အစိုးရအနေဖြင့် ငလျင်အတွက် ကြိုတင် ပြင်ဆင်ခြင်း၊ တုံ့ပြန်ခြင်းနှင့် ပြန်လည် ထူထောင်ခြင်း လုပ်ငန်းအစီအစဉ်များရှိရန် လိုအပ်နေဟုဆို

အစိုးရအနေဖြင့် ငလျင်အတွက် ကြိုတင် ပြင်ဆင်ခြင်း၊ တုံ့ပြန်ခြင်းနှင့် ပြန်လည် ထူထောင်ခြင်း လုပ်ငန်းအစီအစဉ်များရှိရန် လိုအပ်နေဟုဆို
Published 11 September 2018

အစိုးရအနေဖြင့် ငလျင်အတွက် ကြိုတင်ပြင်ဆင်ခြင်း၊ တုံ့ပြန်ခြင်းနှင့် ပြန်လည် ထူထောင်ခြင်း လုပ်ငန်းအစီအစဉ်များရှိရန် လိုအပ်နေကြောင်း စက်တင်ဘာ ၁၀ ရက်က အ.ထ.က (၁)၊ မရမ်းကုန်းတွင် ပြုလုပ်သည့် ရန်ကုန်တိုင်းဒေသကြီး အတွင်းရှိ စာသင်ကျောင်းများတွင် ငလျင်ဘေးအန္တရာယ်ဆိုင်ရာ အသိပညာပေး ဆောင်ရွက်သူများအတွက် နည်းပြသင်တန်းနှင့် ပတ်သက်ပြီး သတင်းထုတ်ပြန်ချက်တွင် ဖော်ပြထားသည်။

“ငလျင်ပညာရှင်များနဲ့ ကျွမ်းကျင်ပညာရှင်များက မြန်မာနိုင်ငံမှာ မြေငလျင်အန္တရာယ် ကျရောက်နိုင်ခြေ များစွာရှိတယ်လို့ ဆိုပါတယ်။ ငလျင်လှုပ်ခြင်းကြောင့် ဘေးအန္တရာယ် ကျရောက်နိုင်ခြေများ လျှော့ချရာမှာ ပြည်သူလူထုနဲ့ သက်ဆိုင်ရာ ပညာရှင်များ၊ လူ့အဖွဲ့အစည်းများနဲ့အတူ ပူးပေါင်းလုပ်ဆောင်ကြဖို့ လိုပါတယ်”ဟု ရန်ကုန်တိုင်းဒေသကြီး အစိုးရအဖွဲ့ လူမှုရေးဝန်ကြီး ဦးနိုင်ငံလင်းက အဆိုပါပွဲတွင် ပြောကြားသည်။

အဆိုပါ ထုတ်ပြန်ချက်တွင် နိုင်ငံအတွင်း ဖြစ်ပေါ်ခဲ့သော ငလျင်ပြင်းအားများနှင့် အကြိမ်အရေအတွက်များအရ ပြည်ထောင်စုသမ္မတ မြန်မာနိုင်ငံတော် အစိုးရအနေဖြင့် အသက်အိုးအိမ် စည်းစိမ်များအား ကာကွယ်ရန်အတွက် ကြိုတင်ပြင်ဆင်ထားရန် လိုအပ်ကြောင်း၊ ပထမအဆင့်အနေဖြင့် ငလျင်ကြောင့် ထိခိုက်ပျက်စီးဆုံးရှုံးနိုင်ခြေ လျော့ပါးသက်သာစေရန် နိုင်ငံတော်အစိုးရမှ ငလျင်ကြိုတင် ပြင်ဆင်ခြင်း အစီအစဉ်တွင် ငလျင်မဖြစ်မီ ကြိုတင်ပြင်ဆင်ရန်၊ ငလျင်လှုပ်နေစဉ်နှင့် လှုပ်ပြီးနောက် ဆောင်ရန် ရှောင်ရန် အကြံပြုချက်များကို ထည့်သွင်းပြီး ပြည်သူများသိရှိ နားလည်အောင် ဆောင်ရွက်ရန် လိုအပ်ကြောင်း သိရသည်။

