<

ရန်ကုန်မြို့၌ဖွင့်လှစ်ထားသည့် ဟံသာဝတီဦးဝင်းတင်ဖောင်ဒေးရှင်း၏ စေတနာအခမဲ့ဆေးကုခန်း၌ ရန်ပုံငွေနှင့် ဆေးဝါးများလိုအပ်နေ

သတင်းစာဆရာကြီး ဟံသာဝတီဦးဝင်းတင်ဖောင်ဒေးရှင်း၏ စေတနာအခမဲ့ဆေးကုခန်း၌ ရန်ပုံငွေနှင့် ဆေးဝါးများလိုအပ်နေကြောင်း စေတနာအခမဲ့ဆေးကုခန်းတာဝန်ခံ ဦးထွန်းကြည်က ပြောကြားသည်။

စက်တင်ဘာ  ၁၂ ရက်က ရန်ကုန်တိုင်းဒေသကြီး ဒလမြို့နယ် ကမာကစစ်ရပ်ကွက်တွင်နေထိုင်သူ ဦးဝင်းဦးက စေတနာအခမဲ့ ဆေးကုခန်းသို့ အလှူငွေ ကျပ်သုံးသိန်းလှူ ဒါန်းပွဲအခမ်းအနားတွင် ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။

နိုင်ငံရေးအကျဉ်းသားများ၏ ကျန်းမာရေး ဘ၀များတိုးတက်စေရန်ရည်ရွယ်ပြီး စေတနာအခမဲ့ ဆေးကုခန်း၌ နေ့စဉ်နေ့တိုင်း နိုင်ငံရေးအကျဉ်းသားမိသားစုဝင်များနှင့် ပြည်သူများအား ကျန်းမာရေးစောင့်ရှောက် မှုပေးလျက်ရှိသော်လည်း အလှူရှင်နှင့် ဆေးဝါးများ လိုအပ်လျက်ရှိနေသေးကြောင်း စေတနာအခမဲ့ ဆေးကုခန်းတာဝန်ခံ ဦးထွန်းကြည်က ပြောကြားသည်။

“ဆရာကြီး ဦးဝင်းတင်ရှိတုန်းကတော့ အလှူရှင်တွေများတယ်။ သူမရှိတဲ့နောက်ပိုင်းတော့ နည်းလာတယ်။ အခုဆိုရင် ဆေးခန်းပြလူနာကများပြီး အလှူရှင်တွေ နည်းလာတော့ ဆေးဝါးလိုအပ်ချက်တွေ ရှိလာတယ်။ အဲဒီလိုအချိန်မှာ ဒလမြို့နယ်က အလှူရှင်တစ်ဦးပေါ်လာလို့ ၀မ်းသာပါတယ်။ နောက်ထပ်လည်း အလှူရှင်တွေ များများလာဖို့ မျှော်လင့်နေပါတယ်” ဟု စေတနာအခမဲ့ဆေး ကုခန်းတာဝန်ခံ ဦးထွန်းကြည်က ဆိုသည်။

လက်ရှိအစိုးရအနေဖြင့် နိုင်ငံရေးအကျဉ်းသားဟောင်းများနှင့် မိသားစုဝင်များကို ပြန်လည်ကုစားရေးအစီအစဉ်များ ပြုလုပ်ပြီး လူမှုရေး စီးပွားရေးတိုးတက်ကောင်းမွန်စေရန် ပြုလုပ်ပေးသင့်ကြောင်း၊ သို့မှသာ နိုင်ငံရေးကို စိတ်ဝင်စားသော နိုင်ငံရေးမျိုး ဆက်သစ်များ ထွက်ပေါ်လာမည်ဖြစ်ကြောင်း ဦးထွန်းကြည်က ဆက်လက်ပြောကြားသည်။

ဟံသာဝတီ ဦးဝင်းတင်ဖောင်ဒေးရှင်းသည် ၂၀၁၂ ခုနှစ် မတ် ၁၂ရက်မှစတင်ကာ လက်ရှိအထိ ဖမ်းဆီးခံနိုင်ငံရေးအကျဉ်းသား ၁၆၈ ဦး၊ နိုင်ငံရေးအကျဉ်းသားဟောင်းနှင့် ဘ၀တူ စာနယ်ဇင်းသမား ၆၇၈ ဦးတို့အား ထောက်ပံ့ငွေကျပ် ၂၀၃၁ သိန်း ထောက်ပံ့ပေးအပ်ခဲ့ပြီးဖြစ်ကြောင်း သိရသည်။

ထို့ပြင် ဖောင်ဒေးရှင်းသည် နိုင်ငံရေး အကျဉ်းသားဟောင်းမိသားစုများအတွက် ပညာရေးထောက်ပံ့မှု ကျန်းမာရေးစောင့်ရှောက်မှုနှင့် အလုပ်အကိုင်ရှာဖွေပေးရေး လုပ်ငန်းစဉ်များကိုလည်း ပြည်တွင်းအလှူရှင်များနှင့် ပေါင်းကူးဆက်စပ်ကာ ကူညီဆောင်ရွက်ပေးလျက်ရှိကြောင်း ဖောင်ဒေးရှင်း၏ ထုတ်ပြန်ထားချက်များအရ သိရသည်။

 

October 12, 2018














Copy Protected by Chetan's WP-Copyprotect.