်တော့်အတွက်တော့ တစ်ခါမှမလုပ်ဖူးတဲ့ ဇာတ်ရုပ်မျိုးဖြစ်နေတော့ ကျွန်တော့်အတွက် ခက်ခက်ခဲခဲလုပ်ရတဲ့ ဇာတ်ရုပ်မျိုးလို့ စိတ်ထဲမှာထင်တယ်။ ကိုယ်ကတော့ အသစ်အဆန်းတစ်ခုကို ကြိုးစားပြီး လုပ်နိုင်ခဲ့တယ်လို့ ခံစားရတယ်။ ကောင်းတယ်ဆိုးတယ် ဆိုတာကတော့ ပရိသတ်တွေက ဆုံးဖြတ်ပေးရမှာပါ။

■ မေး – ကိုဖြိုးဘက်က ဒီဇာတ်ကားအတွက် ဘယ်လိုတွေ ကြိုးစားအားထုတ်ခဲ့ရလဲ သိချင်ပါတယ်။
ဖြေ – သေချာတာတစ်ခုကတော့ ကျွန်တော်လုပ်နေကျ၊ မြင်ဖူးနေကျမဟုတ်တဲ့ အသစ်အဆန်းတစ်ခု၊ ကျွန်တော်မတတ်သေးတဲ့ သင်ခန်းစာသစ်တစ်ခုကို ကြိုးစားပြီး လုပ်ကြည့်ရတာဖြစ်လို့ ပရိသတ်တွေကြည့်တဲ့အခါမှာတော့ ကျွန်တော့်ကို ပရိသတ်တွေက မြင်နေကျမဟုတ်တဲ့ ပုံစံသစ်တစ်ခုနဲ့ မြင်ရမှာဖြစ်လို့ အဲဒါတစ်ခုကတော့ ကျွန်တော့်အတွက် အကျေနပ်ဆုံးတစ်ချက်ပါပဲ။ ကျွန်တော်ကိုယ်တိုင်ကလည်း ကျွန်တော့်ကို ပြောင်းလဲပေးနိုင်မယ့်သူကို တော်တော်မျှော်လင့်တယ်။ ဦးလေး (ဒါရိုက်တာထွန်းအောင်ဇော်) နဲ့ဆို ကျွန်တော်နှစ်ကားရိုက်ထားတယ်။ အဲဒီဇာတ်ကားနှစ်ကားလုံးမှာ ကျွန်တော်အပြောင်းအလဲလေးတွေ လုပ်ရတယ်။ အဲဒီနှစ်ကားလုံးမှာ ကျွန်တော့်အတွက် တော်တော်အသစ်အဆန်းဖြစ်တယ်။ မလုပ်ဖူးတာလေးတွေ လုပ်ရတယ်။ ဒီဇာတ်ကားရိုက်ကူးဖို့အတွက် ဆံပင်ပြင်ဆင်မှုပိုင်းတွေ၊ အ၀တ်အစားတွေကို ဦးလေး (ဒါရိုက်တာ) ဆီကို အဆင်ပြေလားဆိုပြီး လာလာပြရတယ်။ အဲဒီအချိန်တုန်းက ကျွန်တော့်အတွက် အသစ်တစ်ယောက် ဘ၀တုန်းကလိုပဲ ပြင်ဆင်ကြိုးစားဖြစ်တယ်။ ကျွန်တော်တို့မင်းသားဖြစ်စကလိုပဲ ဘယ်ဇာတ်ဝင်ခန်းအတွက် ဘယ်အ၀တ်အစားဆိုတာမျိုးကအစ သေချာပြင်ဆင်ပြီး မရိုက်ခဲ့ရတဲ့အချိန်ကကြားထဲမှာ အချိန်တော်တော်ကြာသွားပြီးမှ ဒီဇာတ်ကားမှာ ကျွန်တော် အဲဒီလိုပြန်ပြီး ပြင်ဆင်ကြိုးစားရိုက်ကူးခွင့်ရခဲ့တဲ့ ဇာတ်ကားပါ။ ကိုယ်တိုင်ကလည်း အလုပ်ကို အလုပ်နဲ့တူအောင် သေချာပြန်လုပ်ချင်နေတဲ့အချိန်မျိုးမှာ ဒီဇာတ်ကားလေးကို ပြန်ရိုက်ကူးခွင့်ရခဲ့တာပါ။ ဒီကားမရိုက်ခင် ရှေ့ပိုင်းကာလ အတော်ကြာလောက်က ရိုက်မယ်ဟေ့ဆိုမှ ထပြင်ဆင်ပြီးရိုက်ခဲ့ရတာမျိုး၊ ကိုယ့်ကိုမရသေးဘူး ပြန်ရိုက်မယ်ဆိုတာမျိုး မကြားခဲ့ရသလို ကိုယ်က ဒီအခန်းလေး ပြန်ရိုက်ပါရစေဆိုရင်တောင်မှ သူတို့က စိတ်ဆိုးချင်တာမျိုးတွေ ကြုံခဲ့ရတာလေ။ ဒီဇာတ်ကားမှာတော့ ကိုယ့်ကိုပြန်ပြီး လေ့လာသင်ယူမှုတွေ ဖြစ်စေခဲ့တယ်လို့ ယူဆသလို သင်ခန်းစာအသစ်တွေ ရတယ်လို့လည်း ခံစားရပါတယ်။

■ မေး – ကိုဖြိုးအနေနဲ့ ဇာတ်လမ်း၊ ဇာတ်ကောင် အရမ်းရွေးချယ်ခဲ့တာက ကိုယ့်ရဲ့အနုပညာလမ်းမှာ ရှေ့ကိုပိုရောက်ဖို့ ခက်ခဲတာမျိုးရှိခဲ့တယ်လို့ ခံစားရလား။
ဖြေ – ရှိခဲ့မှာပါ။ ကျွန်တော့်အနေနဲ့ကတော့ ကျွန်တော်မလုပ်တတ်တဲ့ မိန်းမလျာဇာတ်ရုပ်တွေအပြင် တခြားကျွန်တော်မလုပ်တတ်တဲ့ ဇာတ်ကောင်ပုံစံတွေ ကျွန်တော်နဲ့လိုက်မယ်လို့ မထင်တဲ့ ဇာတ်ကောင်ပုံစံတွေ ကျွန်တော်မလုပ်ဖြစ်ခဲ့ဘူး။ တချို့က ထွင်တယ်လို့ထင်မယ်။ အဲဒါမဟုတ်ပါဘူး။ ပိုက်ဆံရတာပဲ လုပ်ချင်တာပေါ့၊ အဲဒါလုပ်မှ နာမည်ကြီးမယ်ဆို ပိုတောင်လုပ်ချင်သေးတယ်။ ဒါပေမဲ့ ကျွန်တော်မှမလုပ်ရဲတာ၊ မလုပ်တတ်တာ။ အဲဒီလို ကျွန်တော်မလုပ်တတ်တာ၊ မလုပ်ရဲတာတစ်ခုကိုလည်း ပိုက်ဆံအတွက်နဲ့ကြံဖန်ပြီး သည်းခံမလုပ်ခဲ့ဘူး။ ကျွန်တော်သီချင်းမဆိုတတ်တဲ့အတွက် စီဒီဖွင့်ထားပြီး ဟန်ပဲလုပ်နေရမယ်ဆိုတာမျိုးတောင် ကျွန်တော်ပိုက်ဆံရပေမဲ့ သွားမဆိုဘူး။ တစ်ခါတလေကျရင် ကျွန်တော်လုပ်နေတဲ့ ပရော်ဖက်ရှင်နယ်အလုပ်မှာ ဒါမျိုးက ရွေးချယ်ပိုင်ခွင့်၊ ငြင်းပိုင်ခွင့်သိပ်မရှိဘူး။ ဒါမျိုးကို ကျွန်တော်ကရှောင်တယ်၊ ငြင်းတယ်ဆိုတဲ့အခါ အစ်မပြောသလိုပဲ ကျွန်တော့်အနုပညာလမ်းကြောင်းမှာ ထိခိုက်ကောင်း ထိခိုက်နိုင်ပါတယ်။ ဒါပေမယ့် ကျွန်တော်ကတော့ အဲဒါကို ကျွန်တော့်အတွက် အနုတ်လက္ခဏာဆောင်တယ်လို့ မယူဆပါဘူး။ ကျွန်တော်မှ မလုပ်ချင်ခဲ့တာကိုး။ ကိုယ်လုပ်ချင်တာကို လုပ်ပြီးပဲအောင်မြင်တဲ့ နေရာတစ်ခုဆီကို သွားချင်တယ်၊ ပရိသတ်တွေကို အနုပညာတွေ ချပြချင်တယ်။ မလုပ်ချင်တာတွေ၊ မကြိုက်တာတွေ၊ ခံစားလို့မရတာတွေကို ငွေကြေးအတွက်၊ အောင်မြင်မှုအတွက်၊ ပရိသတ်ချစ်ခင်မှုအတွက် ဘာအတွက်မှ ကျွန်တော်မလုပ်ချင်တာကို မလုပ်ဘူး။ ကိုယ်မလုပ်ချင်တာဆိုတော့ စေတနာလည်းမပါတဲ့အတွက် မကောင်းနိုင်ဘူးလေ။

