စားဖိုမှူးသင်တန်းတက်ရန် ရည်ရွယ်ရာမှသည် မော်ဒယ်လ် သရုပ်ဆောင်တစ်ဦးအဖြစ်သို့ ပြောင်းလဲရောက်ရှိလာခဲ့သူ ငြိမ်းသော်၏ ငယ်ဘ၀ဖြတ်သန်းရာ

လူငယ်တိုင်းရဲ့ပခုံးထက်ဆီမှာ မိမိတို့ စိတ်ကူးအိပ်မက်ကိုယ်စီကို ထမ်းပိုးထားတတ်ကြပါတယ်။ လူငယ်အချို့က သေချာခိုင်မာတဲ့ စိတ်ကူးအိပ်မက်တွေကို ပိုင်ဆိုင်ထားသလို တချို့သော လူငယ်တွေကတော့ လက်လှမ်းမီရာ အိပ်မက်တချို့ကိုသာ ဆုပ်ကိုင်ရင်း ချီတက်နေကြပြန်ပါတယ်။ ဒီလို ဆယ်ကျော်သက်လူငယ်ဘ၀မှာ စားဖိုမှူးတစ်ယောက်ဖြစ်လာဖို့ဆိုတဲ့ စိတ်ကူးရည်ရွယ်ချက် ရှိခဲ့ပေမဲ့ မျှော်လင့်မထားတဲ့ အချိုးအကွေ့တွေနဲ့ မော်ဒယ်လ်သရုပ်ဆောင် လမ်းကြောင်းပေါ်ကို ရောက်ရှိလာသူကတော့ သရုပ်ဆောင်မော်ဒယ်လ်ငြိမ်းသော်ပဲ ဖြစ်ပါတယ်။ လက်ရှိမှာတော့ ငြိမ်းသော်က ‘ည’ ဇာတ်ကားရဲ့ သရုပ်ဆောင်တစ်ဦးအဖြစ်အပြင် ကြော်ငြာနဲ့အလှဓာတ်ပုံများစွာက အပြုံးချိုချို မင်းသားချောတစ်ဦးအဖြစ် ပရိသတ်လက်ခံထားသူ တစ်ယောက်လည်း ဖြစ်ပါတယ်။ ဒီတစ်ပတ်မှာတော့ ငြိမ်းသော် ပြောပြခဲ့တဲ့ ငယ်စဉ်ဘ၀ရဲ့အမှတ်တရ ပုံရိပ်တချို့ကို တင်ဆက်ပေးချင်ပါတယ်။

သရုပ်ဆောင်မော်ဒယ်လ်ငြိမ်းသော်က ဧပြီ ၁၃ ရက်မှာ မုံရွာမြို့မှာမွေးဖွားခဲ့သူဖြစ်ပြီး အစ်ကိုနှစ်ယောက်နဲ့ ညီမနှစ်ယောက်ကြားက သားအလတ်တစ်ယောက်လည်း ဖြစ်ပါတယ်။ ငယ်စဉ်ကလေးဘ၀မှာတော့ ငြိမ်းသော်က အနေအေးတတ်သလို တစ်ယောက်တည်း ကစားတတ်တာများတယ်လို့ ဆိုပါတယ်။ ငြိမ်းသော်ကို ငယ်ရွယ်စဉ်မှာ မိဘများပြောပြကြတဲ့ အမှတ်တရကတော့ အသန့်အပြန့် အရမ်းကြိုက်လွန်းတာပါပဲ။ အသက်ငယ်သေးတဲ့ အချိန်မှာတောင် ဖိနပ်မစီးပေးရင် အော်ငိုတတ်တယ်လို့လည်း ရယ်မောရင်းဆိုပါတယ်။ ဓာတ်ပုံရိုက်တဲ့အခါတိုင်းမှာလည်း ငိုတတ်တာကြောင့် ငယ်စဉ်ဘ၀ရဲ့ ဓာတ်ပုံတိုင်းမှာ ငိုနေတဲ့ပုံတွေများတယ်လို့လည်း အမှတ်တရ ပြောပြခဲ့ပါတယ်။

ငြိမ်းသော်က ကျောင်းပညာရေးအနေနဲ့ အ.ထ.က(၁)မုံရွာမှာ သူငယ်တန်းကနေ တက္ကသိုလ်ဝင်တန်းအောင်မြင်ပြီးတဲ့အထိ တက်ရောက်ခဲ့ပါတယ်။ ကျောင်းပညာရေးမှာတော့ သာမန်အဆင့်လောက်ပဲရှိပြီး ထူးချွန်တဲ့အထဲမှာ မပါဝင်ဘူးလို့လည်း ဆိုပါတယ်။ ကျောင်းနေစဉ်မှာ အမှတ်တရအနေနဲ့ကတော့ အလှကြိုက်တတ်လာလို့လည်း ပြောပြခဲ့ပါတယ်။ ဒါ့အပြင် ကျောင်းမှာပဲများတယ်လို့လည်း ကိုယ့်ကိုယ်ကိုယ် မှတ်ချက်ပေးခဲ့ပါတယ်။ တက္ကသိုလ်ဝင်တန်း အောင်မြင်ပြီးချိန်မှာတော့ မိဘများရဲ့ စီးပွားရေးနဲ့လည်းနီးစပ်တဲ့ စားဖိုမှူးသင်တန်းတက်ရောက်ဖို့ ရန်ကုန်ကိုရောက်လာဖြစ်တယ်လို့လည်း ဆိုပါတယ်။

“ရှစ်တန်းကိုးတန်းမှာကတည်းကတော့ အဒေါ်တစ်ယောက်က မဂ္ဂဇင်းတွေ အရမ်းငှားဖတ်တော့ လိုက်ဖတ်ရင်းနဲ့ မော်ဒယ်လ်လုပ်ဖို့ စိတ်ဝင်စားတယ်။ ဒါပေမဲ့ ကျွန်တော်တို့က နယ်မှာနေတဲ့သူဖြစ်တော့ အလှမ်းဝေးတယ်လေ။ စိတ်ဝင်စားတယ်ဆိုရုံပဲ။ တကယ်တမ်းကျတော့ အိမ်ကလည်း ဆိုင်ဖွင့်ထားတယ်ဆိုတော့ စားဖိုမှူးသင်တန်းတက်ဖို့ပဲ စိတ်ကူးပြီး ရန်ကုန်ကိုလာဖြစ်သွားတာ။ ရန်ကုန်ကိုရောက်လာတဲ့အခါ မော်ဒယ်လ်သူငယ်ချင်းတွေ ခင်မင်ခွင့်ရပြီး သူတို့ကလည်း တိုက်တွန်းတာနဲ့ သင်တန်းတက်ဖြစ်ခဲ့တယ်။ အဲဒီကနေပဲ မျှော်လင့်မထားဘဲ အနုပညာလမ်းကြောင်းပေါ် ရောက်လာခဲ့တာပါ” လို့ ငြိမ်းသော်က ဆိုပါတယ်။

ငြိမ်းသော်က Stars Int’1 Models Agency မှာ သင်တန်းတက်ရောက်ခဲ့ပြီး အေဂျင်စီနဲ့လက်တွဲကာ အနုပညာအလုပ်တွေ တွဲဖက်လုပ်ကိုင်ခဲ့ပါတယ်။ ဒီနောက်မှာတော့ Mister ပြိုင်ပွဲတစ်ခုမှာ ဆုရခဲ့သလို ရှိုးပွဲများစွာမှာလည်း ပါဝင်လျှောက်လှမ်းဖြစ်ခဲ့ပါတယ်။ မော်ဒယ်လ်တစ်ယောက်အဖြစ် လှုပ်ရှားနေစဉ်မှာပဲ ဒါရိုက်တာထူးပိုင်ဇော်ဦးရဲ့ ‘ည’ ရုပ်ရှင်ဇာတ်ကားမှာ သရုပ်ဆောင်တစ်ဦးအနေနဲ့ ရွေးချယ်ပါဝင်ခွင့်ရခဲ့ပါတယ်။ ‘ည’ ဇာတ်ကားကို မကြာခင်ကရုံတင်ပြသခဲ့ရာမှာတော့ ငြိမ်းသော်ကို ချစ်ခင်အားပေးတဲ့ ပရိသတ်တွေ ပိုမိုများပြားလာသလို အနုပညာအလုပ်တွေလည်း ဆက်တိုက် လုပ်ကိုင်ခွင့် ရရှိလာတယ်လို့ ဆိုပါတယ်။

