<

အစိုးရကို ထိန်းကျောင်းနိုင်ရန်နှင့် ပြည်သူလူထု၏ ထိန်းကျောင်းမှုကို ခံယူလိုသည့် အစိုးရများ ပေါ်ထွက်လာရေး ဦးတည် ကြိုးပမ်းနေကြောင်း ဒေါက်တာဇော်မြင့်မောင် ပြောကြား

အစိုးရများကို ထိန်းကျောင်းနိုင်သည့် ပြည်သူလူထု ဖြစ်စေရန်နှင့် ပြည်သူလူထု၏ ထိန်းကျောင်းမှုကို ခံယူလိုသည့် အစိုးရများ ပေါ်ထွက်လာရေး ဦးတည် ကြိုးပမ်းနေကြောင်း အမျိုးသားဒီမိုကရေစီအဖွဲ့ချုပ်ပါတီ၏ မြန်မာ့အသံနှင့် ရုပ်မြင်သံကြားမှ ကြားဖြတ်ရွေးကောက်ပွဲအတွက် စည်းရုံးဟောပြောမှုတွင် ဒုတိယဥက္ကဋ္ဌ (၂) ဒေါက်တာဇော်မြင့်မောင် (မန္တလေးတိုင်းဒေသကြီး ၀န်ကြီးချုပ်) က ပြောကြားသည်။

“ပါတီအနေနဲ့ ကျွန်တော်တို့ ပြည်ထောင်စုမှာ မှီတင်းနေထိုင်ကြတဲ့ တိုင်းရင်းသားပေါင်းစုံ ပြည်သူတစ်ရပ်လုံးက အစိုးရများကို ထိန်းကျောင်းနိုင်တဲ့ ပြည်သူလူထု ဖြစ်စေဖို့နဲ့ ပြည်သူလူထုရဲ့ ထိန်းကျောင်းမှုကို ခံယူလိုတဲ့ အစိုးရများ ပေါ်ထွက်လာရေး ဦးတည်ကြိုးပမ်း အကောင်အထည်ဖော် ဆောင်ရွက်နေပါတယ်”ဟု ၎င်းက ပြောကြားသည်။

ထို့ပြင် ကမ္ဘာ့အခြေအနေ၊ နိုင်ငံ၏ လိုအပ်ချက်၊ ပြည်သူများ၏ ဆန္ဒမျှော်လင့်ချက်များကို သတိပြုလေ့လာပြီး ပါတီနှင့် ပါတီ တာဝန်ရှိသူများ၏ အရည်အသွေးကို မြှင့်တင်ရန် ကြိုးစားနေကြောင်း၊ ပြုပြင်ပြောင်းလဲရေး ကြိုးပမ်းရသည့် ဖြစ်စဉ်တွင် စိန်ခေါ်မှုများစွာ ရှိနေကြောင်း၊ ယင်းအခြေအနေမျိုးတွင် အားကောင်းသည့် အစိုးရတစ်ရပ် အနေဖြင့်ရပ်တည်နိုင်ရန် အပြန်အလှန် လေးစားမှုကို တန် ဖိုးထားသည့် အစိုးရတစ်ရပ် ဖြစ်ရန် ပြည်သူလူထု၏ ပကတိအခြေအနေများနှင့် လိုအပ်ချက်များကို အလေးထားသည့် မူဝါဒများနှင့် ဒီမိုကရေစီ ပြုပြင်ပြောင်းလဲရေး အရေးတော်ပုံ၏ သန္ဓေတည်ခဲ့သည့် အမျိုးသားဒီမိုကရေစီ အဖွဲ့ချုပ်အနေဖြင့် နိုင်ငံ့တာဝန်ကို ပြည့်ပြည့်၀၀ ထမ်းဆောင်နိုင်ရန် ပြည်သူတို့၏ ရွေးချယ် တာဝန်ပေးအပ်မှုကို လေးစားယုံကြည်စွာ ခံယူဆောင်ရွက်မည် ဖြစ်ကြောင်း ဒေါက်တာ ဇော်မြင့်မောင်က ပြောကြားသည်။

