စက်ဘီးမတော်တဆမှုတွင် ထိခိုက်ဒဏ်ရာ ရရှိခဲ့မှုကြောင့် အက်ဒ်ရှီးရန်က အာရှဖျော်ဖြေပွဲခရီးစဉ်ကို ဖျက်သိမ်း

ဗြိတိန်အဆိုတော်အက်ဒ်ရှီးရန်သည် စက်ဘီးမတော်တဆမှုဖြစ်ပြီး လက်ကျိုးခဲ့သောကြောင့် အာရှဖျော်ဖြေပွဲခရီးစဉ်ကို ဖျက်သိမ်းလိုက်ကြောင်း အောက်တိုဘာ ၁၈ ရက်က ထုတ်ပြန်ခဲ့သည်။

ရှီးရန်သည် တိုင်ပေ၊ အိုဆာကာ၊ ဆိုးလ်၊ တိုကျိုနှင့် ဟောင်ကောင်တွင် ပြုလုပ်မည့် ဖျော်ဖြေပွဲများကို ဖျက်သိမ်းကြောင်းကို follower ၁၇ ဒသမ ၅ သန်းရှိသည့် Instagram တွင် ကြေညာခဲ့သည်။

“ကျွန်တော့်ရဲ့ ညာဘက်လက်ကောက်ဝတ်နဲ့ ဘယ်ဘက်လက်တံတောင်ဆစ် ကျိုးသွားလို့ ဖျော်ဖြေပွဲတွေ မလုပ်နိုင်တော့ဘူး။ ကုသမှုတိုးတက်လာတာကို စောင့်ပြီးမှ ဖျော်ဖြေပွဲတွေ ဘယ်အချိန်ပြန်စမယ်ဆိုတာကို ဆုံးဖြတ်နိုင်မှာပါ” ဟု ၎င်းက ပြောကြားခဲ့သည်။

ရှီးရန်သည် စက်ဘီးမတော်တဆဖြစ်မှုကြောင့် ထိခိုက်ဒဏ်ရာများ ရရှိခဲ့ကြောင်းကို အောက်တိုဘာ ၁၆ ရက်တွင် Instagram ၌ ဖော်ပြခဲ့သည်။ ယင်းမတော်တဆမှုသည် အောက်တိုဘာ ၁၅ ရက်တွင် လန်ဒန်၌ ဖြစ်ပွားခဲ့ခြင်းဖြစ်သည်ဟု Daily Mail သတင်းစာက ဖော်ပြခဲ့သည်။

ရှီးရန်သည် အာရှဖျော်ဖြေပွဲခရီးစဉ်အဖြစ် ဂျပန်၊ တောင်ကိုရီးယား၊ ဟောင်ကောင်၊ ဖိလစ်ပိုင်၊ စင်ကာပူ၊ မလေးရှား၊ ထိုင်းနှင့် အိန္ဒိယတို့တွင် ဖျော်ဖြေရန် စီစဉ်ထားသည်။ ၎င်းသည် ယူအေအီးတွင်လည်း ဖျော်ဖြေရန် စီစဉ်ထားသည်ဟု သိရသည်။

အသက် ၂၆ နှစ်အရွယ်ရှိ ရှီးရန်သည် ရောင်းအားအကောင်းဆုံးစာရင်းဝင် အဆိုတော်တစ်ဦးဖြစ်သည်။ ၎င်း၏ နောက်ဆုံးထွက်ရှိခဲ့သည့် Divide အယ်လ်ဘမ်သည် Spotify ၀က်ဘ်ဆိုက်တွင် စံချိန်ချိုးဖျက်ခဲ့ပြီး ဖြန့်ချိပြီးတစ်ရက်အတွင်း အွန်လိုင်းမှ နားထောင်သူ ၅၇ သန်း ရှိခဲ့သည်။

ရှီးရန်သည် လမ်းမပေါ်နှင့် ဘားများတွင် နှစ်အတော်ကြာ ဖျော်ဖြေခဲ့ပြီးနောက် ၂၀၁၄ ခုနှစ်တွင် Thinking Out Loud သီချင်းဖြင့် နိုင်ငံတကာတွင် ထိုးဖောက် အောင်မြင်ခဲ့သည်။ ယင်းသီချင်းသည် Spotify တွင် နားထောင်မှုအကြိမ် ငါးသန်းကျော် ရှိခဲ့သည့် ပထမဆုံး သီချင်းလည်းဖြစ်သည်။ ရှီးရန်သည် ယင်းသီချင်းဖြင့် ၂၀၁၆ ခုနှစ် ဂရမ်မီဆုပေးပွဲတွင် တစ်နှစ်တာ အကောင်းဆုံးသီချင်းဆုနှင့် Best Pop Solo Performance ဆုကို ရရှိခဲ့သည်။

