ရန်ကုန်မြို့ရှိ စက်မှုကုန်ထုတ်စက်ရုံလုပ်ငန်းတစ်ခုကို တွေ့ရစဉ် (ဓာတ်ပုံ-ပြည့်ဖြိုးအောင်)

၂၀၁၈ ခုနှစ် သြဂုတ်လ အာဆီယံနိုင်ငံများထုတ်လုပ်မှု PMI ညွှန်းကိန်း PMI (Manufacturing Purchasing Manager’s Index - ဝယ်ယူရေးမန်နေဂျာများ၏ အညွှန်းကိန်း)တွင် အဆင့်အနိမ့်ဆုံးနေရာတွင် မြန်မာနိုင်ငံ နှစ်လဆက်တိုက်ရှိပြီး နိုင်ငံခြားငွေလဲနှုန်း မြင့်တက်မှုဒဏ်ကြောင့် စရိတ်စက ဝန်ထုပ်ဝန်ပိုးဖိစီးလာကာ အပြင်းထန်ဆုံးငွေကြေးဖောင်းပွမှုကို ခံစားနေရကြောင်း Nikkei ၏ ပံ့ပိုးမှုဖြင့်ပြုလုပ်သော  IHS Markit စစ်တမ်းတွင် ဖော်ပြထားသည်။

၂၀၁၈ ခုနှစ် သြဂုတ်လအာဆီယံထုတ်လုပ်မှု PMI ညွှန်းကိန်းတွင် ဗီယက်နမ်နိုင်ငံက ၅၃ ဒသမ ၇၊ ဖိလစ်ပိုင်နိုင်ငံက ၅၁ ဒသ မ ၉၊ အင်ဒိုနီးရှားနိုင်ငံက ၅၁ ဒသမ ၉၊ မလေးရှားနိုင်ငံက ၅၁ ဒသမ ၂၊ ထိုင်းနိုင်ငံက ၄၉ ဒသမ ၉၊ စင်ကာပူနိုင်ငံက ၄၈ ဒသမ ၅၊ မြန်မာနိုင်ငံက  ၄၆ ဒသမ ၄ ရရှိခဲ့ပြီး စစ်တမ်း ကောက်ယူသည့်အာဆီယံနိုင်ငံ ခုနစ်နိုင်ငံတွင် မြန်မာနိုင်ငံက အောက်ဆုံးသို့ နှစ်လ ဆက်တိုက်ရောက်ရှိခဲ့ခြင်းဖြစ်သည်။

၂၀၁၈ ခုနှစ် မတ်၊ ဧပြီ အာဆီယံနိုင်ငံများ ထုတ်လုပ်မှု PMI ညွှန်းကိန်းတွင် နှစ်လဆက်တိုက် ထိပ်ဆုံး၌ရပ်တည်ခဲ့သော မြန်မာနိုင်ငံသည် စီးပွားရေး အရှိန်ပျော့လာခြင်းကြောင့် မေတွင် အဆင့်လေး၊ ဇွန်တွင် အဆင့်ခြောက်၊ ဇူလိုင်တွင် အဆင့်ခုနစ်၊ သြဂုတ်တွင် အဆင့်ခုနစ်နေရာအထိ ဆက်တိုက် ကျဆင်းခဲ့ခြင်းဖြစ်သည်။

ယခုစစ်တမ်းတွင်ပါဝင်သော နိုင်ငံပေါင်းခုနစ်နိုင်ငံအနက် လေးနိုင်ငံမှာ သြဂုတ်လအတွင်း ကုန်ထုတ်လုပ်ရေးအခြေအနေများ တိုးတက်လာသော်လည်း မြန်မာအပါအဝင် သုံးနိုင်ငံမှာ ကုန်ထုတ်လုပ်ရေးကဏ္ဍ အခြေအနေများကျဆင်းလာကြောင်း အချက်ပြနေသည်။ မြန်မာနိုင်ငံအနေဖြင့် ပြည်တွင်းငွေကြေးတန်ဖိုးသိသိသာသာ လျော့ကျနေသည့်အပြင် အပြင်းထန်ဆုံးငွေကြေးဖောင်းပွမှုကို မြင်တွေ့နေရသည်။

