အိန္ဒိယနှင့် ဘင်္ဂလားဒေ့ရ်ှတွင် ရေကြီးမှုများကြောင့် လူဒါဇင်များစွာသေဆုံးပြီး တစ်သန်းကျော် အိုးအိမ်စွန့်ခွာရ

ဇွန် ၁၅ ရက်က ထရိပူရပြည်နယ် မြို့တော်အပြင်ဘက်ရှိ ဘယ်ဒါခယ်ရွာတွင် ရေလွှမ်းနေစဉ် သွားလာနေသူများကို တွေ့ရစဉ် (Photo: AFP)

တောင်အာရှတွင် မုတ်သုံမိုးသည်းထန်စွာ ရွာသွန်းမှုကြောင့် ရေကြီးမှုများဖြစ်ပေါ်ခဲ့ပြီး လူဒါဇင်များစွာသေဆုံး၍ တစ်သန်းကျော် အိုးအိမ်စွန့်ခွာခဲ့ရကြောင်း၊ အများစုသည် အိန္ဒိယအရှေ့မြောက်ပိုင်းနှင့် ဘင်္ဂလားဒေ့ရ်ှတို့မှဖြစ်ကြောင်း အာဏာပိုင်များက ဇွန် ၁၉ ရက်တွင် ပြောကြားခဲ့သည်။

ဟိမ၀န္တာမှ အိန္ဒိယသို့ စီးဆင်းပြီး ယင်းမှတစ်ဆင့် ဘင်္ဂလားဒေ့ရ်ှသို့ ဖြတ်သန်းသည့် ဗြဟ္မပုတြမြစ်၏ မြစ်ကမ်းပါးများ ကျိုးပေါက်မှု ဖြစ်ပွားခဲ့မှုကြောင့် ပြီးခဲ့သည့်သီတင်းပတ်တွင် အိန္ဒိယ၏အာသံပြည်နယ်ရှိ ကျေးရွာ ၁,၅၀၀ ကျော်တွင် ရေလွှမ်းခဲ့သည်။

“ရေကြီးတဲ့အခြေအနေက စိုးရိမ်ရတဲ့ အခြေအနေ ရှိနေသေးတယ်” ဟု အာသံပြည်နယ်၏ ရေအရင်းအမြစ်ဝန်ကြီး ကီရှက်မာ ဟန်တက ရိုက်စ်တာသတင်းဌာနသို့ ပြောကြားခဲ့သည်။

လာမည့် ၄၈ နာရီအတွင်း မိုးပိုမိုသည်းထန်စွာ ရွာသွန်းမည်ဟု မိုးလေ၀သဌာနက ခန့်မှန်းထားသည်ဟု မာဟန်တက ပြောကြားခဲ့သည်။ အာသံပြည်နယ်တွင် အမြင့်ဆုံး သတိပေးချက် ထုတ်ပြန်ထားပြီး ကယ်ဆယ်ရေးများအတွက် စစ်တပ်က ရဟတ်ယာဉ်များ အသင့်ထားထားသည်ဟု ၎င်းက ပြောကြားခဲ့သည်။

ရေကြီးမှုများကြောင့် အိန္ဒိယပြည်နယ်များဖြစ်သည့် အာသံ၊ ထရီပူရနှင့် မဏိပူရ်တို့တွင် လူ ၂၀ ခန့်သေဆုံးပြီး ၈၀၀,၀၀၀ ခန့် အိုးအိမ်စွန့်ခွာခဲ့ရသည်။ ဗြဟ္မပုတြမြစ်တွင် မြစ်ရေသည် ယခုသီတင်းပတ်မကုန်မီအထိ မြင့်တက်ဖွယ်ရှိသည်ဟု အိန္ဒိယ၏ ဗဟိုရေ အရင်းအမြစ်ကော်မရှင်က ထုတ်ပြန်ခဲ့သည်။

ဘင်္ဂလားဒေ့ရ်ှရှိ ရေစုန်တွင် လူ ၁၁ ဦး သေဆုံးပြီး လူ ၂၅၀,၀၀၀ ကျော် အိုးအိမ်စွန့်ခွာခဲ့ရ (သို့မဟုတ်) ရေကြီးမှုဒဏ်ကို ခံခဲ့ရသည်ဟု တာဝန်ရှိသူများက ပြောကြားခဲ့သည်။

ပြီးခဲ့သည့်သီတင်းပတ်တွင် ဘင်္ဂလားဒေ့ရှ် အရှေ့တောင်ပိုင်းတွင် မိုးသည်းထန်စွာ ရွာသွန်းမှုကြောင့် မြေပြိုမှုများနှင့် အခြားမတော်တဆမှုများ ဖြစ်ပွားခဲ့ရာတွင် နယ်စပ်အနီးရှိ စခန်းများတွင် နေထိုင်သည့် ဘင်္ဂါလီဒုက္ခသည် (မူရင်းတွင် ရိုဟင်ဂျာမွတ်စလင်ဟု သုံးထား) နှစ်ဦး အပါအ၀င် ၁၂ ဦးထက်မနည်း သေဆုံးခဲ့သည်။

Ref: Reuters

ဆေးခြောက်များ တရားဝင် ထုတ်လုပ်ခြင်းနှင့် သုံးစွဲခြင်းကို ကနေဒါအထက်လွှတ်တော် အတည်ပြု

ကနေဒါတွင် ဆေးခြောက်များ တရားဝင် ထုတ်လုပ်သုံးစွဲခွင့်ကို ဇွန် ၁၉ ရက်တွင် ကနေဒါအထက် လွှတ်တော်က မဲခွဲဆုံးဖြတ်ခဲ့ရာတွင် အမတ် ၅၂ ဦးအနက် ထောက်ခံမဲ ၂၉ မဲဖြင့် အတည်ပြုနိုင်ခဲ့သည်။ ကနေဒါသည် စိတ်ကိုပြောင်းလဲစေသော ဆေးဝါးများ ထုတ်လုပ်ခြင်းနှင့် သုံးစွဲခြင်းကို တရားဝင် ခွင့်ပြုပေးလိုက်သော ပထမဆုံး ဂျီ-၇နိုင်ငံဖြစ်လာရန် နီးစပ်နေပြီဖြစ်သည်။

ကနေဒါအောက်လွှတ်တော်တွင် ဇွန် ၁၉ ရက်က ယင်းဥပဒေကြမ်းအား မဲခွဲဆုံးဖြတ်ခဲ့ရာ ထောက်ခံမဲ ၈၂ မဲဖြင့် အတည်ပြုခဲ့သည်။

ဥပဒေသစ်အဖြစ် မပြဋ္ဌာန်းမီ ဘုရင်ခံချုပ်၏ တော်ဝင်သဘောတူညီချက်ကို စက်တင်ဘာလထက် နောက်မကျဘဲရရှိရမည်ဖြစ်ပြီး ယင်းမှာ ကနေဒါ၏ လုပ်ရိုးလုပ်စဉ်တစ်ခုပင် ဖြစ်သည်။

ဥပဒေကြမ်းအား အထက်လွှတ်တော်တွင် အဆိုတင်သွင်းရာ၌ နှောင့်နှေးကြန့်ကြာမှုများ ရှိခဲ့သော်လည်း ဥပဒေပြဋ္ဌာန်းခြင်းကို အတားအဆီးမဖြစ်ခဲ့ပေ။ ကနေဒါတွင် ၁၉၂၃ ခုနှစ်ကတည်းက ချမှတ်ထားသော ဆေးခြောက်သုံးစွဲမှု ပိတ်ပင်တားဆီးသည့် လှုပ်ရှားမှုသည် အဆုံးသတ်တော့မည်ဖြစ်သည်။