အနုပညာလောကမှာ ကြုံတွေ့ခဲ့ရတဲ့ အခက်အခဲတွေနဲ့ ပတ်သက်လို့ကတော့ “အခက်အခဲတွေတော့ အများကြီးပါပဲ။ တစ်ခါတလေဆိုရင် ဘာဆက်လုပ်ရမှန်းမသိလို့ နယ်ပြန်ရင် ကောင်းမလားဆိုတဲ့ စိတ်ကူးမျိုးလည်း ခဏခဏ ဖြစ်ဖူးတယ်။ ဒါပေမဲ့ မိဘတွေကလည်း အောင်မြင်စေချင်ကြတယ်။ ပရိသတ်အားပေးမှုတချို့လည်း ရှိနေတော့ ကိုယ်ရွေးချယ်ထားတဲ့ ခရီးလမ်းကို အောင်မြင်တဲ့အထိ ဆက်လျှောက်မယ်ဆိုပြီး အားတင်းခဲ့ရတာ။ အဲဒီလို ကိုယ့်ကိုယ်ကိုယ်အားပေးရင်းနဲ့ အခုလို ရပ်တည်နိုင်လာတာပါ” လို့ ငြိမ်းသော်က ပွင့်ပွင့်လင်းလင်း ဆိုပါတယ်။

လက်ရှိမှာ ကြော်ငြာအများအပြားမှာ ပါဝင်ခွင့်ရနေသလို အမ်တီဗွီတွေလည်း ပါဝင်ရိုက်ကူးခွင့်ရနေတဲ့ ငြိမ်းသော်က ပရိသတ်များနဲ့ အမြဲထိတွေ့နေသူတစ်ဦးလည်း ဖြစ်ပါတယ်။ အွန်လိုင်းကနေ ပရိသတ်များနဲ့ တိုက်ရိုက်ထိတွေ့မှုကို အရင်ကတော့ မလုပ်ဖြစ်ခဲ့ပေမယ့် အခုနောက်ပိုင်းမှာတော့ သေချာအချိန်ပေးပြီး လုပ်ဖြစ်တယ်လို့ ဆိုပါတယ်။ ချစ်ခင်အားပေးကြတဲ့ ပရိသတ်များနဲ့အတူ ပရဟိတလှူဒါန်းမှုတွေ လုပ်ဖြစ်သလို မကြာခင်မှာလည်း ပရိသတ်များနဲ့ စုပေါင်းဘုံကထိန်ခင်းဖို့ စီစဉ်နေတယ်လို့ ပြောပြခဲ့ပါတယ်။

အပြုံးချိုချိုကို ပိုင်ဆိုင်ထားပြီး ကိုရီးယားဟန်ပန်လို့ တင်စားခံရတဲ့ ငြိမ်းသော်က အနုပညာခရီးလမ်း ရည်ရွယ်ချက်ကိုတော့ “ကျွန်တော်ကအခုမှ ဒီလမ်းကြောင်းတစ်ခုအပေါ် သေချာလေး ခြေချခွင့်ရတယ်လို့ ပြောလို့ရပါတယ်။ ဒါကြောင့်အများကြီး ကြိုးစားရဦးမှာပါ။ ကျွန်တော့်အနေနဲ့ ဇာတ်ရုပ်တိုင်းကို ပီပြင်အောင် ပုံဖော်နိုင်တဲ့ သရုပ်ဆောင်ကောင်းတစ်ယောက်ဖြစ်ချင်တယ်။ ပရိသတ်ချစ်ခင်အားပေးတဲ့ သရုပ်ဆောင် တစ်ယောက်ဖြစ်ခွင့်ရချင်ပါတယ်။ အဲဒီအတွက်လည်း အစွမ်းကုန် ကြိုးစားသွားမှာပါ။ လောလောဆယ်တော့ သရုပ်ဆောင်ပိုင်းနဲ့ ပတ်သက်ရင်လည်း လေ့လာနေပါတယ်။ အခွင့်အရေးရခဲ့မယ်ဆိုရင်လည်း ဇာတ်ကားကောင်းတွေမှာ ကြိုးစားပါဝင်ချင်ပါတယ်” လို့ငြိမ်းသော်က ဆိုခဲ့ပါတယ်။

အားပေးချစ်ခင်ကြတဲ့ ပရိသတ်တွေကိုတော့ သရုပ်ဆောင်မော်ဒယ်လ်ငြိမ်းသော်က “အားပေးကြတဲ့ပရိသတ်တွေလည်း ကျွန်တော့်ရဲ့ ငယ်ဘ၀အမှတ်တရတွေကို ဖတ်ရှုရင်း အမှတ်တရဖြစ်မယ်လို့ ယုံကြည်ပါတယ်။ ပရိသတ်တွေရဲ့ ချစ်ခင်အားပေးမှုကြောင့် ကျွန်တော်အခုလို ရှိနေနိုင်တာပါ။ ဒါကြောင့် ပရိသတ်တွေ အနေနဲ့လည်း ဆက်လက်ချစ်ခင် အားပေးကြဖို့လည်း ပြောချင်ပါတယ်။ ပရိသတ်အားပေးမှုနဲ့ ထိုက်တန်တဲ့အနုပညာရှင်ကောင်းတစ်ယောက် ဖြစ်လာအောင်လည်း ဆက်ပြီးကြိုးစားသွားပါမယ်” လို့ ပြောပြခဲ့ပါတယ်။

Miss Supranational Myanmar ဆုရှင် အလှမယ်ရွှေမှူးဟန်နှင့် တွေ့ဆုံခြင်း

ကမ္ဘာ့ထိပ်တန်း အလှမယ်ပြိုင်ပွဲများတွင် မြန်မာကိုယ်စားပြုယှဉ်ပြိုင်ရန် အလှမယ်များ ရွေးချယ်သည့် Miss Golden Land Myanmar အလှမယ်ပြိုင်ပွဲအား ကျင်းပပြီးစီးခဲ့ပြီဖြစ်သည်။ အလှမယ်ခြောက်ဦးအား ရွေးချယ်ခဲ့သည့်အနက် အမြင့်ဆုံးဆုတစ်ခုဟု ဆိုနိုင်သည့် Miss Supranational Myanmar အလှမယ်ဆုကို ကချင်တိုင်းရင်းသူ ရွှေမှူးဟန်က ဆွတ်ခူးရရှိခဲ့ပါသည်။ အလှမယ် ခင်ဝင့်ဝါ၊ ဟန်သီ၊ L ဘောက်နူးနှင့် ဆွေဇင်ထက်တို့ သွားရောက်ယှဉ်ပြိုင်ခဲ့ကြရာတွင် ရလဒ်ကောင်းများ ထွက်ပေါ်လာအောင် ယှဉ်ပြိုင်နိုင်ခဲ့သည့် Miss Supranational ပြိုင်ပွဲအတွက် ယခုနှစ်ကိုယ်စားပြုအလှမယ်ဖြစ်လာသည့် ရွှေမှူးဟန်အနေဖြင့် ပြင်ဆင်မှုများ စတင်ပြုလုပ်နေပြီဖြစ်သည်။ နိုဝင်ဘာလအတွင်း သွားရောက် ယှဉ်ပြိုင်ရမည်ဖြစ်ကာ ဒီဇင်ဘာ ၁ ရက်တွင် နောက်ဆုံးအဆင့် ပြိုင်ပွဲပြုလုပ်မည့် Miss Supranational ပြိုင်ပွဲအတွက် ပြင်ဆင်သွားရန် ကြိုးပမ်းနေမှုများ၊ ပြိုင်ပွဲအတွက် စိတ်လှုပ်ရှားရင်ခုန်မှုများ၊ မြန်မာကိုယ်စားပြုအလှမယ်တစ်ယောက်အဖြစ် ရှေ့ဆက် လုပ်ဆောင်သွားလိုသည်များအား မေးမြန်းဖြစ်ခဲ့ပါသည်။

‘မြန်မာလူမျိုးတွေရဲ့ ယဉ်ကျေးသိမ်မွေ့မှု၊ ဖော်ရွေပျူငှာမှု၊ စေတနာထက်သန်မှု၊ ကူညီရိုင်းပင်းတတ်မှု ဆိုတာတွေကိုလည်း နိုင်ငံတကာကသိအောင် တင်ဆက်သွားချင်ပါတယ်’

■ မေး – Miss Golden Land Myanmar အလှမယ်ပြိုင်ပွဲမှာ မပြိုင်ခင် ပြိုင်ပွဲအတွေ့အကြုံလေး ရှိခဲ့ဖူးလား အရင်ပြောပြပါဦး။