■ မေး – ‘မေတ္တာထားတာ အဟုတ်ကိုပဲ’ ဇာတ်ကားနဲ့ပတ်သက်ပြီး ပရိသတ်တွေကို ပြောချင်တာရှိရင်။
ဖြေ – ဒီဇာတ်ကားမှာက ဟာသအနုပညာကို ပိုင်ပိုင်နိုင်နိုင်လုပ်နိုင်တဲ့ အနုပညာရှင်တွေ အင်အားစုံတယ်။ နောက်တစ်ခုက သရုပ်ဆောင်တွေကို မျိုးဆက်အစုံကြည့်ခွင့်ရမှာဖြစ်ပြီး ပါဝင်ကြတဲ့ အနုပညာရှင်တွေအားလုံးက သူ့နေရာနဲ့သူ အဖြစ်အပျက်အကြောင်းအရာတွေ အစုံကို မျှမျှတတလေး ဇာတ်လမ်းက သွားထားတယ်။ အဲဒါကြောင့် ဟာသဇာတ်ကားကို ဇာတ်လမ်းဇာတ်ကွက်လေးနဲ့ တည်တည်ငြိမ်ငြိမ် ဣနြေ္ဒရရလေးကြည့်ရ ရယ်ရမယ့် ဇာတ်ကားမျိုးပါ။

သရုပ်ဆောင်နန်းဆုဦးနှင့် တွေ့ဆုံခြင်း

မေ ၁၈ ရက်တွင် စတင်ပြသမည့် ဥပါဒါန်ဟု အမည်ပေးထားသော ဇာတ်ကားမှာ သံဃာတော်တစ်ပါးအား အကြည်ညိုလွန်မိရာမှ သဒ္ဓါစိတ်လွန်ကဲမှုကြောင့်အပြစ် ဖြစ်ရသည့် ဒါယိကာမတစ်ဦး၏ အကြောင်းအား ပုံဖော်ထားခြင်းဖြစ်သည်။ တွေ့မြင်ရခဲသည့် ဘာသာရေးအခြေပြု ဇာတ်ကားတစ်ကားဖြစ်ပြီး ယင်းဇာတ်ကားတွင် စွန့်စားမှုများသည့်ဇာတ်ရုပ်ဖြစ်သော သံဃာတော်အား သဒ္ဓါလွန်ကဲမိသူ ဒါယိကာမတစ်ဦးအဖြစ် သရုပ်ဆောင်နန်းဆုဦးက ပီပြင်စွာ ပုံဖော်ထားပါသည်။ ယင်းသို့စွန့်စားမှုများသည့် ဇာတ်ရုပ်ကို လက်ခံပါဝင်ခဲ့သည့် သရုပ်ဆောင်နန်းဆုဦးနှင့် တွေ့ဆုံ၍ ဇာတ်ကားရိုက်ကူးမှု အတွေ့အကြုံများ၊ ဇာတ်ရုပ်အပေါ်ထားသည့် ခံယူချက်အပါအ၀င် သိလိုသည်များအား မေးမြန်းဖြစ်ခဲ့သည်။

■ မေး – ဥပါဒါန်ဇာတ်ကားမှာ ပါဝင်ဖြစ်ပုံလေး အရင်ပြောပြပေးပါဦး။

ဖြေ – ဒီဇာတ်ကားကိုမရိုက်ခင် နှစ်လ၊ သုံးလလောက်အလိုမှာ ဒါရိုက်တာဦးအောင်က ဇာတ်လမ်းလာပြတဲ့အခါ ဘာသာရေးဇာတ်ကားလည်းဖြစ်တယ်။ သူပေးတဲ့ Message တွေကလည်း ဗုဒ္ဓဘာသာဝင် လူငယ်လူရွယ်တွေ သိသင့်တာ၊ မှတ်သားသင့်တာတွေ ဖြစ်နေတယ်။ ဒါကြောင့် လက်ခံဖြစ်သွားတာပါ။

■ မေး – ဒီဇာတ်ကားမှာ အဓိကပေးချင်တဲ့ Message ဆိုရင်ရော။

ဖြေ – အဓိကတော့ ဘယ်အရာမဆို တအားကြီး စိတ်စွဲလန်းရင် မကောင်းဘူး။ လွန်သွားရင် မကောင်းဘူး။ ဒီဘုန်းကြီးကျောင်းပဲ လှူချင်တယ်။ ဒီဘုန်းကြီးကိုပဲ လှူဒါန်းချင်တယ်။ အဲဒါတွေက အစွဲအလမ်းတွေပေါ့။ ဒါတွေဖြစ်လာရင်တော့ မကောင်းဘူး။ ဒါလေးတွေကို ပညာပေးတဲ့ဇာတ်ကားလေးပါ။

■ မေး – ဒီကာရိုက်တာမျိုးက နည်းနည်းလေး အန္တရာယ်များတဲ့ဇာတ်ရုပ်မျိုးလည်းဖြစ်တော့ စိုးရိမ်စိတ်ရှိလား။

ဖြေ – ဒီလိုဇာတ်ရုပ်မျိုးက တစ်ခါမှမလုပ်ဖူးဘူး။ Risk လည်း ရှိတယ်။ တာဝန်ကြီးတယ်။ ဒါရိုက်တာဦးအောင်နဲ့လည်း တိုင်ပင်ဖြစ်တယ်။ ဒီကာရိုက်တာကို တာဝန်မယူခင်မှာ သေချာလည်း စဉ်းစားပါတယ်။ တစ်ခုကတော့ ဒီဇာတ်ကားက ဘာသာရေးဇာတ်ကားလည်း ဖြစ်တယ်။ တစ်သက်လုံးမှာ တစ်ခါလာဖို့ဆိုတာ အခွင့်အရေးနည်းတယ်လေ။ ဒါကြောင့် ဘ၀မှာ အခုလို အခွင့်အရေးရတုန်း ရိုက်မယ်ဆိုတဲ့စိတ်နဲ့ရိုက်ဖြစ်တယ်။ အဓိကတော့ ရည်ရွယ်ချက်ကောင်းမွန်စွာနဲ့ ရိုက်ကူးတဲ့ ဇာတ်ကားဖြစ်တဲ့အတွက် အခုဒီဇာတ်ရုပ်ကလည်း အနုပညာနဲ့ ပဲပေးချင်တဲ့ Message လေးကို ဖော်ဆောင်တာဖြစ်တယ်။ ပရိသတ်တွေလည်း နားလည်လိမ့်မယ်လို့ ယုံကြည်တယ်။

■ မေး – ရိုက်ကူးတုန်းကရော အခက်အခဲရှိခဲ့လား။

ဖြေ – ရိုက်တုန်းက ဘာအခက်အခဲမှ သိပ်မရှိပါဘူး။ မှတ်မှတ်ရရဆိုရင်တော့ ဒီဇာတ်ကား ပထမဆုံးစရိုက်ဖို့ ကန်တော့ပွဲပေးတဲ့နေ့မှာ ရွှေတိဂုံဘုရားမှာ ရိုက်ကွင်းတည်တယ်။ အဲဒီမှာ နန်းဆုတို့ဇာတ်ကားမှာပဲ ပါဝင်မယ့် အမျိုးသမီးတစ်ဦးကို နဂါးဝင်ပူးတာ တွေ့ရတယ်။ တစ်ခါမှ မမြင်ဖူးဘူး။ ပြီးတော့ ဇာတ်ကားမရိုက်ခင် ပြင်ဆင်ချိန်မှာ Consideration နဲ့ ပတ်သက်လို့ စိတ်ငြိမ်အောင်လို့ တရားကြိုထိုင်တာမျိုးတွေ ရှိတယ်။ အဓိကတော့ စိတ်ငြိမ်အောင်လို့ ပြင်ဆင်ခဲ့ရပါတယ်။

■ မေး – ဒီဇာတ်ကားနဲ့ ပတ်သက်လို့ ကိုယ့်ကိုယ်ကိုယ် ကျေနပ်မှုဆိုရင်ရော။

ဖြေ – ဒီဇာတ်ကားက နန်းဆုအတွက် ကိုယ့်ကိုယ်ကိုယ်ပြန်ကြည့်မယ်ဆိုရင် ကိုယ်လုပ်ခဲ့တာကို အားရကျေနပ်မှုရှိတဲ့ ဇာတ်ကားတစ်ကားဖြစ်တယ်။ အနုပညာရှင်တစ်ယောက်အနေနဲ့ ကြုံရခဲတဲ့ ဘာသာရေးဇာတ်ကားမှာ ပါဝင်ခွင့်ရခဲ့တယ်။ ခါတိုင်းလုပ်နေကျ ဇာတ်ရုပ်မျိုးတွေလည်း မဟုတ်ဘူး။ ဇာတ်ရုပ်အသစ်တစ်ခု အနေနဲ့ တွေ့ရမှာဖြစ်ပါတယ်။ ဒီဇာတ်ကားကိုကြည့်မယ်ဆိုရင် ဘာသာရေးနဲ့ပတ်သက်တဲ့ ပညာလေးတွေ၊ သိမှတ်ဖွယ်လေးတွေလည်း ရမှာပါ။ ဒါကြောင့် ကြည့်လည်းကြည့်စေချင်တယ်။ လာကြည့်ပါလို့လည်း ဖိတ်ခေါ်ချင်ပါတယ်။

■ မေး – ဒီဇာတ်ကားမှာ ဘာသာတရားကိုင်းရှိုင်းတဲ့ အမျိုးသမီးအဖြစ် အပြည့်အ၀ လုပ်နိုင်ခဲ့တယ်လို့ ယုံကြည်လား။

ဖြေ – နန်းဆုကတော့ ဦးအောင်သင်ကြားပြသပေးတဲ့အတိုင်း အကောင်းဆုံးလုပ်နိုင်ခဲ့တယ်လို့ ယုံကြည်ပါတယ်။ ဒီ Result ကတော့ ပရိသတ်တွေရဲ့ ဆုံးဖြတ်မှုကို စောင့်ကြည့်ရမှာပေါ့။ ဇာတ်ကားတစ်ကား ရိုက်မယ်ဆိုရင် ကိုယ့်အတွက် လုပ်ကွက်ရှိလား။ ပြီးတော့ကိုယ်ရိုက်တဲ့ဇာတ်ကားမှာ ပရိသတ်တွေအတွက် ဘယ်လိုအသိပညာမျိုးကို ပေးခွင့်ရမလဲဆိုတာ စဉ်းစားပါတယ်။ ဒီဇာတ်ကားမှာကတော့ နန်းဆုရဲ့အနုပညာတစ်ခုကို ပရိသတ်တွေအတွက် တင်ဆက်ခွင့်ရခဲ့တယ်။ ပရိသတ်တွေအတွက် စဉ်းစားစရာ အသိပညာတစ်ခုရမယ်လို့ ယုံကြည်ပါတယ်။

