တရုတ်ဝယ်လိုအား မြင့်တက်မှုကြောင့် မြန်မာနိုင်ငံ ဝါစိုက်ပျိုးမှု မြင့်တက်လာပြီး တောင်သူများ ဈေးကောင်းရနေ

တရုတ်ဝယ်လိုအား မြင့်တက်မှုကြောင့် မြန်မာနိုင်ငံ ဝါစိုက်ပျိုးမှု မြင့်တက်လာပြီး တောင်သူများ ဈေးကောင်းရနေ
Published 12 September 2018

မန္တလေးတိုင်းဒေသကြီးရှိ ဝါစိုက်ခင်းတစ်ခုကို တွေ့ရစဉ်

တရုတ်နိုင်ငံ၏ ဝါဝယ်လိုအားသည့် ယခင်နှစ်များထက် ဝယ်ယူမြင့်တက်လာမှုကြောင့် မြန်မာနိုင်ငံ ဝါစိုက်ပျိုးမှု မြင့်တက်လာပြီး တောင်သူများ ဈေးကောင်းရနေသည်ဟု စက်မှုသီးနှံ စိုက်ပျိုးပညာပေးရေးမှ ဒုတိယ ညွှန်ကြားရေးမှူးချုပ် ဦးဇော်ထွန်းမြင့်က ပြောကြားသည်။

“ကျွန်တော်တို့ နိုင်ငံအနေအထား ကြည့်ရင် လက်ရှိဝါစိုက်ပျိုးထုတ်လုပ်မှုက အများကြီး တိုးတက်လာတာကို တွေ့ရပါ တယ်။ ဝါဈေးနှုန်းက တစ်ပိဿာကို အရင်ဆို ကျပ် ၁၁၀၀၊ ၁၂၀၀ လောက်ကနေအခုဆိုရင် ၁၅၀၀ ကျော်ထိကို ရောက်သွားတဲ့ အနေအ ထားဖြစ်ပါတယ်။ ဒါကလည်း တရုတ်နိုင်ငံရဲ့ ဝယ်လိုအားမြင့်တက်လာမှု ဖြစ်ပါတယ်။ ရေရှည်မှာလည်း ဝယ်မယ့်အနေအထားရှိပါ တယ်။ ဒါကြောင့် ဝါစိုက်မယ်ဆိုရင် အင်မတန် တွက်ခြေကိုက်တဲ့ သီးနှံဖြစ်လာပြီ ဖြစ်တဲ့အတွက် စိုက်ရေး၊ ပျိုးရေးတစ်ခုတည်းတင် လုပ်နေမှာ မဟုတ်ဘဲ အထွက်နှုန်းတိုးတာတွေ၊ ဖြန့်ဖြူးရောင်းချတာတွေ ကုန်ချော ထုတ်တာတွေထိလုပ်ဖို့ လိုအပ်ပါတယ်။ လက်ရှိမှာလည်း ကျွန်တော်တို့နိုင်ငံက ချည်ခင်တွေက နိုင်ငံခြားကနေ တင်သွင်းနေရတာပါ။ နောက်ဆုံး အပ်ချည်လုံးကအစ နိုင်ငံခြားက ဝယ်သုံးနေရတယ်။ ပြည်ပကိုထွက်တဲ့ငွေတွေ လျော့နည်းအောင် ဆိုရင်တော့ ကျွန်တော်တို့နိုင်ငံမှာ ကုန်ချောထုတ်တဲ့ စက်ရုံတွေ တည်ထောင်ဖို့ လိုအပ်ပါတယ်။ စပ လိုင်းချိန်းတစ်ခုလုံးကို ဖွံ့ဖြိုးတိုးတက်အောင် လုပ်မယ်ဆိုရင် ကျွန်တော်တို့ဆီမှာရှိတဲ့ ဝါစိုက်တောင်သူတွေရော၊ ဝါလုပ်ငန်းနဲ့ ဆက်နွှယ်ပတ်သက် လုပ်ကိုင်နေတဲ့ လုပ်ငန်းရှင်တွေအားလုံး အဆင်ပြေမှာ ဖြစ်ပါတယ်” ဟု ဦးဇော်ထွန်းမြင့်က ပြောကြားသည်။