ဖြေ – အရှေ့မှာ ပြိုင်ပွဲအတွေ့အကြုံအနေနဲ့ Miss Universe Myanmar မိတ္ထီလာမြို့ကိုယ်စားပြုအနေနဲ့ ပါဝင်ယှဉ်ပြိုင်ခဲ့ဖူးပါတယ်။ ပြိုင်ပွဲမှာ အကောင်းဆုံးကြိုးစား ယှဉ်ပြိုင်ခဲ့ပေမယ့် နိုင်ငံကိုယ်စားပြုအလှမယ် ဖြစ်ခွင့်မရခဲ့တာကြောင့် ထပ်မံကြိုးစားယှဉ်ပြိုင်ဖို့ စီစဉ်ခဲ့တာပါ။ Miss Golden Land Myanmar ပြိုင်ပွဲမှာလည်း ညီမ အနေနဲ့ ကိုယ်စွမ်းဥာဏ်စွမ်းရှိသမျှ အကောင်းဆုံး ကြိုးစားယှဉ်ပြိုင်ခဲ့ပါတယ်။

■ မေး – ပြိုင်ပွဲမှာ ဆုကြေညာတဲ့အခါ အမြင့်ဆုံးဆုတစ်ခုလို့ ပြောလို့ရမယ့် Miss Supranational Myanmar ဆုအတွက် ကြေညာခံရတော့ ဘယ်လိုခံစားရလဲ။

ဖြေ – ညီမရဲ့အိပ်မက်က နိုင်ငံကိုယ်စားပြု အလှမယ်တစ်ယောက် ဖြစ်ချင်တာပါ။ ဒါပေမဲ့ Miss Golden Land Myanmar ပြိုင်ပွဲမှာ မြင့်မားတဲ့ဆုတစ်ခုဖြစ်တဲ့အပြင် အရှေ့က ပြိုင်ပွဲဝင် စီနီယာတွေအားလုံးကလည်း ရလဒ်ကောင်းတွေ ရယူနိုင်ခဲ့တဲ့ Miss Supranational Myanmar ဆုကို ရမယ်လို့တော့ အများကြီး မျှော်လင့်မထားရဲပါဘူး။ တကယ်တမ်း ဆုကြေညာတဲ့အခါ အရမ်းလည်းဝမ်းသာ ကြည်နူးခဲ့ရပါတယ်။ ပြိုင်ပွဲတောက်လျှောက်မှာ ညီမအနေနဲ့ ကံ ဥာဏ် ၀ီရိယအားလုံး အသုံးပြုပြီး ကြိုးစားခဲ့တဲ့ရလဒ်လို့လည်း ယုံကြည်ပါတယ်။

■ မေး – Miss Supranational ပြိုင်ပွဲကို မြန်မာကိုယ်စားပြုသွားပြီး ယှဉ်ပြိုင်ခဲ့ကြတဲ့အခါ ရလဒ်ကောင်းတွေ ထွက်ပေါ်ခဲ့တဲ့အတွက် ပိုပြီးတာဝန်ကြီးတယ်လို့ ပြောလို့ရလား။

ဖြေ – အဲဒီလို ပြောလို့ရပါတယ်။ ညီမအနေနဲ့တော့ မြန်မာကိုယ်စားပြုအနေနဲ့သွားပြီး ယှဉ်ပြိုင်တဲ့အခါ မြန်မာမိန်းကလေးတစ်ယောက်ရဲ့ လှပသိမ်မွေ့မှု၊ ယဉ်ကျေးပျူငှာမှု၊ သွက်လက်ထက်မြက်မှုတွေ အားလုံးကို ကမ္ဘာ့နိုင်ငံအသီးသီးက အလှမယ်တွေကြားမှာ ပေါ်လွင်အောင် တင်ပြသွားချင်ပါတယ်။ အဲဒီအတွက်လည်း အခုချိန်ကစပြီး လေ့ကျင့်ပြင်ဆင်နေပါပြီ။ ပြိုင်ပွဲက အချိန်နည်းနည်းကပ်နေတော့ လောလောဆယ်မှာ ပြိုင်ပွဲအတွက်ကိုပဲ အပြည့်အ၀ အာရုံစိုက်ပြီး ကြိုးစားသွားပါမယ်။

■ မေး – Miss Golden Land Myanmar ပြိုင်ပွဲ စခန်းသွင်းကာလမှာရော ဘယ်လိုအတွေ့အကြုံကောင်းတွေ ရခဲ့လဲ။

ဖြေ – အတွေ့အကြုံ အများကြီးရပါတယ်။ ညီမတို့ ပြိုင်ပွဲဝင်တွေအားလုံး လေ့လာတာတွေ အများကြီးလုပ်ရတယ်။ ပြီးတော့ ပရဟိတ လှုပ်ရှားမှုတွေလည်း လုပ်ရတယ်။ ပြိုင်ပွဲအတွက် လေ့ကျင့်ပြင်ဆင်တာတွေလည်း လုပ်ခဲ့ရတယ်။ ပြိုင်ပွဲဝင်တွေအားလုံး အတူတူ နေခဲ့တဲ့အချိန်မှာ ညီအစ်မအရင်းတွေလို ရင်းနှီးချစ်ခင်စိတ်တွေ ဖြစ်ခဲ့ပါတယ်။ တစ်ယောက်ကိုတစ်ယောက် ကူညီရိုင်းပင်းခဲ့ကြတဲ့ အတွေ့အကြုံတွေက တန်ဖိုးဖြတ်လို့မရပါဘူး။ နိုင်ငံကိုယ်စားပြုသွားရောက် ယှဉ်ပြိုင်တဲ့အခါလည်း အဲဒီလို အတွေ့အကြုံကောင်းတွေ ရရှိမယ်လို့ ယုံကြည်ပါတယ်။

■ မေး – ပြိုင်ပွဲက အချိန်နည်းနည်း ကပ်နေတယ်ဆိုတော့ ဘယ်တော့လောက်သွားပြိုင်ရမလဲ။ အဲဒီအတွက် အဓိက ဘယ်လိုအရာတွေ ပြင်ဆင်သွားမလဲ။

ဖြေ – ပြိုင်ပွဲက ဒီဇင်ဘာလောက်မှာ ပြိုင်ရမယ်လို့ ပြောပါတယ်။ အဓိကတော့ ဗီဇာအရင်ဆုံး ကြိုးစားနေတယ်။ ဒီကြားထဲမှာလည်း အလှမယ်တစ်ယောက်အတွက် လိုအပ်ချက်ဖြစ်တဲ့ Body Beauty Brain အတွက် ပြင်ဆင်သွားမှာပါ။ အထွေထွေ ဗဟုသုတအတွက်လည်း ပြင်ဆင်နေပါတယ်။ ညီမဘက်က လိုအပ်တာတွေအားလုံးကို အတတ်နိုင်ဆုံး ပြင်ဆင်သွားပါမယ်။

■ မေး – Talent အတွက်ရော ဘာတွေအဓိကထား ပြင်ဆင်သွားမလဲ။

ဖြေ – Talent ပိုင်းအတွက်ကတော့ ညီမအနေနဲ့ စန္ဒရားတီးတတ်ပါတယ်။ ဒါပေမဲ့ သီချင်းအဆိုပိုင်းကိုလည်း ထပ်မံလေ့ကျင့်ပြင်ဆင်ဖို့ ရည်မှန်းထားတယ်။ Talent ပိုင်း အနေနဲ့ ဂီတတင်ဆက်မှုကို ပြုလုပ်သွားဖို့ ရည်မှန်းထားပါတယ်။

■ မေး – Miss Supranational ပြိုင်ပွဲမှာ မြန်မာကိုယ်စားပြု ယှဉ်ပြိုင်ခွင့်ရတဲ့အခါ မြန်မာနိုင်ငံရဲ့ ဘယ်လိုအကြောင်းအရာမျိုးတွေကို ကမ္ဘာ့နိုင်ငံအသီးသီးက သိရှိသွားအောင် ပြောပြသွားချင်လဲ။

ဖြေ – မြန်မာနိုင်ငံကို လှပတဲ့နေရာဒေသတွေ ပိုင်ဆိုင်ထားတဲ့နိုင်ငံတစ်ခုအဖြစ် နိုင်ငံတကာကသိရှိပြီး လာရောက် လည်ပတ်ကြတာတွေ ရှိပါတယ်။ ဒါပေမဲ့ ဒီလိုလှပတဲ့နေရာ ဒေသအသီးသီးက ဘယ်လောက်ထိ တန်ဖိုးရှိသလဲ၊ ဘယ်လိုတန်ဖိုးထား ထိန်းသိမ်းသင့်သလဲ ဆိုတာတွေကို ကမ္ဘာ့နိုင်ငံတွေကပါသိအောင် ပြောပြချင်ပါတယ်။ ပြီးတော့ မြန်မာလူမျိုးတွေရဲ့ ယဉ်ကျေးသိမ်မွေ့မှု၊ ဖော်ရွေပျူငှာမှု၊ စေတနာထက်သန်မှု၊ ကူညီရိုင်းပင်းတတ်မှု ဆိုတာတွေကိုလည်း နိုင်ငံတကာကသိအောင် တင်ဆက်သွားချင်ပါတယ်။