သြဂုတ်လ စစ်တမ်းဒေတာက မြန်မာနိုင်ငံ၏ထုတ်လုပ်ရေးကဏ္ဍတစ်ခုလုံး အခြေအနေများ အရှိန်ပြင်းစွာဖြင့် ဆုတ်ယုတ်လာကြောင်း အချက်ပြနေပြီး အဓိကအကျဆုံး အညွှန်းကိန်းကို ထုတ်လုပ်မှုနှင့် လုပ်ငန်းသစ်များ လျင်မြန်စွာကျဆင်းလာမှုက တွန်းချပစ်ခဲ့သည်။ အကျိုးဆက်အဖြစ် အလုပ်အကိုင်ခန့်ထားမှုများနှင့် လက်ကျန်အလုပ်များ ရှေ့ဆက်ကျဆင်းသွားပြီး ဝယ်ယူမှုများလည်း သိသာစွာလျော့ကျခဲ့သည်။ ထည့်သွင်းကုန် ဈေးနှုန်းများနှင့် ရောင်းဈေးများ နှစ်ရပ်စလုံးသည် စစ်တမ်းအတွင်း အမြင့်ဆုံးသို့ မြင့် တက်သွားကြပြီး အဓိကတွန်းအားမှာ ကုန်ကြမ်းပစ္စည်းများရှားပါးမှုနှင့် သွင်းကုန်ဈေးနှုန်းမြင့်မားမှုတို့ဖြစ်သည်။

သြဂုတ်လအတွက် နစ်ကေးမြန်မာ့ စက်မှုကုန်ထုတ်လုပ်ငန်း PMI အညွှန်းကိန်းမှာ ၄၆ ဒသမ ၄ သို့ကျဆင်းသွားပြီး ဇူလိုင်လရှိ ၄၇ ဒသမ ၉ ထက်ကျဆင်းခဲ့သည်။ သြဂုတ်လအညွှန်းကိန်းသည် ၂၀၁၅ ခုနှစ် ဒီဇင်ဘာတွင်စတင်ခဲ့သည့် စစ်တမ်းသက်တမ်းတစ်လျှောက် ကုန်စည်ထုတ်လုပ်ရေးကဏ္ဍတွင် အကြီးမားဆုံးကျဆင်းမှုကို အချက်ပြလိုက်ပြီး ပြင်းထန်သည့် ဆုတ်ယုတ်မှုက   ကုန်ထုတ်လုပ်မှုစွမ်းဆောင်နိုင်စွမ်း နှစ်လဆက်တိုက်ကျဆင်းလာခြင်းကိုပါ ထောက်ပြနေသည်။ ထုတ်လုပ်မှုကျဆင်းမှုနှုန်းမှာ စစ်တမ်းသမိုင်းအတွင်း အပြင်းထန်ဆုံးဖြစ်လာခဲ့ပြီး ထိုသို့ပြင်းထန်စွာ ကျဆင်းလာခဲ့ခြင်း မှာ ဝယ်သူများဖက်မှ ဝယ်လိုအားလျော့နည်းလာပြီး ကုန်ကြမ်းပစ္စည်းများရှာဖွေမှု ခက်ခဲလာခြင်းကြောင့်ဟု စစ်တမ်းတွင် ပါဝင်ဖြေဆိုသူအများစုက ဆိုသည်။

ယခုလပိုင်းများအတွင်း ကုန်ကြမ်း ပစ္စည်းရှားပါးလာမှုနှင့် ထည့်သွင်းကုန်များ စရိတ်စကမြင့်မားလာခြင်းတို့ကို တုံ့ပြန်သည့်အနေနှင့် ငွေကြေးဖောင်းပွမှုဖိအားပေးမှုများ ပိုပြင်းထန်လာခဲ့ပြီး ထည့်သွင်းကုန်ဈေးနှုန်းနှင့် ရောင်းဈေးနှစ်ခုစလုံးတို့၏ ငွေကြေးဖောင်းပွမှုမှာ စစ်တမ်း၏အမြင့်ဆုံးနေရာများကို တက်လှမ်းရယူထားကာ စစ်တမ်းတွင် ပါဝင်ဖြေကြးသူအများစုက မြင့် တက်လာသည့်စရိတ်များကို ဝယ်သူများထံသို့ လွှဲချပေးခဲ့မှုကြောင့် ဈေးနှုန်းများမြင့်တက်လာခဲ့သည်ဟု ညွှန်ပြကြသည်။