<

ရွှေဘိုခရိုင်အတွင်း မိုးခေါင်မှုကြောင့် မိုးစပါး စိုက်ပျိုးရန် အခက်အခဲများ ဖြစ်ပေါ်နေပြီး စိုက်ပျိုးပြီး စပါးခင်းအချို့ ထိခိုက်ပျက်စီး

မိုးခေါင်မှုကြောင့် ရွှေဘိုခရိုင်ရှိ စိုက်ပျိုးပြီး လယ်မြေအတွင်း ရေမရှိသဖြင့် ပပ်ကြားအက်နေမှုကို တွေ့ရစဉ်

စစ်ကိုင်းတိုင်းဒေသကြီး ရွှေဘိုခရိုင်အတွင်း မိုးခေါင်နေမှုကြောင့် မိုးစပါးစိုက်ပျိုးရန် အခက်အခဲများ ဖြစ်ပေါ်နေပြီး စိုက်ပျိုးပြီး စပါးခင်းအချို့ ရေရရှိမှုမရှိသဖြင့် သေဆုံး ပျက်စီးမှုများ ဖြစ်ပေါ်နေကြောင်း ဒေသခံတောင်သူများထံမှ စုံစမ်းသိရသည်။

ရွှေဘိုခရိုင်အတွင်း ဆည်ရေ မရရှိသည့် ဒေသများတွင် မိုးရေကိုသာ အဓိကအားထား စိုက်ပျိုးနေရခြင်းဖြစ်ပြီး ယခုနှစ်တွင် မိုးခေါင်နေမှုကြောင့် ဒေသခံတောင်သူများမှ မိုးစပါးနှင့် အခြားယာသီးနှံများ ထွန်ယက်စိုက်ပျိုးရန် အခက်အခဲများနှင့် ကြုံတွေ့နေကြရသည်။ ထို့ပြင် မိုးဦးကာလအတွင်းက စိုက်ပျိုးထားသည့် စပါးနှင့် အခြားသီးနှံများမှာ မိုးရွာသွန်းမှု မရှိသဖြင့် ထိခိုက်ပျက်စီးမှုများ ဖြစ်ပေါ်နေကြောင်း ဒေသခံများထံမှ သိရသည်။ လက်ရှိအချိန်တွင် ဆည်ရေသောက်စနစ်ဖြင့် စိုက်ပျိုးသည့် ဒေသအချို့သာ မိုးစပါးနှင့် အခြားသီးနှံများ စိုက်ပျိုးထားနိုင်ကြောင်း သိရသည်။

“မိုးကတော့ သည်ဘက်မှာ စိုက်ပျိုးလို့ ရနိုင်တဲ့အထိ ရွာကို မရွာသေးတာ။ မိုးဦးကာလက ရရှိထားတဲ့ရေနဲ့ စိုက်ပျိုးထားတဲ့ လယ်တွေက အခုချိန်မှာ ရေလုံလောက်အောင် မပေးနိုင်တော့ သေတဲ့အပင်တွေက သေကုန်ပြီ။ မိုးရွာလာရင် စိုက်ပျိုးဖို့အတွက် ပျိုးထောင်ထားတဲ့ ပျိုးခင်းအချို့ကလည်း ရေမရှိတဲ့အတွက် သေကုန်ပြီ။ တချို့တောင်သူတွေကတော့ ရေတွင်းကရေကို ရေစုပ်စက်တွေနဲ့ သွယ်ပြီး စိုက်ပျိုးကြတယ်။ စရိတ်ကတော့ မနည်းဘူးကုန်တယ်။ မိုးစပါး စိုက်ပျိုးချိန်က သည်လအတွင်း နောက်ဆုံးထားပြီး မစိုက်နိုင်ဘူးဆိုရင် အချိန်မမီတော့ဘူး။ မိုးစပါး မစိုက်ရတော့ဘူးဆိုရင်၊ လူစာရော၊ နွားစာအတွက်ပါ အခက်အခဲ ဖြစ်ကြတော့မှာ”ဟု ရွှေဘိုခရိုင်အတွင်းမှ မိုးကောင်းတောင်သူ တစ်ဦးက ဆိုသည်။