■ မေး – နန်းဆု လတ်တလောရော တခြားဘာဇာတ်ကားတွေ ရိုက်နေလဲ။

ဖြေ – လောလောဆယ်တော့ ကိုနေဒွေးနဲ့ ဗီဒီယိုဇာတ်ကားတစ်ကား ရိုက်ထားပါတယ်။ ဒီဇာတ်ကားလေးကတော့ ဖန်စီဇာတ်ကားလေးပေါ့။ နန်းဆုရိုက်ထားတဲ့ ရုပ်ရှင်ကားကြီးတွေလည်း ရုံတင်ဖို့တွေ ရှိပါသေးတယ်။ နောက်ထပ်ပြောထားတဲ့ ဇာတ်ကားတွေလည်း ရှိပါတယ်။

■ မေး – ကိုယ်ပိုင်ထုတ်လုပ်ရေးအနေနဲ့ ဇာတ်ကားတွေ ရိုက်နေကြတာမျိုးလည်းရှိတော့ နန်းဆုရော အဲဒီလိုစိတ်ကူးမျိုးရှိလား။

ဖြေ – စိတ်ကူးယဉ်ထားတာတော့ရှိတယ်။ ဒါပေမဲ့ လက်တွေ့မှာတော့ အများကြီးလိုပါသေးတယ်။ လောလောဆယ်တော့ ကိုယ်ရိုက်ခွင့်ရတဲ့ဇာတ်ရုပ်ကိုပဲ အကောင်းဆုံးဖြစ်အောင် ကြိုးစားနေပါတယ်။

■ မေး – ဥပါဒါန်ဇာတ်ကားက နန်းဆုဦးအတွက် ဘ၀မှာအမှတ်တရဖြစ်မယ့် ဇာတ်ကားလို့ပြောလို့ရမလား။

ဖြေ – ပြောလို့ရပါတယ်။ တကယ်လည်း အမှတ်တရပါပဲ။ ဘာသာရေးဇာတ်ကားတစ်ကားမှာ ပါဝင်ခွင့်ရတယ်။ လူငယ်တွေ အမှတ်တမဲ့ စိတ်တစ်ခုနဲ့ မှားယွင်းသွားတတ်တာကို ပညာပေးထားတာလေးလည်းပါတယ်။ ဒီလိုအန္တရာယ်များတဲ့ ဇာတ်ရုပ်တစ်ခုကို ပါဝင်ခွင့်ရခဲ့တာကတော့ တကယ့်ကိုအမှတ်တရပါ။

■ မေး – ပရိသတ်ကိုပြောချင်တဲ့ စကားလက်ဆောင်များရှိမလား။

ဖြေ – ဒီဇာတ်ကားလေးက မေ ၁၈ ရက်မှာ စတင်ပြသပါတော့မယ်။ ပရိသတ်တွေအတွက်လည်း ကြည့်ရတဲ့အခါ အသိအမြင်လေးတစ်ခုတော့ရမယ်လို့ ယုံကြည်ပါတယ်။ ဒါကြောင့်အားပေးစေချင်ပါတယ်။ နောက်ထပ်လည်း အနုပညာလုပ်ငန်းတွေမှာ အကောင်းဆုံး ကြိုးစားသွားပါဦးမယ်။ အားပေးကြပါဦးလို့ ပြောချင်ပါတယ်။

တေးသံရှင် J-me နှင့် တွေ့ဆုံခြင်း

‘ကျွန်တော့်အခွေသစ်ကို နားထောင်ချင်တဲ့ ပရိသတ်တွေရော၊ ကျွန်တော်ဘာတွေလုပ်နေလဲဆိုပြီး သိချင်နေကြတဲ့ ပရိသတ်တွေရော အခွေထွက်လာတဲ့အခါ နားထောင်ကြည့်ပါ။ တစ်ခုခုတော့ရသွားမယ်ဆိုတာ ကျိန်းသေပါတယ်’

ဟစ်ဟော့ပ်ဂီတ ရေစီးကြောင်းတွင် ပရိသတ်အခိုင်အမာရရှိထားသူ တေးသံရှင် J-me က အချိန်အပိုင်းအခြားတစ်ခုအထိ ဂီတအနုပညာလှုပ်ရှားမှုများ အတန်ငယ်ကျဲပါးသွားခဲ့ပြီး မေ ၂၆ ရက်တွင် တတိယမြောက် တစ်ကိုယ်တော်တေးစီးရီး ‘အမွေစားအမွေခံ’ အား ထွက်ရှိရန် စီစဉ်ထားသည်။ J-me ၏ တတိယမြောက် တစ်ကိုယ်တော်စီးရီးတွင် ၎င်းဖြတ်သန်းခဲ့သည့် လူငယ်ဘ၀အတွေ့အကြုံများ၊ မှားယွင်းခဲ့မိသည်များ၊ အတွေးအမြင်များအား လူငယ်များထံ လက်ဆင့်ကမ်းသည့် အကြောင်းအရာများကိုလည်း ထည့်သွင်းထားသည်ဟု သိရသည်။ တေးသံရှင် J-me နှင့်တွေ့ဆုံ၍ ‘အမွေစားအမွေခံ’ တေးစီးရီးနှင့်ပတ်သက်၍ မေးမြန်းထားသည်များ၊ ဟစ်ဟော့ပ်ဂီတ ရေစီးကြောင်းအပေါ် သုံးသပ်ထားသည်များအား ဖော်ပြလိုက်ပါသည်။

■ မေး – မေ ၂၆ မှာ ထွက်ဖို့စီစဉ်ထားတဲ့ တစ်ကိုယ်တော်အခွေနဲ့ ပတ်သက်လို့ ပြောပြပါဦး။
ဖြေ – အမွေစားအမွေခံအခွေက မေ ၂၆ မှာ ထွက်မယ်။ ကျိန်းသေတယ်။ ပွဲလုပ်ဖြစ်မလုပ်ဖြစ်ကတော့ ညှိနှိုင်းနေကြတယ်။ အဆင်ပြေရင် တစ်နေရာရာမှာပွဲလုပ်ဖြစ်မယ်။ စီဒီတစ်ချပ်ဝယ်တဲ့သူတိုင်းကိုတော့ ပိုစတာပေးဖြစ်မှာတော့ ကျိန်းသေတယ်။ ကျွန်တော့် Fan Page တစ်ခုရှိတော့ အဲဒီကနေ ကြေညာပေးသွားမယ်။

■ မေး – အခွေသစ်မထွက်တာ နည်းနည်းကြာသွားပြီဆိုတော့ ဘယ်လိုဖန်တီးမှုပုံစံအသစ်တွေ မြင်တွေ့ခွင့်ရမလဲ။
ဖြေ – အရင်နဲ့မတူတဲ့ ပုံစံမျိုးတွေပါမယ်။ မကြိုက်မချင်းလုပ်ထားတဲ့ သီချင်းတွေပါမယ်။ တီးလုံးတွေကအစ သေချာလေးတီးထားတယ်။ သီချင်းပုံစံအားလုံးကိုလည်း အချိန်ယူပြီးစိတ်တိုင်းကျတဲ့အထိ ပြင်ဆင်ပြီးမှ ထွက်ဖို့စီစဉ်ဖြစ်တာပါ။

■ မေး – သီချင်းတွေက ဘယ်နှစ်ပုဒ်လောက်ပါလဲ။
ဖြေ – ကြားထဲလည်း အချိန်တော်တော်ယူထားတယ်ဆိုတော့ သီချင်းတွေကတော့ အများကြီးရှိတယ်။ စိတ်တိုင်းကျတဲ့သီချင်းတွေ အကုန်ထည့်ရင် နှစ်ခွေစာလောက်ဖြစ်သွားမယ်။ အဲဒါကြောင့် ပြန်စိစစ်ပြီးလုပ်ထားတာ။ သီချင်း ၁၀ ပုဒ်ပါပါမယ်။ Featuring အနေနဲ့ ပိုပိုဟေသာ၊ ကျားပေါက်ပါမယ်။ ဂျောက်ဂျက်တို့၊ ကြက်ဖတို့ကလည်း ဟာမိုနီတွေ ၀င်ဆိုပေးထားတယ်။

■ မေး – ဒီအခွေထွက်ဖို့က ကြားထဲမှာ အချိန်တော်တော်လေး ခြားသွားတယ်နော်။
ဖြေ – အဓိက ဒီအခွေလုပ်ဖြစ်တာက ပရိသတ်တွေအတွက်ပါပဲ။ ပရိသတ်တွေက ကျွန်တော့်သီချင်းသစ်တွေ နားထောင်ချင်တယ်။ ပရိသတ်တွေဆိုတာလည်း ကျွန်တော့်ညီအစ်ကိုတွေ သူငယ်ချင်းတွေပဲလေ။ သူတို့နဲ့ ကျွန်တော်နဲ့အမြဲတမ်းအတူ မျှဝေခံစားလို့ရတယ်။ ဒါကြောင့် သီချင်းသစ်တွေ ဖန်တီးဖြစ်တာပါ။

■ မေး – စီးရီး Title က အမွေစားအမွေခံလို့ ပေးဖြစ်တာကရော။
ဖြေ – အဓိကတော့ အသက်မပြည့်ရင် အမွေမခံရဘူး။ ဒီအခွေကိုဆိုတဲ့သူရော ရေးတဲ့သူရော၊ နားထောင်ပြီး အားပေးမယ့်သူတွေရော စီးမျောမယ့်သူတွေအားလုံးက အမွေခံထိုက်မယ့်အရွယ်ဖြစ်လာပြီ။ အဲဒီလိုဖြစ်တယ်လို့လည်း ယုံကြည်တဲ့သဘောပဲ။ နှစ်ဦးနှစ်ဖက်လုံးကို ပြောတာပါ။ ပရိသတ်ရော၊ ဖန်တီးသူရောပေါ့။

