ဘာသာစကားဆိုင်ရာ ပညာရေး

ဘာသာစကားဆိုင်ရာ ပညာရေးဟူသည် ဒုတိယမြောက် ဘာသာစကား သို့မဟုတ် နိုင်ငံခြားဘာသာစကားတစ်ရပ်ကို ရယူသည့် လုပ်ငန်းစဉ်နှင့် လေ့ကျင့်မှုဖြစ်သည်။ ယင်းကို အသုံးချဘာသာဗေဒ၏ ဘာသာခွဲအဖြစ် အခြေခံသဘောအရ သတ်မှတ်ထားသော်လည်း ဘာသာရပ်အမျိုးမျိုး ပါဝင်သော ပညာရပ်နယ်ပယ်တစ်ခု အဖြစ်လည်း စဉ်းစားနိုင်သည်။ ဘာသာစကားဆိုင်ရာ ပညာရေးတွင် သင်ယူရန် အဓိက အမျိုးအစား လေးရပ်ရှိသည်။ ယင်းတို့မှာ ဆက်သွယ်ရေးဆိုင်ရာ အရည်အသွေးများ၊ ကျွမ်းကျင်ပိုင်နိုင်မှု၊ ယဉ်ကျေးမှု ကူးသန်းရေး အတွေ့အကြုံနှင့် စာအမျိုးမျိုး တတ်မြောက်မှုတို့ ဖြစ်ကြသည်။

ဂလိုဘယ်လိုက်ဇေးရှင်း တိုး၍တိုး၍ ဖြစ်ထွန်းလာသည်နှင့်အညီ လုပ်သားအင်အားစု၌ ပါဝင်သူများ အနေဖြင့် ဘာသာစကား အမျိုးမျိုးနှင့် ဆက်သွယ်ပြောဆိုနိုင်ရန် အကြီးအကျယ် လိုအပ်လာသည်။ အသုံးများသော ဘာသာစကားများကို ကုန်သွယ်ရေး၊ ခရီးသွားလုပ်ငန်း၊ နိုင်ငံတကာဆက်ဆံရေး၊ နည်းပညာ၊ မီဒီယာနှင့် သိပ္ပံပညာတို့ကဲ့သို့သော နယ်ပယ်များ၌ အသုံးပြုကြသည်။ တောင်ကိုရီးယား၊ ဂျပန်နှင့် တရုတ်တို့ကဲ့သို့သော နိုင်ငံများတွင် မူလတန်းနှင့် အလယ်တန်းအဆင့်တို့၌ အနည်းဆုံး နိုင်ငံခြားဘာသာစကားတစ်ခု သင်ကြားပေးရန် ပညာရေးမူဝါဒ ချမှတ်ထားသည်။ အိန္ဒိယ၊ စင်ကာပူ၊ မလေးရှား၊ ပါကစ္စတန်နှင့် ဖိလစ်ပိုင်တို့ကဲ့သို့သော နိုင်ငံအချို့တွင်မူ ၎င်းတို့၏ အစိုးရအဖွဲ့များအတွင်း ဒုတိယမြောက် ရုံးသုံးဘာသာစကားတစ်ရပ် ပြဋ္ဌာန်းထားသည်။ ၂၀၁၀ ပြည့်နှစ်၌ တရုတ်နိုင်ငံသည် နိုင်ငံခြားဘာသာစကား (အထူးသဖြင့် အင်္ဂလိပ်စာ) သင်ကြားခြင်းနှင့် ပတ်သက်၍ အလွန်ကြီးမားပြီး အလွန်အရေးပါသည့် စီမံကိန်းတစ်ရပ်ကို ချမှတ်ခဲ့သည်။

အချိန်နှင့်အမျှ ဘာသာစကားဆိုင်ရာ ပညာရေးသည် ကျောင်းများတွင် ဖွံ့ဖြိုး၍လာခဲ့ပြီး ကမ္ဘာတစ်လွှား၌ ပညာရေးသင်ရိုး၏ တစ်စိတ်တစ်ဒေသ ဖြစ်လာခဲ့သည်။ အမေရိကန်ပြည်ထောင်စုကဲ့သို့သော နိုင်ငံအချို့တွင် ဘာသာစကားဆိုင်ရာ ပညာရေး (ကမ္ဘာ့ဘာသာစကားများဟုလည်းခေါ်) သည် အင်္ဂလိပ်စာ၊ သင်္ချာနှင့် သိပ္ပံကဲ့သို့သော အဓိကဘာသာရပ်များနှင့်အတူ ပင်မဘာသာရပ်တစ်ခု ဖြစ်လာခဲ့သည်။