■ မေး – Organization တွေနဲ့ အလှမယ်တွေကြားမှာ တစ်ခါတလေ အဆင်မပြေမှုတွေလည်း ရှိတတ်တော့ ဘယ်လိုနားလည်မှုမျိုးနဲ့ လက်တွဲသွားမလဲ။

ဖြေ – ညီမတို့ကို Organization က ယုံကြည်မှု အပြည့်အ၀ရှိလို့သာ အခုလို အလှမယ်တစ်ယောက်အနေနဲ့ ရွေးချယ်စေလွှတ်ဖို့ စီစဉ်တာပါ။ Organization ကထားတဲ့ ယုံကြည်မှုအတိုင်းပဲ ညီမဘက်ကလည်း အပြည့်အ၀ ကြိုးစားသွားပါမယ်။ ရှေ့မှာလည်း အပြန်အလှန် လက်တွဲကြိုးစားခဲ့သလို နိုင်ငံကိုယ်စားပြု အလှမယ်တစ်ယောက် အနေနဲ့ အကောင်းဆုံး ယှဉ်ပြိုင်နိုင်ဖို့ဆိုတာ Organization ရဲ့ ပံ့ပိုးပေးမှုတွေ လိုအပ်သလို ညီမရဲ့ကြိုးစားအားထုတ်မှုလည်း မဖြစ်မနေ လိုအပ်ပါတယ်။ ဒါကြောင့် နားလည်မှုပြည့်ဝစွာနဲ့ လက်တွဲ ယှဉ်ပြိုင်သွားပါမယ်။

■ မေး – ပရဟိတအလုပ်တွေရော ဆက်လုပ်ဖြစ်သွားမလား။

ဖြေ – ညီမ အလှမယ်တစ်ယောက် မလုပ်ခင်ကတည်းက သူငယ်ချင်းတွေနဲ့အတူ တတ်နိုင်သလောက် ပရဟိတအလုပ်တွေ လုပ်ဖြစ်ပါတယ်။ ရှေ့ဆက်ပြီးလည်း ဆက်လုပ်ဖြစ်သွားမှာပါ။

■ မေး – ကချင်တိုင်းရင်းသူတစ်ယောက် အနေနဲ့ အခုလို ရွေးချယ်ခံရတဲ့အတွက် ကချင်တိုင်းရင်းသားတွေအတွက် ဘာတွေလုပ်ဖြစ်သွားဖို့ရှိဦးမလဲ။

ဖြေ – ရှိပါတယ်။ ကချင်ဒေသကို ကိုယ်စားပြုယှဉ်ပြိုင်ခဲ့ပြီး အခုလိုဆုရတဲ့အတွက် ကချင်တိုင်းရင်းသားတွေကလည်း ကျေနပ်ဂုဏ်ယူမယ်လို့ ယုံကြည်ပါတယ်။

■ မေး – ပရိသတ်တွေကို ပြောချင်တဲ့စကားလက်ဆောင်ရှိရင် ပြောပေးပါဦး။

ဖြေ – ညီမကို ပြိုင်ပွဲတစ်လျှောက်လုံး အားပေးခဲ့ကြတဲ့ ပရိသတ်အားလုံးကိုလည်း ကျေးဇူးအများကြီးတင်ပါတယ်။ မြန်မာကိုယ်စားပြုပြိုင်တဲ့အခါမှာလည်း အားပေးကြပါဦးလို့ ပြောချင်ပါတယ်ရှင်။

လူမှုဝန်ထမ်းဦးစီးဌာန ဒုတိယညွှန်ကြားရေးမှူးချုပ် ဦးမျိုးဆက်အောင်နှင့် တွေ့ဆုံမေးမြန်းခြင်း

တောင်းရမ်းစေခိုင်းခံနေရသူတွေနဲ့ ပတ်သက်လို့ပြီးခဲ့တဲ့ အောက်တိုဘာ ၁၂ ရက်က ရန်ကုန်တိုင်းဒေသကြီး လွှတ်တော်မှာ လွှတ်တော်ကိုယ်စားလှယ်တစ်ဦးက မေးခွန်းမေးမြန်းခဲ့ပါတယ်။ ဒီမေးခွန်းကို ရန်ကုန်မြို့တော်ဝန် ဦးမောင်မောင်စိုးက ပြန်လည်ဖြေကြားရာမှာ ၂၀၁၇ ဇန်န၀ါရီ ၁ ရက်ကနေ စက်တင်ဘာ ၅ ရက်အထိ ထိန်းသိမ်းထားသူ ၉၆၄ ဦး ရှိတယ်လို့ ပါရှိပါတယ်။ ဒီလို တောင်းရမ်းစားသောက်သူတွေနဲ့ လမ်းပျော်ကလေး ပပျောက်ရေးစီမံချက်ကို ၁၉၉၅ ခုနစ်လောက်က စတင်ဆောင်ရွက်ခဲ့ပေမယ့် လက်ရှိအချိန်အထိ ပပျောက်သွားခြင်းမရှိတာကို တွေ့ရှိနေရပါတယ်။ ဒီကိစ္စနဲ့ ပတ်သက်လို့ လူမှုဝန်ထမ်းဦးစီးဌာနမှ ဒုတိယညွှန်ကြားရေးမှူးချုပ် ဦးမျိုးဆက်အောင်နဲ့ တွေ့ဆုံမေးမြန်းခဲ့သမျှထဲက တချို့ကို ကောက်နုတ်ဖော်ပြလိုက်ရပါတယ်။

“လှိုင်သာယာဘက်မှာ မော်တာစက်ငါးလုံး၊ အပ်ချုပ်စက် ၁၀ လုံး ထောင်ထားပေးပြီးတော့ သင်ချင်တဲ့သူလာသင်၊ Street Children အမေ၊ အဖေတွေ လာသင်ပြီးရင် ငွေထောက်ပံ့ပေးမယ်ဆိုပြီး ပြောထားပေမယ့် အခုထိကို မပေါ်လာကြသေးဘူး”

မေး ။ ဆရာတို့ဌာနအနေနဲ့ လမ်းပေါ်က မိဘရှိတဲ့ ကလေးနဲ့မိဘမဲ့ ကလေးတွေကို ဘယ်လိုမျိုးခွဲခြားပြီး စောင့်ရှောက်မှုပေးတယ်ဆိုတာကို သိချင်ပါတယ်။

 

ဖြေ ။ လမ်းပေါ်က ကလေးတွေမှာ တချို့က မိဘရှိတယ်။ မိဘက ပြန်လာခေါ်တဲ့အခါ အထောက်အထားပြည့်စုံရင် ပြန်ပေးလိုက်တယ်။ မိဘမရှိတဲ့ ကလေးဆိုရင် မိဘမဲ့အဖြစ်နဲ့ ကျွန်တော်တို့ဌာနက စောင့်ရှောက်တယ်။  မိဘမဲ့ကျောင်းက သပ်သပ်ရှိတယ်။ ကလေးပြုစုရေး ဌာနကတော့ ၁၀ နှစ်အထိ လက်ခံတယ်။ ၁၀ နှစ်အထက်နဲ့ ၁၈ နှစ် ကြားမှာ မိန်းကလေးနဲ့ ယောက်ျားလေး သပ်သပ်စီခွဲထားတယ်။ အမှုမရှိတဲ့ ကလေးဆိုရင် သူနေချင်တဲ့ကျောင်းမှာ နေလို့ရအောင် လုပ်ပေးတယ်။ တချို့ ကလေးတွေကျတော့ ကျောင်းမှာမနေချင်ဘူး။ သူ့မိဘ ဆွေမျိုးတွေဆီ ပြန်မယ်ဆိုတဲ့အခါကျတော့ ပြန့်ပို့ပေးတယ်။ အဲဒီလို ပြန်လွှတ်တဲ့အခါမှာ လိုက်စစ်ဆေးတဲ့ သူတစ်ယောက်ကို ကျွန်တော်တို့က လွှတ်လိုက်တယ်။ မိဘတကယ်ရှိသလား။ ဆွေမျိုးတွေက ညာပြောနေသလား။ ဒါမှမဟုတ် ခိုင်းစားဖို့လား။ ဒီလို သေချာမေးမြန်းစုံစမ်းပြီး သေချာမှ ထည့်ပေးလိုက်တယ်။ မိဘတွေအနေနဲ့ ပြန်လာခေါ်တဲ့အခါမှာ ကလေးရဲ့ မိဘမှန်ကန်ကြောင်း ရပ်ကွက်ထောက်ခံစာပါရမယ်။ သန်းခေါင်စာရင်းပါမယ် မှတ်ပုံတင်ပါရမယ်။ အဲဒီလို အထောက်အထားတွေကို ပြနိုင်မှ ကလေးမိဘ အစစ်အမှန်ဆို ပြန်ပေးလိုက်တယ်။