ဂျနီဖာလိုပက်ဇ်၊ အဲလက်ရိုဒရီဂွက်ဇ်နှင့် မက်အန်တိုနီတို့က ပွာတိုရီကိုကယ်ဆယ်ရေးအတွက် ရန်ပုံငွေ ဒေါ်လာ ၃၅ သန်း ရှာဖွေပေးခဲ့

ဂျနီဖာလိုပက်ဇ်၊ ၎င်း၏လက်ရှိချစ်သူ ဘေ့စ်ဘောကစားသမား အဲလက်ရိုဒရီဂွက်ဇ်နှင့် ၎င်း၏ခင်ပွန်းဟောင်း မက်အန်တိုနီတို့သည် ဟာရီကိန်း ဒဏ်ခံခဲ့ရသည့် ပွာတိုရီကိုအတွက် ရန်ပုံငွေ ဒေါ်လာ ၃၅ သန်း ရှာဖွေပေးခဲ့သည်ဟု ပြောခွင့်ရပုဂ္ဂိုလ် တစ်ဦးက အောက်တိုဘာ ၁၇ ရက်တွင် ထုတ်ပြန်ခဲ့သည်။

ဂျနီဖာလိုပက်ဇ်၊ ရိုဒရီဂွက်ဇ်နှင့် မက်အန်တိုနီတို့က ရန်ပုံငွေ ကောက်ခံပေးခဲ့သည့်အပြင် သီးသန့်စီလည်း လှူဒါန်းခဲ့သည်ဟု သိရသည်။ ၎င်းတို့သုံးဦးက အစီအစဉ် တင်ဆက်သူများအဖြစ် ဆောင်ရွက်ခဲ့သည့် One Voice: Somos Live! ရန်ပုံငွေဖျော်ဖြေပွဲမှ ဒေါ်လာ ကိုးသန်းရရှိခဲ့ပြီး ကျန်ရှိသည့်ငွေများကို အဖွဲ့အစည်း လှူဒါန်းမှုများမှ ရရှိခဲ့သည်ဟု သိရသည်။ အောက်တိုဘာ ၁၄ ရက်က ပြုလုပ်ခဲ့သည့် ယင်းဖျော်ဖြေပွဲတွင် ရစ်ကီမာတင်၊ ဒီမီလိုဗာတို၊ ဂွမ်စတက်ဖနီ၊ စတိဗ်ဝမ်ဒါ၊ ဂျင်မီဖောက်စ်၊ Coldplay အဖွဲ့ခေါင်းဆောင် ခရစ်မာတင်နှင့် Maroon 5 အဖွဲ့တို့ ပါဝင်ဖျော်ဖြေခဲ့သည်။

ဂျနီဖာလိုပက်ဇ်နှင့် အန်တိုနီတို့၏ မိဘများသည် ပွာတိုရီကိုမှ အမေရိကန်သို့ ပြောင်းရွှေ့အခြေချခဲ့ခြင်းဖြစ်သည်။ ရိုဒရီဂွက်ဇ်၏ မိဘများသည် ဒိုမီနီကန်မှဖြစ်သည်။ အသက် ၄၈ နှစ်အရွယ်ရှိ လိုပက်ဇ်သည် စက်တင်ဘာ နှောင်းပိုင်းတွင် လပ်စ်ဗီးဂတ်ဖျော်ဖြေပွဲမှ ရရှိသည့် ဒေါ်လာတစ်သန်းကို ဟာရီကိန်းဒဏ်ခံခဲ့ရသည့် ပွာတိုရီကိုနှင့် ကာရစ်ဘီယံတွင် ပြန်လည်ထူထောင်ရေးများအတွက် လှူဒါန်းခဲ့သည်။

“နယူးယောက်မှာ နေထိုင်တဲ့ ကျွန်မနဲ့ အဲလက်ရိုဒရီဂွက်ဇ်က ပွာတိုရီကိုနဲ့ ကာရစ်ဘီယံမှာ ကယ်ဆယ်ရေးနဲ့ ပြန်လည်ထူထောင်ရေးတွေ လုပ်ဆောင်ရာမှာ ကူညီဖို့ အနုပညာ၊ အားကစားနဲ့ စီးပွားရေးနယ်ပယ်က ကျွန်မတို့ရဲ့ရင်းမြစ်တွေနဲ့ မိတ်ဆွေတွေကို တိုက်တွန်းခဲ့တယ်” ဟု လိုပက်ဇ်က ပြောကြားခဲ့သည်။