သြစတြေးလျကဲ့သို့သော နိုင်ငံအချို့တွင် ယနေ့ခေတ်၌ ကျောင်းများတွင် နိုင်ငံခြား ဘာသာတစ်ရပ် သင်ကြားခြင်းသည် အလွန်ရေပန်းစားလာခဲ့သည်။ ဘာသာစကားဆိုင်ရာ ပညာရေးဘာသာရပ်ကို Language Other Than English (LOTE) ဟု ခေါ်ဆိုသည်။ အင်္ဂလိပ်စကားပြော ပညာရေးဌာန အများစုတွင် လေ့လာသင်ယူရန် ရေပန်းအစားဆုံး နိုင်ငံခြားဘာသာစကားများမှာ ပြင်သစ်၊ ဂျာမန်နှင့် စပိန်ဘာသာစကားများ ဖြစ်ကြသည်။ အင်္ဂလိပ်က ပထမဘာသာစကား မဟုတ်သောကြောင့် အင်္ဂလိပ်စကားကို ကောင်းမွန်စွာ ပြောဆိုနိုင်ခြင်းမရှိသော ကျောင်းသားများအတွက်မူ အင်္ဂလိပ်ဘာသာစကားကို ဒုတိယမြောက် ဘာသာစကားအဖြစ် သင်ယူနိုင်သည်။

မိမိတို့ မြန်မာနိုင်ငံအတွက် အဘက်ဘက်၌ ချွတ်ခြုံကျနေမှုများကို အလျင်အမြန် ဖွံ့ဖြိုးအောင် ကြိုးစားရုန်းကန်နေရချိန်၌ ကဏ္ဍအသီးသီး၌ နိုင်ငံခြားဘာသာစကား (အထူးသဖြင့် အင်္ဂလိပ်ဘာသာစကား) တတ်မြောက်မှုသည် အလွန်တရာ အရေးကြီး၍လာသည်။ ထို့ကြောင့် နိုင်ငံတော်အစိုးရ အနေဖြင့် ဘာသာစကားဆိုင်ရာ ပညာရေးအတွက် ခိုင်မာသော မူဝါဒများ ချမှတ်ကာ အထူးအစီအစဉ်များဖြင့် အလျင်အမြန် အကောင်အထည်ဖော်သွားရန် လိုအပ်သကဲ့သို့ ပြည်သူများအနေဖြင့်လည်း နိုင်ငံခြားဘာသာစကား တတ်မြောက်ရေးကို အထူးအလေးပေး လုပ်ဆောင်သွားကြရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာလ ၂၂ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

မြန်မာ့အချုပ်အခြာအာဏာကို လေးစားရန်လို

ရခိုင်ပြည်နယ်တွင် ပေါ်ပေါက်ခဲ့သော အကြမ်းဖက် ဖြစ်စဉ်များနှင့် ပတ်သက်၍ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က စက်တင်ဘာ ၁၉ ရက်က နိုင်ငံတော်အခြေပြ မိန့်ခွန်းတစ်ရပ်အား ပြောကြားခဲ့သည်။