ထို့ပြင် မြန်မာနိုင်ငံသည် ရေကြီးခြင်း၊ မုန်တိုင်းနှင့် မီးဘေးကဲ့သို့သော အခြားဘေးအန္တရာယ်များထက် ငလျင်ဘေးဖြစ်ပေါ်မှု နည်းပါးသဖြင့် ယင်းနှင့်ပတ်သက်သည့် အတွေ့အကြုံ နည်းပါးရုံသာမက ငလျင်အတွက် ကြိုတင်သတိပေးသည့် စနစ်လည်း မရှိသေးသဖြင့် အစိုးရအနေဖြင့် ငလျင်အတွက် ကြိုတင်ပြင်ဆင်ခြင်း၊ တုံ့ပြန်ခြင်းနှင့် ပြန်လည် ထူထောင်ခြင်း လုပ်ငန်းအစီအစဉ်များ ရှိရန်လိုကြောင်း ထုတ်ပြန်ချက်၌ ဖော်ပြထားသည်။

ထို့ကြောင့် ဥရောပသမဂ္ဂ၏ ငွေကြေးထောက်ပံ့မှုဖြင့် ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၊ လူမှုဝန်ထမ်း ကယ်ဆယ်ရေး နှင့် ပြန်လည်နေရာချထားရေး ဝန်ကြီးဌာန နှင့် ကုလသမဂ္ဂဖွံ့ဖြိုးမှု အစီအစဉ်တို့ ပူးပေါင်းပြီး “ငလျင်ဘေးအန္တရာယ် ရင်ဆိုင် တုံ့ပြန်နိုင်စွမ်း မြှင့်တင်ရေးစီမံကိန်း”ကို အကောင်အထည်ဖော် ဆောင်ရွက်လျက်ရှိကြောင်း၊ အဆိုပါ စီမံကိန်းကို ငလျင်ဖြစ်နိုင်ခြေများသည့် ချင်းပြည်နယ်၊ ကချင်ပြည်နယ်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီးနှင့် ရန်ကုန်တိုင်းဒေသကြီးတို့တွင် ငလျင်ဘေးအန္တရာယ်ဆိုင်ရာ အသိပညာပေးလုပ်ငန်းများ ကြိုတင်ပြင်ဆင်ရေး လုပ်ငန်းများကို ဆောင်ရွက်သွားမည် ဖြစ်ကြောင်း ထုတ်ပြန်ချက်၌ ဖော်ပြထားသည်။

ထုတ်ပြန်ချက်၌ ငလျင်ဘေးအန္တရာယ်ကြောင့် ထိခိုက်ဆုံးရှုံးမှုများအား လျော့နည်းစေရန်အတွက် ငလျင်မလှုပ်မီ ကြိုတင်ပြင်ဆင်ရန်၊ ငလျင်လှုပ်နေစဉ်နှင့် လှုပ်ပြီးနောက် ဆောင်ရွက်ရမည့် အရာများအား စီမံကိန်းဒေသများရှိ စာသင်ကျောင်းများတွင် ကျောင်းသား၊ ကျောင်းသူများအား အသိပညာပေးခြင်း လုပ်ငန်းများ၊ ဆောင်ရွက်ရန် လိုအပ်ကြောင်း၊ အဆိုပါ လုပ်ငန်းများ ဆောင်ရွက်ရန်အတွက် ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၏ ဦးဆောင်ညွှန်ကြားမှုဖြင့် UNDP သည် စီမံကိန်းေဒေသများရှိ သက်ဆိုင်ရာတိုင်းဒေသကြီး ပြည်နယ်များမှ ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၊ အခြေခံဦးစီးဌာနများ နှင့် ညှိနှိုင်းဆွေးနွေးမှုများ ပြုလုပ်ပြီး အသိပညာပေး လုပ်ငန်းများ ဆောင်ရွက်မည့် သင်တန်းပို့ချမည့်သူများနှင့် စာသင်ကျောင်းများအား ရွေးချယ်ခဲ့ပြီး ဖြစ်ကြောင်း သိရသည်။

အဆိုပါ အသိပညာပေးလုပ်ငန်း ဆောင်ရွက်မည့်သူ ၄၀ အား အ.ထ.က (၁) မရမ်းကုန်းမြို့နယ်တွင် စက်တင်ဘာ ၁၀ ရက်မှ ၁၂ ရက်အထိ ငလျင်ဘေးအန္တရာယ်နှင့် ပတ်သက်ပြီး အသိပညာပေး သင်တန်းများ ပို့ချသွားမည် ဖြစ်ကြောင်း သိရသည်။

 

Most Read

Most Recent