w တနင်္သာရီတိုင်းဒေသကြီး အတွင်းရှိ ဆီအုန်းစိုက်ပျိုးရေး စီမံကိန်းကြီးများမှာ မျှော်မှန်းထားသကဲ့သို့ ထိရောက်မှုမရှိဘဲ သဘာဝပတ်ဝန်းကျင် ထိခိုက်မှုများပြီး လူမှုရေး မညီမျှမှုများ ဖြစ်ပေါ်စေဟုဆို - Eleven Media Group <

တနင်္သာရီတိုင်းဒေသကြီး အတွင်းရှိ ဆီအုန်းစိုက်ပျိုးရေး စီမံကိန်းကြီးများမှာ မျှော်မှန်းထားသကဲ့သို့ ထိရောက်မှုမရှိဘဲ သဘာဝပတ်ဝန်းကျင် ထိခိုက်မှုများပြီး လူမှုရေး မညီမျှမှုများ ဖြစ်ပေါ်စေဟုဆို

တနင်္သာရီတိုင်းဒေသကြီး အတွင်းရှိ ဆီအုန်းစိုက်ပျိုးရေး စီမံကိန်းတစ်ခု၏ ဆီအုန်းစိုက်ပျိုးရန် မြေနေရာ ရှင်းလင်းထားမှုများကို တွေ့ရစဉ် (ဓာတ်ပုံ-ဇော်မိုးဦး)

တနင်္သာရီတိုင်းဒေသကြီး အတွင်းရှိ ဆီအုန်းစိုက်ပျိုးရေး စီမံကိန်းကြီးများမှာ မျှော်မှန်းထားသကဲ့သို့ ထိရောက်မှုမရှိဘဲ သဘာဝပတ်ဝန်းကျင် ထိခိုက်မှုများပြီး ရေရှည်မတည်တံ့သည့် လူမှုရေးအရ မညီမျှမှုများကို ဖြစ်ပေါ်စေကြောင်း တနင်္သာရီ မြို့နယ်မဲဆန္ဒနယ် အမှတ် (၂) မှ တိုင်းဒေသကြီး လွှတ်တော်ကိုယ်စားလှယ် ဦးရဲမြင့်ဆွေက ပြောကြားသည်။

သြဂုတ် ၃၁ ရက်က ကျင်းပ သည့် ဒုတိယအကြိမ် တနင်္သာရီတိုင်းဒေသကြီးလွှတ်တော် ဆဋ္ဌမပုံမှန် အစည်းအဝေး ပထမနေ့တွင်  ဦးရဲမြင့်ဆွေက တနင်္သာရီတိုင်းဒေသကြီး အတွင်းရှိ ဆီအုန်းစိုက်ပျိုးရေး စီမံကိန်းများကြောင့် ဖြစ်ပေါ်နေသော ဒေသခံများ၏ မြေယာ၊ လူနေမှုဘ၀နှင့် သဘာဝပတ်ဝန်းကျင် ထိခိုက်မှုဆိုင်ရာ ပြဿနာများကို ထိရောက်စွာ ဖြေရှင်းပေးရန်နှင့် ဆီအုန်းစိုက်ပျိုးရေးလုပ်ငန်းများ လိုက်နာရန် ဖြစ်သော ဥပဒေ၊ နည်းဥပဒေနှင့် လုပ်ထုံးလုပ်နည်းများအတိုင်း လိုက်နာခွင့်ပြုချက်ယူရန် ပျက်ကွက်နေသော ဆီအုန်းစိုက်ပျိုးရေး လုပ်ကိုင်နေသည့် လုပ်ငန်းများ သတ်မှတ်၊ ခွင့်ပြုလျာထားချက်အတိုင်း ပြည့်မီအောင် မစိုက်ပျိုးနိုင်သည့် ကုမ္ပဏီလုပ်ငန်းများထံမှ ဥပဒေနှင့်အညီ ရယူထားခြင်းမရှိသော မြေယာများကို ဒေသခံ ပြည်သူများထံသို့ ပြန်လည်ပေးအပ်နိုင်ရေး ပြည်ထောင်စု အစိုးရနှင့် တိုင်းဒေသကြီး အစိုးရတို့မှ ကြပ်ကြပ်မတ်မတ် အရေးယူ ဆောင်ရွက်ပေးပါရန် တိုက်တွန်းကြောင်းအဆို တင်သွင်းရာ၌ ထည့်သွင်းပြောကြား ခဲ့ခြင်းဖြစ်သည်။