သို့သော် ဆေးခြောက်အား ဆေးကုသမှုများတွင် တရားဝင် အသုံးပြုခွင့်ပေးထားသည်မှာ နှစ် ၂၀ နီးပါးရှိနေပြီဖြစ်သည်။ ၂၀၁၅ ခုနှစ်တွင် မဲဆွယ်လှုပ်ရှားစဉ်က ၀န်ကြီးချုပ် ဂျက်စတင်ထရူဒိုးသည် ဆေးခြောက်ကို တရားဝင်ပြုလုပ်ပေးမည်ဟု ကတိပြု စည်းရုံးခဲ့ဖူးသည်။

Ref: AFP

အမေရိကန်က ကုလသမဂ္ဂ လူ့အခွင့်အရေးကောင်စီမှ နုတ်ထွက်

ဇွန် ၁၉ ရက်က ၀ါရှင်တန်ရှိ အမေရိကန် နိုင်ငံခြားရေးဌာန၌ ကုလသမဂ္ဂဆိုင်ရာ အမေရိကန် သံအမတ်ကြီး ဟာလေးစကားပြောနေသည်ကို နိုင်ငံခြားရေးဝန်ကြီး ပွန်ပီယိုက ကြည့်နေစဉ် (Photo: AFP)

အမေရိကန်က ကုလသမဂ္ဂ လူ့အခွင့်အရေးကောင်စီမှ နုတ်ထွက်ကြောင်း ဇွန် ၂၀ ရက်တွင် ကြေညာခဲ့ပြီး ထိုကောင်စီအဖွဲ့ဝင် နိုင်ငံများ၏ သူတော်ကောင်းဟန်ဆောင်မှုများအား ရှုတ်ချခဲ့ကာ အစ္စရေးနိုင်ငံအား ဘက်လိုက်၍ မရပ်မနား ဆန့်ကျင်နေကြောင်းလည်း စွပ်စွဲခဲ့သည်။ ထိုနုတ်ထွက်ကြောင်း ဆုံးဖြတ်ချက်ကို ကြေညာရန် ကုလသမဂ္ဂဆိုင်ရာ အမေရိကန်သံအမတ်ကြီး နစ်ကီဟာလေးက အမေရိကန် နိုင်ငံခြားရေးဝန်ကြီး မိုက်ပွန်ပီယိုနှင့်အတူ ရောက်ရှိလာခဲ့သည်။ အမေရိကန်သည် လူ့အခွင့်အရေးအတွက် ဦးဆောင်ကြိုးပမ်းသူအဖြစ် ဆက်ရှိနေမည်ဖြစ်ကြောင်း ၎င်းတို့က အခိုင်အမာ ပြောကြားခဲ့သော်လည်း ထိုဆုံးဖြတ်ချက်သည် ကုလသမဂ္ဂနှင့် နိုင်ငံစုံသံတမန်ရေးရာ အဖွဲ့အစည်းများအား အမေရိကန်သမ္မတ ဒေါ်နယ်ထရန့်၏ ရန်လိုမှုများကို ထင်ဟပ်ခဲ့သည်။

မက္ကဆီကိုနိုင်ငံမှ အမေရိကန်ထဲသို့ ဖြတ်ကျော်ဝင်ရောက်လာပြီးနောက် ခိုလှုံခွင့်တောင်းခံသည့် မိဘများနှင့် ၎င်းတို့၏ ကလေးများကို ခွဲ၍ထားသည့် အမေရိကန်၏လုပ်ရပ်အား ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး Zeid Ra’ad Al Hussein က ဇွန် ၁၉ ရက်တွင် ဝေဖန်ခဲ့ပြီးနောက် အမေရိကန်က ယင်းဆုံးဖြတ်ချက်ကို ထုတ်ပြန်ခဲ့ခြင်းဖြစ်သည်။ သို့သော် ထိုကောင်စီအား ပြုပြင်ပြောင်းလဲမှုလုပ်ဆောင်ရန်၊ လူ့အခွင့်အရေး ချိုးဖောက်မှုများတွင် ပါဝင်ပတ်သက်နေသည့် အဖွဲ့ဝင်နိုင်ငံများအား ထုတ်ပယ်ရန် တစ်နှစ်ကျော်ကြာ တောင်းဆိုမှုများ ပြုလုပ်ခဲ့ပြီးမှသာ ယခုဆုံးဖြတ်ချက်ကို ချမှတ်ခဲ့ခြင်းဖြစ်ကြောင်း ဟာလေးနှင့် ပွန်ပီယိုတို့က အလေးအနက်ထား ပြောကြားခဲ့သည်။

ထိုကောင်စီသည် လူ့အခွင့်အရေး ချိုးဖောက်သူများအား ကာကွယ်ပေးသည့်အဖွဲ့အဖြစ် ကာလရှည်ကြာ ရပ်တည်ခဲ့ကြောင်း၊ နိုင်ငံရေးဘက်လိုက်သည့် အကျင့်ပျက်မှုများ ပြည့်နှက်နေကြောင်း၊ ၀မ်းနည်းစရာကောင်းသည်မှာ ပြုပြင်ပြောင်းလဲမှုများ ပြုလုပ်ရန်အတွက် ၎င်းတို့၏တောင်းဆိုချက်များမှာ အရေးစိုက်မခံရကြောင်း ထင်ရှားသွားခဲ့ဟု ဟာလေးက ပြောကြားခဲ့သည်။ ကမ္ဘာတစ်ဝန်း လူ့အခွင့်အရေးများအား မြှင့်တင်ရန်နှင့် ကာကွယ်ရန်အတွက် ၂၀၀၆ ခုနှစ်တွင် ထူထောင်ခဲ့သည့် ထိုကောင်စီ၏ ကြေညာချက်များနှင့် အစီရင်ခံစာများသည် အမေရိကန်နှင့် မကြာခဏ အချင်းများခဲ့သည်။

အမေရိကန်သမ္မတဟောင်း ဂျော့ဒဗလျူဘုရ်ှလက်ထက် ၂၀၀၆ ခုနှစ်တွင် ကုလသမဂ္ဂဆိုင်ရာ အမေရိကန်သံအမတ်ကြီးအဖြစ် ဂျွန်ဘိုတန် (ယခုထရန့်၏ အမျိုးသားလုံခြုံရေး အကြံပေး။) က ထမ်းဆောင်နေစဉ် ထိုကောင်စီ၌ အမေရိကန်ပါဝင်ရန် ငြင်းဆန်ခဲ့သည်။ သို့သော် ဘာရက်အိုဘားမားက အမေရိကန်သမ္မတအဖြစ် ရွေးကောက်ခံခဲ့ရချိန်တွင် ၂၀၀၉ ခုနှစ်၌ အမေရိကန်က ယင်းကောင်စီတွင် ပါဝင်ခဲ့သည်။ သို့သော် ဒေါ်နယ်ထရန့်က အမေရိကန်သမ္မတဖြစ်လာချိန်တွင် ကုလသမဂ္ဂအား ရန်လိုသည့်ချဉ်းကပ်မှုကို ဦးတည်ခဲ့ပြီး ကုလသမဂ္ဂယဉ်ကျေးမှုဆိုင်ရာ အေဂျင်စီ (ယူနက်စကို) မှ နုတ်ထွက်ခဲ့ပြီးဖြစ်ကာ ကုလသမဂ္ဂ ရန်ပုံငွေများအား လျှော့ချဖြတ်တောက်ခြင်း၊ ပါရီရာသီဥတု တိုက်ဖျက်ရေး သဘောတူညီချက်မှ နုတ်ထွက်ရန် စီစဉ်ခြင်းတို့ လုပ်ဆောင်ခဲ့သည်။

Ref: AFP

နှစ်နှစ်ကြာပြီးနောက် တောင်ဆူဒန်မှ ရန်ဘက်နှစ်ဦးတို့ ပထမဆုံးအကြိမ် တွေ့ဆုံကြမည်

၂၀၁၄ ခုနှစ် မေ ၉ ရက်က တောင်ဆူဒန်တွင် တိုက်ခိုက်မှုရပ်ဆိုင်းရေး သဘောတူညီချက် လက်မှတ်ထိုးသည့် အခမ်းအနား၌ ကီယာ (၀ဲ) နှင့် မာချာ (ယာ) တို့ကို တွေ့ရစဉ် (Photo: AFP)

