မိမိရုံးဝန်ထမ်းတစ်ဦးအား ရိုင်းပျစွာ ဆဲဆိုကြိမ်းမောင်းခဲ့သည့် ရှမ်းပြည်နယ် ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ် လူဝင်မှုကြီးကြပ်ရေးနှင့် အမျိုးသား မှတ်ပုံတင်ရေးဦးစီးဌာနဦးစီးမှူးကို အရေးယူ ဆောင်ရွက်နိုင်ရန်အတွက် စုံစမ်းစစ်ဆေးရေးအဖွဲ့ဖြင့် စစ်ဆေးလျက်ရှိကြောင်း ရှမ်းပြည်နယ် လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာရုံးမှ စက်တင်ဘာ ၁၂ ရက်တွင် သတင်းရရှိသည်။
အဆိုပါ ပင်းတယမြို့နယ် လဝကဦးစီးမှူးကို ယခုအခါ တောင်ကြီးခရိုင်ရုံးသို့ ခေါ်ဆောင်ထားပြီး ပင်းတယတွင် ဆက်လက်နေထိုင်ပါက တိုင်းရင်းသားဒေသတွင် ပြဿနာများ ဆက်လက်ဖြစ်ပွားမည်ကို စိုးရိမ်သဖြင့် ခရိုင်ရုံးတွင် ဦးစီးအရာရှိအဖြစ် တာဝန်ပေးထားရခြင်းဖြစ်ကြောင်း တောင်ကြီးခရိုင်မှူးက ပြောကြားသည်။
နောက်နှစ်ရက်အကြာတွင် စစ်ဆေးချက်၊ စုံစမ်းစစ်ဆေးရေးခုံရုံးအဖွဲ့၏ တွေ့ရှိချက်၊ သုံးသပ်ချက်များနှင့်အတူ ပြည်ထောင်စုအဆင့်သို့ တင်ပြပေးသွားမည်ဖြစ်ကာ ညွှန်ကြားချက်ကိုလည်း ပြည်ထောင်စုအဆင့်မှ ချမှတ်ညွှန်ကြားချက်အတိုင်း လိုက်နာ ဆောင်ရွက်ရခြင်းဖြစ်ကြောင်း သိရသည်။
“နောက်နှစ်ရက်လောက်နေရင် အဖြေရလဒ်ကို သိရပါလိမ့်မယ်။ အခုတော့ အကြမ်းဖျင်းအနေနဲ့ ကနဦး စစ်ဆေးထားပါတယ်။ ဒီဦးစီးမှူးကို သေသေချာချာ စုံစုံလင်လင် သိရအောင် စုံခုံအဖွဲ့နဲ့ စစ်ဆေးနေပါတယ်။ အဲဒီ စစ်ဆေးမှု ရလဒ်ပေါ်မူတည်ပြီး အရေးယူ ဆောင်ရွက်သွားမှာ ဖြစ်ပါတယ်။ စုံခုံစစ်နေတဲ့ အချိန်အတွင်းမှာ တောင်ကြီးခရိုင်ရုံးမှာ တွဲဖက်အနေနဲ့ တာဝန်ပေးထားမယ်” ဟု ရှမ်းပြည်နယ် လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာရုံးမှ တာဝန်ရှိသူက ဆိုသည်။
ပင်းတယမြို့နယ် လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေးဦးစီးဌာန ဦးစီးမှူးက ရုံးဝန်ထမ်းတစ်ဦးအား ရိုင်းပျစွာ အော်ဟစ်ဆဲဆို ကြိမ်းမောင်းနေသည့် ရုပ်သံဖိုင်နှင့်အတူ ပင်းတယမြို့နယ်ဦးစီးမှူးနှင့် မူကြိုကျောင်းဆရာမတစ်ဦးတို့၏ ခိုးယူပေါင်းသင်းနေမှုကို ရပ်ကွက်နေပြည်သူများက ဝိုင်းဝန်း ဖမ်းဆီးပြီးနောက် ရပ်ကွက်အုပ်ချုပ်ရေးမှူးသို့ တိုင်ကြားခဲ့သဖြင့် ဝန်ခံကတိပြု လက်မှတ်ရေးထိုးစေခဲ့သော်လည်း ထပ်မံပြုမူနေမှုအပေါ် လိုအပ်သလို ကြီးကြပ်ကွပ်ကဲပေးရန် ပင်းတယမြို့ ဆင်ခေါင်းရပ်ကွက်အုပ်ချုပ်ရေးမှူးက ပင်းတယမြို့နယ်အုပ်ချုပ်ရေးမှူးသို့ သြဂုတ် ၁ ရက်တွင် တင်ပြခဲ့သည့်စာမှာလည်း လူမှုကွန်ရက်တွင် ပျံ့နှံ့နေခဲ့ခြင်းဖြစ်သည်။