ရွှေဘိုခရိုင်အတွင်းရှိ မိုးကောင်းတောင်သူ အများစုမှာ လက်ရှိအချိန်အထိ မိုးသီးနှံများ စိုက်ပျိုးနိုင်ခြင်း မရှိသေးဘဲ မိုးဦးကာလအတွင်းက စိုက်ပျိုးထားသည့် သီးနှံအချို့မှာ မိုးခေါင်မှုကြောင့် ထိခိုက်ပျက်စီးမှုများ ဖြစ်ပေါ်လျက်ရှိသည်။ ထို့ပြင် မိုးရေ မရရှိသဖြင့် စက်ဖြင့်ရေသွင်း စိုက်ပျိုးရာတွင် လယ်တစ်ဧကလျှင် ဒီဇယ်ဂါလန် လေးဂါလန်မှ ငါးဂါလန်အကြား ကုန်ကျစရိတ်ရှိကာ အလုပ်သမားစရိတ် အပါအ၀င် ကုန်ကျစရိတ်များစွာဖြင့် စိုက်ပျိုးနေရသဖြင့် မိုးရွာသွန်းမှု မရှိပါက အခက်အခဲများ ရှိလာမည်ဖြစ်ကြောင်း ဒေသခံများထံမှ သိရသည်။ မိုးခေါင်နေခြင်းကြောင့် ရွှေဘိုခရိုင်၊ ခင်ဦးမြို့နယ်အတွင်းရှိ ကျေးရွာအချို့တွင် မိုးခေါ်လွန်ဆွဲပွဲများ ကျင်းပကာ မိုးရွာစေရန် ဆုတောင်းမှုများပါ ပြုလုပ်လျက်ရှိကြောင်း သိရသည်။

ရွှေဘိုခရိုင်အတွင်း မိုးစပါးစိုက်ပျိုးရာတွင် ရွှေဘိုပေါ်ဆန်း (ဘေးကျားစပါး)၊ မနော် အစရှိသည့် မျိုးစပါးများကို အဓိကထား စိုက်ပျိုးကြပြီး အခြားယာသီးနှံများ ဖြစ်သည့် မြေပဲ၊ နှမ်း၊ ပဲစင်းငုံ၊ ပြောင်း စသည့် သီးနှံများကို အဓိက စိုက်ပျိုးကြသည်။ ထိုသို့ စိုက်ပျိုးရာတွင် ဆည်ရေသောက်စနစ်နှင့် မိုးရေကိုသာ အဓိကအားထား စိုက်ပျိုးသည့်စနစ်ဖြင့် စိုက်ပျိုးကြကြောင်း သိရသည်။

ရွှေဘိုခရိုင်အတွင်း မိုးခေါင်မှုကြောင့် ဒေသခံ တောင်သူများ အားထားနေရသည့် ဆည်များ ရေခန်းခြောက်ခြင်း၊ ရေကန်များ ရေခန်းခြောက်လာခြင်းတို့ ဖြစ်ပေါ်နေပြီး မိုးရေကိုသာ အဓိက အားထားနေရသည့် စိုက်ပျိုးမြေဧက ထောင်ချီကာ မိုးစပါး စိုက်ပျိုးနိုင်ခြင်း မရှိသေးကြောင်း ဒေသခံများထံမှ စုံစမ်းသိရသည်။ ထိုသို့ အလယ်ပိုင်းဒေသများ၌ မိုးခေါင်ရေရှား ဖြစ်ပေါ်နေသော်လည်း မြန်မာနိုင်ငံ အောက်ပိုင်းဒေသများ ဖြစ်သည့် တနင်္သာရီ၊ ပဲခူး၊ မွန်၊ ကရင် အစရှိသည့် ဒေသများတွင် စံချိန်တင် မိုးကြီးခဲ့မှုကြောင့် ရေကြီးရေလျှံမှုများ ဖြစ်ပွားကာ စိုက်ပျိုးပြီး လယ်ယာမြေဧက ပေါင်းသိန်းဂဏန်းကျော် ထိခိုက်ပျက်စီး ဆုံးရှုံးခဲ့ကြောင်း အစိုးရအဖွဲ့၏ သတင်းထုတ်ပြန်ချက်များအရ သိရသည်။

September 11, 2018














Copy Protected by Chetan's WP-Copyprotect.