တောင်ဆူဒန်ပြည်တွင်းစစ်၏ ဗဟိုချက်မှ ပုဂ္ဂိုလ်နှစ်ဦးသည် နှစ်နှစ်နီးပါးကြာကာလအတွင်း ပထမဆုံးအကြိမ်အဖြစ် ဇွန် ၂၀ ရက်တွင် တွေ့ဆုံရန် စီစဉ်ထားသည်။

တောင်ဆူဒန်သမ္မတ ဆယ်ဗာကီယာနှင့် သူပုန်ခေါင်းဆောင်ရိခ်မာချာတို့ မျက်နှာချင်းဆိုင် တွေ့ဆုံလိမ့်မည်ဟု မျှော်မှန်းထားကြောင်း ထိုတွေ့ဆုံပွဲ ဖြစ်မြောက်စေရေးအတွက် ၀င်ရောက်စေ့စပ်ပေးသည့် အီသီယိုးပီးယားက ပြောကြားခဲ့သည်။ ရိခ်မာချာသည် ၂၀၁၆ ခုနှစ် ဇူလိုင်လက တောင်ဆူဒန်မှ ထွက်ပြေးသွားခဲ့သူဖြစ်သည်။

မတည်ငြိမ်သော ဆက်ဆံရေးကြောင့် နာမည်ဆိုးဖြင့် ကျော်ကြားသည့် ၎င်းတို့နှစ်ဦးကြားတွင် တရားဝင်ဆွေးနွေးရမည့် အတိုင်းအတာမှာ ကျယ်ပြန့်လှသည်။ တွေ့ဆုံပွဲ၏ ရလဒ်မှာ မည်သို့ဖြစ်လာမည်ကို ရှင်းရှင်းလင်းလင်း မခန့်မှန်းနိုင်သေးသည့်အပြင် ဆွေးနွေးပွဲဖြစ်လာပါ့မလားဟုပင် သံသယများ ရှိခဲ့ကြသည်။

ကီယာနှင့် မာချာတို့သည် တစ်ချိန်က လွတ်လပ်ရေးအတွက် အတူတိုက်ပွဲဝင်ခဲ့ကြသည့် ရဲဘော်ရဲဘက်များ ဖြစ်ခဲ့သော်လည်း ဆူဒန်မှ လွတ်လပ်ရေးရပြီးသည့်နောက်ပိုင်း ဆက်ဆံရေး ဆိုးရွားလာခဲ့ပြီး နောက်ဆုံးတွင် ကမ္ဘာ့သက်တမ်းအနုဆုံးနိုင်ငံ တောင်ဆူဒန်၌ ပြည်တွင်းစစ်ဖြစ်ခဲ့ရသည်အထိ ရောက်ခဲ့သည်။ ယင်းပြည်တွင်းစစ်ကြီးကြောင့် လူထောင်ပေါင်းများစွာ အသက်ဆုံးရှုံးခဲ့ရပြီး နိုင်ငံ့လူဦးရေ ၁၂ သန်းထဲမှ သုံးပုံတစ်ပုံအထိ အိုးအိမ်များကို စွန့်ခွာထွက်ပြေးခဲ့ရသည်။ ထို့ပြင် နိုင်ငံတွင်းမှ လူအများအပြားမှာလည်း အငတ်ဘေးဆိုက်တော့မည် အခြေအနေသို့လည်း ရောက်ရှိနေပြီဖြစ်သည်။

ထိုစဉ် အီသီယိုးပီးယား ၀န်ကြီးချုပ်သစ် အဘိုင်လီအာမတ်၏ ဖိတ်ခေါ်မှုဖြင့် ကီယာနှင့် မာချာတို့သည် တွေ့ဆုံကြမည်ဖြစ်သည်။ အာမတ်သည် အကျိုးမထူးသေးသော ငြိမ်းချမ်းရေးဆွေးနွေးမှုများကို ဦးဆောင်ဦးရွက် ပြုပေးနေသည့် ဒေသတွင်း အဖွဲ့အစည်းတစ်ခုဖြစ်သော အစိုးရအချင်းချင်း ဖွံ့ဖြိုးတိုးတက်ရေး အာဏာပိုင်အဖွဲ့ (IGAD) ၏ ဥက္ကဋ္ဌလည်းဖြစ်သည်။ ဆွေးနွေးပွဲသို့ ကီရာ တက်ရောက်မည်ဖြစ်ကြောင်း အီသီယိုးပီးယားနိုင်ငံဆိုင်ရာ တောင်ဆူဒန် သံအမတ်က အတည်ပြုပေးခဲ့ပြီး မာချာက တက်ရောက်မည်ဖြစ်ကြောင်းကို ၎င်း၏ဆူဒန် ပြည်သူ့လွတ်မြောက်ရေး လှုပ်ရှားမှုအဖွဲ့၏ အကြီးတန်းအရာရှိတစ်ဦးက အတည်ပြုခဲ့သည်။

ဆူဒန်နိုင်ငံထဲ၌ ကာလရှည်ကြာ ရက်စက်ကြမ်းကြုတ်သော ပြည်တွင်းစစ်ကြီး ဖြစ်ပွားခဲ့ပြီးနောက် တောင်ဆူဒန်နိုင်ငံ ဖြစ်ပေါ်လာခဲ့သည်။ ကုန်တွင်းပိတ်နိုင်ငံငယ် တောင်ဆူဒန်တွင် မျိုးနွယ်စုများစွာ ရောနှောနေထိုင်လျက်ရှိသည်။ ၂၀၁၃ ခုနှစ်တွင်မူ ကီယာသည် ၎င်း၏ ဒုသမ္မတဖြစ်သော မာချာမှာ ၎င်းကို ဖြုတ်ချရန် ကြံစည်နေသည်ဟု စွပ်စွဲရာမှ အစပြုပြီး နှစ်ဘက်အင်အားစုကြားတွင် အကြမ်းဖက်မှုများ ဖြစ်ပေါ်လာကာ နိုင်ငံ၏ ကျယ်ပြန့်လှသော လူမျိုးရေးတင်းမာမှုများအတွက် မီးထိုးပေးသကဲ့သို့ ဖြစ်လာခဲ့သည်။

ကီယာနှင့် မာချာတို့ ဆွေးနွေးကြမည့် အရေးကို ကမ္ဘာတစ်ဝန်းမှ ဂျော့ကလူးနီ အစရှိသော ထင်ရှားကျော်ကြားသူများက ဂုဏ်ပြု ကြိုဆိုခဲ့ကြသည်။

သမ္မတကီယာမှာမူ ဖိအားများကြောင့် ယခုတွေ့ဆုံပွဲအား တက်ရမည်ဖြစ်သော်လည်း ဆွေးနွေးခြင်းဖြင့် ၎င်းအတွက်ရရှိမည့် အကျိုးကျေးဇူးမှာ နည်းပါးနေသည်။ မြေပြင် အခြေအနေတွင် ကီယာ၏ စစ်သားများသည် အောင်ပွဲများက ဆက်နေကာ အတိုက်အခံတို့မှာမူ အဆိုးရွားဆုံး အခြေအနေကို ရင်ဆိုင်နေရသည်။

Ref: AFP

အမေရိကန်က တရုတ်အလူမီနီယမ်ပြားများအား ဒေါ်လာတစ်ဘီလျံနီးပါး သွင်းကုန်ခွန်များ ပြဋ္ဌာန်း

ဧပြီ ၇ ရက်က တရုတ်နိုင်ငံ ရှန်တုံပြည်နယ်၌ အလူမီနီယမ်စက်ရုံတစ်ရုံ၏ အတွင်းပိုင်းကို တွေ့ရစဉ် (Photo: Reuters)