၁၉၉၁ ခုနှစ်မှာ အစိုးရက ပြည်တွင်းစားသုံးမှုဖူလုံရေး အစီအမံအရ ဆီအုန်းစိုက်ပျိုးရေး အစီအစဉ်တစ်ခုကို ချမှတ်ခဲ့ပြီး တနင်္သာရီတိုင်းသည် မြန်မာနိုင်ငံ၏ ဆီအိုးကြီးဖြစ်ရမည်ဆိုသည့် ဆောင်ပုဒ်ဖြင့် ဆီအုန်းစိုက်ပျိုးရေး လုပ်ကွက်များကို ချထားပေးခဲ့ကြောင်း၊ ထိုသို့ ဆီအုန်းစိုက်ပျိုးရန် ချပေးလိုက်သည့် စီမံကိန်းကြီးများတွင် ကြီးမားလှသည့် အမှားကြီးနှစ်ခုကို တွေ့ရပြီး ပထမအချက်အနေဖြင့် စိုက်ပျိုးမြေအဖြစ် လျာထားသည့် မြေများမှာ မြေလွတ်၊ မြေလပ်မြေရိုင်းများ မဟုတ်ဘဲ အဆိုပါဧရိယာမှ ရှေးနှစ်ပေါင်းများစွာ ကတည်းက အခြေချနေထိုင်ကြသည့် ဒေသခံတိုင်းရင်းသားများ၏ ကျေးရွာများ၊ စိုက်ပျိုးမြေများအတွင်း တည်ရှိနေပြီး ပြည်တွင်းစစ်ကြောင့် ထွက်ပြေးတိမ်းရှောင်နေရသူများ၊ နေရပ်စွန့်ခွာ ဒုက္ခသည်များ၊ ပြည်တွင်းရွှေ့ပြောင်း စစ်ဘေးရှောင်များ တစ်ချိန်ချိန် ပြန်လည်လာရောက် နေထိုင်လိုသည့် နေရာများအတွင်း ကျရောက်နေခြင်း ဖြစ်ကြောင်း၊ ဒုတိယအချက်မှာ အလွန်တစ်ရာ ထိရောက်မှုရှိပြီး စီးပွားရေးအရ အရင်းအနှီး အနည်းငယ်မျှဖြင့် အကျိုးအမြတ်များများ ရစေရန်အတွက် ရင်းနှီးမြှုပ်နှံမှုနှင့် နည်းပညာဆိုင်ရာ အလားအလာများကို မှားယွင်းတွက်ချက် ခဲ့ခြင်းတို့ကြောင့် ဆီအုန်းစိုက်ပျိုးရေး စီမံကိန်းကြီးများမှာ မျှော်မှန်းထားသကဲ့သို့ ထိရောက်မှုမရှိဘဲ သဘာဝပတ်ဝန်းကျင်အတွက် ထိခိုက်မှုများစေပြီး လူမှုရေးအရ မညီမျှမှုများကို ဖြစ်ပေါ်စေကြောင်း ဦးရဲမြင့်ဆွေက အဆိုတင်သွင်းရာတွင် ထည့်သွင်း ပြောကြားသည်။

တနသာင်္ရီတိုင်း ဒေသကြီးအတွင်း ၂၀၁၁ ခုနှစ်မှ ၂၀၁၆ ခုနှစ်အထိ ဆီအုန်းစိုက်ပျိုးရေး စီမံကိန်းများအတွက် ချထားပေးခဲ့သည့် မြေဧရိယာ ဧက ၁ ဒသမ ၈ သန်းရှိပြီး ၎င်းအနက် ၂၀၁၆ ခုနှစ် နှစ်ကုန်ပိုင်းအထိ ဧက ၅၀၀၀၀ ကျော်သာ စိုက်ပျိုးပြီးစီးခဲ့ကြောင်း၊ လက်ရှိအခြေအနေအရ ဆီအုန်းစိုက်ပျိုးရေး စီမံကိန်းများကြောင့် စီမံကိန်း ဧရိယာအတွင်းရှိ ဒေသခံများအတွက် စိန်ခေါ်မှုများစွာ ဖြစ်ပေါ်လျက်ပြီး စားဝတ်နေရေးနှင့် အသက်မွေး ၀မ်းကျောင်းဆိုင်ရာ လုပ်ငန်းများကို ဆိုးဆိုးရွားရွား ထိခိုက်နေကြောင်း လေ့လာတွေ့ရှိရသည်ဟု အဆိုတင်သွင်းရာတွင် ထည့်သွင်းပြောကြားခဲ့သည်။

 

September 3, 2017














Copy Protected by Chetan's WP-Copyprotect.