■ မေး – Music ပုံစံတွေကရော ဘယ်လိုတွေပါမလဲ။
ဖြေ – Fusion ပုံစံတွေပါမယ်။ Electronic ဘက်ယိမ်းမလား၊ ဘယ်ဘက်ယိမ်းမလဲဆိုတာ မပြောထားဘူး။ ကျိန်းသေတာ ဟစ်ဟော့ပ်ဖရိမ်အတွင်းမှာပဲ။ အဲဒီအတွင်းထဲကပဲ ဖန်တီးထားတယ်။

■ မေး – Woofer က The Voice Myanmar သီချင်းဆိုပြိုင်ပွဲကနေ နှုတ်ဆက်သွားရတာနဲ့ပတ်သက်ပြီး ဘယ်လိုသုံးသပ်ချင်လဲ။
ဖြေ – ဒါက ၀ါးလက်ခုပ်တီးတဲ့သူတီးမှာပဲ။ ဒီဂျေပွတ်တဲ့သူက ပွတ်မှာပဲ။ လူတိုင်းက သူ့နေရာနဲ့သူ လုပ်ကြတာပဲလေ။ အတွင်းစိတ်ထဲမှာရှိတဲ့အရာကို သူဘယ်လိုဆွဲထုတ်တင်ပြမလဲ။ အဲဒါက အနှစ်သာရပဲ။ ကျွန်တော်လည်း အဲဒါကိုသဘောကျတယ်။ ကျန်တာတော့ မပြောချင်ဘူး။ သူဆုမရပေမယ့် အခုတစ်တိုင်းပြည်လုံးက သူ့ကိုသိသွားပြီ။ အဲဒါက အဓိကပဲလေ။

■ မေး – အရင်ကလုပ်ခဲ့မိတဲ့ အမှားတွေကို ကျောခိုင်းလိုက်ပြီဆိုတာလည်း လူငယ်တွေကို ပြန်ပြီးမျှဝေပေးပါဦး။
ဖြေ – Main Theme က အဲဒါပါ။ အဲဒါကိုပေးချင်လို့ အဲဒီသီချင်းကို မရမချင်းရေးတယ်။ သုံးလဆက်တိုက် ရေးခဲ့တဲ့အခါ ကိုယ့်ဝိညာဉ်ထဲက လိုချင်တာမရမချင်းပေါ့။ ၀ိညာဉ်စကားလုံးရပြီဆိုမှ စလုပ်တာ။ လူတွေကြိုက်မကြိုက်၊ လက်ခံမခံဆိုတာထက် အဲဒီသီချင်းက အချည်းနှီးတော့ မဖြစ်နိုင်ဘူး။ လေထုထဲကို စေလွှတ်လိုက်တာ အာကာသထဲရောက်သွားတယ်လို့ပဲ ပြောရမယ်။ ဒီသီချင်းက တစ်ခုခုတော့ထူးခြားမယ်လို့ ယုံကြည်တယ်။ ၀ါဒဖြန့်တာ၊ မြှူစွယ်တာမျိုးတွေ ပါမှာမဟုတ်ဘူး။ ကျွန်တော်ပြောချင်တာတွေကို သီချင်းထဲကနေ ပြောထားတာပါ။

■ မေး – အခု ဒီဘက်ခေတ် ဟစ်ဟော့ပ်ရေစီးကို သုံးသပ်မယ်ဆိုရင်ရော ဘယ်လိုသုံးသပ်ချင်လဲ။
ဖြေ – ကျွန်တော်တို့၊ ကိုသားစိုးတို့ခေတ်နဲ့ နှိုင်းယှဉ်မယ်ဆိုရင် အခုခေတ်ကရေစီး ပိုမြန်လာတယ်။ ပိုကြမ်းလာတယ်။ တချို့သူတွေကို ကျွန်တော်တကယ်သဘောကျတယ်။

■ မေး – မျိုးဆက်သစ် ဂီတ၀ါသနာရှင်တွေအတွက် လက်ဆင့်ကမ်းပေးချင်တာရောရှိလား။
ဖြေ – ဆင်းရဲတာချမ်းသာတာတွေနဲ့ လုံးဝမဆိုင်ဘူး။ အဓိကတော့ ကိုယ့်မှာရင်းနှီးမြှုပ်နှံမှုဖြစ်တဲ့ အချိန်မယူထားရင်၊ ၀မ်းစာမပြည့်ရင် ကိုယ်စင်ပေါ်တက်ရတော့မယ့်အချိန် အခွင့်အလမ်းက ကိုယ့်ဆီရောက်လာတဲ့အချိန်မှာ အမိအရ မဆုပ်ကိုင်နိုင်ဘူး။ အိပ်ရေး၀၀မအိပ်ထားရင် စင်ပေါ်ရောက်ရင် အသံမထွက်သလိုမျိုး၊ ပွဲအတွက်အ၀တ်အစားကို လျှော်ဖွပ်မီးပူတိုက်ထားဖို့ လိုသလိုမျိုးပေါ့။ အဲဒီတော့ အမြဲတမ်းကိုယ့်ကိုယ်ကိုယ် ပြင်ဆင်ထားဖို့တော့လိုတယ်။

■ မေး – Galaxy Star သီချင်းဆိုပြိုင်ပွဲမှာလည်း ဒိုင်လုပ်ခဲ့တယ်ဆိုတော့ နောက်ထပ်လုပ်ဖြစ်ဦးမလား။
ဖြေ – လောလောဆယ်တော့ မရှိသေးဘူး။ ကမ်းလှမ်းတယ်ဆိုလည်း ညှိနှိုင်းလို့အဆင်ပြေရင် လုပ်ဖြစ်လိမ့်မယ်။

■ မေး – အခုထွက်မယ့်အခွေကိုရော အားရလား။
ဖြေ – ဒီအခွေက ၂၀၁၄ လောက်ကတည်းက ပြီးနေတဲ့အခွေပါ။ ကိုယ့်အခွေ ကိုယ်စိတ်တိုင်းကျတဲ့အထိ၊ ကြိုက်တဲ့အထိ ပြန်ပြင်နေလို့သာ ဒီလောက်အထိ ကြာသွားတာပါ။ အခု မေ ၂၆ ရက်မှာ The Sun Music Production ကနေ ဖြန့်ချိပါမယ်။ နားထောင်ကြည့်တဲ့ သူတွေအတွက်တော့ တစ်ခုခုရမှာ သေချာပါတယ်။ နားထောင် ကြည့်စေချင်ပါတယ်။

■ မေး – ပရိုမိုးရှင်းရောလုပ်ဖို့ရှိလား။
ဖြေ – လောလောဆယ်တော့ နေရာညှိတုန်းပဲ။ အဆင်ပြေရင် လုပ်ဖြစ်မယ်။ လက်မှတ်ထိုးဖြစ်မှာ မဟုတ်ဘူး။ သီချင်းတွေဆိုမယ်။ အခွေရောင်းမယ်။ ပရိသတ်တွေလည်း J ကြီးရဲ့ လက်မှတ်ထက် သီချင်းတွေဆိုပြတာ ပိုကြားချင်မယ်လို့ထင်တယ်။

အောင်မင်းခန့်နှင့် တွေ့ဆုံခြင်း

MRTV-4 က ရိုက်ကူးထုတ်လွှင့်ခဲ့တဲ့ ရုပ်သံဇာတ်လမ်းတွဲတွေကနေတစ်ဆင့် ပရိသတ်တွေရဲ့ ချစ်ခင်အားပေးမှုကို ရရှိခဲ့တဲ့ အနုပညာရှင်တစ်ဦးကတော့ အောင်မင်းခန့်ပါ။ ပရိသတ်တွေရဲ့ အားပေးချစ်ခင်မှုတွေ ရရှိခဲ့ပြီးနောက်မှာတော့ ရုပ်သံဇာတ်လမ်းတွဲတွေ သာမကပဲ ရုပ်ရှင်နဲ့ ဗီဒီယိုဇာတ်ကားတွေကိုလည်း လက်ခံရိုက်ကူးခွင့်ရခဲ့သူပါ။ သူရဲ့ပါဝင်ထားတဲ့ဗီဒီယို ဇာတ်ကားတွေဟာလည်း ပရိသတ်တွေအားပေးမှုကို ရရှိခဲ့ပြီး လက်ရှိမှာလည်း ရုပ်ရှင်၊ ကြော်ငြာနဲ့ ရုပ်သံဇာတ်လမ်းတွဲတွေကို ဆက်တိုက်ရိုက်ကူးနေရသူ အောင်မင်းခန့် အဓိက ပါဝင်သရုပ်ဆောင်ထားတဲ့ ‘မေတ္တာထားတာ အဟုတ်ကိုပဲ’ ဆိုတဲ့ရုပ်ရှင်ဇာတ်ကားကြီးကို မေလထဲမှာပဲ ရုံတင်ပြသတော့မှာ ဖြစ်ပါတယ်။ ဒါကြောင့် ပရိသတ်တွေ ကြည့်ရှုရတော့မှာဖြစ်တဲ့ ‘မေတ္တာထားတာ အဟုတ်ကိုပဲ’ ဇာတ်ကားနဲ့ ပတ်သက်တဲ့ အောင်မင်းခန့်ရဲ့ ကြိုးစားအားထုတ်မှုတွေ၊ ရင်ခုန်သံတွေနဲ့အတူ လတ်တလော အနုပညာလှုပ်ရှားမှုတွေအကြောင်း မေးမြန်းဖြစ်ခဲ့ပါတယ် ….