မိနစ် ၃၀ ကြာခန့် ပြောကြားခဲ့သည့် အဆိုပါမိန့်ခွန်းတွင် ရခိုင်အရေးနှင့် ပတ်သက်၍ နိုင်ငံတကာ၏ စစ်ဆေးမှုကို ကြောက်ရွံ့နေမည် မဟုတ်ကြောင်းနှင့် ဘင်္ဂလားဒေ့ရ်ှနိုင်ငံသို့ ထွက်ပြေးသွားသူများအား ပြန်လည်လက်ခံရေး စိစစ်မှုလုပ်ငန်းစဉ်ကို စတင်နိုင်ရန် ပြင်ဆင်ထားကြောင်းတို့ကို ထည့်သွင်းပြောကြား ခဲ့ပြီးဖြစ်သည်။ ထို့ပြင် ဒေါ်အောင်ဆန်းစုကြည်က ရခိုင်ပြည်နယ်တွင် ဖြစ်ပွားခဲ့သည့် အကြမ်းဖက်တိုက်ခိုက်မှု ဖြစ်စဉ်ကြောင့် ထိခိုက်ခံစားရသူ အားလုံးအတွက်လည်း စိတ်မကောင်းဖြစ်ရကြောင်း၊ အိုးအိမ်များကို စွန့်ခွာပြီး ထွက်ပြေးရသူ အများအပြားရှိကြောင်း၊ ထိုသို့ထွက်ပြေးရသူများတွင် မွတ်စလင်သာမကဘဲ ရခိုင်နှင့် အခြားလူနည်းစုများ ဖြစ်ကြသည့် ကမန်၊ မြို၊ သက်၊ မရမာကြီး၊ ဟိန္ဒူများလည်း ပါဝင်ကြောင်း ပြောကြားခဲ့သလို အစိုးရအနေဖြင့် ရခိုင်ပြည်နယ်ရှိ လူမှုအသိုင်းအ၀န်းများကြား သဟဇာတဖြစ်ရေးနှင့် ငြိမ်းချမ်းရေး၊ တည်ငြိမ်ရေး ပြန်လည်ရရှိရေးအတွက် ကြိုးစားဆောင်ရွက်နေကြောင်း၊ ထွက်မပြေးသည့် မွတ်စလင်ရွာ အများအပြား ရှိကြောင်းနှင့် နိုင်ငံတကာ အသိုင်းအ၀န်းအနေဖြင့် ရခိုင်ဒေသသို့ လာရောက်ကြည့်ရှုရန် ဖိတ်ခေါ်ကြောင်းကိုလည်း ထည့်သွင်းပြောကြားခဲ့သည်။ ရခိုင်အရေးနှင့် ပတ်သက်၍ မှားယွင်းသော အချက်အလက်များ ပျံ့နှံ့ခဲ့ကြောင်းလည်း ရှင်းလင်းထားသည်။

ယင်းအပြင် နိုင်ငံတော် အတိုင်ပင်ခံပုဂ္ဂိုလ်၏ ရခိုင်အရေးနှင့် ပတ်သက်သော နိုင်ငံတော်အခြေပြမိန့်ခွန်း မပြောကြားမီ ရက်ပိုင်းအလိုတွင် တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က လက်ရှိအချိန်တွင် မြန်မာနိုင်ငံအတွက် အကျပ်အတည်းနှင့် အရေးကြီးသော ကိစ္စတစ်ရပ်အဖြစ် ရှိနေသည့် ရခိုင်အရေးနှင့် ပတ်သက်ပြီး အမှန်တရားကို အခိုင်အမာ သက်သေပြနိုင်ရေးအတွက် ညီညွတ်ရန် လိုအပ်ကြောင်း ပြောကြားထားသည်။

ရခိုင်ပြည်နယ်တွင် ပေါ်ပေါက်ခဲ့သော နယ်စပ်ဖြတ်ကျော်ကိစ္စသည် မြန်မာနိုင်ငံ၏ ပြည်တွင်းရေးသာဖြစ်သည်။ လူဝင်မှုကြီးကြပ်ရေးဆိုင်ရာ စိစစ်ဆောင်ရွက်ရမည့် ကိစ္စရပ်သာဖြစ်သည်။ ထို့ကြောင့် မြန်မာနိုင်ငံ၏ ပြည်တွင်းရေးဆိုင်ရာ ပြဿနာရပ်ပေါ် အစိုးရ၏ ကိုင်တွယ်ဖြေရှင်းနေမှုအား မြန်မာနိုင်ငံ၏ မိတ်ဆွေနိုင်ငံနှင့် အိမ်နီးချင်း အင်အားကြီး နိုင်ငံများဖြစ်သည့် တရုတ်နှင့် အိန္ဒိယနိုင်ငံတို့က ထောက်ခံထားပြီး ရုရှားနိုင်ငံ အနေဖြင့်လည်း မြန်မာနိုင်ငံ၏ ပြည်တွင်းရေးကို ၀င်ရောက်စွက်ဖက်ခြင်း မပြုကြရန် သဘောထားမှတ်ချက် ထုတ်ဖော်ထားသည်။ ယင်းအပြင် အာဆီယံဒေသတွင်း နိုင်ငံများ အနေဖြင့်လည်း အာဆီယံမူဝါဒများအတိုင်း နိုင်ငံတစ်နိုင်ငံ၏ ပြည်တွင်းရေးအား လိုအပ်သည်ထက် ပိုမိုစွက်ဖက်နိုင်မည် မဟုတ်ပေ။

