<

၂၀၁၈ ဘဏ္ဍာနှစ် နိုင်ငံခြားရင်းနှီးမြှုပ်နှံမှု ဒေါ်လာသုံးဘီလျံ ၀င်ရောက်ရန် မျှော်မှန်းခြင်း ပြည့်မီမှုမရှိဘဲ လျာထားချက်၏ ထက်ဝက်သာ ၀င်ရောက်သော်လည်း ၂၀၁၉ ကို အကောင်းမြင် မျှော်လင့်နေ

ပြည်တွင်းသို့ လာရောက်မြှုပ်နှံထားသည့် ဘီယာစက်ရုံတစ်ခု၏ လုပ်ငန်းလည်ပတ်ပုံကို တွေ့ရစဉ်

၂၀၁၈ ခြောက်လဘဏ္ဍာနှစ်အတွင်း နိုင်ငံခြားရင်းနှီးမြှုပ်နှံမှု ဒေါ်လာသုံးဘီလျံအထိ ၀င်ရောက်ရန် လျာထားခဲ့သော်လည်း လျာထားချက် ပြည့်မီမှုမရှိဘဲ လျာထားချက်၏ ထက်ဝက် ဒေါ်လာ ၁ ဒသမ ၅ ဘီလျံခန့်သာ နိုင်ငံခြားရင်းနှီးမြှုပ်နှံမှု ၀င်ရောက်ကာ ရင်းနှီးမြှုပ်နှံမှု ကျဆင်းခဲ့သော်လည်း လာမည့် ၂၀၁၈-၂၀၁၉ ဘဏ္ဍနှစ်တွင် လျာထားချက် ဒေါ်လာ ၅ ဒသမ ၈ ဘီလျံ ရရှိလာမည်ဟု အကောင်းမြင်ထားသည်ဟု မြန်မာနိုင်ငံ ရင်းနှီးမြှုပ်နှံမှုကော်မရှင် အတွင်းရေးမှူး ဦးအောင်နိုင်ဦးက ပြောကြားသည်။

“၂၀၁၈ သြဂုတ် ၁ရက်မှာ မြန်မာနိုင်ငံ ကုမဏီများဥပဒေက စပြီး အသက်ဝင်လာပြီ။ စက်တင်ဘာ၊ အောက်တိုဘာ၊ နိုဝင်ဘာမှာ တဖြည်းဖြည်းနဲ့ အရှိန်ရလာမယ်။ ဒီလိုရလာမယ်ဆို ကျွန်တော်တို့က ကုမ္ပဏီဥပဒေရဲ့ ရလဒ်ပေါ့။ ဒုတိယအချက်မှာလည်း ကျွန်တော်တို့ရဲ့ မြန်မာနိုင်ငံ ရင်းနှီးမြှုပ်နှံမှုဥပဒေက ကောင်းကောင်းလေး အသက်ဝင်လာပြီ။ တိုင်းဒေသကြီးနဲ့ ပြည်နယ်တွေကလည်း ကောင်းကောင်းလုပ်နိုင်နေကြပြီ။ MIC ကိုယ်တိုင်ကလည်း ရင်းနှီးမြှုပ်နှံမှု မြန်မြန်လေးချပေးတယ်” ဟု ဦးအောင်နိုင်ဦးက ဆိုသည်။

နိုင်ငံခြားသားများကို ၃၅ ရာခိုင်နှုန်းအထိ ပါဝင်ခွင့်ပေးထားသည့် မြန်မာနိုင်ငံကုမ္ပဏီများဥပဒေ၊ ရင်းနှီးမြှုပ်နှံမှုဥပဒေအပြင် MIC ကိုယ်တိုင်မှလည်း ရင်းနှီးမြှုပ်နှံမှုများကို ချက်ချင်းခွင့်ပြုပေးနေကာ အစိုးရအနေဖြင့် ဥပဒေများ လုပ်ထုံးလုပ်နည်းများကို မြန်ဆန်သွက်လက်လာအောင် လုပ်ဆောင်နေကြောင်း ဦးအောင်နိုင်ဦးက ပြောကြားသည်။ ထို့ပြင် ရင်းနှီးမြှုပ်နှံမှုများတွင် ပေါ်လာသည့် အခက်အခဲများကိုလည်း MIC မှ တာဝန်ခံကာ ရှင်းပေးနေကြောင်း ဦးအောင်နိုင်ဦးက ဆက်လက်ပြောကြားသည်။

