ဒုတိယ နယ်စပ်ကုန်သွယ်မှု အများဆုံးဖြစ်သည့် မြဝတီနယ်စပ်ကုန်သွယ်ရေး လမ်းကြောင်းတစ်နေရာကို တွေ့ရစဉ်

ကရင်ပြည်နယ်အတွင်း ရေကြီးရေလျှံမှု ဖြစ်ခဲ့ပြီးနောက် လစဉ်မြင့်တက်လာခဲ့သော မြဝတီနယ်စပ် ကုန်သွယ်မှုမှာ ယခင်လက ကြန့်ကြာမှု၊ နှောင့်နှေးမှုများရှိခဲ့၍ လက်ရှိဘဏ္ဍာနှစ်ဖြစ်သော ဧပြီ ၁ ရက်မှ သြဂုတ် ၂၄ ရက်အထိ ကုန်သွယ်မှု ပမာဏ ဒေါ်လာ ၃၂၀ ဒသမ ၇၈၃ သန်း ကုန်သွယ်နိုင်ခဲ့သော်လည်း ယခင်နှစ် ကာလတူထက် ဒေါ်လာ ၈ ဒသမ ၆၄၃ သန်း လျော့ကျနေဆဲဖြစ်ကြောင်း  စီးပွား၊ ကူးသန်းဌာနမှ ထုတ်ပြန်သော စာရင်းများအရ သိရသည်။

ယခုကဲ့သို့ကုန်သွယ်မှု လျော့လာခြင်းမှာ  မြဝတီနယ်စပ် ကုန်သွယ်လမ်းကြောင်းပေါ်ရှိ ဂျိုင်း-ပွန်တွန်း တံတား ချဉ်းကပ်လမ်း ရေမြုပ်ခြင်း နှင့် ဂျိုင်း-အိန္ဒုလမ်းပိုင်း ဆိုးရွားစွာ ပျက်စီးနေခြင်းတို့ကြောင့် ၁၃ တန် အထက် ကုန်တင်ယာဉ်၊ တွဲယာဉ် များ ရက်ပေါင်း ၂၀ ကျော် ရပ်တန့်နေ ခဲ့ရခြင်းကြောင့် ဖြစ်သည်ဟု နယ် စပ် ကုန်သည်များက ပြောကြား သည်။

မြန်မာ့ထုတ်ကုန်ပစ္စည်းများ ထိုင်းနိုင်ငံဘက် တင်ပို့ရာတွင် လက်ရှိ ဘဏ္ဍာနှစ် သြဂုတ် ၂၄ ရက်အထိ ဒေါ်လာ ၃၁ ဒသမ ၄၈၈ သန်း တင် ပို့နိုင်ခဲ့၍ ယခင်နှစ်ကာလတူထက် ဒေါ်လာ ၁၁ ဒသမ ၀၉ သန်း ပိုမိုခဲ့ သော်လည်း မြန်မာနိုင်ငံဘက်သို့ ထိုင်းကုန်စည်များ တင်သွင်းရာတွင် သြဂုတ်၂၄  ရက်အထိ   ဒေါ်လာ၂၈၉ ဒသမ ၉၅ သန်းသာ ကုန်သွယ်နိုင်ခဲ့ သည့်အတွက် ယခင်နှစ် ကာလတူထက်  ဒေါ်လာ ၁၉ ဒသမ ၇၃၆ သန်း လျော့ကျခဲ့ကြောင်း သိရသည်။

သို့သော် ယခုနှစ် ကုန်သွယ်မှု ပမာဏမှာ ပထမခြောက်လပတ်ကုန် သွယ်မှုလျာထားချက်ထက် ကျော် လွန်ခဲ့ကြောင်း၊ အမှတ် (၂) ချစ်ကြည် ရေးတံတား ဖွင့်လှစ်ပြီးစီးပါက ကုန် သွယ်မှု နှစ်ဆ မြင့်တက်လာမည် ဖြစ်ကြောင်း  စီးပွားရေးနှင့်ကူးသန်း ရောင်းဝယ်ရေး ဝန်ကြီးဌာန အမြဲတမ်း အတွင်းဝန်  ဦးရန်နိုင်ထွန်းက မြန်မာ- ထိုင်း နှစ်နိုင်ငံ နယ်စပ် ကုန်သွယ်ရေး  ပူးတွဲကော်မတီအစည်း အဝေးကျင်းပပြီးနောက် မီဒီယာ များအား ပြောကြားသည်။