သို့သော် ရခိုင်အရေးနှင့် ပတ်သက်၍ UN အပါအ၀င် အနောက်နိုင်ငံတချို့က ဝေဖန်မှုနှင့် ဖိအားပေး တောင်းဆိုမှုများ ရှိနေဆဲဖြစ်သည်။ အထူးသဖြင့် ဘင်္ဂလားဒေ့ရ်ှနှင့် မြန်မာနိုင်ငံအား ကိုလိုနီအဖြစ် သိမ်းပိုက်ခဲ့ဖူးသော ဗြိတိန်တို့အနေဖြင့် မြန်မာနိုင်ငံအပေါ် လိုအပ်သည်ထက် ပိုမိုသည့် ဖိအားပေး တောင်းဆိုမှုများ ပြုလုပ်လျက်ရှိနေသည်။ ရခိုင်အရေးနှင့်ပတ်သက်၍ ကုလသမဂ္ဂ လုံခြုံရေးကောင်စီ အရေးပေါ် အစည်းအဝေး ခေါ်ယူရန် ကုလ၏ ဗြိတိန်သံအမတ်က တောင်းဆိုခဲ့သည်။ ထို့ပြင် ကုလသမဂ္ဂ အထွေထွေညီလာခံသို့ တက်ရောက်နေသည့် ဘင်္ဂလားဒေ့ရ်ှဝန်ကြီးချုပ် ဟာဆီနာက နယူးယောက်တွင် ဘင်္ဂလားဒေ့ရှ် တက်ကြွလှုပ်ရှားသူများကို တွေ့ဆုံရာတွင် ရခိုင်အကျပ်အတည်းအတွက် မြန်မာနိုင်ငံကို အပြည်ပြည်ဆိုင်ရာက ပိုမိုကြီးမားသော ဖိအားပေးရန် တောင်းဆိုခဲ့ပြီး ရခိုင်ပြည်နယ်တွင် ပဋိပက္ခကြောင့် ထွက်ပြေးခဲ့ကြသည့် ဘင်္ဂါလီမွတ်စလင် ၄၂၀,၀၀၀ ကျော်ကို မြန်မာက ပြန်လည်လက်ခံရမည်ဟု တောင်းဆိုချက် တစ်ရပ်ကိုလည်း ထုတ်ပြန်ခဲ့သည်။ ယင်းအပြင် ဘင်္ဂါလီမွတ်စလင်များ ပြန်လာရေးကို ဟန့်တားသည့် အနေဖြင့် မြန်မာနယ်စပ်၌ မိုင်းများထောင်ထားကြောင်းလည်း စွပ်စွဲပြောကြားခဲ့သည်။

မြန်မာနိုင်ငံသည် အချုပ်အခြာအာဏာပိုင် လွတ်လပ်သည့် နိုင်ငံဖြစ်သည်။ နိုင်ငံတော်သည် လွတ်လပ်၍ တက်ကြွပြီး ဘက်မလိုက်သော နိုင်ငံခြားရေးမူဝါဒကို ကျင့်သုံးသည်။ ကမ္ဘာ့ငြိမ်းချမ်းရေးနှင့် နိုင်ငံအချင်းချင်း မိတ်ဝတ်မပျက် ပေါင်းဖက်ဆက်ဆံရေးကို ရှေးရှုသည်။ နိုင်ငံအချင်းချင်း ငြိမ်းချမ်းစွာ အတူယှဉ်တွဲရေးမူကို စောင့်ထိန်းကြောင်း နိုင်ငံတော်၏ အခြေခံမူများအဖြစ် ခိုင်ခိုင်မာမာ ပြဋ္ဌာန်းထားပြီးဖြစ်သည်။

