ဦးကိုနီ လုပ်ကြံခံရမှုနှင့် ပတ်သက်၍ ရာဇသတ်ကြီးဥပဒေပုဒ်မ ၂၁၂ (ပြစ်မှုကျူးလွန်သူကို လက်သင့်ခံခြင်း) ဖြင့် စွဲချက်တင်ခံထားရသည့် အောင်ဝင်းထွန်းကို စက်တင်ဘာ ၁၃ ရက်တွင် ရန်ကုန်မြောက်ပိုင်းခရိုင် တရားရုံး ခရိုင်တရားသူကြီး တရားခွင်၌ ရုံးချိန်းခေါ်ယူ စစ်ဆေးခဲ့သည်။

စစ်ဆေးရာတွင် တရားလိုနှင့် တရားပြိုင် ရှေ့နေများ၏ မေးမြန်းမှုကို အောင်ဝင်းထွန်းက ပြန်လည် ဖြေကြားခဲ့သည်။

ထိုသို့မေးမြန်းမှုများထဲတွင် တရားလိုဘက်မှ ဥပဒေအရာရှိက “ကြည်လင်းနေထိုင်သည့် စိုင်လျားရွာရှိ ကြည်လင်း၏စာအုပ်ထဲမှ အောင်ဝင်းထွန်းနှင့် အောင်ဝင်းထွန်း၏ဇနီး နာမည်၊ အောင်ဝင်းဇော်နာမည် စသည့် နာမည်များဖြင့် ဖုန်းနံပါတ်များ မှတ်သားထားသည်ကို သိပါသလား” ဟု အောင်ဝင်းထွန်းအား မေးမြန်းရာ အောင်ဝင်းထွန်းက မသိပါ။ ၎င်းနာမည်ဖြင့် ရေးမှတ်ထားသော ဖုန်းနံပါတ်မှာ လွန်ခဲ့သည့် ငါးနှစ်ခန့်က ကိုင်ခဲ့သည့် ဖုန်းနံပါတ်ဖြစ်ကြောင်း ပြန်လည်ဖြေကြားခဲ့သည်။

ထို့ပြင် အောင်ဝင်းထွန်းက ၎င်းသည် ၂၀၁၇ ခုနှစ် ဇန်နဝါရီ ၂၉ ရက် (ဦးကိုနီ လုပ်ကြံခံရသည့်နေ့) က ညီဖြစ်သူ အောင်ဝင်းခိုင်၊ အောင်ဝင်းဇော်တို့နှင့် အဆက်အသွယ် မရှိခဲ့ကြောင်း၊ ယင်းနေ့မတိုင်မီ အောင်ဝင်းခိုင်၊ အောင်ဝင်းဇော်တို့နှင့် အဆက်အသွယ် မရှိခဲ့သည်မှာ လနှင့်ချီရှိကြောင်း၊ ယင်းနေ့တွင် အောင်ဝင်းခိုင်၊ အောင်ဝင်းဇော်တို့ မည်သည့်နေရာသွား၍ မည်သည်တို့ဆောင်ရွက်သည်ကို ၎င်းမသိရှိကြောင်း၊ ယခုအမှုတွင် အောင်ဝင်းဇော် မည်သို့ ပတ်သက်သည်ကိုလည်း မသိရှိကြောင်း၊ အောင်ဝင်းဇော်နှင့် ကြည်လင်းတို့ မုံရွာတွင် ဖြစ်ပွားခဲ့သည့် ကိစ္စများကိုလည်း ၎င်းမသိရှိကြောင်း၊ အောင်ဝင်းဇော် မန္တလေး အိုးဘိုထောင်တွင်ရှိစဉ်က ထောင်ဝင်စာ သွားတွေ့သော်လည်း ၎င်းတစ်ယောက်တည်း မဟုတ်ဘဲ မိခင်ဖြစ်သူနှင့်အတူ သွားခဲ့ခြင်းဖြစ်ကြောင်း၊ ထိုစဉ်က ကြည်လင်းကို တွေ့ဆုံခဲ့ခြင်း မရှိကြောင်း တရားခွင်တွင် ထွက်ဆိုခဲ့သည်။

