မြိတ်ကျွန်းစုအတွင်းရှိ ပုလဲမွေးမြူရေး လုပ်ငန်းတစ်ခုကို တွေ့ရစဉ်
မြိတ်ကျွန်းစုအတွင်း ပုလဲထုတ်လုပ်နိုင်မှုမှာ ပထမခြောက်လအတွင်း လျာထားချက်ထက် ပိုမိုထုတ်လုပ်ထားနိုင်ပြီး ဈေးကွက်ထိုးဖောက်မှုများလည်း လုပ်ဆောင်နေကြောင်း မြန်မာ့ပုလဲထုတ်လုပ်ရေးနှင့် ရောင်းဝယ်ရေးမှ သိရသည်။
၂၀၁၈ ခုနှစ် ဧပြီမှ စက်တင်ဘာအထိ ခြောက်လတာဘဏ္ဍာရေးနှစ်တွင် နိုင်ငံပိုင် ပုလဲကျွန်းနှင့် ပြည်တွင်း/ပြည်ပကုမ္ပဏီများမှ ပုလဲထုတ်လုပ်မှုမှာ လျာထားချက်ထက် ပြည့်မီကျော်လွန်နေပြီဖြစ်ပြီး အာရှအဆင့်မှ အမေရိကန်နိုင်ငံအထိ ဈေးကွက်ထိုးဖောက်ရန် ဆောင်ရွက်နေကာ ပုလဲရောင်းချပွဲများကိုလည်း တစ်နှစ်လျှင် သုံးကြိမ်ဆောင်ရွက်နေကြောင်း သိရသည်။
“၂၀၁၈ ခုနှစ် ဧပြီမှ စက်တင်ဘာအထိ ခြောက်လဘဏ္ဍာရေးနှစ်မှာ နိုင်ငံပိုင် ပုလဲကျွန်းနှင့် ပြည်တွင်း/ပြည်ပကုမ္ပဏီတွေရဲ့ ပုလဲထုတ်လုပ်မှု လျာထားချက်က ၆၄၀၀၀ မိုမီဖြစ်ပါတယ်။ ထုတ်လုပ်နိုင်မှု အနေနဲ့ကတော့ ၉၁၇၆၂ ဒသမ ၈၇ မိုမီကို လက်ရှိအချိန်အထိ ရရှိထားပြီး ဖြစ်ပါတယ်။ ၂၀၁၈ အောက်တိုဘာကနေ ၂၀၁၉ စက်တင်ဘာအထိ ၁၂ လဘဏ္ဍာရေးနှစ်အတွက် ပုလဲထုတ်လုပ်မှု လျာထားချက်ကတော့ ၃၈၇၀၀၀ မိုမီဖြစ်ပါတယ်။ နိုင်ငံပိုင်ပုလဲတွေကို တစ်နှစ်ကို ပြည်တွင်းမှာ နိုင်ငံခြားငွေယူရိုနှင့် တစ်ကြိမ်၊ မြန်မာကျပ်ငွေနှင့် တစ်ကြိမ်ရောင်းပါတယ်။ ပြည်ပမှာ နိုင်ငံခြားငွေ အမေရိကန်ဒေါ်လာနှင့် တစ်ကြိမ် စုစုပေါင်း သုံးကြိမ် ရောင်းချပေးပါတယ်” ဟု မြန်မာ့ပုလဲထုတ်လုပ်ရေးနှင့် ရောင်းဝယ်ရေးဌာနမှ ဒုတိယအထွေထွေ မန်နေဂျာဦးမျိုးလွင်က ပြောကြားသည်။
ပြီးခဲ့သည့် ၂၀၁၆ ခုနှစ်မှ ၂၀၁၈ ခုနှစ်အထိ ပုလဲအတွဲပေါင်း ၁၅၆၁ တွဲ၊ ပုလဲအလုံးရေ ၄၃၁၈၁၁၊ ပုလဲမိုမီ ၂၉၁၂၆၀၇ ဒသမ ၆၅၊ ရောင်းချခဲ့ရပြီး ယူရိုငွေ ၆၇၈၈၂၁၂၊ အမေရိကန်ဒေါ်လာ ၁၃၁၁၅၈၇၂ နှင့် ကျပ်ငွေ ၁၇၄၄၃၉၉၉၉၈ ရရှိထားပြီးဖြစ်ကြောင်း သိရသည်။