သို့ပါ၍ နိုင်ငံတကာ၏ အခြေခံ စည်းမျဉ်းစည်းကမ်းများနှင့်အတူ မြန်မာနိုင်ငံ၏ တည်ဆဲဥပဒေများအား ကျော်လွန်၍ ဖိအားပေးလာခဲ့မည် ဆိုပါက မြန်မာနိုင်ငံအနေဖြင့် အခြားရွေးချယ်စရာလမ်း မရှိဘဲ အစိုးရ၊ တပ်မတော်နှင့် နိုင်ငံသူ နိုင်ငံသားအားလုံး အနေ ဖြင့် ညီညွတ်စွာဖြင့် မြန်မာနိုင်ငံ၏ အချုပ်အခြာအာဏာကို ကာကွယ်ကြရမည်ဖြစ်သည်။ မြန်မာနိုင်ငံသူ နိုင်ငံသား ပြည်သူများ အနေဖြင့်လည်း နိုင်ငံတော် အတိုင်ပင်ခံပုဂ္ဂိုလ်၏ ရခိုင်အရေးနှင့် ပတ်သက်သော ရှင်းလင်းရပ်တည် ဆောင်ရွက်ချက်များအတိုင်း တပ်မတော်၏ ရပ်တည်ချက်များအတိုင်း အခိုင်အမာ ရပ်တည်သွားကြရန် လိုအပ်မည်ဖြစ်ပါသည်။ သို့ပါ၍ မြန်မာနိုင်ငံသည် လွတ်လပ်သည့် အချုပ်အခြာအာဏာပိုင်နိုင်ငံ ဖြစ်သည့်အတွက် ရခိုင်အရေးနှင့်ပတ်သက်၍ ဗြိတိန်နှင့် ဘင်္ဂလားဒေ့ရ်ှနိုင်ငံတို့ အနေဖြင့် မြန်မာနိုင်ငံ၏ အချုပ်အခြာအာဏာ ပိုင်ဆိုင်မှုကို လေးစားရန် လိုအပ်ပါကြောင်း The Daily Eleven သတင်းစာက တိုက်တွန်းအပ်ပါသည်။

စက်တင်ဘာ ၂၁ ရက်နေ့တွင် ထုတ်ဝေမည့် The Daily Eleven သတင်းစာ၏ အယ်ဒီတာ့ အာဘော်

 

မြန်မာနိုင်ငံ၏ ပြည်ပပို့ကုန် မျှော်မှန်းချက်

မြန်မာနိုင်ငံ အနေဖြင့် ၂၀၁၇-၂၀၁၈ ဘဏ္ဍာနှစ်တွင် ပြည်ပပို့ကုန်မှ ဒေါ်လာသန်း ၁၄၀၀၀ ရရှိရန် မျှော်မှန်းထားသည်။ ၂၀၁၇-၂၀၁၈ ဘဏ္ဍာနှစ် အမျိုးသားစီမံကိန်းတွင် ပြည်ပပို့ကုန်အနေဖြင့် မျှော်မှန်းချက်များ ထည့်သွင်းထားပြီး အဓိကပို့ကုန်များအဖြစ် လယ်ယာထွက်ကုန်ပစ္စည်းများ၊ သတ္တုတွင်းထွက်နှင့် ကျောက်မျက်ရတနာများ၊ ရေနံနှင့် ရေနံထွက်ပစ္စည်းများ၊ တိရစ္ဆာန်ထွက်ပစ္စည်းများ၊ ချုပ်ပြီးအထည်နှင့် ရေထွက်ပစ္စည်းတို့ ဖြစ်ကြောင်း ထည့်သွင်းထားသည်။ သို့သော် တရားဝင် စာရင်းဇယားများအရ ပြည်ပပို့ကုန် အဓိကပို့ကုန် ခုနစ်မျိုးအနက် တင်ပို့မှုလျော့ကျနေသည့် စာရင်းတွင် လယ်ယာထွက်ကုန်များ ပါဝင်နေရာ ယင်းလယ်ယာ ထွက်ကုန်များတွင် ဆန်၊ ပဲနှင့် ဆီထွက်သီးနှံတို့ ပါဝင်နေသည်။