ပြည်တွင်းတွင် မစွံတော့သောကုန်များအား အမေရိကန်ဈေးကွက်၌ လျှော့ဈေးဖြင့် အစွံထုတ်နေသည်ဟုဆိုကာ ဒေါ်လာတစ်ဘီလျံနီးပါး တန်ဖိုးရှိ တရုတ် အလူမီနီယမ်ပြားများအား သွင်းကုန်ခွန်များ ပြဋ္ဌာန်းကြောင်း အမေရိကန်က ဇွန် ၁၉ ရက်တွင် ထုတ်ပြန်ခဲ့သည်။

အမေရိကန်သို့ တရုတ်သွင်းကုန်အားလုံးနီးပါးကို သွင်းကုန်ခွန်များ စည်းကြပ်သွားမည်ဖြစ်ကြောင်း အမေရိကန်သမ္မတ ဒေါ်နယ်ထရန့်က ဇွန် ၁၉ ရက်နှောင်းပိုင်းတွင် ခြိမ်းခြောက်ခဲ့ပြီး ကမ္ဘာ့စီးပွားရေးအင်အား အကြီးဆုံးနှစ်နိုင်ငံအကြား ကုန်သွယ်မှုဆိုင်ရာ ဆက်ဆံရေးသည် ဇွန် ၂၀ ရက်တွင် ကျယ်ပြန့်သော ပဋိပက္ခချောက်ကမ်းပါးသို့ ရောက်ရှိနေခဲ့သည်။

ပြည်တွင်းဈေးကွက်၌ လျှော့ဈေးဖြင့် လာရောက်အစွံထုတ်မှုများအား တန်ပြန်ရန် အမေရိကန် ကုန်ထုတ်လုပ်သူများ၏ မေတ္တာရပ်ခံမှုကြောင့် မဟုတ်ဘဲ သွင်းကုန်ခွန် ပြဋ္ဌာန်းမှုအား အမေရိကန် ကုန်သွယ်ရေးဌာနက ၃၃ နှစ်အတွင်း ပထမဆုံးအကြိမ် ဆောင်ရွက်ခဲ့ခြင်းဖြစ်သည်။

အစိုးရ၏ ထောက်ပံ့မှုရရှိထားသော သို့မဟုတ် ပြည်တွင်းဈေးကွက်၌ ရောင်းမထွက်၍ လျှော့ဈေးဖြင့် လာရောက် အစွံထုတ်သည့်ကုန်ပစ္စည်းများ အမေရိကန် ဈေးကွက်များသို့ ၀င်ရောက်မှုကို တားဆီးရန်အတွက် အမေရိကန် ကုန်သွယ်ရေးဌာနသည် အစွမ်းကုန် လုပ်ဆောင်သွားမည်ဖြစ်ကြောင်း အမေရိကန် ကုန်သွယ်ရေးဝန်ကြီး ၀ီလ်ဘာရော့စ်က ကြေညာချက် ထုတ်ပြန်ခဲ့သည်။

တရုတ်ပို့ကုန်လုပ်ငန်းရှင်များသည် အလူမီနီယမ်ပြားများကို အမေရိကန်ဈေးကွက်၌ သင့်တော်သောဈေးနှုန်းထက် ၁၆၇ ဒသမ ၂ ရာခိုင်နှုန်းလျှော့၍ ရောင်းချနေခဲ့ကြောင်း အကြိုကောက်ချက် ချခဲ့သည်ဟု အမေရိကန် ကုန်သွယ်ရေးဌာနက ဇွန် ၂၀ ရက်တွင် ထုတ်ပြန်ခဲ့သည်။
ယင်းအတွက်ကြောင့် လျှော့ဈေးဖြင့် အစွံထုတ်သည်ဟု ယူဆရသည့်ဈေးနှုန်းများဖြင့် ရောင်းချသည့် သွင်းကုန်လုပ်ငန်းရှင်များထံမှ စရန်ငွေများကို စတင်သိမ်းယူနေကြောင်း အမေရိကန်အကောက်ခွန်နှင့် နယ်စပ်ကာကွယ်ရေးအဖွဲ့က ထုတ်ပြန်ခဲ့သည်။

ကုန်သွယ်ရေးဌာနက ပြီးခဲ့သော ဖေဖော်ဝါရီတွင် ပြုလုပ်ခဲ့သည့် အလားတူ လုပ်ငန်းစဉ်၌ ခွင့်မပြုသော တရုတ်အစိုးရ အထောက်အပံ့ယူ စာရင်းဝင်သွင်းကုန်များကို တွေ့ရှိခဲ့ကြောင်း သိရသည်။

တရုတ်လုပ်ပုံမှန် အလူမီနီယမ်ပြားများကို အမေရိကန်သို့ တင်သွင်းမှုသည် ၂၀၁၇ ခုနှစ်တွင် ဒေါ်လာသန်း ၉၀၀ အထိရှိခဲ့ပြီး ၂၀၁၆ ခုနှစ်ကထက် ရာခိုင်နှုန်း ၅၀ ခန့် မြင့်တက်ခဲ့ကြောင်း ကုန်သွယ်ရေးဌာနက ထုတ်ပြန်ခဲ့သည်။ ၂၀၁၈ ခုနှစ်ကုန်တွင် ချမှတ်မည့် နောက်ဆုံး ဆုံးဖြတ်ချက်သည် လျှော့ဈေးဖြင့် အစွံထုတ်မှုအား ထရန့်အစိုးရ၏ ဆန့်ကျင်မှုဆိုင်ရာ မူဝါဒအများအပြားနှင့် သဘောထား ကွဲလွဲခဲ့သည့် အမှီအခိုကင်းသော အမေရိကန် အပြည်ပြည်ဆိုင်ရာ ကုန်သွယ်ရေးကော်မရှင်က ပိတ်ဆို့နိုင်သည်။ တရုတ်ကလည်း အမေရိကန် သွင်းကုန် အလူမီနီယမ်များအား စည်းကြပ်ခွန်များ ပြဋ္ဌာန်းကြောင်း ပြီးခဲ့သောမတ်တွင် ကြေညာခဲ့သည်။ သို့သော် တရုတ်သို့ အမေရိကန်၏ အလူမီနီယမ်တင်သွင်းမှုသည် တရုတ်က အမေရိကန်သို့ နှစ်စဉ်တင်ပို့မှုနှင့် နှိုင်းယှဉ်ပါက အလွန်အမင်း နည်းပါးသည်။

Ref: AFP

တရုတ်က ကမ္ဘောဒီးယားသို့ စစ်ရေးအကူအညီ ဒေါ်လာသန်း ၁၀၀ ခန့် ပေးမည်ဟု ကတိပြု

ဇွန် ၁၉ ရက်က ဖနွမ်းပင်တွင် စစ်ဘက်ပြပွဲ၌ တရုတ်ကာကွယ်ရေးဝန်ကြီး (၀ဲ-ဒုတိယမြောက်) အား ကမ္ဘောဒီးယားကာကွယ်ရေးဝန်ကြီး (၀ဲ) က စကားပြောနေစဉ် (Photo: AFP)

ကမ္ဘောဒီးယားစစ်တပ်အား ခေတ်မီစေရေးအတွက် ဒေါ်လာသန်း ၁၀၀ ၀န်းကျင် ကူညီမည်ဟု တရုတ်က ကတိပြုခဲ့ကြောင်း ကမ္ဘောဒီးယားအစိုးရက ဇွန် ၁၉ ရက်၌ ထုတ်ပြန်ခဲ့သည်။ ယင်းသည် အထွေထွေ ရွေးကောက်ပွဲမတိုင်မီ အတိုက်အခံများ ဖြိုခွင်းခံနေရသည့် ကမ္ဘောဒီးယားနိုင်ငံကို တရုတ်၏ အလုံးအရင်းနှင့် ကူညီမှုများအနက် နောက်ဆုံးတစ်ခု ဖြစ်လာခဲ့သည်။