■မေး ။ ၁၉၉၅ ခုနှစ်ကတည်းက တောင်းရမ်းစားသောက်သူတွေနဲ့ လမ်းပျော်ကလေး ပပျောက်ရေး စီမံချက်ချပြီး ဖမ်းဆီးထိန်းသိမ်းမှုတွေ ပြုလုပ်နေပေမယ့်လည်း ဒီနေ့အချိန်အထိ ပျောက်ကွယ်သွားခြင်း မရှိတဲ့အပေါ်မှာ ဆရာ့အနေနဲ့ ဘာများပြောချင်ပါသလဲ။

■ဖြေ ။ တချို့ ကလေးတွေက အလွယ်သိပ်လိုက်တာ။ လမ်းပေါ်မှာနေပြီး ဖုန်းခိုးလိုက်ရင် တစ်သောင်းရမယ်။ မုန့်တွေ လျှောက်စားမယ်။ အဲဒါကို သူတို့က ပျော်နေတာတွေ ရှိတယ်။ ကိုယ့်ရှေ့ရေးကို မတွေးဘူးပေါ့နော်။ သူတို့ ဘ၀ရှေ့ရေးကကြာရင် သူတောင်းစားဖြစ်မယ်။ ကြာရင် လူဆိုးလူမိုက်ဖြစ်လာမယ်ဆိုပြီး ကျွန်တော်တို့က အမျိုးမျိုး နားချပေမယ့် တချို့ကလေးက မရဘူး။ အဲဒါ သူ့တို့ရဲ့ လူနေမှုအ ကျင့်စရိုက်နဲ့ သူတို့ရဲ့ မိဘတွေအပေါ်မှာ မူတည်တယ်။ တချို့ မိဘတွေက ပြန်ခေါ်သွားပြီးတော့ ကျောင်းလည်း မထားဘဲနဲ့ ပြန်တောင်းစားခိုင်းတာတွေ ရှိတယ်။ အဓိက အကြောင်းရင်းကတော့ ဆင်းရဲမွဲတေမှုပဲ။ နိုင်ငံတော်ကတော့ အကုန်လုံးကို ထိန်းသိမ်းစောင့်ရှောက်နိုင်တာ မရှိဘူး။ တချို့မိဘတွေက သားသမီးတွေကို တောင်းရမ်းခိုင်းပြီး ဝေစုခွဲယူတာတွေလည်း ရှိတယ်။ ဒါတွေက မိဘအရင်းတွေနော်။ ကျွန်တော်တို့နဲ့ တွေ့ရင်တော့ ကျွန်မတို့ မတောင်းစားခိုင်းတော့ပါဘူးဆိုပြီး ပြောပေမယ့် ကျွန်တော်တို့ ပြန်စုံစမ်းကြည့်တဲ့အခါမှာ ကလေးက ဒီအလုပ်ကို လုပ်နေတာတွေ တွေ့ရတယ်။ ဒီလိုသူတို့ရဲ့ အကျင့်စရိုက်တွေကို မဖျောက်လို့ရှိရင် ကျွန်တော်တို့က ဘာမှ လုပ်ပေးလို့ မရဘူး။ သူတို့ မိဘတွေအပေါ်မှာ မူတည်သလို ဘယ်လောက်ပဲ သွန်သင်ဆုံးမပြော ဆိုနေပေမယ့် သူတို့အပေါ်မှာပဲ မူတည်တယ်။ တချို့ဆို မနေဘူး။ ဒီအဆောင်မှာ မနေဘူး။ ကျွန်တော်တို့ ပြန်မယ်။ ဘာဖြစ်ဖြစ် ပြန်မယ်ဆိုပြီး နောက်တော့ ဖုန်းပြန်ခိုးတဲ့ ဘ၀ကို ရောက်သွားရော။ ကိုယ်ကျင့်တရားကို ကောင်းအောင် ပြုပြင်ပေးတာတွေတော့ ရှိတာပေါ့။ ကလေး ၁၀၀ မှာ လေး၊ ငါး၊ ခြောက်ယောက်ပဲ လမ်းကြောင်းတည့်တည့်ကို ရောက်သွားတယ်။ ဘာကြောင့်လဲဆိုတော့ သူတို့ အကျင့်စရိုက်ကို ပြောင်းပေးပြုပြင်ပေးပေမယ့် သူတို့မိဘတွေ ကိုယ်တိုင်က အဲဒီစိတ် ဓာတ်မရှိဘူး။ အဲဒီလို မိဘတွေကို အသိပညာပေး ခေါ်ပြောပေမယ့် ရလားဆိုတော့ မရဘူး။ ခွေးမြီး ကောက်ခြေထောက်စွပ်ပဲ။ ကျွန်တော်တို့ဆီမှာ INGO  ရှစ်ဖွဲ့ရှိတယ်။ အဲဒီအဖွဲ့တွေနဲ့ ကျွန်တော်တို့ ပူးပေါင်းပြီး လုပ်တာပဲ။ အဲဒီလို လုပ်တဲ့အခါမှာ ဘာဖြစ်လာလဲဆိုတော့ ကျွန်တော်တို့နိုင်ငံမှာ ကလေးတွေရဲ့ စိတ်ဓာတ်ကို ဆင်းရဲလို့ဆိုတဲ့ အကြောင်းတစ်ခုနဲ့ မဟုတ်ဘဲ တချို့ယောက်ျားတွေက မိန်းမတွေ ထပ်ယူ၊ တစ်ချို့ မိန်းမတွေက ယောက်ျားတွေ ထပ်ယူပြီး ကလေးတွေရဲ့ ဘ၀ကို မပြုစုဘဲနဲ့ လုပ်နေတဲ့အတွက် ကလေးတွေ ဘ၀ပျက်စီးသွားတာတွေ အများကြီးရှိတယ်။ ကျွန်တော်တို့ကျောင်းမှာ ထားတယ်ဆိုတာကမတူဘူး။ တကယ်တမ်းကျ လုံခြုံတယ်။ သူ့ဘ၀တိုး တက်ဖို့က မိဘမေတ္တာက ပိုအရေးကြီးတယ်။ သူက မိဘမေတ္တာကို မရတဲ့အခါမှာ ကျောင်းမှာ မထားချင်ပေမယ့်လည်း သင်တန်းကျောင်းကို ပို့ရတာရှိတယ်။

 

■မေး ။ တချို့ မိဘရှိတဲ့ ကလေးတွေကို မိဘတွေက ဆရာ့တို့ဆီကနေ ပြန်ခေါ်သွားပြီး ပြန်တောင်းစား ခိုင်းနေတာတွေ ရှိတယ်လို့လည်း သိရပါတယ်။ ဒီအပေါ်မှာ ဆရာ့အနေနဲ့ ကလေးမိဘတွေကို ဘာများပြောချင်ပါသလဲ။

