ဥရောပဘောလုံးအဖွဲ့ချုပ်(UEFA)သည် တတိယမြောက် ဥရောပကလပ်အသင်းပြိုင်ပွဲကို ကျင်းပသွားမည်ဖြစ်ကြောင်း ဥရောပကလပ်အဖွဲ့အစည်း (ECA) ဥက္ကဋ္ဌဖြစ်သူ အန်ဒရီယာအဂ္ဂါနယ်လီက အတည်ပြုပြောကြားခဲ့သည်။
စက်တင်ဘာ (၁၁)ရက်က ခရိုအေးရှားနိုင်ငံ၊ စပလစ်မြို့၌ ကျင်းပခဲ့သည့် ECA အထွေထွေအစည်းအဝေးတွင် UEFA ၏ ကလပ်အသင်း ပြိုင်ပွဲကော်မတီဝင်နှင့် ဂျူဗင်တပ်စ်အသင်း၏ ဥက္ကဋ္ဌလည်းဖြစ်သူ အဂ္ဂါနယ်လီက ၂၀၂၁-၂၂ ရာသီမှစတင်ပြီး တတိယမြောက် ကလပ်အသင်းပြိုင်ပွဲကို ကျင်းပသွားရန် ခွင့်ပြုချက်ရရှိပြီး ဖြစ်ကြောင်း ဖွင့်ဟခဲ့သည်။
အဂ္ဂါနယ်လီက "၂၀၂၁-၂၂ ဘောလုံးရာသီက စတင်ပြီး ဥရောပကလပ်အသင်းပြိုင်ပွဲတွေမှာ တတိယမြောက်ပြိုင်ပွဲတစ်ခုကို ထည့်သွင်းကျင်းပဖို့ ECA အထွေထွေအစည်းအဝေးမှာ ကျွန်တော်တို့ သဘောတူညီမှုရရှိခဲ့ပါတယ်။ လာမယ့် ၂၀၂၁-၂၂ ဘောလုံးရာသီကစပြီး ဥရောပကလပ်အသင်းပြိုင်ပွဲ (၃)ခုမှာ အသင်းပေါင်း (၉၆)သင်း ပါဝင်ယှဉ်ပြိုင်သွားမှာပါ"ဟု ပြောကြားခဲ့သည်။
ယင်းမှာ UEFA ၏ Cup Winners' Cup ပြိုင်ပွဲကို ဖျက်သိမ်းပြီး ဆယ်စုနှစ်(၂)ခုအကြာတွင် ပြိုင်ပွဲအသစ်ကို ဖန်တီးခဲ့ခြင်းလည်းဖြစ်သည်။ Cup Winners' Cup ပြိုင်ပွဲကို ၁၉၉၉ ခုနှစ် ဖျက်သိမ်းခဲ့ခြင်းဖြစ်ပြီး ယခုကျင်းပမည့် ပြိုင်ပွဲမှာ မည်သို့မည်ပုံကျင်းပမည်ဆိုသည့် အသေးစိတ်အချက်အလက်များကို မသိရှိရသေးပေ။
UEFA ၏ကလပ် အသင်းပြိုင်ပွဲ သုံးပွဲကို အသင်းပေါင်း (၉၆)သင်းဖြင့် ကျင်းပသွားမည်ဖြစ်ပြီး ချန်ပီယံလိဂ်တွင် (၃၂)သင်း၊ ယူရိုပါလိဂ်တွင် (၃၂)သင်း၊ ပြိုင်ပွဲသစ်တွင် (၃၂)သင်းဖြင့်
ပြုလုပ်သွားရန်ရှိကာ ယူရိုပါလိဂ်အုပ်စုအဆင့်တွင် လက်ရှိယှဉ်ပြိုင်နေသည့် (၄၈)သင်းမှ (၃၂)သင်းသို့ လျှော့ချရဖွယ်ရှိနေသည်။