International

ပါရီလေကြောင်းပြပွဲ၌ ဘိုးရင်းက နောက်ဆုံးပေါ် လေယာဉ်ကို ထုတ်ပြန်ကြေညာ

ဘိုးရင်းက ဈေးကွက်ထဲ၌ အကျိုးအများဆုံး ဖြစ်လာနိုင်သည်ဟုဆိုသော ၎င်း၏ နောက်ဆုံးထုတ် လေယာဉ်ကို ဇွန် ၁၉ ရက်က ထုတ်ပြန်ကြေညာခဲ့သည်။ အပြိုင်အဆိုင် အလွန်များသော အရပ်ဘက် လေကြောင်းဈေးကွက်ထဲတွင် ဘိုးရင်းသည် ပြိုင်ဘက် အဲဘတ်စ်၏ ဈေးကွက် ဝေစုများကို ဖယ်ရှားရန် ကြိုးပမ်းနေစဉ် ယခုကဲ့သို့ နောက်ဆုံးပေါ်လေယာဉ်ကို မိတ်ဆက်ခဲ့ခြင်းဖြစ်သည်။

“ကျွန်တော်တို့ရဲ့ 737 မိသားစုထဲက  နောက်ဆုံးမိသားစုဝင် 737 MAX 10 ကို တရားဝင်ကြေညာခွင့်ရတဲ့အတွက် ၀မ်းမြောက်မိပါတယ်” ဟု ဘိုးရင်းကုမ္ပဏီ၏ စီးပွားရေး လေကြောင်းဌာနမှ အကြီးအကဲဖြစ်သူ ကီဗင်မက်အဲလစ်စတာက ကျင်းပနေဆဲ ပါရီလေကြောင်းပြပွဲတွင် ပြောကြားခဲ့သည်။

မြောက်ကိုရီးယားမှ ပြန်လွတ်လာသော အမေရိကန်ကျောင်းသား ကွယ်လွန်

မြောက်ကိုရီးယားတွင် ၁၈ လကြာ ထောင်ကျ ခံခဲ့ရပြီးနောက် ပြီးခဲ့သည့် သီတင်းပတ်က ကိုမာဝင်နေသော အခြေအနေဖြင့် ပြန်လွတ်ကာ နေရပ်သို့ ရောက်လာသည့် အမေရိကန်ကျောင်းသား အော်တိုဝမ်းဘီယာသည် ဇွန် ၁၉ ရက်က ကွယ်လွန်သွားခဲ့ပြီ ဖြစ်သည်။ ၀မ်းဘီယာ ကွယ်လွန်မှုနှင့် ပတ်သက်၍ အမေရိကန်သမ္မတ ဒေါ်နယ်ထရန့် က မြောက်ကိုရီးယားကို ရက်စက်ကြမ်းကြုတ်သော အစိုးရဟု ဝေဖန်ရှုတ်ချခဲ့သည်။

သေဆုံးသူ ၆၂ ဦးအထိ မြင့်တက်လာပြီး ဖြစ်သော်လည်း ပေါ်တူဂီတွင် တောမီး ဆက်လက်လောင်ကျွမ်းနေဆဲ

ပေါ်တူဂီနိုင်ငံအလယ်ပိုင်းတွင် ဇွန် ၁၈ ရက်ကတည်းက စတင်လောင်ကျွမ်းနေခဲ့သည့် တောမီးကြီးကို ငြှိမ်းသတ်နိုင်ရန် မီးသတ်သမား ၁၀၀၀ ကျော်က ဇွန် ၁၉ ရက်၌ ဆက်လက်ကြိုးပမ်းနေကြရဆဲဖြစ်သည်။
    
လူပေါင်း ၆၂ ဦးထက်မနည်းကို သေစေခဲ့သော ထိုတောမီးသည် ပေါ်တူဂီ၏မကြာသေးမီ သမိုင်းကာလအတွင်း လူသေဆုံးမှုအများဆုံး တောမီးလောင်ကျွမ်းမှုကြီး ဖြစ်လာခဲ့သည်။ သေဆုံးဒဏ်ရာရသူ အများအပြားမှာ ၎င်းတို့၏ကားထဲ၌ ပိတ်မိနေစဉ် မီးလောင်ခံခဲ့ရခြင်းဖြစ်ကြောင်း သိရသည်။
    

ကမ္ဘာတစ်ဝန်း ၂၀၁၆ ခုနှစ်အကုန်တွင် အိုးအိမ်မဲ့ ၆၅ ဒသမ ၆ သန်းအထိ စံချိန်တင်မြင့်တက်ခဲ့

ဆီးရီးယားနှင့် တောင်ဆူဒန်တို့ကဲ့သို့သော နေရာများတွင် ဆိုးရွားလာသည့် ပဋိပက္ခများ၊ အင်အားသုံး အကြမ်းဖက်မှုများနှင့် နှိပ်ကွပ်မှုများကြောင့် နေအိမ်များမှ စွန့်ခွာထွက်ပြေးခဲ့ရသူ အရေအတွက်သည် ၂၀၁၆ ခုနှစ်မတိုင်မီ စံချိန်တင်အဖြစ် ၆၅ ဒသမ ၆ သန်းအထိ မြင့်တက်လာခဲ့သည်ဟု ကုလသမဂ္ဂက ဇွန် ၁၉ ရက်တွင် ထုတ်ပြန်ခဲ့သည်။ ယင်းပမာဏသည် ၂၀၁၅ ခုနှစ် နှစ်ကုန်ပိုင်းကထက် ၃၀၀,၀၀၀ ခန့်သာမြင့်တက်ခဲ့ခြင်း ဖြစ်သော်လည်း ၂၀၁၄ ခုနှစ် နှစ်ကုန်ပိုင်းနှင့် နှိုင်းယှဉ်ပါက ခြောက်သန်းကျော်အထိ မြင့်တက်ခဲ့ခြင်းဖြစ်ကြောင်း ကုလသမဂ္ဂ ဒုက္ခသည်များဆိုင်ရာအေဂျင်စီ (UNHCR) ၏ထုတ်ပြန်ချက်အရ သိရသည်။
    

တောင်ကိုရီးယားသမ္မတက နျူကလီးယားဓာတ်ပေါင်းဖို စီမံကိန်းအသစ်များအားလုံးကို ဖျက်သိမ်းမည်ဟု ကတိပြု

တောင်ကိုရီးယားသမ္မတသစ် မွန်းဂျေအင်းက နိုင်ငံထဲ၌ အသစ်ထပ်မံဆောက်လုပ်မည့်  နျူကလီးယားဓာတ်ပေါင်းဖို အစီအစဉ်များအားလုံးကို ဖျက်သိမ်းမည်ဟု ဇွန် ၁၉ ရက်က ကတိပြုပြောကြားခဲ့သည်။ မွန်းသည် အာရှ၏စတုတ္ထမြောက် စီးပွားရေးအင်အားအကြီးဆုံးနိုင်ငံကို အဏုမြူစွမ်းအင်မပါဘဲ ပဲ့ထိန်းရန် ကြိုးပမ်းနေစဉ် ယခုကဲ့သို့ပြောကြားခဲ့ခြင်းဖြစ်သည်။