ဦးကိုနီလုပ်ကြံခံရပြီး နောက်တစ်ရက်တွင် အောင်ဝင်းထွန်းနှင့် အောင်ဝင်းဇော်တို့ ကရင်ပြည်နယ်သို့ သွားရာ၌ အောင်ဝင်းဇော်က ရန်ကုန်မှ ဘီးလင်းအထိ မောင်းခဲ့ပြီး ဘီလင်းမှ ဘားအံ သံလွင်တံတားတွင် ရဲများ ထိန်းသိမ်းခံရသည်အထိ အောင်ဝင်းထွန်းက မောင်းခဲ့ကြောင်း၊ အောင်ဝင်းထွန်းက အဖော်ခေါ်၍ အောင်ဝင်းဇော်က လိုက်ခဲ့ခြင်းဖြစ်ကြောင်း ၎င်းတို့၏ရှေ့နေ ဦးအောင်ခိုင်က ပြောကြားခဲ့သည်။

အလားတူ ထိုကိစ္စနှင့်ပတ်သက်၍ တရားလိုဘက်မှ ဥပဒေအရာရှိက “သဘာဝယုတ္တိအားဖြင့် အိပ်ငိုက်တတ်သူမှာ ညဦးပိုင်းမောင်းနှင်ရမည်ဖြစ်ပြီး မအိပ်ငိုက်တတ်သူက ညဉ့်နက်ပိုင်း မောင်းနှင်ရမည် မဟုတ်လား” ဟု မေးမြန်းရာ အောင်ဝင်းထွန်းက ၎င်းသည် မော်တင်စွန်းမှ ပုသိမ်သို့ တောင်တက်လမ်းများအတိုင်း မောင်းနှင်ခဲ့ရပြီး ရန်ကုန်ရောက်သည့် အခါတွင်လည်း တောက်လျှောက် အလုပ်လုပ်နေရသဖြင့် ပင်ပန်း၍ အောင်ဝင်းဇော်ကို မောင်းခိုင်းခြင်းဖြစ်ကြောင်း ပြန်လည်ဖြေကြားသည်။

ထို့ပြင် အောင်ဝင်းထွန်းက ၎င်းတွင် ညီအစ်ကိုမောင်နှမ ခြောက်ယောက်ရှိကြောင်း၊ ယင်းတို့ထဲမှ ယောက်ျားလေးများတွင် ‘ဝင်း’ ဆိုသည့်နာမည်ပါကြောင်း၊ ရန်ကုန်မြို့ ဘားလမ်းတွင် ၎င်းလျှပ်စစ်ပစ္စည်းဆိုင်ဖွင့်စဉ်က ထိုနာမည်ကိုယူ၍ ‘ဝင်းမိသားစု’ ဆိုင်ဟု နာမည်ပေးခဲ့ကြောင်း၊ ဆိုင်မှာ ၎င်းနှင့် ၎င်းမိန်းမ ပိုင်ဆိုင်ကြောင်း ပြန်လည်ဖြေကြားခဲ့သည်။

အောင်ဝင်းထွန်းမှာ ယခုအမှုတွင် ရာဇသတ်ကြီးဥပဒေပုဒ်မ ၂၁၂ (ပြစ်မှုကျူးလွန်သူကို လက်သင့်ခံခြင်း) ဖြင့် စွဲချက်တင်ခံခဲ့ရပြီး ယခုနှစ် ဖေဖော်ဝါရီ ၁၆ ရက်တွင် တရားရုံးသို့ အာမခံလျှောက်ထားရာ ဖေဖော်ဝါရီ ၂၂ ရက်တွင် ကျပ်သိန်း ၅၀၀ တန် အာမခံဖြင့် အာမခံရရှိပြီး လက်ရှိတွင် အာမခံဖြင့် အမှုရင်ဆိုင်လျက်ရှိသည်။