■ မေး – လတ်တလော အနုပညာလှုပ်ရှားမှုတွေအကြောင်းကို အရင်သိပါရစေ။

ဖြေ – ‘မနေ့ကဖြစ်သည် ၂’ ဇာတ်လမ်းတွဲလေး ရိုက်ကူးပြီးသွားပါပြီ။ လက်ရှိမှာ ကြော်ငြာတွေရိုက်ဖြစ်နေတယ်။ ပြက္ခဒိန်တွေလည်း ရိုက်ဖြစ်နေပါတယ်။

■ မေး – ‘မနေ့ကဖြစ်သည် ၂’ မှာရော ဘယ်လိုဇာတ်ကောင်စရိုက်မျိုး ပါဝင်သရုပ်ဆောင်ထားလဲ။

ဖြေ – အဲဒီဇာတ်လမ်းမှာကတော့ ကျွန်တော်က ဂျစ်ကန်ကန်နိုင်တဲ့ကောင်လေးတစ်ယောက်၊ ကိုယ်စိတ်ထင်ရာလုပ်တတ်တဲ့ ကောင်လေးအဖြစ် ပါဝင်သရုပ်ဆောင်ထားပါတယ်။

■ မေး – မေတ္တာထားတာ အဟုတ်ကိုပဲ ရုပ်ရှင်ဇာတ်ကားမှာ ပါဝင်သရုပ်ဆောင်ဖြစ်ခဲ့တဲ့ အကြောင်းကိုအရင်ပြောပြပေးပါဦး။

ဖြေ – အဲဒီဇာတ်ကားကြီးမှာ ပါဝင်ဖို့အတွက် ဆရာဦးထွန်းအောင်ဇော်က ကမ်းလှမ်းခဲ့တာပါ။ ကျွန်တော့်အတွက် လုပ်ခွင့်ရတဲ့ ဇာတ်လမ်းမျိုးလေးဖြစ်သလို ၀ါရင့်အနုပညာရှင်တွေနဲ့လည်း တွဲဖက်ပြီး သရုပ်ဆောင်ရတာဖြစ်လို့ ကျွန်တော့်ဘက်က ၀မ်းသာစွာနဲ့ လက်ခံရိုက်ကူးဖြစ်ခဲ့တာပါ။ အဲဒီလို ကမ်းလှမ်းခဲ့တဲ့အတွက် ဆရာဦးထွန်းအောင်ဇော်ကိုရော ပန်းသခင် ထုတ်လုပ်ရေးကိုပါ ကျေးဇူးအများကြီးတင်ရပါတယ်။

■ မေး – ‘မေတ္တာထားတာ အဟုတ်ကိုပဲ’ ဇာတ်လမ်းမှာရော ဘယ်လိုဇာတ်ကောင်စရိုက်မျိုးနဲ့ တွေ့ရမလဲ။

ဖြေ – ‘မေတ္တာထားတာ အဟုတ်ကိုပဲ’ ဇာတ်ကားမှာက ကျွန်တော့်အနေနဲ့ကတော့ လူငယ်ဆန်ဆန် ပေါ့ပေါ့ပါးပါး ဇာတ်ရုပ်မျိုးပါပဲ။ ဟာသဇာတ်လမ်းလေးဖြစ်ပေမယ့် ကျွန်တော့်အနေနဲ့ ၀ါရင့်အနုပညာရှင်ကြီးတွေဖြစ်တဲ့ အန်ကယ်လေး (လူမင်း) ဦးဗေ (ဗေလုဝ) တို့ အပြင် အခြားဝါရင့်အနုပညာရှင်တွေ အများကြီးနဲ့ တွေ့ဆုံခွင့်ရတဲ့အတွက် ကျွန်တော့်အတွက် ပညာတွေအများကြီးရခဲ့သလို အနုပညာ အခွင့်အရေးကောင်းလည်း ဖြစ်ခဲ့ပါတယ်။ ပညာတွေလည်း အများကြီးရခဲ့သလို ကျွန်တော့်အနေနဲ့ ပါဝင်ရတဲ့အပိုင်းမှာလည်း လုပ်ခွင့်တွေ အများကြီးရခဲ့တဲ့ ဇာတ်ကားဖြစ်တဲ့အတွက် ကျွန်တော့်အတွက်တော့ တကယ်ကို အမှတ်တရဖြစ်တဲ့ ဇာတ်ကားတစ်ကားပါ။

■ မေး – အောင်မင်းခန့်ကို ဟာသဇာတ်လမ်းမျိုးမှာ သိပ်ပြီးတွေ့ရလေ့မရှိတော့ ‘မေတ္တာထားတာ အဟုတ်ကိုပဲ’ ဇာတ်ကား ဟာသဖြစ်တဲ့အတွက် အခက်အခဲရှိခဲ့လား။

ဖြေ – ‘မေတ္တာထားတာ အဟုတ်ကိုပဲ’ ဇာတ်ကားမှာက ကျွန်တော့်က အမေက မိန်းမပေးစားတာကို မယူချင်တဲ့အတွက် အဖေနဲ့ ဦးလေးရဲ့ အားကိုးနဲ့ မိန်းမမယူရအောင် ကြံဖန်ရတဲ့ဇာတ်လမ်းလေးပါ။ ဇာတ်ကားရိုက်ကူးတုန်းကတော့ ဆရာဦးထွန်းအောင်ဇော်ကရော အန်ကယ်လေး (လူမင်း) တို့ ဦးဗေ (ဗေလုဝ) တို့ ကိုဖြိုးငွေစိုးတို့တွေကလည်း အားလုံးက ၀ိုင်းဝန်းသင်ကြားပေးကြတယ်။ နောက်ပြီး အခြားဝါရင့်အနုပညာရှင်တွေများကြီးပါတဲ့ အတွက် ကျွန်တော့်အနေနဲ့ သိချင်တာတွေကို မေးမြန်းခွင့်ရတယ်။ အားလုံးကလည်း ကူညီသင်ကြားပေးကြတာဖြစ်လို့ အစစအရာရာ အဆင်ပြေခဲ့ပါတယ်။

■ မေး – ‘မေတ္တာထားတာ အဟုတ်ကိုပဲ’ ဇာတ်ကားက အောင်မင်းခန့်အတွက် ပထမဆုံးဇာတ်ကားဖြစ်မလား။

ဖြေ – ဟာသဇာတ်လမ်းမှာဆိုရင် ဒီဇာတ်ကားက ကျွန်တော့်အတွက် ပထမဆုံးရုံတင် ဇာတ်ကားကြီးဖြစ်မှာပါ။ ဟာသဇာတ်လမ်းက ဗီဒီယိုမှာလည်း ထွက်ထားတာရှိသလို ရိုက်ကူးထားတာတွေလည်း ရှိပေမယ့် ပရိသတ်တွေ ကြည့်ရှုခွင့်ရမယ့် ရုပ်ရှင်ဇာတ်ကားကြီး အနေနဲ့ကတော့ ဒီဇာတ်ကားက ပထမဆုံးပါပဲ။

■ မေး – ခုချိန်မှာ အောင်မင်းခန့်အနေနဲ့ ဘယ်လိုဇာတ်ကောင်စရိုက်မျိုးတွေကို သရုပ်ဆောင်ချင်နေလဲ။ ရုပ်ရှင်၊ ဇာတ်လမ်းတွဲ ဘာကိုပိုပြီးရိုက်ကူးချင်လဲ။

ဖြေ – တကယ်ကတော့ ရုပ်ရှင်ပဲဖြစ်ဖြစ်၊ ရုပ်သံဇာတ်လမ်းတွဲပဲဖြစ်ဖြစ် သန်းခြောက်ဆယ်သော ပြည်သူတွေကို ဦးတည်ပြီး ရိုက်ကူးတာဖြစ်လို့ ကျွန်တော့်အတွက်ကတော့ ဘာပဲဖြစ်ဖြစ် ပရိသတ်တွေကို ဖျော်ဖြေခွင့်ရမယ့် အလုပ်ပဲဖြစ်လို့ အတူတူပါပဲ။ ဇာတ်ကောင်စရိုက် အနေနဲ့ဆိုရင်တော့ လက်ရှိမှာ ကျွန်တော့်စိတ်ထဲမှာ အရမ်းချစ်တတ်တဲ့ သမီးရည်းစား အချစ်ဇာတ်ကားလေး ရိုက်ချင်သလို အက်ရှင်ဇာတ်ကားတွေလည်း ရိုက်ချင်နေတယ်။

■ မေး – ကိုယ်ရိုက်ကူးမယ့် ဇာတ်ကားတွေကိုရော ဘယ်လိုမျိုးရွေးချယ်ဖြစ်လဲ။

ဖြေ – ကိုယ်ရိုက်ကူးမယ့်ဇာတ်က ကိုယ့်စိတ်ထဲမှာ တကယ်နှစ်သက်တာမျိုးကို ရွေးတယ်။ ကိုယ်တကယ်ကြိုက်မှ ပရိသတ်တွေလည်း ကြိုက်မယ်လေ။ နောက်ပြီး ဇာတ်ကောင်စရိုက်ဆိုရင်လည်း ကိုယ်တိုင်နှစ်သက်တဲ့ ဇာတ်ရုပ်မျိုးပဲရွေးတယ်။ ကိုယ့်ခံစားချက်က ပါဝင်လုပ်ဆောင်နိုင်မယ့် ဇာတ်ကောင်စရိုက်မျိုးပဲရွေးတယ်။ ဒါမှလည်း ကျွန်တော့်ဘက်က ပီပြင်အောင်လုပ်နိုင်မယ်လို့ ခံယူထားတယ်။

■ မေး – မေတ္တာထားတာ အဟုတ်ကိုပဲ ဇာတ်ကားနဲ့ပတ်သက်ပြီး အမှတ်တရရှိရင်လည်း သိချင်ပါတယ်။