တရုတ်ကာကွယ်ရေးဝန်ကြီး ဝေဖုန့်ဟေသည် ကမ္ဘောဒီးယားကာကွယ်ရေးဝန်ကြီး၊ ၀န်ကြီးချုပ် ဟွန်ဆန်တို့နှင့် တွေ့ဆုံဆွေးနွေးမှုများ ပြုလုပ်ရန်အတွက် ဇွန် ၁၆ ရက်က ကမ္ဘောဒီးယားသို့ ရောက်လာစဉ် ယခုကဲ့သို့ အကူအညီပေးမည်ဟု ကတိထွက်ပေါ်လာခြင်းဖြစ်သည်ဟု ကာကွယ်ရေးဝန်ကြီးဌာနမှ ပြောခွင့်ရပုဂ္ဂိုလ်ဗိုလ်ချုပ်ကြီး ချူဟမ်ဆိုချက်က ဆိုသည်။

“ကျွန်တော်တို့ စစ်တပ်ကို တခြားသူတွေလို ခေတ်မီစေဖို့အတွက် ထောက်ပံ့၊ လေ့ကျင့်၊ ကူညီပေးမယ်လို့ ဝေက ကတိပြုခဲ့ပါတယ်” ဟု ဆိုချက်က ပြောကြားခဲ့သည်။ ထို့ပြင် တရုတ်နှင့် ကမ္ဘောဒီးယားတို့သည် လာမည့်နှစ်တွင် Golden Dragon ဟု အမည်ပေးထားသော ၎င်းတို့နှစ်နိုင်ငံ၏ တတိယအကြိမ်မြောက် ပူးတွဲစစ်ရေးလေ့ကျင့်မှုကို ပြုလုပ်မည်ဟုလည်း သိရသည်။

အမေရိကန်နှင့် ကမ္ဘောဒီးယားနှစ်နိုင်ငံကြား၌ ဆက်ဆံရေး တဖြည်းဖြည်း ဆိုးရွားလာစဉ် တရုတ်၏ အကူအညီပေးမှုများ ၀င်လာခြင်းဖြစ်သည်။ ကမ္ဘောဒီးယားသည် ယမန်နှစ်ကပင် အမေရိကန်နှင့် ပူးတွဲစစ်ရေး လေ့ကျင့်မှုကို ဖျက်သိမ်းလိုက်သည်။

ထို့ပြင် ကမ္ဘောဒီးယားဝန်ကြီးချုပ် ဟွန်ဆန်ကလည်း အမေရိကန်သည် ၎င်းတို့အစိုးရကို ဖြုတ်ချရန် အတိုက်အခံတို့၏ ကြံစည်မှုတစ်ခုကို ကူညီပေးခဲ့သည်ဟုလည်း စွပ်စွဲထားသေးသည်။

ဟွန်ဆန်သည် ရှေ့လတွင် ကျင်းပမည့် ရွေးကောက်ပွဲ၌ ၎င်း၏ ၃၃ နှစ်ကြာ အာဏာချုပ်ကိုင်မှုကို ထပ်မံတိုးမြှင့်ရန် ရည်ရွယ်လျက်ရှိသည်။ ကမ္ဘောဒီးယားအစိုးရသည် ပြီးခဲ့သည့်နှစ်ကပင် အဓိကအတိုက်အခံပါတီကို ဖျက်သိမ်းကာ ပါတီခေါင်းဆောင်တစ်ဦးကို ဖမ်းဆီးခဲ့သည်။
တရုတ်ထံမှ ချေးငွေများ၊ ရင်းနှီးမြှုပ်နှံမှုများ အစရှိသည့် အကူအညီများကို အခိုင်အမာ ရရှိခြင်းကြောင့် ဟွန်ဆန်သည် နောက်ဆက်တွဲရလဒ်များကို စိတ်ပူစရာ မလိုဘဲ ၎င်း၏အစိုးရအပေါ် ခြိမ်းခြောက်မှုများကို ပြင်းပြင်းထန်ထန် ချေမှုန်းရန် ခွင့်ပြုချက်ရသကဲ့သို့ ဖြစ်နေသည်ဟု လေ့လာသူများက ပြောခဲ့ကြသည်။

တစ်ဖက်တွင်မူ အမေရိကန်သည် ကမ္ဘောဒီးယား ရွေးကောက်ပွဲများအတွက် ဘဏ္ဍာရေးထောက်ပံ့မှုကို ရုပ်သိမ်းလိုက်ပြီး ဟွန်ဆန်၏ သက်တော်စောင့်တပ်ဖွဲ့ခေါင်းဆောင်ကိုလည်း လူ့အခွင့်အရေး ချိုးဖောက်မှုများကြောင့် ယခုလအတွင်းကပင် ပိတ်ဆို့အရေးယူမှုများ ချမှတ်ခဲ့သည်။

နောက်ထပ်ဖြစ်စဉ်တစ်ခုမှာ ဇွန် ၁၉ ရက်က ဖနွမ်းပင်ရှိ အမေရိကန်သံရုံးမှ ကမ္ဘောဒီးယားဝန်ထမ်းဟောင်း ဒါဇင်ပေါင်းများစွာသည် သံရုံးအပြင်ဘက်၌ ဆန္ဒပြမှုတစ်ခု ပြုလုပ်ခဲ့ကြသည်။ ထိုဝန်ထမ်းများသည် မတ်လက လိင်ပိုင်းဆိုင်ရာ အကြောင်းများ ဖော်ပြထားသည့်အရာများ၊ ကလေးသူငယ်တို့ပါသော အပြာရုပ်ရှင်နှင့် စာပေများ တွေ့ရှိခဲ့မှုဖြင့် ထုတ်ပယ်ခံခဲ့ရသည်။ သို့သော် ၀န်ထမ်းဟောင်းများကမူ ၎င်းတို့သည် မတရားခံရခြင်းဖြစ်ပြီး သံရုံးဘက်မှ သက်သေပြပြီး လျော်ကြေးများပေးရန် တောင်းဆိုခဲ့ကြခြင်း ဖြစ်သည်။

Ref: AFP

ပြင်သစ်က ဂျာမနီနှင့်ပူးတွဲ၍ တိုက်လေယာဉ်တည်ဆောက်မည့် စီမံကိန်းအား ဦးဆောင်မည်

၂၀၁၇ ခုနှစ် ဇန်န၀ါရီ ၆ ရက်က ပြင်သစ်အနောက်တောင်ပိုင်းရှိ လေတပ်စခန်းတစ်ခု၌ ပြင်သစ်ရာဖေးတိုက်လေယာဉ်နှစ်စင်းကို တွေ့ရစဉ် (Photo: AFP)

ဇွန် ၂၀ ရက်က ပြင်သစ်နှင့် ဂျာမနီအစိုးရတို့ကြား၌ ရရှိခဲ့သည့် သဘောတူညီမှုတစ်ခုအရ ဂျာမနီနှင့်အတူ ဂျက်တိုက်လေယာဉ် မျိုးဆက်သစ်တစ်ခုအား တည်ဆောက်ရေးတွင် ပြင်သစ်က ဦးဆောင်မည်ဟု ပြင်သစ်ကာကွယ်ရေးဝန်ကြီးဌာနက ထုတ်ပြန်ခဲ့သည်။

အဆိုပါ ဂျက်တိုက်လေယာဉ်သစ်သည် ၂၀၄၀ ပြည့်နှစ်၌ ပြင်သစ်၏ Dassault လေကြောင်းလုပ်ငန်းမှ ရာဖေးလေယာဉ်များ၊ ဂျာမနီ၏ယူရိုဖိုက်တာများ (ဥရောပအကျိုး တူလုပ်ငန်းတစ်ခုက ထုတ်လုပ်) အား အစားထိုးရန်အတွက် ရည်ရွယ်ထားသည်။

ယခုဖရန်ကို-ဂျာမန် သဘောတူညီချက်အရ ယင်းတိုက်လေယာဉ်စီမံကိန်းကို လေ့လာရေးမှ အစပြုပြီး ယခုနှစ်ကုန်မတိုင်မီ အစပြုရန် တောင်းဆိုထားကြောင်း သိရသည်။

