ညောင်တုန်းမြို့ ပြည်သူ့ဆေးရုံကြီး သုံးထပ်တိုးချဲ့ဆောင် ဆောက်လုပ်ရာတွင် လုပ်ငန်းလုပ်ဆောင်ပေးနေသည့် လုပ်သားများ သတင်းပေးပို့ချက်အရ စစ်ဆေးရာတွင် အဆောက်အအုံမှာ အရည်အသွေးပြည့်မီမှု မရှိခြင်း၊ တည်ဆောက်ရေးလုပ်ငန်း စိစစ်ရေးကော်မတီ၏ လမ်းညွှန်ချက်များကို မလိုက်နာဘဲ လုပ်ဆောင်ထားခြင်းများ ရှိနေကြောင်း စစ်ဆေးတွေ့ရှိခဲ့ပြီး အရည်အသွေးမပြည့်မီခြင်းကြောင့် သုံးထပ်အဆောက်အအုံအဖြစ် ဆက်လက် မဆောက်လုပ်သင့်ကြောင်း စစ်ဆေးရေးအဖွဲ့များက တင်ပြထားကြောင်း သတင်းရရှိသည်။
ခုတင် ၁၀၀ ဆံ့ သုံးထပ်တိုးချဲ့ဆောင် အဆောက်အအုံအသစ်အား ဆောက်လုပ်ရာတွင် တည်ဆောက်နေစဉ်အတွင်း အဆောက်အအုံအတွင်းရှိ ကွန်ကရစ်ထောက်တိုင်များ တည်ဆောက်ထားမှုမှာ နေရာလွဲနေခြင်း၊ စောင်းနေခြင်းများကြောင့် တာဝန်ရှိသူများမှ ပြန်လည်ပြင်ဆင်စေခဲ့ကြောင်း၊ ယင်းသို့ ပြင်ဆင်ရာတွင် ကွန်ကရစ်ထောက်တိုင်များအတွင်း ထည့်သွင်းရမည့် သံချောင်းများအား အောက်ခြေကွန်ကရစ် ဖောင်ဒေးရှင်းမှ စတင်ကာ ပြန်လည်ထူမတ်ရမည်ကို မလုပ်ဆောင်ဘဲ မူလလုပ်ဆောင်ထားသည့် သံချောင်းများကိုဖြတ်ကာ နေရာရွှေ့၍ အောက်ခံကွန်ကရစ်ပြားပေါ်တွင် အပေါက်ငယ်များဖောက်၍သာ ကွန်ကရစ်ထောက်တိုင်များကို နေရာပြောင်းရွှေ့ လုပ်ဆောင်စေခဲ့ကြောင်း၊ မူလဖောင်ဒေးရှင်းမှ တွဲဆက်ထားသည့် သံချောင်းများကိုမူ လာရောက် စစ်ဆေးသည့်အဖွဲ့များ မတွေ့ရှိစေရန် ဘိလပ်မြေများဖြင့် ဖုံးထားခဲ့ကြောင်း၊ မြေညီထပ်ရှိ A13၊ A14၊ A15 ကွန်ကရစ်တိုင်များအား သံချောင်းနှစ်ချောင်းစီဖြတ်ကာ နေရာရွှေ့ခဲ့ပြီး A8 ကွန်ကရစ်တိုင်ကိုမူ သံချောင်းများ အားလုံးဖြတ်တောက်ကာ နေရာပြောင်းရွှေ့ခဲ့ကြောင်း၊ ပထမထပ်တွင်မူ D14၊ E14 ကွန်ကရစ်တိုင်များအား သံချောင်းနှစ်ချောင်းဖြတ်ကာ နေရာရွှေ့ခဲ့ပြီး G14 ကွန်ကရစ်တိုင်ကိုမူ သံချောင်းငါးချောင်းအထိ ဖြတ်ကာ နေရာပြောင်းရွှေ့ခဲ့ကြောင်း၊ အသုံးပြုသည့် သံချောင်းများမှာလည်း သတ်မှတ် သံချောင်းအရွယ်အစားထက် သေးခဲ့ပြီး ပထမ ကွန်ကရစ်လောင်းစဉ်ကလည်း အက်ကွဲမှုများ ဖြစ်ပေါ်ခဲ့ကြောင်း စုံစမ်းစစ်ဆေးရေးအဖွဲ့မှ စစ်ဆေးတွေ့ရှိကြောင်း၊ ယင်းနောက် အဆောက်အအုံ ကြံ့ခိုင်မှုကို အဖွဲ့ပေါင်းစုံမှ ကွင်းဆင်းစစ်ဆေးရာတွင် ဆေးရုံတိုးချဲ့ဆောင်မှာ မူလရည်ရွည်ထားသည့် သုံးထပ်အဆောက်အအုံအဖြစ် ဆက်လက် ဆောက်လုပ်ရန် မသင့်လျော်ဘဲ နှစ်ထပ် အဆောက်အအုံအဖြစ် လည်းကောင်း၊ ဖြိုဖျက်၍ အသစ်ပြန်လည် တည်ဆောက်၍သော်လည်းကောင်း လုပ်ဆောင်သင့်သည်ဟု စစ်ဆေးတွေ့ရှိရကြောင်း သိရသည်။
ညောင်တုန်းမြို့ ပြည်သူ့ဆေးရုံကြီး တိုးချဲ့အဆောက်အအုံအား တော်ဝင်အောင်မြေကုမ္ပဏီမှ တာဝန်ယူ တည်ဆောက်ခဲ့ခြင်းဖြစ်ပြီး အရည်အသွေး ပြည့်မှီမှု မရှိခြင်းများနှင့် ပက်သက်၍ လုပ်ငန်းရယူထားသည့် ကုမ္ပဏီအား မည်ကဲ့သို့ စီမံဆောင်ရွက်မည်ကိုမူ မသိရှိရသေးကြောင်း သိရသည်။