ဖြေ – ‘မေတ္တာထားတာ အဟုတ်ကိုပဲ’ ဇာတ်ကားမှာက ကျွန်တော့်အနေနဲ့ ၀ါရင့်အနုပညာရှင်တွေ အကယ်ဒမီရထားတဲ့ အနုပညာရှင်တွေ အများကြီးနဲ့ တွေ့ဆုံခွင့်ရတဲ့အတွက်ရော သူတို့တွေက ကျွန်တော့်လို အနုပညာရှင်သစ်တစ်ယောက်ကို လက်တွဲပြီး သရုပ်ဆောင် ခွင့်ပေးတဲ့အတွက်ရော ကျွန်တော့်အတွက် တကယ်ကို အမှတ်တရဖြစ်ရသလို ဂုဏ်ယူစရာကောင်းတဲ့ ဇာတ်ကားတစ်ကားပါ။ ဇာတ်လမ်းလေးကလည်း ကောင်းတဲ့အတွက် ပရိသတ်တွေအနေနဲ့လည်း အချိန်ပေးပြီး ကြည့်ရှုရကျိုးနပ်မယ့် ဇာတ်ကားတစ်ကားဖြစ်မှာပါ။

■ မေး – အားပေးနေတဲ့ ပရိသတ်တွေကို ပြောချင်တဲ့စကားရှိရင်။

ဖြေ – ပရိသတ်တွေအားလုံး ကျန်းမာချမ်းသာကြပါစေလို့ ဆုတောင်းမေတ္တာပို့ပါတယ်။ ပရိသတ်တွေရဲ့ ချစ်ခင်အားပေးမှုနဲ့ မေတ္တာတွေကိုလည်း ကျွန်တော်မျှော်လင့်ပါတယ်။ မကြာခင်ရုံတင်တော့မယ့် ‘မေတ္တာထားတာ အဟုတ်ကိုပဲ’ ဇာတ်ကားကိုလည်း ပရိသတ်တွေ လာရောက်ကြည့်ရှု အားပေးဖို့အတွက် ဖိတ်ခေါ်ပါတယ်။

တေးသံရှင် X-Box နှင့် တွေ့ဆုံခြင်း

လူငယ်ဟစ်ဟော့ပ် တေးသံရှင်များကြားတွင် ပရိသတ်အခိုင်အမာဖြင့် ရပ်တည်နေသူတစ်ဦးမှာ တေးသံရှင် X-Box ဖြစ်သည်။ ‘9’၊ ‘99’ တစ်ကိုယ်တော် အယ်လ်ဘမ်နှစ်ခွေ ထွက်ရှိထားပြီး တေးသံရှင်ထက်ယံ၊ ရွှေထူး၊ Lil’Z တို့နှင့် တွဲဖက်ကာ ‘4’ အယ်လ်ဘမ်ဖြင့်လည်း ပရိသတ်အားပေးမှု အခိုင်အမာ ရရှိထားစေသူဖြစ်သည်။ မေ ၁၉ ရက်တွင် ရန်ကုန်မြို့ Hard Rock Cofe ၌ House Party ကျင်းပရန် စီစဉ်ထားသည့် X-Box သည် မေ ၂၀ ရက်တွင် ကျရောက်မည့် မွေးနေ့အတွက် သာမညတောင်သို့ သွားရောက်ကာ သာသနာ့ဘောင်သို့ ၀င်ရောက်လျက် ရှိပါသည်။ တေးသံရှင် X-Box နှင့်တွေ့ဆုံ၍ House Party ဖျော်ဖြေပွဲအတွက် ပြင်ဆင်ထားမှုများ၊ မွေးနေ့တွင် ဖြတ်သန်းရန် စီစဉ်ထားသည်များ၊ ယခုနှစ်အတွင်း ရိုက်ကူးရန် စီစဉ်ထားသည့် ဇာတ်ကားရိုက်ကူးမှုအကြောင်းတို့ကို မေးမြန်းဖြစ်ခဲ့သည်။

■ မေး – မေ ၁၉ မှာလုပ်မယ့် ပွဲလေးအကြောင်း အရင်ဆုံးပြောပြပါဦး။

ဖြေ – ပါတီသဘောမျိုးလုပ်မယ့်ပွဲလေးပါ။ ပရိသတ်နဲ့ နီးနီးကပ်ကပ်လေးတွေ့ပြီး ဖျော်ဖြေခွင့်ရမယ်။ ပရိသတ်နဲ့ အဆိုတော်နဲ့ မိသားစုပုံစံလေး ဖျော်ဖြေခွင့်ရမယ့်ပွဲမျိုးပါ။ အဲဒီလိုဖြစ်အောင်လည်း စီစဉ်ဖြစ်တာပါ။

■ မေး – အရင်ကတော့ ပရိုမိုးရှင်းပွဲတွေကအစ Outdoor Area မှာ လုပ်တယ်။ လူတွေအများကြီးနဲ့ပေါ့။ အခုတော့ နေရာအရ ပရိသတ်လည်း အကန့်အသတ်နဲ့ ဖြစ်သွားမယ်။ အဲဒီလို ရွေးချယ်ဖြစ်တာကရော။

ဖြေ – အဓိကတော့ Freeshow ဆိုရင် ပရိသတ်တွေ အများကြီးလာကြည့်တယ်။ အယ်လ်ဘမ်ပရိုမိုးရှင်းပွဲတွေ လုပ်တဲ့အခါ ပရိသတ်တွေ အများကြီးကလာကြတယ်။ အခုလို ၀င်ကြေးနဲ့ လုပ်ကြည့်တာကတော့ ကိုယ့်ကိုယ်ကိုယ် စာမေးပွဲ စစ်ကြည့်တာလည်းပါတယ်။ ပရိသတ်နဲ့ ကျွန်တော်နဲ့ကြားထဲက ရင်းနှီးမှုလေး ဘယ်လောက်ရှိတယ်ဆိုတာ သိချင်တာကြောင့်လည်း ပါပါတယ်။

■ မေး – ပွဲက ထိုင်ခုံတွေနဲ့လုပ်မယ်ဆိုတော့ သီချင်းအမြူးတွေဆိုတဲ့အခါ ပရိသတ်ကို ပွဲထိန်းနိုင်ဖို့ ဘယ်လိုပြင်ဆင်ထားလဲ။

ဖြေ – အဲဒါလည်း အရသာတစ်ခုပဲ။ လူအုပ်လိုက်ကြီး ပွဲတွေလုပ်ကြတယ်။ မတ်တပ်ရပ်ကြည့်ပြီး လွတ်လွတ်လပ်လပ် အော်ကြတယ်ပေါ့။ အခုကတော့ သီချင်းအေးအေးလေးတွေကို ဂစ်တာနဲ့တီးပြီး ဆိုချင်လည်းဆိုမယ်။ သီချင်းအေးလေးတွေကို Up Beat တွေနဲ့ ပြန်ပြောင်းပြီး ဆိုချင်လည်းဆိုမယ်။ အရသာကတော့ အမျိုးမျိုးရမှာပါပဲ။ အဓိကတော့ ဒီပွဲမှာ လာကြည့်တဲ့ ပရိသတ်တွေက အရင်ရှိုးတွေမှာမြင်နေကျပုံစံမဟုတ်တဲ့ ရသအသစ်တစ်မျိုးကိုရမှာပါ။

■ မေး – မေ ၂၀ ရက်က မွေးနေ့ဆိုတော့ မွေးနေ့အမှတ်တရလုပ်တယ်လို့ ပြောလို့ရလား။

ဖြေ – အဲဒီလို သဘောလည်းပြောလို့ရပါတယ်။ ဒါပေမဲ့ မွေးနေ့ဖျော်ဖြေပွဲဆိုတဲ့ ခေါင်းစဉ်မတပ်ချင်ဘူး။ ဒါကြောင့် ဒီအတိုင်းပဲ မွေးနေ့အကြိုညမှာ လုပ်ဖြစ်တာပါ။

■ မေး – နှစ်တိုင်း မေလမှာပွဲလုပ်ဖို့ ရည်ရွယ်ချက်ရှိတယ်လို့လည်း ကြားတယ်နော်။

ဖြေ – မွေးနေ့ရယ်လို့တော့ မဟုတ်ဘူး။ ပါတီပေါ့။ အဓိက,ကတော့ 99 အယ်လ်ဘမ်အတွက် ပရိုမိုးရှင်းပွဲကို မလုပ်လိုက်ဘူး။ ကျွန်တော့်ဖျော်ဖြေမှုကို ကြည့်ချင်တဲ့ပရိသတ်တွေအတွက် ဒီပွဲကို အစားထိုး လုပ်လိုက်ခြင်းဖြစ်တယ်။ ဒီပွဲက မွေးနေ့ပုံစံမဟုတ်ဘဲ House Party ဆိုတဲ့ နာမည်အတိုင်းပဲ 1,2,3,4 ဆိုပြီး လုပ်သွားမယ့်ပုံစံမျိုးပါ။ ဒီနှစ်ထဲမှာမြို့တစ်မြို့ကို ရွေးချယ်ပြီး House Party နာမည်နဲ့ပဲ ပွဲတစ်ပွဲထပ်လုပ်ဖို့ ဒီပွဲရဲ့ Result ကိုကြည့်ပြီး ဆုံးဖြတ်သွားပါမယ်။

■ မေး – ပွဲမှာ တခြားဘယ်အနုပညာရှင်တွေရော ပါဝင်ဖြစ်မလဲ။

ဖြေ – ကျွန်တော့်သူငယ်ချင်းတွေ ပါဝင်ပါမယ်။ ကျွန်တော့်သူငယ်ချင်းတွေပွဲဆိုလည်း ကျွန်တော်အမြဲတမ်း ပါဝင်ကူညီသီဆိုတယ်။ အခုကျွန်တော့်ပွဲမှာလည်း ကျွန်တော့်သူငယ်ချင်းတွေ ပါပါမယ်။ ထက်ယံ၊ ရွှေထူး၊ Lil’Z၊ Oasix၊ မစန္ဒီမြင့်လွင်၊ မနီနီခင်ဇော် အများကြီးပါပဲ။