မျိုးဆက်သစ် အဆိုပါလေယာဉ်သည် ကိုယ်တိုင်လည်း စွမ်းဆောင်ရည်ရှိသည့်အပြင် ကျယ်ပြန့်လှသော လက်နက်စနစ်ကြီး တစ်ခု၏ ဗဟိုချက်သို့ ရောက်လာလိမ့်မည်ဟု ခန့်မှန်းရသည်။ ထို့ပြင် မောင်းသူမဲ့တပ်ရင်းတစ်ခုကို ထိန်းချုပ်နိုင်စွမ်းရှိလိမ့်မည် ဖြစ်သည်။

လေယာဉ်စီမံကိန်းသစ်အား အတူတကွ ပူးတွဲလုပ်ဆောင်ကြမည့် သဘောတူညီချက် တစ်ခုကို Dassault နှင့် ယူရိုဖိုက်တာအကျိုးတူအုပ်စုမှ အဖွဲ့ဝင်ဖြစ်သည့် Airbus တို့က ဧပြီလကတည်းက လက်မှတ်ရေးထိုးခဲ့ကြသည်။ သို့သော် မည်သူက ကြီးကြပ်မည်ဖြစ်ကြောင်းကို ထုတ်ဖော်ခဲ့ခြင်း မရှိပေ။ လက်ရှိတွင် ပြင်သစ်က ဦးဆောင်မည်ဟု သိရသဖြင့် စီမံကိန်းအားကြီးကြပ်ရန် Dassault တွင် တာဝန်ရှိသွားပြီဖြစ်သည်။ Airbus ၏ ကာကွယ်ရေးလှုပ်ရှားမှု အများစုမှာမူ ဂျာမနီတွင်ဖြစ်သည်။

“ပြင်သစ်နဲ့ ဂျာမနီအတွက် လုပ်ဆောင်နိုင်စွမ်းရည်များစွာပါတဲ့ တိုက်လေယာဉ်တစ်စင်း တည်ဆောက်ရေးဟာ ဥရောပ မဟာဗျူဟာလုပ်ပိုင်ခွင့်မှာ အဓိကဖြစ်လာမယ့် လက်နက်စနစ်တစ်ခုနဲ့ ပူးပေါင်းသွားမှာ ဖြစ်ပါတယ်” ဟု Dassault မှ အမှုဆောင် ဥက္ကဋ္ဌဖြစ်သူ အဲရစ်ထရစ်ပါက ပြောခဲ့သည်။

ယူရိုဖိုက်တာအကျိုးတူ ပူးပေါင်းရေးအဖွဲ့ထဲမှ အခြားအဖွဲ့ဝင်များမှာ ဗြိတိန်မှကာကွယ်ရေးအုပ်စု BAE Systems နှင့် အီတလီမှ Leonardo တို့ ဖြစ်ကြသည်။

၂၀၁၇ ခုနှစ် မေလက ပြင်သစ်သမ္မတအဖြစ် ရွေးကောက်ခံရကာစ အီမန်နျူရယ် မက်ခရွန်နှင့် ဂျာမနီဝန်ကြီးချုပ်အင်ဂျလာ မာကယ်တို့သည် လေယာဉ်သစ် ပူးတွဲတည်ဆောက်ရေးအတွက် ပထမဆုံးအကြိမ် သဘောတူခဲ့ကြသည်။ ထိုနှစ်နိုင်ငံသည် ပိုမိုနီးကပ်သော ကာကွယ်ရေး သဘောတူညီချက်ရရှိရေးအတွက် ယခင်က ယှဉ်ပြိုင်ဘက်များဖြစ်ခဲ့ခြင်းကို မေ့ပစ်ခဲ့ကြသည်။

တိုက်ခိုက်ရေးတင့်ကားတစ်စီးတည် ဆောက်ရေးစီမံကိန်းတစ်ခုအတွက်လည်း ဇွန် ၁၉ ရက်က ပြင်သစ်နှင့် ဂျာမနီတို့ကြားတွင် သဘောတူညီချက် ရရှိခဲ့သည်။ ၂၀၁၉ ခုနှစ်နှစ်လယ်တွင် စတင်ပြီး ၂၀၃၅ ခုနှစ်တွင် စတင်အသုံးပြုနိုင်ရန် ရည်ရွယ်ထားသည့် တင့်ကားစီမံကိန်းကိုမူ ဂျာမနီက ဦးဆောင်မည်ဖြစ်သည်။ ထို့ပြင် ပူးတွဲအမြောက်စနစ်နှင့် ဖရန်ကို-ဂျာမန်စစ်ရေးဂြိုဟ်တုလွှတ်တင်ရေး အစီအစဉ်များအတွက်လည်း ထိုနှစ်နိုင်ငံသည် သဘောတူ လက်မှတ်ရေးထိုးခဲ့ကြသည်။

Ref:Reuters

ယီမင်အစိုးရထောက်ခံသည့်တပ်များက ဟိုဒေးဒါလေဆိပ်ကို သူပုန်များထံမှ သိမ်းပိုက်

ဇွန် ၁၉ ရက်က ဟိုဒေးဒါလေဆိပ်တစ်ဝိုက်တွင် ယီမင်အစိုးရဘက်တော်သား တိုက်ခိုက်ရေးသမားများအား တွေ့ရစဉ် (Photo: AFP)

အဓိကပင်လယ်နီဆိပ်ကမ်းမြို့ကို ပြန်လည်သိမ်းပိုက်ရေးအတွက် ကြီးမားသော ခြေလှမ်းတစ်ခုအဖြစ် ယူအေအီးကျောထောက်နောက်ခံပြု ယီမင်အစိုးရတပ်များသည် ဟိုဒေးဒါလေဆိပ်ကို ဇွန် ၂၀ ရက်တွင် ဟူသီသူပုန်များထံမှ သိမ်းပိုက်ခဲ့သည်ဟု ညွန့်ပေါင်းအဖွဲ့က ထုတ်ပြန်ခဲ့သည်။

“လေဆိပ်ကို လုံးဝ ရှင်းပြီးပြီ။ အခုထိန်းချုပ်မှုအောက်ရောက်နေပြီ” ဟု ယူအေအီး အစိုးရပိုင်သတင်းအေဂျင်စီ (WAM) က ထုတ်ပြန်သည့် ဗီဒီယိုဖိုင်တွင် ပင်လယ်နီကမ်းခြေဆိုင်ရာ ညွန့်ပေါင်းအဖွဲ့တပ်မှူး Abdul Salaam al-Shehi က ပြောကြားခဲ့သည်။

အစိုးရတပ်ဖွဲ့ဝင်များသည် ဇွန် ၁၉ ရက်တွင် လေဆိပ်အနီးတစ်လျှောက် အကာအရံမှတစ်ဆင့် ထိုးဖောက်ဝင်ရောက်ခဲ့ပြီး သဲကြီးမဲကြီးတိုက်ခိုက်ခဲ့ရာ သူပုန် ၃၃ ဦးနှင့် စစ်သား ၁၉ ဦးထက်မနည်း သေဆုံးခဲ့သည်။

ထိုလေဆိပ်ကို အသုံးမပြုဘဲ ပစ်ထားခဲ့သော်လည်း သူပုန်များက အဓိကအခြေစိုက် စခန်းတစ်ခုအဖြစ် အသုံးပြုခဲ့သည်။ လေဆိပ်သည် မြို့၏ ဆိပ်ကမ်းမှ ရှစ်ကီလိုမီတာ (ငါးမိုင်) အကွာတွင် ရှိသည်။ ဟိုဒေးဒါဆိပ်ကမ်းသည် ယီမင်၏ သွင်းကုန်လေးပုံသုံးပုံခန့် ၀င်ရောက်ပြီး အထောက်အပံ့ကို မှီခိုအားထားနေရသည့် လူဦးရေ ၂၂ သန်းအတွက် အသက်သွေးကြောတစ်ခုဖြစ်သည်။