၂၀၀၄ ခုနှစ်တွင် လက်ထပ်ခဲ့ပြီး ၂၀၁၄ ခုနှစ်၌ မက်အန်တိုနီနှင့် ကွာရှင်းခဲ့သည်။ လိုပက်ဇ်သည် ယခုနှစ်အစောပိုင်းတွင် ရိုဒရီဂွက်ဇ်နှင့် တွဲခဲ့သည်။

ဆောင်ဂျွန်ကီနှင့် ဆောင်းဟေကိုတို့၏ မင်္ဂလာပွဲဖိတ်စာ ထွက်ရှိ

မကြာမီလက်ထပ်တော့မည့် ဆောင်ဂျွန်ကီနှင့် ဆောင်းဟေကိုတို့က ၎င်းတို့၏ မင်္ဂလာပွဲအကြောင်းကို အသေးစိတ်မထုတ်ပြန်ခဲ့သော်လည်း မကြာသေးမီရက်ပိုင်းအတွင်း မင်္ဂလာပွဲဖိတ်စာပုံစံ ထွက်ရှိလာခဲ့သည်။ အဖြူရောင်ဖဲကြိုး၊ ပန်းခက်နှင့် အသည်းပုံနှစ်ခုတို့ဖြင့် ရိုးရိုးရှင်းရှင်း အလှဆင်ထားသည့် Song-Song စုံတွဲ၏ မင်္ဂလာပွဲဖိတ်စာကို တရုတ်မီဒီယာ Chongqing Times တွင် ထုတ်ဖော်ပြသခဲ့သည်။

Descendants of The Sun ဇာတ်လမ်းတွဲတွင် စစ်ဗိုလ်နှင့် ဆရာဝန်စုံတွဲအဖြစ် တွဲဖက်သရုပ်ဆောင်ခဲ့သည့် ဆောင်ဂျွန်ကီနှင့် ဆောင်းဟေကိုတို့က ၎င်းတို့တွဲနေသည်ဆိုသော သတင်းများကို အကြိမ်ကြိမ် ငြင်းဆိုခဲ့ပြီးမှ ၎င်းတို့လက်ထပ်တော့မည်ဟု ဇူလိုင် ၅ ရက်တွင် ထုတ်ပြန်ကြေညာခဲ့မှုကြောင့် ပရိသတ်များက အံ့အားသင့်ခဲ့ကြသည်။

၎င်းတို့၏မင်္ဂလာပွဲကို အောက်တိုဘာ ၃၁ ရက်တွင် ဆိုးလ်ရှိ ရှီလာဟိုတယ်တွင် ကျင်းပမည်ဖြစ်သည်။ အသက် ၃၂ နှစ်အရွယ်ရှိ ဆောင်ဂျွန်ကီနှင့် အသက် ၃၅ နှစ်အရွယ်ရှိ ဆောင်းဟေကိုသည် Itaewondong ရှိ နေအိမ်တွင် နေထိုင်မည်ဆိုသော သတင်းများလည်း ထွက်ရှိခဲ့သည်။ ဆောင်ဂျွန်ကီသည် မြေအောက်ခန်းပါဝင်သည့် နှစ်ထပ်အိမ်တစ်လုံးကို ဒေါ်လာ ၈ ဒသမ ၉ သန်းဖြင့် ဇန်န၀ါရီလက ၀ယ်ယူခဲ့သည်ဟု Korea Herald က ဖော်ပြခဲ့ဖူးသည်။

စားဖိုမှူးသင်တန်းတက်ရန် ရည်ရွယ်ရာမှသည် မော်ဒယ်လ် သရုပ်ဆောင်တစ်ဦးအဖြစ်သို့ ပြောင်းလဲရောက်ရှိလာခဲ့သူ ငြိမ်းသော်၏ ငယ်ဘ၀ဖြတ်သန်းရာ