၂၀၁၅ ခုနှစ် ရွေးကောက်ပွဲ ကြေညာစာတမ်းတွင် အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်၏ အမှာစာတွင် ပါရှိသည့်အတိုင်း အဖွဲ့ချုပ်သည် ၁၉၈၈ ခုနှစ် ဒီမိုကရေစီအရေးတော်ပုံမှ ပေါက်ဖွားလာပြီး လူထု၊ လူတန်းစား အလွှာအသီးသီးမှ ပြည်သူလူထုကို ကိုယ်စားပြု ရပ်တည်ခဲ့သည်မှာ အနှစ် ၃၀ ရှိပြီဖြစ်ကြောင်း ၎င်းက ဆိုသည်။

ထို့ပြင် တိုင်းရင်းသားရေးနှင့် ပြည်တွင်း ငြိမ်းချမ်းရေး၊ ပြည်သူတစ်ရပ်လုံး အေးချမ်းလုံခြုံစွာ လက်တွဲနေထိုင်ရေး၊ အာမံချက်ပေးနိုင်သည့် ဖွဲ့စည်းပုံ အခြေခံဥပဒေတစ်ရပ် ပေါ်ထွန်းရေး၊ ပြည်သူလူထုအား တရားမျှတစွာ အကာအကွယ်ပေးမည့် အုပ်ချုပ်မှုစနစ် တစ်ရပ်ပေါ်ပေါက်လာရေး၊ လွတ်လပ် လုံခြုံစွာဖွံ့ဖြိုးတိုးတက်ရေးတို့ ဖြစ်ကြောင်း ဒေါက်တာ ဇော်မြင့်မောင်က ဆက်လက် ပြောကြားသည်။

ထို့ပြင် တိုင်းရင်းသားအားလုံး လက်တွဲ မဖြုတ်တမ်း စည်းလုံးညီညွတ်ရေးနှင့် ပြည်ထောင်စု တစ်ခုလုံး ငြိမ်းချမ်းသာယာရေး၊ ဖွံ့ဖြိုးတိုးတက်ရေးနှင့် တည်တံ့ခိုင်မြဲရေး အကောင်အထည်ဖော်နိုင်မည့် လုပ်ငန်းစဉ် ခြောက်ရပ်ကို ချမှတ်ထားပြီး ဖြစ်ကြောင်း၊ ပြည်တွင်း လက်နက်ကိုင် ပဋိပက္ခအရင်းအမြစ်များကို ဖယ်ရှားရန် အာဃာတကင်းစင်ပြီး ပင်လုံစိတ်ဓာတ်ကို အခြေခံသည့် နိုင်ငံရေးတွေ့ဆုံဆွေးနွေးပွဲများမှ တစ်ဆင့် ပြည်သူ့ဘ၀ လုံခြုံအေးချမ်းစေမည် ဖြစ်ကြောင်း ဒေါက်တာ ဇော်မြင့်မောင်၏ ပြောကြားချက်အရ သိရသည်။

ကြားဖြတ်ရွေးကောက်ပွဲတွင် ၀င်ရောက် ယှဉ်ပြိုင်မည့် နိုင်ငံရေးပါတီများမှ ပါတီမူဝါဒများ၊ လျှောက်လမ်းမည့် လမ်းကြောင်းများကို စည်းရုံးမှုများကို မြန်မာ့အသံနှင့် ရုပ်မြင်သံကြားမှ ထုတ်လွှင့်ပေးလျက် ရှိသည်။

ကြားဖြတ်ရွေးကောက်ပွဲတွင် လစ်လပ် မဲဆန္ဒနယ် ၁၃ နေရာအတွက် နိုင်ငံရေးပါတီ ၂၄ ပါတီမှ ကိုယ်စားလှယ် ၆၂ ဦးနှင့် တစ်သီးပုဂ္ဂလ ကိုယ်စားလှယ်လောင်း ခုနစ်ဦး ၀င်ရောက်ယှဉ်ပြိုင်မည် ဖြစ်သည်။

ထို့ပြင် ကြားဖြတ်ရွေးကောက်ပွဲတွင် NLD ပါတီက နေရာပြည့် ယှဉ်ပြိုင်မည်ဖြစ်ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ၁၀ နေရာ ၀င်ရောက် ယှဉ်ပြိုင်မည် ဖြစ်ကြောင်း သိရသည်။

 

September 11, 2018














Copy Protected by Chetan's WP-Copyprotect.