လက်ရှိတွင် ပဲတင်ပို့မှုနှင့် ပတ်သက်၍ အိန္ဒိယနိုင်ငံအစိုးရနှင့် ညှိနှိုင်းရာတွင် ပဲသုံးမျိုးအား ကန့်သတ်ကုန်စည်အဖြစ် ၂၀၁၈ ခုနှစ် မတ် ၃၁ ရက်အထိ သတ်မှတ်ခြင်းအား ဖယ်ရှားပေးရန်အတွက် ပထမဦးစားပေး တောင်းဆိုပေးရန် ဆွေးနွေးလျက်ရှိနေပြီ ဖြစ်သည်။ အိန္ဒိယအစိုးရမှ ၂၀၁၈ ခုနှစ် မတ် ၃၁ ရက်အထိ ကန့်သတ်ကုန်စည်အဖြစ် သတ်မှတ်ထားသည့် ပဲစင်းငုံ တန်နှစ်သိန်းနှင့် မတ်ပဲနှင့် ပဲတီစိမ်း တန်သုံးသိန်း Fixed Quota သတ်မှတ်ထားခြင်းအား မြန်မာနိုင်ငံအတွက် နောက်ထပ်ပဲစင်းငုံ တန်နှစ်သိန်း၊ မတ်ပဲနှင့် ပဲတီစိမ်း တန်သုံးသိန်း ထပ်တိုးတင်သွင်းခွင့် ပြုရန်အတွက် တောင်းဆိုပေးရန်လည်း ဆွေးနွေးထားကြောင်း သိရသည်။

မြန်မာနိုင်ငံတွင် ပဲမျိုးစုံပြည်ပတင်ပို့မှုသည် အမေရိကန်ဒေါ်လာ သန်းတစ်ထောင် (ဒေါ်လာတစ်ဘီလျံ) ခန့် နိုင်ငံတော်တွင် ရရှိသကဲ့သို့ တစ်နည်းအားဖြင့် တိုင်းပြည်၏ ပြည်ပပို့ကုန် အခွန်ရရှိမှုတွင် ၁၀ ရာခိုင်နှုန်းခန့် ရှိနေသောကြောင့် ပို့ကုန်ဝင်ငွေတိုးမြှင့်ရန် အရေးပါနေသည်။

ယခုနှစ်အတွင်း မြန်မာနိုင်ငံမှဆန်ကို ပြည်ပနိုင်ငံ ၆၅ နိုင်ငံအထိ ဈေးကွက်တိုးချဲ့ တင်ပို့နေခြင်းဖြစ်ပြီး လက်ရှိအချိန်အထိ ပြည်ပသို့ ဆန်တန်ချိန် ၁၃ သိန်းခန့် တင်ပို့ထားပြီး ယခင်နှစ်ကာလတူထက် တန်ချိန်ရှစ်သိန်းကျော် ပိုမိုတင်ပို့ထားသည်။ ၂၀၁၇-၂၀၁၈ ဘဏ္ဍာနှစ်တွင် ပြည်ပသို့ ဆန်တန်ချိန်နှစ်သန်း တင်ပို့ရန် ရည်မှန်းချက်ထား ဆောင်ရွက်လျက်ရှိပြီး မြန်မာနိုင်ငံ ဆန်စပါးအသင်းချုပ် အနေဖြင့် ဆန်စပါးဈေးကွက် ပုံမှန်လည်ပတ်ရေးနှင့် ရေရှည်ဖွံ့ဖြိုး တိုးတက်ရေးအတွက် ပြည်ပကုန်သည် (International Buyer) များကို ရောင်းချပေးသကဲ့သို့  နှစ်နိုင်ငံအစိုးရ အချင်းချင်း ဆက်သွယ်ညှိနှိုင်း ရောင်းချသည့် G to G အစီအစဉ်ကိုပါ ဆောင်ရွက်ရန် အစိုးရနှင့် ပူးပေါင်းလုပ်ဆောင်လျက် ရှိနေသည်။