လူငယ်တိုင်းရဲ့ပခုံးထက်ဆီမှာ မိမိတို့ စိတ်ကူးအိပ်မက်ကိုယ်စီကို ထမ်းပိုးထားတတ်ကြပါတယ်။ လူငယ်အချို့က သေချာခိုင်မာတဲ့ စိတ်ကူးအိပ်မက်တွေကို ပိုင်ဆိုင်ထားသလို တချို့သော လူငယ်တွေကတော့ လက်လှမ်းမီရာ အိပ်မက်တချို့ကိုသာ ဆုပ်ကိုင်ရင်း ချီတက်နေကြပြန်ပါတယ်။ ဒီလို ဆယ်ကျော်သက်လူငယ်ဘ၀မှာ စားဖိုမှူးတစ်ယောက်ဖြစ်လာဖို့ဆိုတဲ့ စိတ်ကူးရည်ရွယ်ချက် ရှိခဲ့ပေမဲ့ မျှော်လင့်မထားတဲ့ အချိုးအကွေ့တွေနဲ့ မော်ဒယ်လ်သရုပ်ဆောင် လမ်းကြောင်းပေါ်ကို ရောက်ရှိလာသူကတော့ သရုပ်ဆောင်မော်ဒယ်လ်ငြိမ်းသော်ပဲ ဖြစ်ပါတယ်။ လက်ရှိမှာတော့ ငြိမ်းသော်က ‘ည’ ဇာတ်ကားရဲ့ သရုပ်ဆောင်တစ်ဦးအဖြစ်အပြင် ကြော်ငြာနဲ့အလှဓာတ်ပုံများစွာက အပြုံးချိုချို မင်းသားချောတစ်ဦးအဖြစ် ပရိသတ်လက်ခံထားသူ တစ်ယောက်လည်း ဖြစ်ပါတယ်။ ဒီတစ်ပတ်မှာတော့ ငြိမ်းသော် ပြောပြခဲ့တဲ့ ငယ်စဉ်ဘ၀ရဲ့အမှတ်တရ ပုံရိပ်တချို့ကို တင်ဆက်ပေးချင်ပါတယ်။

သရုပ်ဆောင်မော်ဒယ်လ်ငြိမ်းသော်က ဧပြီ ၁၃ ရက်မှာ မုံရွာမြို့မှာမွေးဖွားခဲ့သူဖြစ်ပြီး အစ်ကိုနှစ်ယောက်နဲ့ ညီမနှစ်ယောက်ကြားက သားအလတ်တစ်ယောက်လည်း ဖြစ်ပါတယ်။ ငယ်စဉ်ကလေးဘ၀မှာတော့ ငြိမ်းသော်က အနေအေးတတ်သလို တစ်ယောက်တည်း ကစားတတ်တာများတယ်လို့ ဆိုပါတယ်။ ငြိမ်းသော်ကို ငယ်ရွယ်စဉ်မှာ မိဘများပြောပြကြတဲ့ အမှတ်တရကတော့ အသန့်အပြန့် အရမ်းကြိုက်လွန်းတာပါပဲ။ အသက်ငယ်သေးတဲ့ အချိန်မှာတောင် ဖိနပ်မစီးပေးရင် အော်ငိုတတ်တယ်လို့လည်း ရယ်မောရင်းဆိုပါတယ်။ ဓာတ်ပုံရိုက်တဲ့အခါတိုင်းမှာလည်း ငိုတတ်တာကြောင့် ငယ်စဉ်ဘ၀ရဲ့ ဓာတ်ပုံတိုင်းမှာ ငိုနေတဲ့ပုံတွေများတယ်လို့လည်း အမှတ်တရ ပြောပြခဲ့ပါတယ်။

ငြိမ်းသော်က ကျောင်းပညာရေးအနေနဲ့ အ.ထ.က(၁)မုံရွာမှာ သူငယ်တန်းကနေ တက္ကသိုလ်ဝင်တန်းအောင်မြင်ပြီးတဲ့အထိ တက်ရောက်ခဲ့ပါတယ်။ ကျောင်းပညာရေးမှာတော့ သာမန်အဆင့်လောက်ပဲရှိပြီး ထူးချွန်တဲ့အထဲမှာ မပါဝင်ဘူးလို့လည်း ဆိုပါတယ်။ ကျောင်းနေစဉ်မှာ အမှတ်တရအနေနဲ့ကတော့ အလှကြိုက်တတ်လာလို့လည်း ပြောပြခဲ့ပါတယ်။ ဒါ့အပြင် ကျောင်းမှာပဲများတယ်လို့လည်း ကိုယ့်ကိုယ်ကိုယ် မှတ်ချက်ပေးခဲ့ပါတယ်။ တက္ကသိုလ်ဝင်တန်း အောင်မြင်ပြီးချိန်မှာတော့ မိဘများရဲ့ စီးပွားရေးနဲ့လည်းနီးစပ်တဲ့ စားဖိုမှူးသင်တန်းတက်ရောက်ဖို့ ရန်ကုန်ကိုရောက်လာဖြစ်တယ်လို့လည်း ဆိုပါတယ်။

