International

အလက်စကာအနီးတွင် ရုရှားဗုံးကြဲလေယာဉ်များ အကြိမ်ကြိမ် ပျံသန်းခဲ့ကြ

ပြီးခဲ့သည့် သီတင်းပတ်အတွင်းက ရုရှားစစ်လေယာဉ်များသည် အလက်စကာအနီးတွင် အကြိမ်ကြိမ် ပျံသန်းခဲ့ကြသဖြင့် မြောက်အမေရိက ကာကွယ်ရေးအေဂျင်စီသည် အမေရိကန်နှင့် ကနေဒါ ဂျက်လေယာဉ်များကို ကြားဖြတ်ရန်အတွက် အလျင်အမြန် ပျံတက်ကြရန် သတိပေးခဲ့ရသည်ဟု အစိုးရအရာရှိများက ဧပြီ ၂၄ ရက်တွင် ပြောကြားခဲ့သည်။

ရုရှား၏ Tu-95 Bear Bombers လေယာဉ်များကို နိုင်ငံတကာ ဝေဟင်ပိုင်နက်ထဲတွင် သုံးကြိမ်တိုင်တိုင် တွေ့ခဲ့ရကြောင်း၊ အလူရှန်ကျွန်းစုအနီးတွင် နှစ်ကြိမ်တွေ့ခဲ့ပြီး အလက်စကာနှင့် ကနေဒါအနီးတွင် တစ်ကြိမ်တွေ့ခဲ့ကြောင်း အမေရိကန်မြောက်ပိုင်း လေကြောင်းကာကွယ်ရေးဌာနချုပ် (NORAD) နှင့်ပင်တဂွန်တို့က ထုတ်ပြန်ခဲ့သည်။

အိုဘားမားက သမ္မတရာထူးမှ ထွက်ခွာအပြီး ပထမဆုံးမိန့်ခွန်းတွင် ခေါင်းဆောင်သစ်များအား လေ့ကျင့်ပေးရန် အသင့်ရှိဟု ပြောကြား

အမေရိကန် သမ္မတဟောင်း ဘာရက်အိုဘားမားသည် ဧပြီ ၂၄ ရက်တွင် လူမြင်ကွင်းသို့ ထွက်ပေါ်လာခဲ့ပြီး သူသည် သူ၏နောက်ထပ်ဘ၀ တစ်ဆစ်ချိုးအား မျိုးဆက်သစ် ခေါင်းဆောင်များအတွက် ကြိုတင်ပြင်ဆင်နိုင်ရန် ကူညီပေးနိုင်မည်ဟု မျှော်လင့်ကြောင်း ပြောကြားခဲ့သည်။ သမ္မတရာထူးမှ ထွက်ခွာအပြီး သုံးလခန့်အကြာတွင် အနားယူထားပုံရပြီး လည်စည်းမပါဘဲ ကုတ်အကျီဝတ်ထားသော အိုဘားမားက ၎င်း၏မွေးစားမြို့ ချီကာဂိုရှိ ချီကာဂိုတက္ကသိုလ်တွင် အထက်တန်းကျောင်းနှင့် ကောလိပ်ကျောင်းသား ၄၀၀ ကျော်အား မိန့်ခွန်းပြောကြားခဲ့ခြင်းဖြစ်သည်။

ပိတ်ဆို့မှုများနှင့် ရင်ဆိုင်နေရသော်လည်း ရုရှား၏ စစ်အသုံးစရိတ်များ မြင့်တက်လာ

ရေနံဈေးကျဆင်းမှု၊ စီးပွားရေးပိတ်ဆို့ မှုများနှင့် ရင်ဆိုင်နေရသော ရုရှားသည် ၂၀၁၆ ခုနှစ်က ကမ္ဘာပေါ်တွင် စစ်ရေးအသုံးစရိတ် တတိယအကြီးဆုံးနိုင်ငံ ဖြစ်ခဲ့သည်ဟု ဧပြီ ၂၄ ရက်တွင် ထွက်ပေါ်လာသော ထုတ်ပြန်ချက်ထဲတွင် ဖော်ပြခဲ့သည်။