သို့ပါ၍ ပို့ကုန်ဝင်ငွေ လျော့နည်းခြင်းများတွင် ပို့ကုန်တိုးတက်မှု အခြေခံဖွံ့ဖြိုးရန် လုပ်ဆောင်ရမည့်မူဝါဒကို အကောင်အထည်ဖော်မှု အားနည်းနေခြင်း၊ ပို့ကုန်ဈေးကွက်အတွက် G to G ချိတ်ဆက်ညှိနှိုင်းပြီး ဈေးကွက်ရှာဖွေနိုင်မှု ထိရောက်စွာ မလုပ်ဆောင်နိုင်ခြင်း၊ ပြည်တွင်းထုတ်ကုန်များ အရည်အသွေး တိုးတက်လာအောင် ငွေကြေးနည်းပညာ ထောက်ပံ့မှုနည်းပါး၍ ဈေးကောင်းမရဘဲ ၀င်ငွေနည်းနေခြင်း၊ ပို့ကုန်ဈေးကွက်ကို ဦးတည်သည့် ပြည်ပရင်းနှီးမြှုပ်နှံမှု အားနည်းနေခြင်း၊ အသေးစား၊ အလတ်စား လုပ်ငန်းများ ဖွံ့ဖြိုးမှု နှေးကွေးနေခြင်း စသည့်အချက်များကို လိုအပ်သလို ပြုပြင်လုပ်ဆောင်နိုင်ရန် လိုအပ်မည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာ ၂၀ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်

တိုင်းရင်းသားလူမျိုးများ၏ အခွင့်အရေး ကာကွယ်စောင့်ရှောက်ရန်

တိုင်းရင်းသားလူမျိုးများ၏ အခွင့်အရေး ကာကွယ်စောင့်ရှောက်သည့် ဥပဒေကို ၂၀၁၅ ခုနှစ် ဖေဖော်ဝါရီလတွင် ပြည်ထောင်စုလွှတ်တော်က အတည်ပြု ပြဋ္ဌာန်းခဲ့သည်။ လက်ရှိတွင် နည်းဥပဒေအတွက် လုပ်ဆောင်နေမှုများမှာ ရာခိုင်နှုန်း ၇၀ ခန့် ပြီးစီးနေပြီဖြစ်သည်။

ယင်းဥပဒေ၏ ရည်ရွယ်ချက်များမှာ “တိုင်းရင်းသားလူမျိုးအားလုံး တန်းတူညီမျှသော နိုင်ငံသားအခွင့်အရေးများ ရရှိစေရန်၊ တိုင်းရင်းသားအချင်းချင်း ချစ်ကြည်ရင်းနှီးမှုဖြင့် စစ်မှန်သော ပြည်ထောင်စုစိတ်ဓာတ် အခြေခံ၍ ထာဝစဉ်အတူတကွ လက်တွဲနေထိုင်ကြစေရန်၊ တိုင်းရင်းသားလူမျိုးများ၏ စကား၊ စာပေ၊ အနုပညာ၊ ယဉ်ကျေးမှု၊ ရိုးရာဓလေ့ထုံးတမ်း၊ အမျိုးသားရေးလက္ခဏာနှင့် သမိုင်းအမွေအနှစ်တို့ကို ထိန်းသိမ်းစောင့်ရှောက်ရန်နှင့် ဖွံ့ဖြိုးတိုးတက်စေရန်၊ တိုင်းရင်းသား လူမျိုးအချင်းချင်း စည်းလုံးညီညွတ်ရေး၊ ချစ်ကြည်လေးစားရေးနှင့် ရိုင်းပင်းကူညီရေးတို့ကို တိုးတက်ဖြစ်ထွန်းစေရန်၊ တိုးတက်ဖွံ့ဖြိုးမှု နည်းပါးနေသည့် တိုင်းရင်းသားလူမျိုးများ၏ ပညာရေး၊ ကျန်းမာရေး၊ စီးပွားရေး၊ လမ်းပန်းဆက်သွယ်ရေး စသည်တို့ပါဝင်သော လူမှုစီးပွားရေး ဖွံ့ဖြိုးတိုးတက်စေရန်၊ ဖွဲ့စည်းပုံအခြေခံဥပဒေပါ အခွင့်အရေးများကို တိုင်းရင်းသားလူမျိုးများ အပြည့်အ၀ရရှိစေရန်” ဟူ၍ ဖော်ပြပါရှိပါသည်။ ယင်းအပြင် “မည်သူမျှ ဤဥပဒေပါ တိုင်းရင်းသားလူမျိုးများ၏ အခွင့်အရေးနှင့် ရပိုင်ခွင့်များကို ခိုင်လုံသော အကြောင်းပြချက်မရှိဘဲ ပိတ်ပင်တားဆီးခြင်းမပြုရ။ မည်သူမျှ ဤဥပဒေပါ ပြဋ္ဌာန်းချက်များကို နိုင်ငံရေးကိစ္စအလို့ငှာ အလွဲသုံးစားမပြုလုပ်ရ။ မည်သူမျှ တိုင်းရင်းသားလူမျိုးများအချင်းချင်း မုန်းတီးခြင်း၊ ရန်မူခြင်း၊ စိတ်ဝမ်းကွဲခြင်း၊ တစ်မျိုးမျိုးကို ဖြစ်ပေါ်စေရန် ရည်ရွယ်သော သို့မဟုတ် ပေါ်ပေါက်လာရန် အကြောင်းရှိသော အပြုအမူများကို မပြုလုပ်ရ” ဟူ၍ တားမြစ်ချက်များအဖြစ်လည်း ထည့်သွင်းပြဋ္ဌာန်းထားသည်။

