ချင်းပြည်နယ်နှင့် မကွေးတိုင်းဒေသကြီးအတွင်း အကောင်အထည်ဖော်ဆောင်ရွက်မည့် အနောက်ပိုင်းဒေသများ စိုက်ပျိုးစီးပွား ဖွံ့ဖြိုးတိုးတက်ရေးစီမံကိန်းအတွက် အမေရိကန်ဒေါ်လာ ၈ ဒသမ ၉၈၄ သန်း ချေးယူမှုအား စက်တင်ဘာ ၆ ရက်တွင်ပြုလုပ်သော ပြည်ထောင်စုလွှတ်တော် အစည်းအဝေးတွင် သဘောတူခဲ့သည်။

အဆိုပါချေးငွေဖြင့် ချင်းပြည်နယ် (တောင် ပိုင်း) မင်းတပ်၊ကန်ပက်လက်၊ မကွေးတိုင်းဒေသကြီးအတွင်းရှိ ပေါက်မြို့နယ်နှင့် မြိုင်မြို့နယ်များရှိ အိမ်ထောင်စုပေါင်း ၉၈၅၀၀ ခန့် နှင့် ကျေးလက်နေပြည်သူ ၄ ဒသမ ၃ သိန်းခန့် အား အကျိုးပြုစေရန် မျှော်မှန်းအကောင်အထည်ဖော်သည့် စီမံကိန်းဖြစ်ကြောင်း၊ အပြည်ပြည်ဆိုင်ရာ စိုက်ပျိုးရေးဖွံ့ဖြိုးတိုးတက်မှု ရန်ပုံငွေအဖွဲ့အနေဖြင့် ဖွံ့ဖြိုးမှုနည်းပါးပြီး ဆင်းရဲနွမ်းပါးသည့် ကျေးလက်အိမ်ထောင်စုများ၏ လူမှုစီးပွားဘ၀ ဖွံ့ဖြိုးတိုးတက်စေရန်အတွက် ရည်ရွယ်ပြီး သက်သာသောချေးငွေပေးအပ်ခြင်းဖြစ်ကြောင်း၊ ယင်းစီမံကိန်းအား စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ  တာဝန်ယူဆောင်ရွက်မည်ဖြစ်ကြောင်း ဒုတိယဝန်ကြီး ဦးလှကျော်က ပြောကြားသည်။

ယင်းချေးငွေသည် အတိုးမဲ့ချေးငွေဖြစ်ပြီး ဝန်ဆောင်ခအဖြစ် တစ်နှစ်ကို ၀ ဒသမ ၇၅ ရာခိုင်နှုန်း ပေးချေရမည်ဖြစ်ကြောင်း၊ ပြန်လည်ပေးဆပ်ရမည့်ကာလသည် ဆိုင်းငံ့ကာလ ၁၀ နှစ် အပါအဝင် နှစ် ၄၀ ဖြစ်ကြောင်း၊ ၂၀၂၈ -၂၀၂၉ ဘဏ္ဍာနှစ်မှစပြီး ခြောက်လလျှင် တစ်ကြိမ် အမေရိကန်ဒေါ်လာ ၁ ဒသမ ၅ သိန်းဖြင့် နှစ် ၃၀ ပြန်လည်ပေးဆပ်ရမည့်ချေးငွေဖြစ်ကြောင်း၊ စီမံကိန်းမှ ထုတ်လုပ်မှုဆိုင်ရာ အခြေခံအဆောက်အအုံဖွံ့ဖြိုးရေး၊ လူမှုရေးဆိုင်ရာအခြေခံအဆောက်အအုံ ဖွံ့ဖြိုးရေးတို့ကို အကောင်အထည်ဖော်ဆောင်ရွက်ပေးမည်ဖြစ်သည့်အလျောက် စီမံကိန်းလုပ်ငန်းများ စနစ်တကျ ဆောင်ရွက်နိုင်ရန်အတွက် စောင့်ကြည့်စစ်ဆေးအကဲဖြတ်ခြင်းကို လုပ်ငန်းအပိုင်း သုံးပိုင်းဖြင့် အကောင်အထည်ဖော် ဆောင်ရွက်မည်ဖြစ်ကြောင်း ဦးလှကျော်က ပြောကြားခဲ့သည်။

စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက အပြည်ပြည်ဆိုင်ရာ စိုက်ပျိုးရေး ဖွံ့ဖြိုးတိုးတက်မှု ရန်ပုံငွေအဖွဲ့ (IFAD) သည် ကျေးလက်ဒေသများရှိ မြေယာမဲ့လယ်သမားများ၊ ဆင်းရဲပြီး ဝင်ငွေနည်းပါးသည့် လယ်သမားများ၏ မိသားစုများ ဝင်ငွေတိုးတက်လာစေရန် ရည်ရွယ်ပြီး ချေးငွေနှင့် ထောက်ပံ့ငွေများ ပေးအပ်နေသည့် အဖွဲ့အစည်းဖြစ်ကြောင်း၊ ဝန်ဆောင်ခကိုမူ မြန်မာနိုင်ငံသာမက  IFAD ချေးငွေ ရယူသည့်နိုင်ငံတိုင်းမှ ပေးရခြင်းဖြစ်ကြောင်း ပြောကြားခဲ့သည်။

IFAD ၏ ချေးငွေဆိုင်ရာစည်းကမ်း သတ်မှတ်ချက်များအရ ဆိုင်းငံ့ကာလ ၁၀ နှစ်၊ ပြန်ဆပ်ကာလနှစ် ၃၀ ဖြစ်၍ စုစုပေါင်း ချေးငွေသက်တမ်းသည် နှစ် ၄၀ ဖြစ်ကြောင်း၊ အတိုးနှုန်းမှာ ၀ ရာခိုင်နှုန်းဖြစ်သော်လည်း ဝန်ဆောင်ခအဖြစ် တစ်နှစ်လျှင် ၀ ဒသမ ၇၅ ရာခိုင်နှုန်းကောက်ခံကြောင်း၊ အတိုးနှုန်း ၀ ရာခိုင် နှုန်းဖြစ်သော်လည်း ဝန်ဆောင်ခအဖြစ် တစ်နှစ်လျှင် ၀ ဒသမ ၇၅ ရာခိုင်နှုန်းဖြင့် တွက်ချက်ပြီး ထုတ်ယူသုံးစွဲထားသည့် ပမာဏအပေါ် IFAD ကို ပေးချေရမည်ဖြစ်ကြောင် ဒုတိယဝန်ကြီး ဦးမောင်မောင်ဝင်းက ပြောကြားခဲ့သည်။

လွှတ်တော်မှ အတည်ပြုပြီးပါက ချေးငွေစာချုပ်ချုပ်ဆိုရန် ညှိနှိုင်းခြင်း၊ စာချုပ်အသက်ဝင်ရန် ဆောင်ရွက်ခြင်း၊ ချေးငွေစီးဝင်မှုလမ်းကြောင်း သတ်မှတ်ခြင်း၊ ချေးငွေများကို မြန်မာကျပ်ငွေဖြင့်ဖြစ်စေ၊ အမေရိကန်ဒေါ်လာဖြင့်ဖြစ်စေ၊ သက်ဆိုင်ရာဌာနမှ ထုတ်ယူနိုင်ရန် စီစဉ်ပေးခြင်း၊ ချေးငွေထောက်ပံ့ငွေများကို စာရင်းခွဲခြားဖွင့်လှစ်ခြင်းစသည်တို့ကို သက်ဆိုင်ရာဝန်ကြီးဌာနနှင့် ညှိနှိုင်းပြီး ဆက်လက် ဆောင်ရွက်သွားမည်ဖြစ်ကြောင်း ဒုတိယဝန်ကြီး ဦးမောင်မောင်ဝင်းက ပြောကြားခဲ့သည်။