■ဖြေ ။ နာနတ်တောစခန်းမှာ မိဘတွေက ကလေးတွေကို ပြန်လာခေါ်တယ်။ လာခေါ်ရင် ကျွန်တော်တို့က မေးရတယ်။ ခင်ဗျားကလေးကို ပြန်ခေါ်ပြီးသွားရင် ပြန်မတောင်းစားခိုင်းနဲ့ ကလေးဘ၀အတွက် ဘာမှ မတိုးတက်ဘူး။ အဲဒီလိုပြောရင် ကျွန်တော်တို့ ရှေ့မှာတော့ မတောင်းစားခိုင်းတော့ပါဘူး ဆိုပေမယ့်လို့ ပြန်တောင်းစားခိုင်းတာပါပဲ။ ငွေရလိုမှုကို ဦးတည်တာပါပဲ။ အဲဒီလို ကျွန်တော်တို့က ဘယ်လောက်ပြောပြော ကျွန်တော်တို့ မျက်စိအောက်က ပျောက်သွားတာနဲ့ အရင်အတိုင်း ပြန်လုပ်ခိုင်းတာပဲ။ သူတို့ကို စက်ချုပ်သင်မလား။ လာခဲ့ကျွန်တော်တို့ သင်ပေးမယ်။ တတ်ပြီဆိုရင် စက်ခေါင်းတစ်လုံးပါ အလကားပေးလိုက်မယ်။ သင်တန်းလာတက်လို့တတ်ပြီဆို သူတို့နေတဲ့နေရာမှာ ကျွန်တော်တို့ကှု NGO တွေနဲ့ ပေါင်းပြီးဆိုင်တည်ပေးတာပေါ့။ ဒါပေမဲ့ သူတို့က တစ်လလောက် လုပ်ပြီးလို့ရှိရင် သွားကြည့်တဲ့အခါ မရှိတော့ဘူး။ အဲဒီတော့ စက်ရှိနေရင် သားသမီးတွေအတွက် ကောင်းအောင်လုပ်ကျွေးမယ်ဆိုတဲ့ စိတ်ဓာတ်နည်းသွားတယ်။ အခုဆိုရင် လှိုင်သာယာဘက်မှာ မော်တာစက်ငါးလုံး၊ အပ်ချုပ်စက် ၁၀ လုံး ထောင်ထားပေးပြီးတော့ သင်ချင်တဲ့သူလာသင်၊ Street Children အမေ၊ အဖေတွေ လာသင်ပြီးရင် ငွေထောက်ပံ့ ပေးမယ်ဆိုပြီး ပြောထားပေမယ့် အခုထိကို မပေါ်လာကြသေးဘူး။ အဓိကကတော့ ငွေကို အလွယ်လို ချင်ကြတာပေါ့။ နာနတ်တောကို သုံးလေးကြိမ် ပြန်ရောက်ဖူးတဲ့ ကလေးရှိတယ်။ သူတို့ကို မေးကြည့်တော့ ဖုန်းခိုးရတာ လွယ်တယ်တဲ့။ ပြန်ရောင်းရင် တစ်သောင်းရတော့ သူတို့အတွက် တစ်နေ့စရိတ်က အေးဆေးပေါ့။ အဲဒီလိုစိတ်ဓာတ်တွေ ပြင်အောင်လို့ ကျွန်တော်တို့က သူတို့ရှိတဲ့နေရာတွေ သွားပြီး စာသင်ပေးတာတွေ မုန့်ကျွေးတာတွေ လုပ်ပေမယ့် သူတို့ရဲ့ ပင်ကိုစိတ်က မပြောင်းဘူး။

 

■မေး ။ ကလေးသူငယ် ဥပဒေပုဒ်မ ၆၅ နဲ့ ၆၆ မှာ ကလေးသူငယ်တွေကို တောင်းရမ်းစားသောက်ဖို့ ခိုင်းစေရင် ထောင်ဒဏ်နှစ်နှစ်၊ ငွေဒဏ်ကျပ်တစ်သောင်းနဲ့ ဒဏ်နှစ်ရပ်လုံး ချမှတ်နိုင်တယ်လို့ ပြဋ္ဌာန်းထားတာရှိပါတယ်။ ဒါကြောင့် ကလေးသူငယ် တောင်းရမ်းခိုင်းနေတဲ့ သူတွေကို ဆရာတို့အနေနဲ့ အမှုဖွင့်တာတို့ အရေးယူဆောင်ရွက်ထားတာတို့များ ရှိသလား ဆိုတာကို သိချင်ပါတယ်။

■ဖြေ ။  ခိုင်မာအောင် အမှုတည်ဆောက်မယ်ဆိုလို့ရှိရင် ကလေးကလည်း ကျွန်တော့်ကို ခိုင်းစားနေပါတယ်လို့ ထွက်ဆိုပေးရင် အမှုက ခိုင်မာတာပေါ့။ အဲဒီလိုတွေ မပြောတဲ့အတွက်လည်း အမှုက မခိုင်မာဘူး။ သူ့အမေအဖေကို ထောင်ချလိုက်ပြီဆိုရင် ကလေးကို ဘယ်သူထိန်းမလဲ။ ပိုဆိုးသွားမှာလည်း ကျွန်တော်တို့က စိုးရိမ်တယ်။ ကလေးရဲ့ အကောင်းဆုံး အကျိုးစီးပွားကို ဆောင်ရွက်နိုင်တာ သူ့အဖေနဲ့ အမေပဲ။ တစ်ခါတလေကျရင် တအားစဉ်းစားရတယ်။ ကလေးရဲ့အဖေနဲ့ အမေကို ဖမ်းလိုက်လို့ရှိရင် ထောင်နှစ်နှစ်ကျသွားမယ်။ အဲဒီနှစ်နှစ် အတွင်းမှာ ကလေးကိုဘယ်လို လုပ်မလဲ။ အဖေနဲ့ အမေက ပြန်ထွက်လာလို့ ပြုပြင်ရင် ကောင်းတယ်။ မပြုပြင်ဘူးဆို အရင်အတိုင်းပဲ။ အဲဒီတော့ နည်းလမ်းက ရှာလေခက်လေ။ ဘယ်လို ဖြေရှင်းရမလဲဆိုပြီး အသိပညာပေးတာတွေ လုပ်တာပဲ။ ပြောတုန်းခဏပဲ။ နောက်တော့ ဘာမှမထူးဘူး။ ရန်ကုန်တိုင်းမှာ ကလေးငယ်တွေကို တောင်းရမ်းခိုင်းစေတာတွေနဲ့ ပတ်သက်လို့ ပြောဆိုဆုံးမတာတော့ ရှိတယ်။ အမှုဖွင့် အရေးယူတဲ့အထိတော့ မရှိသေးဘူး။

 

■မေး ။ ဒီလို ကလေးသူငယ်တွေကို တောင်းရမ်းခိုင်းစေတာတွေ ပပျောက်ဖို့ဆိုရင် အဓိက ထိထိရောက်ရောက် လုပ်ဆောင်ရမယ့် အချက်တွေက ဘာတွေဖြစ်မယ်လို့ ဆရာ့အနေနဲ့ ပြောချင်ပါသလဲ။

■ဖြေ ။ အတွေးအခေါ်တွေကို ပြောင်းလဲပစ်ရမယ်။ ကလေးတွေရဲ့ မိဘတွေကို အလုပ်အကိုင်ရှာဖွေ ပေးပြီးတော့ မိဘတွေရဲ့ အတွေးအခေါ်ကိုလည်း ပြောင်းလဲပစ်ရမယ်။ ပတ်ဝန်းကျင်ရဲ့ အတွေးအခေါ်ကိုလည်း ချိန်းရမယ်။ ညီအစ်ကို မောင်နှမတွေရဲ့ အတွေးအခေါ်တွေကိုလည်း ချိန်းရမယ်။ အတွေးအခေါ် ပြောင်းလဲပစ်ရမယ့်အပြင်ကို အမြဲတမ်း စစ်ဆေးတာတွေလည်း လုပ်ရမယ်။ ဒါပေမဲ့ ကျွန်တော်တို့မှာ အင်အားမရှိဘူး။

 

■မေး ။  ဒီလို တောင်းရမ်းနေတဲ့ လမ်းပျော် ကလေးတွေရဲ့ ဘ၀တွေကို ပပျောက်အောင် မလုပ်နိုင်ဘူးဆိုရင် နောင်ဖြစ်လာမယ့် ဆိုးကျိုးတွေက ဘာတွေဖြစ်လိမ့်မယ်လို့ ဆရာ့အနေနဲ့ ယူဆပါသလဲ။

■ဖြေ ။ အဲဒါကို ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းကလည်း ပြောဖူးတယ်။ တစ်ချိန်ကျရင် ဒီကလေးတွေကို ငယ်ငယ်ကတည်းက မပြုပြင်ဘူးဆိုရင် ကြီးလာတဲ့အခါမှာ သူတောင်းစား ဟုတ်ရင်ဟုတ်၊ ဒါမှမဟုတ် ခိုးဆိုးမိုက်ရိုင်းတဲ့ လူမိုက်တွေ ဖြစ်သွားနိုင်တယ်။ အဲဒီတော့ Street Children  စီမံကိန်းကို လုပ်မယ်ဆိုပြီးတော့ စီစဉ်ကြတယ်။ ဒါပေမဲ့ ကျွန်တော်တို့ အသေးစား သုတေသနလုပ်တဲ့အခါမှာ အတော်လုပ်ယူရတယ်။ တိုင်းတစ်တိုင်းလုံးအနေနဲ့တော့ မဖြစ်နိုင်သေးဘူး။ ၀န်ကြီးချုပ်ကလည်း ခဏဆိုင်းငံ့ပြီး ကြည့်နေတာ။ အသေးလေးကိုတောင် လုပ်လို့ မနိုင်ဘူး။ NGO တွေနဲ့ ပေါင်းပြီးတော့ ဒီကလေးတွေကို မှတ်တမ်းယူ၊ သုတေသနလုပ်ပြီး အမျိုးအစားတွေခွဲခြား အဲဒါတွေကို လုပ်ပြီးပြီ။ ဒါပေမဲ့ ငွေအင်အား၊ လူအင်အား၊ တတ်ကျွမ်းနားလည်တဲ့ ၀န်ထမ်းအင်အားရှိမှ အသေးလေးကနေ အကြီးကြီးကို ကူးနိုင်မှာ။ ဒါပေမဲ့ ကြိုးစားပြီးတော့ လုပ်ရမှာပဲ။

