<

ကမ်းလွန်လုပ်ကွက် M9 နှင့် M11 တို့တွင် ထိုင်းနိုင်ငံမှ ရေနံနှင့်သဘာဝဓာတ်ငွေ့ တူးဖော်ရေးလုပ်ငန်း PTTEP က ရရှိထားပြီး လာမည့်နှစ်တွင် တူးဖော်ရေးလုပ်ငန်းများ ဆောင်ရွက်မည်

ရေနံနှင့် သဘာဝဓာတ်ငွေ့ တူးဖော်ရာတွင် အသုံးပြုသည့် တူးဖော်ရေး ရေယာဉ်တစ်စင်းအား တွေ့ရစဉ်

ကမ်းလွန်လုပ်ကွက် M9 နှင့် M11 မှာ မုတ္တမပင်လယ်ကွေ့အတွင်း တည်ရှိကာ ရေနံနှင့် သဘာဝဓာတ်ငွေ့ ရှာဖွေတူးဖော်ခြင်း လုပ်ငန်းများ ဆောင်ရွက်ရန်အတွက် နယ်ပယ်တိုင်းတာ ဆန်းစစ်ခြင်းဆိုင်ရာ လူထုတွေ့ဆုံပွဲကို သြဂုတ် ၂၉ ရက်က မြိတ်မြို့တွင် ပြုလုပ်ခဲ့ကြောင်း သိရသည်။ အဆို ပါစီမံကိန်းနေရာများမှာ ထားဝယ်မြို့မှ ကီလိုမီတာ ၂၅၀ နှင့် မြိတ်မြို့မှ ကီလိုမီတာ ၂၇၀ ကွာဝေးသည့် နေရာများတွင် တည်ရှိပြီး ၂၀၁၈ ခုနှစ်တွင် တူးဖော်ရေးလုပ်ငန်းများ လုပ်ဆောင်ရန်အတွက် လူထုတွေ့ဆုံပွဲ ပြုလုပ်ခဲ့ခြင်းဖြစ်ကြောင်း သိရသည်။ အဆိုပါတွေ့ဆုံပွဲသို့ တက်ရောက်လာသူ နည်းပါးပြီး ဌာနဆိုင်ရာဝန်ထမ်း အနည်းငယ်၊ အရပ်ဘက် အဖွဲ့အစည်းတချို့နှင့် ဖိတ်ကြားထားသူ တချို့သာ တက်ရောက်ခဲ့ကြောင်း သိရသည်။

“စီမံကိန်းက ထားဝယ်မြို့ကနေ ကီလိုမီတာ ၂၅၀၊ မြိတ်မြို့ကနေ ကီလိုမီတာ၂၇၀ လောက် ကွာဝေးပါတယ် စီမံကိန်းနှင့် ပတ်သက်ပြီး လုပ်ကွက် M11 မှာ တူးဖော်ရေးက ၂၀၁၈ ဖေဖော်ဝါရီလနောက်ပိုင်းမှာ လုပ်ပါမယ် M9 ကိုတော့ တူးဖော်ရေးလုပ်ငန်းကို ၂၀၁၈ အောက်တိုဘာလမှာ လုပ်ပါ့မယ် ရင်းနှီးမြုပ်နှံမှုနှင့် ပတ်သက်ပြီး တစ်ခုနှင့်တစ်ခု မတူပါဘူး။ တူးဖော်ရေး လုပ်ငန်းအတွက် ရင်းနှီးမြုပ်နှံမှုတစ်ခု၊ စီမံကိန်း တစ်ခုလုံးအတွက် ရင်းနှီးမြုပ်နှံမှုက တစ်ခုပါ နိုင်ငံတော်က တူးဖော်ရေး လုပ်ငန်းတွေမှာ ပါတာမဟုတ်ဘဲနှင့် M9 နှင့် M11 အစိတ်အပိုင်းတွေက ဇောတိက စီမံကိန်းကြီးမှာပါပြီး ကျွန်တော်ပြောခဲ့သလိုပဲ နိုင်ငံတော်က အကျိုးမြတ် ရာခိုင်းနှုန်း ၂၀ ရရှိမှာ ဖြစ်ပါတယ် M9 က ၂၀၀၃ ခုနှစ်နှင့် M11 က၂၀၀၅ ခုနှစ်မှာ စာချုပ်ချုပ်ဆိုပြီး MIC ကနေ ခွင့်ပြုချက်ရရှိပြီး ရင်းနှီးမြှုပ်နှံမှု လုပ်နေတာ ဖြစ်ပါတယ်။ အခုလုပ်မယ့် နေရာကတော့ သဘာဝဓာတ်ငွေ့တွေ့တဲ့ ဒေသဖြစ်တယ်။ ရေနံတွေ့ရင်လည်း ရေနံတူးဖော်သွားမှာပါ” ဟု မြန်မာ့ရေနံနှင့် သဘာဝဓာတ်ငွေ့လုပ်ငန်း MOGE မှ ကိုယ်စားလှယ် ဦးနေအောင်က ပြောကြားသည်။

