စားသုံးသူ အကာအကွယ်ပေးရေး လုပ်ငန်းများနှင့် ပတ်သက်၍ တာဝန်ရှိသူများ ဆွေးနွေးနေကြစဉ်
စားသုံးသူ အကာအကွယ်ပေးရေး လုပ်ငန်းများကို ပိုမိုထိရောက်စေရန်နှင့် အာဆီယံနှင့် တစ်ပြေးညီ လိုက်ပါဆောင်ရွက်နိုင်စေရန် အပြည်ပြည်ဆိုင်ရာ အတွေ့အကြုံ အလေ့အထများကို လေ့လာပြီး အမျိုးသား စားသုံးသူ အကာအကွယ်ပေးရေး စီမံကိန်းကို ရေးဆွဲချမှတ် သွားမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာ ဦးစီးဌာနမှ သိရသည်။
ကုန်စည်နှင့် ဝန်ဆောင်မှုကဏ္ဍ အားလုံးတွင် စားသုံးသူများ၏ အခွင့်အရေး ထိခိုက်ဆုံးရှုံးမှုမရှိအောင် ဥပဒေဘောင်အတွင်းမှ ဆောင်ရွက်ရမည်ဖြစ်ပြီး ထုတ်ကုန်လုံခြုံ စိတ်ချရမှုလုပ်ငန်း၊ အရေးယူ ဖြေရှင်းဆောင်ရွက်ပေးသည့်လုပ်ငန်း၊ စားသုံးသူ ပညာပေးရေး လုပ်ငန်းများကို အစိုးရဌာနများ၊ ပုဂ္ဂလိက အသင်းအဖွဲ့များနှင့် လုပ်ငန်းရှင်များ၊ အစိုးရမဟုတ်သော စားသုံးသူကာကွယ်ပေးရေး အသင်းအဖွဲ့များနှင့် ပူးပေါင်းဆောင်ရွက်ရမည် ဖြစ်ကြောင်း သိရသည်။
ထို့ပြင် အာဆီယံ စားသုံးသူကာကွယ်ရေး ကော်မတီအပါအဝင် ဒေသတွင်း အဖွဲ့အစည်းများ၊ အပြည်ပြည်ဆိုင်ရာ အဖွဲ့အစည်းများနှင့် ပူးပေါင်းပြီး ဒေသတွင်းနှင့် နိုင်ငံတကာတွင် ဆောင်ရွက်နေသည့် အလေ့အထများကို လေ့လာဆောင်ရွက်ရန် လိုအပ်ကြောင်း သိရသည်။
အဆိုပါ စီမံကိန်းရေးဆွဲရေးနှင့် ပတ်သက်၍ နေပြည်တော်ရှိ Horizon Lake View ဟိုတယ်တွင် အမျိုးသား စားသုံးသူ အကာအကွယ်ပေးရေး စီမံကိန်း အလုပ်ရုံဆွေးနွေးပွဲကို စားသုံးသူရေးရာ ဦးစီးဌာနနှင့် EUGIZ အဖွဲ့အစည်းတို့ ပူးပေါင်းကာ စက်တင်ဘာ ၄ ရက်မှ ၇ ရက်အထိ ပြုလုပ်လျက်ရှိကြောင်း သိရသည်။
“ကျွန်တော်တို့က စားသုံးသူ အကာအကွယ်ပေးရေး လုပ်ငန်းတွေကို INGO တွေနဲ့ ပူးပေါင်းဆောင်ရွက်ပါတယ်။ နည်းပညာပိုင်းဆိုင်ရာတွေ သင်တန်းတွေ ထောက်ပံ့ပါတယ်။ အမျိုးသားစားသုံးသူ ကာကွယ်ပေးရေး စီမံကိန်းကို ရေးဆွဲဖို့ လိုအပ်လာတဲ့အတွက် သူတို့ရဲ့ အကူအညီနဲ့ ရေးဆွဲဖို့ စတင်ဆောင်ရွက်နေတာပဲ ဖြစ်ပါတယ်” ဟု စားသုံးသူရေးရာဌာန ဒုတိယညွှန်ကြားရေးမှူး ဦးစိုးအောင်က ပြောကြားသည်။
အမျိုးသားစားသုံးသူ အကာအကွယ်ပေးရေး စီမံကိန်းရေးဆွဲခြင်းနှင့် ပတ်သက်၍ နိုင်ငံပေါင်း ၆၀ ကျော်တွင် စီမံကိန်း ရေးဆွဲပေးခဲ့သည့် ကျွမ်းကျင်ပညာရှင်မှလည်း အကူအညီပေးမည် ဖြစ်ကြောင်း၊ အဆိုပါ အလုပ်ရုံ ဆွေးနွေးပွဲမှ ရလဒ်များက စီမံကိန်းရေးဆွဲရာတွင် အကျိုးရှိမည် ဖြစ်ကြောင်းလည်း ၎င်းက ပြောကြားသည်။
စားသုံးသူရေးရာ ဦးစီးဌာနက စားသုံးသူအခွင့်အရေးနှင့် ပတ်သက်ပြီး အသိပညာပေးရေးကို ပြည်နယ်နှင့် တိုင်းများတွင် ဆောင်ရွက်နေကြောင်း၊ စားသုံးသူ အကျိုးစီးပွား ထိခိုက်နစ်နာခြင်းများကို တိုင်ကြားနိုင်ရန် စားသုံးသူ သတင်းပြန်ကြားရေးနှင့် တိုင်ကြားရေးဌာနများ ဖွင့်လှစ်ထားကြောင်း၊ လက်ရှိတွင် ပြည်နယ်နှင့် တိုင်းဒေသကြီးများ၌ ၄၇ ဌာနဖွင့်ပြီးဖြစ်ကြောင်း သိရသည်။
စားသုံးသူ အခွင့်အရေးနှင့် အကျိုးစီးပွား နစ်နာမှုများအတွက် တိုင်ကြားမှုများမှာလည်း ယမန်နှစ်ကထက် ပိုများလာကြောင်း သိရသည်။