ထို့ပြင် မြန်မာ့ပို့ကုန်အမည်သစ်ဖြစ်သော သိုး၊ ဆိတ်၊ နွား၊ ကျွဲ များ တရားမဝင်ကုန်သွယ်မှု ပပျောက်ရေး၊ တရားဝင် တင်ပို့နိုင်ရေး အပါအဝင် မြန်မာ့ပို့ကုန်များ ထိုင်းနိုင်ငံသို့ အလွယ်တကူ တင်ပို့နိုင်ရေးအတွက် မြန်မာ-ထိုင်းနယ်စပ်၊ မြဝတီမြို့ အမှတ် ၄ ရပ်ကွက် အာရှ လမ်းမကြီးဘေးရှိ ဂရိတ်ဝမ်းဟိုတယ် ခန်းမတွင် စက်တင်ဘာ ၅ ရက်နှင့် ၆ ရက် နှစ်ရက် ကျင်းပခဲ့သည့် ယင်း မြန်မာ- ထိုင်း နှစ်နိုင်ငံ နယ်စပ်ကုန်သွယ်ရေး ပူးတွဲကော်မတီ အစည်းအဝေး၌ ဆွေးနွေးသဘောတူညီမှုများ ရရှိခဲ့ကြောင်း သိရသည်။

မြန်မာနိုင်ငံသို့ တင်သွင်းလိုသော အပင်နှင့် အပင်ထွက်ပစ္စည်းများအတွက် Pest Risk Analysis (PRA) ပေးပို့ရေးကိစ္စ၊ မြန်မာ့ပို့ကုန် မြေပဲဆန်များကို ချင်းမိုင်အစား မဲဆောက်တွင် ဓာတ်ခွဲပေးနိုင်ရေး၊ မြန်မာ့ပို့ကုန် အမည်သစ်ဖြစ်သော ကျွဲ၊ နွား၊ သိုး၊ ဆိတ်များ တရားမဝင် ကုန်သွယ်မှု ပပျောက်ရေးနှင့် မြန်မာ့ပို့ကုန်များ  တင်ပို့ရာတွင် လွယ်ကူချောမွေ့စေရန် ညှိနှိုင်းဆွေးနွေးချက်များကို နှစ်ဖက်သဘောတူညီမှု ရရှိခဲ့ကြသည်ဟုလည်း ၎င်းကဖြည့်စွက် ပြောကြားသည်။

မြဝတီ နယ်စပ်စခန်းသည် ဒုတိယကုန်သွယ်မှ ုအများဆုံးဖြစ်ပြီး ထိုင်းနိုင်ငံဘက်မှ နေ့စဉ်ကုန်တင်ယာဉ် ကားကြီး ၅၀၀ ခန့် ဝင်ရောက်နေသော်လည်း ထိုင်းနိုင်ငံဘက်သို့ ပို့ကုန်တင်ပို့မှုမှာ ကုန်တင်ယာဉ် ဆယ်ဂဏန်းမျှသာ ရှိကြောင်း သိရသည်။

မြန်မာနိုင်ငံဘက်သို့  ထိုင်းဓာတ်ငွေ့ရည်၊ စက်သုံးဆီ ဒီဇယ်၊ ဓာတ်ဆီ၊ စားသုံးဆီများ၊ မော်တော်ဆိုင်ကယ် အမျိုးစုံ၊ စားသောက်ကုန် အလှကုန်၊ လူသုံးကုန်၊ သွပ်၊ ဘိလပ်မြေနှင့် အိမ်ဆောက်ပစ္စည်းမျိုးစုံ၊ သစ်ပင် ပန်းပင်များ၊ သစ်သီးဝလံများကို ယခင်နှစ်ကထက် ပိုမိုတင်သွင်းခဲ့ကြောင်း သိရသည်။

၂၀၁၇- ၂၀၁၈ ခုနှစ် မော်တော် ယာဉ်တင်သွင်းမှုဆိုင်ရာ မူဝါဒ အပြောင်းအလဲ၊ အခွန်နှုန်းထား အပြောင်းအလဲကြောင့် တရားဝင် ကားတင်သွင်းမှု မရှိသလောက် နည်းပါးခဲ့သည်။ လယ်ယာသုံး ထွန်စက်များနှင့် လုပ်ငန်းသုံး စက်ယန္တရားများကို ပုံမှန်တင်သွင်း လျက်ရှိသည်။

မြဝတီနယ်စပ်တွင် သောင်ရင်းဖြတ်ကျော် စက်လှေဂိတ်များမှ ကုန်သွယ် ကူးသန်းမှုမှာလည်း ယခင်အတိုင်း  ရပ်တည်နေပြီး တရားဝင် တင်သွင်းခွင့်မရှိသော အသားထုတ် ဝက်များ၊ ကြက်များ၊ ကြက်ထွက် အသည်းနှလုံး ပါကင်ထုပ်များ၊ ကျော့ပုစွန်များ၊ ဘီယာမျိုးစုံ၊ အရက်မျိးစုံနှင့် တစ်ပတ်ရစ် ဂျပန်ကားများကိုလည်း ပြည်တွင်းသို့  အလုံးအရင်းဖြင့် တင်သွင်းလျက်ရှိကြောင်း ဒေသခံများထံမှ သိရသည်။