လက်ရှိတွင် ပြည်ပမှချည်ခင်များအပြင် အပ်ချည်လုံးကအစ ဝယ်ယူသုံးစွဲနေရကြောင်း ပြည်ပထွက်ငွေ လျော့နည်းအောင် ပြုလုပ်မည်ဆိုပါက မြန်မာနိုင်ငံမှ ထွက်ရှိသည့် ကုန်ကြမ်းများအတွက် ကုန်ချောထုတ်စက်ရုံများ တည်ထောင်ရန် လိုအပ်ကြောင်း၊ ထုတ်လုပ်မှု တိုးတက်လာပြီး ကုန်ချောထုတ်လုပ်မှု အပိုင်းကို မဖြစ်မနေ တိုးမြှင့်ပေးရန် လိုအပ်လာသည့်အတွက် စိုက်ပျိုးသည့်တောင်သူ များကုန်သည်များ၊ စက်မှုလုပ်ငန်းရှင်များ ပူးပေါင်းကာ ကဏ္ဍကြီးတစ်ခုလုံး ဖွံ့ဖြိုးတိုးတက်အောင် ဆောင်ရွက်ရမည်ဖြစ်ကြောင်း၊ မန္တလေးတိုင်း ဒေသကြီးအတွင်း ၂၀၁၇-၂၀၁၈ ဘဏ္ဍာနှစ်တွင် ဝါမျိုးစုံ ၁၈၁၉၇၉ ဧက စိုက်ပျိုးနိုင်ခဲ့သော်လည်း လျာထားချက်ကို အကောင်အထည်ဖော်နိုင်မှု အနေဖြင့် ၇၀ ဒသမ ၁၈ ရာခိုင်နှုန်း ဆောင်ရွက်နိုင်ခဲ့ပြီး ၎င်းစိုက်ဧကအနက် ချည်မျှင်ရှည်ဝါ စိုက်ဧက ၁၅၉၉၃၁ ဧက ပါဝင်ကြောင်း သိရသည်။

ငွေချည် -၆ ချည်မျှင်ရှည်ဝါမျိုးသည် တစ်ဧကလျှင် ပိဿာ ၁၀၀၀ ထိနှင့် ရွှေ တောင် - ၈ နှင့် ငွေချည်- ၉ ချည်မျှင်ရှည်ဝါ မျိုးသစ်သည် တစ်ဧကလျှင် ပိဿာတစ်ထောင်ကျော် ထွက်ရှိနိုင်သည့်အပြင် အခြားသော နှစ်လိုဖွယ်ရာ အရည်အချင်းများနှင့် ပြည့်စုံသော ဝါမျိုးဖြစ်ကြောင်း၊ စိုက်ပျိုးရာ တွင် တစ်ဧကတွင် ကုန်ကျစရိတ် အနေဖြင့် စုစုပေါင်းကုန်ကျစရိတ်မှ ငွေချည် -၆ ချည် မျှင်ရှည်ဝါမျိုး၌ တစ်ဧကလျှင် ငွေကျပ်သုံးသိန်းကျော် ဖြစ်ပြီး ဝင်ငွေအနေဖြင့် ၁၀ သိန်း ရရှိပြီးဖြစ်ကာ တစ်ဧကအသားတင်အမြတ် ငွေမှာ ကျပ် ခြောက်သိန်းကျော် ရရှိမည်ဖြစ်ပြီး ရွှေတောင် -၈ နှင့် ငွေချည်- ၉ ချည်မျှင် ရှည် ဝါမျိုးသစ်မှာ တစ်ဧကလျှင် ငွေကျပ် ခြောက်သိန်းကျော်ဖြစ်ပြီး အနည်းဆုံး ပိဿာ ၁၀၀၀ ထွက်ရှိပါက တစ်ပိဿာကျပ် ၁၀၀၀ နှုန်းဖြင့် ရောင်းချငွေ ၁၀ သိန်းရရှိမည်ဖြစ်ကာ တစ်ဧက အသားတင် အမြတ်ငွေမှာ သုံးသိန်းကျော် ရရှိမည်ဖြစ်ပြီး တောင်သူများ အနေဖြင့် ချည်မျှင်ရှည်ဝါမှာ စိုက်ပျိုးသင့်သည့် သီးနှံ့တစ်ခုဖြစ်ကြောင်း မန္တလေးတိုင်းဒေသကြီး စိုက်ပျိုးရေး ဦးစီးဌာနမှ သိရှိရသည်။

 

Most Read

Most Recent