မြန်မာနိုင်ငံရှိ ရေလှောင်တမံများအနက် ပေါင်းလောင်း၊ ဖြူးနှင့် ရဲနွယ် ရေလှောင်တမံတို့တွင် ရေပိုလွဲှမှ သုံးပေကျော်အထိ ရေကျော်နေပြီး အခြားရေလှောင်တမံ ၄၅ ခုတွင်လည်း ရေကျော်နေကြောင်း စက်တင်ဘာ ၁၂ ရက်စွဲဖြင့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ထုတ်ပြန်ထားသည်။
ပေါင်းလောင်း ရေလှောင်တမံတွင် ရေလှောင်ပမာဏ ပေ ၅၆၀၀၀ ကျော်ရှိပြီး ရေပိုလွှဲမှ ၃ ဒသမ ၆၀ ပေအထိ ရေကျော်နေခြင်း ဖြစ်ကြောင်း၊ ဖြူးရေလှောင်တမံတွင် ရေလှောင်ပမာဏ ပေ ၆၉၀၀၀၀ ရှိပြီး ရေပိုလွှဲမှ ရေ ၃ ဒသမ ၈၀ ပေအထိ ရေကျော်နေခြင်း ဖြစ်ကြောင်း၊ ရဲနွယ်ရေလှောင်တမံတွင် ရေလှောင်ပမာဏ ပေတစ်သိန်းနီးပါး အထိရှိပြီး ရေပိုလွှဲမှ ၃ ဒသမ ၄၅ ပေအထိ ရေကျော်နေခြင်းဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ထုတ်ပြန်ထားသည်။
အခြားသော ရေလှောင်တမံများတွင် အနိမ့်ဆုံး တစ်ပေနီးပါးနှင့် အမြင့်ဆုံးသုံးပေနီးပါးအထိ ရေကျော်နေကြောင်း သိရသည်။
၂၀၁၈ ခုနှစ် သြဂုတ် ၃၀ ရက်စွဲဖြင့် ထုတ်ပြန်ထားချက်တွင်မူ ပဲခူးတိုင်းဒေသကြီး အတွင်းရှိ ရဲနွယ်ရေလှောင်တမံတွင် ရေပိုလွှဲမှ ၅ ဒသမ ၅၀ ပေအထိလည်းကောင်း၊ ဖြူးချောင်းရေလှောင်တမံမှ ၄ ဒသမ ၈၀ ပေ အထိလည်းကောင်း အသီးသီး ရေကျော်နေခဲ့သည်။
ရေပိုလွှဲမှ ရေကျော်နေသည့် ဆည်ကန် ၅၈ ခုအနက် ရဲနွယ်ရေလှောင်တမံမှာ ငါးပေကျော်သည်အထိ အမြင့်ဆုံး ရေကျော်နေခြင်းဖြစ်ကြောင်း သိရသည်။