“ရှစ်တန်းကိုးတန်းမှာကတည်းကတော့ အဒေါ်တစ်ယောက်က မဂ္ဂဇင်းတွေ အရမ်းငှားဖတ်တော့ လိုက်ဖတ်ရင်းနဲ့ မော်ဒယ်လ်လုပ်ဖို့ စိတ်ဝင်စားတယ်။ ဒါပေမဲ့ ကျွန်တော်တို့က နယ်မှာနေတဲ့သူဖြစ်တော့ အလှမ်းဝေးတယ်လေ။ စိတ်ဝင်စားတယ်ဆိုရုံပဲ။ တကယ်တမ်းကျတော့ အိမ်ကလည်း ဆိုင်ဖွင့်ထားတယ်ဆိုတော့ စားဖိုမှူးသင်တန်းတက်ဖို့ပဲ စိတ်ကူးပြီး ရန်ကုန်ကိုလာဖြစ်သွားတာ။ ရန်ကုန်ကိုရောက်လာတဲ့အခါ မော်ဒယ်လ်သူငယ်ချင်းတွေ ခင်မင်ခွင့်ရပြီး သူတို့ကလည်း တိုက်တွန်းတာနဲ့ သင်တန်းတက်ဖြစ်ခဲ့တယ်။ အဲဒီကနေပဲ မျှော်လင့်မထားဘဲ အနုပညာလမ်းကြောင်းပေါ် ရောက်လာခဲ့တာပါ” လို့ ငြိမ်းသော်က ဆိုပါတယ်။

ငြိမ်းသော်က Stars Int’1 Models Agency မှာ သင်တန်းတက်ရောက်ခဲ့ပြီး အေဂျင်စီနဲ့လက်တွဲကာ အနုပညာအလုပ်တွေ တွဲဖက်လုပ်ကိုင်ခဲ့ပါတယ်။ ဒီနောက်မှာတော့ Mister ပြိုင်ပွဲတစ်ခုမှာ ဆုရခဲ့သလို ရှိုးပွဲများစွာမှာလည်း ပါဝင်လျှောက်လှမ်းဖြစ်ခဲ့ပါတယ်။ မော်ဒယ်လ်တစ်ယောက်အဖြစ် လှုပ်ရှားနေစဉ်မှာပဲ ဒါရိုက်တာထူးပိုင်ဇော်ဦးရဲ့ ‘ည’ ရုပ်ရှင်ဇာတ်ကားမှာ သရုပ်ဆောင်တစ်ဦးအနေနဲ့ ရွေးချယ်ပါဝင်ခွင့်ရခဲ့ပါတယ်။ ‘ည’ ဇာတ်ကားကို မကြာခင်ကရုံတင်ပြသခဲ့ရာမှာတော့ ငြိမ်းသော်ကို ချစ်ခင်အားပေးတဲ့ ပရိသတ်တွေ ပိုမိုများပြားလာသလို အနုပညာအလုပ်တွေလည်း ဆက်တိုက် လုပ်ကိုင်ခွင့် ရရှိလာတယ်လို့ ဆိုပါတယ်။

အနုပညာလောကမှာ ကြုံတွေ့ခဲ့ရတဲ့ အခက်အခဲတွေနဲ့ ပတ်သက်လို့ကတော့ “အခက်အခဲတွေတော့ အများကြီးပါပဲ။ တစ်ခါတလေဆိုရင် ဘာဆက်လုပ်ရမှန်းမသိလို့ နယ်ပြန်ရင် ကောင်းမလားဆိုတဲ့ စိတ်ကူးမျိုးလည်း ခဏခဏ ဖြစ်ဖူးတယ်။ ဒါပေမဲ့ မိဘတွေကလည်း အောင်မြင်စေချင်ကြတယ်။ ပရိသတ်အားပေးမှုတချို့လည်း ရှိနေတော့ ကိုယ်ရွေးချယ်ထားတဲ့ ခရီးလမ်းကို အောင်မြင်တဲ့အထိ ဆက်လျှောက်မယ်ဆိုပြီး အားတင်းခဲ့ရတာ။ အဲဒီလို ကိုယ့်ကိုယ်ကိုယ်အားပေးရင်းနဲ့ အခုလို ရပ်တည်နိုင်လာတာပါ” လို့ ငြိမ်းသော်က ပွင့်ပွင့်လင်းလင်း ဆိုပါတယ်။