ဟိုဒေးဒါမြိုတွင် ဆိုးရွားသည့် စစ်ပွဲတစ်ခုဖြစ်ပွားမှုကို ရှောင်လွှဲရန် ကြိုးပမ်းမှုတစ်ခုအဖြစ် သူပုန်ထိန်းချုပ်ထားသည့် မြို့တော် ဆာနာတွင် ကုလသမဂ္ဂသံအမတ်ကြီး Martin Griffiths က ဆွေးနွေးပွဲလေးရက်ကြာ ပြုလုပ်ခဲ့သော်လည်း တိုးတက်မှု အခြေအနေကို ထုတ်ပြန်ခြင်းမရှိဘဲ ဇွန် ၁၉ ရက်တွင် လေယာဉ်ဖြင့် ပြန်လည်ထွက်ခွာခဲ့သည်။

ဒေသတွင်း ပြိုင်ဘက်ဖြစ်သော အီရန်သည် သူပုန်များအတွက် လက်နက်မှောင်ခိုပို့ရန် ဟိုဒေးဒါဆိပ်ကမ်းကို ထွက်ပေါက်တစ်ခုအဖြစ် အသုံးပြုခဲ့သည်ဟု ယူအေးအီးနှင့် ဆော်ဒီဦးဆောင်သည့် ညွန့်ပေါင်းအဖွဲ့၏ အခြားအဖွဲ့ဝင်များက စွပ်စွဲခဲ့သည်။ တီဟီရန်က ယင်းစွပ်စွဲမှုကို ငြင်းဆိုခဲ့သည်။

ဟိုဒေးဒါဆိပ်ကမ်းကို တိုက်ခိုက်မှုကြောင့် အငတ်ဘေး ရင်ဆိုင်ကြုံတွေ့ရတော့မည့် ယီမင်နိုင်ငံသား ၈ ဒသမ ၄ သန်းအတွက် အလွန်အမင်း လိုအပ်နေသည့် ကူညီထောက်ပံ့ရေး ကုန်ပစ္စည်းများ ပို့ဆောင်မှုကို အကြီးအကျယ် ထိခိုက်ပျက်စီးစေနိုင်သည်ဟု ကုလသမဂ္ဂက သတိပေးခဲ့သည်။

ဟိုဒေးဒါလေဆိပ်ကို တိုက်ခိုက်မှုကြောင့် အရပ်သားများ ထိခိုက်သေဆုံးမှုကို ယခုအချိန်ထိ အတည်မပြုသေးသော်လည်း သီတင်းတစ်ပတ်ကြာပြီဖြစ်သည့် တိုက်ပွဲအတွင်း တိုက်ခိုက်ရေးသမား ၂၁၆ ဦးထက်မနည်း သေဆုံးခဲ့သည်။ အစိုးရထောက်ခံသည့် တပ်ဖွဲ့ဝင်များ ပင်လယ်နီကမ်းရိုးတန်းကို ချီတက်လာချိန်တွင် မိသားစု ၅,၂၀၀ သည် ၎င်းတို့၏ နေအိမ်များမှ ထွက်ပြေးခဲ့သည်ဟု ကုလသမဂ္ဂ ထုတ်ပြန်ချက်အရ သိရသည်။

Operation Golden Victory ဟု အမည်ပေးထားသည် ယင်းထိုးစစ်သည် ပြင်းထန်သည့် ယီမင်စစ်ပွဲပဋိပက္ခတွင် အကြီးမားဆုံး စစ်မျက်နှာတစ်ခုဖြစ်သည်။

Ref: AFP

သူတော်ယောင်ဆောင်ပြီး ကိုယ်ကျိုးစီးပွားကိုသာကြည့်သော ကုလသမဂ္ဂလူ့ အခွင့်အရေးကောင်စီမှ နုတ်ထွက်ကြောင်း အမေရိကန်ထုတ်ပြန် ကြေညာ

အစ္စရေး အကျိုးစီးပွားပျက်စီးအောင် လုပ်ဆောင်သည်ဟုစွပ်စွဲလျက် အမေရိကန် ပြည်ထောင်စုသည် ဇွန် ၁၉ ရက်တွင် ကုလသမဂ္ဂ လူ့ အခွင့်အရေးကောင်စီမှ နုတ်ထွက်ကြောင်း ထုတ်ပြန်ကြေညာခဲ့သည်ဟု ကုလ တာဝန်ရှိသူများက ထုတ်ဖော်ပြောကြားခဲ့ကြသည်။

ကုသမဂ္ဂဆိုင်ရာ အမေရိကန်သံတမန် နစ်ကီဟာလေသည် နိုင်ငံခြားရေးဝန်ကြီး မိုက်ပွန်ပီယိုနှင့်အတူ ၀ါရှင်တန်တွင်ယင်းနေ့  ဒေသစံတော်ချိန် ၅ နာရီ ပြုလုပ်သော သတင်းစာရှင်းလင်းပွဲ၌ ထုတ်ပြန်ကြေညာခဲ့ခြင်းဖြစ်သည်။ ကမ္ဘာတစ်ဝန်း လူ့ အခွင့်အရေးများကို ကာကွယ် မြှင့်တန်ရန် ၂၀၀၆ခုနှစ်တွင်ထူထောင်ခဲ့သော ဂျနီဗာအခြေစိုက် ကုလသမဂ္ဂ လူ့ အခွင့်အရေးကောင်စီမှထွက်ရန် နစ်ကီဟာလေက အကြိမ်ကြိမ် ခြိမ်းခြောက် ပြောဆိုခဲ့သည်။

အမေရိကန်-မက္ကဆီကိုနယ်စပ်တွင်   ရွေ့ ပြောင်း အခြေချကလေးများကို ၄င်းတို့ ၏ မိသားစုများနှင့်ခွဲထုတ်သည့် ထရန့် ၏မူဝါဒကို ကုလသမဂ္ဂကပြင်းပြင်းထန်ထန် ဝေဖန်ခဲ့ပြီးနောက် အမေရိကန်က ကုလလူ့ အခွင့် အရေးကောင်စီမှ ထွက်ခွာကြောင်း ထုတ်ပြန် ကြေညာ ခဲ့ခြင်းဖြစ်သည်။ကလေးများကို ယခုကဲ့သို့ ကို နှိပ်စက် အပြစ်ပေး ခြင်းဖြင့် မည်သည့်နိုင်ငံမဆို မိဘများကိုဟန့်တားလိမ့်ဆိုသော အတွေးအခေါ် မှာ ယုတ္တိမရှိ ကြောင်း  ဇွန် ၁၈ ရက်တွင် ကုလလူ့အခွင့်အျရး  ကောင်စီအကြီးအကဲ ဇာအစ်ရာ အက်အယ် ဟူစိန်က ထုတ်ဖော်ပြောကြားခဲ့သည်။

ကုလသမဂ္ဂ ထိပ်တန်းအဖွဲ့ အစည်းတစ်ခုမှ အမေရိကန်နုတ်ထွက်သွားခြင်းကို လူ့အခွင့်အရေးစောင့်ကြည့်မှုအဖွဲ့ က ဝေဖန်ခဲ့ပြီးကမ္ဘာ့အဆိုးရွားဆုံး လူ့ အခွင့်အရေးပြဿနာများကို ဖြေရှင်းရန် အခြားအစိုးရများကို ၀န်ထုပ်ဝန်ပိုး ဖြစ်စေကြောင်း သတိပေးခဲ့သည်။

အစ္စရေးကိုဆန့်ကျင်သည့် နာတာရှည် အစွဲရှိနေပြီး ပြုပြင်ပြောင်းလဲမှု မရှိခြင်းကြောင့် ကြောင်သူတော်ယောင်ဆောင်ပြီး ကိုယ်ကျိုးစီးပွားကိုသာ ကြည့်သော ကုလသမဂ္ဂလူ့ အခွင့်အရေးကောင်စီမှ အမေရိကန် နုတ်ထွက်ကြောင်း သတင်းစာရှင်းလင်းပွဲတွင် နစ်ကီဟာလေကပြောကြားခဲ့ပြီး၊ အမေရိကန်၏ယခုလုပ်ရန်သည် ကမ္ဘာနှင့်အ၀န်း လူ့  အခွင့်အရေး မြှင့်တင်မှုများအတွက် ပိုမို ခက်ခဲ့သွားစေလိမ့်မည်ဟု လူ့ အခွင့်အရေး   တက်ကြွလှုပ်ရှားသူများက သတိပေးခဲ့သည်။