တက်ရောက်လာသူများမှာ ငါးဖမ်းလုပ်ငန်းကွက်နှင့် လွတ်ကင်းမှု ရှိ၊ မရှိ၊ စမ်းသပ်တူးဖော်ခြင်းလုပ်မည့် ကာလမှာ ငါးဖမ်းရာသီအတွင်း ကျရောက်နေသည့်အတွက် ရေလုပ်ငန်းများ နှောင့်နှေးနိုင်မှု ရှိ၊ မရှိ ဒေသခံများအတွက် လျှပ်စစ်မီးနှင့် ပတ်သက်သည့် ဆောင်ရွက်ပေးနိုင်မည့် အနေအထား၊ သဘာဝ ပတ်ဝန်းကျင် ပျက်စီးနိုင်မှု အနေထားများကို မေးမြန်းဆွေးနွေးခဲ့ပြီး ကျွန်းစုဒေသခံများကိုလည်း တွေ့ဆုံပြီး ဒေသဖွံ့ဖြိုးရေး လုပ်ငန်းများကို  ပွင့်လင်းမြင်သာစွာ ပြောကြားသင့်ကြောင်း အကြံပြု ဆွေးနွေးခဲ့ကြကြောင်း သိရသည်။

ထိုင်းနိုင်ငံမှ PTTEP ကုမ္ပဏီမှာ PTT ရေနံရှာဖွေရေးနှင့် ထုတ်လုပ်ရေး အများပိုင်ကုမ္ပဏီ လက်အောက်ခံဖြစ်ပြီး ထိုင်းနိုင်ငံသို့ ရေနံနှင့်သဘာဝဓာတ်ငွေ့ စဉ်ဆက်မပြတ် ပို့လွှတ်နိုင်ရန် လုပ်ဆောင်နေသည့် ကုမ္ပဏီဖြစ်ကြောင်း သိရသည်။ လက်ရှိတွင် ရေနံနှင့်သဘာဝဓာတ်ငွေ့ ရှာဖွေထုတ်လုပ်ရေးလုပ်ကွက် ခုနစ်ခုတွင် လုပ်ငန်းများ ဆောင်ရွက်နေပြီး M9 နှင့် M11 လုပ်ကွက်တို့တွင် လုပ်ပိုင်ခွင့်ရထားကြောင်း သိရသည်။

PTTEP အနေဖြင့် M9 လုပ်ကွက်တွင် အကဲဖြတ်တွင်းနှင့် ရှာဖွေရေးတွင်း စုစုပေါင်း ၁၂ တွင်း တူးဖော်မည်ဖြစ်ပြီး M11 လုပ်ကွက်တွင် ရှာဖွေရေးတွင်း နှစ်တွင်းတူးဖော်သွားမည် ဖြစ်ကြောင်း သိရသည်။ မုတ္တမပင်လယ်ကွေ့ အတွင်းရှိ အဆိုပါ လုပ်ကွက်များမှာ ရန်ကုန်မြို့မှ ကီလိုမီတာ ၃၀၀ ကျော် ကွာဝေးပြီး မြန်မာနိုင်ငံမှာ PTTEP အတွက် အရှေ့တောင်အာရှတွင် ပထမဆုံး နိုင်ငံတကာ စွန့်စားရသည့် စီးပွားရေးလုပ်ငန်း ဖြစ်ကြောင်း ပြောဆိုထားခဲ့သည်။

 

August 29, 2017














Copy Protected by Chetan's WP-Copyprotect.