ထောင်ဒဏ် ခုနစ်နှစ်နှင့်အထက် ချမှတ်အရေးယူနိုင်မည့် တံတားကြီးများ ဥပဒေကြမ်း အမျိုးသားလွှတ်တော် အတည်ပြု

ထောင်ဒဏ် ခုနစ်နှစ်နှင့်အထက် ချမှတ်အရေးယူနိုင်မည့် တံတားကြီးများ ဥပဒေကြမ်း အမျိုးသားလွှတ်တော် အတည်ပြု
Published 13 September 2018

ထောင်ဒဏ် ခုနစ်နှစ်နှင့်အထက် ချမှတ်အရေးယူနိုင်မည့် တံတားကြီးများ ဥပဒေကြမ်းအား အမျိုးသားလွှတ်တော်တွင် အတည်ပြုခဲ့ကြောင်း သတင်းရရှိသည်။

နေပြည်တော်၌ စက်တင်ဘာ ၁၂ ရက်က ပြုလုပ်သည့် အမျိုးသားလွှတ်တော်အစည်းအဝေးတွင် ယင်းဥပဒေကြမ်းနှင့်ပတ်သက်၍ ဥပဒေကြမ်းကော်မတီမှ အစီရင်ခံစာ တင်သွင်းပြီးနောက် ဥပဒေကြမ်းတစ်ခုလုံးအား တစ်ပိုဒ်ချင်းစီအလိုက် ဆွေးနွေး အတည်ပြုခဲ့ခြင်း ဖြစ်သည်။

အမျိုးသားလွှတ်တော် ဥပဒေကြမ်း ကော်မတီက အပိုဒ်(၂)၊ အပိုဒ်ခွဲ (တ) တွင် တံတားကြီးနယ်နိမိတ်ဆိုသည်မှာ တံတားကြီး အသစ်တည်ဆောက်ခြင်းနှင့် ထိန်းသိမ်းရေးလုပ်ငန်းများ ဆောင်ရွက်ရန် ဝန်ကြီးဌာနမှ လုပ်ထုံးလုပ်နည်းများနှင့်အညီ အများပြည်သူ သိသာမြင်သာသည့်နေရာတွင် ထင်ရှားသည့် အမှတ်အသား တစ်ခုခု စိုက်ထူ၍ သတ်မှတ်ထားသည့် ကုန်းနယ်နိမိတ်နှင့် ရေနယ်နိမိတ် အပိုင်းအခြားတို့ကိုဆိုသည့် စကားရပ်ဖြင့်လည်းကောင်း၊ အပိုဒ်(၆)၊ အပိုဒ်ခွဲ(င)တွင် တံတားကြီးနယ်နိမိတ်ကို အများပြည်သူ သိသာမြင်သာသောနေရာတွင် အမှတ်အသား တစ်ခုခုဖြင့် အခိုင်အမာ စိုက်ထူခြင်းဆိုသည့် စကားရပ်ဖြင့် အစားထိုးသင့်ကြောင်း ဥပဒေကြမ်းကော်မတီက ပြင်ဆင်ခဲ့ပြီး ယင်းပြင်ဆင်ချက်များအား အမျိုးသားလွှတ်တော်က အတည်ပြုခဲ့သည်။

သဘာဝဘေးအန္တရာယ်နှင့် လူပုဂ္ဂိုလ်တို့၏ ဖျက်ဆီးမှုများမှအပဖြစ်သည့် တံတားကြီး၏ အရည်အသွေး၊ စံချိန်စံညွှန်းလျော့နည်း၍ တည်ဆောက်ခြင်း၊ ပြုပြင်ခြင်း၊ အရည်အသွေး စစ်ဆေးရာတွင် သိလျက်နှင့် တမင်ထိမ်ချန် ဆောင်ရွက်ခြင်း မပြုလုပ်ရဆိုသည့် အချက်များပါဝင်သည့် တံတားကြီးများ ဥပဒေကြမ်းအား အမျိုးသားလွှတ်တော်သို့ ဆောက်လုပ်ရေးဝန်ကြီးဌာန ဒုတိယဝန်ကြီး ဦးကျော်လင်းက သြဂုတ် ၂၁ ရက်က ပြုလုပ်သည့် အမျိုးသားလွှတ်တော်တွင် တင်သွင်းခဲ့ခြင်းဖြစ်သည်။