ကုလသမဂ္ဂလူ့ အခွင့်အရေးကောင်စီကို ပြုပြင်ပြောင်းလဲရန်အမေရိကန်၏ ကြိုးပမ်းမှုများကို ကဖျက်ယဖျက် လုပ်သည့်အတွက် ရုရှား၊ တရုတ်၊ ကျူးဘားနှင့် အီဂျစ်တို့ ကို နစ်ကီဟာလေက ဝေဖန်ခဲ့သည်။ အမေရိကန် တန်ဖိုးများကိုမျှဝေ၍ အမေရိကန်ကိုလူ့ အခွင့်အရေးကောင်စီတွင် ဆက်လက်ရှိနေစေရန် အားပေးတိုက်တွန်းသောနိုင်ငံများကို သူမက ဝေဖန်ခဲ့သော်လည်း ပိုနေမြဲကျားနေမြဲ အခြေအနေကို အပြင်းအထန်စိန်ခေါ်ရန် ဆန္ဒမရှိကြောင်းပြောကြားခဲ့သည်။

မိုဘိုင်းဖုန်း တိုးပွားမှု ထိပ်ဆုံးငါးနိုင်ငံတွင် မြန်မာပါဝင်ခြင်း မရှိတော့သော်လည်း အာရှပစိဖိတ် ဒေသတွင် ဦးဆောင်နေကြောင်း Ericsson အစီရင်ခံစာမှ သိရ

ပြည်တွင်း မိုဘိုင်းဖုန်း သုံးစွဲနေသူ အချို့အား တွေ့ရစဉ် (ဓာတ်ပုံ- နေမျိုးထွန်း)

မိုဘိုင်းဖုန်းတိုးပွားမှု ထိပ်ဆုံးငါးနိုင်ငံ စာရင်းတွင် မြန်မာနိုင်ငံ ပါဝင်ခြင်း မရှိတော့သော်လည်း အာရှပစိဖိတ်ဒေသမှာ ဦးဆောင်နေကြောင်း ၂၀၁၈ ခုနှစ် ဇွန်လတွင် ထွက်ရှိလာသော Ericsson Mobility Report အစီရင်ခံစာအရ သိရသည်။

၂၀၁၈ ပထမသုံးလအတွင်း ကမ္ဘာတစ်ဝန်းတွင် မိုဘိုင်းဖုန်းသုံးစွဲမှုအသစ် တိုးပွားမှု မှာ ၉၈ သန်းရှိခဲ့ပြီး အာရှပစိဖိတ်ဒေသမှာ ၈၃ သန်းအထိ တိုးပွားခဲ့ကြောင်း သိရသည်။ လက်တင်အမေရိကနှင့် အနောက်ဥရောပတို့မှာ တစ်သန်းစီပင် ပြန်လည်လျော့ကျခဲ့သည်။

၂၀၁၈ နှစ်ဆန်းပိုင်းတွင် မိုဘိုင်းဖုန်းသုံးစွဲသူ အသစ်တိုးပွားမှု ထိပ်ဆုံးငါးနိုင်ငံမှာ တရုတ်နိုင်ငံက ၅၃ သန်းဖြင့် ထိပ်ဆုံးမှ ဦးဆောင်နေပြီး အိန္ဒိယနိုင်ငံက ၁၆ သန်း၊ အင်ဒိုနီးရှားနိုင်ငံက ခြောက်သန်း၊ နိုင်ဂျီးရီးယားနိုင်ငံက သုံးသန်း၊ ဘင်္ဂလားဒေ့ရ်ှနိုင်ငံက နှစ်သန်းဖြင့် ထပ်မံတိုးပွားလာခဲ့ခြင်း ဖြစ်ကြောင်း သိရသည်။

ဒေသတစ်ခုလုံး အနေဖြင့်မူ မြောက်အမေရိကတိုက်မှာ နှစ်သန်းခန့်သာ ထပ်မံတိုးပွားမှုရှိပြီး အလယ်နှင့် အရှေ့ဥရောပမှာ တစ်သန်း၊ အရှေ့အလယ်ပိုင်း ဒေသမှာ သုံးသန်း၊ အာဖရိကဒေသမှာ ၁၁ သန်း ဖြစ်ကြောင်း သိရသည်။

စုစုပေါင်း မိုဘိုင်းဖုန်း သုံးစွဲမှုတွင်မူ မြောက်အမေရိကမှာ သန်း ၃၉၀၊ လက်တင်အမေရိကမှာ သန်း ၆၉၀၊ အနောက်ဥရောပမှာ ၅၂၅ သန်း၊ အလယ်ပိုင်းနှင့် အရှေ့ဥရောပမှာ သန်း ၅၈၀၊ အရှေ့အလယ်ပိုင်းဒေသမှာ ၄၁၅ သန်း၊ အာဖရိကဒေသမှာ သန်း ၁,၀၄၀ နှင့် အာရှ ပစိဖိတ်ဒေသမှာ သန်း ၄,၂၃၀ ရှိလာကြောင်း သိရသည်။ အာရှပစိဖိတ်ဒေသတွင် တရုတ်မှာ သန်း ၁,၄၇၀ နှင့် အိန္ဒိယမှာ ၁,၁၈၅ သန်းရှိကြောင်း သိရသည်။ တစ်ကမ္ဘာလုံးတွင် မိုဘိုင်းသုံးစွဲမှု စုစုပေါင်းမှာ ၇ ဒသမ ၉ ဘီလျံအထိ ရောက်ရှိလာခြင်းဖြစ်သည်။

အူရီဒူးနှင့် တယ်လီနောတို့က ဆင်းမ်ကတ်များကို စတင်ရောင်းချပြီးနောက်ပိုင်း  မြန်မာနိုင်ငံမှာ မိုဘိုင်းဖုန်းသုံးစွဲမှု အတိုးပွားဆုံး ထိပ်ဆုံးငါးနိုင်ငံတွင် ပါဝင်ခဲ့ခြင်းဖြစ်ပြီး ကာလအပိုင်းအခြား တစ်ကြိမ်မက ဖော်ပြခံခဲ့ရခြင်း ဖြစ်သည်။

၂၀၂၃ ခုနှစ်သို့ အရောက်၌ မိုဘိုင်းဖုန်း သုံးစွဲမှုနှုန်းမှာ ၈ ဒသမ ၉ ဘီလျံအထိ ရောက်ရှိလာမည်ဟု ခန့်မှန်းထားပြီး အမှန်တကယ် သုံးစွဲသူ အရေအတွက်မှာ ၆ ဒသမ ၁ ဘီလျံရှိလာမည်ဟု ခန့်မှန်းထားကြသည်။

၂၀၁၃ မှ ၂၀၁၈ ခုနှစ်ကာလအတွင်း အသံဝန်ဆောင်မှု (ဖုန်းပြောဆိုခြင်း) သုံးစွဲခြင်းမှာ တစ်ပြေးညီဖြင့် အပြောင်းအလဲ အတက်အကျ မရှိခဲ့သော်လည်း ဒေတာသုံးစွဲမှု (တစ်နည်းအားဖြင့် အင်တာနက်သုံးစွဲမှု) မှာ လအလိုက်၊ နှစ်အလိုက် ဆက်တိုက် မြင့်တက်ခဲ့ကြောင်း သိရသည်။ မိုဘိုင်းဒေတာ သုံးစွဲမှုမှာ နှစ်စဉ် ၅၄ ရာခိုင်နှုန်းခန့် စီမြင့်တက်ခဲ့ခြင်းဖြစ်ပြီး သုံးလခြားတစ်ခါ မြင့်တက်မှုမှာ ၁၁ ရာခိုင်နှုန်းခန့် ဖြစ်ကြောင်း သိရသည်။