မောင်တောဒေသမြောက်ပိုင်း မိုင်သုံးဆယ်ကျော်ဝေးသော တမန်းသားကျေးရွာမှ ပညာရေးနှင့် ကျန်းမာရေး ဝန်ထမ်းများ၊ ရွာသူရွာသားများ ရရာ ဆိုင်ကယ်များ၊ ကားများဖြင့် ဘူးသီးတောင်သို့ ထွက်ပြေးနေရ
ရခိုင်ပြည်နယ် မောင်တောမြို့နယ်တွင် ဖြစ်ပွားလျက်ရှိသည့် ARSA အစွန်းရောက် ဘင်္ဂါလီများ၏ အကြမ်းဖက်မှုများကြောင့် မောင်တောဒေသ မြောက်ပိုင်း မိုင်သုံးဆယ်ကျော်ဝေးသော တမန်းသားကျေးရွာမှ ပညာရေးနှင့် ကျန်းမာရေးဝန်ထမ်းများ၊ ရွာသူရွာသားများ လုံခြုံရေးမပါဘဲ ဆိုင်ကယ်များဖြင့် လည်းကောင်း၊ ရရာကားများဖြင့် လည်းကောင်း ဘူးသီးတောင်သို့ ထွက်ပြေးနေကြကြောင်း သိရသည်။
သြဂုတ်လ ၂၅ ရက်က စတင်ခဲ့သော ARSA ဘင်္ဂါလီ အစွန်းရောက်များ၏ အကြမ်းဖက်လုပ်ရပ်များကြောင့် မောင်တောဒေသတွင် မြို့အားစွန့်ခွာသည့် ဒေသခံ တိုင်းရင်းသား ပိုများလာပြီး မြို့ပေါ်တွင် အသွားအလာ မရှိသလောက် နည်းပါးလာကြောင်း သိရသည်။
ရခိုင်ပြည်နယ် မောင်တောနှင့် ဘူးသီးတောင်တို့အပြင် ရသေ့တောင်မြို့နယ်များတွင်လည်း နေရပ်စွန့်ခွာ ထွက်ပြေးလာသူများသည် သုံးရွာတစ်စု၊ လေးရွာတစ်စု၊ ငါးရွာတစ်စု စသဖြင့် ခိုလှုံနေကြရကြောင်း သိရပြီး လူမှုအဖွဲ့များ အနေဖြင့်လည်း ကျေးရွာများအထိ သွားရောက်ကူညီ ထောက်ပံ့ရန် လမ်းခရီးအတွင်း အကြမ်းဖက်သမားများ၏ အန္တရာယ်ကြောင့် မသွားရောက်နိုင်ခြင်းများလည်း ရှိကြောင်း သိရသည်။
အကြမ်းဖက်မှုများ စတင်ဖြစ်ပွားသည့် သြဂုတ် ၂၅ ရက်တွင် ပြောင်းရွှေ့မှု အနည်းငယ်သာ ရှိရာမှ နောက်ပိုင်းရက်များတွင် ARSA အစွန်းရောက် ဘင်္ဂါလီများမှ အကြမ်းဖက် လုပ်ရပ်များကို ပိုမိုလုပ်ဆောင်လာသည့်အတွက် ရွာလုံးကျွတ် နေရပ်စွန့်ခွာ ထွက်ပြေးမှုများပါ ရှိလာခဲ့ပြီး ဘူးသီးတောင်မှ သင်္ဘောဖြင့် လာရောက်သူများအပြင် စက်လှေကြီးများဖြင့်လည်း လာရောက်သူများ ရှိနေကြောင်း သိရသည်။