“ပြီးခဲ့တဲ့ဇွန်လက ပြုလုပ်ခဲ့တဲ့ Emporium ပွဲမှာ ရောင်းချခဲ့ရတာကို ပေါင်းပြီးတင်ပြတာပါ။ ဟောင်ကောင်ပုလဲပြပွဲကို ခြောက်ကြိမ်မြောက် သွားရောက် ရောင်းချခဲ့ပြီးပါပြီ။ ဈေးကွက်ထိုးဖောက်မှု အနေနဲ့ကတော့ အမေရိကန်နိုင်ငံ Las Vegas မြို့မှာ၂၀၁၇ ဇွန်မှာ သွားပြီး ရောင်းချခဲ့ပြီးပါပြီ။ နိုင်ငံပိုင်ပုလဲကျွန်းစခန်းနှင့် ပြည်တွင်း/ပြည်ပကုမ္ပဏီ ၁၁ ခု၊ စုစုပေါင်း ၁၂ ခုအနေနဲ့ တိုးချဲ့ဧရိယာ အပါအဝင် လက်ရှိကျွန်း ၁၅ ကျွန်းမှာ အလုပ်လုပ်နေပါတယ်။ ပုဂ္ဂလိကပိုင်းအနေနဲ့ ပြောရမယ်ဆိုရင် ကျွန်တော်တို့က အရင်တုန်းက ပြည်တွင်း ကုမ္ပဏီ နှစ်ခုနဲ့ ပြည်ပကုမ္ပဏီ သုံးခုလောက်ပဲ ပုလဲလုပ်ငန်း လုပ်ပါတယ်။ အခုဆိုရင် ပြည်တွင်းကုမ္ပဏီ ခုနစ်ခု၊ ပြည်ပကုမ္ပဏီ လေးခု စုစုပေါင်း ၁၁ ခုနဲ့ ပုလဲမွေးမြူရေး ဆောင်ရွက်နေပါတယ်” ဟု ဦးမျိုးလွင်က ပြောကြားသည်။
တနင်္သာရီတိုင်းဒေသကြီးတွင် ပုလဲမွေးမြူရေးလုပ်ငန်းကို မြိတ်ကျွန်းစုအတွင်း၌သာ လုပ်ကိုင်နိုင်ပြီး မြိတ်ခရိုင်တွင် မြန်မာတာဆာကီကုမ္ပဏီ (ပြည်ပ) ဒိုမယ်ကျွန်း၊ မြန်မာအတ္တလန်တစ်ကုမ္ပဏီ (ပြည်ပ) ဒုံးပုလဲအော်ကျွန်း၊ အဏ္ဏဝါပုလဲကုမ္ပဏီ (ပြည်တွင်း) နတ်သမီး ရေတွင်းကျွန်းနှင့် ဆက်စပ်ဧရိယာ၊ ပြည်ဖြိုးထွန်းကုမ္ပဏီ (ပြည်တွင်း) ပြင်စဘုကျွန်းနှင့် အာကွာဂိုးလ်မြန်မာကုမ္ပဏီ(ပြည်တွင်း)မလိကျွန်းတို့ မွေးမြူနေကာ ကော့သောင်းခရိုင်တွင် နိုင်ငံပိုင်ပုလဲကျွန်း၊ နီနိုကုမ္ပဏီ (ပြည်တွင်း) မန်ကျည်းပင်ဆောင်ကျွန်း၊ အရှေ့တိုင်းပုလဲ ကုမ္ပဏီ(ဇင်ယော်) (ပြည်တွင်း) ဇင်ယော်ကျွန်း၊ အရှေ့တိုင်းပုလဲကုမ္ပဏီ (ဂျလန်း)(ပြည်တွင်း) ဂျလန်းကျွန်း၊ ပြည့်စုံထက်မြင့်ကုမ္ပဏီ (ပြည်တွင်း) ငလုံးလက်ဖယ်ကျွန်း၊ မြန်မာအက်ဒမန် ကုမ္ပဏီ(ပြည်ပ)စိန့်လုခ်ကျွန်း မျောက်နီ/ မျောက်ဖြူကျွန်း၊ ဘဲပါးလ်ကုမ္ပဏီ(ပြည်ပ) ရွှေကျွန်းတို့တွင် ပုလဲမွေးမြူရေးလုပ်ငန်းများ လုပ်ကိုင်နေကြောင်း သိရသည်။