 

■မေး ။ ရန်ကုန်တိုင်းဒေသကြီးအတွင်းမှာ လမ်းပေါ်ကလေး စုစုပေါင်း ဘယ်လောက်ရှိပြီး ဘယ်မြို့နယ်တွေက အများဆုံးဖြစ်မလဲ ဆရာ။

■ဖြေ ။ ရန်ကုန်တိုင်းဒေသကြီးမှာ လမ်းပျော်ကလေး အရေအတွက်က အကြမ်းဖျင်း ၁၅၀၀ လောက်ရှိတယ်။ မြို့နယ် ၄၅ မြို့နယ်မှာ တခြားဒေသကနေ ပြောင်းလာတာတွေလည်း ရှိတယ်။ အဲဒီလူတွေပါ ရောထွေးနေတာ။ ရန်ကုန်တိုင်းကချည်းပဲ မဟုတ်ဘူး။ အဲဒီ ၄၅ မြို့ နယ်ထဲမှာ လမ်းပျော်ကလေး အများဆုံးရှိတဲ့နေရာတွေက လှိုင်သာယာ၊ ဒလ၊ ရွှေပြည်သာ အဲဒီ သုံးမြို့ နယ်မှာတော့ အများဆုံးပဲ။ လမ်းပျော်ကလေး အရေအတွက်မှာ ယောက်ျားလေးများတယ်။ ဒီစာရင်းက ကျွန်တော်တို့ သုတေသနလုပ်ပြီး ရတဲ့စာရင်းပါ။

 

■မေး  ။  အခုလို မေးမြန်းခဲ့တဲ့အပေါ်မှာ ဆရာ့အနေနဲ့ ဘာများဖြည့်စွက် ပြောချင်တာ ရှိပါသလဲ။

■ဖြေ ။ အကုန်လုံးပပျောက်ဖို့ဆိုတာ ကျွန်တော်တို့ လူမှုဝန်ထမ်းဦးစီးဌာနတစ်ခုတည်းက လုပ်လို့မရဘူး။ အကုန်ဝိုင်းလုပ်မှရမှာ။ အဲဒါကြောင့်မို့လို့ အကုန်လုံးက ကလေးတွေ ကောင်းစားဖို့အတွက် ၀ိုင်းလုပ်ပေးကြပါလို့ ပြောချင်ပါတယ်။

ဒါရိုက်တာ ညီညီထွန်းလွင်နှင့် တွေ့ဆုံခြင်း

ပရိသတ်ကြိုက်နှစ်သက်တဲ့ ဇာတ်ကားတွေကို ရိုက်ကူးဖန်တီးနိုင်ခဲ့တဲ့ ဒါရိုက်တာတွေထဲမှာ ဒါရိုက်တာညီညီထွန်းလွင်ကလည်း ထင်ရှားတဲ့သူတစ်ဦးပါ။ အနုပညာနယ်ပယ်မှာ နှစ်ကာလများစွာ အောင်မြင်မှု တွေနဲ့ရပ်တည်နိုင်ခဲ့တဲ့ ဒါရိုက်တာ ညီညီထွန်းလွင်က ခုနောက်ပိုင်းမှာတော့ အသက်အရွယ်အရ ဇာတ်ကားရိုက်ကူးမှုတွေကို လုံးဝနီးပါး လျော့ချခဲ့သူလည်း ဖြစ်ပါတယ်။ ဇာတ်ကားရိုက်ကူးမှုတွေ နားတော့မယ်လို့ ဆုံးဖြတ်ပြီးချိန်မှာတော့ သူဖန်တီးချင်တဲ့ ဇာတ်လမ်းတွေ၊ သူရိုက်ချင်တဲ့ဇာတ်လမ်းတွေ၊ သူ့ဘ၀အတွက် အမှတ်တရဖြစ်စေမယ့် ဇာတ်လမ်းတွေကို လွန်ခဲ့တဲ့ သုံးနှစ်ဝန်းကျင်ကစပြီး ရိုက်ကူးခဲ့သူပါ။ အဲဒီအချိန်တုန်းက ရိုက်ကူးခဲ့တဲ့ ရုပ်ရှင်ဇာတ်ကားတွေထဲမှာ တစ်ကားအပါအ၀င်ဖြစ်ခဲ့တဲ့ ‘အော်တိုဘုရင်’ ရုပ်ရှင်ဇာတ်ကားကို အောက်တိုဘာ ၂၀ ရက်ကစပြီး မြန်မာနိုင်ငံတစ်ဝန်းက ရုပ်ရှင်ရုံတွေမှာ ရုံတင်ပြသတော့မှာပါ။ လက်ရှိမှာ မြန်မာနိုင်ငံရုပ်ရှင်အစည်းအရုံးရဲ့ အဖွဲ့ဝင်တစ်ဦးအဖြစ် တာဝန်ထမ်းဆောင်နေသလို ဇာတ်ကား နမူနတင်ကတည်းက ပရိသတ်တွေရဲ့စိတ်ဝင်စားမှု အများကြီးရရှိခဲ့တဲ့ ‘အော်တိုဘုရင်’ ဇာတ်ကားနဲ့ပတ်သက်ပြီး ဖန်တီးသူဖြစ်တဲ့ ဒါရိုက်တာ ညီညီထွန်းလွင်နဲ့တွေ့ဆုံခိုက် မေးမြန်းဖြစ်ခဲ့တာတွေကို ဖော်ပြလိုက်ပါတယ် . . .

 

■ မေး- အော်တိုဘုရင် ရုပ်ရှင်ဇာတ်ကားကို ရိုက်ကူးဖြစ်ခဲ့တဲ့အကြောင်းလေးကို အရင်သိပါရစေ။

ဖြေ – ဦးညီအနေနဲ့ ဇာတ်ကားရိုက်ကူးမှုတွေ အနုပညာအလုပ်တွေကနေ နားတော့မယ်လို့ ဆုံးဖြတ်တဲ့အချိန်မှာ အပျင်းပြေ အပျော်ကြည့်အနေနဲ့ မဟုတ်ဘဲ အမှတ်တရဖြစ်စရာ ဇာတ်လမ်းလေးတွေ ရိုက်မယ် စဉ်းစားမိတယ်။ ဒီအော်တိုဘုရင်ကလည်း အဲဒီလို စိတ်ကူးနဲ့ရိုက်တယ်။ ဇာတ်သမားပြန်ရင် မှတ်သမားစရာ ကျန်ရမယ်ဆိုတာမျိုး၊ ခေတ်နဲ့စနစ်ကို သရော်ပြီးတော့ ပုံဖော် ရိုက်ကူးထားတယ်။ ရုပ်ရှင်တစ်ကားကို အပျော်ကြည့် အပျင်းပြေတစ်ခုနဲ့တင် ပြီးမသွားဘဲ ပရိသတ်ကို တစ်ခုခုပေးနိုင်တဲ့ ဇာတ်ကားမျိုးဖြစ်ချင်တယ်။ ဒီ ဇာတ်ကားဆိုမှာဆိုရင်လည်း နိုင်ငံရေးနဲ့ပတ်သက်တဲ့ အကြောင်းအရာတွေ ကိုသရော်ပြီး ရိုက်ကူးထားတယ်။  နိုင်ငံရေးနဲ့ပတ်သက်ပြီး ပိုပြီးစိတ်ဝင်စားစေချင်တာရယ် စကားလုံးတွေကတစ်ဆင့် နိုင်ငံရေးအကြောင်းအရာတွေကို သရော်ထားတယ်။

■ မေး – နိုင်ငံရေးနဲ့ပတ်သက်တဲ့ အကြောင်းအရာတွေကို သရော်ရိုက်ကူးဖို့အတွက် ဒီဇာတ်လမ်းကိုရွေးချယ်ဖြစ်ခဲ့တာလား ကိုယ်ရိုက်ချင်တဲ့ အကြောင်းအရာတွေကိုတည်ပြီးတော့မှ ဒီဇာတ်လမ်းကို ရွေးခဲ့တာမျိုးလား။