“ခြုံပြောရရင် ၂၀၁၉ မှာ ကျွန်တော်တို့ အကောင်းမြင်ပါတယ်။ ၂၀၁၈ ကတော့ ဒီခြောက်လကာလထဲမှာ ရင်းနှီးမြှုပ်နှံမှု ကျခဲ့တယ်။ ကျွန်တော်တို့ မျှော်မှန်းတာက သုံးဘီလျံလောက် မျှော်မှန်းတယ်။ ရခဲ့တာက ၁ ဒသမ ၅ ဘီလျံ။ ထက်ဝက်လောက်ပဲ။ ဒီလကုန်လို့ရှိရင် ကျွန်တော်တို့ ခြောက်လဘဏ္ဍာနှစ် ကုန်သွားပြီ။ ဒီခြောက်လကာလမှာ ကျွန်တော်တို့ မျှော်မှန်းတဲ့ Target ကို မမီဘူး။ သို့သော် ကျွန်တော်တို့က လာမယ့် အောက်တိုဘာ ၁ ရက်ကနေ ၂၀၁၉ စက်တင်ဘာ ၃၀ အထိ ဘဏ္ဍာနှစ်မှာ ဒေါ်လာ ၅ ဒသမ ၈ ဘီလျံ ရအောင်လုပ်မယ်လို့ မျှော်မှန်းထားတယ်။ အဲဒီမှာလည်း ကျွန်တော်တို့ Positive ကို အကောင်းမြင်ပါတယ်။ ကျွန်တော်တို့ မျှော်မှန်းထားတာ ပြည့်မီမယ်လို့ တွက်ထားပါတယ်” ဟု ဦးအောင်နိုင်ဦးက ဆက်လက် ပြောကြားသည်။

NLD အစိုးရလက်ထက်တွင် နိုင်ငံခြားရင်းနှီးမြှုပ်နှံမှုများ ဆက်တိုက်ကျဆင်းနေပြီး ၂၀၁၆-၂၀၁၇ ဘဏ္ဍာနှစ်များနှင့် ၂၀၁၇-၂၀၁၈ ဘဏ္ဍာနှစ်များတွင် လျာထားချက်ဖြစ်သည့် ဒေါ်လာ ခြောက်ဘီလျံကျော်လွန်ရုံသာ နိုင်ငံခြားရင်းနှီးမြှုပ်နှံမှု ၀င်ရောက်ပြီး ၂၀၁၈ ဘဏ္ဍာနှစ်ကြားကာလ ခြောက်လတွင်လည်း လျာထားချက်၏ ထက်ဝက်ခန့်သာ နိုင်ငံခြားရင်းနှီးမြှုပ်နှံမှု ၀င်ရောက်သဖြင့် ၂၀၁၈-၂၀၁၉ ဘဏ္ဍာနှစ်အတွက် နိုင်ငံခြားရင်းနှီးမြှုပ်နှံမှု ၀င်ရောက်မည့် ပမာဏ မျှော်မှန်းမှုကို ဒေါ်လာ ၅ ဒသမ ၈ ဘီလျံသို့ လျှော့ချခဲ့ရသည်။

၂၀၁၇-၂၀၁၈ ဘဏ္ဍာနှစ်အတွင်း ကာလရှည်နိုင်ငံခြား တိုက်ရိုက်ရင်းနှီးမြှုပ်နှံမှု တိုးမြှင့်ရေးဆိုင်ရာ စီမံကိန်းအရ ဒေါ်လာ ခြောက်ဘီလျံ ကျော်လွန်အောင် ဆောင်ရွက်နိုင်ခဲ့ကာ ဒေါ်လာ ၆၁၁၉ ဒသမ ၉၆၆ သန်း ၀င်ရောက်ခဲ့သော်လည်း အမှန်စီးဝင်လာသော ရင်းနှီးမြှုပ်နှံမှု ပမာဏ ဒေါ်လာ ၄ ဒသမ ၃ ဘီလျံသာ ရှိနေကြောင်း သိရသည်။

September 10, 2018














Copy Protected by Chetan's WP-Copyprotect.