■ မေး – ဒီပွဲအတွက် ရင်ခုန်စိတ်လှုပ်ရှားမှုဆိုရင်ရော။

ဖြေ – အများကြီးပဲ။ ညဘက်ဆိုအိပ်မပျော်ဘူး။ တစ်ခုခုများ အဆင်မပြေဖြစ်သွားမလား ဆိုတာလည်း ကြောက်တယ်။ ဒီကြားထဲ ဘုန်းကြီးဝတ်ဦးမှာဆိုတော့ ပွဲမှာလည်း ကတုံးနဲ့ဆိုရမှာ။

■ မေး – သာသနာ့ဘောင်ဝင်မယ်ဆိုတော့ ဘယ်တော့ဝင်ဖြစ်မလဲ။

ဖြေ – မေ ၉ ရက်ကို သာမညစထွက်ဖြစ်မယ်။ သာမညတောင်မှာ ၀တ်မှာပါ။ အဓိကတော့ ကျွန်တော့်အစ်ကို ပြန်လာတယ်။ သူကလည်း ပြည်ပမှာနေတာ ၁၀ နှစ်လောက်ရှိပြီးမှ ပြန်လာတာဆိုတော့ ညီအစ်ကိုနှစ်ယောက် ဘုန်းကြီးအတူဝတ်ချင်တယ်။ အချိန်ညှိတော့ ပွဲမလုပ်ခင်ဘဲရတဲ့အတွက် ဒီအချိန်ပဲ ၀တ်မယ်ဆိုပြီးဖြစ်သွားတာ။ ငါးရက်လောက်ဝတ်ဖြစ်မယ်။

■ မေး – ဒီပွဲမှာဖျော်ဖြေမယ့်ပုံစံကရော ဘယ်လိုပုံစံတွေ ဖျော်ဖြေဖြစ်မလဲ။ သီချင်းတွေကရော ဘယ်လိုရွေးချယ်ဖြစ်မလဲ။

ဖြေ – ဖျော်ဖြေမယ့်ပုံစံကတော့ ဒရမ်သမားတစ်ယောက်ပါမယ်။ ဒီဂျေပါမယ်။ ပါတီနဲ့ ကိုက်ညီတဲ့ မြူးကြွတဲ့ပုံစံတွေ ဖျော်ဖြေဖြစ်ပါမယ်။ ငြိမ်တဲ့သီချင်းတွေလည်းပါပါမယ်။ အကောင်းဆုံး ဖျော်ဖြေတင်ဆက်မှုတွေဖြစ်အောင် ကြိုးစားသွားမှာပါ။ အခြားပွဲတွေမှာ မြင်ရလေ့ရှိတဲ့ X-Box နဲ့တော့ လုံးဝတူမှာမဟုတ်ဘူး။ ရသအသစ်တစ်မျိုးကို ခံစားရမှာပါ။

■ မေး – Hard Rock Cafe မှာလုပ်ဖို့ ရွေးချယ်ဖြစ်တာကရော။

ဖြေ – ဒီနေရာက ရော့ခ်ဂီတသမားတွေ ဖျော်ဖြေလို့ကောင်းတဲ့နေရာပေါ့။ ဟစ်ဟော့ပ်သမားတွေ အတွက်တော့ နည်းနည်းခက်တယ်။ ဒါပေမဲ့ ဘာလို့ရွေးလဲဆိုရင် ဂီတဖျော်ဖြေပွဲတွေ နိုင်ငံတကာမှာလည်း လုပ်လေ့ရှိတဲ့နေရာဖြစ်တာကြောင့်လည်း ပါပါတယ်။

■ မေး – သီချင်းကရော 99 ထဲက အများစုဆိုမှာလား။

ဖြေ – အဲဒီလိုတော့မဟုတ်ဘူး။ သီချင်းဟောင်း အများစုဆိုပါမယ်။ 4 အယ်လ်ဘမ်ထဲက သီချင်းတွေ ဆိုမယ်။ 9 အယ်လ်ဘမ်ထဲကလည်းဆိုမယ်။ 99 ထဲက သီချင်းနည်းနည်းပဲဆိုဖြစ်မယ်။ သီချင်းဟောင်းတွေ မဆိုဖြစ်တာ တော်တော်လေးကြာပြီလေ။

■ မေး – သရုပ်ဆောင်တစ်ယောက်အဖြစ် ဇာတ်ကားရိုက်ကူးဖို့ အစီအစဉ်နဲ့ ပတ်သက်ပြီးလည်း ပြောပါဦး။

ဖြေ – ရိုက်တာတော့ ရိုက်ပါမယ်။ လောလောဆယ်က သီချင်းကိုအာရုံစိုက်နေတော့ ဇာတ်ကားရိုက်တဲ့အပိုင်းကို အချိန်မပေးနိုင်သေးဘူးဖြစ်နေတယ်။ အခုထွက်ခဲ့တဲ့ 99 အခွေကလည်း ကျွန်တော်လုပ်ချင်တာတွေပဲ လုပ်ထားတဲ့အတွက် ကျွန်တော်စိတ်ကျေနပ်ပေမယ့် ပရိသတ်က သိပ်မကြိုက်ဘူး။ သီချင်းသစ်တွေကို ဘယ်လိုဖန်တီးမလဲဆိုတာပဲ ခေါင်းထဲမှာ ရှိနေပါတယ်။ နောက်လထဲလောက်မှာ သီချင်းသစ်တစ်ပုဒ် ထွက်လာဖို့ရှိပါတယ်။ တစ်ပုဒ်ချင်းစီ အရင်ထွက်မယ်။ ပြီးမှ အချိန်နည်းနည်းခြားပြီးမှ အယ်လ်ဘမ်သစ်အနေနဲ့ ထွက်ပါမယ်။

■ မေး – မွေးနေ့မှာရော အမှတ်တရ ဘယ်လိုအစီအစဉ်တွေနဲ့ ဖြတ်သန်းဖို့ရှိမလဲ။

ဖြေ – မေ ၂၀ မှာ ပရိသတ်တွေနဲ့ထပ်တွေ့လို့ရမယ့် အစီအစဉ်လေးတစ်ခု လုပ်နေပါတယ်။ အလှူလေးတစ်ခု လုပ်ချင်တယ်။ ပရိသတ်တွေနဲ့အတူ လှူဖို့လုပ်ဖြစ်မှာပါ။ ပြီးရင်တော့ မိသားစုခရီးလေး ထွက်ဖို့ရှိပါမယ်။ ပရိသတ်တွေနဲ့ တိုင်ပင်ပြီးရင် အသိပေးပါမယ်။ မွေးနေ့မှာအလှူလည်း လုပ်ချင်တယ်။ ပရိသတ်တွေနဲ့အတူ ဖြတ်သန်းချင်ပါတယ်။

■ မေး – ပရိသတ်တွေကို ပြောချင်တာများ ရှိဦးမလား။

ဖြေ – ကျွန်တော်ဒီပွဲလေးကစပြီးတော့ ပွဲတွေအများကြီး ဆက်လုပ်သွားပါမယ်။ ပရိသတ်တွေလည်း ကျွန်တော့်တင်ဆက်မှုကို လာအားပေးပါ။ ကြိုက်တယ်ဆိုရင် နောက်ထပ်ပွဲတွေကိုလည်း အားပေးပါ။ ပရိသတ်တွေ အားပေးမှုနဲ့ နှစ်တွေအရှည်ကြီး ဖြတ်သန်းချင်ပါတယ်။ ပရိသတ်အားလုံး ကျန်းမာချမ်းသာကြပါစေလို့ ဆုတောင်းပေးချင်ပါတယ်။

အင်န်နီမေးရှင်းဒါရိုက်တာ ဥာဏ်ကျယ်စေနှင့် တွေ့ဆုံခြင်း

တေးသံရှင်ကျားပေါက်၏ Anger Management တေးအယ်လ်ဘမ်မှ သတိရတယ် သီချင်း၏ အင်န်နီမေးရှင်း Music Video အား Pencell Studio မှဖန်တီးပေးထားကာ Pencell Studio Page တွင် လွှင့်တင်ထားရာတွင်လည်း ပရိသတ်စိတ်ဝင်စား အားပေးမှု များပြားခဲ့သည်။ Pencell Studio ကို ကာတွန်းဆရာ အော်ပီကျယ်၏သားဖြစ်သူ အင်နီမေးရှင်းပညာရှင် ဒါရိုက်တဥာဏ်ကျယ်စေနှင့် သူငယ်ချင်းများ စုပေါင်းတည်ထောင်ထားခြင်းဖြစ်သည်။ အင်နီမေးရှင်းဇာတ်ကားတိုများနှင့် နိုင်ငံတကာ ရုပ်ရှင်ပွဲတော်များတွင် ဆုများရရှိထားကာ အင်နီမေးရှင်းဇာတ်ကားတိုများ၊ ရုံတင်အင်နီမေးရှင်း ဇာတ်ကားများကိုပါ ပရိသတ်များထံ အရောက်ပို့ဆောင်သွားရန် စီစဉ်ထားသည့် ဒါရိုက်တာဥာဏ်ကျယ်စေနှင့် တွေ့ဆုံ၍ ဆက်လက်ဖန်တီးသွားမည့် အနုပညာဖန်တီးမှုများ၊ အင်နီမေးရှင်းဈေးကွက်အပေါ် အမြင်တို့အား မေးမြန်းဖြစ်ခဲ့သည်။

■ မေး – သတိရတယ် Animated Music Video ကို ဖန်တီးခဲ့တဲ့ အတွေ့အကြုံလေးတွေကို အရင်ဆုံးပြောပြပါဦး။