တိုင်းရင်းသားလူမျိုးများ၏ အခွင့်အရေး ကာကွယ်စောင့်ရှောက်သည့် ဥပဒေကို ၂၀၁၅ ခုနှစ် ဖေဖော်ဝါရီတွင် ပြဋ္ဌာန်းခဲ့သော်လည်း ၀န်ကြီးဌာနအသစ် ဖွဲ့စည်းနေရခြင်းကြောင့် တိုင်းရင်းသား အရေးအရာများဖြစ်သော စကား၊ စာပေ၊ အနုပညာ၊ ယဉ်ကျေးမှုဓလေ့ထုံးတမ်းများကို ထိန်းသိမ်းကာကွယ် ဖော်ထုတ်ရေးလုပ်ငန်းများ၊ ဖွံ့ဖြိုးတိုးတက်မှု နည်းပါးသော တိုင်းရင်းသားလူမျိုးများ၏ လူမှုဘ၀ မြှင့်တင်ရေးလုပ်ငန်းများဖြစ်သည့် ပညာရေး၊ ကျန်းမာရေး၊ စီးပွားရေးနှင့် လမ်းပန်းဆက်သွယ်ရေး စသည့် ဘက်စုံဖွံ့ဖြိုးရေးလုပ်ငန်းများ ဆောင်ရွက်ပေးရန် နှေးကွေးလျက်ရှိကြောင်း ပြည်သူ့လွှတ်တော် တိုင်းရင်းသားရေးရာနှင့် ပြည်တွင်းငြိမ်းချမ်းရေးဖော်ဆောင်မှု ကော်မတီက ပြီးခဲ့သည့် ပြည်သူ့လွှတ်တော် အစည်းအဝေးကာလအတွင်း လွှတ်တော်သို့ အစီရင်ခံစာတင်ရာတွင် ထည့်သွင်းတင်ပြခဲ့သည်။

ထို့ပြင် တိုင်းရင်းသားရေးရာနှင့် ပြည်တွင်းငြိမ်းချမ်းရေး အကောင်အထည်ဖော်မှုနှင့် ပတ်သက်၍ တိုင်းရင်းသားတို့၏ မျှော်လင့်တောင့်တနေသော စကား၊ စာပေ၊ ယဉ်ကျေးမှု၊ ဓလေ့ထုံးတမ်းများ ကာကွယ်စောင့်ရှောက် ဖော်ထုတ်မြှင့်တင်ခြင်းစသည့် ရှင်သန်မှုများကို ဥပဒေ၊ နည်းဥပဒေများဖြင့် ပြဋ္ဌာန်းကာကွယ်ပေးရေး ဆောင်ရွက်ရန် များစွာလိုအပ်နေသေးသည်ဟု သုံးသပ်မိကြောင်းလည်း ပြည်သူ့လွှတ်တော် တိုင်းရင်းသားရေးရာနှင့် ပြည်တွင်းငြိမ်းချမ်းရေး ဖော်ဆောင်မှုကော်မတီက အကြံပြုတင်ပြထားသည်။

သို့ပါ၍ တိုင်းရင်းသားပေါင်းစုံ စုစည်းနေထိုင်သော နိုင်ငံဖြစ်သည်နှင့်အညီ တန်းတူညီမျှမှု စည်းလုံးညီညွတ်မှုများဖြင့် ဥပဒေအတိုင်း အခွင့်အရေးနှင့် ကာကွယ်စောင့်ရှောက်ပေးနိုင်ရန် အရေးကြီးပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာလ (၁၉) ရက်နေ့ထုတ် The Daily Eleven သတင်းစာ အယ်ဒီတာ့အာဘော်