တံတားကြီးများ ဥပဒေကြမ်း၏ အခန်း (၇) တားမြစ်ချက်များ အခန်းပုဒ်မ (၁၀) တွင် တံတားကြီးများ အဆင့်မြှင့်တင်တည်ဆောက်ခြင်း၊ တိုးချဲ့တည်ဆောက်ခြင်း၊ ထိန်းသိမ်းခြင်း၊ ပြုပြင်ခြင်း စသည့်လုပ်ငန်းဆောင်ရွက်နေသော တံတားကြီးများပေါ်တွင် မည်သည့် မော်တော်ယာဉ်၊ စက်ယန္တရား၊ ရထား သို့မဟုတ် အနှေးယာဉ်မျှ ခွင့်ပြုချက်မရှိဘဲ ရပ်နားခြင်း သို့မဟုတ် ရပ်ဆိုင်းခြင်းမပြုရ။ ပုဒ်မ-၁၁ (က) တံတားကြီးအင်္ဂါရပ်ကို ရည်ရွယ်ချက်ဖြင့် တမင်ဖျက်ဆီးခြင်း၊ ပျက်စီးစေခြင်း၊ ပေါ့လျော့မှုကြောင့် ပျက်စီးစေခြင်း၊ တံတားရေရှည် တည်တံ့ခိုင်မြဲမှုကို ထိခိုက်စေမည့် အပြုအမူများ ပြုလုပ်ခြင်း။ (ခ) သဘာဝဘေးအန္တရာယ်နှင့် လူပုဂ္ဂိုလ်တို့၏ ဖျက်ဆီးမှုများမှအပ ဖြစ်သည့် တံတားကြီး၏ အရည်အသွေး၊ စံချိန်စံညွှန်း လျော့နည်း၍ တည်ဆောက်ခြင်း၊ ပြုပြင်ခြင်း၊ အရည်အသွေးစစ်ဆေးရာတွင် သိလျက်နှင့် တမင်ထိမ်ချန် ဆောင်ရွက်ခြင်းဟု အမျိုးသားလွှတ်တော် ဥပဒေကြမ်းကော်မတီက ပြင်ဆင်ထားချက်အတိုင်း အတည်ပြုခဲ့သည်။

ဥပဒေကြမ်း၏ ပြစ်မှုပြစ်ဒဏ်အခန်း ပုဒ်မ ၁၄ (က) ပုဒ်မ-၁၁၊ ပုဒ်မခွဲ (က၊ ခ) ပါ တားမြစ်ချက် တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို ခုနစ်နှစ်နှင့်အထက် ထောင်ဒဏ် ချမှတ်ရမည့်အပြင် တံတားကြီးဆိုင်ရာ ပျက်စီးဆုံးရှုံးမှုတန်ဖိုး၏ နှစ်ဆကို ပေးလျော်စေရမည်။ ထို့ပြင် ပုဒ်မ-၁၁ ပုဒ်မခွဲ (ဂ၊ ဃ၊ ဇ၊ ဈ၊ ဌ) တို့ပါ တားမြစ်ချက်တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် ထိုသူကို သုံးနှစ်ထက်မပိုသောထောင်ဒဏ်ဖြစ်စေ၊ အနည်းဆုံးကျပ်ငါးသိန်းမှ အများဆုံး ကျပ်သိန်း ၅၀ အထိ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည့်အပြင် တံတားကြီးဆိုင်ရာ ပျက်စီးဆုံးရှုံးမှု တန်ဖိုး၏နှစ်ဆကို ပေးလျော်စေရမည်ဟု ဥပဒေကြမ်း ကော်မတီ၏ ပြင်ဆင်ချက်အတိုင်း အတည်ပြုခဲ့သည်။

တံတားကြီးများ ဥပဒေကြမ်းပြဋ္ဌာန်းရခြင်း၏ ရည်ရွယ်ချက်များအနေဖြင့် တံတားကြီးအသစ်တည်ဆောက်ခြင်း၊ အဆင့်မြှင့်တင် တည်ဆောက်ခြင်း၊ တိုးချဲ့တည်ဆောက်ခြင်း၊ တံတားကြီး ကြံ့ခိုင်မှုကို စစ်ဆေးခြင်း၊ ထိန်းသိမ်းခြင်း၊ ပြုပြင်ခြင်း၊ ဖျက်သိမ်းခြင်း၊ လူပုဂ္ဂိုလ်၊ မော်တော်ယာဉ်နှင့် ရထား စသည်တို့၏ တံတားပေါ် အသုံးပြုမှုအပေါ် စီမံခန့်ခွဲခြင်း၊ ကြီးကြပ်ကွပ်ကဲခြင်း၊ တံတားအသုံးပြုခ ကောက်ခံခြင်းတို့ကို စနစ်တကျ ဆောင်ရွက်နိုင်ရန် စသည့် အချက်များကိုလည်း ဥပဒေကြမ်းကော်မတီ၏ ပြင်ဆင်ချက်အတိုင်း အတည်ပြုခဲ့သည်။

ဥပဒေကြမ်း၏ အခန်း ၃ ဝန်ကြီးဌာန၏ လုပ်ငန်းတာဝန်နှင့် လုပ်ပိုင်ခွင့်များအခန်းတွင် တံတားကြီး အသစ်တည်ဆောက်ခြင်း၊ အဆင့်မြှင့်တင် တည်ဆောက်ခြင်း၊ တိုးချဲ့တည်ဆောက်ခြင်း၊ တံတားကြီးကြံ့ခိုင်မှုကို စစ်ဆေးခြင်း၊ တည်ဆောက်ပြီး တံတားများပြုပြင်ခြင်း၊ ထိန်းသိမ်းခြင်း၊ ဖျက်သိမ်းခြင်းတို့အတွက် နှစ်တို၊ နှစ်ရှည်စီမံကိန်းများနှင့် အထူးစီမံကိန်းများ ရင်းနှီးမြှုပ်နှံမှု စီမံကိန်းများကို အစိုးရအဖွဲ့၏ သဘောတူညီချက်ဖြင့် ချမှတ် ဆောင်ရွက်ခြင်းဟု ဥပဒေကြမ်းကော်မတီ၏ ပြင်ဆင်ချက်အတိုင်း အတည်ပြုခဲ့သည်။

Most Read

Most Recent