ထရန့်နှင့် ဖုန်းပြောဆိုရာတွင် ရှီကျင်ပင်းက မြောက်ကိုရီးယားကိစ္စ၌ သည်းခံချုပ်တည်းရန် ပြောကြား

တရုတ်သမ္မတ ရှီကျင်ပင်းက အမေရိကန်လေယာဉ်တင်သင်္ဘောကြီး ကိုရီးယားကျွန်းဆွယ်သို့ ရောက်ရှိရန် ရည်မှန်းထားသည့်အချိန်မတိုင်မီ ရက်ပိုင်းအလို ဧပြီ ၂၄ ရက်တွင် အမေရိကန်သမ္မတ ဒေါ်နယ်ထရန့် နှင့် ဖုန်းပြောဆိုစဉ်အတွင်း မြောက်ကိုရီးယား ကိစ္စနှင့်ပတ်သက်၍ သည်းခံချုပ်တည်းရန် တောင်းဆိုလိုက်သည်။

ကိုရီးယားပြည်သူ့တပ်မတော်ကို ထူထောင်သည့် ၈၅ နှစ်မြောက် နှစ်ပတ်လည်နေ့ အထိမ်းအမှတ်အဖြစ် ဧပြီ ၂၅ ရက်၌ မြောက်ကိုရီးယားက နောက်ထပ်နျူကလီးယား သို့မဟုတ် ဒုံးကျည်စမ်းသပ်မှုပြုလုပ်မည်ကို စိုးရိမ်မှုများ မြင့်မားနေသည့်အကြား တရုတ်နှင့် အမေရိကန်သမ္မတတို့ ဖုန်းပြောဆိုခဲ့ကြခြင်းဖြစ်သည်။

အာဖရိကတွင် ပထမဆုံးအကြိမ် ငှက်ဖျားကာကွယ်ဆေး စမ်းသပ်မှုကြီးကို ကျယ်ကျယ်ပြန့်ပြန့် ပြုလုပ်မည်

ကင်ညာ၊ ဂါနာနှင့် မာလာဝီနိုင်ငံတို့တွင် ငှက်ဖျားရောဂါ ကာကွယ်ဆေးသစ် တစ်မျိုးကို ကျယ်ကျယ်ပြန့်ပြန့် စမ်းသပ်သွားမည်ဖြစ်ကြောင်း ကမ္ဘာ့ကျန်းမာရေးအဖွဲ့ (WHO) က ဧပြီ ၂၄ ရက်တွင် ထုတ်ပြန်ခဲ့သည်။ ၂၀၁၈ ခုနှစ်မှ ၂၀၂၀ ပြည့်နှစ်အထိ ကြာမြင့်မည့် ထိုစမ်းသပ်မှုကာလတွင် ကလေးပေါင်း ၃၆၀,၀၀၀ ပါဝင်လိမ့်မည်ဟု သိရသည်။

RTS,S ကာကွယ်ဆေးကို ထိုးခြင်းဖြင့် ၂၀၁၅ ခုနှစ်က လူပေါင်း ၄၂၉,၀၀၀ ကို သေစေခဲ့သော ငှက်ဖျားရောဂါ အန္တရာယ်မှ အတိုင်းအတာတစ်ခုအထိ အကာအကွယ် ရရှိမည်ဖြစ်သည်။ ထို ၄၂၉,၀၀၀ အနက် ၉၂ ရာခိုင်နှုန်းမှာ အာဖရိကမှဖြစ်ပြီး ယင်းတို့အနက် သုံးပုံနှစ်ပုံမှာ အသက်ငါးနှစ်အောက် ကလေးများဖြစ်ကြသည်။