ဖြေ – ဇာတ်လမ်းကိုပဲ အရင်ရွေးတာပါ။ ပြီးတော့ နဂါးနိုင်မင်း ပေါက်ကျိုင်းဆိုတာက သူ့ဇာတ်လမ်းနဲ့ သူရှိပြီးသားလေ။ ဒါကိုပဲ ဦးညီတို့က ကိုယ်လိုချင်တဲ့ အပိုင်းလေးတွေကို ချဲ့ယူတာမျိုးပါပဲ။ ကိုယ်ပြောချင်တဲ့ နိုင်ငံရေးသရော် ဇာတ်ကွက်တွေကို ဇာတ်လမ်းထဲကိုဝင်အောင်ထည့်ပြီး ရိုက်ကူးခဲ့တာပါ။

■ မေး – ‘အော်တိုဘုရင်’ ရုပ်ရှင်ရိုက်ကူးဖို့အတွက် ပြင်ဆင်ခဲ့ရတာတွေရှိရင်လည်း သိချင်ပါတယ်။

ဖြေ – ဒီဇာတ်ကားမရိုက်ခင်မှာ ဂျာနယ်တွေ၊ သတင်းစာတွေ၊ ဆောင်းပါးတွေ၊ ကာတွန်းတွေဖတ်ပြီး ခေတ်နဲ့စနစ်ကို ထင်ဟပ်နိုင်မယ့် အကြောင်းအရာတွေ သရော်ဟာသအနေနဲ့ လုပ်နိုင်မယ့်အချက်အလက်တွေကို ရှာဖွေစုဆောင်းရတယ်။ အဲဒီလိုရှာဖွေထားတာကို ဒီဇာတ်လမ်းမှာ ဖြည့်စွက်လိုက်တာမျိုးပါပဲ။ အဲဒီလို ဖြည့်စွက်တင်ပြလို့ရမယ့် ဇာတ်လမ်းမျိုးဖြစ်လို့လဲ ပေါက်ကျိုင်းဇာတ်ကို ရွေးချယ်ဖြစ်ခဲ့တာ။

■ မေး – ဟိုးအရင်တုန်းကလည်း ဒီလို ပေါက်ကျိုင်းဇာတ်မျိုးကို ရိုက်ခဲ့ဖူးတယ်ဆိုတော့ အဲဒီဇာတ်ကားနဲ့ အော်တိုဘုရင် ဇာတ်ကား ဘာတွေကွာခြားသွားမလဲ။

ဖြေ – ဟိုးအရင် ဗီဒီယိုခေတ်တုန်းက မော့စ်နဲ့ ခေတ်သစ်ပေါက်ကျိုင်းဆိုပြီး ရိုက်ကူးခဲ့တယ်။ အဲဒီဇာတ်ကားက ခွေငှားဆိုင်တွေ အတော်များများမှာ ဈေးကြီးတင်ပြီး ခိုးဝှက် ငှားကြည့်ရတဲ့ ဇာတ်ကားဖြစ်ခဲ့သလို ဦးညီ ကိုယ်တိုင်လည်း စစ်ဆေးမေးမြန်းတာတွေ ခံခဲ့ရတယ်။ အဲဒီတုန်းကလည်း ခေတ်နဲ့စနစ်ကို သရော်နိုင်မယ့်အကြောင်းအရာလေးတွေထည့်ပြီး ရိုက်ခဲ့တာပါပဲ။ အော်တို ဘုရင်ဇာတ်ကားမှာတော့ အရင်ကထက်ပိုပြီး လွတ်လွတ်လပ်လပ် တင်ပြနိုင်တဲ့ အနေအထားမျိုးဖြစ်လာသလို ဒီဘက်ခေတ်ရဲ့ အနေအထားတွေ အခြေအနေတွေကိုလည်း ထင်ဟပ်နိုင်အောင် ကြိုးစားထားတယ်။

■ မေး – အရင်ကထက်ပိုပြီး လွတ်လွတ်လပ်လပ် ဖန်တီးလာနိုင်တဲ့ ဒီအော်တိုဘုရင် ဇာတ်ကားအတွက် ဆင်ဆာ အခက်အခဲတွေလည်း ရှိခဲ့တယ်ဆိုတော့ ဆင်ဆာမှာ ကြုံရတဲ့အခက်အခဲတွေကိုလည်း ပြောပြပေးပါဦး။

ဖြေ – အော်တိုဘုရင် ဇာတ်ကားမှာလည်း ဆင်ဆာက ဖြတ်ခိုင်းတာတွေများခဲ့တယ်။ ကိုယ့်ဘက်ကလည်း ဖြတ်နိုင်တာလေးတွေ ဖြတ်ပေးပြီး တချို့ဇာတ်ဝင်ခန်းတွေကတော့ ဇာတ်လမ်းကို ထိခိုက်ပျက်ဆီးစေနိုင်တာမျိုးတွေ ကြုံနိုင်တဲ့အတွက် ပြန်ပြီးစောဒကတက်တဲ့နည်းနဲ့  ပြန်ညှိနှိုင်းပြီး ဆွေးနွေးရတာလေးတွေ ရှိပါတယ်။ ဒီဇာတ်ကားက တစ်ကားလုံးနီးပါးက အန်နီးမေးရှင်းတွေပါတဲ့အခါ ဆင်ဆာဖြတ်ခံရရင် အဲဒီ ကွန်ပျူတာ အထူးပြုလုပ်ချက်တွေပါ အကုန်ပြန်လုပ်ရတာမျိုးတွေ ကျတော့လည်း အဆင်မပြေဖြစ်တာတွေ ရှိတယ်။ ပထမပိုင်းတုန်းကတော့ ဆင်ဆာဖြတ်ခံရတဲ့အပိုင်းက တော်တော်များများရှိခဲ့တယ်။ ဇာတ်ဝင်ခန်းတစ်ခန်းလုံးကို ဖြတ်ပေးရ တာမျိုးတွေလည်းရှိတယ်။ ဒါပေမဲ့ ကိုယ့်ဘက်ကစောဒက ပြန်တက်ပြီး ညှိရတာတွေရှိတယ်။ အတော်များများကတော့ ပြန်ပြီးအဆင်ပြေခဲ့ပါတယ်။

■ မေး – ဒီဇာတ်ကား ရိုက်ကူးတုန်းက ကြုံရတဲ့အခက်အခဲတွေ အမှတ်တရတွေကိုလည်း ပြောပြပေးပါဦး။

ဖြေ – ပေါက်ကျိုင်းက ပါးစပ်ရာဇ၀င်တစ်ခုဖြစ်တဲ့အတွက်  ဒီ ဇာတ်မှာ ကျွန်တော်တို့က ဟာသအနေနဲ့ရော သရော်ပြီး ရိုက်ကူးမယ့် အကြောင်းအရာတွေအတွက်ပါ လွတ်လွတ်လပ်လပ် ဖန်တီးရိုက်ကူးခွင့်ရှိတဲ့ အပေါ်မှာ ဟာသအမြင်ဖြစ်အောင် နဂါးက လက်ပတ် နာရီပတ်တာမျိုး၊ အ၀တ်အစားဒီဇိုင်းကို အဆင်ပြေအောင်ပြင်ဆင်နိုင်တာမျိုးတွေရော စကားပြောမှာလည်း ခေတ်စကားတွေနဲ့ ထည့်ပြောတာတွေ လုပ်ထားတယ်။ နောက်ပြီး နဂါး ခေါင်းကိုဖြတ်ပြီး ယူသွားတဲ့ အခန်းဆိုရင်လည်း ဘုရားပွဲဈေးက နဂါးခေါင်းကိုထည့်သုံးပြီး စကားပြောနဲ့တင် ဟာသလုပ်ထားလိုက်တယ်။ ဒါကြောင့် ဒီဇာတ်ကားက ပရိသတ်တွေအတွက် အမြင်တစ်ခုတော့ ဆန်းနေမှာပါ။

■ မေး – ဒီဇာတ်ကားကို လာကြည့်မယ့် ပရိသတ်တွေကို ပြောချင်တဲ့စကားရှိရင်။

ဖြေ – ဒီဇာတ်ကားက ရိုက်ရိုးရိုက်စဉ် ပြရိုးပြစဉ်ထဲမှာ မပါတဲ့အတွက် ပရိသတ်တွေ ကြိုက်မှကြိုက်ပါ့မလားလို့ စိတ်ပူမိတာရှိတယ်။ ဒီ ဇာတ်ကားလေးကြည့်ရင် ပရိသတ်တွေရင်ထဲမှာ အမှတ်တရ အဖြစ်တွေ စကားလုံးလေးတွေပေါ်မှာ မှတ်သားမိတာ၊ ခံစားမှု ရသတွေတော့ ပေးစွမ်းနိုင်မှာပါ။