ဖြေ – အင်နီမေးရှင်းအနေနဲ့ Music Video တစ်ခုလုံးကို ဖန်တီးထားတာပါ။ ဒီ Music Video က လေးမိနစ်စာဆိုပေမယ့် တကယ်ဖန်တီးခဲ့စဉ်တုန်းက နောက်ကွယ်မှာ လူ ၁၅ ယောက်နဲ့ ငါးလကျော်ကြာ ဖန်တီးခဲ့ရတယ်။ ဒီအတွက် ကုန်ကျစရိတ်လည်း အများကြီး ကုန်ပါတယ်။ နေ့ရောညရော လူတွေအများကြီး ပင်ပန်းခံပြီး လုပ်ခဲ့ရတယ်။

■ မေး – ဒီသီချင်းလေးကို ဖန်တီးရာမှာ ဘယ်လိုစိတ်ကူးနဲ့ ဖန်တီးခဲ့ရလဲ။

ဖြေ – ဒီသီချင်းနဲ့ ရုပ်နဲ့အသံကိုက်ဖို့ အရင်ဆုံး Story စဉ်းစားရတာပေါ့။ ကိုကျားပေါက်ရဲ့ Anger Management ကို နားထောင်ပြီးကတည်းက ကျွန်တော်တို့ Pencell Studio အနေနဲ့ကြိုက်တယ်။ ဒီထဲက သီချင်းတစ်ပုဒ်ကို Music Video ဖန်တီးမယ်လို့ စဉ်းစားခဲ့တယ်။ နောက်ဆုံးတော့ သတိရတယ်ကို ရွေးဖြစ်တယ်။ အင်န်နီမေးရှင်းဖြစ်တဲ့ အတွက်ကြောင့် လူနဲ့ပုံဖော်လို့မရတဲ့ အကြောင်းအရာမျိုးကို ရွေးချယ်တယ်။ Story ဖန်တီးရာမှာလည်း ကြည့်တဲ့ပရိသတ်က လွတ်လွတ်လပ်လပ် ဖြန့်တွေးနိုင်တဲ့ပုံစံမျိုးဖြစ်အောင် ဖန်တီးတယ်။ အားလုံးက တစ်ယောက်နဲ့တစ်ယောက်မတူဘူး။ ကိုယ့်ဘ၀နဲ့ကိုယ် ဆက်တွေးလို့ရမယ့် အနေအထားမျိုး၊ သတိရတယ်သီချင်းရဲ့ အကြောင်းအရာနဲ့လည်း ဝေးမသွားမယ့် Story မျိုးလေးဖြစ်အောင် အများကြီး ကြိုးစားထားတယ်။ အခက်အခဲပိုင်းကတော့ အခြားအလုပ်တွေလည်း မပျက်အောင် အားလုံးညှိပြီး လုပ်ရတယ်။ ဒီလိုပဲ ငတ်တစ်လှည့် ပြတ်တစ်လှည့်နဲ့ပေါ့။

■ မေး – Music Video အပေါ် အားရကျေနပ်မှုရောရှိလား။

ဖြေ – အားရကျေနပ်ပါတယ်။ Result ကတော့ ပရိသတ်ကပဲ ခန့်မှန်းပေးပါ။ Team က ဒီ Music Video ဖြစ်လာဖို့ကို အများကြီး ကြိုးစားထားကြတယ်။ ဒါကြောင့် ကျွန်တော်တို့တစ်ဖွဲ့လုံးရဲ့ အားထုတ်မှုကို ပရိသတ်တွေက ခံစားကြည့်ရှုပြီးမှပဲ Result ကို ခန့်မှန်းပေးစေချင်ပါတယ်။

■ မေး – ဒီ Music Video ကို နိုင်ငံတကာက Music Video Festival တွေမှာလည်းပြိုင်ဖို့ စိတ်ကူးရှိနေတယ်ဆိုတော့ အဲဒီအကြောင်းလည်း ပြောပြပါဦး။

ဖြေ – ကျွန်တော့်အရင် Animation Short Film ကို Festival တွေမှာ ပြိုင်ခဲ့ဖူးတယ်။ အခုဒီ Music Video ကိုလည်း ပြိုင်ချင်တယ်။ အဓိကရည်ရွယ်ချက်က မြန်မာနိုင်ငံရဲ့ အင်န်နီမေးရှင်းယဉ်ကျေးမှုကိုလည်း နိုင်ငံတကာက သိစေချင်တယ်။ မြန်မာနိုင်ငံရဲ့ ဂီတဖန်တီးမှုကိုလည်း နိုင်ငံတကာ သိစေချင်တယ်။ Festival တွေမှာ ပြိုင်ချင်တယ်။ ဒါကြောင့် သွားပြိုင်ဖို့လည်း ပြင်ဆင်နေပါတယ်။

■ မေး – Pencell Studio အနေနဲ့ ဘယ်လိုဖန်တီးမှုတွေ ထပ်လုပ်ဖြစ်မလဲ။

ဖြေ – ကျွန်တော်တို့ စိတ်ကူးထားတာတွေ အများကြီးရှိပါတယ်။ အားလုံးကပြင်ဆင်နေဆဲဆိုတော့ သေချာပြီဆိုမှ အားလုံးကိုအသိပေးပါမယ်။ Pencell Studio Page မှာ အင်နီမေးရှင်းကားတိုတွေ တင်ဖို့ရှိမယ်။ ရုံတင်ကားတွေအထိ လုပ်သွားဖို့ရှိတယ်။ ဘယ်အချိန်မှာ ဘာကအရင်ထွက်လာမယ်ဆိုတာတော့ ပြောလို့မရသေးလို့ပါ။ စောင့်မျှော်နေကြပါလို့ ပြောချင်ပါတယ်။

■ မေး – အစီအစဉ်တွေ အများကြီးရှိနေတယ်ဆိုတော့ အဲဒီအတွက်ပြင်ဆင်မှုနဲ့ စိန်ခေါ်မှုတွေဆိုရင်ရော။

ဖြေ – အများကြီး ပြင်ဆင်ရပါတယ်။ Plan A နဲ့မရရင် Plan B သွားဖို့ အမြဲတမ်းပြင်ထားရတယ်။ အဓိကတော့ ယုံကြည်မှုတစ်ခုနဲ့ပဲ ရှေ့ဆက်တာပါ။ ယုံကြည်မှု ခိုင်ခိုင်မာမာရှိရင် အောင်မြင်မယ်လို့ စိတ်ထဲမှာထားထားတယ်။

■ မေး – အင်န်နီမေးရှင်းက မြန်မာနိုင်ငံမှာတော့ စိန်ခေါ်မှုတွေအခက်အခဲတွေ အများကြီးရှိတုန်းပဲဆိုတော့ အဲဒီအပေါ်ဘယ်လိုမြင်လဲ။

ဖြေ – ဟုတ်ပါတယ်။ အင်န်နီမေးရှင်းက စိန်ခေါ်မှုတွေ အခက်အခဲတွေ အများကြီးရှိနေတုန်းပဲ။ မြန်မာပြည်အနုပညာမှာ အင်န်နီမေးရှင်းကို အနုပညာဖန်တီးမှုတစ်ခုအနေနဲ့ ဘောင်ဝင်လာဖို့၊ လက်ခံလာဖို့ကြိုးစားနေရဆဲပဲ။ အင်န်နီမေးရှင်းဖန်တီးသူတွေက အခုနောက်ပိုင်းတော့ ပိုများလာပါတယ်။ Animated Music Video လုပ်တယ်ဆိုတာလည်း အနုပညာတစ်ခုပဲလေ။ အင်န်နီမေးရှင်းဆိုတာက ရုပ်ရှင်အမျိုးအစားတစ်ခုပဲ။ နိုင်ငံခြားမှာဆိုရင် Live Action ရယ် Animation ရယ်နှစ်မျိုးရှိတယ်။ ဒီမှာလည်း ဒါတွေကို လက်ခံလာအောင် ကျွန်တော်တို့ကြိုးစားမယ်။

■ မေး – ဒီ Music Video လေး အခုထွက်လာတဲ့အခါ ပြန်ကြည့်ပြီးတော့ အားသာချက် အားနည်းချက် သုံးသပ်ပေးပါဆိုရင်ရော။

ဖြေ – Music Video ကောင်းမကောင်းကတော့ ပရိသတ်တွေ ဆုံးဖြတ်တာ အကောင်းဆုံးပါပဲ။ ကျွန်တော့်အနေနဲ့ကတော့ ဒါကိုဖန်တီးနေတဲ့ အချိန်အတွင်းမှာ တစ်ဖွဲ့လုံးက ကိုယ်တတ်တဲ့ပညာတွေကို အစွမ်းကုန်သုံးပြီး အကောင်းဆုံး ကြိုးစားထားကြတယ်။ ဒီလိုကြိုးစားထားတာနဲ့တင် ကျေနပ်နေပါပြီ။

■ မေး – ပရိသတ်ကိုပြောချင်တာများ ရှိမလား။

ဖြေ – Pencell Studio အနေနဲ့ အင်န်နီမေးရှင်း ဇာတ်ကားတွေရော Music Video တွေရော အများကြီးထပ်လာပါဦးမယ်။ အဲဒီအတွက် အင်န်နီမေးရှင်း ချစ်သူတွေရော၊ ကာတွန်းချစ်သူတွေပါ အားပေးစေချင်ပါတယ်။

■ မေး – ဖခင်ဖြစ်သူ ဆရာအော်ပီကျယ်ဆီကရော ဘယ်လိုလေ့လာ သင်ယူခွင့်ရခဲ့လဲ။

ဖြေ – အဖေက ကျွန်တော်အရမ်း လေးစားအားကျရတဲ့သူပါ။ အဖေ့ရဲ့ အနုပညာဖန်တီးမှုကိုသာမက အတွေးအခေါ် အယူအဆ၊ နေထိုင်ကျင့်သုံးမှုတွေကိုပါ ကျွန်တော်လေးစားအားကျရပါတယ်။