လက်ရှိမှာ ကြော်ငြာအများအပြားမှာ ပါဝင်ခွင့်ရနေသလို အမ်တီဗွီတွေလည်း ပါဝင်ရိုက်ကူးခွင့်ရနေတဲ့ ငြိမ်းသော်က ပရိသတ်များနဲ့ အမြဲထိတွေ့နေသူတစ်ဦးလည်း ဖြစ်ပါတယ်။ အွန်လိုင်းကနေ ပရိသတ်များနဲ့ တိုက်ရိုက်ထိတွေ့မှုကို အရင်ကတော့ မလုပ်ဖြစ်ခဲ့ပေမယ့် အခုနောက်ပိုင်းမှာတော့ သေချာအချိန်ပေးပြီး လုပ်ဖြစ်တယ်လို့ ဆိုပါတယ်။ ချစ်ခင်အားပေးကြတဲ့ ပရိသတ်များနဲ့အတူ ပရဟိတလှူဒါန်းမှုတွေ လုပ်ဖြစ်သလို မကြာခင်မှာလည်း ပရိသတ်များနဲ့ စုပေါင်းဘုံကထိန်ခင်းဖို့ စီစဉ်နေတယ်လို့ ပြောပြခဲ့ပါတယ်။

အပြုံးချိုချိုကို ပိုင်ဆိုင်ထားပြီး ကိုရီးယားဟန်ပန်လို့ တင်စားခံရတဲ့ ငြိမ်းသော်က အနုပညာခရီးလမ်း ရည်ရွယ်ချက်ကိုတော့ “ကျွန်တော်ကအခုမှ ဒီလမ်းကြောင်းတစ်ခုအပေါ် သေချာလေး ခြေချခွင့်ရတယ်လို့ ပြောလို့ရပါတယ်။ ဒါကြောင့်အများကြီး ကြိုးစားရဦးမှာပါ။ ကျွန်တော့်အနေနဲ့ ဇာတ်ရုပ်တိုင်းကို ပီပြင်အောင် ပုံဖော်နိုင်တဲ့ သရုပ်ဆောင်ကောင်းတစ်ယောက်ဖြစ်ချင်တယ်။ ပရိသတ်ချစ်ခင်အားပေးတဲ့ သရုပ်ဆောင် တစ်ယောက်ဖြစ်ခွင့်ရချင်ပါတယ်။ အဲဒီအတွက်လည်း အစွမ်းကုန် ကြိုးစားသွားမှာပါ။ လောလောဆယ်တော့ သရုပ်ဆောင်ပိုင်းနဲ့ ပတ်သက်ရင်လည်း လေ့လာနေပါတယ်။ အခွင့်အရေးရခဲ့မယ်ဆိုရင်လည်း ဇာတ်ကားကောင်းတွေမှာ ကြိုးစားပါဝင်ချင်ပါတယ်” လို့ငြိမ်းသော်က ဆိုခဲ့ပါတယ်။

အားပေးချစ်ခင်ကြတဲ့ ပရိသတ်တွေကိုတော့ သရုပ်ဆောင်မော်ဒယ်လ်ငြိမ်းသော်က “အားပေးကြတဲ့ပရိသတ်တွေလည်း ကျွန်တော့်ရဲ့ ငယ်ဘ၀အမှတ်တရတွေကို ဖတ်ရှုရင်း အမှတ်တရဖြစ်မယ်လို့ ယုံကြည်ပါတယ်။ ပရိသတ်တွေရဲ့ ချစ်ခင်အားပေးမှုကြောင့် ကျွန်တော်အခုလို ရှိနေနိုင်တာပါ။ ဒါကြောင့် ပရိသတ်တွေ အနေနဲ့လည်း ဆက်လက်ချစ်ခင် အားပေးကြဖို့လည်း ပြောချင်ပါတယ်။ ပရိသတ်အားပေးမှုနဲ့ ထိုက်တန်တဲ့အနုပညာရှင်ကောင်းတစ်ယောက် ဖြစ်လာအောင်လည်း ဆက်ပြီးကြိုးစားသွားပါမယ်” လို့ ပြောပြခဲ့ပါတယ်။